བོད་ལ་རང་སྐྱོང་གི་ཐོབ་ཐང་མེད།

རྭ་རྒྱ་བློ་དབང༌།

བོད་ལ་རང་སྐྱོང་གི་ཐོབ་ཐང་ཡོད་དམ། ཡང་ན་བོད་ཀྱི་རང་སྐྱོང་གི་ཐོབ་ཐང་ཞེས་པ་གང་འདྲ་ཞིག་ཡིན་ནམ། རང་རེའི་ཆབ་སྲིད་པ་ཚོས་བོད་ཀྱི་རང་སྐྱོང་ཐོབ་ཐང་གི་སྐོར་བཤད་དུས་བཙན་པོའི་རྒྱལ་རབས་ནས་བཟུང་བའི་ལོ་རྒྱུས་ཤིག་བཤད་ཀྱི་ཡོད་ལ། ཡང་ན་རྒྱ་ནག་དང་མི་འདྲ་བའི་བོད་ཀྱི་ཁྱད་ཆོས་དག་གླེང་གི་ཡོད། རང་སྐྱོང་གི་ཐོབ་ཐང་དངོས་ནི་འདས་པའི་ལོ་རྒྱུས་ཁྲོད་མེད་ལ་འཚོ་བའི་གོམས་སྲོལ་ཁྲོད་ཀྱང་མེད། འདས་པའི་བྱུང་རབས་ཁྲོད་ཀྱི་ཐོབ་ཐང་དེ་ཡབ་མེས་ཚོའི་ཡིན་ལ། འཚོ་བའི་གོམས་སྲོལ་དང་སྐད་བརྡ་མི་འདྲ་བ་ཙམ་ནི་རང་སྐྱོང་གི་ཐོབ་ཐང་ཞིག་ཏུ་གཏན་ནས་བརྩི་མི་འོས།  མདོར་ན་རང་སྐྱོང་གི་ཐོབ་ཐང་ཞེས་པ་ནི་གདོད་མ་ནས་ཡོང་བའི་ལྷན་སྐྱེས་ཤིག་མིན་པར་དཀའ་སྤྱད་འབལ་རྩོལ་གྱིས་བསྐྱེད་པའི་ཐོན་འབྲས་ཤིག་ཡིན་འོས། རང་སྐྱོང་གི་ཐོབ་ཐང་ཡོད་དུ་གྱུར་ན་དེ་ནི་གཞན་གྱི་འཕྲོགས་ཆོག་པ་ཞིག་མིན་ལ་འཕྲོགས་ཐུབ་པ་ཞིག་དེ་བས་ཀྱང་མིན། གལ་སྲིད་རང་སྐྱོང་གི་ཐོབ་ཐང་གཞན་གྱིས་འཕྲོགས་པའམ་ཤོར་སོང་ན། དེ་ནི་རང་སྐྱོང་གི་ཐོབ་ཐང་མེད་པའི་རྒྱུ་མཚན་བླ་ན་མེད་པ་དེ་ཡིན་ངེས།  གང་ལྟར་ཡང་ད་ལྟ་བོད་གཞིས་བྱེས་གང་ལ་ལྟོས་ཀྱང་རང་སྐྱོང་གི་ཐོབ་ཐང་ཡོད་པ་ཞིག་གཏན་ནས་མཐོང་མི་ཐུབ།  རང་རེའི་ལོ་ངོ་ལྔ་བཅུའི་རང་གི་བདག་དབང་འཐབ་རྩོད་ཁྲོད་རང་སྐྱོང་གི་ཐོབ་ཐང་མ་ལོན་པ་དེས་ཀྱང་རང་ཅག་ལ་རང་སྐྱོང་གི་ཐོབ་ཐང་མེད་པ་གསལ་སྟོན་བྱེད་ཀྱི་ཡོད། གལ་སྲིད་རང་སྐྱོང་གི་ཐོབ་ཐང་རྩོད་མེད་ཅིག་ཡོད་དབང་དུ་བཏང་ན་ཚེ་སྲོག་གཏའ་མར་བཞག་པའི་