སྨོན་ལམ་བོད་ཀྱི་ཐུན་མོང་སྐད་གདངས་མཉེན་ཆས་ལས་སྐྱེ་གནས་རྣམ་བཤད་ལ་བགྲོ་གླེང་གནང་རོགས་ཞེས་ཁོང་གིས་བོད་རིགས་ཤེས་ལྡན་པ་རྣམས་ལ་འབོད་སྐུལ་གནང་སོང་།
ཡི་གེ་སོ་སོའི་སྐྱེ་གནས་དང་། བྱེད་པ། བརྗོད་ཚུལ། ཕོ་མོ་མ་ནིང་སོགས་གང་དུ་གཏོགས་པ་བཅས་ཀྱི་ངོས་འདི་ནི་ས་སྐྱ་བསོད་ནམས་རྩེ་མོའི་ཡི་གེའི་བཀླག་ཐབས་བྱིས་པ་བདེ་བླག་ཏུ་འཇུག་པའི་སྒོ་དང་། གསེར་ཏོག་སུམ་རྟགས་ཀྱི་སྐྱེ་གནས་དང་སྒྲ་གདངས་གཞིར་བཞག་སྟེ། རང་ཉིད་ཀྱིས་ཀྱང་དཔག་ཚོད་ཀྱིས་ཡི་གེ་རྣམས་མགྲིན་པ་དང་རྐན་སོགས་སྐྱེ་གནས་གང་ཡིན་དང་། ལྕེ་དང་སོ་སོགས་ཀྱི་བྱེད་པ་གང་ལ་བརྟེན་པ། སྒྲ་གདངས་དྲག་ཞན་གང་དུ་གཏོགས་པ་སོགས་ལ་བརྟགས་དཔྱད་གཟབ་ནན་བྱས་པ་དང་། ཉེ་འཁོར་གྱི་ཤེས་ལྡན་པ་རྣམས་ལ་གྲོས་བསྡུར་ཡང་ཡང་བྱས་ཏེ། མགོ་འདོགས་ཅན་རྣམས་ལ་ཡང་སྒྲ་གདངས་དང་སྐྱེ་གནས་སོགས་གཏན་འཁེལ་བྱེད་ཐབས་བྱས་ཡོད། འོན་ཀྱང་དེ་སྔ་སུས་ཀྱང་རྣམ་བཞག་ཆ་ཚང་ཞིག་གཏན་འཁེལ་བྱས་མ་མྱོང་སྟབས་དཔྱད་གཞི་ཧ་ཅང་ཉུང་བ་དང་། ཁོ་བོ་ལ་སྐྱེས་སྦྱང་གི་ཤེས་རབ་ཞན་པས་གནད་འགག་ཧ་ཅང་ཆེ་བའི་གནས་འདི་འདྲ་ལ་ནོར་འཕྱུག་དང་། ཆད་ལྷག་ནོར་སྐྱོན་ཅིས་ཀྱང་ཡོད་ངེས་པ་དང་། སྤྱིར་བོད་ཀྱི་སྐད་ཡིག་འཕེལ་རྒྱས་ཀྱི་རང་བཞིན་ལ་ཕན་པའི་མཁྱེན་ལྡན་མཁས་དབང་རྣམས་པས་འདིའི་སྐོར་ལ་དགོངས་ཚུལ་ལྷུག་བརྗོད་ཡོང་བའི་རེ་བ་ཆེ། སྐུ་ཉིད་ནས་གཤམ་གྱི་ཁ་བྱང་ཐོག་ནས་སྐྱེ་གནས་རྣམ་བཤད་ཡིག་ཆ་ཕབས་ལེན་གནང་རོགས་ཞུ། དགོངས་ཚུལ་གང་ཡོད་ཟིན་བྲིས་ཐོག་འགོད་པའམ་ཡང་ན་ཡིག་ཆ་ནང་དུ་ཡོད་པའི་མྱུར་འཕྲིན་ཁ་བྱང་ཐོག་སྤྱི་ཟླ་བཅུ་གཉིས་སྔོན་ལ་གནང་དགོས། སྤྱི་ཟླ་བཅུ་གཉིས་པའི་རྗེས་ནས་ལས་རིམ་མཇུག་བསྡུ་རྒྱུ་ཡིན། ཞེས་ཁོང་གིས་གསལ་བསྒྲགས་གནང་བྱུང་།
