མཚོ་ལྷོ་ཁུལ་མང་ར་རྫོང་གིས་ད་ལོར་སློབ་གྲྭ་ཆུང་འབྲིང་གི་དགེ་རྒན་ས་མིག་ལས་ཞུགས་རྒྱུགས་གཞི་བོད་ཡིག་གིས་བྲིས་མི་ཆོག་པ་བཟོས་པ་དེས། རྒྱུགས་ཞུགས་བྱེད་མཁན་གྱི་བོད་ཡིག་ཆེད་སྦྱོང་སློབ་ཆེན་མཐར་ཕྱིན་སློབ་མ་རྣམས་ལས་ཞུགས་བྱེད་པར་བཀག་རྒྱ་བཟོས་ཡོད་འདུག
འབྲེལ་ཡོད་མི་སྣ་ཞིག་གིས་དེ་རིང་འདི་ལ་ལས་ཁུངས་སུ་བཤད་པ་ལྟར་ན། ཕྱི་ལོ་ ༢༠༠༩ ལོའི་ཟླ་ ༧ ཚེས་ ༡༤ ཉིན་མཚོ་སྔོན་ཆེན་མཚོ་ལྷོ་ཁུལ་མང་ར་རྫོང་མི་དོན་ལས་ཁུངས་དང་རྩ་འཛུགས་ལས་ཁུངས་གཉིས་ཀྱི་སྟངས་འཛིན་འོག་ས་གནས་མཐོ་འབྲིང་གཞུང་ཞབས་དགེ་རྒན་བསྡུ་ལེན་གྱི་ཡིག་རྒྱུགས་བླངས་ཡོད་པ་དང་། གཏན་འཁེལ་བྱས་པའི་རྒྱུགས་ཞུགས་པའི་ཁྱབ་ཁོངས་ནི་སྤྱི་ལོ་ ༡༩༩༩ ནས་ ༢༠༠༩ ལོའི་བར་གྱི་ས་གནས་རྫོངས་ཁོངས་ཀྱི་སློབ་ཆེན་མཐར་ཕྱིན་སློབ་མ་ཡིན་ལ། ཡིག་རྒྱུགས་འདིར་འཛུལ་ཞུགས་བྱེད་མཁན་མི་གྲངས་བརྒྱ་ལྷག་ཡོད་འདུག རྒྱུགས་ལེན་ལྟ་རྟོག་པ་ནི་མང་ར་རྫོང་མི་དོན་ལས་ཁུངས་ཀྱི་རྡོ་རྗེ་དབང་ཆེན་དང་། མང་ར་རྫོང་རྩ་འཛུགས་ལས་ཁུངས་ཀྱི་ལྷུན་གྲུབ། མཁར་བྱམས་རྒྱལ་བཅས་ཡིན་པ་དང་། ཐེངས་འདིའི་ལས་ཞུགས་ཡིག་རྒྱུགས་ཀྱི་ས་མིག་ནི་སྐད་གཉིས་སྨྲ་བའི་འབྲིང་རིམ་དགེ་རྒན་གྱི་ལས་གནས་ཡིན་ནའང་། རྒྱུགས་གཞིའི་ནང་དོན་ནི་མཐོ་འབྲིང་དགེ་རྒན་གྱི་ཤེས་ཚད་དང་འབྲེལ་མེད་ཀྱི་ཏང་གི་མཚོན་བྱེད་གསུམ་གྱི་དགོངས་དོན་དང་། ཝུན་ཁྲིན་ས་ཡོམ། རྒྱལ་གཅེས་རིང་ལུགས་ཀྱི་དགོངས་དོན་ཟེར་བ་སོགས་སྲིད་དོན་དྲིལ་བསྒྲགས་སྐོར་འདུག གཞན་ཡང་ཐེངས་འདིའི་ཡིག་རྒྱུགས་ལེན་ཕྱོགས་ནི་སྔོན་དང་མི་འདྲ་བར་རྒྱུགས་གཞིའི་སྒྲིག་གཞི་ཐད་གསལ་བསྒྲགས་ཅི་ཡང་མ་བྱས་པར་རྒྱུགས་རའི་ནང་ནས་རྒྱུགས་གཞི་ཆ་ཚང་བོད་ཡིག་གིས་བྲིས་མི་ཆོག་པའི་བཀའ་རྒྱ་བཏང་ཡོད་འདུག དེའི་ཐད་ལ་རྒྱུགས་ཞུགས་པ་རྣམས་ཀྱིས་མི་རིགས་རང་སྐྱོང་ས་ཁུལ་དུ་སྐད་གཉིས་དགེ་རྒན་བསྡུ་ལེན་གྱི་རྒྱུགས་གཞི་བོད་ཡིག་གིས་བྲིས་མི་ཆོག་པའི་རྒྱུ་མཚན་ཅི་ཡིན་སྐོར་དྲིས་པར། རྒྱུགས་ལེན་ལྟ་རྟོགས་པས་དེ་ནི་རྒྱུགས་ཤོག་ལ་ལྟ་མཁན་ཚོ་གྲོང་ཁྱེར་ཟི་ལིང་ནས་འོང་པའི་རྒྱ་མི་ཡིན་པས་ཁོ་ཚོས་བོད་ཡིག་མི་ཤེས་པས་རྐྱེན་ཡིན་ལུགས་བརྗོད་ཡོད་འདུག