འཛམ་གླིང་གི་འགྲོ་བ་མིའི་ཐོབ་ཐང་དང་གྲོས་ཚོགས་ཁག གཞུང་བཅས་ཀྱིས་བོད་ནང་གི་དངོས་ཡོད་གནས་སྟངས་ལ་ངོས་ཟིན་གསལ་བོ་བྱུང་ཡོད་པ་ལྟར། རྒྱ་གཞུང་ནས་ཀྱང་ང་ཚོས་དུས་དྲན་འདི་ངོས་ལེན་བྱ་ཐབས་མེད་པའི་རྒྱུ་མཚན་གསལ་བོར་མཁྱེན་རྒྱུ་རེད་བསམ་ཡོད་ཟེར།
སང་ཉིན་ཕྱི་ཚེས་ ༢༨ ཉིན་རྒྱ་གཞུང་གིས་ཞིང་བྲན་ཁྲི་ཚོ་བརྒྱ་བཅིངས་གྲོལ་བཏང་སྟེ་མི་ལོ་ ༥༠ འཁོར་བ་དང༌། བོད་ལ་དམངས་གཙོའི་བཅོས་བསྒྱུར་བྱས་ཏེ་མི་ལོ་ ༥༠ འཁོར་བའི་དུས་དྲན་གཉིས་ལྷན་དུ་གཙི་སྲུང་བྱ་འཆར་ཡོད་པའི་ཐད། དེ་རིང་སྔ་དྲོའི་ཆུ་ཚོད་ ༡༡ སྟེང་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་ཐོག ངོ་རྒོལ་ཡོད་པའི་གྲོས་ཆོད་བཞག་སོང་ལ། དེ་བཞིན། ཉིན་རྒྱབ་ཆུ་ཚོད་ ༢ སྟེང་བོད་གཞུང་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་རྒྱ་གཞུང་གི་དུས་དྲན་དེར་བོད་གཞུང་དམངས་གཉིས་ནས་ངོས་ལེན་མེད་པའི་གསར་འགོད་གསལ་བསྒྲགས་བསྐྱངས་ཡོད།
སྐབས་དེར་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་གསུངས་དོན། མི་ལོ་ལྔ་བཅུའི་རིང་རྒྱ་གཞུང་གི་གདུག་རྩུབ་དང་བཙན་དབང་འོག བོད་མི་ཚོ་བཙན་བྱོལ་དུ་ཡོང་དགོས་པའི་གནས་སྟངས་བྱུང་ཡོད། རྒྱ་གཞུང་གིས་བོད་ཀྱི་གནད་དོན་དེ་འཛམ་གླིང་ནང་གསལ་བོ་གང་འདྲ་ཆགས་ཡོད་མེད་ལ་མ་ལྟོས་པར། བོད་མིའི་འཚོ་བ་ཡར་རྒྱས་བཏང་ཡོད་ཚུལ་རྒྱལ་སྤྱིའི་གསར་ལམ་ཁག་ཏུ་དྲིལ་བསྒྲགས་ཤུགས་ཆེན་བྱེད་ཀྱིན་ཡོད། གལ་སྲིད་དེ་དག་དངོས་ཡོད་ཡིན་ན། ཁ་སང་དང་དེ་རིང་བོད་མི་ཚོ་འཛིན་བཟུང་བཙོན་འཇུག་དང༌། སྡུག་སྦྱོང་མནར་གཅོད་གཏོང་དགོས་དོན་མེད། དུས་དྲན་དེ་ཁྱབ་བསྒྲགས་ཆེད། ད་ལོའི་ལོ་གསར་སྐབས་ནས་བོད་མི་ཚོར་བཙན་གྱིས་སྤྲོ་སྐྱིད་གཏོང་དུ་བཅུག་སྟབས། ངོ་རྒོལ་སྐད་འབོད་དང་འཛིན་བཟུང་བཙོན་འཇུག ཚེ་སྲོག་ཤོར་བ་སོགས་ཀྱི་གནས་སྟངས་བྱུང་ཡོད།
