༄༅། །བོད་ཀྱི་ཐུན་མོང་མ་ཡིན་པའི་རིག་གནས་ལ་མཁྱེན་རྒྱ་ཆེ་ཞིང་དར་སྤེལ་རྒྱུན་འཛིན་གྱི་ལར་ཞེན་ཆེ་བའི་རྩོམ་པ་པོ་རྣམས་ཀྱི་༸སྙན་ལམ་དུ་གསོལ་རྒྱུར། ལམ་ཙམ་མཁྱེན་གསལ་ལྟར་༸རོང་ཆེན་བསྟན་པའི་སྒྲོན་མེ་༸སྐྱབས་རྗེ་ཀིརྟི་རིན་པོ་ཆེ་མཆོག་གི་དབུ་ཁྲིད་ལམ་སྟོན་དང་ཐུགས་འགན་ཆེར་བསྐྱེད་ཀྱི་བཀའ་དྲིན་འོག འཕགས་ཡུལ་ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུད་འཛིན་སླད་ལོ་ཡུན་ཐུང་ངུ་ཞིག་གི་ནང་དཔལ་འབྱོར་གྱི་མཐུན་རྐྱེན་ཞན་ཅིང་རྩོམ་སྒྲིག་གི་ཉམས་མྱོང་མེད་ནའང་དཀའ་བ་དུ་མ་ཁྱད་བསད་ཀྱིས། བཅུ་ཕྲག་རིག་པའི་གནས་དང་འབྲེལ་བའི་གཞུང་ལུགས་ཀྱི་དེབ་ཕྲེང་དུ་མ་གསར་རྩོམ་དང་རྩོམ་སྒྲིག་འགྲེམས་སྤེལ་ཞུས་ནས་ད་ཆ་ཕྱག་དེབ་རྣམ་གྲངས་མི་འདྲ་བ་བརྒྱ་ཐམ་པ་ལོངས་ཟིན་པར་བརྟེན། འདི་ལོར་བོད་གཞུང་དམངས་གཉིས་བཙན་བྱོལ་དུ་ཕེབས་ནས་མི་ལོ་ལྔ་བཅུ་ཧྲིལ་པོ་འཁོར་བའི་དུས་དྲན་སྲུང་བརྩི་གནང་བཞིན་པ་འདིའི་ཆ་ཤས་སུ་དམིགས་ཏེ་རྩོམ་དེབ་གྲངས་བརྒྱ་ཐམ་པ་ལོངས་པའི་དམིགས་བསལ་གྱི་མཛད་སྒོ་ཞིག་རིང་མིན་ཚུགས་རྒྱུའི་ལས་རིམ་ཁོངས་སུ། འདས་པའི་མི་ལོ་ལྔ་བཅུའི་རིང་གཞིས་བྱེས་བོད་མིའི་ཤེས་ཡོན་དར་རྒུད་ཀྱི་གནས་བབ་ལ་བསྐྱར་ཞིབ་དང་འབྲེལ་འབྱུང་འགྱུར་གྱི་དུས་རབས་ནང་མུ་མཐུད་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་རིག་གནས་མི་ཉམས་རྒྱུན་འཛིན་བྱེད་པའི་དགེ་མཚན་དང་དེའི་ཐབས་ལམ་སྐོར་བོད་ཀྱི་སྐད་ཡིག་ནང་རྩོམ་ཡིག་འགྲན་བསྡུར་རྒྱ་ཆེ་ཙམ་ཞིག་གནང་གཏན་འཁེལ་ཡོད་པ་ལགས་ན། བོད་ཀྱི་ཐུན་མོང་མ་ཡིན་པའི་རིག་གནས་ཐོག་མཁྱེན་སྤྱན་ཡངས་པ་རྣམས་ཀྱིས་གཤམ་གསལ་ཆ་རྐྱེན་ལྟར་རྩོམ་ཡིག་གང་ལེགས་རེ་འབྲི་རྩོམ་གྱིས་འགྲན་བསྡུར་ནང་འཛུལ་ཞུགས་ཡོང་བའི་རེ་སྐུལ་ཞུ། བཞུགས་སྒར་ཀིརྟིའི་བྱེས་པ་གྲྭ་ཚང་གི་རྩོམ་དེབ་བརྒྱ་ཐམ་པ་ལོངས་པའི་མཛད་སྒོའི་གོ་སྒྲིག་ཚོགས་ཆུང་ནས། ཕྱི་ལོ་ ༢༠༠༩ ཟླ་ ༨ ཚེས་ ༡༧ ལ་ཕུལ།
རྩོམ་ཡིག་འགྲན་བསྡུར་གྱི་ཆ་རྐྱེན་ཁག
༡ བརྗོད་གཞི།
བོད་ཀྱི་སྲོལ་རྒྱུན་རིག་གནས་རྒྱུན་འཛིན་བྱེད་པའི་དགེ་མཚན་དང་དེའི་ཐབས་ལམ།
༢ མང་ཉུང་།
