དབོན་ཞང་རྡོ་རིང་ཡི་གེ་ནང་། ཆིག་སྒྲིལ་གྱི་ཚིག་དེ་ཐེངས་མང་པོར་བེད་སྤྱོད་གཏང་འདུག འཕྲུལ་གྱི་ལྷ་བཙན་པོ་ཁྲི་སྲུང་བཙན་དང་། རྒྱ་རྗེ་ཐེ་ཙུང་ཧེའུ་ཏིག་ཧྭང་ཏེ་གཉིས། ཆབ་སྲིད་གཅིག་ཏུ་མོལ་ཏེ། ཞེས་བཀོད་ཡོད། སྐབས་དེར་ཆིག་སྒྲིལ་ཟེར་བ་དེ་རང་ག་བ་ཞིག་མ་རེད། ཆབ་སྲིད་ཀྱི་ཆིག་སྒྲིལ་རེད། ཡང་། བོད་རྒྱ་གཉིས་རབས་ཁྲིར་བདེ་ཞིང་སྐྱིད་པའི་མཇལ་དུམ་ཆེན་པོ་མཛད་དེ། ཞེས་པ་དེ་མི་རབས་ཁྲི་ཞེས་པའི་དོན་རེད། ངས་བཙན་པོ་ཁྲི་རལ་བ་ཅན་བཞིན་མི་རབས་ཁྲི་ཕྲག་ལབ་རྒྱུ་བྱུང་མ་སོང་མོད། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག་ཅེས་ལབ་པ་ཡིན། ཞེས་བཀའ་བློན་ཁྲི་པས་གསུངས་ཡོད།
བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་ཉེ་ཆར་སུད་སིའི་རྒྱལ་ས་ཇི་ནེ་ཝའི་རྒྱལ་སྤྱིའི་བོད་རྒྱ་ལྷན་ཚོགས་སྟེང་བསྩལ་བའི་གསུང་བཤད་ནང་། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག ཅེས་གསུངས་པ་དེར་སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྟེང་། གྲོས་ཚོགས་འཐུས་མིས་དོགས་འདྲི་ཞུས་པའི་ལན་དུ། ཕྱི་ཚེས་ ༡༧ ཉིན་བཀའ་ཁྲི་མཆོག་གིས་ལན་འདེབས་གནང་དོན། བཀའ་བློན་ཁྲི་པས་ཇི་ནེ་ཝའི་རྒྱལ་སྤྱིའི་བོད་རྒྱ་ལྷན་ཚོགས་སྟེང་། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག་ཅེས་ལབ་ཡོད་ལ། ལབ་པ་ཙམ་དུ་མ་ཟད་ཡིག་ཐོག་ལའང་བྲིས་ཡོད། སྐད་ཆ་དེ་བཤད་སྐབས་བོད་རྒྱ་མི་རིགས་གཉིས་ཀྱི་ཚོགས་ཞུགས་པ་ཚང་མ་དང་གསར་འགོད་པ་བཅས་ཡོད་ཡོད་པ་མ་ཟད། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་གི་གསེར་ཞལ་དྲོན་མོ་ཡོད་ས་ནས་ལབ་པ་ཡིན་མ་གཏོགས། ཁུག་ཁུག་ཀྱོག་ཀྱོག་ཅིག་ནས་ལྐོག་ལྐོག་སིལ་སིལ་གྱིས་ལབ་བཞག་པ་ཞིག སྤྱི་འཐུས་ཚོས་བརྙེད་ཡོང་བ་དེ་འདྲ་མ་རེད། རྒྱ་གྲགས་བོད་གྲགས་ཀྱི་སྐད་ཆ་ཞིག་རེད། ཅེས་དང་།
