ཨ་རྒྱ་གཉིས་དང་བོད་ཀྱི་གནད་དོན།

༧གོང་ས་མཆོག་དང་སྲིད་འཛིན་ཨོ་བྷ་མ་རྣམ་གཉིས་ཀྱི་མཇལ་འཕྲད་དེ་སྔར་གྱི་དུས་ཆད་ལས་ཕྱིར་འགྱངས་གནང་སྟེ། ཕྱི་ཟླ་ ༡༡ པའི་ནང་དུ་མཇལ་འཕྲད་གནང་རྒྱུ་རེད།

ཕྱི་ཚེས་ ༡༤ ཉིན་སྲིད་འཛིན་ཨོ་བྷ་མཆོག་གི་སློབ་སྟོན་པ་དང་མཐོ་རིམ་དཔོན་རིགས་གསུམ་བཞུགས་སྒར་ནས་༧གོང་ས་མཆོག་ལ་མཇལ་བའི་སྐབས་སུ། སྲིད་འཛིན་ཨོ་བྷ་མའི་སློབ་སྟོན་པ་ལྕམ་ ཝ་ལེ་རི་ ཇར་རེ་ཊི་ ལགས་ཀྱིས་ཞུས་དོན། སྲིད་འཛིན་ཨོ་བྷ་མ་མཆོག་གིས་བོད་མི་རིགས་ཀྱི་ཐུན་མོང་མ་ཡིན་པའི་ཆོས་ལུགས་དང་སྐད་ཡིག རིག་གཞུང་གི་ཤུལ་དངོས། བོད་མི་ཚོའི་འགྲོ་བ་མིའི་ཐོབ་ཐང་དང་མི་སེར་གྱི་རང་དབང་བཅས་ལ་སྲུང་སྐྱོབ་བྱེད་པར་མཐའ་གཅིག་ཏུ་རྒྱབ་སྐྱོར་གནང་གི་ཡིན་ཅེས་གསུངས་ཚུལ་ཞུས་ཡོད་པ་རེད། དེས་མི་ཚད་སྲིད་འཛིན་ཨོ་བྷ་མ་མཆོག་གིས། ༧གོང་ས་མཆོག་གིས་དབུ་མའི་ལམ་གྱི་དགོངས་གཞིའི་འོག་བོད་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འོག་ཏུ་ཚད་མཐོའི་རང་སྲིད་རང་སྐྱོང་འཐོབ་རེ་གནང་བཞིན་པར་ཡང་རྒྱབ་སྐྱོར་ཡོད་སྐོར་ཞུས་འདུག

སྐུ་སྒེར་ཡིག་ཚང་གི་དྲ་ཚིགས་ནང་དུ་བཀོད་པ་ལྟར་ན། ༧གོང་ས་མཆོག་གིས་བཙན་བྱོལ་བོད་མིའི་སྤྱི་སྙོམས་ཀྱི་གནས་ཚུལ་ཞུས་ཤིང་། རྒྱ་གར་གཞུང་དམངས་གཉིས་ཀྱི་སྐུ་དྲིན་ལ་བོད་མི་རྣམས་ཀྱིས་བཙན་བྱོལ་དུ་རང་གི་རིག་གཞུང་དང་ངོ་རྟགས་ཚུན་སྲུང་སྐྱོབ་དང་གོང་སྤེལ་གཏོང་ཐུབ་ཀྱིན་ཡོད་པའི་སྐོར་དང་། དེ་བཞིན་བོད་རྒྱའི་འབྲེལ་མོལ་གྱི་གནས་སྟངས་སྐོར་ཞུས་ཡོད་པ་མ་ཟད། སྔར་ལོ་ཕྱི་ཟླ་ ༡༠ པ་ནས ༡༡ པའི་བར་གྱི་འབྲེལ་མོལ་ཐེངས་བརྒྱད་པའི་སྐབས་སྐུ་ཚབ་རྣམ་པས་རྒྱ་ནག་གི་དཔོན་རིགས་ཚོར་ཚད་མཐོའི་རང་སྐྱོང་སྐོར་གྱི་ཡིག་ཆ་ཕུལ་བའི་སྐོར་གསུངས་ཡོད་པ་རེད།

ལྕམ་ ཇར་རེ་ཊི་ ལགས་ཀྱིས་ཕྱིར་ཞུས་དོན། ཨ་རིའི་གཞུང་གིས་བོད་ཀྱི་གནད་དོན་སེལ་ཐབས་སུ་རོགས་འདེགས་གང་ཡོང་ཞུ་རྒྱུ་ཡིན་ལ། ལྷག་དོན་དུ་ད་རེབ་ཕྱི་ཟླ་ ༡༡ པའི་ནང་དུ་སྲིད་འཛིན་ཨོ་བྷ་མ་མཆོག་གིས་ཐེངས་དང་པོར་རྒྱ་ནག་ལ་གཟིགས་སྐོར་གནང་བའི་སྐབས་འདིར་གང་ཐུབ་ཀྱི་གླེང་སློང་གནང་རྒྱུ་ཡིན་སྐོར་ཞུས་ཡོད་པ་རེད།

 ༧གོང་ས་མཆོག་གིས་སྲིད་འཛིན་ཨོ་བྷ་མར་ལམ་སྟོན་ཞུས་དོན། ཨ་རི་དང་རྒྱ་ནག་གཉིས་ཀྱི་བར་དུ་རྩ་དོན་རང་བཞིན་དང་བཟང་ཕྱོགས་ཀྱི་འབྲེལ་བ་འཛིན་དགོས་སྐོར་གསུངས་ཡོད་ལ། སྲིད་འཛིན་མཆོག་གིས་བོད་མི་རིགས་ཀྱི་སྐྱིད་སྡུག་ལ་ཐུགས་ཁུར་གནང་བཞིན་པ་དེར་སེམས་གཏིང་ནས་དགའ་མགུ་ཡོད་པ་དང་། ཁོང་གི་སྲིད་འཛིན་གྱི་ལས་ཁུར་རིང་ལ་བོད་མི་རིགས་ཀྱིས་རང་གི་དཀའ་རྙོག་འདི་སེལ་བར་དོན་དམ་གྱི་ཡར་རྒྱས་ཤིག་མཐོང་ཐུབ་པའི་རེ་བ་ཡོད་ཅེས་དང་། སྲིད་འཛིན་མཆོག་རྒྱ་ནག་ནས་ཕྱིར་ཕེབས་རྗེས་མཇལ་འཕྲད་ཡོང་རྒྱུར་རེ་སྒུག་གནང་ཡོད་ཚུལ་ཡང་གསུངས་ཡོད་པ་རེད།

དེ་བཞིན་༧གོང་ས་མཆོག་གིས་ནམ་ཀུན་ཐུགས་ཁུར་གནང་བཞིན་པའི་གནད་དོན་འགའ་ཤས་ཞུས་ཡོད་ལ། དེ་དག་གི་ཁོངས་སུ་གོ་ལ་རང་བཞིན་གྱི་རྩོད་རྙོག་དང་ཁོར་ཡུག་གི་གནད་དོན་སོགས་ཚུད་ཡོད་ལ། ཁོང་གིས་སྲིད་འཛིན་ཨོ་བྷ་མ་མཆོག་ལ་རེ་སྐུལ་གནང་དོན། སྲིད་འཛིན་མཆོག་གིས་མཉམ་ལས་དང་འབྲེལ་གཏུགས། གྲོས་མོལ་སོགས་ཀྱི་ལམ་ནས་ཕྱག་ལས་འདི་དག་མཇུག་སྐྱོང་ཡོང་བར་གཞེན་སྐུལ་ནན་ཏན་གྱིས་ཞུས་ཡོད་པ་རེད།

ཐེངས་འདིར་ཨ་རིའི་གཞུང་གིས་ཨ་རིའི་ཕྱི་སྲིད་ལས་ཁུངས་ཀྱི་དྲུང་གཞོན་ མ་རི་ཡ་ ཨོ་ཊེ་རོ་ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བར་དགའ་བསུ་ཞུས་ཡོད་པ་རེད།

༧གོང་ས་མཆོག་དང་སྲིད་འཛིན་ཨོ་བྷ་མ་རྣམ་གཉིས་ཟླ་འདིའི་ཟླ་མཇུག་དང་འཆར་ཟླའི་ཟླ་སྟོད་ཙམ་ལ་མཇལ་འཕྲད་གནང་རྒྱུའི་ཐུགས་འདུན་ཡོད་རུང་། ད་ཆ་དུས་ཚེས་ཕྱིར་འགྱངས་ཀྱིས་སྲིད་འཛིན་མཆོག་རྒྱ་ནག་ལ་ཕེབས་ཏེ་ཕྱིར་འཁོར་རྗེས་༧གོང་ས་མཆོག་ལ་མཇལ་འཕྲད་གནང་རྒྱུ་ཡིན་འདུག
༧གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་ལགས་ཀྱིས། ཁོང་གིས་ཕོ་བྲང་དཀར་པོའི་འབྲེལ་ཡོད་ལས་བྱེད་དང་ལྷན་དུ་སྲིད་འཛིན་དང་༧གོང་ས་མཆོག་གི་མཛལ་འཕྲད་ཀྱི་དུས་ཚེས་གཏན་འཁེལ་གནང་གི་ཡིན་ཅེས་གསུངས་ཡོད་པ་རེད།