བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ལ་ཕྱི་ཚེས་ ༡༩ ཉིན་འདི་ག་གསར་ཁང་གིས་ཉིན་འདི་དག་རིང་གི་བོད་དོན་བགྲོ་གླེང་ཁག་དང༌། རྒྱལ་སྤྱིའི་གནས་ཚུལ་གལ་ཆེན་རེ་ཟུང༌། དེ་བཞིན་ལོ་འདིའི་བོད་དོན་དང་རྒྱ་ནག་གི་འགྱུར་བ་བཅས་ལས་འཕྲོས་པའི་དྲི་བ་དག་ཅིག་བཏོན་པ་གཤམ་དུ་བཀོད་ཡོད།
དྲི་བ། ཉེ་ལམ་ནས་བོད་ཕྱི་ནང་གཉིས་ཀར་ད་ལོ་བོད་ལུགས་ལོ་གསར་མི་སར་རྒྱུའི་སྐོར་བཤད་ཀྱིན་འདུག ཡང་ཕྱི་རྒྱལ་ཁག་གི་བོད་མི་ཁག་ཅིག་གིས་ལོ་གསར་ནི་བོད་མི་རྣམས་འདུ་འཛོམས་ཀྱི་གོ་སྐབས་ཤིག་ཡིན་སྟབས་འདུ་འཛོམས་བྱ་དགོས་པར་བཤད་ཀྱིན་འདུག གཙོ་བོ་ནི་འདུ་འཛོམས་བྱུང་བ་ཡིན་ན་ལས་འགུལ་གང་འདྲ་ཞིག་སྤེལ་དགོས་མིན་སྐོར་ལ་བསམ་བློ་གཏོང་གི་ཡོད་འདུག ཚོགས་གཙོ་མཆོག་ལ་འདིའི་ཐད་དགོངས་ཚུལ་དང་ལམ་སྟོན་འདྲ་ཡོད་དམ།
ལན། སྤྱིར་བཏང་ལོ་གསར་སྲུང་གཙི་བྱེད་པའི་གཞི་རིམ་གྱི་ལྟ་བ་འདྲ་བོ་དེ་ང་ཚོ་མིའི་རིགས་སུ་གྱུར་བ་འདི་སྤྱི་ཚོགས་ལ་བསྟེན་པ་དང་བསྟུན་ནས་འདུག་པའི་སྲོག་ཆགས་ཤིག་ཡིན་པའི་ཆ་ནས། འདུ་འཛོམས་བྱེད་པ་དང༌། ལོ་གསར་པ་སྲུང་གཙི་བྱེད་པ་དེ་འདྲ་ཞིག་རེད། དོན་ངོ་མའི་ཐོག་ནས་བལྟས་པ་ཡིན་ན་ལོ་ག྄སར་པ་སྲུང་གཙི་བྱེད་པའི་སྐབས་ལ་འདས་པའི་ལོའི་ནང་གནས་ཚུལ་ཅི་བྱུང་མཐ྄་དག་ལ་བསྐྱར་ཞིབ་བྱེད་པ་དང༌། ལོ་གསར་པའི་ནང་དུ་སྔོན་གྱི་ནོར་འཁྲུལ་མི་ཡོང་བ་སོགས་ཀྱི་ཐད་ལས་གཞི་གསར་པ་སྒྲིག་དགོས་པ་རེད། སོ་སོ་སྒེར་དང་མི་རིགས་དང་རྒྱལ་ཁབ་ཀྱི་ཆེད་གང་ཡིན་ཡང་དེ་དག་ལམ་ལྷོང་ཡོང་བའི་ཆེད་དུ་སྨོན་ལམ་རྒྱག་པ་གཅིག་པུས་ཕན་གི་མ་རེད། འཆར་གཞི་སྒྲིག་དགོས་པ་རེད། རྩ་བའི་ཆ་ནས་ལོ་གསར་སྲུང་གཙི་བྱེད