ཁྲག་གི་ལས་འགུལ།

རྒྱ་གར་བོད་པའི་གྲོགས་པོ་ཞིག་གིས་རྒྱ་གར་སྲིད་བློན་གྱི་མཚན་ཐོག་ལ་ཁྲག་གི་ཡི་གེ་བྲིས་ཏེ། བོད་རང་བཙན་ལ་རྒྱབ་སྐྱོར་དང༌། ༧གོང་ས་མཆོག་རྒྱ་གར་གྲོས་ཚོགས་ནང་གདན་ཞུ་བྱ་དགོས་པའི་རེ་འདུན་བཏོན་ཡོད།

རྒྱ་གར་ལྷོ་ཕྱོགས་བྷོ་པལ་དུ་ཡོད་པའི་མཱཧ་ངྷ་མཱ་གྷན་ངྷི་བོད་རང་བཙན་ལས་འགུལ་ཚོགས་པའི་ཚོགས་གཙོ་སྨན་པ་མཱ་ཧེ་ཤི་ཡཱ་ངྷི་ལགས་ཀྱིས་ཉེ་སྔོན་སྤྱི་ཟླ་ ༡༢ ཚེས་ ༡༠ ནས་མགོ་འཛུགས་ཀྱིས་བོད་དོན་ལས་འགུལ་སྤེལ་ཏེ། ཁ་སང་སྔ་དྲོའི་ཆུ་ཚོད་ ༡༡ སྟེང་རྒྱ་གར་བྱང་ཕྱོགས་ངྷ་རམ་ས་ལར་འབྱོར་ཏེ། དེར་ཡོད་བོད་མི་ཚོས་ཁོང་ལ་འཚམས་འདྲིའི་ཁ་བཏགས་སྒྲོན་ཏེ་དགའ་བསུ་ཞུས་སོང་།

ཁོང་གིས་ངྷ་སའི་རླངས་འཁོར་འབབ་ཚུགས་ནས་སོ་སོའི་ལག་པའི་སྟེང་ནས་ཁྲག་བཏོན་ཏེ། རྒྱ་གར་སྲིད་བློན་མཆོག་གི་མཚན་ཐོག་ལ། བོད་རང་བཙན་དེ་རྒྱ་གར་བདེ་འཇགས་དང་འབྲེལ་བ་ཡོད། བོད་ཀྱི་གནད་དོན་དེ་འགྲོ་བ་མིའི་ཆེད་དུ། འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱབ་སྐྱོར་བྱ་དགོས། ཏཱ་ལའི་བླ་མ་རྒྱ་གར་གྲོས་ཚོགས་ནང་གདན་འདྲེན་ཞུ་དགོས། ཞེས་བྲིས་སོང༌། ཁོང་ལ་རྒྱུས་ཡོད་ཚོས་བཤད་པ་ལྟར་ན། སྐུ་ཞབས་མཱ་ཧེ་ཤི་ཡཱ་ངྷི་ལགས་ཀྱིས་ལོ་བཅུ་གྲངས་གོང་ནས་རྒྱ་གར་གྱི་མངའ་སྡེ་དང་གྲོང་ཁྱེར་མང་པོའི་ནང་སྐོར་སྐྱོད་བྱས་ཏེ། སོ་སོའི་ཁྲག་གིས་རྒྱ་གར་སྲིད་བློན་དང་གནད་ཡོད་མི་སྣ་ཁག་གི་མཚན་ཐོག་ལ་ཡི་གེ་བྲིས་ཏེ་མང་ཚོགས་ཁྲོད་བོད་དོན་ལས་འགུལ་ཤུགས་ཆེན་སྤེལ་གྱིན་ཡོད་པ་རེད་ཟེར།

སྐབས་དེར་ཁོང་གིས་གསར་འགོད་པ་ཚོར་བརྗོད་དོན། ལས་འགུལ་འདི་ཉེ་སྔོན་སྤྱི་ཟླ་ ༡༢ ཚེས་ ༡༠ ནས་མགོ་འཛུགས་ཞུས་པ་ཡིན།

ད་ལོ་ནི་བོད་རང་བཙན་ཤོར་ཏེ་ལོ་ ༥༠ འཁོར་བའི་དུས་དྲན་ཆགས་ཡོད་སྟབས། ལས་འགུལ་འདི་ཡང་ཉིན་གྲངས་ ༥༠ ལ་སྤེལ་རྒྱུ་ཡིན། བོད་ལ་རང་བཙན་མེད་ན། རྒྱ་གར་གྱི་སྲུང་སྐྱོབ་དང་བདེ་འཇགས་ཟེར་བ་དེ་ཡོང་ཐབས་མེད་པ་ཞིག་རེད། གནད་དོན་དེ་རྒྱ་གར་མི་སེར་དཀྱུས་མ་ཚོས་ཤེས་རྟོགས་ཡོང་ཆེད། ང་རང་གིས་ ༡༩༩༤ ཙམ་ནས་བོད་དོན་ལས་འགུལ་སྤེལ་བ་ཡིན། བོད་རང་བཙན་དང་བོད་པའི་བདག་དབང་བོད་པར་ཡོད་དགོས་པ་དེ་རྒྱ་གར་སྲུང་སྐྱོབ་དང་འབྲེལ་བ་དམ་ཟབ་ཡོད་པའི་རྒྱུ་མཚན་གནས་ལུགས་དམངས་ཁྲོད་དུ་བསལ་བཤད་བྱས་སྐབས། མི་དམངས་ཚོ་ཧ་ལས་ཤིང་ཧོན་ཐོར་ཏེ། སྔོན་ཆད་པ་ཀི་སི་ཊན་དེ་ང་ཚོའི་དགྲ་ཆེ་ཤོས་ལ་ངོས་འཛིན་བྱེད་ཀྱིན་ཡོད་པ་ལས་རྒྱ་ནག་ལ་དོ་སྣང་མེད། ད་ལྟ་རྒྱ་ནག་གིས་ང་ཚོར་ཉེན་ཁ་བཟོ་བཞིན་ཡོད་པ་དང༌། བོད་པའི་རང་དབང་དེ་རྒྱ་གར་སྲུང་སྐྱོབ་ཐད་གལ་ཆེན་ཡིན་པ་ཤེས་སོང་ཟེར་ནས། བོད་དོན་ལ་དོ་སྣང་ཡོང་གིན་འདུག་ལ། སྲིད་བློན་གྱི་མཚན་ཐོག་ལ་ཡི་གེ་ཕུལ་བ་ཡང་མང་པོ་བྱུང་སོང༌། ངས་སྔོན་མ་ནས་འདི་ལྟར་ས་གནས་ཁག་ལ་ལས་འགུལ་སྤེལ་སྐབས་སོ་སོའི་ཁྲག་གིས་རྒྱ་གར་སྲིད་བློན་ལ་ཡི་གེ་འབྲི་བཞིན་ཡོད། ཐེངས་འདིའི་ལས་འགུལ་མུ་མཐུད་དུ་སྤེལ་ཏེ་ལྡི་ལི་ནས་མཇུག་བསྡུ་རྒྱུ་ཡིན། ཞེས་བརྗོད་བྱུང༌།