འཐབ་རྩོད་འདི་དག་དགོས་མཁོ་མེད་པ་ཞིག་རེད། ད་ལྟ་གཞིས་བཞུགས་བོད་མི་རྣམས་ཀྱིས་ཐབས་ཟད་འུ་ཐུག་གི་བློས་གཏོང་འདི་རྒྱ་ནག་སྲིད་གཞུང་གི་ཁ་གཏད་དུ་ལངས་པའི་ཞུམ་པ་མེད་པའི་འགོག་རྒོལ་ཞིག་ཡིན་པ་སྨྲོས་མེད་དང༌། དེ་བས་ཀྱང་གལ་ཆེ་བའི་ནང་དོན་ཞིག་ཡོད་པ་ནི། བོད་པའི་མཁས་པར་རློམ་པ་ཚོར་དུས་ལ་བབས་པའི་རེ་འབོད་དྲག་པོ་ཞིག་བཏང་བ་དེ་རེད། ད་ལྟ་བོད་ཕྱི་ནང་གཉིས་ཀར་མཁས་པར་སྒྲོག་པ་དང་ཤེས་ལྡན་པར་འབོད་པ་གྲངས་མེད་ཅིག་ཡོད་ན་ཡང༌། མཐར་གཏུགས་པའི་ཡོན་ཏན་ནི་རྩོམ་ཡིག་རེ་འབྲི་བ་དང་གཞུང་ཚན་རེ་འཆད་ཁྲིད་བྱེད་ཤེས་པ་ཙམ་རེད། ད་ལྟ་རང་ཅག་ལ་ཡོད་པའི་རང་སྐྱོང་གི་ནུས་ཤུགས་འདི་འདྲ་ཞིག་གིས་དུས་རབས་ཀྱི་འགྱུར་ལྡོག་དང་མིའི་སྤྱི་ཚོགས་ཀྱི་འཕེལ་འགྱུར་གློག་ལྟར་མྱུར་བའི་ནང་ཇི་ལྟར་རང་སྐྱོང་བྱ་རྒྱུ།  གནའ་ནས་ད་ལྟ་བར་འཇགས་པའི་གོམས་སྲོལ་ཞིག་སྟེ། བསྟན་བཅོས་བརྩམས་པ་ཆེས་མང་ན་མཁས་པར་བརྩི་བ་དང་སུ་ཞིག་མཁས་པར་གྲགས་པ་ན་ཐམས་ཅད་ཀྱིས་ཡིན་ཤག་ཤག་གིས་བཀུར་རྐྱང་དང་མཆོད་རྐྱང་བྱེད་པ་འདིས། ངོ་ཚ་མེད་པའི་བརྫུ་བག་ཅན་ཆེས་མང་པོ་ཞིག་ཤེས་ཡོན་པ་དང་མཁས་དབང་ཞེས་པའི་མིང་བྱང་འོག་ཡོད་ལ། ཁོ་ཚོས་ནི་ཕྱི་རབས་པའི་ཤེས་རབ་དང་འཕེལ་རྒྱས་ལ་ཟ་ཟུར་མང་པོ་ཞིག་ནས་བཅོམ་བརླགས་བྱེད་ཀྱི་ཡཽད། གནས་སྟངས་འདི་ནི་དགོན་པ་དང་སློབ་གྲྭ་སོགས་ཤེས་ལྡན་མི་སྣ་གསོ་སྐྱོང་བྱ་སའི་ཁོར་ཡུག་ཡོངས་ལ་ཁྱབ་ནས་ཡོད། དུས་རབས་ཀྱི་རྒྱུན་ཤེས་ཙམ་ལ་ཡང་མགོ་བོ་ནག་འཐོམ་མེར་ཡོད་ན་ཡང་ང་ནི་མཁས་སོ་སྙམ་པའི་འདུ་ཤེས་དེས་དུས་ནམ་ཡང་རང་ཉིད་ལ་ཚད་གཞི་ཞིག་རྙེད་ཀྱི་མེད། དེ་འདྲའི་ཁོར་ཡུག་ཅིག་མུ་མཐུད་པའི་དབང་གིས་རང་ཉིད་རང་གིས་སྐྱོབ་པའི་ཐོང་ཐང་དེ་ང་ཚོ་དང་བར་ཐག་ཆེས་རིང་བར་གྱུར་བ་རེད། ཞིབ་ཏུ་སོམས་དང༌། ང་ཚོས་རྗོད་བཞིན་པའི་རང་སྐྱོང་ཞེས་པ་ནི་མི་སྒེར་བ་གཅིག་གི་མི་ཚེར་གོ་བ་མ་ཡིན་པར་མི་རིགས་ཧྲིལ་བོའི་འཚོ་བའི་འགན་ཁུར་དང་དེའི་འཕེལ་རྒྱས་ལ་གོ་དགོས་པ་ཞིག་རེད། གལ་སྲིད་རྒྱ་མི་རིགས་ཀྱིས་ཤེས་ཐུབ་པའི་ཤེས་བྱ་དང་བྱ་ཐུབ་པའི་བྱ་བ་དག་གི་བརྒྱ་ཆའི་བཅུ་ཙམ་བོད་མི་རིགས་ཀྱིས་ཀྱང་དེ་བཞིན་ཤེས་པ་དང་བྱེད་ཐུབ་ཀྱི་ཡོད་ན། བདག་དབང་གཞན་ལ་ཤོར་བའི་སྐྱོ་གནས་འདི་གཏན་ནས་འབྱུང་མི་སྲིད་ལ། བྱུང་ཟིན་པའི་དབང་དུ་བཏང་རུང་འཐབ་རྩོད་ཀྱི་རྣམ་འགྱུར་ཆུང་ཙག་རེས་ཀྱང་བདེ་བླག་ངང་ལེན་ཐུབ་ངེས་རེད། དམག་དོན་དང་ཆབ་སྲིད་ཀྱི་ཐད་ནས་རྒྱ་ནག་གུང་ཁྲན་ཏང་ལ་ངན་ཁག་འགེལ་ཁུལ་བྱས་ཆོག་ཀྱང༌། ལོ་ངོ་ལྔ་བཅུའི་རིང་གི་རྒྱུ་ཆ་གསོག་སྒྲུབ་ཁྲོད་ཅི་ཞིག་རྙེད་ཡོད་དམ། རང་སྐྱོང་ཞེས་པ་ནི་མི་ཡོད་པ་ཙམ་གྱིས་ཡོད་འགྲོ་བ་ཞིག་ག་ལ་ཡིན། ས་ལ་འཛུགས་ཆོག་ཆོག་གི་རྐང་བ་བརྟན་པོ་ཞིག་མེད་ན་དུས་ནམ་ཡང་གཞན་དབང་ལས་ཐར་ས་མེད་པ་ནི་དངོས་པོའི་ཆོས་ཉིད་ལས་མ་འདས་པས། རང་བཙན་གྱི་འབོད་སྒྲས་གནམ་ས་འགེངས་པར་བྱས་ཀྱང་མིད་པ་འགག་པའི་སྡུག་ལས་ཙམ་རེད། དེ་ལས་མཐུན་རྐྱེན་ཡོངས་སུ་ཚང་བའི་ཁོར་ཡུག་འདི་ལ་བརྟེན་པའི་སྟོབས་ཤུགས་གསོག་སྒྲུབ་དང༌། རང་སྐྱོང་གི་མེ་སོན་རང་སྟེང་ནས་སྦར་ཐབས་བྱ་རྒྱུ་ནི་ཁ་ཚ་དགོས་གཏུགས་ཀྱི་འགན་ཁུར་ཞིག་ཏུ་མཐོང༌། དོན་དག་འདིའི་སླད་དུ་ྋགོང་ས་རྒྱལ་བ་རིན་པོ་ཆེས་བགྲང་བྱ་བཅུ་ཕྲག་འགའི་ཡར་སྔོན་ནས་གཞུང་སྒེར་གྱི་སློབ་