གླེན་པའི་གླེན་པ་གླེང་བ། གཉིས་པ།

རང་གི་བྲིས་པ་བདེན་གཏམ་ཡིན་ཞེས་བསྒྲགས།།
གཞན་གྱི་བྲིས་པ་བདེན་དོན་མི་འདུག་ཞེས།།
གདོང་དུ་གཏད་ནས་གླེང་བ་མེད་ན་ཡང་།།
ཚིགས་ཀྱི་ཟུར་ནས་དེ་ལྟར་བཤད་པ་དེས།།
གླེན་པའི་གླེན་པ་བཤད་པའི་སྙིང་གཏམ་ལ།།
ཁྱེད་ཀྱིས་ཉམ་ནོར་བྱས་པ་མིན་འགྲོ་སྙམ།།
དེ་འདྲ་ཡིན་ན་སླར་ཡང་ཐེངས་ཤིག་ཉོན།།
གླེན་པའི་གླེན་པར་ཡང་བསྐྱར་གཏམ་ཞིག་བཤད།།
གཏམ་འདི་གོ་ན་གྲོགས་པོའི་བསམ་ཚུལ་ཡིན།།
མ་གོ་བཏང་ན་གྲོགས་ལ་ནག་ཉེས་མ་འཛུགས་ཤིག།
ང་དང་བཅས་པའི་བོད་ཀྱི་མི་དམངས་འདིས།།
༧གོང་ས་མཆོག་ལ་བཅོལ་བའི་རེ་བ་ལས།།
རང་གི་རྐ་ལག་འགུལ་བསྐྱོད་མི་བྱེད་ལ།།
བྱེད་མཁན་བྱུང་ན་དེ་ལ་དམའ་འབེབས་དང་།།
དེའི་གང་འཇོན་དེ་ཡི་ཅི་ཤེས་སོགས།།
ལམ་ནས་འགོག་པར་རྩོམ་ལས་དེ་ཉིད་ལ།།
རྒྱབ་སྐྱོར་བྱེད་པའི་གོམ་སྲོལ་བོད་ལ་མེད།།
ལྷག་དུ་བོད་པ་ཚང་གི་མི་དམངས་འདིས།།
སྔ་ཕྱི་ཡོད་ཚད་༧གོང་ས་མཆོག་ཉིད་ལས།།
གཞན་པའི་མི་ཡིས་བྱེད་ཐུབ་མེད་པར་གླེང་བ་དེས།།
༧གོང་ས་མཆོག་ལ་དཀའ་ངལ་འཕར་མ་བཟོས།།
ནང་གི་མཐུན་སྒྲིལ་ཕྱོགས་ལ་གཏོར་བཤིག་ཐེབས།།
རང་གི་རིགས་ཀྱི་དགེ་ཕྱོགས་མ་མཐོང་བ།།
རང་གི་རིགས་ལ་སྐྱོན་ཆ་འཚོལ་བར་དགའ།།
འདི་འདྲའི་མི་རིགས་མིང་ལ་བོད་པ་ཟེར།།
དེའི་ཁྲོད་ཀྱི་གླེན་པ་ཁྱེད་དང་ངེད་གཉིས་ཡང་།།
མི་རིགས་འདི་ཡི་རུས་རྒྱུད་མ་ཡིན་ནམ།།
ཡིན་ན་རང་ནོར་ལྡོག་ཤེས་བྱེད་པའི་དུས་ལ་སླེབས།།