མི་རིགས་ལ་ཞེན་པ་དཀར་ཞིང་སྐད་ཡིག་ལ་དུང་ཞེན་ཟབ་པའི་བོད་རིགས་ན་གཞོན་ཁག་ཅིག་གིས་སྣེ་ཁྲིད་དེ། རྒྱལ་སྤྱིའི་སྐད་ཡིག་ཉིན་མོར་བོད་ཀྱི་སྐད་ཡིག་གི་གནས་བབ་གླེང་བའི་ལྷན་འཛོམས་ཀྱི་བགྲོ་གླེང་ཐོག་མ་བསྡུས་ཏེ། འཛམ་གླིང་གཅིག་གྱུར་དང་སྐད་ཡིག་གཅིག་བསྡུད་ཆེན་མོའི་མཐོ་རླབས་ཁྲོད་ནས་བོད་པའི་སྐད་ཡིག་གི་ལས་དབང་ལ་ཕྱིར་རྟོག་བྱས་ཡོད།
ཕྱི་ཚེས་ ༢༡ ཉིན་བཞུགས་སྒར་ཡོངས་གླིང་སློབ་གྲྭའི་ཚོགས་ཁང་དུ། བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག་འོག འཛམ་གླིང་སྐད་ཡིག་ཉིན་མོ་སྲུང་གཙི་བྱས་ཡོད་པ་དང༌། མཛད་སྒོ་དེའི་སྟེང་བོད་གཞུང་དཔེ་མཛོད་ཁང་གི་ན་གཱ་སངས་རྒྱན་བསྟན་དར་ལགས་དང་བོད་ཀྱི་དུས་བབ་གསར་ཤོག་གི་རྩོམ་སྒྲིག་པ་ལུང་རིག་རྒྱལ་ལགས། བོད་ཀྱི་བང་ཆེན་གསར་ཤོག་གི་རྩོམ་སྒྲིག་པ་གསེར་རྟ་ཚུལ་ཁྲིམས་ལགས་བཅས་ཆེད་དུ་གདན་འདྲེན་ཞུས་ཏེ། བོད་ཀྱི་སྐད་ཡིག་གླེང་བ། ཞུ་བའི་འཛམ་གླིང་སྐད་ཡིག་གི་འཕེལ་འགྲིབ་དང་འབྲེལ་བོད་ཀྱི་སྐད་ཡིག་གི་གནས་བབ་སྐོར་ལ། ཚོགས་ཞུགས་པ་ཡོངས་དང་མཉམ་དུ་བགྲོ་གླིང་གོ་བསྡུར་དང་དྲི་བ་དྲིས་ལན་གནང་ཡོད།
སྐབས་དེ་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་མི་དང༌། སྐད་ཡིག་ཚགས་པར་གྱི་རྩོམ་སྒྲིག་པ་རྟ་ནག་སྐལ་བཟང་ལུང་རིག་ལགས་ཀྱིས་བོད་ཀྱི་སྐད་ཡིག་རྒྱུན་འཛིན་ཚོགས་པ་ངོ་སྤྲོད་དང་སྦྲགས་འཛམ་གླིང་སྐད་ཡིག་ཉིན་མོ་གཙི་སྲུང་ཞུ་དགོས་པའི་དམིགས་ཡུལ་བརྗོད་དོན། བོད་ཀྱི་སྐད་ཡིག་རྒྱུན་འཛིན་ཚོགས་ཆུང་ཟེར་བ་འདྀ། སྤྱི་ལོ་ ༢༠༠༥ ལོར་ང་ཚོ་བོད་ནས་བལ་ཡུལ་སྣེ་ལེན་ཁང་ལ་གསར་དུ་འབྱོར་སྐབས། ཤེས་ཡོན་ལ་དོ་སྣང་ཡོད་པའི་གྲོགས་པོ་ཁག་ཅིག་འཛོམས་ཏེ། ཚོགས་པ་འདི་ཐོག་མར་མགོ་འཛུགས་ལྟ་བུ་བྱས་པ་ཡིན། ང་ཚོར་ད་སྐབས་ཚོགས་མི་ཉུང་ངུ་ཞིག་ལས་མེད་ལ། ཡོད་པ་དག་ཀྱང་གྲྭ་བ་གྲྭ་རྐྱང་དང་སློབ་མ། ལས་མེད་འགའ་རེ་ཡིན། སྤྱི་ལོ་ ༢༠༠༧ ཟླ་ ༡༠ ཙམ་ནས་ང་བོད་ཀྱི་སྐད་ཡིག་རྒྱུན་འཛིན་ཚོགས་པས་སྐད་ཡིག་ཚགས་པར་ཟེར་བ་འདི་གསར་དུ་འདོན་སྤེལ་བྱས་ཏེ། ད་བར་འདོན་ཐེངས་དྲུག ༦ ཙམ་དུས་ངེས་མེད་ཀྱིས་འདོན་སྤེལ་བྱེད་ཀྱིན་ཡོད།
སྤྱིར་འཛམ་གླིང་ནང་སྐད་ཡིག་དྲུག་སྟོང་ ༦༠༠༠ ལྷག་ཡོད་ཀྱང༌། དུས་རབས་ཀྱི་འཕེལ་འགྱུར་ཁྲོད་སྐད་ཡིག་ཕྱེད་ཙམ་རྩ་མེད་དུ་སོང་སྟེ། ད་ལྟ་སྐད་ཡིག་ ༣༠༠༠ ཙམ་ལས་ལྷག་མེད་པའི་གནས་ཚུལ་ཐོན་ཡོད། འཛམ་གླིང་མཉམ་འབྲེལ་རྒྱལ་ཚོགས་ཤེས་ཡོན་ལྷན་ཚོགས་ཀྱིས་ ༢༠༠༢ ལོའི་ཟླ་ ༢ ཚེས་ ༢༡ ཉིན་འཛམ་གླིང་སྐད་ཡིག་ཉིན་མོར་གཏན་འབེབས་བྱས་ཏེ། ད་ལྟའི་བར་ལོ་བདུན་ཙམ་འགྲོ་བཞིན་ཡོད། འཛམ་གླིང་སྐད་ཡིག་གཅིག་གྱུར་ཆེན་མོ་འདིའི་ཁྲོད། བོད་ཀྱི་སྐད་ཡིག་གི་གནས་བབ་ཀྱང་ཧ་ཅང་གཉན་འཕྲང་ཅན་ཞིག་ཏུ་སླེབས་ཡོད་པ་ཚང་མས་མཐོང་གསལ་རེད། དེར་བརྟེན། དེ་རིང་འདིར་ང་ཚོས་འཛམ་གླིང་སྐད་ཡིག་ཉིན་མོ་གཟབ་རྒྱས་ཤིག་སྲུང་གཙི་ཞུ་ཐུབ་མེད་ཀྱང༌། བོད་མི་རིགས་ཀྱི་བླ་སྲོག་ལྟ་བུར་གྱུར་བའི་སྐད་ཡིག་འདིའི་ལས་དབང་ལ་སེམས་འཚབ་ཀྱིས་ཀུན་ནས་བསླངས་ཏེ། འཛམ་གླིང་སྐད་ཡིག་ཉིན་མོ་འདི་སྲུང་གཙི་ཞུས་པ་ཡིན། དེ་རིང་གི་བགྲོ་གླེང་འདི་བརྒྱུད་དེ། བོད་པའི་སྐད་ཡིག་ཉམས་རྒུད་དུ་ཕྱིན་པའི་རྒྱུ་རྐྱེན་དང༌། མ་འོངས་པར་ཇི་ལྟར་སླར་གསོ་བྱེད་ཕྱོགས་བཅས་ལ་ཆེད་དུ་གདན་ཞུས་སྐུ་མགྲོན་རྣམ་པ་དང་ལྷན་དུ་ཚོགས་ཞུགས་པ་ཡོངས་ཀྱིས་བློ་ཐག་ཉེ་བོས་བགྲོ་གླེང་ལྷུག་པོ་ཡོང་རྒྱུར་རེ་སྐུལ་ཞུ་བཞིན་ཡོད། ཅེས་ངོས་སྤྲོད་གནང་བྱུང༌།
དེའི་རྗེས་བོད་གཞུང་དཔེ་མཛོད་ཁང་ཤེས་རིག་དཔར་སྐྲུན་སྡེ་ཚན་གྱི་འགན་འཛིན་ན་གཱ་སངས་རྒྱས་བསྟན་དར་ལགས་ཀྱིས་མི་རིགས་ཀྱི་སྐད་ཡིག་དང་མི་རིགས་དེའི་བསམ་བློ་གཉིས་ཀྱིས་ཕན་ཚུན་གཞོགས་འདེགས་བྱེད་ཀྱིན་ཡོད་སྐོར་གསུངས་དོན། སྤྱིར་ ༢༠༠༢ ལོ་འཛམ་གླིང་སྐད་ཡིག་ཉིན་མོ་སྲུང་གཙི་བྱེད་ཀྱིན་ཡོད་ཀྱང༌། བོད་པའི་སྤྱི་ཚོགས་ནང་ཐེངས་དང་པོ་དེ་ཆགས་ཡོད། ཞེ་དྲག་དགའ་བོ་བྱུང་སོང་ཐུགས་རྗེ་ཆེ་ཞུ་རྒྱུ་ཡིན། ང་ཚོའི་མི་རིགས་ཀྱི་འཐབ་རྩོད་ཁྲོད་ལས་དོན་མང་པོ་ཞིག་གནང་དགོས་ཀྱང༌། དེའི་ནང་གི་གལ་ཆེན་ཤོས་ཤིག་སྐད་ཡིག་སྲུང་སྐྱོབ་དེ་རེད། གནད་དོན་གཞན་དག་ཆབ་སྲིད་ཀྱི་དབང་གིས་དུས་ཡུན་རིང་པོ་འགོར་སྲིད་ལ། ཉི་མ་གཅིག་གཉིས་ནང་འགྲུབ་ཀྱང་སྲིད་པ་ཞིག་རེད། སྐད་ཡིག་ཉམས་པ་ཡིན་ན་དུས་ཚོད་ཐུང་ཐུང་ནང་སླར་གསོ་ཐུབ་པ་ཞིག་གཏན་ནས་མ་རེད། མི་རིགས་ཤིག་གི་སྐད་ཡིག་སྲུང་སྐྱོབ་བྱེད་པར་གལ་ཆེ་ཤོས་མི་རིགས་དེའི་བསམ་བློ་རེད། མི་རིགས་ཀྱི་སྐད་ཡིག་དང་མི་རིགས་དེའི་བསམ་བློ་གཉིས་གཅིག་ལ་གཅིག་བརྟེན་རེད། མི་རིགས་དེའི་གོལ་སྲོལ་བཟང་པོ་ཞིག་སྲུང་སྐྱོབ་བྱ་དགོས་ན། མི་རིགས་དེའི་ལྟ་བ་མ་ཉམས་པ་བྱ་རྒྱུ་གལ་ཆེན་པོ་རེད། བསམ་བློ་དེས་གྲོགས་བྱས་ཏེ་སྐད་ཡིག་སྲུང་སྐྱོབ་ལ་ཏན་ཏན་ཕན་ཐོགས་ཀྱིན་ཡོད།
ང་ཚོས་རང་ཉིད་བོད་པ་ཡིན་བསམ་པའི་སྤོབས་པ་བྱ་དགོས་ལ། སྤོབས་པ་དེ་མ་བརླགས་པ་བྱ་དགོས་ན། སྐད་ཡིག་དེ་གལ་ཆེན་པོ་ཡིན་པ་བཤད་མ་དགོས་པ་རེད། བོད་ཀྱི་སྐད་ཡིག་དེ་སོ་སོའི་སྐད་ཡིག་རེད། དེ་ཤེས་པ་ཡིན་ན་སོ་སོའི་མི་རིགས་སྲུང་སྐྱོབ་བྱེད་ཐུབ་ཀྱིན་ཡོད་པ་དང༌། དེ་རྐྱེན་བྱས་ཏེ་འཛམ་གླིང་མི་རིགས་གཞན་ལས་ལོགས་སུ་ཐུན་མོང་མ་ཡིན་པའི་ཁྱད་ཆོས་ཡོད་པ་མཐོང་དགོས་པ་དེ་གལ་ཆེན་པོ་རེད། དབྱིན་ཡིག་ཡག་པོ་ཤེས་ཀྱང་སོ་སོའི་སྐད་ཡིག་སྦྱོང་རྒྱུ་གལ་ཆེན་རེད། འཚོ་བར་དཀའ་ངལ་མེད་ཀྱང་སོ་སོའི་སྐད་ཡིག་སྦྱོང་རྒྱུ་གལ་ཆེན་རེད། ཐ་ན་སོ་སོ་ཉམས་ལེན་པ་ཞིག་ཡིན་ན་འདྲ་ལ། སྨན་པ་ཞིག་ཡིན་ནའང་འདྲ། ཆེད་ལས་ལ་ཐད་ཀར་འབྲེལ་བ་མེད་ཀྱང༌། སོ་སོའི་ངོ་རྟགས་སྲུང་ཆེད་སོ་སོའི་སྐད་ཡིག་དེ་གལ་ཆེན་པོ་རེད། ཅེས་གསུངས་སོང༌།