་པ་རང་ལ་སྐྱོན་ཡོད་པ་མ་རེད་བསམ། སྲུང་གཙི་བྱེད་སྟངས་མང་པོ་ཡོད་པ་རེད། སོ་སོའི་ནང་ལ་བསྡད་པ་ཡིན་ནའང་རེད། པ་མ་སྤུན་མཆེད་རྣམས་འཛོམས་ནའང་འདྲ། སྤྱི་ཚོགས་ཡོངས་རྫོགས་འཛོམས་ནའང་རེད། གོང་དུ་བཤད་པ་ལྟར། ལྷག་པར་དུ་ཕྱི་རྒྱལ་ཁང་ཏུ་ཡོད་པའི་བོད་རིགས་རྣམས་ཡིན་ན་ལོ་གསར་དང་འཁྲུངས་སྐར་གྱི་ཉིན་མོ་མ་གཏོགས་འཛོམས་ཐུབ་གི་ཡོད་པ་མ་རེད། ཡིན་ནའང་ནམ་རྒྱུན་ནང་བཞིན་གྱི་རྒྱས་སྤྲོས་མེད་པ་ཞིག་ངེས་པར་དུ་དགོས་པ་རེད། བྱུང་བ་ཡིན་ན་འདུ་འཛོམས་སྐབས་སྤྱི་ཚོགས་ཡིན་ནའང་རེད། གྲོགས་པོ་ནང་ཁུལ་ལ་ཡིན་ནའང་རེད། སྔར་གྱི་ལས་དོན་ཁྲོད་ཡག་སྡུག་སྣ་ཚོགས་བྱུང་བ་ལས་མུ་མཐུད་ཡར་རྒྱས་གཏོང་ཕྱོགས་དང་ནོར་འཁྲུལ་རིགས་ཡོ་བསྲང་སོགས་ལས་འཕྲོས་པའི་གོ་བསྡུར་སོགས་བྱེད་ཐུབ་ན་ཡག་པོ་ཡོད་པ་རེད། དེ་མ་གཏོགས་ལོ་གསར་ཞེས་པ་བཀག་ནས་འགོག་ཐུབ་པ་ཡོད་པ་མ་རེད། སྔར་ལོ་བོད་ནང་དུ་ཆབ་སྲིད་རྐྱང་བ་མ་ཡིན་པར་འབྱུང་བའི་གནད་སྐྱོན་ཡང་ཐེབས་ཡོད་སྟབས། འདི་དག་གི་ཆེད་དུ་བསམ་ཤེས་བྱེད་ཐུབ་པ་དང༌། ད་ལོ་གཅིག་པུ་མ་ཡིན་པར་དུས་རྒྱུན་དུ་ནས་ལོ་གསར་གྱི་སྐབས་སུ་དེང་དུས་ནུབ་ཕྱོགས་སུ་དར་སྲོལ་ཡོད་པ་བཞིན་ལོ་གསར་པའི་དམ་བཅའ་དེ་འདྲ་འཇོག་ཐུབ་པ་ཡིན་ན་ཡག་པོ་ཡོད་པ་རེད་བསམ།
དྲི་བ། སང་ཉིན་ཨ་རིའི་སྲིད་འཛིན་ཨོ་བྷ་མ་མཆོག་གི་ཁྲི་སྟོན་རེད། སྐབས་འདིར་འཛམ་གླིང་གང་ས་ནས་ཁོང་གི་ལས་འགུལ་གྱི་འབོད་ཚིག་ལྟར་འགྱུར་བ་རེ་ཡོང་བར་རེ་བ་རྒྱག་གིན་ཡོད་པ་རེད། ང་ཚོ་བོད་མི་རིགས་ཀྱི་གནས་སྟངས་མུ་མཐུད་དུ་ཛ་ད྄རག་ཅིག་གི་འོག་ཡོད་སྟབས། ང་ཚོའི་ངོས་ནས་ཁོང་ལ མིགས་བསལ་གྱི་རེ་བ་རྒྱག་ཆོག་པ་དང་འོས་པ་དེ་འདྲ་གཟིགས་ཀྱི་ཡོད་དམ།
