རིགས་འགར་སྟངས་ཤིག

རིགས་ཞེན་དཀར་བ་ག་བུར་མདངས་ལ་ཁུ།།
ལ་རྒྱ་ཟབ་པ་མཐའ་ཡས་རྒྱ་མཚོའི་ཟླ།།
ཕ་སྐད་སྙན་མོ་གླུ་མ་ལྷ་སྐྱིད་འདྲ།།
དེ་འདྲའི་གྲོགས་ཤིག་ཡོད་པའི་དུས་བབས་སྨོན།།

སྒོམ་སྡེ་དོན་གྲུབ་རྒྱལ་མཚན་ལགས། ཉིད་ཀྱིས་བདག་གིས་དྲིས་པའི་ལན་དང་། གོ་ནོར་ཐེབས་འདུག་ཟེར་བ་དེར་རང་གིས་རང་ལ་ངོ་གནོང་མི་དགོས་པའི་གསུངས་དྲོན་མོ་དེ་དག་བདག་གིས་ཞིབ་དུ་བཀླགས་ཟིན་པ་ཡིན་ལ། ཉིད་ཀྱིས་བསམ་ཚུལ་དེ་དག་ལ་ཡང་བདག་གིས་གཅིག་མཚུངས་ཀྱིས་རྒྱབ་སྐྱོར་དང་མོས་མཐུན་ཡོད་ལགས། སྐུ་ཉིད་ཀྱིས་དཀའ་ཚེགས་ལ་མ་འཛེམ་པར་དམིགས་བསལ་གྱིས་དུས་ཚོད་བཏང་དེ་བདག་ལ་ལན་གསལ་དག་གཅིག་གནངས་པ་དེ་ནི་དངོས་ནས་སེམས་གཏིང་ནས་དགའ་ནི་ཡིན་ལགས། རྗེས་ཕྱོགས་ཀྱང་བསམ་ཚུལ་ལྷུག་པོར་གནང་རྒྱུར་རེ་བ་ཡོད་ལགས།

