བོད་ཕྲུག་དེའི་དྲི་བ། འཇམ་དབྱངས་བསྟན་འཛིན་ཤཱསྟྲིའ།

                              
འཇམ་དབྱངས་བསྟན་འཛིན་ཤཱསྟྲིའ།

སྔ་ལོ་ཕྱི་ཟླ་གསུམ་པའི་ནང་བོད་ནང་ཟིང་འཁྲུག་བྱུང་སྐབས་ང་གནས་སྡོད་བྱེད་སའི་ས་གནས་ཀྱི་ཨ་རིའི་བོད་མི་རྣམས་ཉིན་མོ་ལས་ཀའི་གུང་གསེང་ནམ་ཡིན་ལ་ལམ་གྱི་བཞི་མདོ་གང་སར་ངོ་རྒོལ་དང༌། མཚན་མོ་དྲ་རྒྱར་གནས་ཚུལ་ཇི་བྱུང་ལ་བལྟ་ཞིབ་དང་ཉན་ཏེ་བསྡད། ཕྱི་ཟླ་གསུམ་པའི་ནང་ཨ་རིའི་ལྷོ་ཕྱོགས་སུ་སྔར་དང་མི་འདྲ་བ་སྔ་དྲོ་གནམ་གཤིས་གྲང་མོ་བསྟན་ཅིང༌། ལམ་ཟུར་དུ་གངས་དང་ལྷགས་རླུངས་གྲང་མོ་རྒྱག་བཞིན་པའི་སྐབས་དེར། ངས་བུ་བསྟན་འཛིན་ལོ་ན་བཞི་དང་ཕྱེད་ལ་སོན་པ་དེ་སྔ་དྲོ་ཆུ་ཚོད་བརྒྱད་པའི་སྔོན་ལ་བུ་ཆུང་གི་ལག་པར་བོད་ཀྱི་རྒྱལ་དར་ཞིག་དང༌། ངོས་ཀྱི་ལག་པར་བོད་ལ་འགྲོ་བའི་མིའི་ཐོབ་ཐང་དགོས། ཞེས་དབྱིན་ཡིག་ཐོག་བྲིས་ཏེ་ལམ་གྱི་བཞི་མདོར་ལངས་ཏེ་སྡོད་སྐབས་ཨ་རི་བ་ཚོས་དོ་སྣང་ཆེན་པོ་བྱེད་ཀྱི་འདུག་ ཆུ་ཚོད་བརྒྱད་པའི་ཐོག་བསྟན་འཛིན་སློབ་གྲར་འབྱོར་དགོས་ཤིང༌། ངས་བསྟན་འཛིན་སློབ་གྲྭར་མ་བསྐྱལ་གོང་ཞོགས་པ་ནམ་གཤིས་གྲང་མོའི་སྐབས་ཐེངས་ཁ་ཤས་མི་འགྲོ་ཆེ་བའི་ལམ་གྱི་བཞི་མདོར་འཁྲིད་དེ་དེར་ལངས་ཏེ་བསྡད་པ་ཁོང་གི་འཛིན་གྲོགས་ཨ་རི་བ་ཆུང་ངུ་ཚོས་མོ་ཀྲའི་སྒེའུ་ཁུང་ནས་བསྟན་འཛིན་མཐོང་འདུག  ཨ་རི་བ་ཆུང་ངུ་དེ་ཚོས། བསྟན་འཛིན་ཁོ་ཞོགས་པ་སྔ་པོ་དེ་འདྲ་ལ་ལམ་ཟུར་དུ་ཅི་བྱེད། ཅེས་རང་ཉིད་ཀྱི་ཕ་མར་སྐད་ཆ་དྲིས་འདུག 

ངས་བསྟན་འཛིན་ཆུ་ཚོད་བརྒྱད་པའི་ཐོག་སློབ་གྲར་བསྐྱལ་རྗེས་ཁོང་གི་འཛིན་གྲོགས་ཚོས། ཁྱེད་ཉིན་ལྟར་ཞོགས་པ་ནམ་གཤིས་གྲང་མོ་འདི་འདྲ་ལ་ཅི་བྱེད། ཅེས་བསྟན་འཛིན་ལ་སྐད་ཆའང་དྲིས་འདུག  སློབ་ཕྲུག་ཆུང་ཆུང་དེ་ཚོའི་ཕ་མ་དང་དགེ་རྒན་ཚོས། བསྟན་འཛིན་བོད་པ་རེད། དེང་སང་ཁོའི་ལུང་པར་རྒྱ་དམར་གྱིས་བོད་མིར་བརྙས་བཅོས་བྱས་པར་བོད་མི་ཚོ་སེམས་ཀྱིས་མ་བཟོད་པར་ངོ་རྒོལ་བྱེད་སྐབས་ཁོང་ཚོར་ཉེས་བརྡུང་དང་བཙོན་འཇུག་བྱེད་བཞིན་པ་རེད། དེ་འདྲ་སོང་ཙང༌། བསྟན་འཛིན་དང་ཁོང་གི་པཱ་ལགས་སོ་སོའི་ལུང་པར་རང་དབང་དགོས། ང་ཚོ་ལ་རོགས་པ་བྱེད་རོགས། ཞེས་ཨ་རིའི་མི་མང་ལ་འབོད་བསྐུལ་ཞུ་བཞིན་ཡོད་པ་རེད། ཅེས་འགྲེལ་བཤད་རྒྱབས་འདུག 

