ཤ་རུས་ལ་འཐིམ་འོས་པའི་རང་གི་རིག་གཞུང་ལེན་དུ་ཡོང་།

རང་ཉིད་བོད་མི་ཡིན་པ་གང་ཞིག་ལ་རང་མི་རིགས་ཀྱི་རིག་གཞུང་དང་རྒྱལ་རབས་ལོ་རྒྱུས། ཡུལ་སྲོལ་གོམས་གཤིས། ཡ་རབས་སྤྱོད་བཟང་སོགས་རང་ཉིད་རྒྱལ་ཁབ་གང་ཞིག་ཏུ་བསྡད་ཡོད་ཀྱང་མི་རིགས་གང་ཡིན་པ་མི་བརྗེད་པར་བྱ་རྒྱུ་དང་། མི་རིགས་ཀྱི་ཞེན་ཁོག་དང་ལ་ཞེན། སྤོབས་པ་སོགས་ཡིད་ལ་འཇགས་ཆེད་དུ་འདིར་ཡོང་བ་རེད་ཟེར།

ཟླ་བདུན་པའི་ཚེས་ ༣ ཉིན་ནས་ཟླ་བརྒྱད་པའི་ཚེས་ ༧ བར་ངྷ་སྟེང་བོད་ཁྱིམ་སྤྱི་ཁྱབ་ཡིག་ཚང་ཤེས་ཡོན་སྡེ་ཚན་དང་ཨ་རིའི་དོན་གཅོད་ཁང་མཉམ་འབྲེལ་བྱས་ཏེ་ཨ་རི་གཙོས། ཡུ་རོབ་ཀྱི་སུད་སི་དང་ཧྥ་རན་སི་སོགས་རྒྱལ་ཁབ་ ༦ ནས་འཚར་ལོངས་བྱུང་བའི་བོད་པའི་གཞོན་སྐྱེས་སློབ་མ་ ༧༣ ལྷག་ལ་ནུབ་ཕྱོགས་ཀྱི་དབྱར་ཁའི་གུང་གསེང་དང་སྟབས་བསྟུན་གྱིས་ངྷ་སྟེང་བོད་ཕྲུག་ཁྱིམ་སྡེ་རུ་བོད་མི་རིགས་ཀྱི་སྲོལ་རྒྱུན་རིག་གནས་དང་ཡུལ་སྲོལ་གོམས་གཤིས། ཆོས་དང་རིག་གཞུང། བཙན་བྱོལ་བོད་མིའི་གནས་སྟངས། བོད་ནང་གི་དོན་རྐྱེན་སོགས་གཟིགས་འབུལ་གྱིས་སློབ་སྦྱོང་སྤྲོད་ཀྱིན་ཡོད་པ་དང་། དམིགས་བསལ་༧གོང་ས་མཆོག་ནས་གལ་གནད་དུ་བཟུང་སྟེ་གཟིམ་ཆུང་མཇལ་ཁ་དང་ལམ་སྟོན་བཀའ་སློབ་གནང་ཡོད་པ་མ་ཟད། ༧རྒྱལ་བ་ཀརྨ་པ་མཆོག་དང་བཀའ་བློན་ཁྲི་པ། སྐུའི་གཅུང་མོ་རྗེ་བཙུན་པདྨ་བཅས་ཀྱིས་ལམ་སྟོན་བཀའ་སློབ་གནང་ཡོད་པ་རེད། ཕྱི་ཚེས་ ༣ ཉིན་འདི་གའི་གསར་འགོད་པ་ངྷ་སྟེང་བོད་ཁྱིམ་དུ་སོང་སྟེ། བོད་ཁྱིམ་སྤྱི་ཁྱབ་ཡིག་ཚང་གི་འབྲེལ་ཡོད་ལས་བྱེད། དེ་བཞིན་ནུབ་ཕྱོགས་ནས་ཡོང་བའི་བོད་རིགས་སློབ་ཕྲུག་ཚོའི་མཉམ་དུ་གནས་ཚུལ་རྒྱུས་ལོན་བྱས་པ་ཡིན། 

བོད་ཁྱིམ་སྤྱི་ཁྱབ་ཡིག་ཚང་གི་དྲུང་ཆེ་ཐུབ་བསྟན་རྡོ་རྗེ་ལགས་ཀྱིས་ལས་རིམ་འདིའི་དམིགས་ཡུལ་སྐོར་ངོ་སྤྲོད་གནང་དོན། ང་ཚོ་བཙན་བྱོལ་བོད་མི་འདུས་སྡོད་ཀྱི་གནས་ཆེ་ཤོས་རྒྱ་བལ་འབྲུག་གསུམ་དུ་ཡོད་ཀྱང་། གཞན། ཨ་རི་གཙོས་འཛམ་གླིང་གི་རྒྱལ་ཁབ་མང་ཆེ་བས་ནང་བོད་པ་ཁྱབ་བསྡད་ཡོད་པ་རེད། ཡིན་ནའང། དེ་དག་ནང་རང་ཉིད་བོད་མི་ཡིན་པ་གང་ཞིག་ལ་རང་མི་རིགས་ཀྱི་རིག་གཞུང་དང་རྒྱལ་རབས་ལོ་རྒྱུས། ཡུལ་སྲོལ་གོམས་གཤིས། ཡ་རབས་སྤྱོད་བཟང་སོགས་རང་ཉིད་རྒྱལ་ཁབ་གང་ཞིག་ཏུ་བསྡད་ཡོད་ཀྱང་མི་རིགས་གང་ཡིན་པ་མི་བརྗེད་པར་བྱ་རྒྱུ་དང་། མི་རིགས་ཀྱི་ཞེན་ཁོག་དང་ལར་ཞེན། སྤོབས་པ་སོགས་ཡིད་ལ་འཇགས་ཆེད་ ༡༩༩༧ ལོར་ཕྱི་རྒྱལ་ཁག་ནས་ཡོང་པའི་སློབ་མ་ ༧ བསྡུ་རུབ་བྱས་ཏེ་ང་ཚོས་ལས་རིམ་འདི་ཐོག་མར་མགོ་འཛུགས་བྱས་པ་རེད། དེ་ཡང་གཙོ་བོ་སྐུའི་གཅུང་མོ་རྗེ་བཙུན་པདྨ་ལགས་ཀྱིས་ཕྱི་རྒྱལ་དུ་གནས་སྡོད་བཙན་བྱོལ་བོད་མིའི་གནས་སྟངས་ལ་གཟིགས་ཏེ་བོད་མི་རིགས་ཀྱི་རིག་གཞུང་དེ་ཉིིད་ཉམས་པ་སླར་གསོ་དང་མི་ཉམས་རྒྱུད་འཛིན་ཆེད་དམིགས་པ་རེད། ཨ་རིའི་དོན་གཅོད་ནས་ལས་རིམ་ཚགས་ཚུད་ཐད་མཐུན་རྐྱེན་དང་རྒྱབ་སྐྱོར་གང་ལེགས་གནང་བ་རེད། ང་ཚོས་སློབ་མ་བསྡུ་རུབ་བྱས་སྐབས་གཙོ་བོ་བོད་རང་གི་རིག་གནས་སློབ་གསོའི་ཁོར་ཡུག་མེད་པའི་ཡུལ་གྲུ་ལ་དམིགས་ཏེ་སློབ་མ་བསྡུ་རུབ་བྱེད་ཀྱིན་ཡོད་ལ། གཙོ་བོ་ཕྱི་རྒྱལ་དུ་ཡོད་པའི་ས་གནས་སྤྱི་མཐུན་ཚོགས་པ་ཁག་གིས་མཉམ་རུབ་ཀྱིས་སློབ་མའི་མིང་ཐོ་བཀོད་རྗེས་དྲ་ཐོག་ནས་འབྲེལ་བ་བྱས་ཏེ་ཟླ་ ༡ དང་བདུན་ཕྲག་གཅིག་གི་དུས་ཡུན་ནང་སློབ་མ་རེར་ཨ་སྒོར་ ༣༠༠ ཡི་མ་དངུལ་བསྡུ་རུབ་ཀྱིས་བོད་མི་རིགས་ཀྱི་རིག་གཞུང་ཐད་བག་ཆགས་འཇོག་གིན་ཡོད་པ་རེད། ད་ལྟའི་བར་ལས་རིམ་འདི་ལ་ཕྲུ་གུའི་ཕ་མ་མང་པོས་ཡིག་ངག་གཉིས་ཀྱི་ལམ་ནས་ང་ཚོར་བཀའ་དྲིན་ཞུ་གིན་འདུག་ལ། ང་ཚོའི་ངོས་ནས་ཀྱང་འདིའི་ཐད་ནུས་པ་གང་ཡོད་བཏོན་ཡོད་སྟབས། ལོ་རེའི་སློབ་མའི་གྲངས་འབོར་འཕར་བཞིན་འདུག་ལ། དེ་དག་ལ་བལྟས་ནའང་ཕན་ཐོགས་གང་འཚམ་ཐོན་གྱི་ཡོད་པ་ཤེས་ཡོང་གི་འདུག  སྤྱིར་ནུབ་ཕྱོགས་པའི་ཕ་མ་ཚོར་ལས་ཀའི་བྲེལ་བའི་ཐོག་ནས་རང་ཉིད་ཀྱི་བུ་ཕྲུག་ལ་ལྟ་སྐྱོང་གི་དུས་ཚོད་མེད་པ་དང་། བྱིས་པ་ཚོར་ཡང་ཕྱིའི་དངོས་པོའི་མཐུན་རྐྱེན་བཟང་བ་ལས་ནང་སེམས་ཀྱི་སྤྱོད་པ་སོགས་མི་རིགས་རང་གི་གཤིས་བཟང་གི་སློབ་གསོའི་སྐོར་ཡིད་ལ་འཇགས་ཐུབ་ཀྱིན་མེད་པ་རེད། དེ་ཕ་མའི་སྐྱོན་ཡིན་པ་ལས་བུ་ཕྲུག་གི་སྐྱོན་མ་རེད། གལ་སྲིད། ཕ་མ་དེ་དག་གིས་རང་གི་བུ་ཕྲུག་ལ་སེམས་ཁུར་དང་རྒྱབ་སྐྱོར་བྱ་རྒྱུའི་འདུན་པ་ཡོད་ན། མ་འོངས་པར་མུ་མཐུད་འདིའི་ཐད་དོ་སྣང་བྱས་ཏེ་ཕྲུག་གུ་མང་ཙམ་གཏོང་རྒྱུ་གལ་ཆེན་པོ་རེད་བསམ། མ་འོངས་པར་གཞི་རྩའི་འགྱུར་བ་ཆེན་པོ་མི་འབྱུང་ཡང་སྔོན་མ་ལྟར་འབྲེལ་ཡོད་ལས་བྱེད་དང་དགེ་རྒན། ཕ་མ། སློབ་མ་སོགས་ལ་བསམ་ཚུལ་བསྡུ་རུབ་བྱས་ཏེ་ལས་དོན་ཚགས་ཚུད་གཏོང་ཅི་ཐུབ་བྱ་ངེས་ཡིན། ཅེས་བརྗོད་བྱུང། 

དེ་བཞིན་གསར་འགོད་པས་སློབ་མ་ཁག་ཅིག་ལ་བོད་སྐད་དང་བོད་ཡིག་གི་དགོས་མཁོ་དང་མ་འོངས་པའི་དམིགས་ཡུལ་སོགས་ཀྱི་ཐད་བཅར་འདྲི་ཞུས་པར། ཨ་རི་ནས་ཕེབས་པའི་བུ་མོ་བསྟན་འཛིན་སྒྲོལ་དཀར་ལགས་ཀྱིས་བརྗོད་དོན། ང་རང་ཨ་རིའི་ཆི་ཁ་ཀོ་ནས་སྐྱེས་པ་ཡིན་ལ་འཛིན་གྲྭ་ ༡༢ བར་ཕྱིན་པ་ཡིན། ཨ་རིའི་ནང་གཟའ་སྤེན་པའི་བོད་ཡིག་གི་འཛིན་གྲྭར་སོང་བ་ཡིན། འཛིན་གྲྭ་དེར་གཙོ་བོ་ཁ་བརྡའི་ཕྱོགས་རེད། དེ་བཞིན་ང་ཚོའི་ཁྱིམ་ཚང་ནང་རྒྱུན་དུ་བོད་སྐད་བཤད་གིན་ཡོད། ད་རེབ་ང་རང་ཐེངས་དང་པོོར་རྒྱ་གར་ནང་ཡོང་བ་ཡིན་ལ། འདིར་སླེབས་ཏེ་བོད་མི་མང་པོར་ཐུག་འཕྲད་བྱུང་བས་ཉམས་མྱོང་མང་པོ་ཞིག་ཐོབ་སོང། ད་དུང་དགེ་རྒན་ཚང་མས་བོད་སྐད་བཤད་གིན་ཡོད་སྟབས་ཧ་ཅང་སྐྱིད་པོ་འདུག་ཅེས་བརྗོད་བྱུང་ལ། ཡང་ཁོང་ལ་བོད་ཡིག་སྦྱངས་རྗེས་ག་རེ་བྱ་རྩིས་ཡོད་མེད་དང་བོད་ཀྱི་ལོ་རྒྱུས་ཀྱི་སྐོར་ནས་ག་རེ་ཤེས་གིན་ཡོད་མེད་དྲིས་པར་ཁོ་མོས། ང་རང་ཨ་རི་ན་ཡོད་དུས་ཅུང་ཙམ་མ་གཏོགས་གོ་ཡི་མེད། འདིར་སླེབས་པ་ནས་དགེ་རྒན་ཚོས་ནམ་རྒྱུན་དེའི་སྐོར་ལབ་ཀྱིན་ཡོད་སྟབས། སྔོན་མ་ལས་མང་པོ་ཧ་གོ་སོང་། མ་འོངས་པར་ང་རང་སྨན་པ་བྱས་རྗེས་བོད་ནང་ལོག་སྟེ་སྨན་ཁང་ཕྱེ་རྒྱུ་ཡིན་ལ། བོད་ནང་སློབ་སྦྱོང་གི་གོ་སྐབས་ཐོབ་ཀྱིན་མེད་པའི་བུ་ཕྲུག་དེ་དག་ལ་སློབ་སྦྱོང་གི་གོ་སྐབས་བསྐྲུན་རྒྱུ་ཡིན་ཟེར།

ལ་དྭགས་ནས་སྐྱེས་ཤིང་ད་ལྟ་ཨ་རིའི་འཛིན་གྲྭ་ ༨ པར་སློབ་གཉེར་བྱེད་བཞིན་པའི་པའི་རང་ལོ་ ༡༢ ཡིན་པའི་བུ་མོ་བསྟན་འཛིན་བྱམས་པ་ལ་སྐད་ཆ་དྲིས་པར་ཁོ་མོས། ངས་བོད་སྐད་དང་བོད་ཡིག་གཙོ་བོ་གཟའ་སྤེན་པའི་འཛིན་གྲྭའི་ནང་སྦྱངས་པ་ཡིན་ལ། བོད་སྐོར་གྱི་ལོ་རྒྱུས་ཀྱང་དབྱིན་ཇིའི་སྒང་ནས་ཤེས་པ་ཡིན། དེ་བཞིན་བོད་ནང་གི་མི་བསད་པའི་པར་མང་པོ་ཡང་མཐོང་མྱོང་ཡོད། དེ་དག་མཐོང་དུས་སེམས་པ་སྐྱིད་པོ་ཁྱོན་ནས་མི་འདུག ངས་བོད་ཡིག་སྦྱངས་དོན་ནི་ང་རང་བོད་རིགས་ཡིན་པས་རེད། ང་ཚོས་རང་གི་རིག་གཞུང་མ་སྦྱངས་པར་མི་རིགས་གཞན་གྱིས་སྦྱང་བ་ཡིན་ན་ཡག་པོ་ཡོད་པ་མ་རེད། ཡིན་ནའང། བོད་ཡིག་སྦྱང་པར་དཀའ་ལས་ཁག་པོ་འདུག འདི་དང་ཨ་རི་གཉིས་འདྲ་བོ་མི་འདུག ཨ་རིའི་སློབ་གྲྭའི་ནང་ཞལ་འདོན་སོགས་ཡོད་པ་མ་རེད། ཅེས་དང། མ་འོངས་པའི་ཐད་ལ་༧རྒྱལ་བ་རིན་པོ་ཆེས་གསུང་གིན་ཡོད་པ་བཞིན་ང་རང་གིས་སློབ་སྦྱོང་ཡག་པོ་བྱས་ཏེ་བོད་ནང་གི་བོད་མི་ཚོར་རོགས་པ་བྱ་རྒྱུ་ཡིན་ཟེར།

