ལོ་སྔོན་མར་བོད་ཀྱི་རྒྱལ་ས་ལྷ་སར་ཐོག་མར་ཞི་བའི་ངོ་རྒོལ་བྱེད་མཁན་སེ་ར་དགོན་གྱི་གྲྭ་བཅུ་བཞིའི་ཁྲོད་ནས་ཉེ་ཆར་གྲྭ་པ་གསུམ་ལ་མི་ལོ་ལྔ་དང་བཅུའི་བར་གྱི་བཙོན་འཇུག་གི་ཁྲིམས་ཐག་བཅད་ཡོད་འདུག
འདི་གར་སེར་བྱེས་གྲྭ་བློ་བཟང་ལུང་རིགས་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ལོ་སྔོན་མར་བོད་ཀྱི་རྒྱལ་ས་ལྷ་སར་ཐོག་མར་ཞི་བའི་ངོ་རྒོལ་བྱེད་མཁན་སེ་ར་དགོན་གྱི་གྲྭ་བཅུ་བཞིའི་ཁྲོད་ནས། རང་ལོ་ ༢༩ ཡིན་ཞིང་ཕ་ཡུལ་རྫ་ཆུ་ཁ་དབོན་པོ་དགོན་གྱི་གྲྭ་བློ་བཟང་དངོས་གྲུབ་དང་། རང་ལོ་ ༣༠ ཡིན་ཞིང་མང་དགེ་དགོན་གྱི་གྲྭ་བཟོད་པ་གཉིས་ལ་ཉེ་ཆར་ལོ་ལྔ་རེའི་བཙོན་འཇུག་ཁྲིམས་ཐག་བཅད་དེ་ལྷ་ས་ཆུ་ཤུར་བཙོན་ཁང་དུ་བཅུགས་ཡོད་པ་དང་། དེ་མིན་གྱི་གྲྭ་པ་ཁག་ཅིག་ད་དུང་སྟོད་ལུང་དུ་བཙོན་འཇུག་བྱས་འདུག་ཀྱང་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག་ཅེས་དང་། གཞན་ཡང་ལོ་སྔོན་མའི་ཟླ་གསུམ་པའི་ཚེས་ ༡༩ ཉིན་ལྷ་སར་འཛིན་བཟུང་བྱས་ཤིང་ཕ་ཡུལ་རྫ་ཆུ་ཁ་དབོན་པོ་དགོན་གྱི་རང་ལོ་ ༣༥ ཡིན་པའི་གྲྭ་བསོད་ནམས་གྲགས་པ་ལགས་སུ་ལོ་བཅུའི་བཙོན་འཇུག་ཁྲིིམས་ཐག་བཅད་ཡོད་འདུག ཁོང་ ༡༩༩༩ ལོར་རྒྱ་གར་དུ་ཡོང་སྟེ་སེ་ར་ཐེག་ཆེན་གླིང་དུ་ལོ་འགར་སློབ་གཉེར་གནང་མྱོང་བ་མ་ཟད། ཕྱིར་ཕ་ཡུལ་དུ་ལོག་རྗེས་ཀྱང་བསྐྱར་དུ་རྒྱ་གར་ལ་ཐེངས་འགར་ཡོང་མྱོང་ཡོད་འདུག་ལ། ལོ་སྔོན་མའི་དཔྱིད་ཆོས་ཆེན་མོའི་སྐབས་སུ་བཞུགས་སྒར་ངྷ་སར་བཞུགས་ཏེ་ཕྱིར་ཕ་ཡུལ་དུ་ལོག་ཡོད་འདུག ཁོང་ལྷ་སར་འཇུ་བཟུང་བྱེད་སྐབས་ཁོང་གི་སྲིང་མོ་ཞིག་དང་སྲིང་མོའི་མག་པ་བཅས་མཉམ་དུ་བཟུང་ཡོད་ནའང་། ཁོང་གཉིས་ལོ་གཅིག་ཙམ་གྱི་རྗེས་ནས་གློད་གྲོལ་བཏང་ཡོད་འདུག གྲྭ་བསོད་ནམས་གྲགས་པ་ལགས་ཀྱིས་ལོ་སྔོན་མའི་ཞི་རྒོལ་ནང་མཉམ་ཞུགས་དང་དམིགས་བསལ་གྱིས་ལས་འགུལ་སྤེལ་བ་སོགས་བྱས་མི་འདུག་མོད། ཁོང་ཕྱི་ཕྱོགས་སུ་འབྲེལ་ལམ་ཤུགས་ཆེར་ཡོད་སྟབས་ཐེངས་འདིར་ཁོང་ལ་ཁྲིམས་ཐག་བཅད་པ་མ་ཟད། ཉེས་མིང་སྣ་ཚོགས་གཡོགས་ཡོད་འདུག་ཅེས་འགྲེལ་བརྗོད་གནང་སོང་།
མཆན། གཡས་ནས་བརྩིས་པའི་པར་དང་བོ། གྲྭ་བསོད་ནམས་གྲགས་པ་དང་གཉིས་པ་གྲྭ་བཟོད་པ། གསུམ་པ་བློ་བཟང་དངོས་གྲུབ་བཅས་ཡིན།
དྲ་སྒོ་ཕྱེ་ནས་འོང་དུས་བོད་ནས་མི་ཅིག་ཅིག་བཟུང་འདུག མི་ཅིག་ཅིག་ཁྲིམས་ཐག་བཅད་འདུག མི་ཅིག་ཅིག་གར་སོང་ཆ་མེད་རེད་འདུག་སོགས་ཀྱི་གནས་ཚུལ་འདི་དག་གི་བསྐོར་བོད་ནས་བྱུང་བ་གོ་དེ་འོང་དུས། ངེད་ཅག་བོད་ཕྱི་བསྡོད་པ་དག་གི་སེམས་ནང་དུ་ག་རེ་དྲན་དགོས་ཀྱི་ཡོད་པ་རེད་ལ། ངེད་ཅག་གིས་ག་རེ་བྱེད་ཐུབ་ཀྱི་ཡོད་པ་རེད་དམ།
གཞིས་ལུས་བོད་མི་ཚོ་ངོ་མ་སྙིང་རེ་རྗེ།རྒྱ་འདྲེ་དེ་ཚོས་ཐུབ་ཚོད་རྐྱང་རྐྱང་གིས་འཚོ་དགོས་པ་རེད།འཇིག་རྟེན་ན་དྲང་བདེན་ཞིག་ཨེ་ཡོད་དམ།