རྟོན་བཞི་འཇུག་ལྡོག་མ་བྱེད།

ཡིག་ནོར་ཡོད་ན་དག་ཡིག་ལ་ལྟོས། གཞན་གྱིས་ནོར་བཅོས་གནང་བར་ལམ་སང་ཐུགས་རྗེ་ཆེ་ཞུ་མི་ཐུབ་ཀྱང་ཨེ་ཐུབ་ལ་འབད་པ་བྱོས། ཨུ་ཚུགས་ཚ་བོ་མ་གནང་། འདི་པཱ་ལེ་བ་ཞིག་གིས་མ་འོངས་པའི་མཁས་པ་ཚོར་ཕུལ་བའི་སེམས་གཏམ་ཡིན།

ང་ནི་བཙན་བྱོལ་བོད་མི་སྤྱི་མཚུངས་ལྟར། དགའ་ཆོག་ཆོག་དང་སྡུག་ཆོག་ཆོག ཚིག་གིས་ཕོག་ཆོག་ཆོག་ཅིག་མིན་ལ། ཟེར་ཚད་ལ་བདེན་ཁ་བསྟེར་བའི་མི་ཞོགས་ཡང་ཞིག་དེ་བས་ཀྱང་མིན། མི་གཞི་རང་སྐྱ་ཐུབ་པ་ཞིག་དང༌། བསམ་བློར་རང་དབང་ཐོབ་པ་ཞིག་ཡིན་བསམ་པའི་སྤོབས་པ་ཡོད་ལ། ངས་འཚོལ་སྙེགས་བྱེད་བཞིན་པའི་མི་གཤིས་དེའང་ཡིན།

གསར་འགྱུར་འགའ་དྲ་ཐོག་ལ་གཏོང་ཆེད། དེ་རིང་གུང་གསེང་ཡིན་ཡང༌། ང་གཅིག་པུ་ལས་ཁུངས་ལ་བཅར་བ་ཡིན། ངའི་ཡིག་ཚང་གི་མདུན་ཅོག་སྟེང་དུ། དག་ཡིག་གསར་སྒྲིག་གཅིག་དང༌། བོད་རྒྱ་ཚིག་མཛོད་ཆེན་མོ། དུང་དཀར་ཚིག་མཛོད་ཀྱི་སྨད་ཆ། དབྱིན་བོད་ཚིག་མཛོད་གསར་མ་བཅས་ཀྱིས་ཁེངས་འདུག དེ་དག་མཐོང་མ་ཐག་ང་རང་ཁེར་དགོད་ཅིག་ཤོར་ཞིང༌། དེ་དང་མཉམ་དུ་ངའི་སྟེང་ལ་མི་དགའ་མཁན་བསྟན་འཛིན་ཟེར་བ་དེ་གློ་བུར་དུ་དྲན་ཏེ། ཡང་བསྐྱར་བགད་མོ་ཞིག་ཤོར་སོང༌། ཧཧ་ཧ་

ང་ཡིད་ཆེས་མ་སོང། བོད་ཀྱི་དུས་བབས་གསར་ཤོག་གི་འཆི་གསོན་དེ་ལུང་རིགས་རྒྱལ་ཡོད་མེད་ཀྱིས་ཐག་གཅོད་ཀྱི་ཡོད་ན། དངོས་གནས་ངས་བོད་ཀྱི་དུས་བབས་ལ་གདེངས་འཇོག་བྱས་པ་དེ་ཅུང་ཅི་ཞིག་ཏུ་འགྱུར་གྱིན་འདུག་སྙམ་ཞིག་སེམས་ལ་འཁོར་གྱི་འདུག

དྲ་གྲོགས་འབྲོག་རུ་ཆོས་གྲགས་དང་འཇིགས་མེད་གཉིས་ལགས།

ཁྱེད་གཉིས་ནས་བཤད་པའང་བདེན་ནོ་ཞུ། ཡིན་ནའང༌། འབྲོག་རུ་ཆོས་གྲགས་ལགས་ནས་ཡིག་ནོར་སྤེལ་སྟངས་འདི་དང་དུས་བབ་གླེང་སྟངས་འདི་གཉིས་མགོ་མཚུངས་ཤིག་ཆགས་མི་འདུག རྗེས་མར་གཞན་གྱི་ཡིག་སྐྱོན་དོན་སྐྱོན་སྐོར་གླེང་དུས། རང་ཉིད་ཀྱིས་གང་སྤེལ་རྒྱུའི་ཚིག་དོན་ལ་གཟབ་གཟབ་གནང་བའི་རེ་བ་ཡོད།

ད་ལྟ་ངས་ལོ་ཁ་ཤས་གོང་དུས་བབ་ཚགས་པར་སྟེང་ནས་བཀླགས་མྱོང་བའི་གསར་འགྱུར་ཞིག་དྲན་སོང༌། ཨ་མདོ་དོར་ཤུལ་རྒྱ་མཚོ་ཟེར་བ་ཞིག་གིས་རྩོམ་དེབ་ཅིག་འགྲེམས་སྤེལ་བྱས་པ་རྡ་རམ་ས་ལ་ནས་ཁྱི་རྔ་ལ་བཏགས་པའི་སྐོར་གྱི་གསར་འགྱུར་དེ་རེད། དེབ་དེ་ནི་ཡིག་ནོར་མང་བ་དང༌། ཅི་ཞིག་སྟོན་གྱི་ཡོད་མེད་མི་ཤེས་པའི་ཚིག་ཚོགས་ཤིག་ཏུ་ཡོད་འདུག་པ་དེ། ཁྱི་རྔར་འདོགས་དགོས་པའི་རྒྱུ་མཚན་ཨང་དང་པོ་ཆགས་ཡོད་རབས་ཤིག་རྗེས་ལ་གོ་ཐོས་བྱུང༌།

ད་ལྟ་གསར་འགྱུར་དེ་སྤེལ་མཁན་བོད་ཀྱི་དུས་བབ་གསར་ཁང་གིས། ཡིག་ནོར་བརྡ་ནོར་དང༌། ཅི་སྟོན་མི་ཤེས་པའི་ཚིག་ཚོགས་ཤིག་སྤེལ་ཞིང་ཡོད་པ་ནི། གཟབ་གཟབ་གནང་ན་མ་གཏོགས། རྡ་རམ་ས་ལའི་ཤེས་ཡོན་པ་ཚོས་ཁྱི་རྔ་ལ་བཏགས་ཡོང༌། ཚགས་པར་ཁོ་རང་མ་བཏགས་པ་ཡིན་ནའང༌། ད་ཐེངས་ཀྱི་འདི་ལྟ་བུའི་རྩོམ་སྒྲིག་པའི་གཏམ་དག་ནི། ཁྱི་རྔའི་མན་ཞིག་ལ་འདོགས་དགོས་ནའང་འདོགས་དགོས་ནས་འདུག དམའ་འབེབས་བྱས་པ་མིན། དངོས་འབྲེལ་གྱི་རིན་ཐང་དང་གནས་སྟངས་ཀྱིས་ཚད་འདིར་བསྐྱལ་ནས་འདུག དུས་བབ་ཀྱི་རྩོམ་སྒྲིག་པའི་གཏམ་སྔ་མ་དག་དང་བསྡུར་བས། རྟ་རྒྱུག་ཐང་དང༌། རྟ་བཤད་སྒང་གི་དཔེས་འདིར་ཞུས་ཐལ་དུ་སོང༌།

ལར་ནས། ད་ལྟའི་ཆར། དུས་བབ་ཚགས་པར་དང་དྲ་རྒྱའི་སྐོར་གྱི་དག་ཆ་དང་སྡེབ་སྦྱོར་ཡར་རྒྱས་ཀྱི་རེ་བ་བྱེད་པ་ནི། ཉ་སྤུ་མེད་ལ་རལ་བའི་ཁྲལ་འགེལ་བ་ཅི་བས་ཐབས་རྡུགས་རེད་མོད་ཀྱང༌། མུ་ཏོའི་ཕྱེ་ཁུག་ལ་བསེར་འགོང་མི་རྒྱུག་པ་ཙམ་དུ་རེ་བས་འདིར་གཅིག་ཞུ་ན། དྲ་གྲོགས་ཁྱེད་རང་ཚོ་རྡ་སར་ཡོད་མཁན་ཚོས་འདི་ཚོར་མགོན་སྐྱབས་དཔུང་གཉེན་རེ་ཅིས་ཀྱང་གནང་དགོས་པས་མི་ཚད་འཕྱིས་ཚད་དུ་འདུག་ཅེས་ཀྱང་ཞུ་བར་ཐལ་ལོ།།

