ཤེས་རིག་ལས་ཁུངས་ཀྱིས་བཙན་བྱོལ་བོད་མིའི་སྤྱི་ཚོགས་ནང་ཆེད་ལས་སློབ་ཐོན་གནས་ཚུལ་རྟོགས་ཞིབ་ཀྱི་ལས་གཞི་དང་འབྲེལ་བའི་འབོད་བསྐུལ་གསལ་བསྒྲགས་ཤིག་སྤེལ་ཏེ། བོད་མིའི་ཆེད་ལས་སློབ་ཐོན་པ་རྣམས་ཀྱི་གནས་ཚུལ་རྟོགས་ཞིབ་ཐད་ཚང་མས་མཐུན་འགྱུར་གནང་རོགས་ཟེར།
ཤེས་རིག་ལས་ཁུངས་ཀྱི་གསལ་བསྒྲགས་ནི་གཤམ་གསལ་ལྟར་བཀོད་འདུག ༄༅།། ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་དམར་གྱིས་བཙན་བཟུང་བྱས་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་བོད་མི་འབུམ་ལ་ཉེ་བ་རྒྱ་གར་དང་ཁྱིམ་མཚེས་རྒྱལ་ཁབ་ནང་སྐྱབས་བཅོལ་དུ་འབྱོར་ནས་མི་ལོ་ལྔ་བཅུ་འཁོར་ལ་ཉེ་ཞིང༌། དུས་ཡུན་དེའི་རིང་༧གོང་ས་༧སྐྱབས་མགོན་ཆེན་པོའི་དབུ་འཁྲིད་ལམ་སྟོན་འོག་སྐྱབས་བཅོལ་ལ་འབྱོར་བ་ནས་བཟུང་བོད་ཕྲུག་ཚོར་འདབ་ཤོག་གཉིས་ལྡན་གྱི་ཤེས་ཡོན་མཁོ་སྤྲོད་ཞུ་རྒྱུ་དེ་བཞིན་གལ་འགངས་ཆེ་ཤོས་ཤིག་ལ་ངོས་འཛིན་གྱིས་ཐོག་མར་མ་སུ་རི་སློབ་གྲ་གསར་བཙུགས་གནང༌། རིམ་བཞིན་རྒྱ་བལ་འབྲུག་གསུམ་བོད་མིའི་སྡོད་སྒར་སོགས་ཀྱི་ནང་གཏན་ཉིན་སློབ་གྲྭ་རྒྱ་བསྐྱེད་དང་དེ་བཞིན་ཕྱི་རྒྱལ་ཡུལ་གྲུ་ཁག་ལ་ཤེས་ཡོན་སྦྱོང་བརྡར་ཆེད་བོད་ཕྲུག་ཆེད་རྫོང་བྱེད་རྒྱུ་སོགས་ཤེས་ཡོན་ཡར་རྒྱས་གཏོང་ཐབས་འབྲེལ་ཡོད་ཚང་མས་ཐབས་ཤེས་འབད་བརྩོན་གནང་འབྲས་སུ་སྤྱི་ཡོངས་ཀྱི་ཆ་ནས་གྲུབ་འབྲས་ཀྱང་ཧ་ཅང་ཆེན་པོ་སོན་ཡོད་པ་ཚང་མས་མཐོང་ཆོས་སུ་ཡོད་ནའང༌། ད་བར་བོད་ཕྲུག་ཇི་ཙམ་ཞིག་གིས་ཤེས་ཡོན་སྡེ་ཚན་གང་ཞིག་དང༌། གཞན་ལས་རིགས་འདྲ་མིན་སོགས་ཀྱི་ནང་སློབ་གཉེར་མཐར་ཕྱིན་གནང་པའི་གྲངས་ཐོ་ཐར་ཐོར་ཙམ་ལས་མེད་པ། ལྷག་པར་བོད་ཕྲུག་སློབ་ཐོན་ནས་ཁྱད་ལས་ཇི་ཡོད་ཀྱི་གྲངས་ཐོ་ཆ་ཚང་ཞིག་མེད་པ་བཅས་ལ་བརྟེན། དེ་དག་གི་གནས་ཚུལ་ཞིབ་ཆ་ཞིག་དགོས་གལ་ཡོད་པ་དེ་སྔ་ནས་བཀའ་ཕེབས་དགོངས་དོན་བཞིན་ཤེས་རིག་ལས་ཁུངས་ཀྱིས་རྒྱ་གར་དབུས་བོད་སློབ་འཛིན་ཚོགས་ཀྱི་འགན་འཛིན་ལྷན་ཚོགས་ནང་ཞུས་ཏེ་སྔ་ལོ་ནས་དེའི་ལས་རིམ་འགྲོ་བཞིན་པ་དང༌། ད་ལན་གྱི་མཐོ་སློབ་ཐོན་པའི་གནས་ཚུལ་གྲངས་ཐོ་བསྡུ་ལེན་འདྀ་བརྒྱུད་ནས་བཙན་བྱོལ་བོད་མིའི་འཁྲོད་ཆེད་ལས་ཐོན་པ་ཇི་ཡོད་བཙན་བྱོལ་གཞུང་མང་ནས་ཤེས་རྟོགས་ཡོང་རྒྱུའི་ཐོག་ཤེས་ཡོན་དང་ནུས་ལྡན་གྱི་མི་སྣ་ཁག་ལ་འབྲེལ་ལམ་དང་ནུས་པ་བེད་སྤྱོད་ལ་དམིགས་སྟེ་ལས་གཞི་འདི་སྤེལ་བ་ཡིན་པས་ཚང་མས་མཐུན་འགྱུར་གནང་སྐྱོང་ཡོང་བ། གྲངས་ཐོ་འདིའི་ནང་བཙན་བྱོལ་ལ་འབྱོར་ནས་ད་བར་གང་ན་སུས་གཙུག་ལག་རབ་འབྱམས་སམ་དེ་དང་ཚད་མཉམ་པ་Master Degree or Equivalent in any subject) རིགས་གཅིག་རྐང་འཛིན། (PhD or M.Phil, Chartered Accountant) བོད་སྨན་དང་ཕྱི་སྨན། འཕྲུལ་རིགEngineering) སོགས་ཆེད་ལས་ཐོན་མཁན་རྣམས་ནས་མཉམ་སྦྱར་འགེངས་ཤོག་གཞི་བཟུང་བཀང་སྟེ་རྒྱ་བོད་འབྲུག་གསུམ་ནང་གནས་འཁོད་རྣམས་ནས་ཁྱབ་ཁོངས་ས་གནས་འགོ་འཛིན་དང༌། ཕྱི་རྒྱལ་དུ་གནས་འཁོད་རྣམས་ནས་ཁྱབ་ཁོངས་བོད་གཞུང་ཕྱི་རྒྱལ་སྐུ་ཚབ་དོན་གཅོད་ལས་ཁུངས་དང་བོད་རིགས་སྤྱི་མཐུན་ཚོགས་པ་གང་རུང་བརྒྱུད། ཡང་ན་ཤེས་རིག་ལས་ཁུངས་སུ་ཐད་ཀར་ཕྱི་ལོ་ ༢༠༠༩ ཟླ་ ༤ ཚེས་ ༣༠ འགྱངས་མེད་གཤམ་གསལ་ཞལ་བྱང་ཐོག་གམ་ཨི་མལ་བརྒྱུད་འབུལ་གནང་ཡོད་པ། འགེངས་ཤོག་འདི་བཞིན་བཙན་བྱོལ་བོད་གཞུང་དང༌། ཤེས་རིག་གི་དྲ་རྒྱ། www.tibet.net./www.sherig.org ནང་ལའང་ཡོད་པས་ཕབ་ལེན་གྱིས་འགེང་བཀང་གནང་ནའང་འཐུས་རྒྱུ་བཅས་ཤེས་རིག་ལས་ཁུངས་ནས་ཕྱི་ལོ་ ༢༠༠༨ ཟླ་ ༡༢ ཚེས་ ༦ ལ།།
