བོད། ང་རང་བོད་པ་ཞིག་ཨེ་རེད། བོད། ང་རང་བོད་མི་ཞིག་ཡིན་ནམ། བོད། ང་རང་བོད་དོན་ལ་སེམས་འཁུར་ཡོད་མཁན་ཞིག་རེད་དམ། བོད་ནས་ཡོང་དུས་ཀྱི་བོད་པ་ཞིག་བོད་ཡུལ་དང་གྱེས་དེ་ལོ་མང་འགོར་བའི་དེ་རིང་། ཁོ་བོས་རང་ཉིད་ལ་བོད་པ་ཟེར་བའི་མིང་དོན་ཚང་མིན་བསམ་བློ་མང་བོ་ཞིག་ཉིན་མཚན་མེད་པར་བཏང་དུས། ཐོག་མོར་གང་འདྲ་ཞིག་ལ་བོད་པ་ཟེར་དགོས་པ་དང་བོད་པ་ཟེར་བ་དེ་ལ་ཆ་རྐྱེན་གང་འདྲ་ཞིག་ཚང་དགོས་མིན། བོད་པ་ཟེར་བ་དེ་ལ་ཐུན་མོང་མ་ཡིན་པའི་གོམ་གཤིས་ཇི་འདྲ་ཞིག་ཡོད་མེད་བཅས་སུ་བསམ་བློ་གཏོང་ཞོར་དུ་ཁོ་རང་ཉིན་གང་བོར་ལས་ཀ་བྱས་སྟབས། འདང་རྒྱག་ཞོར་དུ་གཉིད་དུ་ཤོར་སོང་།
ཁོ་རང་ཉལ་བས་རྨི་ལམ་ནང་དུ་ཡང་བོད་ཟེར་ན་ག་འདྲ་ཞིག་རེད་ཟེར་ནས་བསྐྱར་ཟློས་བྱེད་བཞིན་ཡོད་སྐབས། ཁོ་རང་གི་ལས་ཀ་བྱེད་སའི་ཟ་ཁང་ནང་དུ་བོད་དོན་རྩ་གཅོད་བྱེད་མཁན་གྱི་ཕྱི་རྒྱལ་མགོ་སེར་ཞིག་དང་ལྷན་དུ་བོད་ཀྱི་ཕོ་གསར་སྐྲ་རིང་ཁ་ཤས་ཤིག་གི་བོད་དོན་བསྐོར་གླེང་མོལ་བྱེད་པ་མཐོང་ནས། ཁོ་རང་གིས་ཡ་འཚར་དང་བཅས་དེ་ཁོང་ཚོས་ཕྱོགས་སུ་རྣ་བ་གཏད་དེ་ཉན། ཕྱི་རྒྱལ་བ་དེས་བོད་ཟེར་བ་འདི་ག་དུས་ནས་རང་བཙན་ཤོར་བ་རེད། བོད་ཟེར་བའི་རྒྱལ་ཁབ་འདི་རང་བཙན་གཙང་མའི་རྒྱལ་ཁབ་ཞིག་ཡིན་པར་འཛམ་གླིང་གི་རྒྱབ་ཁབ་སུ་ཞིག་གིས་ངོས་འཛིན་བྱས་པ་དང་རྒྱབ་སྐྱོར་རེག་ཡོད་པ་རེད་ཅེས་དྲིས་དུས། ཕོ་གསར་ཞིག་གིས་དེ་ནི་ང་ཚོས་གསལ་བཤད་བྱེད་དགོས་པ་ཞིག་མ་རེད། ཁྱེད་ཀྱིས་ང་ཚོས་བོད་ཀྱི་ལོ་རྒྱུས་ཀློག་དང་ཤེས་ངེས་རེད། དེ་མིན་ང་ཚོས་ཁྱེད་རང་ལ་བཤད་ཐུབ་པ་ཞིག་མ་རེད་ཟེར་བཞིན་འགོ་ཕྱི་ལ་བརྗེ་ཞོར་དུ་རྒྱབ་ལོག་གི་ཞབས་ཞུ་བ་ཞིག་ལ་འོ་ཇ་ཞིག་བསྔགས་ནས་ཕྱི་རྒྱལ་བ་དེས་གདོང་ལ་བལྟས་དེ་ཅི་ཞིག་བཤད་ཡོང་བར་རེ་སྒུག་བྱས། ཕྱི་རྒྱལ་བ་དེས་འོ་ན་ཁྱེད་ཀྱིས་རང་གི་རྒྱལ་ཁབ་ཀྱི་ལོ་རྒྱུས་ཤེས་ཀྱི་ཨེ་ཡོད། ཁྱེད་རང་གིས་བོད་ཀྱི་ལོ་རྒྱུས་སྤྱོང་མྱོང་ཡོད་དམ། ཨ་ལེ་ཟེར་ཞོར་ཞབས་ཞུ་བས་འཁུར་ཡོང་བས་འོ་ཇ་དེ་ལེན་ཞོར་དུ། རེད་ངས་ལོ་རྒྱུས་སྤྱོང་མྱོང་མེད་ལ། ང་རང་ལོ་རྒྱུས་སྤྱོང་རྒྱུར་ཡང་དགའ་བོ་མེད། ད་དུང་ང་རང་བོད་ཡིག་གི་་ཆུ་ཚད་ཧ་ཅང་སྐྱོ་བོ་ཡོད། བོད་ཀྱི་ལོ་རྒྱུས་སྤྱོང་བ་ལ་བོད་ཡིག་ལེགས་པོ་ཞིག་ཤེས་དགོས་སྟབས། ང་རང་བོད་ཡིག་ལས་དབྱིན་ཡིག་སྤྱོང་རྒྱུར་དགའ་བ་ནས་བོད་ཡིག་ལས་དབྱིན་ཡིག་ཤེས་ན་ཆ་རྐྱེན་མང་བོ་ཞིག་རེག་གི་འདུག