ཀུན་གཟིགས་༧པན་ཆེན་སྐུ་ཕྲེང་བཅུ་བ་ཆེན་པོ་མཆོག་སྐུ་མྱ་ངན་ལས་འདས་ནས་མི་ལོ་ཧྲིལ་བོ་ ༢༠ འཁོར་བར་རྗེས་དྲན་ཞུས་ཡོད་པ་རེད།
ཕྱི་ཚེས་ ༢༨ ཉིན་༧པཎ་ཆེན་ཨེར་ཏེ་ནི་ཞབས་ཞུ་ལས་དོན་ལྟེ་གནས་ཁང་དང་བཀྲ་ཤིས་ལྷུན་པོ་བླ་སྤྱི་ལྷན་ཁང་གཉིས་ཀྱིས། ༧པན་ཆེན་སྐུ་ཕྲེང་བཅུ་བ་ཆེན་པོ་མཆོག་སྐུ་མྱ་ངན་ལས་འདས་ནས་མི་ལོ་ཧྲིལ་བོ་ ༢༠ འཁོར་བར་རྗེས་དྲན་གྱི་གསར་འགོད་གསལ་བསྒྲགས་ཤིག་གནང་ཡོད་པ་དང༌། གསལ་བསྒྲགས་ཡིག་ཆ་དེའི་ནང་འཁོད་དོན། ༧པན་ཆེན་སྐུ་གོང་མ་མཆོག་གི་གཟུགས་སྐུའི་བཀོད་པ་ཆོས་དབྱིངས་སུ་འཐིམ་ནས་མི་ལོ་ ༢༠ འཁོར་བའི་དུས་དྲན་གྱི་ཉིན་མོ་ནས་བཟུང་གོང་གསལ་ཚོགས་པ་ཁག་གཉིས་ཀྱིས་གང་གི་བཀའ་དྲིན་རྗེས་མཚོན་ཆེད་དུ་ལོ་ངོ་ཧྲིལ་བོ་གཅིག་གི་རིང་ལས་འགུལ་སྣ་ཚོགས་ཤིག་སྤེལ་རྒྱུ་ཡིན་ཅེས་དང་། གལ་སྲིད་ཁོང་ཉིད་སྐུ་དངོས་སུ་བཞུགས་ཡོད་ཚེ། བོད་ས་བྱི་ལོའི་ཞི་རྒོལ་ཆེན་མོའི་སྐབས་སུ་རྒྱ་གཞུང་གིས་དྲག་གནོན་བྱས་པ་དེར་བཟོད་སྒོམ་ནམ་ཡང་གནང་མི་སྲིད་ཅེས་ཀྱང་བཀོད་ཡོད་པ་རེད།
༧པན་ཆེན་རིན་པོ་ཆེ་སྐུ་ཕྲེང་བཅུ་བ་མཆོག་ནི་སྤྱི་ལོ་ ༡༩༣༨ ལོའི་ཟླ་ ༢ ཚེས་ ༣ ཉིན་མདོ་སྨད་བིས་མདོར་འཁོན་རིགས་ཡབ་གུར་མགོན་ཚེ་བརྟན་དང་ཡུམ་བསོད་ནམས་སྒྲོལ་མ་ཟུང་གི་སྲས་སུ་འཁྲུངས་པ་དང༌། སྤྱི་ལོ་ ༡༩༥༡ ཟླ་ ༥ ནང་༧གོང་ས་མཆོག་ནས་༧པན་ཆེན་སྐུ་གོང་མའི་ཡང་སྲིད་དུ་ངོས་འཛིན་བསྐྱངས་ཤིང་བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་ཅེས་མཚན་གསོལ། སྤྱི་ལོ་ ༡༩༨༩ ལོའི་ཟླ་ ༡ ཚེས་ ༢༨ ཉིན་༧གང་སྐུ་གློ་བུར་དུ་དགོངས་པ་གཞན་གཤེགས་ཡོད་པ་རེད།