དྲ་གྲོགས་བསྟན་འཛིན་གྱིས་བཤད་པར་རྒྱབ་སྐྱོར་ཡོད། ད་དུང་བཤད་རྒྱུ་ཞིག་ནི་ད་རེས་ཀྱི་རྩོམ་སྒྲིག་པའི་གཏམ་གྱི་ཁ་བྱང་འདི་རེད། གསུང་འཕྲིན་དང་རྩོམ་སྒྲིག་པའི་གཏམ་གཉིས་ཀའི་ནང་དོན་ལ་བལྟས་ན་རྟོན་བཞི་འཇུག་ལྡོག་མ་བྱེད་ཟེར་རྒྱུ་མིན་པར། རྟོན་བཞིའི་འཇུག་ལྡོག་མ་ནོར་ཟེར་རྒྱུའམ་ཡང་ན་རྟོན་བཞི་གོ་ལྡོག་མ་བྱེད་ཟེར་དགོས་པ་ཡིན་པར་སྣང་། འདི་ཡིག་ནོར་ཤོར་བ་ཞིག་མིན་པར་དོན་སྟེང་ནས་བཤད་སྟངས་ནོར་ཡོད་དེ། རྟོན་པ་བཞི་དང་མི་རྟོན་པ་བཞིའི་རྟོན་པ་ནི་སྐབས་འདིེའི་འཇུག་པ་དང་མི་རྟོན་པ་ནི་སྐབས་འདིའི་ལྡོག་པ་ཡིན་པས་དེ་ལྟའི་འཇུག་པ་དང་ལྡོག་པ་གཉིས་ཀ་བྱེད་དགོས་པ་ཡིན་ཙ་ན་དེ་ལ་མ་བྱེད་ཟེར་ག་ལ་རུང་། འཇུག་ལྡོག་དེ་གཉིས་ཀ་བྱེད་དགོས་པ་གང་ཞིག་ལ་བྱེད་སྟངས་མ་ནོར་བ་ཞིག་དང་གོ་ལྡོག་ཏུ་མ་སོང་བ་ཞིག་བྱེད་དགོས་པ་འདི་གནད་ཀྱི་དོན་པོ་ཡིན། རྩོམ་སྒྲིག་པའི་ཞེ་འདོད་ཀྱང་འདི་བཞིན་ཡིན་ངེས་མོད་དེ་ཚིག་ལ་མ་ཐོན་པར་མ་ཟད་ནོར་ནས་འདུག རྩོམ་ཡིག་གི་ཁ་བྱང་ནི་རྩོམ་ཡིག་སོ་སོའི་གྲུབ་ཆ་གཙོ་བོ་ཞིག་དང་གལ་གནད་ཆེ་ཤོས་ཤིག་ཡིན་པ་མཁྱེན་གསལ་ལྟར་ཡིན་པས་རྩོམ་མིང་འདོགས་སྟངས་ལ་ལྷག་པར་གཟབ་གལ་ཆེ་ཞེས་དུས་བབ་ཀྱི་མཚན་ལ་དང་མདུན་ལམ་ལ་བསམས་ཏེ་སྲོང་པོར་སྨྲས་པ་ལགས།

དེ་རིང་ང་ལ་དུས་བབ་འདོན་ཐེངས་གསར་པ་དེ་འབྱོར་སོང༌། བཀླགས་པ་ཡིན། ནམ་རྒྱུན་གྱི་གོམས་སྲོལ་ལྟར། རྩོམ་སྒྲིག་པའི་གཏམ་དེ་བཀླགས་པ་ཡིན། ཅི་ཞིག་ཤོད་ཀྱི་ཡོད་མེད་རྩ་བ་རང་ནས་གོ་མ་སོང༌། གྲོགས་པོ་ཨ་མདོ་བ་གཉིས་ཡོད་པར་བཀླགས་བཅུག་ནས་འགྲེལ་བཤད་ཀྱི་རེ་བ་བྱས་པ་ཡིན། ཁོང་གཉིས་ལའང་ང་ལ་བྱུང་རྒྱུ་དེ་ག་རང་བྱུང་སོང༌།

ངས་བགྲང་བྱ་བརྒྱད་ཀྱི་རིང་གི་བོད་ཀྱི་དུས་བབ་འདོན་ཐེངས་རེ་རེ་བཞིན་བཀླགས་མྱོང༌། ད་ནི་ཀློག་པ་དང་ལེགས་ཉེས་དཔྱོད་པ་གཉིས་ཀ་རང་རྐྱ་འཕེར་བར་གྱུར་ཏེ་ཡོད། དངོས་འབྲེལ་བྱས་ན། ང་ནི་བོད་ཀྱི་དུས་བབ་བཀླགས་ནས་བོད་ཡིག་ལ་འབྲེལ་འདྲིས་ཟབ་པར་གྱུར་པ་ཞིག་ཡིན། བོད་ཀྱི་དུས་བབ་ནི། ངས་དགེ་རྒན་ཅིག་ཏུ་བརྩི་ཞིང་ཡོད། དེ་ནི་ལོ་ངོ་བརྒྱད་རིང་གི་བཀླགས་ཚོར་ཕྱོགས་བསྡོམས་ཡིན་པར་བརྗོད་ཆོག་པ་ཡོད།