བོད་ཡིག་ཚེག་ཁྱིམ་ ༥༠༠༠ ལས་མ་ཉུང་བ་དང་ ༥༥༠༠ ལས་མ་མང་བ་དགོས། རྩོམ་ཡིག་གློག་ཀླད་དུ་བཅུག་ནས་གནང་ཐུབ་ཚེ་རང་གཞན་གཉིས་ཀར་ཕན་ཐོགས་ཆེ།
༣ དུས་ཚོད།
ཕྱི་ལོ་ ༢༠༠༩ ཟླ་ ༡༡ ཚེས་ ༢༥ ལས་འགྱངས་མེད་འདི་གའི་མཛད་སྒོ་གོ་སྒྲིག་ཚོགས་ཆུང་ལ་ངེས་པར་འབྱོར་ཐུབ་པ་གནང་དགོས། དེའི་རྗེས་ནས་འབྱོར་ཚེ་རྩིས་མེད་འགྲོ་རྒྱུ་ཡིན། རྩོམ་ཡིག་དེ་འགྲན་བསྡུར་ནང་ཚུད་ཐུབ་མིན་རྩོམ་ཡིག་ཞིབ་འཇུག་འདེམས་སྒྲུག་ཚོགས་ཆུང་ལ་སྐུ་དབང་གནང་དགོས་རྒྱུ།
༤ གཟེངས་བསྟོད་བྱ་དགའ།
རྩོམ་ཡིག་ཨང་དང་པོ་ལ་བྱ་དགའ་ཧིན་སྒོར་ ༡༠༠༠༠ དང་གཟེངས་བསྟོད་ཕྱག་འཁྱེར།
རྩོམ་ཡིག་ཨང་གཉིས་པ་གཅིག་ལ་བྱ་དགའ་ཧིན་སྒོར་ ༧༠༠༠ དང་གཟེངས་བསྟོད་ཕྱག་འཁྱེར། རྩོམ་ཡིག་ཨང་གསུམ་པ་གསུམ་ལ་བྱ་དགའ་ཧིན་སྒོར་ ༥༠༠༠ རེ་དང་གཟེངས་བསྟོད་ཕྱག་འཁྱེར། ཨང་བཞི་པ་མན་གྱི་རྩོམ་ཡིག་བཅུ་ལ་རྩོམ་དོད་ཧིན་སྒོར་ ༥༠༠ རེ་འབུལ་རྒྱུ།
བྱ་དགའ་ཐོབ་མཁན་རྣམས་མཛད་སྒོར་ཕེབས་ (འགྲོ་སོང་རང་ཁུངས) ཚེ་མཛད་སྒོའི་ཐོག་ནས་བྱ་དགའ་འབུལ་བཞེས་གནང་རྒྱུའམ་གལ་སྲིད་ཕེབས་མ་ཐུབ་ཚེ་མི་གཞན་བརྒྱུད་ནས་བཞེས་ཀྱང་ཆོག རྩོམ་ཡིག་ཆ་ཚང་ཕྱོགས་བསྒྲིགས་ཀྱིས་དཔར་སྐྲུན་འགྲེམས་སྤེལ་ཡང་ཞུ་འཆར་ཡོད།
༥ རྩོམ་ཡིག་ཞིབ་འཇུག་འདེམས་སྒྲུག་ཚོགས་མི།
ནོར་གླིང་བོད་ཀྱི་རིག་གཞུང་ཞིབ་འཇུག་ལྟེ་གནས་ཁང་གི་འགན་འཛིན་རྡོ་རྗེ་དབང་ཕྱུག རང་གཞུང་ཤེས་རིག་ལས་ཁུངས་ཀྱི་ཉམས་ཞིབ་པ་དང་ཡིག་སྒྱུར་པ་ཆུང་ཚེ་རིང་། ས་རཱ་མཐོ་སློབ་ཀྱི་རྒྱལ་རབས་སློབ་དཔོན་བསོད་ནམས་རྒྱལ་མཚན། འདི་གའི་སློབ་གཉེར་ཁང་གི་སློབ་སྤྱི་ཟུར་པ་དགེ་རྒན་འབྲིང་བ་འཇིགས་མེད་དང་། རྩོམ་སྒྲིག་འགན་འཛིན་ཟུར་པ་དགེ་རྒན་རེ་མདོ་སེངྒེ་། རྩོམ་སྒྲིག་འགན་འཛིན་ལས་ཐོག་པ་དགེ་རྒན་སོ་རུ་དར་རྒྱས་རྣམས་ཡིན།
འབྲེལ་གཏུགས་བྱེད་ཡུལ།
Dongsher & Sodar
kirti Monastery
Institute of Higher Tibetan Studies
P.O.Mcleod Ganj-176219
Distt Kangra (H.P.) India
ཡིག་ཚང་གི་ཁ་པར་ཨང་གྲངས། ༠༡༨༩༢-༢༢༡༥༢༦
སློབ་སྤྱི་གདོང་རི་ཤེས་རབ། ༩༨༡༦༧༨༥༨༩༨
སློབ་སྤྱིའི་ལས་རོགས་གད་འོག་བསྟན་འཛིན། ༩༤༡༨༢༤༧༦༡༥
གློག་འཕྲིན། Tsampayak@yahoo.co.uk / kadten@yahoo.c.in