༧ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་གིས། རྒྱ་ནག་གིས་བོད་ནང་ཡར་རྒྱས་བཏང་བ་དང་གནོད་འཚེ་བྱས་པ་གཉིས་བསྡུར་བ་ཡིན་ན། གནོད་སྐྱོན་ཚབས་ཆེན་བཟོས་ཡོད། ཅེས་གསུངས་བ་བཞིན། སྔ་ཕྱི་བར་གསུམ་དུ་བཅིངས་གྲོལ་བཏང་བ་དང༌། འཕེལ་རྒྱས་ཕྱིན་ཡོད་སྐོར་ཀྱི་བསྒྲགས་གཏམ་སྤེལ་གྱིན་ཡོད་ཀྱང༌། རྒྱ་མིས་མཐོང་ཆུང་དང་གནོད་འཚེ་བྱེད་པ། འགྲོ་བ་མིའི་ཐོབ་ཐང་མེད་པ་གསལ་ཡིན་སྟབས། ཕྱི་ནང་གཉིས་སུ་ཡོད་པའི་བོད་མི་ཚང་མས་དུས་དྲན་འདི་ལ་ངོས་ལེན་མེད་པ་གསལ་བོ་ཡིན། འཛམ་གླིང་གི་འགྲོ་བ་མིའི་ཐོབ་ཐང་དང་གྲོས་ཚོགས་ཁག གཞུང་བཅས་ཀྱིས་བོད་ནང་གི་དངོས་ཡོད་གནས་སྟངས་ལ་ངོས་ཟིན་གསལ་བོ་བྱུང་ཡོད་པ་ལྟར། རྒྱ་གཞུང་ནས་ཀྱང་ང་ཚོས་དུས་དྲན་འདི་ངོས་ལེན་བྱ་ཐབས་མེད་པའི་རྒྱུ་མཚན་གསལ་བོ་མཁྱེན་རྒྱུ་རེད་བསམ་ཡོད། ཅེས་གསུངས་སོང༌།
དེ་བཞིན། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཆོད་ནང་བཀོད་དོན། ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་མགོ་བཙུགས་པ་ནས། བོད་དང་ཐའེ་ཝན་གཉིས་གང་མགྱོགས་བཅིངས་གྲོལ་གཏོང་རྒྱུ་ཡིན་ཟེར་ནས་བོད་ཆོལ་ཁ་གསུམ་གྱི་ས་ཁྱོན་ཡོངས་ལ། རྒྱ་ནག་དམར་པོའི་སྲིད་གཞུང་གིས་དྲག་གནོན་དང་དབང་བསྒྱུར་བྱས་ཏེ། ཟིང་འཁྲུག་ཞོད་འཇགས་དང་དམངས་གཙོ་བཅོས་བསྒྱུར། གྲལ་རིམ་འཐབ་རྩོད། མི་དམངས་སྤྱི་ཁང༌། རིག་གནས་གསར་བརྗེ། དམག་ཁྲིམས་བསྡམས་པ། རྒྱལ་གཅེས་ཆོས་གཅེས། རྡུང་རྡེག་ཚ་ནན། གསུམ་གཅིག་བཞིའི་དོན་རྐྱེན་ལ་གདོང་ལེན་ཟེར་བ་སོགས་ཀྱི་བྱ་འགུལ་གཅིག་རྗེས་གཉིས་མཐུད་དུ་སྤེལ་བའི་ཁྲོད། བོད་ཀྱི་སྣོད་བཅུད་ཡོངས་ལ་གཏོར་ཚད་ལས་འདས་པ་བཏང་ཡོད་པ་མ་ཟད། བོད་མི་འབུམ་ཕྲག་མང་པོ་རྐྱེན་ལམ་དུ་བཏང་ཡོད།
