སྐྱབས་བཅོལ་གྱི་མི་ལོ་ལྔ་བཅུར་ཕྱིར་མིག་བལྟས་པ།

བོད་ས་རྒྱ་ལག་ཏུ་ཤོར་ཞིང་༧གོང་ས་མཆོག་གཙོས་པའི་བོད་མི་འབུམ་ཕྲག་ཁྱིམ་མཚེས་རྒྱལ་ཁབ་ཁག་ཏུ་གྱར་ཏེ། མི་ལོ་ཧྲིལ་བོ་ ༥༠ འཁོར་བའི་དུས་སྐབས་འདིར། བཙན་བྱོལ་བོད་གཞུང་གིས་ད་ལོའི་གསུམ་བཅུའི་དུས་དྲན་ནས་སང་ལོའི་གསུམ་བཅུའི་དུས་དྲན་བར་ལོ་འཁོར་གཅིག་རིང་ལྔ་བཅུའི་དུས་དྲན་གཟབ་རྒྱས་ཤིག་སྲུང་གཙི་ཞུ་འཆར་ཡོད་པའི་གོ་སྐབས་དང་བསྟུན་ཏེ། འདི་གའི་གསར་འགོད་པས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་སུ་བཅར་འདྲི་ཞུས་ཡོད།

དྲི་བ། ད་ལོའི་གསུམ་བཅུའི་དུས་དྲན་ནས་བོད་པ་བཙན་བྱོལ་དུ་འབྱོར་ཏེ་མི་ལོ་ལྔ་བཅུ་འཁོར་བའི་དུས་དྲན་གཞི་རྒྱ་ཆེན་པོ་ཞིག་གོ་སྒྲིག་བྱས་ཡོད་པའི་ཐད། བོད་མི་དམངས་སྤྱི་འཐུས་ལྷན་ཚོགས་ལ་གྲ་སྒྲིག་གང་འདྲ་ཡོད་དམ།

ལན། ད་ལོ་ནས་སང་ལོའི་བར་ལོ་ཧྲིལ་བོ་གཅིག་རིང་གི་དུས་དྲན་གྱི་མཛད་རིམ་ཡོངས་རྫོགས་བཀའ་ཤག་གིས་བཞེས་ཏེ། ད་ལྟ་ལས་འཆར་གཏན་འབེབ་གནང་གྲུབ་འདུག བཀའ་ཤག་གིས་སྔོན་མ་ལྔ་བཅུའི་དུས་དྲན་གོ་སྒྲིག་ཚོགས་ཆུང་བཙུགས་སྐབས། དེའི་ནང་བོད་མི་མང་སྤྱི་འཐུས་ལྷན་ཚོགས་ཚུད་ཡོད་པ་མ་རེད། ང་རང་གིས་གོ་ཚོད་ལྟར་ན། སྐབས་དེར་སྤྱི་འཐུས་རྒྱུན་ལས་ནས་བཀའ་ཤག་ལ་ཕྱག་འཕྲིན་ཞིག་ཕུལ་ཡོད་ཀྱང༌། ཐག་གཅོད་མ་བྱུང་བར་ཡུན་རིང་ཞིག་འགོར་འདུག་ལ། རྗེས་སུ་ཡང་བསྐྱར་སྤྱི་འཐུས་ཀྱིས་གོ་བསྡུར་བྱས་མཐར། ལྔ་བཅུའི་དུས་དྲན་གྱི་འགན་ཆ་ཚང་བཀའ་ཤག་གིས་བཞེས་རྒྱུ་དང༌། མཛད་འཆར་ཁག་གི་ནང་སྤྱི་འཐུས་མཉམ་ཞུགས་བྱ་དགོས་རིགས་ལ་མཉམ་ཞུགས་གནང་རྒྱུ་ཐག་གཅོད་བྱུང་འདུག ལྔ་བཅུའི་དུས་དྲན་རིང་གི་བོད་མི་དམངས་སྤྱི་འཐུས་ལྷན་ཚོགས་ཀྱི་ལས་འགན་གལ་ཆེ་ཤོས་དེ། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་ཆགས་ཡོད། དེ་མ་ཡིན་པའི་ལྔ་བཅུའི་དུས་དྲན་གྱི་ཆེད་དུ་ལས་རིམ་གཞན་མེད། གང་ཡིན་ཟེར་ན། འཛིན་སྐྱོང་བཀའ་ཤག་གི་ལས་རིམ་དང་བོད་མི་མང་སྤྱི་འཐུས་ཀྱི་ལས་རིམ་ཞེས་ཁག་གཉིས་བྱུང་ན། རྣམ་འགྱུར་ཡག་པོ་ཡོང་གི་མ་རེད།