དྲ་གྲོགས་ལགས་ང་གོ་ནོར་ཐེབས་པར་སྙིང་ཐག་པ་ནས་དགོངས་སེལ་ཞུ། ངས་རང་ཉིད་གོ་ནོར་ཐེབས་ཡོད་པ་མཐོང་དུས་ད་གཟོད་ངས་ཁྱེད་ཀྱི་རྩོམ་དེ་ཡག་པོ་བཀླགས་ཐུབ་མེད་པའི་ཚོར་སྣང་ཞིག་སྐྱེས་སོང་།
སློབ་སྦྱོང་ཆུ་ཚད་ཀྱི་ཆ་ནས་བཤད་ན་ང་ནི་རང་གི་རང་ལ་གདེངས་ཚོད་གཏན་ནས་མེད་མཁན་ཞིག་ཡིན། ཡིན་ནའང་ངས་རང་གིས་གང་བསམ་པ་དེ་བཤད་རྐྱང་བྱེད་ཀྱིན་ཡོད་ལ་ངས་བཤད་པ་དེར་ནོར་འཁྲུག་མི་ཉུང་བ་ཡོད་པའང་རྟག་པར་དྲན་གྱི་ཡོད། ངས་གང་བཤད་པ་དེར་གཞན་ཞིག་གིས་ལྷག་བསམ་གྱི་སྒོ་ནས་སྐྱོན་འཛུག་བྱས་འོང་ན་ངས་དེ་ལ་སྙིང་ནས་དགའ་བའི་ཡི་རང་བྱེད་ཀྱི་ཡོད།
དེ་ནི་ངའི་གཤིས་ཀ་ཡིན། རིགས་ཞེན། ངར་འཛིན། མི་རིགས་རང་ལུགས་ཀྱི་ལྟ་བ་་་་་་་འོ་རེད་འདི་གསུམ་ལ་ཁྱད་པར་ཆེན་པོ་མཐོང་གི ངར་འཛིན་ནི་གཞན་འཛིན་ལས་ཐ་དད་པའི་འཛིན་སྟངས་ངར་ལྷང་ངེ་བ་ཞིག་ཡིན་ལ་རིགས་ཞེན་ནི་རང་ཉིད་གཙོར་བྱས་པའི་རང་ཕྱོགས་ཀྱི་མི་དང་བྱ་དངོས་གང་ཡིན་ཡང་དེ་ལ་འཁྲེང་བའི་འཁྲེང་སེམས་ཤིག་རེད་། མི་རིགས་རང་གི་ལྟ་བ་ཟེར་ན་ཕལ་ཆེར་མི་རིགས་རང་ཉིད་ཀྱི་ཐུན་མིན་རིག་གནས་ཀྱིས་མི་རིགས་རང་ཉིད་ཐུན་མོངས་ལ་བཞག་པའི་བག་ཆགས་སམ་བསམ་བློའི་འཁྱེར་སོ་ཞིག་ལ་གོ་བ་རེད་བསམ། ད་དུང་ངར་འཛིན་དང་ཁྱོད་འཛིན་བལྟོས་གྲུབ་བམ་རྟེན་འབྱུང་ཡིན་པར་བཤད་དུས་ཁྱེད་ཀྱིས་ཁ་ཐུག་ཆོས་ཕྱོགས་ལ་གོ་བ་བླངས་སོང་འདུག རྟེན་འབྱུང་ངམ་བལྟོས་གྲུབ་ཀྱི་རྣམ་གཞག་ནི་ཆོས་ཕྱོགས་ཁོ་ནའི་སྐད་ཆ་གཏན་ནས་མ་རེད་སྙམ། ཆོས་ཐམས་ཅད་རྟེན་ཅིང་འབྲེལ་བ་འབྱུང་ཡིན་པའི་དབང་གིས་རྣམ་གཞག་འདི་ནི་ཆོས་དང་འཇིག་རྟེན་གང་གི་ཆ་ནས་བཤད་ཀྱང་ཧ་ཅང་མཁོ་བའི་རྣམ་གཞག་ཅིག་རེད་། ཁྱེད་ཀྱིས་དོ་སྣང་བྱུང་སོང་ངམ། མི་མང་པོ་ཞིག་གིས་དབུ་མའི་ལམ་ཞེས་བཤད་དུས་ཆོས་ཕྱོགས་ཀྱི་སྐད་ཆ་ཞིག་ལ་ལམ་སང་གོ་འགྲོ་གི་འདུག རེད་དབུ་མའི་ལམ་གྱི་རྣམ་གཞག་དང་པོར་ནང་པའི་ལྟ་གྲུབ་ཀྱི་ནང་བཤད་ཡོང་བ་རེད་། འོན་ཀྱང་དེའི་དོན་ལ་བསམས་ན་ད་གཟོད་རྣམ་གཞག་འདིས་ཆོས་དང་འཇིག་རྟེན་གང་གི་ཆ་ལའང་ཤིན་ཏུ་མཁོ་བ་ཞིག་རེད་། ཁྱེད་ཀྱིས་མཁྱེན་གསལ་རེད་། དབུ་མ་ཞེས་པའི་གོ་དོན་ནི་དབུས་མའམ་དཀྱིལ་མ་རེད་། འོན་ན་དབུས་མའམ་དཀྱིལ་མས་ཆོས་དང་འཇིག་རྟེན་གཉིས་ཆར་ཇི་ལྟར་མཁོ་བ་རེད་ཟེར་ན་ཆོས་ཕྱོགས་ནས་བཤད་ན་མཐའ་གང་དུའང་མི་འཛིན་པར་དབུ་མའི་ལྟ་བ་རྒྱུད་ལ་སྐྱེ་དགོས་ལ། ང་ཚོ་འཇིག་རྟེན་པའི་ཆ་ནས་བཤད་ན་དབུ་མའི་ལྟ་བ་ནི་རང་གཞན་གཉིས་ཀར་གྱོང་མེད་པའི་བྱ་སྤྱོད་ཅིག་ལ་གོ་བས་དེ་ལྟ་བུའི་བྱ་སྤྱོད་ནི་འཇིག་རྟེན་ལུགས་དང་མཐུན་པའི་བྱ་སྤྱོད་ཡང་དག་པ་ཞིག་ཡིན་ཙང་དབུ་མ་ནི་འཇིག་རྟེན་ལ་ཡང་མཁོ་བ་རེད་། དེ་དང་གཅིག་མཚུངས་ལྟོས་གྲུབ་བམ་རྟེན་འབྱུང་གི་ལྟ་བ་དང་དེའི་རྣམ་གཞག་རྣམས་ཀྱང་འཇིག་རྟེན་འབྲལ་ཐབས་མེད་པ་ཞིག་རེད་། དེས་ན་རྟེན་འབྱུང་གི་རྣམ་གཞག་བྱས་པ་ཙམ་གྱིས་ངར་འཛིན་མི་དགོས་པར་ཁས་ལེན་ནི་མི་དགོས་པར་སྙམ་མོ། དེ་དག་ནི་ངས་ལྟ་ཚུལ་ཁྱེད་ཞུས་པ་ཙམ་ལས་ཡང་དག་ཅིག་ཡིན་པར་ང་ལའང་གདེངས་ཚོད་མེད། ངོ་མ་ཡིན།