ལན། སང་ཉིན་སྲིད་འཛིན་ཨོ་བྷ་མ་ཁྲི་འདོན་གནང་གི་ཡོད་པ་རེད། དེ་དང་འབྲེལ་བའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱིས་ཁོང་མ་འཚམས་འདྲིའི་ཕྱག་འཕྲིན་ཕུལ་ཟིན་པ་ཡིན། དེའི་མཉམ་དུ་ང་ཚོས་རེ་འབོད་ཞུས་པ་ནི། ད་ལྟ་བར་དུ་ཨ་རིའི་སྲིད་གཞུང་གི་ངོས་ནས་བོད་དོན་ཐོག་རྒྱལ་ཁབ་གཞན་དང་མི་འདྲ་བའི་རྒྱབ་སྐྱོར་ཤུགས་ཆེན་པོ་གནང་སྡད་ཡོད་པ་རེད། འདི་སྔར་ལས་ལྷག་ཅིག་གནང་ཡོང་ཐུབ་པའི་རེ་བ་ཡོད་ཅེས་ཁོང་ལ་ཞུས་ཡོད། ཡིན་ནའང་རེ་བ་ཞེད་པོ་ཤུགས་ཆེན་པོ་བྱ་རྒྱུ་དེ་ཏག་ཏག་ཅིག་ཞུ་ཐུབ་པ་མི་འདུག གང་ཡིན་ཟེར་ན་ད་རེབ་འཛམ་གླིང་གིས་ལྟ་སྟངས་མི་འདྲ་བ་ཞིག་ལྟ་བཞིན་པ་ནི་ཁོང་ཉིད་མི་རིགས་ནག་པོ་ཡིན་པ་དང༌། ཨ་རིའི་ལོ་རྒྱུས་ཐོག་མི་རིགས་ནག་པོ་ཞིག་ལ་སྲིད་འཛིན་གྱི་རྒྱལ་ཁ་ཐོབ་པ། དེའི་ཁར་ཁོང་ཉིད་དགུང་ལོ་གཞོན་པ་དང༌། གནས་སྟངས་ཀྱི་ཆ་ནས་ཀྱང་ཆུང་དུས་སུ་མི་རིགས་དཀར་པོའི་བྱིས་པ་མི་འདྲ་བའི་སྡུག་མྱངས་ཡོད་པའི་ལྟ་ཚུལ་གྱི་ཐོག་ནས་རེད། འོན་ཀྱང་འཛམ་གླིང་སྤྱིའི་ཆབ་སྲིད་ཀྱི་ཐོག་ནས་བལྟས་ཡོང་དུས་ད་བར་དུ་ཕེབས་པའི་ཨ་རིའི་སྲིད་འཛིན་གོང་མ་རྣམས་ཀྱིས་བོད་དོན་ལ་ཤུགས་བརྒྱབས་པ་དེ་ལས་ལྷག་ཅིག་རེ་བ་བརྒྱབས་ན་ཏག་ཏག་ཅིག་ཨེ་ཡོད་དྲན་བསྡད་ཡོད། ཡིན་ཡང་ད་ཡོད་ཀྱི་རྒྱབ་སྐྱོར་དེ་དག་མུ་མཐུད་ནས་འདུག་གི་རེད་བསམ་ཡོད། དེ་བཞིན་དུ་ཁོང་དང་མཉམ་དུ་སྲིད་འཛིན་གྱི་འོས་མིར་ཕེབས་མཁན་རྗོན་མེ་ཁན་ཡིན་ནའང་རེད། ཨོ་བྷ་ཡིན་ནའང་རེད། སྔར་ལོ་བོད་ནང་དུ་ཛ་དྲག་གནས་ཚུལ་བྱུང་བའི་སྐབས་ལ་ཁོང་གཉིས་ཀས་གདུང་སེམས་མཉམ་སྐྱེད་ཀྱི་དགོངས་ཚུལ་ཤུགས་ཆེན་པོར་གསུངས་ཡོད་པ་རེད། ཨ་