དྲི་བ། བཀའ་ཤག་གིས་གསལ་བསྒྲགས་བྱས་པའི་ལྔ་བཅུའི་དུས་དྲན་གྱི་མཛད་རིམ་ཐད་ལྟ་སྟངས་གང་འདྲ་ཡོད་པ་དང༌། བོད་མི་མང་སྤྱི་འཐུས་ལྷན་ཚོགས་རང་ངོས་ནས་ལྔ་བཅུའི་དུས་དྲན་སྲུང་གཙི་ཞུ་ཕྱོགས་ཐད་དགོངས་འཆར་འདྲ་ཡོད་དམ། 

ལན། འདས་པའི་ལོ་ལྔ་བཅུའི་རིང་བོད་ཕྱི་ནང་གཉིས་སུ་ལས་འགུལ་མང་པོ་ཞིག་སྤེལ་ཡོད་པ་རེད། ཕྱི་རྒྱལ་ཁག་གི་བོད་དོན་རྒྱབ་སྐྱོར་བ་ཚོས་ཀྱང་ལས་འགུལ་མང་པོ་ཞིག་སྤེལ་ཡོད། ལས་འགུལ་ཇི་སྙེད་ཅིག་སྤེལ་བའི་ནང་གྲུབ་འབྲས་ཐོན་ཡོད་མེད་གཉིས་ཀ་བྱུང་ཡོད། གོ་སྐབས་འདི་བརྒྱུད་དེ་འདས་བའི་ཉམས་མྱོང་ཕྱོགས་སྡོམ་དང་བསྐྱར་ཞིབ། བླངས་དོར་ཡག་པོ་ཞིག་བྱས་ཏེ། མ་འོངས་པར་བོད་པའི་རྩ་དོན་བསྒྲུབ་ཕྱོགས་ལ་བྱེད་སྒོ་རྣམ་བཞག་ཅི་ཡོད། ལས་འགུལ་རྣམ་གྲངས་ཅི་སྤེལ་སོགས་ལ་འཆར་འགོད་དང་གྲ་སྒྲིག་བྱ་རྒྱུའི་གོ་སྐབས་རེད། མི་སྒེར་ཅིག་གི་མི་ཚེ་ནང་ལོ་ལྔ་བཅུ་ཟེར་ན་རིང་པོ་རེད་དེ། རྒྱལ་ཁབ་ཅིག་དང་མི་རིགས་ཤིག་གི་འཐབ་རྩོད་ནང་དེ་ཙམ་རིང་པོ་མ་རེད། འོན་ཀྱང༌། བོད་ཀྱི་ས་རྒྱ་ཆེན་པོ་ཞིག་ཏུ་བོད་མིའི་གྲངས་ཀ་ཉུང་ཉུང་ཡིན་སྟབས། མ་འོངས་པར་ལོ་ལྔ་བཅུར་སྒུག་ཐབས་རྩ་བ་ནས་ཡོད་པ་མ་རེད། འབྱུང་འགྱུར་ལོ་བཅུ་གྲངས་ནང་བདེན་མཐའ་སེལ་ཐབས་ལ་འཆར་གཞི་སྒྲིག་དགོས་པའི་གནས་སྟངས་ཆགས་ཡོད། བོད་མི་དམངས་སྤྱི་འཐུས་ལྷན་ཚོགས་ཀྱིས་ཀྱང༌། ད་ལོ་ཆབ་སྲིད་ཁོ་ནའི་ཆེད་དུ་ནང་ཁུལ་གྱི་ཚོགས་འདུ་ཐེངས་ཁ་ཤས་ཤིག་འཚོགས་འཆར་ཡོད།

དྲི་བ། འདས་པའི་མི་ལོ་ལྔ་བཅུའི་རིང་གཞིས་ལུས་རྒྱ་ཆེའི་མི་དམངས་ཀྱི་རྒྱལ་གཅེས་ལྷག་བསམ་དང༌། རྩ་དོན་འཐབ་རྩོད་ཀྱི་འདུན་པ་སོགས་ལ་ངོས་འཛིན་གང་འདྲ་གནང་གིན་ཡོད་དམ།

ལན། འདས་པའི་ལོ་ངོ་ལྔ་བཅུའི་རིང་རྒྱ་གཞུང་གིས་བོད་ནང་ལ་གཡོན་ཐལ་ཆེ་བའི་སྲིད་ཇུས་འདྲ་མིན་སྤེལ་ཏེ། བོད་མིའི་མངོན་འདོད་དང་མི་འཚམ་པའི་ལས་གཞི་སྣ་ཚོགས་བཏིང་ཡོད། འོན་ཀྱང༌། བོད་མི་ཚོས་སྙིང་སྟོབས་དང་ཆོད་སེམས་ལ་འགྱུར་བ་མེད་པར་གདོང་ལེན་ཁ་གཏད་བཅག་ཡོད། མ་འོངས་པར་ཡང་རྒྱ་གཞུང་གིས་སྲིད་ཇུས་གང་འདྲ་ཞིག་སྤེལ་ཡང༌། བོད་ནང་གི་བོད་མི་ཚོས་སྔར་བཞིན་བརྟན་རླིང་གིས་ངོ་རྒོལ་གྱི་ལས་འགུལ་སྤེལ་རྒྱུ་ཡིན་པ་ཧ་ཅང་གསལ་བོ་རེད། ལྷག་པར་དུ་ཉེ་ཆར་ལོ་གསར་གྱིས་མཚོན་པའི་ལས་འགུལ་དག་ལ་བལྟས་ན། འཚེ་མེད་ཞི་བའི་གནས་ཚད་ཧ་ཅང་མཐོ་བོར་སླེབས་ཡོད་པ་གསལ་བོར་རྟོགས་ཐུབ་ཀྱིན་འདུག མ་འོངས་པར་ཡང་ལས་འགུལ་གང་འདྲ་ཞིག་སྤེལ་ཡང༌། འཚེ་བ་མེད་པ་དང་དྲག་སྤྱོད་མིན་པའི་ལྟ་བ་གཞི་རྩར་འཛིན་དགོས་ལ། རྒྱ་ནག་མི་དམངས་ལ་ཕོག་ཐུག་མི་འགྲོ་བ་གནང་དགོས། ༧གོང་ས་མཆོག་གིས་ཐག་གཅོད་གང་འདྲ་ཞིག་གནང་ཡང་དེར་བོད་མི་ཡོངས་ཤར་སྐྱོད་བྱ་ཐུབ་ན། བོད་མིའི་རྩ་དོན་དེའང་རླབས་ཆེན་ཞིག་ནས་འགྲུབ་ཡོང་བའི་ཡིད་ཆེས་ཡོད།

དྲི་བ། འདས་པའི་བགྲང་བྱ་ལྔ་བཅུའི་རིང་གི་བོད་དོན་འཐབ་རྩོད་ཀྱི་གྲུབ་འབྲས་དེ་ད་ཆར་གནས་བབ་གང་འདྲ་ཞིག་ཏུ་སླེབས་ཡོད་པར་ངོས་འཛིན་བྱེད་ཀྱིན་ཡོད་དམ།

ལན། ང་ཚོར་མངོན་འདོད་གང་འདྲ་ཞིག་ཡོད་པ་དེ་རྒྱ་ནག་གཞུང་ལ་གསལ་བོ་བཟོས་ཚར་ཡོད། ད་སྐབས་ང་ཚོས་མཐར་བསྐྱལ་ཚར་བ་རེད། དེ་གྲུབ་འབྲས་ཆེན་པོ་ཞིག་ལ་ངོས་འཛིན་བྱེད་ཆོག་གི་རེད་སྙམ། ད་བར་བོད་རྒྱ་གཉིས་སྐད་ཆ་ཐེངས་མང་བཤད་ཀྱང༌། ང་ཚོའི་མངོན་འདོད་ངོ་མ་གང་ཡིན་པ་གསལ་བོ་བཟོ་ཐུབ་ཡོད་པ་མ་རེད། སྤྱིར་ཨ་རིའི་གྲོས་ཚོགས་འགྲོ་བ་མིའི་ཐོབ་ཐང་ལྷན་ཚོགས་སྟེང་བསྩལ་བའི་ཞི་བའི་གྲོས་འཆར་དོན་ཚན་ལྔ་དང༌། སི་ཊ་སི་སྦག་གི་གསུང་བཤད། ཉེ་ཆར་རྒྱ་ནག་ལ་ཕུལ་བའི་རང་སྐྱོང་གི་འཆར་ཟིན་སོགས་ལ་འགྱུར་བ་ཆེན་པོ་ཕྱིན་ཡོད་ཀྱང༌། ང་ཚོའི་ལངས་ཕྱོགས་རྩ་བ་ཉིད་ནས་ནོར་མེད། སྔོན་མ་ལོ་བརྒྱ་ཕྲག་གི་འགྱུར་འགྲོས་དེང་སྐབས་ལོ་བཅུ་གྲངས་ནང་འགྲོ་བཞིན་ཡོད། ཞི་བའི་གྲོས་འཆར་དོན་ཚན་ལྔ་དང་སི་ཊ་སི་སྦག་གི་གསུང་བཤད་ཀྱི་རྗེས་ལོ་ ༢༠ ཙམ་ཕྱིན་པའི་རིང་འགྱུར་བ་མང་པོ་ཞིག་ཕྱིན་ཡོད། འོན་ཀྱང༌། བོད་རྒྱའི་དཀའ་རྙོག་སེལ་མ་ཐུབ་པ་དེ་རྒྱ་གཞུང་གི་མགོ་ཁྲིད་ཚོར་ཐུག་ཡོད། ཁོ་ཚོར་ཆབ་སྲིད་ཀྱི་འདུན་པ་ཞིག་ཡོད་ན། བོད་པའི་དཀའ་རྙོག་སེལ་དེ་ཞེ་དྲག་དཀའ་མོ་མ་རེད་ལ། རྒྱ་ནག་གི་སྲིད་འཛིན་ཧུའུ་ཅིན་ཐའོ་དང་སྲིད་བློན་ཝོན་ཅ་པའོ་གཉིས་ཀྱི་རིང་ལ་བོད་ཀྱི་གནད་དོན་སེལ་བ་ཡིན་ན། རྒྱ་ནག་གི་ལོ་རྒྱུས་ནང་སྤྱི་ཚོགས་འཆམ་མཐུན་གྱི་གཞིར་རྩ་ཟིན་པ་རེད་ལ། སྲིད་འཛིན་ཧུའུ་ཅིན་ཐའོ་ཡི་ཁ་ནས་བཤད་པ་དོན་ལ་གནས་སོང་བ་རེད།

