རྒྱ་གཞུང་གིས། མངོན་གསལ་མིན་པའི་ཐོག་གྲྭ་འཇམ་དབྱངས་བསྟན་འཛིན་ལ་ལོ་གསུམ་གྱི་ཁྲིམས་ཐག་བཅད་འདུག
ཕྱི་ཚེས་ ༢༠ ཉིན་བོད
་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསལ་བསྒྲགས་སྤེལ་བ་ལྟར་ན། ༢༠༠༧ ལོའི་ཟླ་ ༡༠ བའི་ཚེས་ ༣ ཉིན་རྒྱ་ནག་གཞུང་གིས་ལི་ཐང་གཡོན་རུ་དགེ་ལྡན་རབ་རྒྱས་གྲྭ་ཚང་དུ་སེར་སྐྱ་མི་དམངས་སྟོང་ཕྲག་བརྒལ་བར་ཚོགས་འདུ་སྐོང་སྟེ། ཏཱ་ལའི་རུ་ཚོགས་ལ་ངོ་རྒོལ་ས་རྟགས་རྒྱག་དགོས་པ་དང་། རྒྱལ་གཅེས་ཆོས་གཅེས་ཀྱི་སློབ་གསོ་དང་ལེན་བྱེད་དུ་བཅུག་སྐབས། གྲྭ་འཇམ་དབྱངས་བསྟན་འཛིན་ལགས་ཀྱིས། ༧རྒྱལ་བ་རིན་པོ་ཆེ་ང་ཚོའི་དཔྲལ་བའི་མིག་དང་ཁོག་གི་སྙིང་ཡིན་པས་ང་ཚོས་དུས་ནམ་ཡང་ཁོང་ལ་ངོ་རྒོལ་མི་བྱེད། ཅེས་དང་། རྒྱལ་གཅེས་དཔའ་བོ་རོང་རྒྱས་ཨ་གྲགས་གཙོས་བཙོན་པ་རྣམས་གློད་གྲོལ་གཏོང་དགོས་སྐོར་སྐད་གསེང་མཐོན་པོས་བརྗོད་ཡོད་སྟབས། རྒྱ་ནག་གཞུང་གིས་ཁོང་འཛིན་བཟུང་བཙོན་འཇུག་བྱས་ཡོད་པ་དང་། འདི་ལོའི་ཟླ་ ༧ པའི་ཚེས་ ༣ ཉིན་མདའ་རྩེ་མདོ་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་དུ་ཁོང་གི་ནང་མི་དང་གཉེན་ཉེ་དག་ལ་བརྡ་ལན་ཅི་ཡང་མེད་པའི་ཐོག་དུས་བཀག་བཙོན་འཇུག་ལོ་ ༣ གྱི་ཁྲིམས་ཐག་བཅད་འདུག་ལ། ད་ལྟའི་ཆར་ཁོང་གི་གནས་སྟངས་ཅི་ཡང་ཤེས་རྟོགས་ཐུབ་ཀྱིན་མེད་པ་རེད།
འཇམ་དབྱངས་བསྟན་འཛིན་ལགས་ནི། ༡༩༧༣ ལོར་ལི་ཐང་གཡོན་རུ་སྡེ་བའི་ཕ་འཕྲིན་ལས་ཚེ་རིང་དང་མ་བསོད་ནམས་སྒྲོལ་མ་གཉིས་ཀྱི་ཁྱིམ་ནས་སྐྱེས་ཤིང། རང་ལོ་ ༡༣ ཐོག་ལི་ཐང་དགོན་ཆེན་གྱི་ཆོས་སྒོར་ཞུགས་པ་དང་། ༡༩༩༥ ལོར་བཙན་བྱོལ་དུ་འབྱོར་ཏེ་དགའ་ལྡན་བྱང་རྩེ་གྲྭ་ཚང་དུ་སློབ་གཉེར་གནང་ཡོད་འདུག ༢༠༠༤ ལོར་ཕྱིར་བོད་ནང་ལོག་སྐབས་བལ་བོད་ས་མཚམས་ནས་རྒྱ་གཞུང་གིས་འཇུས་ཏེ་ཟླ་གསུམ་རིང་མནར་གཅོད་གང་མང་མྱངས་ཡོད་པ་རེད།
ལི་ཐང་རོང་རྒྱས་ཨ་གྲགས་ལགས་ཀྱི་དཔའ་ངར་ཆེན་པོས་སྐད་འབོད་གནང་རྗེས་ཨ་འབྲུག་བློ་སྤོ་གཙོས་པའི་རྒྱལ་གཅེས་པ་གཅིག་་མཇུག་གཉིས་མཐུད་དུ་ཁམས་ཀྱི་ལི་ཐང་ཕྱོགས་ནས་ཐོན་བྱུང་ཞིང། དཔའ་བོ་ཁྱེད་ནི་དེའི་ཁྲོད་ནས་གཅིག་རེད། ངས་ཁྱེད་རྣམ་པའི་བླ་ན་མེད་པའི་སྙིང་སྟོབས་ལ་གུས་བརྩི་ཞུ་གི་ཡོད་ལ། ཞོར་འཕྲོས་སུ་དཔའ་བོ་རུང་རྒྱས་ཨ་གྲགས་རྒྱས་གྱུར་ཅིག་ཅེས་ཞུ་འདོད་བྱུང་། གང་ལགས་ཞུ་ན། ཁོང་ནི་ང་ཚོ་ཆོལ་གསུམ་བོད་མིའི་ཁྲོད་ནས་མི་བསོད་ནམས་ཅན་ཞིག་ཡིན་པར་ཡིད་ཆེས་ཞུ་གི་ཡོད། ཁོང་ནས་སྐད་འབོད་བྱས་རྗེས་དེའི་ནུས་པ་དེ་དུས་ཚོད་དང་མཚམས་པར་ས་གནས་སུ་གང་སར་འཕེལ་སོང་བས་ངས་ཁྱེད་བཙོན་ནང་སྡུག་སྦྱོང་མནར་གཅོད་འོག་དཔའ་ངར་མི་ཞུམ་པར་ང་ཚོ་དང་གང་མགྱོགས་ཞལ་མཇལ་ཡོང་བའི་སྨོན་ལམ་འདེབས་རྒྱུ་ཡིན།