དེའི་རྗེས་བོད་ཀྱི་དུས་བབ་གསར་ཤོག་གི་རྩོམ་སྒྲིག་པ་ལུང་རིག་རྒྱལ་ལགས་ཀྱིས་བོད་ཀྱི་སྐད་ཡིག་སྲུང་སྐྱོབ་དེ་བགྲོ་གླེང་གོ་བསྡུར་ཙམ་མ་ཡིན་པར་དངོས་ཡོད་ལག་ལེན་ཐོག་གོམ་པ་སྤོ་རྒྱུར་དགོངས་པ་བཞེས་དགོས་པའི་སྐོར་གསུངས་དོན། རྒྱལ་སྤྱིའི་སྐད་ཡིག་གི་ཉིན་མོ་འདིར་གཙོ་བོ་མི་རིགས་སུ་ཞིག་ཡིན་རུང༌། སོ་སོའི་མ་སྐད་དེ་མ་ཉམས་རྒྱུན་འཛིན་བྱ་རྒྱུ་དེ་རེད། བོད་ཀྱི་སྐད་ཡིག་དེ་ཐོག་མར་བོད་མི་རིགས་བྱུང་བ་དང༌། དེའི་རྗེས་བོད་ཀྱི་སྐད་ཡིག་ཆགས་པ་སོགས་ཀྱི་འགྱུར་འགྲོས་ཐད་ནས་བཤད་ན། ད་ལྟ་བོད་ཀྱི་སྐད་ཡིག་དེ་ཚད་ངེས་ཅན་ཞིག་དུ་སླེབས་ཡོད་པ་རེད། བཙན་བྱོལ་སྤྱི་ཚོགས་ལྟ་བུར་མཚོན་ནའང་རྩ་བའི་ཡིག་རྨོངས་སེལ་ཡོད་པ་རེད། འོན་ཀྱང༌། རང་སྐྱ་ཐུབ་པ་ཞིག་ཡོད་དམ་ཟེར་ན་ཁག་པོ་རེད། ད་དུང་ཡར་རྒྱས་ལ་ཤུགས་སྣོན་རྒྱག་དགོས་པའི་བརྒྱུད་རིམ་ཞིག་རེད། ཁ་ཚ་དགོས་གཏུགས་ཀྱི་གནད་དོན་གང་ཞིག་ཡོད་ཟེར་ན། ང་ཚོས་འཛམ་གླིང་སྐད་ཡིག་ཉིན་མོ་གཙི་སྲུང་ཙམ་མ་ཡིན་པར། གནད་དོན་ཞིག་གམ། དམིགས་ཡུལ་ཞིག་གཞིར་བཟུང་སྟེ། དེ་ལ་གོམ་པ་ཇི་ལྟར་རྒྱག་རྒྱུར་བསམ་བློ་གཏོང་རྒྱུ་གལ་ཆེན་པོ་རེད།
ལོ་རྗེས་མ་ལྟ་བུར་མཚོན་ན། སྐད་ཡིག་སྲུང་གཙིའི་ཉིན་མོ་འདིར་ཐད་ཀར་ལག་ལེན་ཐོག་ལ་གོམ་པ་རྒྱག་ཐུབ་རྒྱུར་དགོངས་པ་བཞེས་རྒྱུ་གལ་ཆེན་རེད་སྙམ། སྔོན་མ་གངས་སྐྱིད་ཁུལ་གྱི་ལྷན་ཁང་ཁག་དང༌། ཚོགས་པ་སྒྲིག་འཛུགས་ཁག དེ་བཞིན་ཚོང་ཁང་ཟ་ཁང་སོགས་ཀྱི་སྒོ་བྱང་འགྲིག་མིན་ཐད་སྐད་ཆ་མང་པོ་བྱུང་ཡོད། དེ་དག་ཉིན་མོ་འདི་ལྟ་བུ་དང་བསྟུན་ཏེ། ཁ་ཡོད་ལག་ཡོད་ཀྱིས་ཞིབ་འཇིག་དང་བཅོས་སྒྱུར་གྱི་ལས་འགུལ་སྤེལ་རྒྱུ་གལ་ཆེན་རེད། སོ་སོའི་མིག་མདུན་དུ་ལྷག་ཡོད་པའི་གནད་དོན་ལ་ཁ་ཕྱོགས་ཏེ། ནུས་ཚད་འཇོན་ཚད་ཀྱིས་དངོས་ཡོད་ལག་ལེན་ཐོག་གོམ་པ་རྒྱག་དགོས། དེང་དུས་མཐུན་རྐྱེན་འཛོམས་པོ་རེད། དཔེར་ན། དྲ་རྒྱ་སོགས་བརྡ་འཕྲིན་བརྒྱུད་ལམ་ཁག་ཏུ་བོད་ཡིག་སྤྱོད་ཐུབ་མིན་གྱི་དཀའ་ངལ་སེལ་ཡོད། གཞོན་སྐྱེས་ཚོས་དྲ་རྒྱ་བརྒྱུད་དེ་ཕན་ཚུན་ལ་ཡི་གེ་གཏོང་བ་དང་གླེང་མོལ་བྱེད་པ་སོགས་སྟབས་བདེ་ཆགས་ཡོད། དེའི་ཐད་འགན་རྐང་འཁུར་མཁན་ང་ཚོས་ཀྱང་གཞོན་སྐྱེས་ཚོར་ཆེད་དུ་མཐུན་འགྱུར་དང་རོགས་རམ་བྱས་ཏེ། མ་འོངས་པར་ཡང་འདི་ལྟ་བའི་དཔྱད་བསྡུར་བརྒྱུད་དེ། གནད་དོན་དངོས་ལ་ཞུགས་རྒྱུར་འབད་བརྩོན་བྱ་དགོས། ཞེས་གསུངས་བྱུང༌།
དེའི་རྗེས་བོད་ཀྱི་བང་ཆེན་གསར་ཤོག་གི་རྩོམ་སྒྲིག་པ་གསེར་རྟ་ཚུལ་ཁྲིམས་ལགས་ཀྱིས་རྩོམ་པ་པོ་དང་རྩོམ་སྒྲིག་པ་དག་གིས་གོ་བསླ་བ་དང་དངོས་ཡོད་སྤྱི་ཚོགས་ལ་ཁ་ཕྱོགས་པའི་རྩོམ་ཡིག་འབྲི་རྒྱུ་གལ་ཆེན་ཡིན་སྐོར་གསུངས་དོན། འདས་པའི་ལོ་རྒྱུས་ལ་བལྟས་ན། བོད་ཀྱི་སྐད་ཡིག་དེ་གཙོ་ཆེ་ཤས་ནང་པ་སངས་རྒྱས་པའི་ཆོས་ལུགས་དང༌། དེ་དང་འབྲེལ་བའི་རིག་གཞུང་ཐད་བེད་སྤྱོད་བྱས་པའི་སྐད་ཡིག་ཅིག་ཆགས་ཡོད། དེ་འཛིན་སྐྱོང་སྤེལ་གསུམ་བྱེད་མཁན་དག་ཀྱང༌། ཆོས་ཕྱོགས་དང་འབྲེལ་བ་ཡོད་པ་དག་རེད། ད་ལྟའི་ཆར་བོད་ཀྱི་སྐད་ཡིག་དེ་དངོས་ཡོད་སྤྱི་ཚོགས་ནང་དར་ཁྱབ་བྱུང་ཡོད། བོད་ཀྱི་སྐད་ཡིག་ཤེས་མཁན་དེ་ཚོའི་ནང་ལ་མཛུབ་མོ་བཙུགས་ཏེ། སྐྱོན་གང་དུ་ལྷག་པ་དང་ནོར་འཁྲུལ་གང་དུ་བཟོས་པ། སྐད་ཡིག་དར་རྒྱས་ལ་འགོག་རྐྱེན་གང་དུ་འཕྲད་ཡོད་པ་སོགས་ལ་བསམ་བློ་གཏོང་རྒྱུ་གལ་ཆེན་པོ་རེད་སྙམ།