བོད། ཤ་ཁྲག་རུས་གསུམ་ལགས། ངོ་ཚོས་གང་ཞིག་གླེང་ན་དགག་སྒྲུབ་ཀྱི་ཕྱོགས་གཉིས་ནས་གླེང་ཆོག་བསམ། དཔེར་ན་རིགས་ཞེན་ལྟ་བུ་ལ་ཆ་མཚོན་ན་ཁྱེད་ཀྱིས་དེའི་སྐྱོན་ཕྱོགས་ནས་གླེང་བཞིན་འདུག་ལ་ངས་ནི་དེའི་ཡོན་ཏན་གྱི་ཕྱོགས་ནས་གླེང་གི་ཡོད། དེ་ནི་འུ་གཉིས་ཀྱི་ལྟ་ཚུལ་མི་མཐུན་པ་ཙམ་རེད། ངས་ནི་འཇིག་རྟེན་ལུགས་ཀྱི་ཆ་ནས་བཤད་ན་ངར་འཛིན་དགོས་པར་འདོད་ཅིང་ཁྱེད་ཀྱིས་ནི་ཆོས་དང་འཇིག་རྟེན་གང་གི་ཆ་ནས་ཀྱང་དེ་རྩ་ནས་མི་དགོས་པར་འདོད་པ་དེ་ནི་འུ་གཉིས་ལྟ་ཚུལ་མི་མཐུན་ཡོང་སའི་གཞི་རེད། ནང་པའི་ལྟ་བའི་ཆ་ནས་བཤད་ན་ཉེས་པ་ཐམས་ཅད་ཀྱི་རྩ་བ་ནི་ངར་འཛིན་ཡིན་པར་འདོད་ཀྱང་འཇིག་རྟེན་སྲིད་ལུགས་ཀྱི་ཐད་ནས་གླེང་ན་ངར་འཛིན་ནི་འཕེལ་འགྱུར་གྱི་སྒུལ་ཤུགས་ཤིག་རེད་ཅེས་བཤད་ན་མི་ཆོག་རྒྱུ་གཏན་ནས་མེད། དཔལ་མགོན་འཕགས་པ་ཀླུ་སྒྲུབ་ཀྱིས་ཆོས་ཐམས་ཅད་རྟེན་འབྱུང་ཁོར་ནར་གསུངས་པ་ལྟར་ངར་འཛིན་དང་ཁྱོད་འཛིན་ཡང་གཅིག་ལ་གཅིག་རྟེན་རེད། ངར་འཛིན་མེད་ན་ཁྱོད་འཛིན་མེད་པ་ནི་རྟེན་འབྲེལ་གྱི་འགྲོ་སྟངས་ཤིག་རེད། ངས་ངར་འཛིན་དགོས་པར་འདོད་པ་ནི་གོང་དུ་བཤད་པ་ལྟར་དེ་ནི་སྒུལ་ཤུགས་ཐམས་ཅད་ཀྱི་རྩ་བར་འདོད་པས་སོ། ཁྱེད་ཀྱིིས་མི་དགོས་པར་འདོད་ནི་དེ་ཉིད་ཉེས་པ་ཐམས་ཅད་ཀྱི་བྱེད་པོར་མཐོང་བས་ཅི་ལ་མིན། ངས་གོང་དུ་བོད་པ་ཚང་རྗེས་ལུས་ཐེབས་པའི་རྒྱུ་རྐྱེན་ནི་རིགས་ཞེན་མེད་པའི་དབང་གིས་རེད་ཅེས་བཤད་པ་ཡིན། ཡ་ད་འོ་ན་བོད་པ་ཚང་ལ་རིགས་ཞེན་གཏན་ནས་མེད་པ་རེད་དམ་ཞེ་ན་དེ་ནི་ག་ལ་ཡིན་ཏེ་ང་ཚོ་བོད་པ་ཚང་ལ་རིགས་ཞེན་ཡོད་ཀི ངས་བོད་པ་ཚང་ལ་རིགས་ ཞེན་མེད་ཅེས་པའི་རིགས་ཞེན་དེ་ནི་རིགས་ཞེན་བྱེ་བྲག་པ་ཞིག་ཏེ་དེ་ནི་འཕེལ་འགྱུར་གྱི་སྒུལ་ཤུགས་སུ་གྱུར་པའི་རིགས་ཞེན་དེ་མེད་པ་རེད་ཅེས་བཤད་པ་ཡིན། ངར་འཛིན་གྱིས་རིགས་ཞེན་བསྐྱེད་ཅིང་རིགས་ཞེན་གྱིས་འགྲན་རྩོད་སློང་བར་བྱེད། འགྲན་རྩོད་ཀྱིས་ཧུར་བརྩོན་ལ་སྐུལ་འདེད་བྱེད་ཅིང་ཧུར་བརྩོན་ནི་འཕེལ་རྒྱས་ཐམས་ཅད་ཀྱི་སྐྱེད་མ་ལྟ་བུ་རེད། ངས་དེ་ལྟར་དུ་འདོད་པས་ན་ད་གཟོད་འཇིག་རྟེན་པའི་ཕྱོགས་ནས་གླེང་ན་ངར་འཛིན་ནི་ཧ་ཅང་མེད་དུ་མི་རུང་བ་ཞིག་ཏུ་མཐོང་།