རིའི་དབུ་ཁྲིད་སྤྱིའི་ཆ་ནས་བཤད་ནའང༌། འཛམ་གླིང་ནང་འགྲོ་བ་མིའི་ཐོབ་ཐང་དང་དམངས་གཙོའི་ཐོག་རང་བཞིན་གྱིས་ཤུགས་རྒྱག་དགོས་པ་ཞིག་ཆགས་ཡོད་པ་རེད། འདི་ཁོང་ཚོའི་གཞི་རིམ་གྱི་ལྟ་གྲུབ་དང་འབྲེལ་བ་ཡོད་པའི་ཆ་ནས་འདི་ལྟར་ཆགས་ཡོད་པ་རེད། ཕྱོགས་གཞན་ནས་བཤད་ན། ང་ཚོས་ཨོ་བྷ་མ་ལ་རེ་བ་ག་ཚོད་ཅིག་རྒྱག་གི་ཡོད་པ་ནང་བཞིན་རྒྱ་ནག་གཞུང་དང་མི་དམངས་ཀྱིས་ཀྱང་ཨོ་བྷ་མ་ལ་རེ་བ་རྒྱག་གི་ཡོད་པ་རེད། རེ་བ་འདི་གཉིས་ཀྱི་བསམ་བློ་ལྡོག་ཕྱོགས་སུ་ཡོད་སྟབས་ལམ་སེང་སྨིན་ཐུབ་པ་དེ་འདྲ་མ་རེད། མདོར་ན། ད་བར་ཨ་རིའི་གཞུང་གིས་བོད་ཐོག་འཛིན་པའི་སྲིད་བྱུས་དང་རྒྱབ་སྐྱོར་དེ་དག་མུ་མཐུད་གནས་པ་ལས་དེ་ལས་ལྷག་ཅིག་ཡོང་བར་རེ་བ་རྒྱག་གི་མེད། རེ་བ་འོས་འཚམ་ཞིག་བརྒྱབ་པ་ཡིན་ན་རྗེས་མ་བློ་ཕམ་དང་སྡུག་བསྔལ་ཆེན་པོ་འཕྲད་གི་མ་རེད་བསམ་ཡོད།
དྲི་བ། ད་སྐབས་དཔལ་འབྱོར་གྱི་ཉམས་རྒུད་འདི་འཛམ་གླིང་སྤྱིར་ཁྱབ་ཡོད་ལ། ལྷག་པར་དུ་ཨ་རི་ལྟ་བུ་ཡིན་ན་དངུལ་ཁང་རྡིབ་པ་དང༌། བཟོ་ཚོང་སྒོ་རྒྱག་པ་སོགས་ཀྱིས་ལས་མེད་ཀྱི་གྲངས་འབོད་ཡང་ཇེ་མང་རེད། དཔེར་ན། ༢༠༠༩ ལོར་ནེའུ་ཡོག་ནས་ལས་ཀ་ ༡༨༡༠༠༠ དང༌། ལོ་སི་ཨན་རྗི་ལི་ནས་ལས་ཀ་ ༡༦༤༠༠། དེ་བཞིན་ལས་ཀ་ཤོར་སའི་ས་གནས་ཁག ༧༠ ལྷག་ནི་ཚབས་ཆེ་ཤོས་ཡིན་པར་བཤད་ཀྱིན་ཡོད་པ་རེད། ཨ་རིའི་གཞུང་དམངས་གཉིས་ཀར་འདི་འདྲའི་ཉམས་རྒུད་ཅིག་སླེབས་སྐབས། བཙན་བྱོལ་བོད་མིའི་སྤྱི་ཚོགས་ཀྱི་དཔལ་འབྱོར་ཡང་ཨ་རིའི་གཞུང་སྒེར་གཉིས་ཀར་གང་འཚམ་རེ་བསྟེན་ཡོད་སྟབས། དཔལ་འབྱོར་གྱི་ཉམས་རྒུད་འདིས་བོད་མི་ཚོར་ཤུགས་རྐྱེན་འདྲ་སླེབས་གི་རེད་དམ།
ལན། ཤུགས་རྐྱེན་ཞེ་དྲག་ཆེན་པོ་དེ་འདྲ་ཡོང་གི་མ་རེད་བསམ། གང་ཡིན་ཟེར་ན་ང་ཚོའི་དངུལ་ཡོང་ཁུངས་དེ་གཅིག་རང་གཅིག་མ་རེད། དཔེར་ན། ཨ་རིའི་སྲིད་གཞུང་གིས་ཌོ་ལོར་ས་ཡ་གཉིས་སྤྲོད་ཀྱིན་ཡོད་པ་རེད། ཌོ་ལོར་ས་ཡ་གཉིས་ཞེས་པ་དེ་ཨ་རིའི་གཞུང་ལྟ་བུར་མཚོན་ན་དོ་ཕོག་འགྲོ་བ་དེ་འདྲ་གང་ཡང་མ་རེད། དེ་ལ་ཁྱད་པར་ཅི་ཡང་འགྲོ་གི་མ་རེད་འདོད། དེ་མ་ཡིན་པའི་སྒྲིག་འཛུགས་ཁག་དང་གང་ཟག་སྒེར་མང་པོ་ཞིག་ཡོད་སྟབས་ང་ཚོར་དོ་ཕོག་དང་ཤུགས་རྐྱེན་དེ་འདྲ་ཐེབས་གི་རེད་བསམ་གི་མེད། བཙན་བྱོལ་བོད་གཞུང་གི་རྒྱུན་གྲོན་དང་སྤྱི་ཚོགས་ཞབས་ཞུ་བཅས་ཡོད་པ་ལས་རྒྱུན་གྲོན་ཐོག་ནམ་རྒྱུན་ནས་ཕྱི་རྒྱལ་གྱི་རོགས་དངུལ་ཕོན་ཆེན་པོ་དེ་འདྲ་གཏོང་གི་ཡོད་པ་མ་རེད། གཙོ་བོ་ཞིག་སྤྱི་ཚོགས་ཞབས་ཞུའི་རིགས་རེད། འདི་ལ་ལོ་ལྟར་རྒྱ་གར་གྱི་སྒོར་མོ་ས་ཡ་ ༧༠༠ ནས་ ༨༠༠ དེ་འདྲ་གཏོང་གི་ཡོད་པ་རེད། འདི་ཕྱི་རྒྱལ་གྱི་རོགས་དངུལ་ལ་བསྟེན་ཡོད་པ་རེད། ཡིན་ཡང་འདི་ལའང་དོ་ཕོག་དེ་འདྲ་འགྲོ་གི་མ་རེད་འདོད་ཡོད།
དྲི་བ། རྒྱ་ནག་གིས་ ༣ པའི་ཚེས་ ༢༨ ཉིན་བཅིངས་འགྲོལ་གྱི་ཉིན་མོ་སྲུང་གཙི་བྱ་རྒྱུ་ཡིན་ཟེར། ལོ་འདི་བོད་མིའི་ཆབ་སྲིད་ཀྱི་ལོ་ཞིག་ཆགས་ཀྱིན་ཡོད་དུས། བོད་ནང་དུ་སྔར་ལོ་བཞིན་ཆབ་སྲིད་ཀྱི་ལས་འགུལ་དེ་འདྲ་སླེབས་པར་སྔོན་དཔག་འདྲ་གནང་གི་ཡོད་དམ།
ལན། བོད་ནང་ལོག་ལ་ ༢༠༠༨ ལོར་བྱུང་བ་དེ་འདྲ་ཞིག་འབྱུང་ཁག་པོ་རེད་བསམ་གི་འདུག རྩ་བའི་ཆ་ནས་བོད་ནང་གི་བོད་མི་ཚང་ནས་འདིའི་ཐོག་ལ་དོ་སྣང་ཏན་ཏན་བྱ་གི་རེད། བཙན་བྱོལ་ནང་ཡིན་ནའང་བཀ྄འ་ཤག་གིས་དབུ་ཁྲིད་པའི་སྒྲིག་འཛུགས་ནང་དུ་ལས་རིམ་མང་པོ་ཞིག་བང་སྒྲིག་བཞག་ཡོད་པ་རེད། བཙན་བྱོལ་དུ་ལོ་ ༥༠ འཁོར་དུས་དྲན་དང་འབྲེལ་བའི་ཐོག་ནས་འཆར་གཞི་མང་པོ་ཞིག་སྒྲིག་ཡོད་པ་རེད། བོད་ནང་དུ་ལོ་སྔོན་པར་ཞི་བའི་ངོ་རྒོལ་བྱུང་བ་ནང་བཞིན་ཞིག་ཡོང་རྒྱུ་ནི་ཕལ་ཆེར་ཁག་པོ་རེད་བསམ་གི་འདུག གང་ཡིན་ཟེར་ན་ན་ནིང་གི་ཉམས་མྱོང་ལ་བལྟས་ནས་ད་ལོ་རྒྱ་ནག་གཞུང་གིས་ད་ལྟ་ནས་དམ་དུ་གཏོང་རྒྱུ་མགོ་བཙུགས་ཚར་བ་རེད་ལ། ལྷག་པར་དུ་གསུམ་བཅུ་དུས་དྲན་གཡས་གཡོན་དང༌། ལོ་ཧྲིལ་བོ་འདིའི་ནང་གི་གཞིས་བྱེས་བོད་མི་གཉིས་ཀྱིས་སྲུང་གཙི་བྱེད་པའི་ལས་འགུལ་མཐའ་དག་ལ་དམ་དྲག་ཤུགས་ཆེ་རུ་གཏོང་གི་རེད་འདོད། ལྷག་པར་དུ་ལོ་སྔོན་མར་བོད་ནང་དུ་དོན་རྐྱེན་ཆེན་པོ་དེ་འདྲ་ཞིག་བྱུང་བ་ནས་བཟུང་ད་ལྟའི་བར་རྒྱ་ནག་ནང་ཁུལ་དུ་རྒྱལ་སྤྱིའི་གསར་འགོད་པ་འགྲོ་ཆོག་པ་བཟོས་ཡོད་ཀྱང༌། བོད་ནང་དུ་མུ་མཐུད་དམ་དྲག་བྱས་ནས་གནས་བསྡད་ཡོད་དུས་ཙམ་ལ་་ངོ་རྒོལ་ཤུགས་ཆེན་པོ་ཡོང་ཐུབ་གི་མ་རེད་འདོད། བཙན་བྱོལ་ནང་ལ་མཚོན་ན་ལས་འགཡལ་སྤེལ་བ་ཡིན་ནའང་འཆར་གཞི་ཡོད་པའི་ཐོག་ནས་སྤེལ་དགོས་པ་དེ་གནད་འགག་ཆེན་པོ་རེད། ལྷག་པར་དུ་དམིགས་བསལ་ཚོགས་ཆེན་གྱི་རྗེས་ལ་རྒྱལ་བ་རིན་པོ་ཆེས་བོད་རྒྱ་འབྲེལ་མོལ་གྱི་གནས་སྟངས་སོགས་ཀྱི་ཐད་བར་གནས་ཡིན་ཅེས་གསུངས་ཡོད་པ་རེད། དེ་གསུངས་པའི་རྒྱུ་མཚན་གྱི་ཐོག་ནས་ང་ཚོས་རྒྱ་ནག་ལ་བསམ་བློ་གཏོང་བའི་གོ་སྐབས་སྤྲད་པ་ལྟ་བུ་ཞིག་རེད་བསམ་གྱི་འདུག
དྲི་བ། བོད་ནང་གི་འགྱུར་བ་ཆེ་ཤོས་ཤིག་ནི་འཚོ་བའི་ལམ་ལུགས་རེད། ལོ་ ༥༠ འཁོར་བའི་ཁ་མཚམས་འདི་ནས་བཟུང་ཆོལ་ཁ་གསུམ་གྱི་བོད་མིའི་འཚོ་བའི་ལམ་ལུགས་དེ་འབྲོག་པ་ནས་གྲོང་བརྡལ་ལ་བསྒྱུར་ཚར་གྱིན་ཡོད་པ་རེད། འདིའི་ཤུགས་རྐྱེན་སྐོར་ལ་དགོངས་ཚུལ་ཅི་ཡོད་དམ། རྒྱ་ནག་གིས་བོད་ནང་གི་འཛུགསསྐྲུན་གྱི་ཐད་ལ་བཙན་བྱོལ་བོད་མི་ཚོས་བམ་ཚུལ་འདོན་པ་དང༌། སློབ་སྟོན་བྱེད་པ། ལས་ཀར་མཉམ་ཞུགས་བྱས་ཆོག་ཚུལ་བཤད་པ་མ་རེད་དམ།
