མདོ་སྨད་མཚོ་ལྷོ་ཁུལ་མང་ར་རྫོང་ཁོངས་མགོ་མང་གྲོང་བརྡལ་གྱི་ཁོངས་སུ་ཡོད་པའི་མུ་གེ་ཐང་གི་རོང་འབྲོག་མི་གྲངས་ ༤༠༠༠ ལྷག་ས་ཁུལ་དེ་ནས་གནས་སྤོར་བྱ་དགོས་ཚུལ་རྒྱ་གཞུང་གིས་བརྗོད་ཡོད་འདུག
༢༠༠༠ ལོ་ནས་བཟུང་རྒྱ་གཞུང་གིས་ས་ཁུལ་དེའི་རོང་འབྲོག་མང་ཚོགས་རྣམས་ས་ཁུལ་གཞན་པར་གནས་སྤོར་བྱ་དགོས་ཚུལ་བརྗོད་ཡོད་ན་ཡང་། ད་ལྟའི་བར་ལག་བསྟར་བྱས་མི་འདུག ད་ལོའི་ཕྱི་ཟླ་བཞི་བ་ནས་བཟུང་རྒྱ་གཞུང་གིས་ས་ཁུལ་དེ་བདག་བཟུང་བྱེད་ཆེད། འབྲོག་པ་མང་ཚོགས་ཀྱིས་རང་རང་གི་ས་ཆར་བདག་བཟུང་གིས་ལྕགས་ར་བསྐོར་ཡོད་པ་དེ་དག་བསྡུས་ནས། དེའི་ཤུལ་དུ་རྒྱ་གཞུང་གིས་ལྕགས་ར་གསར་བ་བརྒྱབས་ཡོད་འདུག རྒྱ་གཞུང་གིས་འབྲོག་པ་མང་ཚོགས་ཀྱིས་བརྒྱབས་པའི་ལྕགས་ར་བསྡུས་ནས་གསར་བ་རྒྱག་དོན་ནི། ས་ཆ་དེ་རོང་འབྲོག་མང་ཚོགས་ལ་དབང་གི་མེད་པ་དང་། ད་ལོའི་ཕྱི་ཟླ་བརྒྱད་པ་ནས་བཟུང་རོང་འབྲོག་མང་ཚོགས་རྣམས་ཀྱིས་རང་རང་གི་ཕྱུགས་ཟོག་ཡོད་ཚད་བཙོང་ནས་གྲོང་ཁྱེར་ལ་འགྲོ་དགོས་པའི་བཀའ་རྒྱ་བཏང་ཡོད་འདུག
དེའི་ཐད་མདོ་སྨད་མཚོ་ལྷོ་ཁུལ་མང་ར་རྫོང་མགོ་མང་གྲོང་བརྡལ། མུ་གེ་ཐང་གི་འབྲེལ་ཡོད་མི་སྣ་ཞིག་ལ་ཁ་པར་བརྒྱུད་སྐད་ཆ་དྲིས་པར་ཁོང་གིས་བརྗོད་དོན། ༢༠༠༠ ལོ་ནས་བཟུང་སྐད་ཆ་དེ་འདྲ་ཞིག་གོང་རིམ་ནས་བཤད་པ་རེད། ཡིན་ནའང་། སྐད་ཆ་དེ་བཤད་ནས་ལོ་གང་འཚམ་སོང་སྟབས། མི་མང་གིས་གོང་རིམ་གྱི་སྐད་ཆ་དེར་ཡིད་ཆེས་དང་གདེང་འཇོག་བྱེད་ཀྱིན་ཡོད་པ་མ་རེད། ཡིན་ནའང། ད་ལོའི་ཕྱི་ཟླ་བཞི་བ་ནས་བཟུང་གོང་རིམ་གི་བཀའ་མངགས་ལྟར། རོང་འབྲོག་མང་ཚོགས་ཀྱིས་རྒྱུ་ནོར་བཏང་ནས་རང་གི་ས་ཆར་ལྕགས་ར་བརྒྱབས་པ་དེ་བསྡུས་པ་རེད། གོང་རིམ་གྱིས་རོང་འབྲོག་མང་ཚོགས་ཀྱི་ལྕགས་ར་མ་བསྡུས་པའི་སྔོན་ལ། མི་མང་བསྡུ་སྐོང་བྱས་ནས། སང་ཉིན་ནས་བཟུང་རྒྱལ་ཁབ་ཀྱིས་ས་ཆ་འདིར་ལྕགས་ར་བརྒྱབ་ནས་བདག་བཟུང་བྱེད་གི་རེད། ཁྱེད་རང་ཚོས་རང་གི་ཕྱུགས་ཟོག་བཙོང་ནས་ས་ཁུལ་གཞན་པ་ལ་གནས་སྤོར་དགོས་གི་རེད། གང་ཡིན་ཟེར་ན། ས་ཆ་འདིའི་རྩྭ་ས་རྒྱལ་ཁབ་ཀྱིས་བདག་བཟུང་བྱས་ནས་ཕྱུགས་ཟོག་གཅིག་ཀྱང་འདིར་འདུག་མི་ཆོག་པ་བཟོ་རྒྱུ་རེད། ཅེས་བཀའ་རྒྱ་བཏང་སོང་ཟེར།