ཉིན་དེའི་ཕྱི་དྲོ་མི་ ༡༣ གྱིས་ལས་ཞུགས་ཡིག་རྒྱུགས་འཕྲོད་པའི་གསལ་གསལ་བསྒྲགས་བྱས་ཡོད་ལ། དེའི་ཁྲོད་བོད་མི་ ༢ མ་གཏོགས་གཞན་ཚང་མ་རྒྱ་མི་ཡིན་འདུག
ཕྱི་ཚེས་ ༡༦ ཉིན་ས་གནས་རྫོང་ཁོངས་ཀྱི་གཞི་རིམ་སློབ་ཆུང་དགེ་རྒན་ལས་ཞུགས་ཀྱི་ཡིག་རྒྱུགས་བླངས་ཡོད་པ་དང་། རྒྱུགས་ཞུགས་པ་ ༢༠༠ ལྷག་ཡོད་པའི་ཁྲོད་ནས་ལས་ཞུགས་རྒྱུགས་འཕྲོད་པ་ ༢༠ བསྡུས་ཡོད་འདུག ཐེངས་འདིའི་ཡིག་གཞི་ནི་བོད་རྒྱ་ཡིག་རིགས་གང་རུང་གིས་བྲིས་ཆོག་པ་བཟོས་ཡོད་ནའང་། རྒྱུགས་གཞིའི་ནང་དོན་ནི་སྔར་མཚུངས་ལྟར་དགེ་རྒན་གྱི་ལས་གནས་དངོས་ཀྱི་ཤེས་ཚད་དང་འབྲེལ་མེད་ཀྱི་ཏང་གི་དྲིལ་བསྒྲགས་སྐོར་ཡིན་འདུག
རྒྱུགས་ཞུགས་བྱེད་མཁན་གྱི་བོད་ཡིག་ཆེད་སྦྱོང་སློབ་ཆེན་པ་དག་གིས་དགེ་རྒན་གྱི་ལས་གནས་ས་མིག་དངོས་དང་འབྲེལ་མེད་ཀྱི་རྒྱུགས་གཞི་འདི་འདྲ་ཞིག་ལ་གདོང་གཏད་དགོས་བྱུང་བར་བློ་ཕམ་ཡི་ཆད་བྱུང་ཡོད་པར་མ་ཟད། མ་འོངས་པར་བོད་རིགས་གཞོན་སྐྱེས་ཚོས་རང་གི་སྐད་ཡིག་རིག་གནས་སློབ་སྦྱོང་དང་འཛིན་སྐྱོང་སྤེལ་གསུམ་གྱི་བྱ་བར་བཀག་རྒྱ་ཐེབས་སྲིད་པའི་བློ་དོགས་ཀྱང་སྐྱེས་བཞིན་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
གསར་འགྱུར་འདི་རིགས་ཐད་ང་ཚོས་རྒྱུན་དུ་དོ་་སྣང་བྱ་དགོས་ཀྱི་འདུག ད་ལྟའི་གནས་ཚུལ་འདི་ནི་རྫོང་ཞིག་གི་ཡིག་རྒྱུགས་ཁྲོད་དུ་བྱུང་བའི་གནས་ཚུལ་ཞིག་རེད། དངོས་སུ་གྲོང་ཁྱེར་ཁག་གི་ནང་དུ་སླེབས་ཚེ་གནས་སྟངས་གང་འདྲ་ཞིག་ཆགས་ཡོད་པ་རེད་དམ། ་ང་ཚོས་ཏན་ཏན་མཉམ་རུབ་ཀྱི་ནུས་པ་བཏོན་དགོས་ཀྱི་འདུག
གསར་འགྱུར་འདིས་གྲངས་ཉུང་མི་རིགས་ཀྱི་རྩ་ཁྲིམས་ནང་གི་ཐོབ་ཐང་དང་ལག་ལེན་སྟེང་གི་བདེན་པ་གཉིས་ཀྱི་བར་ཐག་ལ་ཚད་ཅིག་བརྒྱབ་པ་རེད།
མ་འོངས་པར་རོང་པའི་ཞིང་ས་དང་འབྲོག་པའི་རྩ་ས་སོགས་ལ་ཆབ་སྲིད་ཀྱི་སྐུད་པ་འཐེན་ཐབས་ཀྱི་གཡོ་ཇུས་ཤིག་ཀྱང་སླེབས་ངེས་རེད།