འོན་ཏེ། ད་ལྟའི་དུས་བབ་གསར་ཤོག་གིས། ང་ལ་ཚོར་སྣང་གཞན་པ་ཞིག་སྤྲད་སོང༌། ཡིག་ནོར་ཇེ་མང་དུ་ཕྱིན་སོང༌། སྡེབ་སྦྱོར་ཇེ་སྡུག་ཏུ་ཕྱིན་སོང༌། ང་ལ་ཕངས་སེམས་ཤིག་ཡོད་པ་ནི། ནམ་ཟླའི་དབྱར་དགུན་གྱི་འགྱུར་བ་ནང་བཞིན་དུས་བབ་ཀྱི་དག་ཆ་དང་ཚིག་སྦྱོར་གསེར་གྱི་ཁྲི་ན་འགྱིང་བ་དེ། གློ་བུར་ཐོལ་རྒྱག་ཏུ་མར་ཟགས་བཞིན་པ་འདིའོ།།

རྡ་རམ་ས་ལའི་གྲོགས་པོ་ཁག་ཅིག་ལ་སྐད་ཆ་དྲིས་པར། དུས་བབ་ཀྱི་རྩོམ་སྒྲིག་པ་ལུང་རིགས་ལགས་ཕྱི་ལོགས་སུ་ཕྱིན་པ་རེད། གསར་འགོད་པ་ཚོས་རང་མགོ་ཐོན་གྱི་ཡོད་པ་མ་རེད། རྩོམ་སྒྲིག་པ་ཕྱིར་སླེབས་པ་ཡིན་ན། སྔོན་མ་ནང་བཞིན་གྱི་དུས་བབ་ཀློག་རྒྱུ་ཡོང་གི་རེད་གསུངས་སོང༌། དེར་ངས། རྩེད་མོའི་ཚུལ་གྱིས། དུས་བབ་ཀྱི་དག་ཆ་རྩོམ་སྒྲིག་པ་དང་ལྷན་དུ་ཕྱིན་ཚར་བ་རེད་པས། དུས་བབ་ཀྱི་ཚིག་སྦྱོར་དེ་ཡང་རྩོམ་སྒྲིག་པ་དང་ལྷན་དུ་ཕྱིན་ཚར་བ་རེད་པས། དཔེ་བསགས་སོང་བ་རེད་ཅེས་ལབ་པ་ཡིན།

ཁ་སྔོན་དུས་བབ་ཀྱི་གསར་འགོད་པ་དོན་འགྲུབ་བཀྲ་ཤིས་ཟེར་བས། ང་ལ་ཐེངས་དང་པོར་རྩེད་མཚར་དང༌། ཐེངས་གཉིས་པར་ལུང་རིགས་ཀྱི་བརྒལ་བརྟག་བྱ་འདོད་ཡོད་ལབ། ཐེངས་གསུམ་པར་མགོ་སྒུར་བ་ཡིན་ལབ་པ་ཡིན་སྟབས། ད་ནི་འགྱོང་ཚངས་སྡིག་བཤགས་ཀྱི་རེ་བ་ཡེ་མེད་མོད་ཀྱང༌། ད་དུང་ཡང་སྔོན་གྱི་དུས་བབ་དག་དང་ཆ་འདྲ་ཞིག་ཀློག་འདུན་གྱིས་སྡོད་མ་བཅུག་ནས་བསམ་ཚུལ་ཚིག་འགའ་མ་ཞུས་རང་ཞུས་སུ་ཐལ་བ་ནི།