དཔེར་ན། སྔོན་མ་ངའི་གྲོགས་པོ་བོད་ཡིག་ཕྲན་བུ་ལས་མི་ཤེས་མཁན་ཞིག་གིས། ངེད་ཅག་ལབ་ན་ཅི་རེད། ཅེས་དྲི་བ་བཏོན་བྱུང༌། ངས་ཁོ་ལ་ངེད་ཅག་ལབ་ན། ང་ཚོའི་དོན་རེད་ཅེས་འགྲེལ་བཤད་བརྒྱབས་སྐབས། ཁོས་དེ་ལ་ངེད་ཅག་ཟེར་དགོས་དོན་མི་འདུག ང་ཚོ་ལབ་ན་འགྲིག་གི་རེད་ཟེར། གནད་དོན་དེས་ང་ལ་བློ་སྐྱེད་ལྟ་བུ་བྱུང་སོང༌། རྗེས་སུ་གང་ཐུབ་ཀྱིས་ཡུལ་ལུང་བྱེ་བྲག་པ་མ་ཡིན་པའི་ཐོག་ནས་ཚིག་གོ་བསླ་བའི་རིགས་འབྲི་རྒྱུར་འབད་བརྩོན་བྱས་པ་ཡིན། མི་མང་པོ་ཞིག་གིས་གོ་བསླ་བོ་བྱས་ན་བོད་ཀྱི་སྐད་ཡིག་གི་བྲོ་བ་ཉམས་འགྲོ་བ་རེད་ཟེར་མོད། ང་དང་ང་ལྟ་བུ་ཞིག་ལ་ངས་བྲིས་པའི་རྩོམ་གྱིས་ཕན་ཐོགས་པ་མ་རེད། ང་ལས་དམན་པ་ཞིག་གིས་ངས་བྲིས་པའི་རྩོམ་ཡིག་གོ་མི་ཐུབ། ངས་བྲིས་པའི་རྩོམ་གྱིས་ཕན་མ་ཐོགས་པ་རེད། དེ་བསམ་བློ་གཏོང་ས་གནད་འགག་ཅིག་རེད། ལོ་རབས་བརྒྱད་ཅུའི་དཀྱིལ་ནས་ནས་དུས་རབས་ཉི་ཤུ་མ་རྫོགས་པར་སྙན་ངག་གསར་རྙིང་བརྩད་པ་རེད། དེའི་རྗེས་ནས་ནང་ཆོས་ཀྱི་ཕན་གནོད་གླེང་བ་རེད། དེ་ལ་ཕན་ནུས་ཅུང་རེ་ཡོད་ཀྱང༌། སྤྱི་ཚོགས་ནང་ལ་ཁ་ཕྱོགས་ཐུབ་ཡོད་པ་མ་རེད་སྙམ། ད་ལྟ་སྐད་ཡིག་གཉིས་ཤེས་མཁན་དང༌། དེང་གི་རིག་གནས་ཤེས་མཁན་དག་གིས་བོད་པའི་སྐད་ཡིག་རྒྱུན་གནས་དང་དར་སྤེལ་ལ་ནུས་པ་འདོན་དགོས པ་རེད། ཅེས་གསུངས་བྱུང༌།
ཐུགས་རྗེ་ཆེ། མ་འོངས་པར་ང་ཚོས་རང་ནུས་ཅི་ཡོད་ཀྱིས་བོད་ཀྱི་སྐད་ཡིག་སྲུང་འཛིན་བྱ་གི་ཡིན། ཡང་བསྐྱར་ཐུགས་རྗེ་ཆེ།
བོད་ཀྱི་སྐད་ཡིག་སྲུང་སྐྱོབ་དང་འཛིན་སྐྱོང་གི་ལས་གཞི་འདི་འདྲ་ཞིག་སྤེལ་བ་ལ་ང་བོད་མི་དཀྱུས་མ་ཞིག་གི་དངོས་ནས་རྒྱབ་སྐྱོར་ཐུགས་རྗེ་ཆེ་ཞུ་རྒྱུ་ཡིན། དེ་མིན་ཁྱེད་ཅག་གི་སྐད་ཡིག་སྲུང་སྐྱོབ་དང་དར་སྤེལ་ཆེད་བྱེད་རྒྱུའི་ལས་དཀའི་ཁྲོད་ཕྲན་གྱིས་ཐུབ་ངེས་ཀྱི་ལས་དཀའ་འདྲ་ཡོད་ན་འབྲེལ་བ་བྱོས་དང་རིན་མེད་གླ་མེད་ཐོག་ལྷག་བསམ་དཀར་པོས་སློབ་སྦྱོང་གི་ཞོར་ལ་བསྒྲུབ་ངེས་ཡིན།
yonbay@yahoo.com
ཡང་བསྐྱར་ཐུགས་རྗེ་ཆེ།
དུས་ཡུན་རིང་པོ་ཞིག་ནས། ང་ཚོ་གཏམ་བཤད་ལ་གོམས་ཏེ། མི་ཆེ་ཆུང་ཚང་མས་གཏམ་བཤད་རིང་ཐུང་སྣ་ཚོགས་སྤེལ་རྒྱུར་གོམས་པ་དང་། གཏམ་བཤད་ཀྱི་རིམ་པ་གྲོལ་རྗེས་ཡོད་ཚད་མཇུག་རྫོགས་འགྲོ་གི་འདུག འདི་སྤྱི་ཚོགས་ཧྲིལ་བོ་ཞིག་གི་གཤིས་ཀར་གྲུབ། བླ་མ་ཚོས་ཁྲི་ཐོག་ནས་ཆོས་གསུངས། དཔོན་པོ་ཚོས་སྲིད་སྟེགས་ནས་ཆབ་སྲིད་བཤད། མཁས་པ་ཚོས་གཞུང་ལུགས་བཤད། བར་སྐབས་ཤིག་ནས་ང་ལྟ་བུའི་རིགས་ཀྱིས་ཀྱང་མུ་ཅོར་དང་ལབ་རྡོལ་སྣ་ཚོགས་བཤད། མི་མང་པོ་ཞིག་ཚོད་ཚོད་ལ་ཁ་ཇེ་བདེར་སོང་། དེ་བས་གཏམ་བཤད་ལ་ལྷག་པར་དུ་དབྱིངས་འཕར་ཏེ། ཕན་ཚུན་ལ་གཏམ་བཤད་སྤེལ་རེས་བྱས་ནས་དུས་ཚོད་བསྐྱལ།