དྲི་བ། བཙན་བྱོལ་བོད་གཞུང་གི་འདས་པའི་ལོ་འཁོར་ལྔ་བཅུའི་རིང་གི་ཕྱི་འགྲེལ་སྲིད་ཇུས་ཀྱི་གནས་བབ་དང༌། ཕྱི་རྒྱལ་ཁག་གི་གཞུང་དམངས་གཉིས་ཀྱི་བོད་དོན་ལ་རྒྱབ་སྐྱོར་གྱི་གནས་བབ་གང་འདྲར་ངོས་འཛིན་བྱེད་ཀྱིན་ཡོད་དམ།

ལན། རྒྱལ་སྤྱིའི་ནང་གི་བོད་པར་རྒྱབ་སྐྱོར་དང་བོད་བཙན་བྱོལ་གཞུང་གི་ཕྱི་འབྲེལ་གྱི་གནས་བབ་དེ་ཚད་ངེས་ཅན་ཞིག་ཏུ་སླེབས་ཡོད། འོན་ཀྱང༌། ང་ཚོའི་ལས་དོན་བྱེད་སྟངས་དང་ལངས་ཕྱོགས་འཛིན་ཕྱོགས་ཏག་ཏག་ཅིག་འདུག་མ་ཐུབ་པ་ཡིན་ན། རྒྱལ་སྤྱིའི་ནང་གི་རྒྱབ་སྐྱོར་བརླག་རྒྱུར་ཉེན་ཁ་ཆེན་པོ་ཡོད། རྒྱལ་སྤྱིའི་རྒྱབ་སྐྱོར་ཚད་མཐོར་སླེབས་དོན། ༧གོང་ས་མཆོག་གི་གཟི་བརྗིད་དང༌། འཚེ་མེད་ཞི་བའི་ཐབས་ལམ་བརྟན་བཟུང་བྱས་པས་རེད། དེར་བརྟེན། ཞི་བདེ་ལ་དགའ་བའི་རྒྱལ་སྤྱིའི་མི་དམངས་ཚོས་བོད་པའི་གནད་དོན་དེ་ཞི་བའི་ཐོག་ནས་སེལ་རྒྱུར་རེ་བ་རྒྱག་གིན་ཡོད། ད་ལྟའི་ཆར་བོད་གཞུང་དང་ཕྱི་རྒྱལ་ཁག་གི་འབྲེལ་ལམ་ཡག་པོ་ཡོད་ལ། རྒྱལ་སྤྱིའི་བོད་དོན་རྒྱབ་སྐྱོར་གྱི་གནས་ཚུལ་ཡང་མཐོན་པོ་རེད། རྒྱབ་སྐྱོར་དེ་དག་གིས་ནུས་པ་འཐོན་གྱིན་འདུག་གམ་ཟེར་ན། བསམ་བློ་གཏོང་དགོས་པ་ཞིག་ཆགས་ཡོད། ང་ཚོའི་རེ་བ་ལྟར་གྲུབ་འབྲས་འཐོན་མེད། སོ་སོའི་རྒྱལ་ཁབ་ཀྱི་ཁེ་ཕན་ཨང་དང་པོ་བཞག་སྟེ། བོད་དོན་ཐོག་རྒྱབ་སྐྱོར་གྱི་ལས་ཀ་བྱེད་ནུས་པ་འཐོན་པ་ཞིག གནས་སྟངས་མང་