སྤྱི་ནོར་༧གོང་ས་མཆོག་གི་དབུ་ཁྲིད་པའི་བཙན་བྱོལ་བོད་གཞུང་མང་ཡོངས་ནས། དུས་རྒྱུན་གཞིས་བཞུགས་ཆོལ་གསུམ་བོད་མི་རྣམས་ཀྱི་འགྱུར་བ་མེད་པའི་ལྷག་བསམ། ཞུམ་པ་མེད་པའི་སྙིང་སྟབས། རྒྱུན་ཆད་མེད་པའི་ཆོད་སེམས། མདོར་ན་ལུས་ངག་གི་ཡིད་གསུམ་ཀྱི་སྐྱིད་སྡུག་མཉམ་མྱོང་གིས་གདུང་སེམས་མཉམ་བསྐྱེད་ཞུ་བཞིན་ཡོད་ལ། ལྷག་པར་དུ་ཕྱི་ལོ་ ༢༠༠༨ ལོ་ནས་བཙན་བྱོལ་བོད་མིའི་སྤྱི་ཚོགས་ཁྲོད་གླུ་གར་སྤྲོ་སྐྱིད་སོགས་མཚམས་འཇོག་བྱས་ཟིན་པ་ལྟར། ད་རེབ་རྒྱ་ནག་གཞུང་གིས་ཡར་ལངས་ཞིང་བྲན་ཁྲི་ཚོ་བརྒྱར་བཅིངས་གྲོལ་ཐོབ་སྟེ། མི་ལོ་ ༥༠ འཁོར་བའི་དུས་དྲན་དང༌། བོད་ལ་དམངས་གཙོའི་བཅོས་བསྒྱུར་བྱས་ཏེ། མི་ལོ་ ༥༠ འཁོར་བའི་དགའ་སྤྲོའི་དུས་དྲན་གཉིས་དགའ་སེམས་འཁོལ་བའི་ངང་ཕྱི་ཚེས་ ༢༨ ཉིན་གཙི་སྲུང་བྱ་རྒྱུ་ཡིན་ཟེར་དེ་དོན་དངོས་དང་མི་མཐུན་ཞིང༌། གཞིས་བྱེས་བོད་མིའི་མངོན་འདོད་དང་མི་འཚམས་སྟབས། བོད་མི་མང་སྤྱི་འཐུས་ལྷན་ཚོགས་ནས་ངོས་ལེན་མེད་པ་མ་ཟད་མཐའ་གཅིག་ཏུ་ངོ་རྒོལ་བྱ་རྒྱུ་ཡིན། ཞེས་བཀོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ངའི་རྒྱུན་ལྡན་གྱི་ངོས་འཛིན་ནང་དུས་བབ་གསར་ཤོག་འདི་བཙན་བྱོལ་བའི་གསར་ཤོག་ཁག་ནང་གི་གསར་འགྱུར་དག་ཤོས་དང་། སྤུས་ཚད་བཟང་ཤོས། ཚིག་གི་བརྗོད་པ་ཡག་ཤོས་བཅས་སུ་མཐོང་ནས་དགའ་མོས་ཆེ་ཤོས་བྱེད་ཀྱིན་ཡོད། འོན་ཀྱང་བར་ལམ་ནས་ཡིག་ནོར་དང་ཆད་ལྷག་སྣ་ཚོགས་འབྱུང་གི་འདུག་པ་དཔེར་ན། གོང་གསལ་གྱི་འགྱུར་ཉུང་ངུ་འདིའི་ནང་དུ། འགྲོ་བ་མིའི་ཐོབ་ཐང་མེད་པ་གསལ་ཡིན་སྟབས་ཞེས་པ་དང་། བོད་ཀྱི་སྣོད་བཅུད་ཡོངས་ལ་གཏོར་ཚད་ལས་འདས་པ་བཏང་ཡོད་པ་མ་ཟད་ཅེས་པ། སྤྱི་ནོར་༧གོང་ས་མཆོག་གི་དབུ་ཁྲིད་པའི་བཙན་བྱོལ་བོད་གཞུང་ཞེས་པ། ཞུམ་པ་མེད་པའི་སྙིང་སྟབས་ཞེས་པ། གཙི་སྲུང་བྱ་རྒྱུ་ཡིན་ཟེར་དེ་དོན་དངོས་དང་མི་མཐུན་ཞེས་པ་སོགས་ལ་གཟིགས་དང་། ནོར་འཁྲུལ་ཅི་ཙམ་འདུག