ད་ལོའི་གསུམ་བཅུའི་དུས་དྲན་རྗེས་རྒྱ་གཞུང་གིས་མགོ་ལོག་རྭ་རྒྱ་དགོན་པར་མི་སྤྱོད་ལས་འདས་པའི་སྲིད་བྱུས་ལག་བསྟར་བྱས་པར་བརྟེན། རྭ་རྒྱ་དགོན་དུས་འཁོར་གྲྭ་ཚང་གི་དགེ་འདུན་པ་བཀྲ་ཤིས་བཟང་པོ་རྨ་ཆུར་མཆོངས་ཏེ་རང་ཤི་བརྒྱབས་ཡོད། སྐབས་དེར་ཡུལ་ལུང་དེའི་སེར་སྐྱ་མི་དམངས་སྟོང་ཕྲག་མང་པོས་ཞི་བའི་རྔམ་སྟོན་ཁྲོམ་སྐོར་བྱས་པའི་ཁྲོད་ཀྱི་མི་བརྒྱད་ལ་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
ཟླ་འདིའི་ཕྱི་ཚེས་ ༡༣ ཉིན་མགོ་ལོག་ཁུལ་རྨ་ཆེན་རྫོང་མི་དམངས་ཁྲིམས་ཁང་གིས་ད་ལོའི་མགོ་ལོག་རྭ་རྒྱ་དགོན་པའི་དོན་རྐྱེན་ཁྲོད་ལས་འགུལ་སྣེ་ཁྲིད་བྱས་པའི་ཉེས་མིང་འོག རྭ་རྒྱ་དགོན་གྲོང་གཉིས་ཀྱི་རྒྱལ་གཅེས་དཔའ་བོ་ ༨ ལ་ཁྲིམས་ཐག་བཅད་ཡོད་འདུག ཐེངས་འདིར་ཁྲམས་ཁྲིམས་ཐག་བཅད་པ་དག་ནི། རྭ་རྒྱ་དགོན་པའི་ཚོགས་ཆེན་དགེ་སྐོས་དཔལ་ལྡན་རྒྱ་མཚོར་ལོ་ ༧ གྱི་ཁྲིམས་ཆད་ཅིང་། ཆབ་སྲིད་ཁེ་དབང་ལོ་གཉིས་ལ་འཕྲོག་ཡོད་འདུག དགེ་སྐོས་ཟུར་བ་ཚུལ་ཁྲིམས་ལགས་ལ་ལོ་ ༤ ། དགོན་པའི་ཕྱག་མཛོད་ལས་ཐོགས་བཟོད་པ་བཟང་པོ་ལགས་ལ་ལོ་ ༣ ། ཁོང་དེ་སྔོན་གངས་ལྗོངས་སྤྲི་ཆུར་བཟོ་གྲྭའི་སྤྱི་གཉེར་ཡིན་འདུག རྭ་རྒྱ་དགོན་འགན་འཛིན་ལྷན་ཚོགས་ཀྱི་དྲུང་ཡིག་གྲྭ་འཇམ་དབྱངས་མཁས་གྲུབ་ལགས་ལ་ལོ་ ༢ ། མགར་རྩེ་གོང་མའི་དགེ་འདུན་ལགས་ལ་ལོ་ ༡ ། མགར་རྩེ་ཞོལ་མ་ཁ་གྱ་སྡེ་བའི་གྲྭ་ཤེས་རབ་བཟང་པོ་ལགས་ལ་ལོ་ ༢ ། རྒྱ་བཟའ་སྡེ་བའི་མི་སྐྱ་ཧུ་ལོ་ལ་ལོ་ ༢ དང་། དབྱངས་སྐྱབས་ལ་ཟླ་ ༦ བཅས་རིམ་པ་མི་འདྲ་བའི་ཁྲིམས་ཐག་བཅད་ཡོད་འདུག