པོ་ཞིག་གི་དབང་གིས་ཁག་པོ་ཆགས་ཡོད།

དྲི་བ། ཐེ་ཝན་གཙོས་པའི་རྒྱལ་ཁབ་ཁག་ཅིག་གིས་སྔོན་མ་བོད་གཞུང་དང་འབྲེལ་བ་གཏིང་ཟབ་ཡོད་ཀྱང༌། རྗེས་སུ་རིམ་གྱིས་འབྲེལ་ལམ་ཉམས་ཆག་ཏུ་སོང་ཡོད་པ་དང༌། གོ་ཐོས་སུ་བོད་དོན་རྒྱབ་སྐྱོར་ཚོགས་པ་རེ་ཟུང་གིས་ཀྱང༌། བོད་དོན་ལ་རྒྱབ་སྐྱོར་བྱེད་རྒྱུ་མཚམས་འཇོག་བྱས་ཡོད་རབས་འདུག་པ་བདེན་པ་རེད་དམ།

ལན། ཐེ་ཝན་ནང་ཁུལ་ཀྱི་ཆབ་སྲིད་ལ་འགྱུར་ལྡོག་ཆེན་པོ་འགྲོ་བཞིན་ཡོད། སྔོན་མ་དམངས་གཙོ་ཚོགས་པ་གཞུང་འཛིན་ཚོགས་པ་རེད། དེང་སྐབས་གོ་མིན་ཏང་ཚོགས་པ་གཞུང་འཛིན་ཚོགས་པ་ཆགས་ཡོད། གོ་མིན་ཏང་ཚོགས་པའི་གཞིར་རྩའི་ལྟ་གྲུབ་རྒྱ་ནག་དང་བར་ཐག་ཉེ་བོ་རེད་ཡིན་སྟབས། རང་བཞིན་གྱིས་ང་ཚོའི་བར་གྱི་འབྲེལ་བ་ཉམས་ཆག་ཏུ་འགྲོ་སྲིད་ཀྱང༌། དེར་ང་ཚོའི་ངོས་ནས་ལས་དོན་བྱ་རྒྱུ་དམིགས་བསལ་གང་ཡང་མེད། རྒྱ་ནག་གིས་ཐེ་ཝན་རྒྱ་ནག་གི་ཆ་ཤས་ཡིན་པར་ངོས་ལེན་བྱ་དགོས་ཟེར་ཡང༌། ང་ཚོས་ཐེ་ཝན་རྒྱ་ནག་གི་ཆ་ཤས་ཡིན་མིན་ཐེ་ཝན་མི་དམངས་ཀྱི་ཐག་གིས་གཅོད་དགོས་པ་ཞིག་རེད་ཟེར་གྱིན་ཡོད། དེ་མིན་རྒྱལ་ཁབ་གཞན་ལ་སྔར་འབྲེལ་བ་ཡོད་པ། ད་ལྟ་འབྲེལ་ལམ་ཆད་ཡོད་པ་དེ་འདྲ་ཡོད་པ་མ་རེད་བསམ་ཡོད། བོད་གཞུང་དང་འབྲེལ་བ་ཡོད་པའི་རྒྱལ་ཁབ་ཁག་ནི། ཨ་རི་དང་ཡུ་རོབ་གཙོས་པའི་ཡར་ཐོན་ཅན་གྱི་རྒྱལ་ཁབ་ཁག་རེད། ལྷོ་ཨ་རི་དང་ཨ་ཧྥི་རི་ཁ། ཨེ་ཤ་ཡའི་རྒྱལ་ཁབ་ཁག་ཅིག་དང༌། ལྷག་པར་དུ་ཁ་ཆེ་རྒྱལ་ཁབ་ཁག་ཅིག་ཏུ་ང་ཚོས་འབྲེལ་བ་བྱེད་ཐུབ་མེད། རྒྱལ་ཁབ་དེ་དག་ཁོ་རང་ཚོའི་ནང་ཁུལ་དུ་ཆབ་སྲིད་དང་དཔལ་འབྱོར་གྱི་དཀའ་རྙོག་མང་ཐག་ཆོད་ཅིག་ཡོད་སྟབས། གཞན་གྱི་བདེ་སྡུག་ལ་ལྟ་བའི་གོ་སྐབས་ཡོད་པ་མ་རེད། ཨེ་ཤ་ཡའི་རྒྱལ་ཁབ་ཁག་ཅིག་ལ་རྒྱ་ནག་གི་ཤུགས་རྐྱེན་སླེབས་ཏེ་བོད་པར་འབྲེལ་བ་མ་བྱུང་བ་རེད།