རང་ལོ་ ༡༧ ཡིན་ཞིང་ད་ལྟ་ཨ་རིའི་སློབ་ཆེན་ལ་འགྲོ་ལ་ཉེ་བའི་བསྟན་འཛིན་ཆོས་དབྱིངས་ཀྱིས་བརྗོད་དོན། བོད་པའི་སྐོར་ལ་ང་རང་གིས་ཞེ་དྲག་ཧ་གོ་གི་མེད། ཡིན་ནའང་། ང་ཚོ་བོད་ཀྱི་རྒྱལ་པོ་ཐོག་མ་སུ་ཡིན་མིན་སོགས་ང་ཚོ་ཨ་རིའི་གཟའ་སྤེན་པའི་འཛིན་གྲྭའི་ནང་ཤེས་པ་ཡིན། ཐེངས་འདིར་ང་རང་ལ་མཚོན་ན་ཞེ་དྲག་ཧ་གོ་གི་མི་འདུག  ཡིན་ནའང་། དགེ་རྒན་དེ་ཚོས་ཧ་ཅང་ཡག་པོ་བསླབ་ཀྱིན་འདུག་ཟེར། ཡང་ཁོང་ལ་བོད་ཡིག་སྦྱངས་དོན་ག་རེ་ཡིན་མིན་དྲིས་པར་ཁོས། སོ་སོ་རང་ཉིད་ཀྱི་རིག་གཞུང་ཤེས་ན་ཡག་པོ་འདུག དེ་ལྟར་སྦྱངས་ན་རང་ཉིད་བོད་པ་ཡིན་པའི་མིང་ཐོན་གྱི་རེད། ཨ་རིའི་ནང་དུའང་མི་རིགས་མང་པོ་ཡོད་པ་རེད། ཁོང་ཚོས་རང་ཉིད་ཀྱི་རིག་གནས་ཧ་གོ་གི་ཡོད་པ་རེད། ངས་ཀྱང་རང་གིས་བོད་ཡིག་ཡག་པོ་སྦྱངས་ཏེ་ཤེས་པ་ཡིན་ན་རང་ཉིད་བོད་པ་ཡིན་ཅེས་ལབ་ཆོག་གི་རེད། ད་ལྟ་ང་རང་ཚོའི་མིང་དེ་༧རྒྱལ་བ་རིན་པོ་ཆེའི་ཐོག་ནས་འོངས་པ་རེད། དེ་བས། མ་འོངས་པར་ང་རང་གིས་སྨན་པའི་ཆེད་ལས་ཡག་པོ་སྦྱངས་ཏེ་བོད་པའི་མིང་འཁུར་ཐུབ་པ་ཞིག་བྱ་རྩིས་ཡིན་ཟེར།

དེ་བཞིན་ཁེ་ན་ཌ་ཊོ་རོན་ཊོ་ནས་འོངས་བའི་རང་ལོ་ ༡༢ ཡིན་པའི་བསྟན་འཛིན་འཇིགས་མེད་ཀྱིས་བརྗོད་དོན། ང་ད་ལྟ་ཁེ་ན་ཌའི་ནང་འཛིན་ ༧ པར་འགྲོ་རྒྱུ་ཡིན། ངས་བོད་སྐད་དང་བོད་ཡིག་གཟའ་སྤེན་པ་དང་གཟའ་ཉི་མའི་འཛིན་གྲྭ་ནས་ཐོག་མར་སྦྱངས་པ་ཡིན། ཁྱིམ་ཚང་ནང་བོད་སྐད་ཞེ་དྲག་ལབ་གིན་མེད། ང་རང་ལ་བོད་ཡིག་གི་ཁག་ཤོས་ནི་འབྲི་རྒྱུ་དེ་རེད། གང་ལྟར། བོད་ཡིག་སྦྱོང་ན་སྐྱིད་པོ་འདུག འདི་ནས་བོད་ཡིག་སྦྱངས་རྗེས་ང་གང་འདྲ་བྱས་ནས་ཡར་རྒྱས་གཏོང་རྒྱུ་ཧ་གོ་གི་མེད་ལ། མ་འོངས་པར་གང་འདྲ་བྱ་མིན་ངས་ཤེས་ཀྱིན་མི་འདུག་ཟེར།