བསྟན་འཛིན་ཁོས་ཞོགས་པ་ཞིག ང་སྔ་དྲོ་རྟག་པར་དེ་ལྟར་མི་འགྲོ།  ནམ་གཤིས་དཔེ་གྲང་མོ་འདུག མ་གཞི་ནས་ང་ཞོགས་པ་རྟག་པར་ཁྱེད་དང་མཉམ་དུ་ལམ་ཟུར་དུ་རྒྱལ་དར་འཁྱེར་ནས་ལངས་ཏེ་བསྡད་ན། ངའི་གྲོགས་པོ་ཚོས་ཁྱེད་ལ་ལུང་པ་མེད་པ་རེད། ཅེས་བརྙས་བཅོས་བྱེད་ཀྱི་འདུག་ཟེར། དེ་ནས་བཟུང་ངས་བསྟན་འཛིན་ཞོགས་པ་འཁྲིད་འགྱུར་འབད་རྩོལ་བྱས་མེད། ད་ལོ་ཁོ་ལོ་ན་ལྔ་ལ་སོན་པ་དང༌། ཁོའི་དྲི་བ་དང་པོར། ཨ་རི་ང་ཚོའི་ལུང་པ་མ་རེད་པས། ཅེས་དྲི་བ་བཏོན། དེ་རྗེས་བོད་ཀྱི་གནས་སྟངས་སྐོར་གློག་བརྙན་ཁ་ཤས་བལྟས་རྗེས། ད་ང་ཚོ་བོད་ལ་ག་དུས་ལོག་གི་རེད།  རྒྱ་མིས་ང་ཚོ་བརྡུང་གི་མ་རེད་དམ། ཅེས་དྲིས་ཏེ་གློག་བརྙན་ནང་བོད་མི་ཚོ་ཉེས་བརྡུང་བཟེད་པ་མཐོང་སྐབས་ཁོ་ཞེད་སྣང་བྱེད་ཀྱི་འདུག

འདི་ལོ་ཕྱི་ཟླ་གསུམ་པའི་ནང་ང་དང་ནང་མི་རྣམས་ཨ་རིའི་རྒྱལ་ས་ཝ་ཤིང་ཀྲོན་ཏུ་གྲོས་ཚོགས་འཐུས་མིར་བོད་དོན་རྒྱབ་སྐྱོར་ཡོང་ཐབས་འབོད་བསྐུལ་ཞུ་བར་འགྲོ་སྐབས། དགོང་དྲོ་ཞིག་རྒྱ་མིའི་གྲོང་ཁྱེར་དུ་བསྐྱོད། ཕྲུ་གུ་ཆུང་ཆུང་དེར། དོ་དགོང་ཁ་ལག་བཟའ་རུ་རྒྱ་མིའི་ཟ་ཁང་ཞིག་ཏུ་འགྲོ། ཞེས་བཤད་པར། ཁོས་ཁོང་ཁྲོ་དང་བཅས་ཏེ། ང་རྒྱ་མིའི་ཟ་ཁང་དུ་ནམ་ཡང་མི་འགྲོ། ཞེས་ངོ་རྒོལ་མཐའ་གཅིག་ཏུ་བྱས་ཏེ་ང་ཚོ་དགོང་དྲོ་ཟ་ཁང་བརྗེ་པོ་བརྒྱབ་དགོས་བྱུང༌།

བདུན་ཕྲག་གཅིག་རྗེས་རང་ཁྱིམ་དུ་འབྱོར་ཏེ་བསྟན་འཛིན་སློབ་གྲར་བསྐྱོད་སྐབས། ཁོས་རང་ཉིད་ཀྱི་འཛིན་གྲྭའི་སློབ་ཆུང་རྣམས་ལ་དུས་ཚོད་ནམ་བྱུང་ལ་བོད་དང་རྒྱ་ནག་སྐོར་ཤོད་ཀྱི་ཡོད་འདུག་པས་ཉིན་གཅིག་ཁོའི་དགེ་རྒན་དེས་ཁོས་དེ་ལྟར་ཉིན་ལྟར་བརྗོད་ན། རྒྱ་མིའི་སློབ་ཕྲུག་ཆུང་ཆུང་ཚོའི་སེམས་པར་ཕོག་ཉེན་འདུག་པས་གཟབ་གཟབ་བྱེད་དགོས་པའི་ཉེན་བརྡ་བཏང་བྱུང༌། ཕྲུ་གུ་ཆུང་ཆུང་དེས་དབུ་མའི་ལམ་མི་ཤེས་ལ། རང་བཙན་ཡང་མི་ཤེས། ཡིན་ནའང་བོད་ཞེན་ཁོ་ནས་ཁོའི་མི་ཚེའི་ནང་གི་རང་ཉིད་ཀྱི་དགྲར་ཁ་གཏད་བཅོག་རྒྱུ་འགོ་ཚུགས་འདུག

རང་བཙན་སེམས་མཆོག་རིན་པོ་ཆེ། མ་སྐྱེས་པ་རྣམས་སྐྱེས་འགྱུར་ཅིག
སྐྱེས་པ་ཉམས་པ་མེད་པ་ཡང༌། གོང་ནས་གོང་དུ་འཕེལ་བར་ཤོག