གོང་དུ་ཁྲིམས་ཐག་བཅད་ཟིན་པ་དེ་དག་ལ་དོ་བདག་སོ་སོས་བཙལ་བའི་ཁྲིམས་རྩོད་པ་རེ་ཡོད་པ་ད
ང་། དེ་དག་ཁྲོད་ཀྱི་ཁྲིམས་རྩོད་པ་གནས་རིམ་མཐོ་ཤོས་དེ་མཚོ་སྔོན་ཞིང་ཆེན་ཁྲིམས་བཤེར་ཨུ་ཡོན་ལྷན་ཁང་གི་ཚོགས་གཙོ་གཞོན་པ་ཡིན་ཞིང་། གཞན་ཞིང་ཆེན་རིམ་པའི་ཁྲིམས་རྩོད་པ་ ༣ དང་། ཁུལ་རིམ་པའི་ཁྲིམས་རྩོད་པ་ ༤ བཅས་ཡོད་འདུག ས་གནས་མང་ཚོགས་ཀྱིས་བརྗོད་པ་ལྟར་ན། ཁྲིམས་རྩོད་པ་དག་གིས་ལས་དོན་འདིའི་མགོ་མཇུག་བར་གསུམ་དུ་ཧུར་ཐག་དང་དྲང་བདེན་གྱིས་བྱ་བ་བསྒྲུབས་སོང་ཟེར། ཁྲིམས་བཤེར་ཉིན་གནད་དོན་འདིའི་བརྒྱུད་རིམ་ཁྲོད། གསང་བའི་གནས་ཚུལ་སྲིད་གཞུང་ལ་སྐྱེལ་མཁན་དག་གི་གནས་ཚུལ་གསལ་བོར་བཤད་ཡོད་འདུག་ཅིང་། དེ་དག་མང་ཆེ་ཤེས་བོད་རིགས་ལས་བྱེད་ཡིན་ཞིང་། ས་གནས་མང་ཚོགས་དང་དགོན་པའི་གྲྭ་བ་བཅས་ཀྱང་ཡོད་འདུག གཞན། སྔོན་མ་འཛིན་བཟུང་བྱས་པའི་ཁྲོད་ཀྱི་བློ་བཟང་དར་རྒྱས་དང་མན་ངག་རྡོ་རྗེ་གཉིས་ད་དུང་མུ་མཐུད་གར་ཡོད་ཀྱི་གནས་ཚུལ་ཤེས་རྟོགས་བྱུང་ཡོད་མི་འདུག
གོང་གི་གནད་དོན་དེའི་ཐད་གནས་ཚུལ་མཁོ་སྤྲོད་པ་རྭ་རྒྱ་བློ་དབང་ལགས་སུ་འདི་གའི་གསར་འགོད་པས། ཐེངས་འདིར་མགོ་ལོག་རྭ་རྒྱ་དགོན་པའི་མི་བརྒྱད་ལ་ཁྲིམས་ཐག་བཅད་པའི་སྔ་ཕྱིའི་གནས་ཚུལ་བཅར་འདྲི་ཞུས་པར་ཁོང་གིས་བརྗོད་དོན། ད་ལོའི་གསུམ་བཅུའི་དུས་དྲན་སྐབས། རྒྱ་གཞུང་གིས་ང་ཚོའི་དགོན་པའི་དགེ་འདུན་པ་ ༦ འཛིན་བཟུང་བྱས་པ་རེད། དེའི་ཁྲོད་ཀྱི་དགེ་འདུན་པ་བཀྲ་ཤིས་བཟང་པོ་ཞུ་བ་ཁོང་བཙོན་ནས་གློད་མ་ཐག རྨ་ཆུར་མཆོངས་ཏེ་རང་ཤི་བརྒྱབས་ཡོད། གནས་ཚུལ་དེས་དབང་གིས་དགོན་པའི་གྲྭ་དམངས་གཙོ་བྱས་པའི་ལྷ་སྡེ་མི་དམངས་ ༡༨༠༠ ལྷག་གིས་རྭ་རྒྱ་གྲོང་རྡལ་ཉེན་རྟོག་ལས་ཁུངས་དང་སྲིང་བར་བཅས་ནས་སྐད་འབོད་བརྒྱབས་ཏེ། འབྲེལ་ཡོད་ལས་ཁུངས་ཁག་ལ་གཏུགས་བཤེར་བྱས་པ་རེད། དེ་ལྟར་ཉིན་རེ་ལས་ཉིན་རེར་གནས་ཚུལ་ཛ་དྲག་ཏུ་གྱུར་ཅིང་ཟིང་ཆ་ཆེན་པོ་བྱུང་བའི་རྒྱུ་མཚན་ལ་བརྟེན་ཏེ། དགོན་པ་དང་ལྷ་སྡེ་ཡོངས་ནས་མི་ ༧༠ ལྷག་རྒྱ་གཞུང་གིས་འཛིན་བཟུང་བཙན་ཁྲིད་བྱས་ཡོད།
འདྲི་བརྩད་དང་ཞིབ་བཤེར་བརྒྱུད་སྐབས་དེར་འཛིན་བཟུང་བྱས་རིགས་མང་ཆེ་བ་གློད་གྲོལ་བཏང་ཡོད་ཀྱང་། མི་ ༡༠ ཙམ་མུ་མཐུད་བཀག་ཉར་བྱས་ཏེ། ཟླ་འདིའི་ཕྱི་ཚེས་ ༡༣ ཉིན་མགོ་ལོག་ཁུལ་རྨ་ཆེན་རྫོང་མི་དམངས་ཁྲིམས་ཁང་གིས་དགེ་འདུན་པ་ ༦ དང་། མི་སྐྱ་ ༢ བཅས་སྡོམ་པའི་མི་ ༨ ལ་ཁྲིམས་ཐག་བཅད་འདུག རྒྱ་གཞུང་གིས་ཁོང་ཚོར་ཁྲིམས་རྩོད་པ་སོ་སོས་འཚོལ་ཆོག་སྐོར་བརྗོད་པ་ལྟར། ནང་མི་ཚོས་ཁྲིམས་རྩོད་པ་རེ་རེར་རྒྱ་སྒོར་ཉིས་ཁྲི་ ༢༠༠༠༠ ལྷག་སྤྲད་དེ་ཁྲིམས་རྩོད་པ་ ༨ བཙལ་ཡོད་པ་རེད། ཁོང་ཚོར་ཁྲིམས་ཐག་གཅོད་པའི་ཉིན་དེར་ས་གནས་བོད་རིགས་མང་པོ་ཞིག་ཀྱང་། ཁྲིམས་བཤེར་ཁང་དེར་ཟུར་ཉན་དུ་བཅར་ཡོད་པ་འདྲ། གྲྭ་ཚུལ་ཁྲིམས་ཀྱི་ཁྲིམས་རྩོད་པ་དེ་མཚོ་སྔོན་ཞིང་ཆེན་ཁྲིམས་བཤེར་ཨུ་ཡོན་ལྷན་ཁང་གི་ཚོགས་གཙོ་གཞོན་པ་ཡིན་འདུག་ལ་མི་རིགས་ཁ་ཆེ་རེད་ཟེར། གཞན། ཞིང་ཆེན་རིམ་པའི་ཁྲིམས་རྩོད་པ་ ༣ དང་། ཁུལ་རིམ་པའི་ཁྲིམས་རྩོད་པ་ ༤ བཅས་ཡོད་ས་རེད།