རི་བོང་ལགས། སྐུ་ཉིད་ཀྱིས་ཞོགས་དུང་སོགས་ཀྱི་རྗེས་འབྲང་ཡོངས་ཀྱིས་རིགས་ཞེན་འཛིན་སྟངས་ལ་ལྟ་བའི་མིག་དང་། རིགས་ཞེན་ལ་བཅིངས་པའི་ཆོས་ལུགས་ལ་ལྟ་ཚུལ་གྱི་མིག་དེ་གཉིས་ཁ་ཁར་ཆགས་པ་ལྟ་བུ་ཞིག་ཚོར་གྱི་མི་འདུག་གམ་ལགས།

སྐར་ཁྲི་བཙན་ལགས། མི་སུ་ཞིག་ཡིན་ན་ཡང་། རིགས་ཞེན་དགོས་པ་ཡིན་ལ་རིགས་ཞེན་དེ་ཡང་རང་རིགས་ཁོོ་ན་རྒྱལ་བའི་དོན་ཞིག་ལ་ངོས་འཛིན་བྱེད་པ་ནི་གཏན་ནས་འགྲིག་གི་མེད་པ་དེ་ནི་རྒྱའི་སྲིད་གཞུང་གི་གཙོ་བའི་དེང་སང་གི་གནམ་འོག་གི་སྲིད་འཛིན་དག་ལ་ཞིབ་གཟིགས་དང་ལན་ཞིག་རེག་ངེས་ཡིན་ལགས།