དྲི་བ། བོད་གཞུང་གིས་མཉམ་འབྲེལ་རྒྱལ་ཚོགས་ནང་རེ་བ་རྒྱག་རྒྱུ་མཚམས་འཇོག་བྱས་ཡོད་ཀྱང༌། དེང་སྐབས་བོད་གཞུང་གིས་བསྐྱར་དུ་འཛམ་གླིང་མཉམ་འབྲེལ་རྒྱལ་ཚོགས་སོགས་སུ་རེ་འདུན་འདོན་བཞིན་འདུག་དོན་ཅི་ཡིན་ནམ།

ལན། མཉམ་འབྲེལ་རྒྱལ་ཚོགས་ནང་འགྱུར་བ་ཤུགས་ཆེན་ཞིག་མ་སོང་བར་རྒྱལ་ཚོགས་ནང་ནས་བོད་དོན་གླེང་ཐབས་མེད་པ་གསལ་བོ་རེད། མཉམ་འབྲེལ་རྒྱལ་ཚོགས་དེ་རྒྱལ་ཁབ་སྟོབས་ཆེན་ལྔས་དབང་སྒྱུར་བྱས་ཡོད། རྒྱ་གར་དང་ཉི་ཧོང་སོགས་རྒྱལ་ཁབ་ཁག་ཅིག་གིས་མཉམ་འབྲེལ་རྒྱལ་ཚོགས་ལ་འགྱུར་བ་གཏོང་རྒྱུར་རེ་བ་རྒྱག་གིན་ཡོད་ཀྱང་ནུས་པ་འཐོན་ཐུབ་ཀྱིན་མེད། སྔོན་མ་བོད་མིར་རང་ཐག་རང་གཅོད་ཀྱི་ཐོབ་ཐང་སྤྲོད་དགོས་ཞེས་གྲོས་ཆོད་བཞག་ཡོད་ཀྱང༌། ལག་ལེན་བསྟར་རྒྱུ་ཁག་པོ་ཆགས་ཡོད། འོན་ཀྱང༌། ང་ཚོས་རེ་བ་རྒྱག་ས་གཙོ་བོ་དེ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ནང་བོད་དོན་བསྐྱལ་ཐབས་བྱེད་ཀྱིན་ཡོད། འོན་ཀྱང༌། ང་ཚོས་མཉམ་འབྲེལ་རྒྱལ་ཚོགས་ལ་རེ་བ་ཆེན་པོ་བརྒྱབས་མེད་ནའང༌། སྒྲིག་འཛུགས་གལ་ཆེན་ཞིག་ཡིན་སྟབས། དུས་ནས་དུས་སུ་གནས་ཚུལ་འཁྱོལ་ཐུབ་པ་བྱ་རྒྱུ་གནད་འགག་ཆགས་ཡོད། ང་ཚོར་དེ་ལས་ལྷག་པའི་རེ་བ་ཞིག་ཁག་པོ་རེད། 

དྲི་བ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་དང༌། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་ཀྱི་ལས་དོན་བྱེད་ཕྱོགས་དང་ལྟ་གྲུབ་འཛིན་སྟངས་ལ་ཁྱད་པར་ཡོད་དམ།