ས་གནས་མང་ཚོགས་ཀྱིས་བརྗོད་པ་ལྟར་ན། ཁྲིམས་རྩོད་པ་དག་གིས་ཐེངས་འདིར་ལས་དོན་འདིའི་མགོ་མཇུག་བར་གསུམ་དུ་གང་ཐུབ་ཅི་ནུས་ཀྱིས་དྲང་བདེན་དང་། ཧུར་བརྩོན་གྱིས་བྱ་བ་བསྒྲུབས་སོང་བའི་སེམས་ཚོར་བྱུང་སོང་ཟེར། དཔེར་ན། ཁྲིམས་བཤེར་བྱས་པའི་ཉིན་དེར་ཁྲིམས་རྩོད་པ་ཁ་ཆེ་དེས། རྒྱལ་ཁབ་ཀྱི་ཁྲིམས་ཐོག་ནས་བལྟས་ན། དགོན་པའི་དགེ་སྐོས་ལ་ཐེངས་འདིར་ཉེས་པ་ལས་བྱས་རྗེས་ཆེན་པོ་འདུག གང་ཡིན་ཟེར་ན། ཟིང་ཆའི་སྐབས་ཁོང་གིས་མང་ཚོགས་ལ་སྣེ་ཁྲིད་བྱས་མེད་པ་ཡིན་ན། སྐབས་དེར་མི་གསོད་ཁྲག་སྦྱོར་གྱི་དོན་རྐྱེན་ཚབས་ཆེན་བྱུང་ཡོད་པ་རེད། ཅེས་བརྗོད་སོང་ཟེར། སྐད་ཆ་དེ་ང་ཚོས་ཀྱང་བདེན་པ་རེད་དྲན་ཡོད། གང་ཡིན་ཟེར་ན། དེ་འདྲའི་ཛ་དྲག་གི་སྐབས་སུ་དགེ་སྐོས་ལྟ་བུའི་བརྩི་བཀུར་བྱ་ཡུལ་ཞིག་མེད་པ་ཡིན་ན། མང་ཚོགས་ལ་ཚོད་འཛིན་ཡོད་པ་མ་རེད། ས་གནས་བོད་རིགས་མང་ཚོགས་ཀྱི་གཤིས་ག་ང་ཚོས་ཀྱང་ཤེས་གསལ་ལྟར་རེད།
སྤྱིར་ཐེངས་འདིར་ཕྱི་ཚེས་ ༡༠ ཉིན་ཁོང་ཅག་ལ་ཁྲིམས་བཤེར་མགོ་འཛུགས་བྱས་ཡོད་ཀྱང་། རྩོད་པ་རྩོད་ལན་བྱས་ཏེ་ཐག་གིས་གཅོད་མ་ཐུབ་པར་ཕྱི་ཚེ་ ༡༣ བར་ལྷག་ཡོད་པ་འདྲ། མཇུག་མཐར་ཕྱི་ཚེས་ ༡༣ ཉིན་ཁོང་ཚོ་མི་ ༨ ལ་རིམ་པ་མི་འདྲ་བའི་ཁྲིམས་ཐག་བཅད་འདུག ཁྲིམས་ཐག་གཅོད་པའི་ཉིན་དེར། གཞུང་ཕྱོགས་ནས་གནད་དོན་འདིའི་བརྒྱུད་རིམ་ཁྲོད། ས་གནས་མང་ཚོགས་ཁྲོད་ནས་སྲིད་གཞུང་ལ་གསང་བའི་གནས་ཚུལ་སྐྱེལ་མཁན་ཆ་ཚང་གསལ་བོར་བཤད་སོང་ཟེར། ཁོང་ཅག་ས་གནས་བོད་མི་དང་དགོན་པའི་གྲྭ་བ། མང་ཆེ་ཤས་བོད་རིགས་ལས་བྱེད་ཁག་ཅིག་རེད་ཟེར། འོན་ཀྱང་། དེ་དག་གི་མིང་དང་གནས་ཚུལ་སོགས་ཞིབ་ཕྲའི་གནས་ཚུལ་ད་དུང་འབྱོར་མ་སོང་། གཞན། བློ་བཟང་དར་རྒྱས་ཞུ་བ་དང་མན་ངག་རྡོ་རྗེ་ཞུ་བ་འཛིན་བཟུང་བྱས་ཏེ། ད་བར་གར་ཡོད་ཅི་བྱུང་གི་གནས་ཚུལ་ཤེས་རྟོགས་བྱུང་ཡོད་པ་མ་རེད། ཟི་ལིང་དུ་འདུག་ཅེས་སྐད་ཆ་ཙམ་གོ་ཡོད་མོད། འོན་ཀྱང་། མི་སུ་གཅིག་གིས་ཀྱང་མཐོང་བ་དང་ཐུག་པ་དེ་འདྲ་བྱུང་ཡོད་པ་མ་རེད། ཅེས་བརྗོད་སོང་།
མིའུ་ཕྲུག་ལགས།
ཆབ་སྲིད་བཙོན་པ་རྫུན་མའི་མིང་ཐོག་ནས་ཁེ་ཕན་སྒྲུབ་མཁན་ཕལ་ཆེར་ས་མཐའ་འདིར་མང་རབས་གླེང་གིན་འདུག
བསེ་རུའི་བཤད་པ་ལྟར་འབྲེལ་ཡོད་ཀྱི་ཚོགས་པ་དག་གིས་རྒྱལ་གཅེས་དཔའ་བོ་དག་གི་པར་དང་ལོ་རྒྱུས་ཡིག་ཚང་དུ་ཉར་ཐུབ་ཚེ་ཕྱོགས་ཡོངས་ནས་དགེ་མཚན་ཆེ་བ་མ་ཟད་ཐ་ན་ཆབ་སྲིད་བཙོན་རྫུན་ཡང་ཉུང་རུ་བཏང་ཐོབ
རྒྱུ་འབྲས་དང་ངོ་ཚ་མེད་པའི་རྒྱ་ནག་སྲིད་གཞུང་གིས་མི་ཤ་རློན་ཟས་དང་མི་ཁྲག་དྲོན་མོ་འཐུང་བར་གོམས་འདུག་པས།བོད་མི་ཚོས་ད་ནི་ཅི་ཞིག་བྱེད་དགོས་སམ།
བོད་ནང་གི་དབའ་བོ་འདི་དག་གི་ལོ་རྒྱུས་གཅིག་གཅིག་གཉིས་གཉིས་བྱས་དེ་དྲ་ཐོག་ནས་བསྒྲགས་ནས་འོང་དུས་རང་གི་རང་ལ་ངོ་གནོང་བ་ལས་གང་ཡང་བྱེད་རྒྱུ་མེད་པར་ལུས་མཁན་བདག་ལྟ་བུས་དབའ་རྒོད་འདི་འདྲ་དག་བོད་དོན་དུ་ཤི་འགྲོ་བ་ལས་བོད་དོན་དུ་གསོན་ཡོད་ན་ཅི་མ་རུང་སྙམ་ཞོར་འཕོངས་སེམས་ཀྱང་ཡང་ཡང་སྐྱེ་ཡི་འདུག གང་ལྟར། ཤོར་ཟིན་པ་ནི་ཤོར་ཚར་བ་རེད། ཕྱིན་ཆད་བོད་མི་གཅིག་གི་ཚེ་སྲོག་ཡིན་ཡང་རྒྱ་ནག་པོའི་འདོད་རྔམ་འོག་མི་ཤོར་བར་སྨོན་ལམ་སེམས་གཏིང་ནས་འདེབས།
བསེ་རུ་རྭ་གཅིག་གིས་བཤད་ནོ་མི་ཧྲ་གི་ན་ཡུམ་དུམ་པཱ།
རྒྱལ་གཅེས་ར་རྒྱ་ཚང་ལ་ཐུགས་རྗེ་ཆེ་ཞུ། ད་དུད་ང་ཚོ་རང་བཙན་མ་ཐོབ་བར་དུ་སེམས་ཤུགས་མ་ཆགས་རོགས་།