གྲྭ་དང་དགོན་པ་ཁག་ལ་ཐུགས་སུན་པའི་བར་དུ་བསླབ་སྟོན་མཛད་ཡོད་ན་ཡང༌། རང་རེའི་ཤེས་རིག་ལས་ཁུངས་ཀྱི་གོ་སྒྲིག་འོག་གི་ཆེད་ལས་སློབ་མ་རྣམས་ལ་ལྟོས་དང༌། ཉི་མ་རྩེ་ཤར་ལ་རྩེད་འཇོ་དང་རྣམ་གཡེང་གི་ངང་ནས་ཉི་མ་སྐྱེལ་ཞིང༌། དུས་བཅད་ལྟར་གྱི་བཤུས་རྩོམ་རྣམས་གྲུབ་རྗེས་ཆེད་ལས་ཐོན་སོང་བ་དང༌། རིགས་གཅིག་རྐང་འཛིན་པ་སྐྱེད་སྲིང་བྱས་ཟིན་པར་རློམ་གྱི་ཡོད། ད་དུང་ལྟོས་དང་ཤེས་རིག་ལས་ཁུངས་ཀྱིས་ཆེད་ལས་པར་གོ་སྒྲིག་བྱས་པའི་སྦྱང་བྱ་ནི། གླུ་ལ་གཞས་དང་ཁེད་གབ་ཚིག  མདའ་མདུང་དར་ཚུལ་སོགས་གཞིས་ལུས་རྣམས་ཀྱིས་དུས་རབས་སྔོན་མའི་ལོ་རབས་བརྒྱད་ཅུའི་ནང་ནས་བཟུང་གླེང་ཟིན་པ་དང་བཅད་ཟིན་པའི་གྲུབ་དོན་རྐྱང་རྐྱང་རེད། མ་འོངས་པའི་དུས་རིམ་ནང་མི་རིགས་རང་སྐྱོང་གི་གཞི་རྟེན་ལ་ཆེད་ལས་པ་ཚོས་འདི་འདྲ་རེ་སྦྱངས་ཤིང༌། མཁས་མིང་བ་ཚོས་བསྟན་བཅོས་རྙིང་བ་དག་གི་ཚིག་སྣ་བསྡུས་པའི་བརྐུས་རྩོམ་རེ་སྤེལ་བ་དང༌། གཞོན་ནུ་བློ་སྟོབས་ཅན་ཚོས་ཀྱང་ཚོད་མེད་ཀྱིས་སྡུག་གཏམ་རེ་རྩོམ་དུ་བསྒྲིགས་ཐུབ་སོང་ན། ད་གཟོད་མི་རིགས་རང་སྐྱོང་གི་རྨང་གཞི་རྙེད་སོང་བ་ག་ལ་ཡིན། ངས་བསམ་ན་དོན་དངོས་མིའི་སྤྱི་ཚོགས་དང་ཐད་ཀར་འབྲེལ་བའི་རང་སྐྱོང་དང༌། མི་རིགས་ཤིག་ལ་ངེས་པར་ཡོད་འོས་པའི་ལ་རྒྱ་ཞེས་པ་དེ་ནི་ད་དུང་རང་ཅག་དང་རྒྱང་ཐག་རིང་ལ། གཞིས་ལུས་ཚོས་ཚེ་སྲོག་གི་འབོད་སྒྲ་མཐོན་པོ་དེས་ཀྱང་ང་ཚོ་དཀྲོགས་ཐུབ་ཀྱི་མེད་པ་འདྲ། འདིའི་རྒྱུ་རྐྱེན་ཡང་མཐར་གཏུགས་ན་མཁས་པར་གྲགས་པའི་འགྱིང་ཉམས་ཅན་ཚོ་ལ་ཐུག་ཅིང༌། ཁོ་ཚཽས་མིང་ཆེན་པོ་རེའི་ཕྱི་ཤུན་གྱོན་ཏེ་རྟ་ལམ་བོང་བུས་འགོག་པ་དང༌། ན་གཞོན་ཚོར་འདག་ཐབས་དཀའ་བའི་ངན་ཤུགས་རྫོབ་རོ་དག་བགོ་བཞིན་ཡོད། དཔེར་ན། དུས་རབས་ཀྱི་འགྱུར་ལྡོག་མ་མཐོང་བའི་རྗེས་ལུས་ཀྱི་བསམ་བློ་དང༌། དངོས་ཡོད་ཀྱི་འཇིགས་དངངས་མི་ཚོར་བའི་བག་ཕེབས་ཀྱི་རྣམ་འགྱུར། བྱ་གཞག་ལ་གསོན་ཤུགས་མེད་པའི་སྒྱིད་ལུག་གི་རང་བཞིན་སོགས་ཀྱིས་སྤྱི་ཚོགས་ཧྲིལ་བོ་ཐལ་བའི་རྡུལ་དུ་རློག་བཞིན་པའི་མི་ཚད། གནའ་རྩོམ་གཅོད་གཏུབ་ཀྱི་རྩོམ་ཡིག་བྲིས་ན་མཁས་མིང་ཐོབ་པ་དང༌། བཅོས་མའི་བརྫུ་བག་གི་རྣམ་པས་བཀུར་སྟི་འདྲེན་པ། ཁྱོད་མཛེས་ང་ཡག་གི་བསྟོད་པས་ལམ་འགྲོ་སྟེར་བ་སོགས་ཀྱིས་ཀྱང་རྗེས་རབས་པ་ཚོར་རང་གཤིས་དང་འགན་ཁུར་མི་དགོས་པའི་བསླད་སྐྱོན་སྐྱག་དྲི་བྲོ་བ་དག་བགོ་བཞིན་ཡོད། ང་ཚོའི་མི་རིགས་ཀྱིས་རང་སྐྱོང་ཐོབ་ཐང་དངོས་གནས་ཤིག་རྩོད་ལེན་བྱེད་དགོས་ན། ཐོག་མའི་གོ་རིམ་ནི་མཁས་མིང་ཁུར་བའི་བརྫུ་བག་ཅན་ཚོའི་གདོང་པགས་གསལ་རྗེན་དུ་བཤུས་ཏེ། ཁོ་ཚོར་དགོས་མཁོ་ཡོད་པའི་གནའ་རྩོམ་གཅོད་གཏུབ་ཁང་ཞིག་བཙུག་ཀྱང་ཆོག་ལ། ད་ལྟ་སྤྱི་ཚོགས་ཁྲོད་དུ་ནམ་ཉིན་ལྟོས་མེད་ལ་དཀའ་ངལ་གྱི་ཁྲོད་ནས་ལངས་ཤིང༌། ལྷག་བསམ་དང་བརྩོན་འགྲུས་ཀྱི་མེ་འབར་བ་ཚོར་གོ་སྐབས་གསར་བ་ཞིག་སྤྲད་དེ། ཁོ་ཚོས་མི་རིགས་ལ་བཅངས་པའི་སྤྱི་སེམས་དང་མ་འོངས་པར་རེ་བའི་མིག་ཞགས་རིང་དུ་རྐྱོངས་པར་མཐུན་རྐྱེན་བླ་ལྷག་ཏུ་བསྐྲུན་པའི་དུས་ལ་བབས་འདུག་པར་སྙམ། གལ་སྲིད་མུ་མཐུད་ནས་སྒྱིད་ལུག་དང་རང་མཐོང་གིས་ཀུན་ནས་སྦགས་པའི་མཁས་བརྫུ་ཚོར་གོང་བཀུར་གྱིས་བསྡད་ཚེ་ངེད་ཅག་གི་རང་སྐྱོང་ནི་ནམ་མཁར་བཞད་པའི་མེ་ཏོག་ལ་སྨོན་པ་ལས་མ་འདས་སོ། །

༢༠༠༩་ ༣  ༢༧ ཉིན།