མ་འོངས་པར་མུ་མཐུད་དུ་ཞལ་འདེབས་བསྡུ་རུབ་ཀྱིས་རྒན་པའི་མ་དངུལ་ཐེབས་རྩ་ཞིག་འཛུགས་འཆར་ཡོད་ཟེར།
ཕྱི་ཚེས་ ༡༣ ཉིན་སྐབས་བཅུ་གཅིག་པའི་མདོ་སྨད་ངྷ་ས་ས་གནས་རྒྱུན་ལས་གྱི་གོ་སྒྲིག་འོག ངྷ་སར་གནས་བཞུགས་མདོ་སྨད་ཆོལ་ཁོངས་ཀྱི་དགུང་ལོ་ ༥༠ ཡན་ལ་སོན་པའི་ལོ་ལོན་རྒན་རབས་པ་ཉི་ཤུ་ལྷག་ལ་རྒན་བཀུར་ཆུང་བྱམས་དང་ཐུགས་རྗེ་ལེགས་གསོལ་མཚོན་ཆེད་ཉིན་གཅིག་གི་ཞལ་ལག་ཕུལ་ཡོད། དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གཙོས། མདོ་སྨད་དབུས་རྒྱུན་ལས་ཚོགས་གཙོ་དང་ཚོགས་གཞོན། དྲུང་ཆེ་བཅས་ཆེད་ཕེབས་ཀྱིས་རྒན་རབས་པ་རྣམས་ལ་ཁ་བཏགས་ཕུལ་ཏེ་བཀའ་དྲིན་ལེགས་གསོལ་ཞུས་ཡོད། སྐབས་དེར། མདོ་སྨད་ངྷ་ས་ས་རྒྱུན་ཚོགས་གཙོ་གཡང་ཁོ་རྒྱལ་ལགས་ཀྱིས་ཐེངས་འདིའི་ལས་འགུལ་གྱི་དམིགས་ཡུལ་ཐད་གསུངས་དོན། ང་ཚོ་སྐབས་བཅུ་གཅིག་པའི་མདོ་སྨད་ངྷ་ས་ས་རྒྱུན་གྱི་ངོས་ནས་གཞན་གྱི་ཞལ་འདེབས་བསྡུ་རུབ་བྱས་པའི་མ་དངུལ་དེས་ངྷ་སར་གནས་བཞུགས་མདོ་སྨད་ཀྱི་རྒན་རབས་པ་ ༤༠ ལྷག་ལ་ཉིན་གཅིག་གི་ཞལ་ལག་འབུལ་རྒྱུའི་མགྲོན་འབོད་ཞུས་ཡོད་མོད། རྒན་རབས་པ་ཁག་ཅིག་གཟུགས་གཞི་བདེ་ཐང་མིན་པའི་དཀའ་ངལ་སོགས་ཀྱི་རྐྱེན་པས། དེ་རིང་འདིར་རྒན་རབས་པ་ ༢༠ ལྷག་ལས་འབྱོར་མི་འདུག་ཟེར་ལ། ཚོགས་གཞོན་ཨ་ལོ་ཡིས་བཤད་དོན། ང་ཚོས་འདི་ལྟར་བསྒྲུབ་པའི་དམིགས་ཡུལ་ནི། ང་ཚོ་བོད་མི་རིགས་ཀྱི་རྒན་བཀུར་ཆུང་བྱམས་ཀྱི་སྲོལ་རྒྱུན་བཟང་པོ་འདི་མི་ཉམས་རྒྱུན་འཛིན་ཡོང་ཆེད་དང་། གོ་སྐབས་འདི་བརྒྱུད་རྒན་པ་ཚོ་ངོ་ཤེས་པར་བྱ་རྒྱུ་དེ་ཡིན་ལ། རྒན་པ་ཚོའི་ངོས་ནས་ཀྱང་ཁ་པར་ཨང་གྲངས་ང་ཚོར་སྤྲད་པ་ཡིན་ན། རྗེས་ཕྱོགས་དཀའ་ངལ་ཅི་བྱུང་ཡང་ང་ཚོས་བདག་སྐྱོང་བྱ་རྒྱུར་སྟབས་བདེ་བཟོ་རྒྱུ་གལ་ཆེན་པོ་རེད། ང་ཚོའི་ངོས་ནས་ལོ་གསུམ་གྱི་ས་རྒྱུན་གྱི་དུས་ཡུན་འདིའི་རིང་མུ་མཐུད་རྒྱུན་སྐྱོང་བྱ་རྒྱུའི་ཆོད་སེམས་བརྟན་པོ་ཡོད་པ་མ་ཟད། མ་འོངས་པར་མུ་མཐུད་དུ་ལོ་རེར་ཐེངས་རེར་འཚོགས་ཐུབ་ཆེད་ཐེངས་འདིའི་ལྷག་དངུལ་རྣམས་ལོགས་སུ་གསོག་འཇོག་བྱས་ཐོག་ཞལ་འདེབས་བསྡུ་རུབ་ཀྱིས་རྒན་པའི་མ་དངུལ་ཐེབས་རྩ་ཞིག་འཛུགས་འཆར་ཡོད། ཅེས་བརྗོད་བྱུང་།
དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་འདིའི་ཐད་གསུངས་དོན། མིའི་མི་ཚེའི་བརྒྱུད་རིམ་ནང་ཆུང་དུས་ཕ་མས་བདག་སྐྱོང་བྱེད་ཀྱིན་ཡོད་པ་དང་། ཕ་མ་རིམ་བཞིན་རྒས་འགྲོ་གིན་ཡོད་པ་ཡིན་དུས། ཕ་མའི་བདེ་སྡུག་ལ་བལྟ་རྒྱུ་དེ་རང་བཞིན་གྱིས་ཕྲུ་གུ་ཚོའི་འགན་ཆགས་ཡོད། དེ་བཞིན། སྤྱི་ཚོགས་ཤིག་ཡིན་ནའང་དེའི་ནང་རྒན་པ་ཚོས་མགོ་ཁྲིད་ཅིང་གཞོན་པ་ཚོས་རྗེས་འབྲངས་དགོས་པ་རེད། ཐེངས་འདིར་མདོ་སྨད་ས་གནས་རྒྱུན་ལས་ཀྱི་ངོས་ནས་མདོ་སྨད་ཀྱི་རྒན་རབས་པ་རྣམས་མཉམ་དུ་བསྡུས་ཏེ། ཁོང་ཚོ་གཞོན་པའི་དུས་སུ་མགོ་ཁྲིད་དང་འགན་ཁུར་བ་དེ་དག་ལ་ཐུགས་རྗེ་ལེགས་འབུལ་དང། ཕན་ཚུན་ངོ་ཤེས་སུ་འཇུག་རྒྱུའི་གོ་སྐབས་ཤིག་བསྐྲུན་པ་རེད། ང་རང་བོད་མི་མང་སྤྱི་འཐུས་ཚོགས་གཙོའི་ངོས་ནས་བསམ་ཚུལ་གསར་བ་དང་། ལས་འགུལ་གསར་བ་འདི་ལ་བསྔགས་བརྗོད་ཡོད། ང་ཚོའི་འཐབ་རྩོད་དང་སྤྱི་ཚོགས་མུ་མཐུད་གནས་དགོས་པར་བརྟེན། བོད་པའི་སྲོལ་རྒྱུན་བཟང་པོ་འདི་མི་ཉམས་རྒྱུན་འཛིན་དང་དར་སྤེལ་དུ་གཏོང་རྒྱུ་གལ་ཆེན་རེད། དེ་བས། འདི་མདོ་སྨད་ཙམ་མ་ཡིན་པར་ཆོལ་ཁ་གཞན་པའི་ངོས་ནས་ཀྱང་། མ་འོངས་པར་ས་རྒྱུན་དང་སྐྱིད་སྡུག་ཁག་གང་ཡིན་རུང་རྒན་པར་ཆེ་མཐོང་སྤྲད་དེ་ཁོང་ཚོར་ཐུགས་རྗེ་ལེགས་གསོལ་ཞུ་བའི་ལས་འགུལ་མང་པོ་སྤེལ་ཐུབ་ཚེ་བོད་པའི་གོམས་གཤིས་བཟང་པོ་དེ་མི་ཉམས་རྒྱུན་འཛིན་ཡོང་བར་ཕན་ཐོགས་གི་རེད། ཅེས་གསུངས་བྱུང།
ཐེངས་འདིའི་རྒན་པར་དྲིན་གཟོའི་ལས་འགུལ་འདི་ནི། མདོ་སྨད་ས་རྒྱུན་གྱིས་ལས་འགུལ་ཐོག་མ་དེ་ཆགས་ཡོད་པ་དང་། ས་རྒྱུན་གྱི་ངོས་ནས་༧གོང་ས་མཆོག་ལ་ཐུགས་རྗེ་ལེགས་གསོལ་གྱི་ཞལ་ལག་འབུལ་བཞེས་དང། ངྷ་སར་གནས་བཞུགས་དགུང་ལོ་ ༥༠ ནས་ ༨༩ བར་གྱི་མདོ་སྨད་ཀྱི་རྒན་རབས་པ་ ༤༠ ལྷག་ལ་དྲིན་གཟོ་ཞུས་ཡོད་པ་རེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ས་རྒྱུན་གསར་བ་ཚོས་དངོས་གནས་མྱི་བྱ་ཞིག་སྒྲུབས་སོང་། ཡག་པོ་འདུག
ལྷག་པར་ཏུ་རྒན་པའི་ཐེབས་རྩ་འཛུག་རྒྱུའི་འཆར་གཞི་དེ།
ལས་འགུལ་ངོ་མ་ཡག་པོ་རེད། ཚོགས་སྐྱིད་ཚང་མས་འདི་ལྟར་བྱེད་ཐུབ་ན་ཞེ་དྲག་རེད། ཡིན་ནའང་ཞལ་ལག་བཞེས་ས་ལ་སྐུ་མགྲོན་གཙོ་བོ་ཞེས་པ་འདི་ཅུང་ཡ་མཚན་པ་ཞིག་དང་། ཞལ་འདེབས་སློང་ནས་སྤྲོ་སྐྱིད་གཏོང་བ་འདི་ཅུང་དགོད་བྲོ་ཞིག
ཡག་པོ་རེད། ཡིན་ནའང་ག་ས་གང་ལ་རྒྱུག་ནས་ཞལ་འདེབས་ཤིག་བསྡུས་ནོ་འདི་ལྟར་རྫོགས་བཅུག་ན་དོན་སྙིང་ཆེར་མི་འདུག སྔོན་མ་ཨ་ལགས་འཇིགས་མེད་མཆོག་ནས་ཕྱི་རྒྱལ་དུ་ཡོད་པའི་ཨ་མདོ་ཚོའི་ལག་ནས་ཞལ་འདེབས་རེ་བསྡུས་ཡོང་ན་ཨ་མདོ་ཚོས་དབྱར་སྐྱིད་དང་དེ་མིན་ན་ལོ་གསར་གཏོང་གི་རེད། རག་ཚད་ཟ་རྐྱང་འཐུང་རྐྱང་བྱས་ན་ཡག་པོ་ཞིག་ཨེ་ཡིན།
ཆུ་ཐིགས་སྔོན་མོ་ལགས།
གཞོན་རབས་པ་ཞིག་ཡིན་ན་གཞན་གྱི་རོགས་སྐྱོར་ལ་རེ་སྒུག་བྱེད་ཀྱི་ལང་ཤོར་ལ་སོང་ན་ཧ་ཅང་གི་མི་འཚམ་པ་ཞིག་རེད།་་་རང་གི་ནུས་བེད་སྤྱད་དེ་སོ་སོའི་རྐང་པའི་ཐོག་ལ་ལང་ཆེད་འབད་བརྩོན་ངེས་པར་དུ་བྱེད་དགོས་པ་རེད།་་གལ་སྲིད་ལམ་འགྲོ་མ་བརྒྱུག་ནས་ཕམ་ཁའི་གནས་སུ་ལྷུང་ན་ཡང་ཕམ་ཁ་ནི་རྒྱལ་ཁའི་རྩ་བ་ཡིན་པ་ལ་ངེས་ཤེས་ཇེ་བརྟན་དུ་འགྲོ་དགོས་པ་རེད།་་དེ་ལྟར་བྱས་ན་ད་གཟོད་ང་ཚོ་ལ་རེ་བ་ཡོད་པ་རེད།་་་ང་ལ་མཚོན་ན་ཕྱི་རྒྱལ་གྱི་སྦྱིན་བདག་དང་ནང་མིའི་དངུལ་དངོས་བེད་སྤྱད་དེ་སྐྱིད་ཟ་སྐྱིད་ཉལ་