ལན། ད་ལྟའི་ཆར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ ༥༠ ཙམ་ཡོད་པ་རེད། དེ་ལོ་གསུམ་རེ་མཚམས་སུ་ཚོགས་འདུ་ཐེངས་གཅིག་རེ་འཚོགས་ཀྱིན་ཡོད། མི་འགྱངས་པར་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་འཚོགས་འཆར་ཡོད་པ་རེད། དེར་སྔར་དང་མི་འདྲ་བར་རྒྱལ་ཁབ་མང་པོའི་འཐུས་མི་ཞུགས་རྒྱུ་དང༌། གྲོས་གཞི་དང་ལས་དོན་ལག་ལེན་བསྟར་ཕྱོགས་གྲ་སྒྲིག་བཅས་ལ་རེ་བ་རྒྱག་གིན་ཡོད། ཕྱིའི་རྒྱལ་ཁབ་ཁག་གི་གྲོས་ཚོགས་མང་པོ་ཞིག་ཏུ་བོད་དོན་རྒྱབ་སྐྱོར་བ་ཡོད་ཀྱང༌། སྐབས་རེར་སོ་སོའི་ལས་དོན་གྱི་དབང་གིས་ཚོགས་འདུར་ཞུགས་མ་ཐུབ་པ་ཡོང་གིན་ཡོད། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་དང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་ཚོགས་མི་མང་པོ་འདུ་འཛོམས་ཐོག བོད་དོན་གླེང་སློང་གི་སྡིངས་ཆ་གལ་ཆེན་ཞིག་ཆགས་ཡོད། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་མང་ཆེ་བས་ཐོག་མར་བོད་མིའི་ཆོས་དང་རིག་གཞུང་ལ་དགའ་ཞེན་སྐྱེས་ཏེ། རིམ་གྱིས་བོད་པའི་རྩ་དོན་འཐབ་རྩོད་ལ་རྒྱབ་སྐྱོར་བྱས་པ་ཆགས་ཡོད།

དྲི་བ། སྤྱི་འཐུས་ལྷན་ཚོགས་དེ་ཁྲིམས་བཟོ་ལྷན་ཚོགས་ཤིག་ཡིན་སྟབས། དུས་ནས་དུས་སུ་བཙན་བྱོལ་བོད་མིའི་བཅའ་ཁྲིམས་གཙོས་པའི་ཁྲིམས་སྒྲིག་ཁག་ལ་འགན་འཁུར་དགོས་པ་ཆགས་ཡོད། ལྔ་བཅུའི་དུས་དྲན་དང་བསྟུན་ཏེ། ཁྲིམས་སྒྲིག་ལ་བསྐྱར་ཞིབ་དང་ལེགས་བཅོས་འདྲ་དགོས་པར་མཐོང་གིན་ཡོད་དམ།

ལན། བོད་པའི་དམངས་གཙོ་དབུ་བརྙེས་ཏེ་མི་ལོ་ལྔ་བཅུ་ཕྱིན་ཡོད་ཀྱང༌། ༧གོང་ས་མཆོག་གི་དགོངས་གཞི་ནང་ལྟར་ང་ཚོས་གོམ་པ་སྤོ་ཐུབ་ཡོད་པ་མ་རེད། སྤྱི་ལོ་ ༡༩༩༡ བོད་མི་དམངས་སྤྱི་འཐུས་སྐབས་བཅུ་གཅིག་པའི་དུས་ནས་འགྱུར་བ་ཤུགས་ཆེན་བཏང་ཡོད། ད་ལྟའི་བཙན་བྱོལ་བོད་གཞུང་གི་བཅའ་ཁྲིམས་གཏན་འབེབས་བྱས་ཏེ་ལོ་ ༡༨ ཙམ་ལས་སོང་མེད། བཅའ་ཁྲིམས་ཐོག་མར་གཏན་འབེབ་བྱེད་སྐབས་ནས་བཙན་བྱོལ་གྱི་གནས་སྟངས་ལ་གཞི་བཞག་སྟེ་བཟོས་ཡོད་སྟབས། བཅའ་ཁྲིམས་སྤྱིའི་སྒྲོམ་གཞི་བོད་ནང་ལོག་རྒྱུ་མ་བྱུང་བར་འོས་འཚམ་ཡིན་པར་ངོས་འཛིན་བྱེད་ཀྱིན་ཡོད། ད་ཆར་བཅའ་ཁྲིམས་རྩིས་པའི་སྒྲིག་གཞི་ཁག ༢༢ ཙམ་ཡོད། དེ་དག་ལ་དུས་ནས་དུས་སུ་གྲོས་ཚོགས་ནས་བསྐྱར་ཞིབ་དང་ལེགས་བཅོས་བྱེད་ཀྱིན་ཡོད། སྤྱི་ཡོངས་ཀྱི་ཐོག་ནས་འགྱུར་བ་ཞིག་གཏོང་དགོས་པར་མཐོང་གིན་མེད། སྤྱི་འཐུས་གྲོས་ཚོགས་ནང་དུའང་དེ་འདྲའི་བསམ་ཚུལ་བྱུང་མ་སོང༌། འོན་ཀྱང༌། སྒྲིག་གཞི་གཏན་འབེབ་བྱེད་ཕྱོགས་དེ་ཁྱེད་ཀྱིས་གསུངས་པ་ལྟར། ཡུལ་དུས་གནས་བབ་ལ་མཐུན་དང་མི་མཐུན། ལས་དོན་དངོས་དང་འབྲེལ་བ་ཡོད་མེད་སོགས་ལ་བསྐྱར་ཞིབ་ཅིག་དགོས་པར་མཐོང་གིན་ཡོད་ལ། ཐེངས་འདིའི་གྲོས་ཚོགས་ཀྱི་རྗེས་སུ་ཟུར་དུ་ཚོགས་ཆུང་ཞིག་བཙུགས་ཏེ་ཞིབ་འཇུག་བྱ་འཆར་ཡོད།

