དེང་སྐབས་བོད་ནང་གི་འབྲོག་ཕྱོགས་སུ་རྒྱན་འཛུགས་ཤོ་རྒྱག་གི་གནས་སྟངས་ཚབས་ཆེན་ཆགས་ཏེ། འཚོ་བའི་གནས་སྟངས་སྐྱོ་བོ་ཆགས་ཤིང་བུ་ཕྲུག་སློབ་གྲྭར་སྐྱེལ་མ་ཐུབ་པ་དང༌། བཟའ་ཐོར་རྒྱག་པ། ཐ་ན་མི་གསོད་ཁྲག་སྦྱོར་གྱི་གནས་ཚུལ་ཡང་ཡོང་གིན་འདུག་ཟེར།
ཕ་ཡུལ་རྨ་ལྷོ་སོག་རྫོང་ནས་ཡིན་ཞིང༌། ད་ལྟ་རྒྱ་གར་ལྷོ་ཕྱོགས་འབྲས་སྤུངས་སྒོ་མང་ཁང་ཚན་དུ་སློབ་གཉེར་གནང་བཞིན་པའི་དགེ་འདུན་པ་འཇིགས་མེད་ལགས་ཉེ་ཆར་འདི་གའི་གསར་ཁང་ལ་ཆེད་དུ་བཅར་ཏེ། ཁོའི་ཕ་ཡུལ་སོག་རྫོང་གཙོས་པའི་བོད་ཀྱི་ས་ཆ་ཁག་ཏུ་རྒྱན་འཛུགས་ཤོ་རྒྱག་གི་གནས་ཚུལ་ཧ་ཅང་ཛ་དྲག་ཡིན་པ་དང༌། གནད་དོན་འདིའི་ཐད་རང་དབང་ལུང་པའི་བླ་སྤྲུལ་དང་གནད་ཡོད་མི་སྣ་ཚོས་བཀའ་སློབ་ལམ་སྟོན་གནང་གལ་ཆེན་ཚུལ་བརྗོད་དོན། ད་ལྟ་བོད་ཀྱི་ས་ཆ་གང་སར་རྒྱན་འཛུགས་ཤོ་རྒྱག་གི་དཀའ་ངལ་ཆེན་པོ་འཕྲད་ཀྱིན་ཡོད་པ་མ་ཟད། ལྷག་པར་དུ་ངའི་ཕ་ཡུལ་རྨ་ལྷོ་སོག་རྫོང་ལྟ་བུར་མཚོན་ན། ཁུལ་དང་རྫོང་སོགས་སུ་ཇ་ཁང་གི་མིང་ཐོག་ནས་རྒྱན་འཛུགས་ཁང་མང་པོ་ཕྱེས་ཏེ། ས་གནས་འབྲོག་པ་མང་ཚོགས་ལ་དཀའ་ངལ་ཤུགས་ཆེན་འཕྲད་ཀྱིན་འདུག་ཟེར། མང་ཚོགས་ཀྱིས་བརྩི་བཀུར་དང་ཆེ་མཐོང་ཡོད་པའི་མི་སྣ་དང༌། མང་ཚོགས་ལ་སློབ་གསོ་ལམ་སྟོན་གནང་མཁན་མེད་པའི་ཁར། རྒྱ་གཞུང་གིས་ཀྱང་རྐང་བཙུགས་ཏེ་སྤྱི་ཚོགས་རུལ་སུངས་ལ་གྱུར་དུ་བཅུག་སྟེ། རྒྱན་འཛུགས་ཤོ་རྒྱག་གི་གནས་སྟངས་ཚབས་ཆགས་འདུག ཁྱིམ་ཚང་ལ་དཔལ་འབྱོར་གྱི་གྱོང་གུད་རྒྱག་གིན་ཡོད་པ་མ་ཟད། བུ་ཕྲུག་སློབ་གྲྭར་སྐྱེལ་མ་ཐུབ་པར་འཕྲོ་རླག་ཏུ་འགྲོ་བཞིན་འདུག་ལ། བཟའ་ཐོར་གྱི་གནས་ཚུལ་ཡང་མང་པོ་ཡོང་གིན་འདུག ད་དུང་སྡེ་བ་དང་ཁྱིམ་ཚང༌། གྲོགས་ཕན་ཚུན་བར་ལ་མཁོན་འཛིང་དང༌། ཐ་ན་མི་གསོད་ཁྲག་སྦྱོར་གྱི་གནས་ཚུལ་ཡང་ཡོང་གིན་འདུག