སྒྲོལ་མ་ལགས། ཐུགས་རྗེ་ཆེ། དཔྱད་གཏམ་འདི་ལྟ་བུ་འགོད་རྒྱུ་གལ་ཆེན་པོ་རེད། སྤྱིར་བཏང་ནས་བཙན་བྱོལ་བ་ཆགས་ནས་མི་ལོ་ལྔ་བཅུ་ཟིན་ལ་ཉེ་བའི་སྐབས་འདིར་བཙན་བྱོལ་བོད་གཞུང་གི་ངོས་ནས་ཡིན་ཀྱང་ཆོག དེ་བཞིན་མི་སྒེར་ཡིན་ཡང་རུང་མི་ལོ་ལྔ་བཅུ་འདིའི་བཙན་བྱོལ་ནང་ཤེས་ཡོན་སྐོར་ལ་ཕྱོགས་ཡོངས་ནས་ཕྱིར་རྟོག་ཅིག་བྱེད་དགོས་ངེས་རེད་ལ། དེ་མཚུངས་ཕྱིར་རྟོག་དེ་བརྒྱུད་ནས་མ་འོངས་པའི་ཤེས་ཡོན་སློབ་གསོའི་ཁ་ཕྱོགས་ལ་འགྱུར་བ་གང་འདྲ་ཞིག་གཏོང་དགོས་མིན་གྱི་ལམ་ཁ་ཞིག་འཚོལ་དགོས་ངེས་རེད། གཡུ་མཚོན་ནས།
སློབ་གྲྭ་ཆེན་མོ་བའི་བསམ་བློའི་ཆུ་ཚད་དང་བསམ་གཞིགས་ཀྱི་ནུས་པ་མཐོར་འདེགས་བཟོ་བའི་ཐད་ཀྱི་བསམ་གཞིགས།
བདུད་ལྷ་རྒྱལ།
སློབ་གྲྭ་ཆེན་མོ་ནི་མཐོ་རིམ་ཡོན་ཏན་པ་གསོ་སྐྱོང་བྱ་ས་ཡིན་ལ། འདི་ལས་ཐོན་པའི་མི་སྣ་ནི་སྤྱིར་བཏང་གི་སློབ་གསོ་མྱོང་ཡོད་མཁན་ཞིག་དང་གཏན་ནས་མི་འདྲ། སློབ་གྲྭ་ཆེན་མོ་ནས་མཐར་ཕྱིན་པ་ཞིག་ཡིན་ན། དེ་ལ་རང་ཚུགས་ཀྱི་བསམ་གཞིགས་བྱེད་སྟངས་ཤིག་དང༌། གཞན་དྲིང་མི་འཇོག་པའི་སྤོབས་པ། གནད་དོན་ཐག་གཅོད་ཀྱི་ནུས་པ་སོགས་མཐོ་རིམ་གྱི་གནད་ལ་དཔྱོད་ཅིང་འཇུག་པའི་སྤོབས་པ་དང་ནུས་པ་ཆ་ཡོངས་སུ་རྫོགས་ཡོད་པ་ཞིག་ཡིན་དགོས།
ཡིན་ནའང་སྔོན་དང་ད་ལྟ་གང་གི་བོད་ཀྱི་མཐོ་རིམ་སློབ་གྲྭ་ཆེན་མོ་བ་རྣམས་ཀྱི་གནས་ཚུལ་ལ་གཞིགས་ན། འདི་ལྟའི་ཚད་ཐིག་ལ་ཐོན་མེད་པའམ་ཐོན་དཀའ་བའི་ཚོད་དུ་གདའ། ཁོ་ཚོའི་ནར་མའི་ཁ་བརྡ་ཡིན་ན་འདྲ་ལ། ཚོགས་དབུས་ཀྱི་བགྲོ་གླེང་ཡིན་ནའང་འདྲ། མཐར་ཕྱིན་དཔྱད་རྩོམ་ཡིན་ནའང་འདྲ་གང་དུའང་ཡོན་ཏན་པའི་འཇོན་ཐང་མངོན་ཡོད་པ་ཅིག་མེད་པར། ཕལ་བའི་བསམ་ཚོད་ཅིག་གིས་སྤྱིར་བཏང་བའི་ལྟ་བ་ཞིག དཀྱུས་མའི་སྐད་ཆ་ཞིག་གིས་འཆད་ཀྱིན་འདུག
ཁོ་ཚོས་ལྟ་བ་གང་ཞིག་འདོན་ཡང་། དེ་ཉིད་ཀྱི་མཐོང་སྣེ་ཆེས་ཆིག་རྐྱང་བ་ཞིག་སྟེ། ཁོ་ཚོར་སྤྱིར་མི་ཆོས་ཀུན་སྤྱོད་ཀྱི་མཐོང་སྣེ་མ་གཏོགས། ཐ་ན་ལོ་རྒྱུས་ཀྱི་ལྟ་བའི་ཟུར་ཕྲན་ཙམ་ཡང་མེད། དེ་བས་ཡ་རབས་གཞུང་དྲང༌། བྱམས་སྙིང་རྗེ་ལྟ་བུའི་སྲོལ་རྒྱུན་གྱི་བསམ་གཞིགས་གཏོང་སྟངས་ཀྱིས་དུས་དང་ཡུལ་ལ་ ཁྱད་པར་མེད་པར་གཅིག་ཏུ་ཁ་ཚོན་གཅོད་པ་ལས་ལོ་རྒྱུས་འཕེལ་རྒྱས་ཀྱི་ངོས་ནས་བལྟས་ན། དགེ་སྐྱོན་ཅི་ཡོད་ལ་བསམ་བློ་ཆེན་པོ་འཁོར་མི་ཐུབ། ལོ་རྒྱུས་འཕེལ་བའི་ཆོས་ཉིད་ཀྱིས་སྔར་ཡོད་ཀྱི་མི་ཆོས་ལྟ་བ་མང་པོ་ཞིག་ལ་བསྐྱར་དུ་གདེང་འཇོག་དང་ཚད་འཇལ་བྱེད་དགོས་པར་འགྱུར་བ་དང༌། དེ་བཞིན་དུས་དང་འཚམས་པའི་རིན་ཐང་ལྟ་བ་གསར་བ་ཞིག་འབྱུང་དགོས་ཀྱང་། ང་ཚོའི་སློབ་གྲྭ་ཆེན་མོ་བ་རྣམས་ལ་འདིའི་ཐད་ནས་འཇོན་ཐང་ཆེན་པོ་མེད།
དེ་ལས་གཞན་སློབ་གྲྭ་ཆེན་མོ་ནས་མཐར་ཕྱིན་པའི་དེང་གི་ཡོན་ཏན་པ་དག་ལ་མཚོན་ནའང་དངོས་ཡོད་ལ་ཁ་སྐོར་ནས་དངོས་ཡོད་ཀྱི་སྤྱི་ཚོགས་གནད་དོན་ཞིག་བཤད་དགོས་པར་གྱུར་ཚེ།ང་ཚོའི་བསམ་གཞིགས་དེ་རྡིབ་འགྲོ་བའི་ཉེན་ཁ་ཡོད། ཆེས་ཕུགས་བསམ་ཅན་གྱི་བྱིས་བློ་དང་འདྲེས་པའི་ཐབས་ལམ་ཞིག་སྟོན་རྒྱུ་ལས། གནད་དོན་ལ་དབྱེ་ཞིབ་ཆ་རྫོགས་པ་ཞིག་དང༌། རིག་པའི་གཞུང་ལུགས་ཀྱིས་རྒྱབ་རྟེན་མཛད་པའི་ཞིབ་འཇུག་གཏིང་ཟབ་མོ་ཞིག་ཅིས་ཀྱང་འབྱུང་དཀའ།ང་ཚོའི་ཡོན་ཏན་པ་རྣམས་ཀྱིས་དམངས་སྲོལ་ལམ། ལོ་ཚིགས་སམ། དོན་རྐྱེན་ལྟ་བུའི་སྣང་ཚུལ་རྐྱང་བའམ་ད་ཡོད་སྤྱི་ཚོགས་འཕེལ་རྒྱས་ལ་ཁ་གཏད་མེད་པའི་རིགས་རྟོག་གི་ལས་ཀ་ཞིག་གམ། རིག་གཞུང་རྐྱང་བ་ཞིག་ལས་དངོས་ཡོད་སྤྱི་ཚོགས་ལ་ཁ་གཏད་ཀྱི་དོན་སྙིང་ཡོད་པའི་ཞིབ་འཇུག་གི་ལས་ཀ་གཉེར་མཁན་ཉུང༌།
ང་ཚོའི་སློབ་གྲྭ་ཆེན་མོ་བ་རྣམས་ཀྱིས་ཁ་བརྡ་དང་བགྲོ་གླེང་། ཞིབ་འཇུག་གི་ཁྲོད་དུ་བཀོལ་བཞིན་པའི་སྐད་ཆའམ་བརྡ་ཆད་ལ་བལྟས་པ་ཙམ་པོས་གནད་དོན་འདི་ཆེས་སླ་བར་མཐོང་སྟེ། ཁོ་ཚོས་རྩོམ་རིག་གམ། སྤྱི་ཚོགས། རིག་གནས། ལོ་རྒྱུས་སོགས་གང་ལ་དཔྱོད་ཀྱང་རིག་གཞུང་གང་དེའི་རིག་གཞུང་གི་ལྟ་བའམ་ཐབས་ལམ་སྤྱོད་པ་ལྟ་ཞོག་དེ་ཉིད་ཆེས་ཕལ་བའི་སྐད་དང་འཚོ་བའི་སྐད། ལྷུག་བརྗོད་ཀྱི་སྐད་ཀྱིས་འཆད་པར་འགྱུར་བ་ལས། རིག་གཞུང་གི་བརྡ་ཆད་བཀོལ་ཐུབ་པ་ཉུང་ལ། བཀོལ་ཡོད་པའི་དབང་དུ་བཏང་ཡང་བརྡ་ཆད་ཀྱི་གོ་བ་རབ་རིབ་སབ་སིབ་ཅིག་ཏུ་འདུག འདི་འདྲ་ཞིག་གིས་དཔྱད་པ་དང་ཞིབ་འཇུག་གི་ལས་ལ་ཇི་ལྟར་འཇུག་ཐུབ་སྟེ་མི་ཐུབ་བོ།། རིག་གཞུང་གང་ཞིག་གི་གསང་ཚིག་དེ་རིགས་རིག་གཞུང་དེའི་བརྡ་ཆད་ཀྱིས་མཚོན་པ་ཡིན། དེ་བཞིན་གནད་དོན་ཐག་གཅོད་པའམ་གནད་དོན་ལ་དབྱེ་ཞིབ་བྱེད་པའམ་གནད་ལ་ཐིངས་པ་ཞིག་ཡོང་མི་སྲིད། འདིས་ནི་དོན་གྱིས་བསམ་གཞིགས་དེ་ཉིད་གནད་དུ་ཐིངས་མེད་པ་དང༌། བསམ་གཞིགས་དེ་ཉིད་ལ་རིག་པའི་གཞུང་ལུགས་ཀྱི་རྒྱབ་ལྗོངས་མེད་པའི་དྲན་འཆར་ཐོར་བུ་བ་ཞིག་ཡིན་པ་དེ་མཚོན་པ་ཡིན།
གནད་དོན་གྱི་རྩ་བ་ནི་ངས་བསམ་ན་ཤེས་བྱའི་སྒྲིག་གཞི་ལ་ཐུག་ཡོད་སྙམ། ཐུན་མིན་གྱི་ལྟ་བ་དེ་བསམ་གཞིགས་ཀྱི་ནུས་པ་འཇོན་པོ་ཞིག་ལས་འོང་དགོས་ལ། བསམ་གཞིགས་ཀྱི་ནུས་པ་དེ་བསམ་གཞིགས་ཀྱི་རྒྱུ་ཆ་སྟེ་ཤེས་བྱའི་གྲ་འཛོམས་པོ་ཞིག་ལས་འོང་དགོས། ཤེས་བྱ་ལ་གལ་ཆེན་མཛད་དོན་གཙོ་བོ་བསམ་གཞིགས་ཀྱི་དོན་ཡིན། བོད་ཀྱི་མཐོ་རིམ་སློབ་གྲྭའི་སློབ་མ་རྣམས་ལ་མཚོན་ན། སློབ་ཆུང་སློབ་འབྲིང་བཅས་ལོ་ངོ་བཅུ་གཉིས་ལྷག་གི་ཤེས་བྱའི་བསགས་སྦྱང་ལས་སྤྱིར་ཤེས་བྱ་སྣ་ཚོགས་པ་ཞིག་གི་རྨང་གཞི་ཡོད་ཀྱང༌། དེང་གི་བོད་སྤྱི་ཚོགས་དང་རིག་གནས་སྤྱིའི་ཁོར་ཡུག་ད་དུང་ཆིག་རྐྱང་བ་ཞིག་དང༌། ད་དུང་ཁ་རུབ་ཀྱི་རྣམ་པ་ཞིག་གི་ངང་ན་ཡོད་པའི་རྣམ་པ་འདིས་གནའ་བོའི་ཤེས་བྱའི་སྒྲིག་གཞི་ལ་འདའ་འགོངས་སམ་ཐོད་བརྒལ་མཛད་མ་ཐུབ་པས། དེང་རབ་ཀྱི་ཤེས་བྱའི་ཕྱོགས་ན་ཉམ་ཆུང་ཉམ་ཐག་ཏུ་ཡོད། དངོས་ཡོད་སྤྱི་ཚོགས་དང་ཉེ་བར་བཏུད་ནས་རང་གི་ཤེས་བྱ་དངོས་ཡོད་ཀྱི་ཁྲོད་ནས་བཀོལ་སྤྱོད་བྱེད་དགོས་དུས། ཁོ་ཚོར་ཡུལ་ཡུལ་ཅན་ནམ་བྱེད་པ་པོ་དང་བྱ་བའི་བར་ལ་ཡ་བྲལ་དུ་འགྱུར་བའི་རྣམ་པ་ཡོད། འདི་ནི་རང་གི་ཤེས་བྱའི་སྒྲིག་གཞི་དང་ཐག་གཅད་བྱའི་གནད་དོན་གཉིས་བར་གྱི་ཡ་བྲལ་གྱི་སྣང་ཚུལ་ཞིག་གི་འབྲས་རྟགས་རེད། ཤ་ཟ་བ་ལ་གྲི་དང་ཚོད་མ་ཟ་བ་ལ་ཐུར་མ་དགོས་པ་བཞིན། ཤེས་བྱ་ཡིན་ཚད་ཀྱིས་གནད་དོན་གང་ལའང་འཇུག་ཆོག་པའམ་ཐུབ་པ་ཞིག་ཡོད་མི་སྲིད།
ད་ལྟའི་ང་ཚོའི་སློབ་ཁྲིད་ལ་མཚོན་ན་ང་ཚོས་རྗོད་བྱེད་ཚིག་གི་གསོ་སྦྱོང་ལ་དམིགས་ཡོད་པ་ལས། བརྗོད་བྱའི་བསམ་བློ་གསོ་སྦྱོང་ལ་དམིགས་ཐུབ་མེད་པའི་རྣམ་པ་ཞིག་ཡོད། འདིས་སློབ་མའི་བསམ་གཞིགས་ཀྱི་ནུས་པའི་མཐོར་འདེགས་དང༌། བསམ་བློའི་ཆུ་ཚད་ཀྱི་མཐོར་འདེགས་ལ་ཕན་ཐོགས་ཆེན་པོ་ཐུབ་ཀིན་མེད་པས། སྣང་ཚུལ་འདི་དེང་གི་སློབ་གྲྭ་ཆེན་མོའི་སློབ་གསོའི་ཞན་ཆ་ཞིག་ཡིན། སུམ་རྟགས་སྙན་ངག་དང༌། རྩོམ་འཇུག་རྩོམ་རིག་གཞུང་ལུགས་གང་ཡིན་ཡང་དེ་ཉིད་ཚིག་དག་མོ་ཞིག་དང༌། རྗོད་བྱེད་ཚིག་དང་རྗོད་པ་ཅི་འདྲ་ལེགས་ཤིང་དག་ཀྱང་། དེ་ཉིད་ནི་ཕྱིའི་ཤུན་པ་ལྟ་བུ་ཡིན་ལ། ནང་སྙིང་ནི་བརྗོད་བྱའི་བསམ་བློ་ཡིན་པ་སྨོས་མ་དགོས། དེས་ན་ང་ཚོས་འདི་ལྟའི་བརྗོད་བྱ་ཕུན་ཚོགས་གཏིང་ཟབ། རྒྱ་ཆེན་པོ་དེ་གང་ནས་ཡོང་དགོས་པ་དང༌། དེ་ཇི་ལྟར་གསོ་སྐྱོང་བྱ་བའི་ཐད་ལ་ད་བར་དུ་ངོས་ཟིན་མ་བྱུང་བར་བཏང་སྙོམས་སུ་བསྐྱུར་བ་རེད། དེ་བས་བོད་ཡིག་སློབ་གྲྭ་ཆེན་མོ་བའི་བསམ་གཞིགས་ཀྱི་ནུས་པའང་འཇོན་ཐང་ཅན་དུ་འོངས་མ་ཐུབ་པ་རེད།
གནད་དོན་དབྱེ་ཞིབ་དང༌། གནད་དོན་ཐག་གཅོད་ཀྱི་ནུས་ཤུགས་ཞན་པ་དང༌། བསམ་གཞིགས་ཀྱི་ནུས་པ་ཞན་པའི་གནད་དོན་འདི་འདྲ་ཐག་གཅོད་པའི་ཐབས་ལམ་ནི། ངས་བསམ་ན་འཐུས་སྒོ་ཚང་བའི་ཤེས་བྱ་གསར་བ་ནང་འདྲེན་བྱ་རྒྱུ་དེ་ཁོ་ནའོ་སྙམ། དེང་གི་སློབ་གྲྭ་ཆེན་མོའི་སློབ་ཁྲིད་ཀྱི་ཁྲོད་ན་ཤེས་བྱ་གསར་བ་དང་བསླབ་བྱ་གསར་བ་ཡིན་སྐད་ཀྱི་སློབ་ཁྲིད་ནི་ཡོད་ཀྱང༌། དེ་དག་ལ་ཞན་ཆ་ཞིག་ཡོད་པ་ནི། དེའི་སློབ་ཁྲིད་ལ་ཟབ་ཁྱད་མེད་པ་དང༌། རྒྱ་ཚད་མེད་པ་དང༌། ལྷག་པར་རྒྱུས་མངའ་དང་བྱང་ཆ་ཆེ་བའི་དགེ་རྒན་དཀོན་པ་དེ་རེད།