ད་ལྟའི་མི་མང་གི་གནས་སྟངས་སྐོར་དྲིས་པར་ཁོང་གིས་བརྗོད་དོན། དེ་འདྲ་བྱས་ནས། ཕྱི་ཟླ་ལྔ་བ་དྲུག་པ་དེར་འབྲོག་པ་མང་ཚོགས་ཀྱིས་རུ་དབྱར་སར་སྤོ་བའི་སྐབས་འཁེལ་ཡོད་སྟབས། རུ་དབྱར་སར་སྤོས་པ་རེད། ད་སྐབས་རུ་དབྱར་ས་ན་ཡོད་པའི་སྒང་རེད། ཉེ་ལམ་གོང་རིམ་ནས་མི་མང་བསྡུ་སྐོང་བྱས་ནས་བརྗོད་པ་ལྟར་ན། རུ་དབྱར་ས་ནས་ཕྱིར་སྤོ་དུས། ཕྱིར་མུ་གེ་ཐང་དུ་ཡོང་མི་ཆོག་པ་དང་། ཕྱུགས་ཟོག་ཀྱང་ཚང་མ་བཙོང་དགོས་ཚུལ་བརྗོད་ཀྱིན་འདུག མི་མང་གང་ལ་འགྲོ་དགོས་པ་རེད་ཟེར་ན། ན་ནིང་ནས་བཟུང་སྡེ་བ་མགོ་མང་གྲོང་བརྡལ་གྱི་གཡས་གཡོན་ན་གྲོང་སྡེའི་རྣམ་པ་ཡི་ཁང་བ་བརྒྱུབས་ཡོད་པ་རེད། མི་མང་རྒྱལ་ཁབ་ཀྱིས་བཟོས་པའི་ཁང་བ་དེ་དག་གི་ནང་མ་སོང་བར་བསྡད་ཡོད་པ་རེད་དེ། གནས་སྟངས་འདི་ལྟར་སོང་ན་མི་འགྲོ་ཀ་མེད་ཆགས་ཀྱི་རེད། ད་སྐབས་མི་མང་གིས་འདིའི་ཐད་ལ་ཉིན་མཚན་མེད་པར་ཤི་སྡུག་དང་སེམས་ཁྲལ་མང་བོ་བྱེད་ཀྱིན་ཡོད་ཚུལ་ཡང་བརྗོད་སོང་།
གནས་ཚུལ་ཤེས་རྟོགས་བྱུང་བ་ལྟར་ན། རྒྱ་གཞུང་གིས་ས་ཁུལ་དེར་གནས་པའི་རོང་འབྲོག་མང་ཚོགས་ས་གནས་གཞན་དུ་གནས་སྤར་དགོས་དོན་ནི། མུ་གེ་ཐང་ནི་མི་མེད་རང་འགུལ་གནམ་གཤིས་རྟོག་དཔྱོད་ས་ཚིགས་ཤིག་ཏུ་བསྒྱུར་དགོས་ཚུལ་བརྗོད་ཡོད་འདུག གནས་གཤིས་རྟོག་དཔྱོད་ས་ཚིགས་དེས་ཕྱུགས་ལས་ལག་རྩལ་ཚོད་ལྟ་བྱེད་པ་དང་ཁྱབ་བརྡལ་དུ་གཏོང་བ། ས་ངོས་ནས་ནམ་ཟླར་ལྟ་ཞིབ་བྱེད་ཐུབ་སྐོར་བརྗོད་ཡོད་འདུག གནས་ཚུལ་འདིའི་སྐོར་མཚོ་སྔོན་བོད་སྐད་རླུང་འཕྲིན་གྱི་དྲ་ཚིགས་སུ་བཀོད་པ་ལྟར་ན། མུ་གེ་ཐང་གི་གནམ་གཤིས་རྟོག་དཔྱོད་ས་ཚིགས་དེ་ ༡༩༦༨ ལོ་ནས་བཟུང་ལས་མགོ་བཙུགས་ཡོད་པ་དང་། ད་ལྟ་མཚོ་སྔོན་ཞིང་ཆེན་ཀོས་ནན་རྩྭ་ལས་ཀུང་ཟིས་དབང་བསྒྱུར་བྱེད་ཀྱིན་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཨ་རི་ནས་བོད་དང་རྒྱ་ནག་ས་ཁུལ་དུ་བདུན་ཕྲག་འདིའི་ནང་གནས་ཡོད་མི་སྣ་བཅུ་གཟིགས་སྐོར་དུ་ཕེབས་གཏན་འཁེལ་འདུག་པས་ད་ཐེངས་ཁོང་རྣམ་པ་ངེས་པར་དུ་ཁུལ་འདིར་ཅི་ནས་ཀྱང་ཕེབས་ཐུབ་རྒྱུའི་རེ་འདུན་ཞིག་ཞུ་ཐུབ་ན་དགེ་མཚན་ཆེ་སྙམ།
ད་དུང་ང་ཚོས་འདི་ནས་གནས་ཚུལ་དེའི་སྐོར་སྣང་མེད་དུ་མ་བཞག་པར་ངེས་གཞུང་མང་གཉིས་ཀས་གང་ཐུབ་ཀྱིས་སྐད་འབོད་དང་ངོ་རྒོལ་བྱེད་དགོས་ལ་དེ་འཛམ་གླིང་རྒྱལ་སྤྱིའི་སྟེང་དུའང་ཤེས་རྟོགས་ཐུབ་པར་འབད་དགོས།
དྲ་གྲོགས་རྣམས་པས་སེམས་བསམ་པའི་གཏིང་ནས་ཐཱུགས་ཁུར་དང་སེམས་ཁྲལ་བྱས་པར་ངས་ས་ཁུལ་དེར་གནས་པའི་མི་མང་ཡོངས་ཀྱི་ཚབ་བྱས་ནས་ཐུགས་རྗེ་ཆེ་ཞུས་པ་ཡིན།
ཡིན་ནའང་། ད་ང་ཚོས་ཁོང་ཚོ་ཕལ་ཆེར་སྐྱོབ་ཐབས་མེད་པ་ཞིག་ཆགས་འདུག
ངས་གོ་ཐོས་ལ་གལ་སྲིད་མི་མང་གྲོང་སྡེ་ཅན་དུ་མ་སོང་ན་རང་རང་གིས་ས་ཁུལ་གཞན་ནས་འཚོ་གནས་འཚོལ་དགོས་ཀྱིན་ཆགས་ཡོད་པ་མ་ཟད། ཁྱིམ་ཐོ་ཡང་རྩིས་མེད་དུ་གཏོང་བའི་སྐད་ཆ་ཞིག་མདང་དགོང་གོ་བྱུང་།
དེར་བརྟེན་ཁོང་ཚོ་ད་སྐབས་ཅི་བྱ་བརྟོལ་མེད་དུ་གྱུར་ཡོད་པའི་སྐབས་ཤིག་རེད་འདུག
་མུ་གེ་ཐང་གི་འབྲོག་པ་མང་ཚོགས་ཀྱི་འཚོ་་བ་ཕྱུགས་ཟོག་ཁོ་ན་ལ་བརྟེན་ནས་འཚོལ་བཞིན་ཡོད་པ་རེད།ཕྱུགས་ཟོག་ཚང་མ་བཙོང་བཅུགས་ནས་གྲོང་ཁྱེར་ལ་འགྲོ་བཅུགས་པ་ཡིན་ན་ཁོ་ཚོའི་་འཚོ་བ་ཇི་ལྟར་རོལ་དགོས་པ་རེད།ཁོ་ཚོ་ལ་ཤེས་ཡོན་སོགས་གྲོང་ཁྱེར་ནས་འཚོལ་བའི་རྒྱུ་རྐྱེན་གང་ཡང་མེད་པ་ཡིན་ཚང་ཁོ་ཚོ་ལ་ངོ་མས་དཀའ་ངན་ཆེན་པོ་བྱུང་རྒྱུ་ཡིན་པ་ཐག་ཆོད་རེད།དེ་བས་ང་ཚོས་འདི་ནས་དེ་ལྟར་འགྲོ་མི་དགོས་བའི་ཐབས་ཤེས་ཤིག་ཅི་ཀྱང་བྱེད་དགོས་པ་རེད།
མུ་གེ་ཐང་ནས་མུ་གེས་ཤི་བ་ལས་སྤོར་ན་མི་དགའ་འམ། དཀོན་མཆོག་མཁྱེན། བཤད་ཤེས་པ་མི་འདུག་གོ མི་མ་ཤི་ན་མི་གོ་དགུ་གོ་གོ་གི་འདུག
མཁར་རྔ་ལགས། ང་ཚོས་ཤེས་པ་དེ་དང་འགྲོག་ནས་ངེད་ཅག་གི་གང་ཞིག་བྱེད་དགོས་མིན་དེའི་ཐད་དུ་བསམ་ཚུལ་རེ་གསུང་རྒྱུ་ཡོད་དམ་ལགས། ཡོད་ན་གསུང་རོགས་ཞུ། དེ་ནས་འུ་ཅག་བོད་པ་ཚང་གི་འདས་པའི་ལོ་རྒྱུས་གཞི་ལ་བཞག ད་ལྟའི་དམིགས་འབེན་སེམས་སུ་བཟུང་། མ་འོངས་བྱ་བ་དོན་དུ་གཉེར་ན་ག་འདྲ་འདུག་ལགས།
འདི་ནི་ཆེས་ཛ་དྲག་རང་བཞིན་དང་། བོད་རིགས་གྲངས་ཉུང་ནས་སྐམ་ས་ཆེན་པོར་རྦད་དེ་སིམ་ཐབས་ཀྱིས་སྲིད་ཇུས་ཡིན་པ་ཧ་ཅང་གི་གསལ་པོ་རེད་ལ། ལྷག་པར་དུ་ང་ཚོས་དེ་ལྟར་ཡིན་པ་ཤེས་དགོས་ལ་ངོས་འཛིན་ཡང་གནང་དགོས་པ་གལ་ཆེའོ།།