ཐོག་མར་ནོར་ལུག་འཚོ་མཁན་ཚོས་རྩེད་མོའི་ཚུལ་དུ་དངུལ་ཉུང་ངུ་རེ་འཇོག་པ་དང་རིམ་གྱིས་ཕྱུགས་ཟོག་རྒྱན་ལ་འཇོག་པ། དེ་ལྟར་ཤུགས་ཆེ་རུ་ཕྱིན་ཏེ་ཁྱིམ་ཚང་དང་བཟའ་ཟླ་བུ་ཕྲུག་སོགས་ཀྱང་འཇོག་གིན་འདུག་ཟེར། གཞོན་སྐྱེས་ཚོ་རྫོང་དང་ཁུལ། ཟི་ལིང་གྲོང་ཁྱེར་སོགས་སུ་སོང་སྟེ་རྒྱན་འཛུགས་ཀྱིན་ཡོད་པ་དང༌། ཉེ་ཆར་རྒྱན་འཛུགས་མཁན་ཞིག་གིས་བཤད་པ་ལྟར་ན། ལོ་འདི་འགར་རྒྱན་བཙུགས་ཏེ། རྒྱ་སྒོར་ཁྲི་བརྒྱ་ ༡༠༠༠༠༠༠ ལྷག་ཤོར་ཚར་སོང༌། གལ་སྲིད་རྒྱ་སྒོར་ཁྲི་ཉིས་བརྒྱ་ ༢༠༠༠༠༠༠ ཤོར་བ་ཡིན་ན། རྒྱན་གཅོད་རྒྱུ་ཟེར་གྱིན་འདུག་ཟེར། དངུལ་འབོར་དེ་འདྲ་ཤོར་གྱིན་ཡོད་པ་ཁོ་གཅིག་པུ་མ་རེད་གཞན་མང་དག་ཅིག་ཡོད། རྨ་ལྷོ་སོག་རྫོང་ཁེའུ་སིན་ཞིང་བེ་སིའི་སྡེ་བའི་ཚེ་རིང་ཟེར་བ་ཞིག་གིས་རྒྱན་བཙུགས་ཏེ། དངུལ་ཡོངས་རྫོགས་ཤོར་བ་མ་ཟད་མཐར་ཁང་པ་ཤོར་ཏེ། ད་ལྟ་གར་སོང་ཆ་མེད་ཆགས་འདུག་ཟེར། རྒྱན་འཛུགས་ཀྱི་དཀའ་ངལ་དེ་རྨ་ལྷོ་སོག་རྫོང་གཅིག་པུ་མ་རེད། ལྷ་ས་གཙོས་པའི་བོད་ཁུལ་ཡོངས་དང༌།
ལྷག་པར་དུ་འབྲོག་ཕྱོགས་སུ་ཁྱབ་གདལ་ཤུགས་ཆེན་འགྲོ་བཞིན་འདུག
དེང་སྐབས་རྨ་ལྷོ་ཁུལ་དང་སོག་རྫོང་གི་རྒྱན་འཛུགས་ཁང་ཆེ་ཁག་ཏུ་ཉུང་མཐར་རྒྱ་སྒོར་ཁྲི་གཅིག་མེད་ན་ཡོང་ཆོག་གིན་མི་འདུག་ཟེར། ཟི་ལིང་གྲོང་ཁྱེར་ལ་མཚོན་ན་སྔར་བོད་རིགས་ཉུང་ལ། ལྷག་པར་དུ་རྨ་ལྷོ་སོག་རྫོང་གི་འབྲོག་པ་ཉུང་མོད། དེང་སྐབས་རྨ་ལྷོ་སོག་རྫོག་གི་རྒྱན་འཛུགས་མཁན་མང་པོ་སླེབས་འདུག་ཟེར། སྔོན་མ་ཡིན་ན་ཁྱིམ་ཚང་གང་ཞིག་ལ་མི་ཤི་གོད་ཆག་གི་དོན་རྐྱེན་བྱུང་ན། སྡེ་བ་འཚོ་བས་ལྟ་སྐྱོང་དང་རོགས་རམ་བྱེད་སྲོལ་ཡོད་མོད། རྒྱན་འཛུགས་ཤོ་རྒྱག་གིས་ཁྱིམ་ཚང་སྟོང་བ་ཆགས་ན། སྡེ་བ་འཚོ་བའི་རོགས་རམ་ཕར་ཟད། ཐ་ན་གཉེན་ཉེ་དང་གྲོགས་པོ་ཚོས་ཀྱང་ཁ་ཡ་བྱེད་ཀྱིན་མི་འདུག་ཟེར། གོ་ཐོས་ལྟར་ན། དཀའ་ངལ་དེས་དབང་གིས་ཁྱིམ་ཚང་ཞིག་གི་བུ་མོ་མནའ་མར་སྟེར་སྐབས། བུ་མོའི་ཕ་མས་མག་པ་རྒྱན་འཛུགས་མཁན་ཡིན་མིན་བརྩད་གཅོད་བྱེད་པ་དང༌། བུ་མོས་ཀྱང་སོ་སོའི་ཁྱོ་ག་ཤོ་རྒྱག་མཁན་ཞིག་མིན་པའི་སྨོན་ལམ་རྒྱག་གིན་འདུག་ཟེར། གནད་དོན་དེར་དམིགས་ཏེ། རང་དབང་ལུང་པར་ཡོད་པའི་བླ་སྤྲུལ་ཚོས་ཆེད་དུ་གསར་འགྱུར་བརྒྱུད་ལམ་བེད་སྤྱད་དེ།
བཀའ་སློབ་ལམ་སྟོན་ཁ་གསལ་ཞིག་གནང་རྒྱུ་གལ་ཆེན་རེད།
དེ་བཞིན། ཉེ་ཆར་ལྷོ་ཕྱོགས་མོན་གྷོ་འདོད་དགུ་གླིང་གཞིས་ཆགས་སུ་གཞིས་མགོ་གསར་བ་ཞིག་སླེབས་འདུག་ལ། ཁོང་ལ་མང་ཚོགས་ཀྱིས་དགའ་བསུ་ཆེན་པོ་བྱེད་ཀྱིན་འདུག གང་ཡིན་ཟེར་ན། སྔོན་མ་མོན་གྷོ་གཞིས་ཆགས་ནང་ཆང་ཁང་རེ་ཟུང་དང༌། རྒྱན་འཛུགས་ས་ཁྱིམ་ཚང་གཉིས་ཡོད། གཞིས་མགོ་གསར་བས་དེ་དག་བཀག་འགོག་བྱས་ཤིང་དངུལ་ཆད་བཅད་ཡོད་ལ། མ་འོངས་པར་གྲོང་སྡེ་གང་ཞིག་ཏུ་རྒྱན་འཛུགས་མཁན་བྱུང་ན། བརྒྱ་དཔོན་བཅུ་དཔོན། མི་ཚང་དང་བཅས་ལ་དངུལ་ཆད་གཅོད་རྒྱུ་ཐག་གཏོད་བྱས་ཡོད། དེ་ཚོ་ཧ་ཅང་ཡག་པོ་རེད། གོ་ཐོས་སུ་ངྷ་རམ་ས་ལར་ཡང་རྒྱན་འཛུགས་ཁང་འགའ་རེ་ཡོད་རབས་འདུག རྒྱན་འཛུགས་ཤོ་རྒྱག་རྩ་མེད་བཟོ་བ་དེ་ཆོས་དང་འཇིག་རྟེན། རྒྱལ་སྤྱིའི་ཁྲིམས་ཚང་མར་མཐུན་པ་ཞིག་རེད། འདི་དག་ལ་ངེས་པར་དུ་བོད་གཞུང་གི་ངོས་ནས་ཐུགས་སྣང་བཞེས་དགོས་ཀྱིན་འདུག ཅེས་བརྗོད་བྱུང༌།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འདི་ནི་མི་ཐ་ཤལ་བའི་བྱ་སྤྱོད་ཞིག་ཡིན་པས་རྗེས་ཕྱོགས་པར་གཟབ་པར་འཚལ། ངེས་བར་དུ་རྩེད་དགོས་ན་མི་མང་གི་མིག་མདུན་ནས་མ་རྩེད་ན་མི་འགྲིག་གམ།
རེད་ཡ་དེང་སྐབས་ཨོ་སི་ཊིར་ལེ་ཡར་སོང་བའི་རང་རེའི་ཆབ་སྲིད་བཙོན་ཟུར་ཁ་ཤས་ཡང་གཟའ་ཉི་མ་རྟག་པར་མི་མང་འགྲོ་སའི་ལམ་ཁའམ་སྤང་ཐང་ཞིག་ན་ཤོ་རྒྱག་བརྒྱན་འཇོག་གི་ལས་ལ་བྲེལ་བཞིན་འདུག་ན་འདི་དག་མཐོང་དུས་བོད་མི་རིགས་ཀྱི་རྐང་འདྲེན་རེད་ལ་ཡིད་སེམས་ཀྱང་གཏིང་ནས་སྐྱོ། མ་གཞིར་ཆབ་སྲིད་བཙོན་ཟུར་ཚོའི་ལས་འགན་འདི་འདྲ་འེ་རེད །
དེ་བས་ང་ཚོས་རྒྱལ་བའི་བཞུགས་སྒར་རྡ་སའི་ཤོ་ཁང་དང་མ་ཅང་རྩེ་མཁན་དང་དེ་བདག་གཉེར་བྱེད་མཁན་རྣམས་སུ་ཡིན་ལ་རྩད་གཅོད་ལེགས་པོ་བྱས་ཏེ་སྐྱོད་བརྗོད་བྱ་དགོས་ལ། རིམ་པས་བྱ་ངན་དེ་དག་མཚམས་འཇོག་ཇི་ལྟར་བྱ་དགོས་པའི་སྐོར་ལ་ཐབས་ཤས་བྱ་དགོས། དེ་ལྟར་ན་ང་ཚོས་རང་གི་སྤྱི་ཚོགས་ལ་ཤ་ཚ་བ་དང་འགན་ཁུར་བ་རེད་སྙམ།
གནད་དོན་འདི་འདྲ་གླེང་སྐབས་ངེས་པར་དུ་སྤྱི་ཚོགས་རྙིང་པར་ཁ་གཏོང་བ་དང་རྡུག་དམོད་བྱས་པས་མི་ཕན་པར། དེ་ལས་ལྡོག་སྟེ་རང་ཉིད་གནས་སའི་ཁོར་ཡུག་ཏུ་གནས་ཚུལ་ཅི་བྱུང་ལ་དགོས་སྐྱོན་བརྗོད་རྒྱུ་དེ་ང་ཚོའི་ལས་འགན་རེད་སྙམ། སྤྱི་ཚོགས་རྙིང་པ་བཟང་རུང་ངན་རུང་འདས་ཚར་བ་རེད། འདི་འདྲའི་སྐབས་སུ་བསམ་ཚུམ་ཙམ་བཤད་པ་ལས་དངོས་ཡོད་གནས་ཚུལ་འཚོལ་རྒྱུ་དེ་འགན་ཁུར་ཅན་གྱི་ལས་ཀ་རང་རེད་སྙམ།
ད་དུང་རྡ་ས་མེག་གྷན་དུ་མ་ཅང་རྩེད་ཁང་དུ་ཡོད་དང༌། དེ་དག་གཉེར་མཁན་སུ་ཡིན། རྟག་པར་མ་ཅང་རྩེ་བཞིན་ཁ་གསོ་བ་དང༌། ཁ་སྒོར་བ་སོགས་མང་པོ་བྱུང་མྱོང་བ་མ་ཟད། ཕོ་སར་མང་པོ་མ་ཅང་རྩེ་ས་ནས་འཁྲུག་འཛིངས་ཤོར་བའང་ལན་གཅིག་མ་རེད། འདི་འདྲའི་སྐོར་ལའང་མིག་ཟུར་ཙམ་གཟིགས་རྒྱུ་ནི་བོད་མི་རིགས་དང་བཅས་པར་ཤ་ཚ་མཁན་ཚོས་བྱེད་ལས་ཅི་ལ་མིན།
བོད་ཁྱིམ་སློབ་མས་དུད་ནག་སྤྱོད་པའི་སྐོར་ལས་དངོས་ཡོད་གནས་ཚུལ་འདི་འདྲ་ལ་གླེང་སློང་ཙམ་ཡང་བྱེད་མི་ཐུབ་པ་ཅི་ཡིན་ན།