གསར་འགོད་པ་ལགས་འདིའི་ཐད་ཅུང་གཟབ་ན་བཟང་། སྐད་ཆ་འདི་དུས་བབ་གསར་ཤོག་ལ་དང་བ་ཡོད་པའི་མི་ཞིག་གི་ཤ་ཚའི་སྐད་ཆ་ཡིན་པ་ལས་སྡིགས་སྨོད་དང་སྐྱོན་བརྗོད་བྱས་པ་མིན།
ཁོ་ལ་དྲ་གྲོགས་྄རྣམས་ཀྱིས་གཟབ་གཟབ་བྱོས།
ཁ་བ་དཀར་བོ་ཟེར་བ་འདི་དངོས་གནས་རྒྱ་ནག་གི་རྒྱུག་ཁྱི་ཡིན་འདྲ། ཁོས་ཁ་སང་རྒྱ་ནག་གིས་བཤད་ཀྱིན་པའི་སྐད་ཆ་དག་བཤད་ཀྱི་འདུག
དྲིན་ཆེན་ཚོ། བཙན་བྱོལ་ལ་མཚོན་ན་སྐུ་དྲག་ཟེར་བའི་དཔོན་པོ་དང༌། མངའ་བདག་དང༌། ས་བདག་ཟེར་བ། བཀས་བཀོད་རྒྱུན་འཛིན་ཞིང་བྲན་ལམ་ལུགས་ཟེར་བ་མཇུག་རྫོགས་ནས་ལོ་ཡི་འཁོར་མོ་བཅུ་ཕྲག་མང་པོ་ཕྱིན་ཚར་ལ། དེང་སྐབས་ང་ཚོས་ང་ཚོའི་དཔོན་པོ་འདེམས་བཞིན་ཡོད་ལ། ང་ཚོས་ང་ཚོའི་ངོ་ཚབ་གཙང་མ་བྱེད་ཀྱིན་ཡོད་པ་མིག་མཐོང་ལག་ཟིན་རེད། དེ་ལས་བཙན་བྱོལ་བོད་གཞུང་དང་བཙན་འཛུལ་བ་རྒྱ་གཞུང་གཉིས་གདན་ཐོག་གཅིག་ལ་བཞག་ན་ཧ་ཅང་མི་འོས།
ཡིག་ནོར་རེད། རྒྱ་དཔོན་གྱི་་་་་་
ང་ཚའོ་ངོས་ནས་འདི་ལྟར་བཤད་དགོས་བ་རེད་བྱ་བའི་དགོས་མཁོ་རེད།
རྒྱ་ནག་གིས་བོད་ལ་ཞི་བའི་བཅིངས་གྲོལ་མ་རེད་དྲག་པོའི་བཙན་འཛུལ་རེད། ཞིང་བྲན་རྐང་འོག་ནས་ཐར་བ་མ་རེད་སྐུ་དྲག་ཚོའི་རླུང་རྟ་རྒུད་པ་རེད།
ཁ་བ་དཀར་པོ་ལགས་་ཞིང་བྲན་ཁྲི་ཚོ་བརྒྱ་རྒྱ་དཔོན་ནས་རྐང་འོག་ཏུ་ཡང་བསྐྱར་ལྷུང་བ་རེད་ཟེར་བའི་དོན་མ་གོ་བས་ཡང་བསྐྱར་གསལ་བཤད་ཡོངས་བར་མཁྱེན།
ཞིང་བྲན་ཁྲི་ཚོ་བརྒྱ་སྐུ་དྲག་ཚོའི་རྐང་འོག་ནས་ཐར་བ་རེད། ཞིང་བྲན་ཁྲི་ཚོ་བརྒྱ་རྒྱ་དཔོན་ནས་རྐང་འོག་ཏུ་ཡང་སྐྱར་ལྷུང་བ་རེད། འདི་ནི་ལོ་རྒྱུས་ཀྱི་དོན་དངོས་རེད། འདི་ལ་བོད་རྒྱ་སུས་ཀྱང་འགྱུར་བ་གཏོང་ཐུབ་ཀྱི་མ་རེད།