ངའི་བསམ་པར་རྒྱལ་གཅེས་པ་གང་ན་སུ་མཆིས་ཀྱི་གནས་ཚུལ་སྐབས་སྐབས་སུ་གསར་འགྱུར་གྱི་མེ་ལོང་གནང་བཏོན་པ་ཙམ་མ་ཡིན་པར། གཞུང་དང་གཞུང་འབྲེལ་མ་ཡིན་པའི་ཚོགས་པ། དཔེར་ན། འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་དང་། བོད་ཀྱི་དགུ་བཅུ་གསུམ་ལས་འགུལ་ཚོགས་པ་སོགས་ཀྱིས་སྐབས་དང་བསྟུན་མི་སྣ་དེ་དག་གི་ལོ་རྒྱུས་ལག་ལ་གང་སོན་རྣམས་ཞིབ་འཇུག་གིས་ཉར་ཚགས་གནང་རྒྱུ་ནི་འབྱུང་འགྱུར་གྱི་ལོ་རྒྱུས་ནང་ཧ་ཅང་གལ་ཆེ་དོན་ཆེ་ཞིག་ཡིན་སྟབས། དཔའ་རྒོད་དེ་ཚོ་གཅིག་ཀྱང་མ་ལུས་པའི་ལོ་རྒྱུས་ཉར་ཚགས་བྱ་རྒྱུ་ནི་ལས་འགན་གལ་ཆེན་ཞིག་ཏུ་མཐོང་ངོ་།།
རྒྱལ་གཅེས་བ་དེ་དག་གི་སྙིང་སྟོབས་ལ་ཡི་རངས་དང་ང་ཚོའི་ལྷ་མིའི་རྣམས་ཀྱི་དགེ་བའི་ཐུབ་སྟོབས་ཕྱོགས་གཅིག་ལ་བརྟེན་ནས་ཁྱེད་ཚོས་ཅི་བསམ་ཐམས་ཅད་ལྷུན་གྱིས་འགྲུབ་པའི་སྨོན་འདུན་ཞུ
རྒྱལ་གཅེས་དཔའ་བོ་ཁོང་ཚོར་རྗེས་སུ་ཡི་རང་བྱས་པ་ཙམ་མ་ཡིན་པར། རང་ཉིད་ལ་གང་ཞིག་འཁྲི་བའི་ལས་འགན་དེ་སྒྲུབ་པར་འབད་པར་འཚལ་ཞེས་བོད་རིགས་ཡོངས་ལ་དྲན་གསོའི་ཚུལ་དུ་མཆན་བུ་འདི་བཏབ་པ་ཡིན། འོན་ཀྱང་བློ་ཕམ་པ་ཞིག་ལ། སྐབས་དེར་གསང་བ་ཕྱིར་བསྒྲགས་བྱེད་མཁན་རྣམས་བོད་རིགས་ནང་ཁུལ་ཡིན་པ་གང་ཞིག་ལ། དགེ་འདུན་པ་དང་གཞུང་ཞབས་པ་ཡིན་ཚུལ་བཀོད་འདུག གལ་སྲིད་དེ་ལྟར་བདེན་པ་ཡིན་ན། ཆེས་བློ་ངོར་མི་ཤོངས་པའི་གནས་ཚུལ་ཞིག་མ་རེད་དམ། བོད་རིགས་ཡོད་དོ་ཅོག་གིས་འདི་ལྟར་ཉིན་མཚན་རྒྱུན་མི་ཆད་པར་དཀའ་སྡུག་སྣ་ཚོགས་ཤིག་མྱོང་བཞིན་པའི་སྐབས་འདིར། ད་དུང་ནང་ཁུལ་ལ་རོ་ཐོག་རྒྱ་རྒྱུག་གི་དཔེ་འཛིན་པ་ནི། ཧ་ཅང་བློ་རེ་ཕམ། དྲ་གྲོགས