རྒྱ་གར་རྡ་རམ་ས་ལའི་ཉེ་འགྲམ་གྱི་ནོར་གླིང་ཞེས་པ་དེར། སྐུ་ངོ་བཀའ་བློན་ཁྲི་ཟུར་ག་གེ་མོས་གཙོས་ཕོ་སར་སྐྱལ་སྟོང་འགའ་ཞིག་གིས་ཉིན་ལྟར་མ་ཅང་དང་ཤོ་རྩེ་བཞིན་འདུག་ཟེར་གི་ འདི་དངོས་ཡོད་གནས་ཚུལ་ཡིན་པ་ནོར་གླིང་གི་ཕོ་སར་འགས་བརྗོད་བཞིན་འདུག དངོས་ནས་ཐབས་སྐྱོ་བ་ལ། བཀའ་བློན་ཁོང་བཀའ་བློན་གྱི་ལས་འཁྱུར་གནང་མ་ཐག་ཤོ་རྩེད་ལ་ཇི་ལྟར་གོམས་པ་ཡིན་ན། འོན་ཀྱང་ཁོང་ད་དུང་རྡ་ས་སོགས་སུ་གདན་ཞུས་གསུང་བཤད་གནང་གི་ཕེབས་ཀི་འདུག་ཟེར་ག ཅི་ཞིག་བཤད་ཀྱི་ཡོད་ན། མ་ཅང་དང་ཤོ་རྩེ་སྟངས་ཨེ་ཡིན་ནམ། ལས་ཀ་བྱེད་འདི་དངོས་ནས་སྐྱག་དྲི་ཁ་གི འདི་ལ་སྐྱོན་བརྗོད་དང་གནས་ཚུལ་གླེང་མཁན་ཉིན་མོའི་སྐར་མ་བཞིན་རེད།
ལྷོ་ཕྱོགས་མོན་གྷོར་མཚོན་ན་སྔོན་ཆད་གོང་ས་མཆོག་གི་འཁྲུངས་སྐར་གཙོས་བླ་ཆེན་ག་གེ་མོ་ཞིག་གི་འཁྲུངས་སྐར་རེད་ཞེས་རྣ་བས་གོ་མ་ཐག་ཤོ་ལ་དགའ་བ་རྣམས་གང་ས་གང་ནས་བྱ་རྒོད་ཐེད་ལ་འཁོར་བ་བཞིན་ཐོན་ཡོངགི་ཡོད་མོད་དེང་སྐབས་དེ་འདྲ་མིན་ན་ངོ་མའི་དགའ་འོས་བ་ཞིག་དང་གཞིས་འགོ་དེ་ངོ་སོ་བསྟོད་དགོས་བ་ཞིག་ཀྱང་རེད།
མཱ་ཅང་གི་མཚོན་པའི་རྒྱན་འཛུགས་ཤོ་རྒྱག་གི་གནས་སྟངས་འདིའི་འཐད་ལ་སྔོན་མ་༧་གོང་ས་མཆོག་གིས་དཀའ་སློབ་གནད་མོ་གནང་བའི་དབང་གིས་ཉུང་དུ་སོང་ཡོད་པ་རེད།་དེའི་ཕྱིར།་་ང་ཚོས་གོ་སྐབས་དང་བསྟུན་ནས་༧་གོང་ས་མཆོག་གི་དཀའ་སློབ་དེ་དག་ངག་ཐོག་དང་ཡིག་ཐོག་བརྒྱུད་ནས་ངེས་པར་དུ་རྒྱན་འཛུགས་ཤོ་རྒྱག་གི་བྱ་བ་ལ་མགོ་མཁོར་པའི་གཞོན་སྐྱེས་དེ་དག་ལ་ངོ་སྤྲོད་དང་གསལ་བྱེད་བྱེད་དགོས།ཁོ་ཚོའི་ཡང་རིན་པ་ོ་ཆེའི་གསུང་ལ་ཉན་གིས་རེད།་བླ་སྤྲུལ་ཡིན་པ་ཙམ་གྱི་ཁོ་ཚོས་ཉན་གིས་མ་རེད་ལ་དེང་སྐབས་ཀྱི་བླ་སྤྲུལ་མང་ཆེ་བས་མི་དམངས་ཀྱི་ཉན་ཁ་དང་བདེ་སྡུག་ལ་འགན་ལེན་བྱེད་ཀྱི་མེད་པ་རེད།ཁོ་ཚོ་ལ་རྒྱ་ནོར་དང་གོ་ས་རང་བདེ་སོང་ན་འགྲིག་གི་ཡོད་པ་རེད་
