རང་གི་རང་འཚང་རང་རིགས་ནང་དུ་སྟོན།།
ཕན་ཚུན་ཤེས་པའི་གནད་ཀྱི་དོན་དམ་པ།།
སྤྱངས་པའི་ཉམ་མྱོང་ལ་བརྟེན་ལྷན་སྐྱེས་ཀྱི།།
ཤེས་རབ་དགོས་པ་ཚང་མས་ཐུགས་ལ་བཟུང་།།
ཁ་ནས་གང་ཐོན་བཤད་པ་དྲང་གཏམ་མིན།།
སེམས་ནང་གང་དྲན་བྲིས་པ་སྙན་ངག་མིན།།
མིག་གི་གང་མཐོང་དཔྱད་པ་དཔྱོད་ཤེས་མིན།།
རང་གི་རིགས་འཕྱ་བ་གླེན་རྟགས་ཡིན།།
གླེང་ངོ་རང་གིས་ཟིན་ན་དཔྱོན་ལྡན་ཡིན།།
རང་རིགས་ལར་ཞེན་ཆེ་བ་སྲུ་ཞུ་ཡིན།།
རང་ལ་སེམས་པ་དཀར་བ་རང་ལུགས་ཡིན།།
འདི་དག་ཡིན་མིན་ཁྱེད་ཅག་དྲ་གྲོགས་ཚོས།།
རང་རང་སེམས་ཀྱི་རྩ་བ་བསྔོག་པའི་མཐར།།
ཕན་ཚུན་སྤུན་ཟླ་ཡིན་པའི་འདུ་ཤེས་དེ།།
ཤེས་པའི་སྒོ་ནས་གཏམ་བཤད་གནང་བར་འཚལ།།
རིགས་ཞེན་སེམས་ཀྱི་ཤར་བའི་བྲིས་གཟུགས་འདི།།
དྲ་གྲོགས་སེང་རྡོར་གཙོ་བའི་རིགས་འཛིན་པ།།
ཡོངས་ཀྱིས་སེམས་ངོར་བཞག་ནས་གཏམ་ལན་རེ།།
གང་ཞིག་བཤད་འདོད་ཡོད་ཀྱང་སེམས་གཏིང་ནས།།
གུས་པ་དང་བཅས་དགའ་བསུ་གྲངས་མེད་ཡོད།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
གྲོགས་པོ་ལྷ་ཆབ་ལགས། སྐད་ཆ་འདི་ཚོ་དངོས་ནས་དགོད་སྤྱད་རང་རེད། བུ་མོ་ཚོས་ཁོ་རང་གི་ཆེད་དུ་རང་ཤི་རྒྱག་འདོད་ཡོད་པའི་གཏམ་དེ་དག་ནི་ཐོས་མ་མྱོང་མོད། འོན་ཀྱང་། ཁོ་རང་གིས་བྲིས་པའི་རྟུལ་འཕོད་ཟེར་བའི་དེབ་དེའི་ཅོལ་རྒྱུགས་དགའ་བ་མི་ཉུང་བ་ཞིག་གིས་སེམས་ཁོང་དུ་གདོན་ཞུགས་དེ་བོད་ཀྱི་ནང་ཆོས་ལ་ངོ་རྒོལ་བྱེད་མཁན་ཡང་གྲ་བས་ཁྲོད་དུ་ཡོད་པ་མ་ཟད། གྲ་བ་མི་ཉུང་བ་ཞིག་ཀྱང་གྲ་ལོག་བྱས་པའི་གཏམ་གསར་དེ་འདྲ་ཡང་གོ་རྒྱུ་འདུག གང་ལྟར། མི་དེའི་སྐད་ཆ་དང་སྙན་ངག་འབྲི་ལུགས་དེ་ནི་གནའ་སྔ་མོའི་རྒྱ་གར་ཡུལ་གྱི་ཕྱི་རོལ་བ་དེ་དག་གི་གྲུབ་མཐའ་རྩོམ་པ་པོ་དེ་ཚོས་འཇིག་རྟེན་ན་ལས་འབྲས་དང་སྐྱེ་བ་སྔ་ཕྱི་མེད་པའི་བསྐོར་སྒྲུབ་ནས་མཐར་རང་གི་མ་དང་བུ་མོ་ཆགས་སྤྱོད་བྱས་པ་དེ་དག་གིས་བྱ་སྤྱོད་ཡོད་པ་དེ་དག་སེམས་སུ་དྲན་ནས་འོང་དུ་འཇུག་པ་ལས། འཇིག་རྟེན་གྱི་གནས་ལུགས་མཐར་ཐུག་གི་ཡང་རྩེ་ནང་ཆོས་ལ་རྒྱུས་མངའ་གང་ཙམ་ཞིག་ཡོད་པའི་རྨང་གཞི་དེའི་སྟེང་ནས་རྩོམ་ཡིག་འབྲི་བཞིན་མེད་པ་ནི་ཕལ་ཆེར་ཁ་ཚོད་གཅོད་ཐུབ་ཀྱི་ཡོད་པ་འདྲ། ཁྱེད་རང་ལ་དུས་ཁོམ་བྱུང་བ་ཡིན་ན་ནི་ཧི་གཟུགས་ཟིན་བྲིས་ནང་དུ་སོང་དེ་ཁོ་རང་གིས་བྲིས་པའི་སྙན་ངག་དེ་དག་གི་ལྩི་ཁོག་ལ་གཟིགས་དང་དེ་ནས་རྟོགས་ངེས་རེད། ངས་རེ་བ་ལ་གྲོགས་པོ་ཁྱེད་རང་གིས་ཁོས་བྲིས་པའི་སྙན་ངག་མི་ཉུང་བ་ཞིག་ཧི་གཟུགས་ཟིན་བྲིས་སུ་འདུག་ན་དེ་རུ་བསྐོར་ཉུལ་རེ་བྱེད་རྒྱུ་དེ་ཡིན།
བློ་བཟང་མཁྱེན་བརྩེ་ལགས་ཀྱིས་གསུང་བ་དེར་ངས་ཡིད་དུ་བཞག་ཆོག ལམ་སྟོན་གནང་བ་དེར་ཐུགས་རྗེ་ཆེ། སྐུ་ཉིད་ལྟ་བུ་གང་མང་མང་གིས་ལམ་སྟོན་འོག་ནས་ང་རང་ཡར་བླངས་མ་ཐུབ་ཀྱང་། མི་གཞན་དག་ཁ་ཤས་རེ་ཁྱེད་རང་ལྟ་བུ་ཁ་ཤས་ཀྱི་སློབ་སྟོན་འོག་ནས་འཚར་ལོངས་བྱུང་ཐུབ་ངེས་རེད། རྗེས་ཕྱོགས་ཀྱང་འདི་ལྟར་དུས་ཐོག་དུ་ཕེབས་ནས་ལམ་སྟོན་དང་བགྲོ་གླེང་རེ་གནོང་རོགས་ཞུ།
གྲོགས་པོ་ལགས། སེང་རྡོར་ལ་སྐད་ཆ་ཅང་མ་བཤད་མ་གཏོགས། བུ་མོ་དེ་ཚོའི་ཐུགས་ལ་ཕོག་འགྲོ་ཡི་རེད། དེང་སང་བོད་ན་གསར་འགྱུར་ཆེན་པོ་གཉིས་ཡོད། གཅིག་སེང་རྡོར་གྱི་རྩོམ་ཡིག་གི་བརྗོད་བྱའི་ཐད་ནས་ཞོགས་དུང་ནང་བཞིན་གནམ་ས་གཡོ་བཞིན་པའི་གསར་འགྱུར་དང༌། གཉིས་སེང་རྡོར་གྱི་ཆེད་དུ་བུ་མོ་དེ་ཚོས་མི་ཚེ་ལ་ཆང་ས་མི་རྒྱག་པ་དང༌། གལ་སྲིད་སེང་རྡོར་གྱིས་མི་གཞན་དང་ཆང་ས་ནམ་རྒྱབ་ན་རང་ཤི་རྒྱག་གི་ཡིན་ཟེར་བའི་གསར་འགྱུར་གཉིས་ཡོད། འདི་ནི་བོད་མི་ཚོས་ལྷ་རིགས་ཤིག་གམ་ཆོ་འཕྲུལ་ཞིག་ཡིན་ངེས་ཟེར་རྒྱུའི་ཕོ་གསར་རྫིག་པོ་ཞིག་ཡོད་རབས་ཟེར། རྒྱ་མི་ཚོས་བོད་པ་ཡིན་རྒྱུ་མ་རེད། བོད་ལ་འདི་འདྲའི་མི་ཞིག་འབྱུང་མི་སྲིད་ཟེར་རྒྱུ་ཞིག་རེད་འདུག་ཟེར། དེའི་སྟབས་ཀྱིས་ངས་ཀྱང་དེ་མཐོང་ན་འདོད། ཁོ་སློབ་གྲྭ་ན་ཡོད་དུས་དགེ་རྒན་མ་ཞིག་ཁོང་གི་ཆེད་དུ་སྨྱོན་པར་ཆགས་འདུག་ཟེར། ད་དུང་སློབ་གྲོགས་བུ་མོ་དེ་ཚོ་ཁོའི་ཆེད་དུ་ལྕེབས་མཁན་དང་སྨྱོན་པར་ཆགས་པ་མང་བོ་ཡོད་རབས་གོ་ཐོས་བྱུང༌། དེའི་སྟབས་ཀྱིས་ཁོང་རང་བཞིན་གྱིས་སྐད་གྲགས་ཆེན་པོ་ཆགས་པ་རེད་ཟེར། ཨེ་བདེན་མི་ཤེས། གལ་སྲིད་བདེན་ན་མི་དེ་ནི་ངའི་ཡིན་ཞིག་ཡིན་རྒྱུ་རེད། གྲོགས་པོ་ལགས། གལ་སྲིད་ཁོང་ནམ་མཐོང་ན་ངེད་གཉིས་བསྡུར་རྒྱུ་མ་བརྗེད་རོགས། ང་ལས་དྲག་ན་ང་ལ་བུ་མོ་རྣམས་གསོད་མཁན་གྱི་ལག་དམར་ཞེས་པའི་མིང་དེ་མི་དགོས། དེ་ནི་ཁྱོད་རང་བརྒྱུད་དེ་ཁོང་ལ་སྤྲོད་རྒྱུ་ཡིན།
སྤྱིར་བསམ་ཚུལ་བཏོན་པ་ལེགས་མོད། སྤྱངས་བ་མ་ཡིན་སྦྱང་བ་ཡིན་པ་འདྲ།
གང་ལྟར་ཁྱོད་ཀྱིས་མང་པོ་ཞིག་འབྲི་གིན་འདུག་པ་བཟང་གི ཡིན་ཡང་གོང་གི་འདི་འདྲའི་ཚིག་བཅད་ནི་ཚིག་ལྷུག་ལས་ཀྱང་ཚིག་ཉོག་མང་བར་འདུག་པ་མ་ཟད། འདི་ལྟར་མུ་མཐུད་ནས་བྲིས་ན་ཁྱོད་ཀྱི་ཚིག་སྡེབ་ཉེས་ནས་ཉེས་བར་འགྲོ་བར་གདོན་མི་ཟ། དེ་བས་ཚིག་ལྷུག་ལ་བྱང་ཆུབ་རྗེས་ཚིག་བཅད་བྲིས་ན་ཚིག་ལྷག་མི་འབྱུང་བར་ཁྱད་པར་ཆེན་པོ་ཡོད་པར་མཁས་པས་གསུངས་པ་རེད་ཀྱང་རེད་སྙམ། དཔེར་ན། “སྦྱངས་པའི་ཉམ་མྱོང་ལ་བརྟེན་ལྷན་སྐྱེས་ཀྱི་ཤེས་རབ་དགོས་པ་”ཟེར་བ་ལས། ལྷན་སྐྱེས་ཀྱི་ཤེས་རབ་ལ་བརྟེན་ནས་སྦྱངས་སྟོབས་ཀྱི་ཡོན་ཏན་ནམ་ཉམ་མྱོང་གིས་ཕྱུགས་པར་འགྱུར། ཞེས་ན་ཅི་འདྲ། “འདི་དག་ཡིན་མིན་ཁྱེད་ཅག་དྲ་གྲོགས་ཚོས་རང་རང་གི་སེམས་ཀྱི་རྩ་བ་བསྔོག་སྟེ་ཕན་ཚུན་སྤུན་ཟླའི་འདུ་ཤེས་དེས། ཤེས་པའི་སྒོི་ནས་གཏམ་བཤད་གནང་བར་འཚལ།”ཞེས་སོ། །ཡང༌།
“དྲ་གྲོགས་སེང་རྡོར་གཙོ་བོའི་རིགས་འཛིན་པ་ཡོངས་ཀྱིས་(བདག་གིས་བྲིས་པ་འདི་)སེམས་ངོར་བཞག་ནས་གཏམ་ལན་གང་ཞིག་བཤད་འདོད་ཡོད་ཀྱང་བདག་གི་སེམས་གཏིང་ནས་གུས་པ་དང་བཅས་དགའ་བསུ་གྲངས་མེད་ཡོད།”ཅེས་པ་དེའོ། ། དེ་བས་ད་ཐེངས་ཀྱི་རྩོམ་ཡིག་འདི་ཚིག་བཅད་དུ་སྡེབ་པ་དེ་འདྲ་བཟང་རྒྱུ་མི་འདུག འདི་འདྲ་བ་བྲིས་མང་ཤོར་ན་ཁྱེད་ཀྱི་རྩོམ་ཉམས་ཤོར་རྒྱུ་རེད། དེའི་མི་ཚད་བརྗོད་འདོད་ཀྱི་དོན་དག་ཚིག་ཉོག་ལ་བསྐུར་རྒྱུ་རེད་སྙམ། དེ་ཙམ་བྱོས། ཡང་གིས་མཇལ་ཡོང༌།