ལན། བཙན་བྱོལ་བོད་གཞུང་གི་ཕྱོགས་ནས་རྒྱལ་སྤྱིའི་གཞུང་དང་དབུ་ཁྲིད་དེ་ཚོར་གང་དགོས་ཀྱི་རོགས་རམ་ཐད་འབོད་སྐུལ་ཞུས་དང་ཞུ་བཞིན་པ་རེད། གཙོ་བོ་མིའི་བསམ་བློར་འགྱུར་བ་ཐེབས་མིན་དེ་བོད་ནང་གི་བོད་མི་ཚོར་རག་ལས་གི་རེད་བསམ་གྱི་འདུག བཙན་བྱོལ་བོད་མི་ཚོའི་ཕྱོགས་ནས་སློབ་སྟོན་དང་རོགས་རམ་ག་རེ་ཞིག་དགོས་ན་དེ་བརྒྱུད་ལམ་སོགས་ནས་ཐབས་ལམ་འཚོལ་དགོས་གི་རེད། རྒྱ་ནག་གིས་ད་ལྟ་འཛིན་པའི་སྲིད་བྱིས་དེ་ཧ་ཅང་གིས་ངན་པ་ཞིག་རེད། འདི་བོད་པའི་མི་རིགས་ཀྱི་ངོ་བོ་གནས་དང་མི་གནས་ལ་འཕྲལ་ཕུག་གཉིས་ཀ་ནས་ཉེན་ཁ་ཆེན་པོ་དང༌། ཐད་ཀར་འབྲེལ་བ་ཆགས་བསྡད་པ་དེ་འདྲ་ཞིག་རེད། བོད་ནང་གི་བོད་རིགས་བརྒྱ་ཆ་ ༧༠ ལྷག་འབྲོག་པར་བརྩི་གིནཡོད་ན། རྒྱ་ནག་གིས་ལོ་ ༥ རིང་འབྲོག་པ་བརྒྱ་ཆ་ ༨༠ ལྷག་གྲོང་བརྡལ་ལ་བསྒྱུར་གི་ཡིན་ཟེར། འདིའང་མྱུར་ཚད་ཆེན་པོ་ཞིག་གི་ཐོག་ལ་བསྡད་ཡོད་པ་རེད། འདིའི་སྐྱོན་ཆ་ནི་འབྲོག་པ་ཚང་མ་གྲོང་བརྡལ་བཟོས་ཚེ་འབྲོག་ས་ཚང་མ་གཞུང་བཞེས་གཏོང་གི་རེད། ད་སྐབས་གཞུང་བཞེས་གཏོང་སྐབས་ཁོར་ཡུག་སྲུང་སྐྱོབ་སོགས་རྒྱུ་མཚན་མང་དག་ཅིག་བགྲང་གི་རེད་དེ། དེ་རྗེས་མ་རྒྱ་ནག་གི་མི་འབོར་བོད་ས་ཁུལ་ལ་སྤོར་དུས་ཁོང་ཚོ་གཞིས་ཆགས་ས་བཟོ་གི་རེད། གཉིས་ཐད་ནས། ཆབ་སྲིད་ཀྱི་ཐད་ནས་སྟངས་འཛིན་བྱེད་བདེ་བོ་ཆགས་གི་རེད། ད་སྐབས་ལུང་པ་རེ་རེའི་འབྲོག་ཁྱིམ་རེ་རེར་དམག་མི་དང་ཉེན་རྟོག་པ་གཏོང་དགོས་ན་དཀའ་ལས་ཡོད་སྟབས། གྲོང་བརྡལ་བཟོས་པ་ཡིན་ན་སྟངས་འཛིན་བྱེད་བདེ་བ་ཆགས