རྒྱུ་རིག་ན་རྒྱུ་མ་འགུལ་བའི་དཔེ་ལྟར་འཛམ་གླིང་ས་ཕྱོགས་གང་སར་ཤོ་རྒྱག་བརྒྱན་འཇོག་གི་རྩེད་མོ་འདི་དར་ཁྱབ་ཤིན་ཏུ་ཆེ་ན་ཡང་ང་ཚོ་བོད་རྒན་གླེན་པ་ཚོ་ནང་བཞིན་བཟའ་ཟླ་བུ་ཕྲུག་དང་བཅས་བ་བརྒྱན་འཇོག་བྱེད་པ་ད་བར་མཐོང་མྱོང་མེད།
སྤྱི་ཚོགས་རྙིང་པའི་སྐུ་དྲག་ཚོས་ཤོ་དང་མཱ་ཅང་བརྒྱབ་བསྡད་དེ་བོད་བསྐྱལ་བ་རེད་ཅེས་འཁང་ར་བྱས་དང་བྱེད་བཞིན་ཡོད་། བོད་ཤོར་རྗེས་སུ་ཡང་བཀའ་ཟུར་དང་། བཀའ་བློན། སྐུ་ངོ་། ལས་བྱེད་ཚོ་མ་ཟད་གྲྭ་བ་མི་ཉུང་བ་ཞིག་ཀྱང་ཤོ་སྦག་ཏཱ་སེ་སོགས་རྒྱན་པོ་འགྱེད་པར་ཡ་ང་བག་ཚ་མེད་པར་མནོ་བསམ་ཞིག་བཏང་ན་སྤྱི་ཚོགས་རྙིང་པའི་མི་དེ་ཚོ་རང་གི་ལུང་པར་རང་དབང་ཡོད་པའི་སྐབས་ཡིན་པས་ཁག་མིན་འདུག་སྙམ་པའི་ཚོར་བ་ཞིག་ཡོང་གི་འདུག བོད་ནང་དུ་ཡང་མི་འགའ་ཤས་བཟའ་ཚང་བུ་ཕྲུག་སྣང་མེད་དུ་བཞག་སྟེ་ནམ་ཉིན་མཚན་མཱ་ཅང་ཁོ་ན་རྒྱབ་ཏེ་སྡོད་མཁན་མཐོང་བྱུང་བས་ད་ནི་ནད་རྙིང་ཡིན་ན་ནད་དེ་རྩད་ནས་འབྱིན་ནུས་པའི་སྨན་པ་ཞིག་གམ་གདོན་ནད་ཡིན་ན་མནན་བསྲེག་གི་ཆོ་ག་་ལ་མཁས་ཤིང་ཆམ་ལ་ཕབ་ནུས་པའི་རྣལ་འབྱོར་བ་ནུས་ལྡན་ཞིག་གདན་ཞུ་རེ་རན་ནོ་ཞེས་ཐལ་ལོ།།
མི་ལེགས་པའི་གོམས་སྲོལ་འདི་བཙན་བྱོལ་ནང་ཐོག་མར་ཚོགས་པ་སྐྱིད་སྡུག་ཁག་གི་ཐུགས་སྤྲོ་གཏོང་སྐབས་ནས་དར་བ་ཡིན་ལ། ཉེ་བའི་ལོ་འགའི་རིང་ནས་ལྡི་ལི་བསམ་ཡས་གླིང་དུ་ལོ་གསར་དང་འཁྲུངས་སྐར་དུས་ཆེན་སོགས་གཞུང་འབྲེལ་དུས་ཆེན་ཁག་ལ་ཡང་མངོན་སུམ་འཛེམ་མེད་ཀྱིས་རྒྱན་འཛུགས་པའི་རྩེད་མོ་འདི་ཆེད་འཛུགས་བྱེད་ཀྱི་ཡོད་སྟབས། བསམ་ཡོད་ཀྱི་མི་དག་གིས་འདི་ངེས་བར་དུ་ཐུགས་བསམ་བཞེས་རོགས།