རྒྱག་མཁན་ཚོ་ནི་ནམ་ཡང་སྤྱི་ཚོགས་འདིའི་ཟ་འདྲེ་ཉག་གཅིག་ལ་ངོས་འཛིན་བྱེད་ཀྱིན་ཡོད།་་དེ་ལས་ལྡོག་དེ་བག་ལེབ་དང་ལང་ཧྥིས་ཚུན་ཆད་ཀྱི་ཚོང་ལས་རེ་ཉར་ནས་རང་ཁ་རང་གསོ་ལ་འབད་ཀྱིན་པ་དང་།་་་ཟ་ཁང་གི་གཡོག་ལས་རེ་མ་གཏོགས་མ་རེག་ནའང་ཨུ་ཚུགས་ཀྱིས་འཐམ་མཁན་ཚོ་ལ་ངས་རྗེས་སུ་ཡི་རངས་བྱེད་ཀྱིན་ཡོད།་་ལས་མེད་ཀྱི་དཀའ་ངལ་ཟེར་བ་དེ་ཡར་ཐོན་ཅན་གྱི་རྒྱལ་ཁབ་ཁག་གི་ནང་ལའང་མུ་འཐུད་དུ་གནས་བཞིན་པ་ཞིག་ཡིན་པས་འབད་བརྩོན་ཇི་ལྟར་བྱས་ཀྱང་བཙན་བྱོལ་གྱི་སྤྱི་ཚོགས་ཆུང་ཆུང་འདིའི་ནང་ནས་དཀའ་ངལ་དེ་གཙང་སེལ་བྱེད་མི་ཐུབ་པ་དེ་ཡང་མཁྱེན་དགོས་པ་ཞིག་རེད།་་༼གཞོན་རབས་པ་ཚོ་སྙིང་རྗེ་ས་གང་ཡིན་ནའང་མི་འདུག༽ཟེར་བ་ནི་ཧ་ཅང་ཐལ་དྲག་པ་རེད།་་བལ་ཡུལ་སྣེ་ལེན་ཁང་ནས་བཟུང་གོ་བསྒྲིག་ངེས་ཅན་ཞིག་གི་འོག་སློབ་གྲྭ་འགྲོ་མཁན་སློབ་གྲྭ་དང་གྲྭ་ས་འགྲོ་མཁན་གྲྭ་སར་སྐྱེལ་བཞིན་པ་འདི་སྙིང་རྗེ་བ་མིན་ན་གང་རེད།་་ང་རང་ཉིད་ནི་རྒྱ་གར་ལ་སླེབས་ནས་མི་ལོ་བཅོ་ལྔ་ལྷག་གི་རིང་འདིར་དམིགས་བསལ་གྱི་ཁེ་བཟང་འཕར་མ་གང་ཡང་རེག་མ་མྱོང་མོད་བཙན་བྱོལ་བོད་གཞུང་གི་བཀའ་དྲིན་ནི་དུས་ནམ་ཡང་འཇལ་ཐུབ་དཀའ་བ་ཞིག་ལ་ངོས་འཛིན་ཀྱིན་ཡོད།
ཐུགས་རྗེ་ཆེ། གཞོན་རབས་ཉམ་ཐག་ཚོ་སྙིང་རྗེ་ས་གང་ཡིན་ནའང་མི་འདུག་ དཀའ་ངལ་ཡོད་པ་མཐོང་གི་ལོས་ཡོད། མི་འགའ་ཤས་ཤིག་ལ་ལས་དཀའ་མེད་པར་དཀའ་ངལ་མི་ཉུང་བ་ཞིག་འཕྲད་ཀྱིན་འདུག་ དེ་ཚོ་ལ་ཅི་ཡང་མེད་པ་དེ་ཐབས་སྐྱོ་བོ་རེད།
རྗེས་སུ་ཡི་རང་ཡོད།
ཆེ་བཀུར་ཆུང་བྱམས་ལས་སུ་བརྩོན་པ་དེ་ནི་བོད་མི་རིགས་ཀྱི་སྲོལ་རྒྱུན་ཆེས་བཟང་བོ་ཞིག་ཡིན་ན་ཡང་། ད་ལྟའི་འཆར་བོད་ཕྱི་ནང་གཉིས་སུ་དེ་ནི་ཉམས་རྒུད་དུ་འགྲོ་བཞིན་ཡོད་པས་མཐོང་ཚུལ་མི་མང་བོ་ཞིག་ལ་ཡོང་གི་འདུག་ན་དེའི་ཐད་དུ་སྤུན་གྲོགསཁྱེད་ཅག་ལ་བསམ་ཚུལ་གང་ཡོད་དམ།