་རྣམས་པ། བློ་མཐུན་རྣམས་པ། བོད་རིགས་རྣམས་པ། ཤེས་ཡོན་པ་རྣམས་པ། སྨྱུག་འཛིན་པ་རྣམས། ང་ཚོས་ཅི་ནས་ཀྱང་གཞན་གྱི་བསླུ་བྲིད་འོག་མགོ་འཁོར་བའི་བོད་རིགས་རྒྱལ་ཚོང་བ་དེ་དག་ལ་སློབ་གསོ་ཞིག་གཏོང་བར་འབད་པ་བྱེད་དགོས། དམོད་མོ་དང་མཚངས་འབྱིན་གྱིས་ཕན་ཀྱང་སྲིད་ལ་གནོད་ཀྱང་སྲིད། དེ་བས་སློབ་གསོ་དང་དྲན་སྐུལ་གྱིས་ལོག་ལམ་དུ་ཕྱིན་པ་སུ་དང་གང་གི་སེམས་ནང་ལ་མདངས་རྒྱག་ཅིག་སྟེར་ངེས། དྲ་གྲོགས་རྣམས་པ། ང་ཚོའི་སྨྱུག་ཁ་འདི་སློབ་གསོའི་ཕྱོགས་ལ་བསྐུལ་བའི་དུས་ལ་བབ་འདུག་པས། ནང་ཁུལ་འཕོངས་སྦྱོར་དང༌། ཁྱོས་ཁ་ངའི་སྣ་རྩོད་རྒྱུ་མཚམས་ཞོགས་ལ། མི་ཤེས་མཁན་རྣམས་ལ་སློབ་གསོ་ཐོངས། མི་རིགས་མཁན་རྣམས་ལ་ལམ་སྟོན་གྱིས། མི་དགའ་མཁན་དང་དགྲ་ཟླར་ལངས་མཁན་རྣམས་ལ་གཉན་གྱི་ཚུལ་ཟུང་ལ་གནས་ལུགས་ཤོད། ཤེས་ཡོན་པ་རྣམས་པ། ད་ནས་བཟུང༌། ནང་ཁུལ་གྱི་ཁ་མཆུ་རྩོད་གླེང་དག་སྤངས་ནས། སློབ་གསོ་དང་མཐུན་སྒྲིལ་གྱི་ལས་ལ་ཞུགས་ཡ། ང་ཚོས་ཕྲག་ཏུ་བབ་པ་ནི་བོད་རིགས་ནང་ཁུལ་མཐུན་སྒྲིལ་བྱེད་པ་དེ་ཡིན། རང་ཉིད་ལ་དབང་བའི་རང་ས་རང་ཡུལ་དེ་ཕྱིར་ལེན་ཐབས་བྱེད་དགོས་པ་དེ་ཡིན། ཀི་ཀི་བསྭོ་བསྭོ་བོད་མི་ཚོ། བོད་རྒྱལ་ལོ།
མགོ་ལོག་ར་རྒྱ་འདི་ཚོ་ད་ངོ་མ་དཔའ་རྒོད་རྐྱང་རྐྱང་རེད། རྗེས་སུ་ཡི་རངས་ཡོད།
གནས་ཚུལ་འདི་ཁོམ་འདོན་བྱེད་མཁན་རྩོམ་པ་པོ་རྭ་བློ་དབང་དང་གསར་འགོད་པ་དོན་བཀྲ་གཉིས་ཀྱིས་ལྷོད་ལྷོད་བྱས་ནས་དཔའ་པོ་ཁཽ་ཚོའི་མ་འོངས་པའི་ཐད་དུ་སེམས་འཁུར་བྱེད་ཀྱིན་པ་འདྲ།
ལ་རྒྱ་ཅན་གྱི་རྭ་རྒྱ་ནས་དཔའ་བོ་ཚོས་དཔའ་རྟགས་ཡང་ཡང་བསྟན་སོང་།