དེ་བས་ངའི་འདོད་པ་འགའ་ཞིག་ཉིན་དེར་གྲོས་འདེབས་ལྟ་བུ་བྱས་པ་ཡིན། ངའི་རེ་བ་ལ་སང་ལོ་ནས་བཟུང་ང་ཚོས་གཏམ་བཤད་སྤེལ་མི་དགོས་པར། ཁྲོམ་ལ་ཐོན་ཏེ་མིག་གིས་མཐོང་ས་དང་ལག་པས་སྙོབ་ས་ནས་ལས་ཀ་རེ་བྱེད་དགོས་ཀྱི་འདུག དེ་བཞིན་ང་ཚོའི་སྐལ་བར་ཐོབ་ཅིང་གཞལ་དུ་མེད་པའི་བརྡ་འཕྲིན་གྱི་ནུས་པ་འདི་སྤྱོད་དགོས་ཀྱི་འདུག ཤེས་རིག་བཀའ་བློན་མཆོག་གིས་གཙོས་པའི་འགན་ཡོད་དང་འབྲེལ་ཡོད་ཀྱི་མི་རྗེ་དག་ཀྱང་ང་ཚོ་དང་མཉམ་དུ་ལས་འགུལ་འདིའི་ཁྲོད་དུ་ཞུགས་ན་སྙམ་པ་ཡིན། བོད་ཀྱི་སྐད་ཡིག་གི་ཐད་ནས་ང་རང་ཚོའི་དབང་དུ་ཡོང་བ་དང་ནུས་པས་ལྕོགས་པའི་ལས་ཀའང་རྫོགས་མེད་ཅིག་ཡོད་པར་འདོད་པས་རྒྱལ་སྤྱིའི་ཡུམ་སྐད་ཀྱི་ཉིན་མོ་སྲུང་གཙི་བྱེད་སྟངས་དེའང་ཁ་ཕྱོགས་འདི་འདྲ་ཞིག་ལ་འཁོར་ཐུབ་ན་བསམ་པ་ཡིན་ནོ། །
རྣམ་པ་ཚོས་རྒྱབ་སྐྱོར་བྱས་པ་ཐུགས་རྗེ་ཆེ། བགྲོ་གླེང་དེ་འཚོགས་ཚར་རྗེས་ངའི་སྣང་བར་རང་གི་རྒྱབ་ཀྱི་ཁུར་བོ་དེ་ཇེ་ཡང་ལ་བཏང་བའི་སྣང་བ་བྱུང་སོང༌། ལྷག་པར་དུ་སྙིང་ནས་བརྩེབའི་གྲོགས་པོ་ཚོའི་རྒྱབ་སྐྱོར་ལ་བརྟེན་ནས་འདི་འཚོགས་ཐུབ་པ་བྱུང་བས་རྣམ་པ་ཚོའང་གོ་སྐབས་འདི་དང་བསྟུན་ནས་ཐུགས་རྗེ་ཆེཞུ་བ་ཡིན།
འདི་ལྟ་བུའི་སྒྲོག་གླེང་ཡང་ཡང་འཚོགས་ན་དགེ་མཚན་ཆེ་པོ་འདུག
དེ་མིན་ཆེན་པོ་ཚོས་སྐད་ཆ་དག་ལ་སྙིང་བོ་ཅི་མེད་པ་རེད། ཁོ་པ་ཚོས་ར་མ་ལུག་གི་སྐད་ལྟ་བུར་བཤད་ནས་མཁས་མཉམ་སྟོན་རྒྱུ་ལས་མེད།
ལྷག་པར་དུ་ད་ཐེངས།《་བོད་ཀྱི་དུས་བབ་གསར་ཤོག་གི་རྩོམ་སྒྲིག་པ་ལུང་རིག་རྒྱལ་ལགས་ཀྱིས་བོད་ཀྱི་སྐད་ཡིག་སྲུང་སྐྱོབ་དེ་བགྲོ་གླེང་གོ་བསྡུར་ཙམ་མ་ཡིན་པར་དངོས་ཡོད་ལག་ལེན་ཐོག་གོམ་པ་སྤོ་རྒྱུར་དགོངས་པ་བཞེས་དགོས་པའི་སྐོར》གསུངས་པ་གནད་དུ་འཁེལ་བ་ཞིག་རེད།
༄༅། ། གྲོས་གཞི་རུ་ཕུལ་བ། ངའི་བསམ་ཚུལ་ཞིག་ལ་བོད་ཀྱི་ཐ་སྙད་གཅིག་གྱུར་མི་ཡོང་བའི་གནད་གཅིག་འདི་ན་འདུག་སྙམ།
རང་གིས་ཉེ་ལམ་དྲྭ་ཐོག་ཏུ་སྤེལ་བའི་ཟིན་བྲིས་ང་དང་ཀྲུང་གོ་པའི་སྐྲག་སྣང་ཞེས་པ་དང་ཀྲུང་གོའི་དངོས་སྐྱེལ་གྲུ་གཟེངས་ཞེས་པའི་མཇུག་ཏུ་ཀློག་མཁན་གྲོགས་པོ་རེ་ཟུང་གིས། ཀྲུང་གོ་ཞེས་པ་འདི་རྒྱ་ཡིག་རེད། རྒྱ་ནག་ཅེས་ཕྲིས་དང༌། འོ་ན་བོད་ལ་ཤིས་ཙང་ཞེས་འབྲི་རྒྱུ་ཡིན་ནམ། ཞེས་དང༌། ཀྲུང་ གོ་ལ་རྒྱ་ནག་ཅེས་བརྗོད་ན། བོད་ལ་ཤིས་ཙང་ཞེས་འབྲི་དགོས་པའི་བཙན་བཀའ་དེ་སུ་ཡིས་བཏང་ངམ། རང་རེ་ལ་སྐད་ཡིག་ཐུན་མོང་མ་ཡིན་པ་ཞིག་ཡོད་བཞིན་དུ་རྒྱའི་སྐད་ཡིག་ངེས་པར་དུ་ བཀོལ་སྤྱོད་བྱེད་དགོས་དོན་ཅི་ཞིག་ཡིན་ནམ། བོད་རང་ས་ནས་རྒྱའི་སྐད་ཡིག་མང་པོ་ཞིག་སྣང་མེད་ངང་བེད་སྤྱོད་བཏང་དང་གཏོང་ བཞིན་པའི་མཇུག་འབྲས་ལ་བོད་ཀྱི་ཐ་སྙད་མང་པོ་ཞིག་རྩ་ཡལ་ལྟ་བུར་ཕྱིན་པ་མིན་ནམ། ཞེས་སྤེལ་ཡོད་པ་འདི་དག་གིས་བདག་ལ་བསམ་གཞིགས་སྣ་ཚོགས་ཤིག་བྱེད་པའི་རམ་འདེགས་ ཐོབ་པ་མ་ཟད། དོགས་གཞི་མང་པོ་ཞིག་གི་སྒོ་གླེགས་ཀྱང་བྱས་སོང་བས་གྲོགས་པོ་དེ་དག་ལ་སྙིང་ནས་ བཀའ་དྲིན་ཆེ་ཞུ་བར་མ་ཟད། ཕྱིན་ཆད་ཀྱང་འདི་ལྟ་བུའི་དགོངས་འཆར་ལྷུག་བརྗོད་གནང་བའི་རེ་བ་ཆེ། བདག་གིས་ཟིན་བྲིས་རེ་ཟུང་བཀོད་པ་ནི་རང་ཉིད་རྒྱལ་འདོད་དང་གཞན་ལ་རྒོལ་འདོད་རྐྱང་བའི་ཆེད་མ་ཡིན་པར་རང་ གི་ཞན་ཆ་གང་ཡིན་ངོས་ཟིན་པ་དང་གཞན་གྱི་ཞན་ཆ་ལའང་དྲན་སྐུལ་རེ་བྱེད་ཨེ་ཐུབ་ སྙམ་པའི་སེམས་འདུན་གྱིས་སྤེལ་བ་ལགས་ན། སྤུན་གྲོགས་ཡོངས་ཀྱིས་ཀྱང་དེ་ལྟར་དགོངས་འཇགས་གནང་ནས་མཛུབ་སྟོན་ཡོད་པར་ཞུ། ཡིན་ནའང༌། སྐྱོན་བརྗོད་ཡོངས་རྫོགས་ལ་ལགས་སོ་ཞེས་པའི་ལན་འདེབས་རྐྱང་བྱས་ན་སྐབས་འགར་རང་ གི་ཞན་ཆ་གང་ནས་བྱུང་བ་གསལ་བོ་མི་རྟོགས་པས་མཚམས་ལན་རེར་རང་གི་འདོད་འདུན་དང་ བསྟུན་པའི་ལན་རེའང་ཕུལ་བ་ཡིན་ལ། དུས་དེར་དཔྱོད་ལྡན་དག་གིས་ཐུགས་ཁྲེལ་མི་བཞེས་པར་ལྷག་པར་ཡང་མ་དག་པའི་ཉེས་ སྐྱོན་ཁ་གསལ་གོ་བདེ་ཡིས་ངོ་སྤྲོད་གནང་རྒྱུ་མཁྱེན་མཁྱེན་ཞེས་ཀྱང་སྙིང་ནས་ཞུ་བ་ལགས་སོ།།
འདི་དག་ནི་ཞར་བྱུང་དུ་འཕྲོས་ནས་ད་ནི་བརྗོད་དོན་དངོས་དེ་ཞུས་ན་གོང་གི་གནད་ དོན་དེ་རིགས་ཇི་ལྟར་ལེགས་བཅོས་དང་ཐག་ཆོད་ཡོང་བའི་ཐད་ལ་བཤད་མི་ཤེས་པའི་གནད་ འགག་གལ་ཆེན་ཞིག་མཆིས་པ་འདྲ་བས་དཔྱོད་ལྡན་སྤུན་གྲོགས་ཚོར་གྲོས་སུ་ཞུ་འདོད་པ་ ལགས།
རྒྱ་ ནག་གཞུང་འབྲེལ་དང་བོད་ཀྱི་ཤེས་ཡོན་པའི་སྡེ་ཁག་སྒེར་གྱིས་བཀོལ་བའི་ཐ་སྙད་མི་ མཐུན་པས་བོད་ཀྱི་ཐ་སྙད་གཅིག་གྱུར་ལ་གནོད་ཚབས་ཐེབས་པ་མ་ཟད། གོ་བརྡ་སྤྲོད་པའི་ཐད་ནས་ཤིན་ཏུ་དཀའ་ཁག་ལ་འཕྲད་པར་འདུག དཔེ་ཞིག་གི་སྟེང་ནས་གསལ་བཤད་བྱས་ན་དེ་སྔོན་ངའི་ཟིན་བྲིས་ཤིག་གི་མཇུག་ཏུ་ ཡུན་ནན་བདེ་ཆེན་དུ་ཞེས་བཀོད་པར་ཀློག་མཁན་གྲོགས་པོ་ཞིག་གིས་ད་ལྟ་ཁྱེད་ ཀྱི་གནས་ཡུལ་ས་ཆ་དེར་བདེ་ཆེན་ནམ་རྒྱལ་ཐང་ཞེས་ཉིད་ཀྱིས་གསུངས་པ་ལྟར་ཆོག་མོད། དེ་ལ་ཡུན་ནན་ཞེས་བཙན་གྱིས་འབོད་དགོས་དོན་ཨེ་ཡོད་སྙམ། ཞེས་བརྗོད་འདུག སྐབས་དེར་ཡང་ངས་བསམ་གཞིགས་ཡང་ཡང་བྱས་ལ། ད་ལྟའང་འདང་རེ་བརྒྱབས་ན། ངས་གསལ་བཤད་ཅིག་ཞུ་དགོས་པ་ནི་གལ་སྲིད་ཡུན་ནན་མི་ཟེར་བར་རྒྱལ་ཐང་ཞེས་ བཀོད་ན། གཅིག་ནས་བདེ་ཆེན་ཁུལ་ཙམ་ཡོད་སའི་ས་གནས་དེ་ལས་བདེ་ཆེན་གྱི་རྫོང་གཞན་དག་ལ་ ཁྱབ་མི་ཐུབ་པས་རང་ཉིད་གནས་ས་ནི་ཁུལ་ཐོག་མ་ཡིན་པའི་ས་དེར་ལྷག་པར་ཡང་གོ་མི་ ནུས་པ་དང༌། གཉིས་ནས་རྒྱལ་ཐང་ཞེས་པ་ནི་བོད་གནའ་བོའི་མིང་ཞིག་ཡིན་ནའང་ ད་ལྟ་བཀོལ་སྤྱོད་མ་བྱས་པའི་དབང་གིས་བོད་ཀྱི་ལོ་རྒྱུས་ལ་རྒྱུས་མངའ་ཅུང་ཆེ་ བའི་རིགས་དང་ཁོང་ཚོའི་ས་ཆའི་མིས་མ་གཏོགས་ས་ཆ་གང་ཕྱོགས་ཤིག་ཡིན་པ་གཏན་ནས་གོ་ དཀའ་ཚོད་རེད། ཡང་བདེ་ཆེན་ཞེས་བཀོད་ན་ལེགས་པ་འདྲ་ཡང་ལྷ་སའི་བདེ་ཆེན་ རྫོང་ཞེས་པ་དེ་དང་གོ་ནོར་འབྱུང་ཉེན་ཆེ་བའི་སྐོར་ཞིག་བདག་གི་ལྷ་སའི་གྲོགས་པོ་ཞིག་གིས་ལབ་བྱུང༌། ཤམ་བྷ་ལའམ་སེམས་ཀྱི་ཉི་ཟླ་ཞེས་བཀོད་ན་བོད་རང་ གི་ལོ་རྒྱུས་དང་མི་མཐུན་པ་ཞིག་ཨེ་ཡོང་སྙམ་པའི་དོགས་པ་རབས་དང་རིམ་པར་མཆེད་ པས་སོམ་ཉི་མང་པོའི་ཀློང་ནས་འུ་ཐུག་ཐབས་ཟད་ལྟ་བུར་གྱུར་ནས་ཤམ་བྷ་ལའམ་སེམས་ཀྱི་ཉི་ཟླ་ཞེས་བཀོད་ན་བོད་རང་གི་ལོ་རྒྱུས་དང་མི་མཐུན་པ་དང་ཡུན་ནན་བདེ་ཆེན་ཞེས་ བཀོད་ནའང་བོད་ཀྱི་ལོ་རྒྱུས་དང་མི་མཐུན་པར་འདྲ་ནའང་ད་ལྟའི་དུས་སུ་རྒྱུགས་ཆེ་ བའི་ཐ་སྙད་ཡུན་ནན་བདེ་ཆེན་ཞེས་བཀོད་ན་གྲོགས་པོ་མང་པོ་ཞིག་གིས་ཤེས་རྟོགས་ འབྱུང་སླ་སྙམ་པའི་བསམ་ཚུལ་གློ་བུར་བ་ཞིག་གིས་དེ་ལྟར་བཀོད་པ་ལགས་མོད། ད་ལྟ་ཞིབ་འདང་རེ་བརྒྱབས་ན་དེའང་བླུན་པོ་གྲགས་རྗེས་འབྲངས་པའི་ནོར་འཁྲུལ་ཞིག་ཏུ་སོང་ཡོད་འདུག་སྙམ་པའི་ཞན་ཆ་དེ་ངོས་ཟིན་ནའང་ད་དུང་ཐ་སྙད་གང་བཀོད་ན་ཡང་དག་ཡིན་པའི་ངེས་པ་རྙེད་ མ་བྱུང་བས་སྤུན་གྲོགས་དག་ལ་དོགས་གཅོད་གནང་བའི་གྲོས་གཞི་རུ་ཕུལ་བ་ལགས།
དེ་མིན་གོང་བཤད་ལྟར་ཀྲུང་གོ་ཞེས་པའི་ཐ་སྙད་ལ་དབྱེ་ཞིབ་ཅིག་བྱས་ན། བོད་ནང་དུ་འགྲེམས་སྤེལ་བྱེད་པའི་རྒྱ་ནག་གཞུང་འབྲེལ་བོད་ཡིག་ཡིག་ཆ་དག་ལས་ནམ་ ཡང་ཀྲུང་གོ་ཞེས་བཀོད་པ་ལས་རྒྱ་ནག་ཅེས་བཀོད་མི་སྲིད་ལ།༼འདིའི་རྒྱུ་མཚན་ཞིབ་བརྗོད་མ་བྱས་ཀྱང་སྤུན་གྲོགས་དག་གིས་མཁྱེན་སྲིད་པས་གསལ་འགྲེལ་གྱི་ངལ་བ་མ་བྱས།༽ བོད་ མི་ཤེས་ཡོན་ཅན་གྱི་མི་སྒེར་རེ་ཟུང་གིས་རྒྱ་ནག་ཅེས་བཀོལ་ནའང་བོད་མི་ཕལ་ཆེ་ བས་རྒྱ་ནག་དང་ཀྲུང་གོ་གཉིས་དོན་གཅིག་མིང་གི་རྣམ་གྲངས་སུ་གོ་ཐུབ་ཀྱིན་མེད་པ་ འདྲ་སྟེ། བོད་མི་ཚོར་མི་ལོ་ལྔ་བཅུ་ཡས་མས་ཤིག་ལ་ཀྲུང་གོ་རྒྱལ་ཁབ་ཧ་ཅང་ཆེ།། མི་རིགས་ལྔ་བཅུ་ང་དྲུག་ཡོད།། ཅེས་གོ་བརྡ་སྤྲད་དེ་ཁ་བྱང་ལག་བྱང་དུ་སོང་དྲགས་པའི་བག་ཆགས་ཀྱིས་ད་ལྟ་བོད་མི་ མང་ཆེན་ཞིག་ལ་གོས་ཡོད་པ་འདྲ་བས་བསམ་ཞིབ་བྱེད་མཁན་རེ་ཟུང་མ་གཏོགས་རྒྱ་ནག་ ཅེས་བྲིས་ན་རྒྱ་རིགས་རྐྱང་པར་གོ་ཐུབ་ཀྱང་ཀྲུང་གོ་ཞེས་བྲིས་ན་དེ་ལས་ཆེན་པོ་ཞིག་ཏུ་གོ་འགྲོ། ཡང་བྱེས་བགྲོད་བོད་མི་ཡོངས་ཀྱིས་ཀྲུང་གོ་དང་རྒྱ་ནག་དོན་གཅིག་མིང་གི་རྣམ་གྲངས་སུ་གོ་སྟེ། ཀྲུང་གོ་ཞེས་པ་རྒྱ་སྐད་དང་རྒྱ་ནག་ཅེས་པ་བོད་སྐད་དུ་གོ་བར་བྱེད། དོན་ངོ་མའི་གནས་ཚུལ་ལས་བཤད་ན་བྱེས་བགྲོད་བོད་མིའི་གོ་བ་དེ་རྣལ་མར་སོང་འདུག་ པས་རང་ཡིད་འཐད་པའི་མགོ་ལྕོག་ལྡེམ་ཞིང་ལག་ལེན་དངོས་འབེབས་བྱས་ན་བཟང་བར་སྙམ་ཡང༌། བོད་ཁུལ་ས་ཆ་སོ་སོ་ནས་དེ་ལྟར་ལག་ལེན་བྱེད་མི་ཐུབ་པར་བསམས་ན་ཁ་སྟོང་ནང་གི་ ཚིག་སྟོང་དུ་སོང་ནས་གྲུབ་འབྲས་ལེགས་པོ་འཐོབ་སྲིད་དམ་སྙམ་པའི་དོགས་པ་ཡོང་གི་འདུག དེའི་རྒྱུ་རྐྱེན་གཙོ་བོ་ཡང་བོད་སྤྱི་ཚོགས་དངོས་ལ་གཞིགས་ནས་བཤད་ན། ད་རུང་རྒྱ་ནག་གཞུང་འབྲེལ་ཡིག་ཆ་དག་ལ་ཁྱབ་རྒྱ་ཅུང་ཆེ་བས་གཞུང་འབྲེལ་ཡིག་ཆ་ དག་ལས་མི་བཀོལ་བའི་ཐ་སྙད་རིགས་དག་ནི་མི་སྒེར་རེ་ཟུང་གིས་བཀོལ་ཀྱང་ཡོངས་ཁྱབ་བྱེད་དཀའ་ལ། དེ་ལས་ཀྱང་གོ་བ་གཞན་ཞིག་ཏུ་ལེན་སྲིད་པའང་ཡོད་འགྲོ།
ཀྲུང་གོ་ཞེས་པ་དཔེ་མཚོན་ཙམ་དུ་དྲངས་པ་ལས་དེ་མཚུངས་ཀྱི་རྒྱ་ནག་གཞུང་འབྲེལ་ གྱིས་གཏན་ཕབ་བྱས་པའི་ཐ་སྙད་བོད་རང་གི་སྐད་ཡིག་དང་མི་མཐུན་པ་མང་པོ་འདུག་པས་ གཞུང་འབྲེལ་གྱིས་བཀོལ་བའི་ཐ་སྙད་དང་མི་སྒེར་གྱི་བཀོལ་བའི་ཐ་སྙད་གཉིས་བར་ གཅིག་གྱུར་ཡོང་ཐབས་མེད་ལ། གལ་སྲིད་གཅིག་གྱུར་མ་ཡོང་ན་བོད་རང་གི་སྐད་ཡིག་ཉམས་ཞན་དུ་འགྱུར་བའི་གནད་དོན་ དུ་འགྲོ་ངེས་སྙམ་པས། གནད་དོན་དེ་ཇི་ལྟར་ཐག་གཅོད་བྱེད་འོས་པའི་ཐད་ནས་དགོངས་འཆར་གང་མང་རེ་གནང་ རོགས་ཞུ།
དོགས་ པ་ཁོང་སློང་གི་ཚུལ་དུ་ཡང་གཅིག་བཤད་ན། རྒྱ་ནག་ལ་བསྟུན་དགོས་མེད་པར་རང་གི་སྐད་ཡིག་རང་གིས་བེད་སྤྱོད་བྱས་ན་རེད་ཅེས་ སེམས་སྲིད་ཀྱང༌། གནས་སྐབས་རྒྱ་ནག་དང་མ་བསྟུན་པའི་རང་གི་སྐད་ཡིག་རང་གིས་སྤྱོད་རྐྱང་མིན་པ་ དང༌། ལྷག་པར་བོད་ནང་གི་སྤྱི་ཚོགས་དངོས་ལ་ཁྱབ་ཆེ་བའི་རླུང་འཕྲིན་དང་བརྙན་འཕྲིན། དུས་དེབ་དང་ཚགས་པར་སོགས་ལས་ཀྱང་མང་ཆེན་ཞིག་གཞུང་འབྲེལ་ཡིན་པ་དེ་དང་མི་ བསྟུན་པའི་མི་སྒེར་གྱི་ཐ་སྙད་རིགས་རྣམས་བོད་ཁུལ་ཡོངས་སུ་ཁྱབ་མི་ནུས་ལ། དེ་བས་ཀྱང་མི་སྒེར་ཤེས་ཡོན་ཅན་དག་ལ་མཚོན་ནའང་རང་རང་གི་འདོད་འདུན་དང་ཁོར་ ཡུག་ལ་ཤུགས་ཆེར་བསྟུན་པས། ཆེ་ཕྱོགས་ནས་བཤད་ན་དེང་རབས་ཐ་སྙད་གསར་བའི་རིགས་ལ་མདོ་དབུས་ཁམས་གསུམ་གྱི་ ཤེས་ཡོན་ཅན་རྣམས་ཀྱི་བཀོལ་སྤྱོད་བྱེད་པ་མི་འདྲ་བའི་དབང་གིས་ཡོངས་ཁྱབ་ཀྱི་ གེགས་སུ་སོང་འདུག
བསམ་ གཟས་ནས་ལྡོག་བརྗོད་བྱེད་པ་ཚོས་ཐ་སྙད་མང་ན་ལྷག་ཏུ་བཟང་བར་བཤད་སྲིད་ཀྱང༌། ཡུལ་ལུང་རེ་རེ་ནས་ཐ་སྙད་དང་སྐད་ཆ་མི་འདྲ་བ་མང་པོ་བཀོལ་སྤྱོད་བྱས་དྲགས་པའི་ དབང་གིས་ད་ལྟ་ང་ཚོས་སྤྱི་སྐད་ཅིག་འདེམས་དགོས་ནའང་ཅི་འདྲའི་འཐེན་འཁྱེར་མང་ པོ་བྱེད་དགོས་ཨང༌། ད་དུང་མུ་མཐུད་དུ་ཐ་སྙད་གསར་བ་དག་ལའང་གཅིག་གྱུར་མ་བྱུང་ཚེ་བོད་ཀྱི་སྐད་ཡིག་ ངང་ངམ་ཤུགས་ཀྱིས་འཐོར་ཞིག་ཏུ་གྱུར་ཨེ་འགྲོ་སྙམ་ནས་སེམས་པ་བདེ་མི་ནུས་པའི་ དེ་སྐད་ཞུས་པ་ལགས་སོ།།
གནས་ སྐབས་འདི་ཙམ་གྱིས་འཐུས་པར་བྱ་ལ་ད་དུང་མུ་མཐུད་དུ་ཕྱོགས་འདིར་བསམ་བློ་བཏང་ ནས་ཁ་གསབ་བྱེད་དགོས་པའི་རིགས་དག་དྲན་ཡོང་ན་དུས་ལྟར་སྤུན་གྲོགས་དག་ལ་གྲོས་ སུ་འབུལ་ངེས་པས་ཁྱེད་མཁྱེན་དཔྱོད་ཡངས་པའི་སྤུན་གྲོགས་དག་གིས་ཀྱང་ཐུགས་ངལ་ལ་ མི་འཛེམས་པར་མཛུབ་སྟོན་གནང་རྒྱུར་ཡང་དང་ཡང་དུ་རེ་ཞུ་བྱས་པ་ཡིན།
ཞེས་ ཕྱི་ལོ་༢༠༠༩ཟླ་༢ཚེས་༢༡སྟེ་འཛམ་གླིང་སྐད་ཡིག་དུས་ཆེན་གྱི་ཉིན་རང་གི་སྐད་ཡིག་ དང་འབྲེལ་བའི་གྲོས་གཞི་ཞིག་ཞུས་པ་འདི་ཡང་སྐད་ཡིག་ཉམས་མེད་གོང་འཕེལ་འབྱུང་ བའི་རྒྱུ་རུ་ལན་བརྒྱར་སྨོན།
སྤྱི་ལོ་ ༢༠༠༩ ལོའི་ཟླ་ ༢ ཚེས་ ༢༡ ཉིན་འབའ་མཁྱེན་དཔལ་ནས་ཕུལ།
འདི་ན་ཧ་ཅང་ལོ་རྒྱུས་ཀྱི་དོན་སྙིང་ལྡན་པའི་བྱ་འགུལ་ཞིག་རེད ། བྱ་འགུལ་གོ་སྒྲིག་བྱེད་མཁན་དང་ཚོགས་བཅར་བ་ཡོངས་ལ་སྙིང་ཐག་བ་ནས་ཐུགས་རྗེ་ཆེ་ཞུ ། གཤམ་དུ་སྐུ་ཞབས་འབའ་མཁྱེན་དཔལ་ལགས་ཀྱིས་རྒྱལ་སྤྱིའི་སྐད་ཡིག་དུས་ཆེན་སྟེང་ཕུལ་བའི་གྲོས་གཞི་གལ་ཆེན་ཞིག་འདིར་བཀོད་ཆོག་བའི་དགོངས་འཁྲོལ་ཡོང་བར་ཞུ །