དྲི་བ། བཙན་བྱོལ་བོད་གཞུང་གི་ལྷན་ཁང་མ་ལག་དང་བཅས་པའི་ལས་དོན་བྱེད་ཕྱོགས་དང༌། ཁྲིམས་སྒྲིག་གི་འགྲོ་སྟངས་སོགས་ཀྱི་ཐོག་ལ་དགོངས་ཚུལ་གང་འདྲ་ཡོད་དམ།

ལན། བཙན་བྱོལ་བོད་གཞུང་གི་གཞུང་ཞབས་ལས་བྱེད་ཚོའི་གོ་གནས་སྤར་བ་དང་ཕབ། གསར་དུ་བསྐོ་བ་དང་གནས་དབྱུང་གཏོང་སོགས་ནི། ང་ཚོས་གཏན་འབེབ་བྱས་པའི་གཞུང་ཞབས་འདེམས་ལྷན་གྱི་སྒྲིག་གཞི་དེ་རེད། ང་ཚོ་དགའ་འོས་པ་ཞིག་ལ་ད་ལྟའི་བར་བཙན་བྱོལ་བོད་གཞུང་ནང་ལྐོག་ཟ་རུལ་སུངས་ཀྱི་གནད་དོན་ཞེ་དྲག་ཉུང་ཉུང་རེད། དེ་འདྲའི་ཚབས་ཆེན་གྱི་གནད་དོན་མ་བྱུང་བ་ཡིན་ན། ལས་བྱེད་གནས་དབྱུང་ཟེར་བ་དེའང་རང་བཞིན་གྱིས་མེད་པ་ཞིག་རེད། གནས་སྟངས་དེའི་གང་ཞིག་གསལ་བཤད་བྱེད་ཀྱིན་ཡོད་ཟེར་ན། བཙན་བྱོལ་གཞུང་གི་ལས་ཀ་བྱེད་མཁན་ཚོས་སོ་སོའི་ལྟོ་གོས་ཀྱི་ཆེད་མ་ཡིན་པར། ༧གོང་ས་མཆོག་དང་བོད་གཞུང༌། རྩ་དོན་བཅས་ཀྱ་ཆེད་དུ་ལྷག་བསམ་དང༌། དྲང་བདེན་ལ་གཡོ་བ་མེད་པར་ཧུར་ཐག་བྱེད་ཀྱིན་ཡོད་པ་མཚོན་ཐུབ། ལས་བྱེད་གསར་བ་དང་ལོ་ཆུང་ཚོ་གནས་རིམ་མཐོན་པོར་སླེབས་པ་དེ། ཡིག་རྩལ་བཏང་སྟེ་དྲུང་གཞོན་དང་ཟུང་གཞོན་ཆགས་པ་རེད། འོན་ཀྱང༌། གནས་རིམ་ལྟར་སོང་བ་ཡིན་ན་ལོ་བདུན་རེ་མཚམས་སུ་གནས་རིམ་འཕར་གྱིན་ཡོད། ཁོ་ལ་ཤེས་འཇོན་མེད་ཀྱང་འགྲོ་སྟངས་ཤིག་གི་དབང་གིས་གནས་རིམ་འཕར་འགྲོ་བཞིན་ཡོད། དགོས་མཁོ་ཅན་དང་དམིགས་བསལ་ཅན་གོ་གནས་སྤར་རྒྱུ་དེ་གལ་ཆེན་ཡིན་རུང་ང་ཚོའི་སྒྲིག་གཞིའི་ནང་འཇུག་ཐུབ་ཡོད་པ་མ་རེད།  མི་རབས་བརྗེ་འགྲོ་བཞིན་ཡོད་སྟབས། ལས་བྱེད་རྒན་རབས་པ་མང་པོ་ཞིག་བགྲེས་ཡོལ་དུ་ཕྱིན་ཏེ། ལས་དོན་ཉམས་མྱོང་གིས་མ་འདང་བ་ཏན་ཏན་ཡོང་གིན་འདུག དེ་དག་འགྱུར་བ་གཏོང་རྒྱུ་དཀའ་ངལ་ཞིག་འཕྲད་ཡོད་ས་རེད།