དཔེར་ན་ང་རང་གི་བོད་དོན་བསྐོར་གྱི་གནས་ཚུལ་ཞིག་ཁྱེད་རང་ལྟ་བུས་ཕྱི་རྒྱལ་བ་ཚོ་བཤད་དགོས་བྱུང་ན་བོད་ཡིག་ཤེས་པ་ཙམ་གྱིས་ངས་ཁྱེད་རང་ལ་བོད་དོན་བསྐོར་འགྲེལ་བཤད་བྱེད་ཐུབ་ཀྱི་མེད་པ་ལྟ་བུ་རེད། དེ་རིང་ངས་དབྱིན་ཡིག་ཅུང་ཙམ་ཤེས་པའི་གྲུབ་འབྲས་ལ་བརྟེན་ནས་ང་རང་ལ་བོད་དོན་བཤད་སའི་ཁྱེད་རང་ལྟ་བུས་ཕྱི་རྒྱལ་གྱི་རོགས་ཚོགས་བྱེད་མཁན་དང་ཐུག་འཕྲད་བྱུང་ཡོད་པ་འདི་རེད་བཅས་དོན་མེད་རྙོག་གཏམ་མང་བོ་ཞིག་བཤད་མཐར། ཕྱི་རྒྱལ་བ་དེ་ཐང་ཆད་པའི་རྣམ་པ་དང་བཅས་དེ། ལགས་སོ། ལགས་སོ། འོ་ན། ཁ་སང་ཁྱེད་ཅག་གིས་དབུ་ཁྲིད་༧གོང་ས་མཚོག་གིས་བཅར་འདྲི་ཞིག་གི་སྟེང་དུ་བོད་དོན་ཐག་གཅོད་བྱེད་པའི་མཐའ་མའི་དབང་ཚད་བོད་མི་མང་ལ་ཡོད་པ་ལས་ཁོང་ལ་གཏན་ནས་མེད་གསུང་སོང་། ཁྱེད་རང་གི་བལྟས་ན་བོད་དོན་ཐག་གཅོད་ག་འདྲ་ཞིག་བྱས་ན་ཡག་ས་རེད་ཟེར་སླར་ཡང་དྲི་བ་ཞིག་བཀོད། ཕོ་གསར་དེས་རང་ཉིད་ལ་ཡིད་ཆེས་ཡོད་འདོག་གིས་དེ་འདྲ་ཞིག་ཡིན་རྒྱུ་མ་རེད། དེ་ཕལ་ཆེར་ཁྱེད་རང་གི་གོ་ནོར་ཐེབས་པ་ཡིན་རྒྱུ་རེད། ང་ཚོ་བོད་མི་ཚང་གི་སྐྱིད་སྡུག་ཡོད་ཚད་༧གོང་ས་ཆོག་ལས་གཞན་སུ་གང་གིས་ཐག་གཅོད་བྱེད་ཐུབ་ཀྱི་མེད་ལ། ང་རང་ལ་དམིགས་གསལ་གྱི་བོད་དོན་ཐག་གཅོད་བྱེད་ཕྱོགས་བསྐོར་གྱི་བསམ་བློ་དེ་འདྲ་འཁོར་མྱོང་མེད་ཅེས་ལན་བརྒྱབ་དུས། ཕྱི་རྒྱལ་བས་ཁྱེད་རང་བོད་དོན་དུ་སེམས་ཤུགས་ཡོད་པ་དངོས་ནས་ཡག་པོ་རེད་ཅེས་ནམ་རྒྱུན་མི་རིག་ཚད་ལ་ཁ་ཡག་བཤད་པར་གོམ་པའི་ནུབ་གླིང་གི་གཤིས་ཀ་དེས་བསྟན། སྐབས་དེར་ཕོ་གསར་གཞན་ཞིག་གིས་དེ་དག་ལ་འགན་འཁུར་མཁན་བོད་གཞུང་དང་བཀའ་བློན་ཁྲི་བ་སོགས་ཡོད་ལ། བོད་མི་དམངས་སྤྱི་འཐུས་ལྷན་ཚོགས་སོགས་ཀྱང་ཡོད་སྟབས། ང་ཚོ་དེའི་ཐད་དུ་ཇུས་འདོག་ཡོད་མ་རེད། དེ་ལས་དོ་ནུབ་ང་ཚོས་མཚན་ཚོགས་ཀྱི་བསྐོར་ཞིག་གྲོས་བྱེད་ཅེས་སྤོབས་ཉམས་དང་བཅས་དེ་བཤད། ཕོ་གསར་གཞན་ཞིག་གིས་ང་ཚོས་མུ་མཐུད་དུ་བོད་དོན་གླེང་།
་་་ཏུ་རུ་རུ་་་་ དུས་ཚོད་ཀྱི་ཅོང་སྒྲ་གྲགས་ཤིང་། རྡ་སའི་ཁོར་ཡུག་གི་རྣམ་པ་ནི་སྔར་བཞིན་རེད་འདུག་ལ། ཁོ་རང་ཡང་འདོད་ལ་མི་འདོད་ངང་ཡར་བླངས་དེ། བོད་ཟེར་ན་ག་འདྲ་ཞིག་རེད་ཟེར་བའི་མིང་ཚིགས་དེ་དྲན་ཞོར་དུ། ལས་ཀ་བྱེད་སའི་ཟ་ཁང་ཕྱོགས་སུ་བྱིན་སོང་།
