ཨ་མདོ་རྔ་པའི་བོད་མི་ཞིག་ལ་ངོ་རྒོལ་སྐད་འབོད་ཀྱི་མགོ་འཁྲིད་མཁན་དང་ཉེན་རྟོག་ཁང་གཏོར་བཅོམ་བྱེད་མཁན། རྒྱལ་དར་མེར་བསྲེག་གཏོང་མཁན་བཅས་ཀྱི་ཉེས་མིང་འོག་ལོ་བཞི་ཡི་བཙོན་འཇུག་ཁྲིམས་ཐག་བཅད་འདུག
ཚེས་ ༣༠ ཉིན་ཀིརྟི་བྱེས་པ་གྲྭ་ཚང་གི་གྲྭ་དབུར་འཇམ་བཟོད་པས་འདི་གའི་གསར་ཁང་ལ་གནས་ཚུལ་སྤྲད་པ་ལྟར་ན། ༢༠༠༨ ལོའི་ཕྱི་ཟླ་ ༤ པའི་ནང་བོད་མིའི་ཞི་རྒོལ་སྐབས་ཀྱི་ཉེས་མིང་འོག་རྔ་པ་རྨེའུ་རུ་མའི་རུ་ཆེན་གཉིས་པའི་དབུར་འཇམ་ཚང་གི་རང་ལོ་ ༣༣ ལ་སོན་པའི་ཆོས་འཕེལ་འཇུ་བཟུང་བྱས་ཡོད་པ་དང༌། དེ་ནས་བཟུང་ནང་མི་ཚོས་ས་ཁུལ་གང་དང་བཙོན་ཁང་གང་དུ་བཅུག་ཡོད་པ་ཤེས་རྟོགས་ཐུབ་མི་འདུག ཟླ་ ༡༡ ཚེས་ ༤ ཉིན་ཆོས་འཕེལ་གྱི་ནང་མིར་རྔ་པའི་ཉེན་རྟོག་ཁང་ནས་ཁ་པར་ཡོང་སྟེ་ཆོས་འཕེལ་ལ་སང་ཉིན་ཁྲིམས་ཐག་གཅོད་རྒྱུ་ཡིན་ཚུལ་བཤད་པ་ལྟར། ནང་མི་དང་ཉེ་འབྲེལ་སོགས་རྔ་པ་རྫོང་ཐོག་གི་ཁྲིམས་ཁང་ལ་སོང་ཡང་མི་གཉིས་ལས་ཁྲིམས་ཐག་གཅོད་སར་ཡོང་གི་བཅུག་མེད་པ་དང༌། ཚེས་ ༤ ཉིན་རྔ་པ་རྫོང་ཁྲིམས་ཁང་གིས། ཆོས་འཕེལ་ནི་ངོ་རྒོལ་སྐད་འབོད་ཀྱི་མགོ་འཁྲིད་མཁན་དང༌། ཉེན་རྟོག་ཁང་གཏོར་བཅོམ་བྱེད་མཁན། རྒྱལ་དར་མེར་བསྲེག་མཁན་གསུམ་གྱི་གཙོ་གྲས་ཡིན་པས་ལོ་ ༤ རིང་བཙོན་འཇུག་གི་ཁྲིམས་ཐག་བཅད་ཡོད་པ་རེད།
དེ་རྗེས་ནང་མི་ཚོས་ཆོས་འཕེལ་བཙོན་ཁང་གང་དུ་བསྐྱལ་ཡོད་མེད་རྩད་གཅོད་བྱེད་སྐབས་ཁྲིན་ཏུའུ་གྲོང་ཁྱེར་ནས་ལེ་བར་ ༢༠༠ མཚམས་ཀྱི་མེན་ཡང་ཞེས་པའི་ཁྲིམས་ཁང་དུ་བསྐྱལ་ཡོད་འདུག བཙོན་པར་ཐུག་འཕྲད་དུ་བསྐྱོད་སྐབས་ཞང་ཐོག་གི་ཉེན་རྟོག་ཁང་ནས་ཆོག་མཆན་ཡི་གེ་ཁྱེར་ནས་འགྲོ་དགོས་པ་བཞིན་ཆོས་འཕེལ་གྱི་ནང་མི་ཞིག་ཐུག་འཕྲད་དུ་སོང་སྐབས། ཁང་པ་གཉིས་ཀྱི་བར་ཤེལ་གྱིས་བཅད་དེ་ཕར་ཚུར་མཐོང་ས་ནས་ཁ་པར་ནང་སྐད་ཆ་བཤད་དགོས་པ་དང༌། སྐད་ཆ་ཡང་རྒྱ་སྐད་མ་གཏོགས་བོད་སྐད་བཤད་མི་ཆོག་པ། དངུལ་མ་གཏོགས་ཅ་དངོས་དང་ཟ་མ་གང་ཡང་སྤྲོད་ལེན་བྱེད་བཅུག་མི་འདུག་པ་མ་ཟད། ཆོས་འཕེལ་གྱི་མིག་གཡོན་པས་ཅི་ཡང་མཐོང་མི་ཐུབ་པར་གྱུར་ཡོད་འདུག
