གསེར་རྟ་བླ་རུང་ལྔ་རིག་ནང་བསྟན་སློབ་གླིང་གི་ཆོས་རྗེ་མཁན་ཆེན་འཇིགས་མེད་ཕུན་ཚོགས་མཆོག་གི་སྐུའི་ཚ་བོ་གྲྭ་ངག་ཆུང་ལ་རྒྱ་ནག་གཞུང་གིས་བོད་ནང་གི་གནས་ཚུལ་ཁ་པར་བརྒྱུད་ཕྱི་ཕྱོགས་སུ་ཁྱབ་བསྒྲགས་བྱས་པའི་ཉེས་མིང་འོག་འཇུ་བཟུང་བྱས་ཏེ། ད་ལྟ་ལོ་གཅིག་ཟིན་གྱི་ཡོད་པ་རེད། གཉེན་ཉེ་སོགས་འབྲེལ་ཡོད་ཀྱིས་ཐུག་འཕྲད་བྱེད་རྒྱུར་འབད་བརྩོན་ཐེངས་མང་བྱས་ཡོད་ཀྱང་། རྒྱ་ནག་གཞུང་གིས་ཐུག་འཕྲད་ཀྱི་གོ་སྐབས་མ་སྤྲད་པར་བརྟེན། ཁོང་རྒྱ་ནག་ཁྲིན་ཏུའུ་གྲོང་ཁྱེར་གྱི་བཀག་ཉར་ཁང་དུ་ཡོད་པ་ཙམ་ལས་དངོས་ཡོད་གནས་ཚུལ་གང་འདྲ་ཡིན་མིན་ཤེས་རྟོགས་ཐུབ་ཡོད་མི་འདུག
སྔར་ལོའི་ཟླ་༧ ཚེས་༨ ཉིན་གྱི་དགོང་མོ་གསེར་རྟ་རྫོང་བླ་རུང་ལྔ་རིག་ནང་བསྟན་སློབ་གླིང་གི་དགེ་འདུན་པ་བཀྲ་ཕུན་དང༌འགུ་དྲག ངག་ཆུང་བཅས་རྒྱ་ནག་སི་ཁྲོན་ཞིང་ཆེན་གྱི་ལྟེ་གནས་ཁྲིན་ཏུའུ་ཞིང་ཆེན་སྤྱི་བདེ་ཉེན་རྟོག་ཁང་ནས་འཛིན་བཟུང་བྱས་ཡོད་པ་དང༌། རྗེས་སུ་དགེ་འདུན་པ་བཀྲ་ཕུན་དང༌འགུ་དྲག་གཉིས་གློད་གྲོལ་བཏང་ཡོད་ཀྱང་། ངག་ཆུང་གིས་ཁ་པར་བརྒྱུད་ཕྱི་ཕྱོགས་སུ་གནས་ཚུལ་ཁྱབ་བསྒྲགས་བྱས་པའི་ཉེས་འཛུགས་འོག་མུ་མཐུད་བཀག་ཉར་བྱས་ཡོད་ཀྱང་། བར་ལམ་རྒྱ་ནག་ཁྲིན་ཏུའུ་གྲོང་ཁྱེར་གྱི་བཀག་ཉར་ཁང་ཞིག་ཏུ་ཡོད་པ་ཙམ་ལས། དངོས་ཡོད་གནས་སྟངས་ད་སྔ་གང་ཡང་ཤེས་རྟོགས་བྱུང་ཡོད་མི་འདུག གྲྭ་ངག་ཆུང་གིས་ལོ་ཉི་ཤུ་ལྷག་གི་རིང་བླ་རུང་ཆོས་སྒར་ནས་སློབ་སྦྱོང་བྱས་པ་དང༌། དགོན་པའི་ལས་སྣེ་ཆེ་ཆུང་འདྲ་མིན་ཁུར་མྱོང་བ་མ་ཟད། འཇུ་བཟུང་བྱེད་སྐབས་ཀྱང་ཆོས་སྒར་དེའི་བཟང་སྤྱོད་ལས་ཁང་གི་འགན་ཁུར་བའི་གྲས་ཡིན་ཞིང་། བཀྲ་ཕུན་དང་ངག་ཆུང་གཉིས་ཕ་གཅིག་པའི་སྤུན་མཆེད་ཡིན་འདུག གོང་བཀོད་ཀྱི་གནས་ཚུལ་དེ་གྲྭ་ལྕགས་ཁུང་ཚེ་དབང་གིས་ཁ་སང་ཕྱི་ཚེས་ ༢༢ ཉིན་འདི་གའི་གསར་ཁང་ལ་མཁོ་སྤྲོད་བྱས།