་གི་རེད། གནད་དོན་གཞན་ཞིག་ནི། ཐོག་མར་གསལ་བསྒྲགས་བྱས་སྐབས་དངུལ་ཕྱེད་ཀ་སོ་སོས་སྤྲད། དངུལ་ཕྱེད་ཀ་གཞུང་གིས་སྤྲོད་གི་ཡིན་ལབ་ཡོད་ཀྱང༌། ད་སྐབས་ཁང་བ་རྒྱག་པར་དངུལ་ཚང་མ་སོ་སོས་གཏོང་དགོས་ཀྱི་ཡོད་པ་རེད། གཉིས་ཐད་ནས་ལོ་ཐོག་མ་གསུམ་དེར་གཞུང་ངོས་ནས་ཕོགས་འདྲ་བོ་ཞིག་སྤྲོད་ཀྱིན་ཡོད་པ་རེད། འདི་ལ་བརྟེན་འབྲོག་པ་ཚོར་ལས་ཀ་བྱེད་པའི་གཤིས་ཀ་བརླག་འཇུག་པ་དང༌། རྗེས་མ་ཕོགས་ཐོབ་མེད་དུས་འཚོ་བ་སྐྱེལ་མི་ཤེས་པ་དེ་འདྲ་ཆགས་གིན་ཡོད་པ་རེད། འདི་ལྟར་བོད་མིའི་གཤིས་ཀར་གནོད་སྐྱོན་དང༌། ཆབ་སྲིད་ཀྱི་ཐོག་ནས་ཁོང་ཚོས་སྟངས་འཛིན་བྱེད་བདེ་བ་ཆགས་ཡོང་གི་ཡོད་དུས། གཙོ་བོ་བོད་ནང་གི་བོད་རིགས་ཚོས་བསམ་བློ་དང་རིག་པ་གྲུང་པོ་བྱེད་དགོས་པ་གལ་ཆེ་ཤོས་རེད་འདོད།
དྲི་བ། མི་མང་པོ་ཞིག་གིས་ ༢༠༠༩ ལོར་ཡང་རྒྱ་ནག་གི་འགྱུར་བ་གལ་ཆེན་རེ་ལ་རེ་བ་རྒྱག་གི་འདུག
ལན། རྒྱ་ནག་ལ་ཆབ་སྲིད་ཀྱི་འགྲོ་སྟངས་དེ་འདྲའི་སྟེང་ནས་དཀའ་ངལ་ཏན་ཏན་འཕྲད་གི་རེད་བསམ་གྱི་འདུག དཔལ་འབྱོར་གྱི་དཀའ་ངལ་དེ་ ༢༠༠༨ ལོའི་དཀྱིལ་ཙམ་ནས་འཛམ་གླིང་ལ་དཀའ་ངལ་འཕྲད་པ་ལྟར་འདིའི་ཤུགས་རྐྱེན་མངོན་གསལ་གྱིས་ཐེབས་ས་གཅིག་ནི་རྒྱ་ནག་རེད། དཀའ་ངལ་འདི་མུ་མཐུད་ནས་ལོ་གཉིས་གསུམ་རེར་འདུག་གི་རེད། འདི་ལྟར་དཔལ་འབྱོར་གྱི་དཀའ་ངལ་འཕྲད་ཡོང་བ་ཡིན་ན་འདི་ཆབ་སྲིད་ཀྱི་ངོ་བོར་བསྒྱུར་རྒྱུ་དེ་ལས་སླ་བོ་ཞེ་དྲག་ཅིག་རེད། ང་ཚོས་ལོ་རེ་ཟུང་གི་ནང་དུ་འགྱུར་བ་འགྲོ་གི་རེད་ལབ་ན་ཧམ་པ་ལྟ་བུ་རེད་དེ། འབྱུང་འགྱུར་གྱི་ལོ་ ༥ ནས་ ༡༠ རིང་ལ་ཆབ་སྲིད་ཀྱི་ལམ་ལུགས་ལ་འགྱུར་བ་འགྲོ་དགོས་པ་ནི་གཡོལ་ས་མེད་པ་ལྟ་བུ་ཞིག་ཆགས་ཡོད་པ་རེད་སྙམ།