དྲ་གྲོགས་རི་བོང་ལགས། ཁྱོད་བསམ་ཆར་བཤད་པར་ཐུགས་རྗེ་ཆེ། ངས་བལྟས་ན་ཁྱོད་ཀྱིས་ནང་དོན་རིག་པའི་བརྗོད་དགག་བྱ་གཙོ་བོ་ང་དེ་གཏན་ནས་ངོས་འཛིན་ཐུབ་མི་འདུག་ལ་ནང་དོན་རིག་པར་གཏན་ནས་ལྟ་ཀློག་བྱེད་མྱོང་ཡོད་ས་མ་རེད། སྐུ་ཞབས་ཞོགས་དུང་ལགས་ཀྱི་རྗེས་འབྲང་རྣམས་ཀྱིས་གླེན་བཤད་བླ་མེད་རེ་བརྒྱབས་ཞེས་པར་གཞིགས་ན་ཁྱོད་ཀྱིས་སྐུ་ཞབས་ཞོགས་སོགས་ཀྱིས་ཅི་ཞིག་བཤད་ཡོད་དང་ཁོང་ཚོའི་དོན་ངོ་མ་ལྟ་བ་དེ་གང་ཡིན་ཁྱོད་ཀྱིས་ད་དུང་གོ་ཚོས་མི་འདུག
ངས་བསམས་ཁྱོད་རང་དངོས་གནས་དུངས་ཞེན་གྱི་དབང་ཤོར་འགྲོ་གི་འདུག
དུངས་ཞེན་གྱི་དབང་དུ་ཤོར་བའི་མི་བུ་ཞིག་ལ་ཆ་མཚོན་ན་ཕྱོགས་གཞན་དེར་བལྟ་བའི་བློ་མིག་ཡོངས་གྲིབ་ཚར་བ་རེད། དེས་ན་ཁྱོད་རང་དུངས་ཞེན་གྱི་དབང་དུ་མ་ཤོར་བ་བྱ་རོགས་ཞེས་འབོད་སྐུལ་ཞུ་བ་ཡིན་ལགས།

ཡང་གཅིག་བཤད་ན་རིགས་ཞེན་མེད་པའི་མི་ཚོ་རང་གི་སྤུན་ཟླ་ཚོའི་གྲལ་ནས་རང་བཞིན་འབུད་ཀྱི་འདུག ཆོས་ཕྱྱོགས་ནས་བཤད་ན་ངར་འཛིན་ནི་འཁོར་བའི་རྩ་བ་རེད་ཀྱང་འཇིག་རྟེན་གྱི་ཕྱོགས་ནས་གླེང་ན་ངར་འཛིན་ནི་ཡོད་དགོས་ངེས་ཤིག་རེད་སྙམ། གང་ལ་ཞེ་ན་ངར་འཛིན་མེད་ན་ཁྱོད་འཛིན་ཡང་མེད་པས་དེ་ལྟ་བུའི་འཛིན་པ་གང་ཡང་མེད་འཇིག་རྟེན་ན་འགྲན་རྩོད་མེད་ལ། འགྲན་རྩོད་མེད་ན་འཕེལ་འགྱུར་གྱི་སྒུལ་ཤུགས་ནི་མེད་ཚར་ནི་རེད། འཕེལ་འགྱུར་གྱི་སྒུལ་ཤུགས་མེད་ན་ནམ་ཡང་རྗེས་ལུས་རེད་དཔེར་ང་ཚོ་བོད་པ་ཚང་བཞིན། དེས་ན་ང་ཚོར་རིགས་ཞེན་དགོས། རིགས་ཞེན་ཡོད་ན་འཇིག་རྟེན་ན་འགྲན་རྩོད་ཡོད་ལ་འགྲན་རྩོད་ལ་ཐོབ་ཤོར་ཡོད་པས་ད་གཟོད་འཇིག་རྟེན་ལ་བྲོ་བ་ཡོད།

ཧཧཧཧ་འོ་ཙམ་ཞིག་རེད། གུང་སེང་སྐྱིད་པོ་ཞིག་ཡོང་བར་སྨོན།