དོན་ཚན་བཞི་ཅན་གྱི་བོད་རྒྱའི་བསྒྲགས་གཏམ།

ཉེ་སྔོན་རྗི་ནི་ཝར་བསྐོང་བའི་རྒྱ་བོད་ཚོགས་ཆེན་དེའི་སྟེང་གཞིས་བྱེས་བོད་མི་ཡོངས་ཀྱི་དཀའ་སྡུག་ལ་སེམས་ཁུར་དང་འབྲེལ་རང་དབང་སླར་གསོ་ཐུབ་པར་རྒྱབ་སྐྱོར་མཚོན་བྱེད་དུ་སྐུ་ཚབ་ཚོས་དོན་ཚན་བཞིར་སྤྱི་མོས་གྲོས་མཐུན་གྱི་དགོངས་ཚུལ་བཏོན་ཡོད་པ་རེད།

༡། གཞི་རྩའི་རིན་ཐང་དང་རྩ་དོན།
ཡོངས་ཁྱབ་ཀྱི་རིན་ཐང་ནི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་སྤེལ་བ་ནས་ཚུགས་ཡོད་ལ། དེའི་ནང་དུ་རང་དབང་དང། མང་གཙོ། ཁྲིམས་ཀྱི་དབང་སྒྱུར། འགྲོ་བ་མིའི་ཐོབ་ཐང་། འདྲ་མཉམ་དང་ལེགས་བྱང་རིས་མེད་ཀྱི་མཉམ་གནས་བཅས་འགྲོ་བ་མིའི་གཞི་རྩའི་རིན་ཐང་ལྟ་ཚུལ་དང། རྩ་དོན་བཅས་ཡོད་ལ། ད་རེབ་ཀྱི་ཚོགས་ཞུགས་པ་རྣམས་ཀྱིས་འདི་དག་རྩ་འཛིན་བྱས་ཡོད།

༢། བོད་དོན་གྱི་རང་བཞིནདང་། དེའི་རྩ་བ།
༡༽    བོད་ཀྱི་རྩ་བའི་གནད་དོན་ནི་རྒྱ་རིགས་དང་བོད་རིགས་བར་གྱི་རྩོད་རྙོག་ཅིག་མིན་པར།
རྒྱ་ནག་གཞུང་ནས་བོད་ཀྱི་རིག་གཞུང་རྩ་མེད་དང། བཙན་པོ་དབང་ཡོད་ཀྱི་སྲིད་གཞུང་བཙུགས་པ་ལས་བྱུང་བ་ཡིན།
༢ ༽ རྒྱ་ནག་གཞུང་གིས་བོད་ནི་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པར་བཤད་ཀྱིན་པ་དེར་དོན་དངོས་ཀྱི་ནོར་འཁྲུལ་ཤོར་ཡོད།
༣ ༽ བོད་ཀྱི་ཆོས་དང། རིག་གཞུང། སྐད་ཡིག་བཅས་ནི་ཆག་འཇིག་གི་ཁ་མཚམས་ལ་སླེབས་པ།
༤ ༽ བོད་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་གིས་མཚོན་པའི་རང་ཐག་རང་གཅོད་དང། སྲིད་དོན་ནང་མཉམ་ཞུགས། ཆོས་དད་རང་མོས་སོགས་རྒྱ་གཞུང་གིས་འཕྲོག་ཡོད་པ།
༥ ༽ རྒྱ་ནག་གི་གཞུང་འབྲེལ་གསར་འགོད་བརྒྱུད་ལམ་གྱིས་བོད་ཀྱི་གནད་དོན་ཀྱི་ངོ་བོ་གང་ཡིན་མི་བརྗོད་པར། རྒྱ་བོད་གཉིས་དབར་ཁ་གཏད་གཅོག་རེས་བྱེད་ཀྱི་ཡོད་ཚུལ་གོ་ལྡོག་ནས་བརྗོད་ཡོད།

༣། བོད་ཀྱི་དཀའ་རྙོག་སེལ་བའི་ཐབས་བྱུས།
༡༽ བོད་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་གིས་མཚོན་པའི་ཆབ་སྲིད་ཀྱི་ལས་དོན་ནང་མཉམ་ཞུགས། ཆོས་དད་རང་དབང་བཅས་ལ་རྒྱ་གཞུང་ནས་དང་ལེན་གུས་བརྩི་ཞུ་དགོས་པ།
༢༽ བོད་ཀྱི་གནད་དོན་ཐག་གཅོད་དེ་རྒྱ་ནག་གི་མང་གཙོ་དང་འབྲེལ་བ་ཡོད་པ།
༣༽རྒྱ་རིགས་མི་དམངས་ཀྱིས་རྒྱ་ནག་ཆེན་པོའི་མི་རིགས་རིང་ལུགས་ཀྱི་ཉེས་དམིགས་ཤེས་པའི་ཐོག་ནས་བོད་མི་རིགས་ཀྱི་ལེགས་བྱང་། འཚོ་བ་སྐྱེལ་ཕྱོགས་ལ་ངེས་པར་དུ་གུས་བཀུར་ཞུ་དགོས་པ།
༤༽ རྒྱ་ནག་གཞུང་གིས་ཁྲིམས་ཀྱི་དབང་སྒྱུར་ལ་གུས་བརྩི་དང་ལེན་ཞུ་དགོས་པ།
༥༽ ༸གོང་ས་མཆོག་ཕྱིར་རང་གི་ཕ་ཡུལ་དུ་ཕེབས་ཆོག་པའི་གཡོལ་མེད་ཐོབ་ཐང་དེར་རྒྱ་ནག་གཞུང་གིས་བརྩི་བཀུར་བྱེད་དགོས།

༤། བཙན་བྱོལ་བོད་གཞུང་ལ་ཕུལ་བའི་དགོངས་ཚུལ།
༡ ༽རྒྱ་བོད་མཐུན་སྒྲིལ་གྱི་ཚོགས་པ་རྒྱལ་སྤྱིའི་ས་ཕྱོགས་གང་སར་བཙུགས་ཏེ། རྒྱ་བོད་གཉིས་མོས་ཀྱི་བསམ་འཆར་འདོན་སྤེལ་བྱ་རྒྱུ་ལ་སོགས་པའི་ལེགས་བྱང་བརྗེ་རེས་དང། སེམས་ཚོར་གྱི་འབྲེལ་བ་གོང་མཐོར་གཏོང་དགོས་པ།
༢ ༽ བོད་ཀྱི་ལོ་རྒྱུས་རང་བཞིན་གྱི་དངོས་དོན་བསྐྱར་བཅོས་ཡོང་སླད་དུ་རྒྱ་བོད་མཁས་དབང་རྣམ་པར་ཞིབ་འཇུག་སྡེ་ཚན་ཞིག་གསར་འཛུགས་ཀྱིས་བོད་ཀྱི་ཐུན་མོང་མ་ཡིན་པའི་ལོ་རྒྱུས་དང། རིག་གཞུང་གི་གོ་རྟོགས་གོང་འཕེལ་ཡོང་བ་བྱ་རྒྱུ།
༣༽རྒྱ་ནག་གཞུང་གིས་༸གོང་ས་མཆོག་དང་བོད་ཀྱི་དངོས་དོན་གྱི་གནས་ཚུལ་མཁོ་སྒྲུབ་བྱ་རྒྱུར་དྲ་རྒྱ་དོ་དམ་པས་འགོག་སྡོམ་བྱེད་ཀྱིན་ཡོད་པ་དེར་བོད་ཕྱོགས་ནས་ཚད་ངེས་ཅན་གྱིས་གདོང་ལེན་གྱི་ཐབས་བྱུས་ཤིག་ལག་བསྟར་བྱེད་དགོས་པ་དང། དེས་རྒྱ་མི་རིགས་ཚོ་དང་རྒྱལ་སྤྱིར་གནད་དོན་འཚོལ་ཞིབ་ལ་མཐུན་རྐྱེན་སྐྲུན་ཐུབ།   
༤༽ ༸གོང་ས་མཆོག་ལ་འོས་འཚམ་གྱི་ཆ་རྐྱེན་བསྐྲུན་པའི་ཐོག་ནས་རྒྱ་མི་རིགས་ཀྱི་ནང་དུ་ཁོང་གི་རིན་ཐང་གི་ལྟ་བ་གོང་མཐོར་གཏོང་ཐུབ་པ་དང། དེས་རྒྱ་རིགས་མང་ཚོགས་ཀྱི་ནང་དུ་མིའི་རིགས་ཀྱི་རིན་ཐང་ཤེས་རྟོགས་འབྱུང་བར་བསྐྱར་གསོ་ཐུབ་པར་ཞབས་འདེགས་ཐུབ་པ། བཅས་རེད།

མཇུག་སྣོན་གྱི་ཚུལ་དུ། ཚོགས་ཞུགས་པ་རྣམས་ཀྱིས་བརྗོད་དོན། ངེད་ཚོ་རྒྱ་བོད་སྐུ་ཚབ་ཚོགས་ཞུགས་པ་ཚོས་བོད་རིགས་ཚོའི་རང་དབང་སླར་གསོ་ཐུབ་པ་དང། རིག་གཞུང་མི་ཉམས་རྒྱུན་འཛིན་ཡོང་སླད་དུ་རེ་སྨོན་བྱེད་ཀྱིན་ཡོད་ལ། ངེད་ཚོའི་ནང་ཁུལ་ལའང་ཡིད་ཆེས་གཞི་ལ་བཞག་པའི་ཐོག་ནས་བསམ་ཚུལ་བརྗེ་ལེན་བྱས་པ། རང་དབང་ནི་ཆེས་མཐོའི་གནས་ཚད་དང་ལྡན་པ། བོད་ཀྱི་ལེགས་བྱང་དེ་ནི་འགྲོ་བ་མིའི་རིག་གཞུང་གི་ནང་དུ་རྩ་ཆེའི་རྒྱུ་ནོར་ཡིན་པ། ཇི་སྲིད་བོད་ལ་རང་དབང་མེད་པ་དེ་སྲིད་དུ་རྒྱ་ནག་ལ་རང་དབང་མེད་པ། བོད་ཀྱི་ལེགས་བྱང་དང་རིག་གཞུང་འཇིག་བཞིན་པ་དེའང་བོད་མི་ཚོའི་རྐྱེན་ངན་ཙམ་མིན་པར་རྒྱ་མི་རིགས་ཀྱི་རྐང་འདྲེན་དང། བཅོས་རྒྱུ་མེད་པའི་མི་རིགས་ཀྱི་གྱོང་གུད་ཆེ་ཤོས་ཞིག་རེད་ཅེས་བཀོད་ཡོད་པ་རེད།