རིག་གནས་ཚན་ཁག་གི་སློབ་མ་ཞིག་ལ་མཚོན་ན། རྩོམ་རིག་དང་ལོ་རྒྱུས། མཚན་ཉིད་རིག་པ་གསུམ་གྱི་གཞུང་ལུགས་ཀྱི་རྨང་གཞིའི་ཤེས་བྱར་གྱུར་པ་དག་ངེས་པར་ཁོང་དུ་ཆུད་པ་དགོས། རྩོ མ་རིག་དང་ལོ་རྒྱུས། སྤྱི་ཚོགས་རིག་པ་སོགས་བསླབ་ཚན་བྱེ་བྲག་པ་གང་ཡིན་ཡང་། དེ་ཉིད་ལ་དཔྱོད་པ་དེ་ཕལ་བ་དཀྱུས་མ་སྣང་ཚུལ་ངོ་སྤྲོད་ལྟ་བུ་ཞིག་གི་ངང་དུ་མི་བསྐྱུར་བར་ཟབ་སར་ཕྱིན་འདོད་ན་ནི། མཚན་ཉིད་རིག་པ་མ་ཤེས་ཐབས་མེད་ཡིན། སྐད་བརྡ་རིག་པ་ལྟ་བུ་ཞིག་ལ་མཚོན་ནའང་གཏིང་ཟབ་སར་ཕྱིན་ན་མཚན་ཉིད་རིག་པ་དང་མི་འབྲེལ་ཐབས་མེད་རེད། རྩོམ་རིག་ཀྱང་དེ་ལྟར་རོ། ། ང་ཚོའི་དེང་གི་བཤད་བྱ་ཆེས་ཚ་བོ་སྟེ་རིག་གནས་གསར་རྙིང་གི་དགག་བཞག་ལྟ་བུ་ལ་མཚོན་ནའང༌། མཐར་ཐུག་མཚན་ཉིད་རིག་པའི་སྒོ་ནས་འཆད་མ་ཐུབ་པས་དེ་ལ་བློ་འཁུལ་གྱི་ནུས་ཤུགས་ཡོད་མི་སྲིད།
དེ་བས་བོད་ཡིག་སློབ་གྲྭ་ཆེན་མོ་བའི་མཚན་ཉིད་རིག་པའི་སློབ་ཁྲིད་ལ་ཤུགས་སྣོན་མཛད་དགོས། དེ་ཡང་ནུབ་གླིང་གི་མཚན་ཉིད་རིག་པ་གཙོ་བོ་དང༌། དེའི་ནང་ནས་ཀྱང་ནུབ་གླིང་དེང་རབས་མཚན་ཉིད་རིག་པ་གཙོ་བོ་ཡིན་ན་འགྲིག། དེང་གི་བཤད་བྱ་ཆེན་པོ་དེང་རབས་ཤེས་རིག་གི་ཕྱིར་རྟོག་ཡིན་ནའང་འདྲ། མི་ཇུས་ཀྱི་དགོངས་པ་ཡིན་ནའང་འདྲ། རྩོམ་རིག་གི་དེང་རབས་རིང་ལུགས་ཡིན་འང་འདྲ། སྤྱི་ཚོགས་རིག་པའི་དེང་རབས་ཕྱི་མའི་རིང་ལུགས་ཀྱི་དཔྱོད་པ་ཡིན་ནའང་འདྲ། དེང་རབས་མཚན་ཉིད་རིག་པ་ནི་ཁོ་ཚོའི་ལྟ་བའི་འབྱུང་ཁུངས་གཙོ་བོ་ཞིག་ཡིན།