རྩོམ་སྒྲིག་པའི་གཏམ་གྱི་ནང༌། གནས་༼ཚད༽་ཞེས་འབྲི་དགོས་སར་གནས་༼ཚུལ༽ཞེས་ནོར་ནས་བྲིས་འདུག་པ་དང༌། དམངས་གཙོའི་༼ཀ༽བ་ཞེས་འབྲི་དགོས་རྒྱུ་ལ་དམངས་གཙོའི་༼བཀའ༽་བ་ཞེས་ནོར་ནས་བྲིས་འདུག འོས་འཚམ་སྟེ། རན་པོ་དང་འཇུག་པོ། འཚམ་པོ་བཅས་ཀྱི་དོན་སྟོན་བྱེད་ཀྱི་འོས་༼འཚམ༽ལ་འོས་༼འཚམས་༽ཞེས་ནོར་ནས་བྲིས་འདུག གདུང་སེམས་མཉམ་༼བསྐྱེད༽་ལ་གདུང་སེམས་མཉམ་༼སྐྱིད༽ཅེས་ནོར་ནས་བྲིས་འདུག གངས་ཅན་སྐྱིད་༼གཤོངས༽་ལ་གངས་ཅན་སྐྱིད་༼གཞུང༽་ཞེས་ནོར་ནས་བྲིས་འདུག་པ་དག་ནི་དཔེ་མཚོན་ཙམ་ཡིན། ཚགས་ཤོག་བྱིངས་ཀྱི་ནང་དུ་ནི། ཡིག་ནོར་བརྡ་ནོར་དེ་བས་མང་བ་འདུག གྲངས་ལ་ངེས་གཏན་དུ་བགྲང་བའི་དུས་བྱུང་མ་སོང་མོད། དཔེར་ན། དུས་བབ་ཚགས་པར་རང་གི་མཇུག་ཤོག་ཏུ། འགན་འཛིན་དང་རྩོམ་སྒྲིག་པ། རྩིས་པ་དང་འགན་འཛིན། གསར་འགོད་པ་སོགས་བཀོད་པའི་ས་ཁོད་ལག་མཐིལ་ཕྱེད་ཙམ་པ་དེའི་ནང་ཁོ་ནར་ཡང༌། ༼འགྲེམས༽་སྤེལ་ལ་༼འབྲེམས༽་སྤེལ་ཞེས་ནོར་ནས་བྲིས་འདུག་ལ། འགན་འཛིན་ལ་༼འགན་འདིན༽་ཞེས་ནོར་ནས་བྲིས་འདུག་པ་ལྟ་བུ་རེད། དཔེ་མཚོན་འདི་འཁྱེར་ནས་དུས་བབ་འདོན་ཐེངས་འདིའི་ཤོག་ངོས་བརྒྱད་ཆ་ཚང་ལ་རྩིས་ཤིག་བསྐོར་བ་ཡིན་ན། ཡིག་ནོར་གྱི་གྲངས་ཀ་དེ་འདོད་ན་རེད་མི་འདོད་ན་རེད། ཧ་ཅང་མང་པོ་ཞིག་ཆགས་རྒྱུ་ནི་གཏན་འཁེལ་འཁེལ་བ་རེད། ང་འདི་དུས་བབ་ཚགས་ཤོག་ཞིབ་ཚགས་པོས་ཀློག་མཁན་ཅིག་ཡིན་སྟབས། མིག་འདིས་མཐོང་དགོས་རྒྱུ་མི་དགོས་རྒྱུ་གཉིས་ཀ་མཐོང་བར་གྱུར།

ད་ནི་སྔོན་གྱི་རེ་བ་དེའི་སྣེ་དེར་མུ་མཐུད་འཇུས་ཏེ། བསམ་ཚུལ་ཞིག་བསྐྱར་དུ་ཞུ་སྙིང་སྤྲོ་བ་ནི། དུས་བབ་ཀྱི་ལས་ཀ་བྱེད་མཁན་ཕོ་གསར་མོ་གསར་ཚང་མས། ཞོགས་སྔ་བཞེངས་དང་དགོང་འཕྱི་གཟིམ་གྱིས་ཕྱག་ལས་གནང་གི་ཡོད་མེད་ལ་ཚོམ་པ་ག་ལ་ཡོད་མཆི་སྟེ། དུས་བབ་སྤུས་དག་རེ་འདོན་པའི་རེ་འདུན་དང༌། ཡང་ན་ནི། དུས་བབ་ཀྱི་ཤོག་ངོས་ཇེ་ཉུང་དུ་བཏང་ནས། སྤུས་ཚད་དག་པོ་ཞིག་འདོན་པར། དགོངས་པ་ཞིག་བཞེས་གནང་ཡོང་བ་ཞེས་ལྷག་བསམ་ལྷད་མེད་ཀྱིས་ཞུ་བར་ཐལ་ལོ།།

ངེད་རང་གི་ཨིས་མལ་ཁ་བྱང་ ttsepak31@yahoo.in འདི་ཡིན་ཞེས་ཀྱང་ཞུའོ།།