གསར་འགོད་པས་ཁོང་ཚོ་གཙོས་བྱིས་པ་ ༨ ལྷག་ལ་ཐད་ཀར་འབྲེལ་འདྲིས་བྱས་པ་ཡིན་ལ། ཁོང་ཚོའི་མང་ཆེ་བས་བོད་ཡིག་སྦྱོང་དགོས་དོན་དང་དེའི་དགོས་པ་སོགས་གསལ་བོ་ཞིག་ཤེས་གིན་མི་འདུག་ལ། སོ་སོའི་ཁྱིན་ཚང་ནང་དུའང་བོད་སྐད་དང་བོད་ཡིག་གི་ཁོར་ཡུག་དཀོན་པོར་གྱུར་འདུག འདིའི་ཐད་ཁོང་ཚོ་དང་ནམ་རྒྱུན་འབྲེལ་འདྲིས་ཟབ་པའི་རྒན་ནོར་བུ་ལགས་ཀྱིས་གསུངས་དོན། འདིར་སླེབས་དུས་མང་ཆེ་བས་བོད་སྐད་ཕར་ཞོག་ཐ་ན་མི་ལ་བརྩི་བཀུར་བྱེད་སྟངས་སོགས་རྒྱུན་ལྡན་གྱི་གོམས་གཤིས་མང་པོ་ཞིག་ཤེས་གིན་མི་འདུག ཡིན་ནའང། ང་ཚོས་ཉིན་གཅིག་གི་སློབ་ཐུན་ནང་བོད་ཡིག་དང་རྒྱལ་རབས། བོད་ཀྱི་ཟ་མ་བཟོ་སྟངས། གཞས་དང་ཞབས་བྲོ། བོད་ནང་གི་དོན་རྐྱེན་དང་འབྲེལ་བའི་ལྟད་མོ་སྟོན་པ་དང། གཞན། བོད་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གི་མི་སྣ། དགེ་འདུན་པ། སྨན་པ་སོགས་གདན་འདྲེན་ཞུས་ཏེ་ངོ་སྤྲོད་བྱེད་བཞིན་ཡོད། ཉིན་གཅིག་གི་དུས་ཡུན་ནང་ངལ་གསོའི་དུས་ཚོད་གཅིག་མ་གཏོགས་གཟའ་ཉི་མ་སོགས་ཀྱང་མེད་པར་མི་རིགས་རང་གི་རིག་གཞུང་དང་འབྲེལ་བའི་བྱ་འགུལ་སྣ་ཚོགས་སྤེལ་ཏེ་ཁོང་ཚོའི་རྒྱུད་ལ་འཇགས་ཐབས་བྱེད་བཞིན་ཡོད། ཡིན་ནའང། དཀའ་ངལ་ཆེ་ཤོས་དེ་ཁོང་ཚོ་དམངས་གཙོའི་ལུང་པའི་ནང་འཚར་ལོངས་བྱུང་བ་རྐྱང་ཡིན་སྟབས། སློབ་གསོ་སྤྲོད་སྟངས་སོགས་ཀྱི་ཐད་ང་ཆོའི་སློབ་མ་དང་མི་འདྲ་བར་དཀའ་ངལ་ཏོག་ཙམ་ཡོད་ཀྱང་ད་ལྟ་མང་པོ་ཞིག་གོམས་ཡོད་སྟབས། སྔོན་མ་ལས་བཟང་དུ་ཕྱིན་འདུག་ལ་ཡར་རྒྱས་འགྲོ་བཞིན་པ་གསལ་བོར་མཐོང་གིན་འདུག   དེ་བས་མ་འོངས་པར་མུ་མཐུད་འདིའི་ཐད་ནུབ་ཕྱོགས་སུ་ཡོད་པའི་ཕ་མ་རྣམས་ཀྱིས་དོ་སྣང་དང་ཐུགས་ཁུར་གནང་རྒྱུ་གལ་ཆེན་དུ་མཐོང་གི་འདུག་ཟེར།