དེ་ནས་གཞན་ནུབ་གླིང་གི་སྤྱི་ཚོགས་དང་བསམ་བློའི་འཕེལ་རྒྱས་གཙོར་བཟུང་ནས། ང་ཚོ་ལ་བལྟ་སའམ་མིག་དཔེ་བྱས་ཆོག་པའི་བསམ་བློའི་མཐོ་རླབས་སམ་སྤྱི་ཚོགས་ཀྱི་ལོ་རྒྱུས་གཙོ་བོ་ངོ་སྤྲོད་པ་ཤིན་ཏུ་གལ་ཆེ། དཔེར་ན། རིག་རྩལ་བསྐྱར་དར་དང༌། བློ་འབྱེད་ལས་འགུལ། ཧྥ་རིན་སིའི་གསར་བརྗེ་ཆེན་མོ་དང༌། ཡའོ་རུབ་གླིང་གི་བཟོ་ལས་གསར་བརྗེ་ལྟ་བུ་སོགས་ངེས་ཚེ། སློབ་མ་རྣམས་ལ་འཛམ་གླིང་གི་མཐོང་རྒྱ་འབྱུང་བར་གྲོགས་བྱེད་ཐུབ་ངེས། དེང་གི་བོད་སྤྱིཚོགས་འཕེལ་རྒྱས་ཀྱི་དཔྱོད་པ་ལ་མཚོན་ན་དཀོན་ནས་ཡོད་པའང་ཉེ་རབས་དང་དེང་རབས་ཀྱི་འཛམ་གླིང་ལོ་རྒྱུས་ཀྱི་ཤེས་བྱའི་རྒྱབ་ལྗོངས་རེད།
གང་ཡིན་ཡང་ཐོག་མཐའ་བར་གསུམ་ཀུན་ཏུ་རྩ་བའི་བླང་བྱ་ཞིག་ཡོད་པ་ནི། ང་ཚོ་བོད་ཀྱི་གནས་ཚུལ་ལ་ཁ་གཏོད་པ་དང༌། བོད་རང་གི་སྤྱི་ཚོགས་གནས་སྟངས་འདི་གཞི་རྩ་བྱས་ནས་རིག་གནས་གསར་བ་དེ་དག་གི་ཤེས་བྱའི་རྒྱབ་ལྗོངས་ཡོད་པར་བྱ་རྒྱུ་གལ་ཆེ། འདི་ནི་བོད་ཀྱི་སློབ་གྲྭ་ཆེན་མོ་བ་དག་གི་བསམ་བློའི་ཆུ་ཚད་གོང་དུ་སྤེལ་བའི་ཐབས་དམ་པ་རེད་སྙམ།
ཞེས་སྐབས་གཉིས་པའི་བོད་ཀྱི་སྲོལ་རྒྱུན་རིག་གནས་དང་འཆམ་མཐུན་སྤྱི་ཚོགས་འཛུགས་སྐྲུན་ཞེས་བྱ་བའི་རིགས་གཞུང་དཔྱད་གླེང་ཚོགས་འདུའི་དཔྱད་རྩོམ་ཕྱོགས་བསྒྲིགས་ལས་བདམས།
སྐུ་ཞབས་བསེ་རུ་ལགས་ཀྱི་དཔྱད་གཏམ་ལ་དོན་སྙིང་ལྡན་གི
བྱེས་ཡུལ་གྱི་ཤེས་ཡོན་ཐད་དཀའ་ངལ་ཡོད་པ་ཐོས་བྱུང་། སློབ་གྲྭ་ཆེན་མོ་བའི་ཤེས་ཡོན་དང་བསམ་གཞིགས་ཀྱི་ནུས་པའི་ཐད། དགེ་རྒན་ཆེན་མོ་བདུད་ལྷ་རྒྱལ་ཀྱིས་བཏོན་པའི་བསམ་ཚུལ་ཞིག་གཤམ་དུ་འགོད་ཆོག་པར་བགྱིས།
ང་ཚོས་ལྟར་འགོ་བཙུགས་ནས་ལས་མཇུག་འཁྱོལ་ཞིག་བྱུང་ན་མི་ལོ་སུམ་ཅུའི་རྗེས་ང་ཚོར་དགོས་པ་ནི་ཤེས་ཡོན་གྱི་ཕྱུག་པའི་མི་རབས་ཤིག
ང་ཚོར་དགོས་པ་ནི་མི་རིགས་ཀྱི་ལམ་སྣ་འདྲེན་མཁན་གྱི་ཁྱུ་ཚོགས་ཤིག
ང་ཚོར་དགོས་པ་ནི་རང་ཡུལ་རང་གིས་སྐྱོང་ཐུབ་མཁན་གྱི་གངས་སེང་ཞིག
ང་ཚོར་དགོས་པ་ནི་ཕྱི་གཏེར་ནང་ལ་འདྲེན་ཐུབ་མཁན་གྱི་མི་བུ་ཞིག
ང་ཚོར་དགོས་པ་ནི་གསར་གཏོད་ཀྱི་རྒྱལ་ཁམས་མྱུལ་བའི་ཚན་རིག་པ་ཞིག
ང་ཚོར་དགོས་པ་ནི་་་་་