བོད་རྒྱ་ལྷན་ཚོགས་སྟེང་ངས་དེ་ལྟར་ལབ་དགོས་པའི་རྒྱུ་མཚན་གང་ཡིན་ཟེར་ན། བོད་རྒྱ་མི་རིགས་གཉིས་པོ་དེ་ཆིག་སྒྲིལ་བྱུང་བ་ཡིན་ན། བོད་ས་ཡོངས་རྫོགས་རྒྱ་མིས་ཁེངས་ནས་འདུག་དགོས་པ་རེད་ཟེར་པའི་སྐད་ཆ་མ་རེད། ཆིག་སྒྲིལ་ཟེར་བའི་ཚིག་དེ་མི་འགྲིག་པའི་རྒྱུ་མཚན་ལ། བཀུར་འོས་སྤྱི་འཐུས་རྣམ་པ་ཚོས་ཐུགས་སྤོབས་ཆེན་པོའི་ཐོག་ནས་རྒྱ་མི་ཡོང་དུ་འཇུག་རྒྱུ་ཡོད་པ་མ་རེད། རྒྱ་མི་སྡོད་དུ་འཇུག་རྒྱུ་ཡོད་པ་མ་རེད། རྒྱ་མི་ལ་ཁང་པ་གཡར་རྒྱུ་ཡོད་པ་མ་རེད། ཅེས་བཀའ་གནང་གིན་ཡོད་གསུངས་སོང་། དེ་བཀའ་གནང་དགོས་པ་ཞིག་རེད། ང་ཚོས་ཀྱང་ལབ་ཀྱིན་ཡོད། ང་ཚོས་གཙོ་བོ་རྒྱལ་སྤྱིའི་ནང་གང་ཞིག་ལབ་ཀྱིན་ཡོད་ཟེར་ན། མི་འབོར་གྱི་གནས་བབས་ལ་འགྱུར་བ་གཏོང་དགོས་ཀྱིན་འདུག མི་འབོར་གྱི་གནས་བབས་ལ་འགྱུར་བ་མ་བཏང་ན། སྐུལ་སློང་ཡོད་མེད་ཇི་ལྟར་ཡང་ལེགས་བྱང་བརྡབ་གསིག་གི་གནས་སྟངས་ཆགས་ཀྱིན་ཡོད། མི་འབོར་གྱི་ཐོག་ནས་ལེགས་བྱང་ལ་བརྡབ་གསིག་ཆགས་ཀྱིན་ཡོད། དེ་འགྲིག་གིན་མི་འདུག་ཅེས་དུས་རྒྱུན་བཤད་ཀྱིན་ཡོད། ཅེས་གསུངས་བྱུང་།
བཀའ་ཁྲི་མཆོག་གིས་མཱར་ཁི་སི་ལེ་ཉེན་རིང་ལུགས་ལས་ཆིག་སྒྲིལ་གྱི་བསྟན་དོན་ངོ་སྤྲོད་གནང་དོན། བོད་རྒྱ་ཆིག་སྒྲིལ་ཡོང་རྒྱུར་འདྲ་མཉམ་ཡོང་དགོས་ཀྱིན་ཡོད། མཱ་ཁི་སི་ལེ་ཉེན་གྱི་ལྟ་གྲུབ་ནང་། ཆིག་སྒྲིལ་དེ་འདྲ་མཉམ་ཀྱི་སྔོན་འགྲོ་ཡིན། འདྲ་མཉམ་མེད་ན་ཆིག་སྒྲིལ་ཡོང་ཐབས་མེད་ཟེར་གྱིན་ཡོད། ང་ཚོས་ཆིག་སྒྲིལ་ལབ་སྐབས། ཆིག་སྒྲིལ་དང་མཉམ་དུ་འདྲེས་བསྡད་པའི་དོན་དག་གཅིག་འདྲ་མཉམ་དེ་རེད། དེར་བརྟེན། བོད་རྒྱ་མི་རིགས་འདྲ་མཉམ་དང་བོད་རྒྱ་མི་རིགས་ཆིག་སྒྲིལ་ཡོང་དགོས་པ་དེ་གལ་ཆེན་པོ་རེད་བསམ་ཡོད། བོད་རྒྱ་མི་རིགས་ཆིག་སྒྲིལ་ཡོང་བ་ཡིན་ན། ད་གཟོད་བཀུར་འོས་སྤྱི་འཐུས་ཤིག་གིས་ཡིག་རྙིང་ལུང་འདྲེན་བྱས་ཏེ། རྒྱ་རྒྱ་ཡུལ་དུ་སྐྱིད། བོད་བོད་ཡུལ་ན་སྐྱིད། ཅེས་པའི་བསམ་ཚུལ་བཤད་པ་དེའི་གནས་བབ་གཞི་ནས་ཡོང་ཐུབ་པ་ཞིག་རེད། སྐབས་དེར་རྒྱ་ཡུལ་ནས་རྒྱ་མི་རིགས་འདུག་གི་རེད་ལ། བོད་ཡུལ་ནས་བོད་མི་རིགས་འདུག་གི་རེད། ཅེས་གསུངས།
བཀའ་བློན་ཁྲི་པ་མཆོག་གིས་སྔར་སྤྱི་ལོའི་དུས་རབས་བརྒྱད་པའི་སྐབས་བོད་རྒྱའི་བར་བཞེངས་པའི་ཆིངས་དུམ་ཆེན་པོའི་རྡོ་རིང་གི་ཡི་གེ་དང་སྦྱར་ཏེ། ཆིག་སྒྲིལ་ཞེས་པའི་ཡི་གེ་དེར་འགྲེལ་བཤད་སྐྱོན་དོན། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག ཅེས་པ་དེ་ནོར་འཁྲུལ་ཆེན་པོ་ཡིན་པའི་བསམ་ཚུལ་འཛིན་མཁན་དང་། རྒྱ་རྒྱ་ཡུལ་ན་སྐྱིད། བོད་བོད་ཡུལ་ན་སྐྱིད། ཅེས་ལུང་འདྲེན་བྱས་པའི་ཐང་བོད་དབོན་ཞང་གཉིས་མཇལ་དུམ་མཛད་པའི་རྡོ་རིང་ཡི་གེ་ནང་། ཆིག་སྒྲིལ་གྱི་ཚིག་དེ་ཐེངས་མང་པོར་བེད་སྤྱོད་གཏང་འདུག འཕྲུལ་གྱི་ལྷ་བཙན་པོ་ཁྲི་སྲུང་བཙན་དང་། རྒྱ་རྗེ་ཐེ་ཙུང་ཧེའུ་ཏིག་ཧྭང་ཏེ་གཉིས། ཆབ་སྲིད་གཅིག་ཏུ་མོལ་ཏེ། ཞེས་བཀོད་ཡོད། སྐབས་དེའི་ཆིག་སྒྲིལ་ཟེར་བ་དེ་རང་ག་བ་ཞིག་མ་རེད། ཆབ་སྲིད་ཀྱི་ཆིག་སྒྲིལ་རེད། དེ་བཞིན། བོད་རྒྱ་གཉིས་རབས་ཁྲིར་བདེ་ཞིང་སྐྱིད་པའི་མཇལ་དུམ་ཆེན་པོ་མཛད་དེ། ཞེས་པ་དེ་མི་རབས་ཁྲི་ཞེས་པའི་དོན་རེད། ངས་བཙན་པོ་ཁྲི་རལ་བ་ཅན་བཞིན་མི་རབས་ཁྲི་ཕྲག་ལབ་རྒྱུ་བྱུང་མ་སོང་མོད། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག་ཅེས་ལབ་པ་ཡིན། ཞེས་གསུངས།
ཡང་ཁོང་གིས་ཚད་མེད་ཡོན་ཏན་ལུང་འདྲེན་གྱིས་བོད་རྒྱ་མི་རིགས་གཉིས་པོ་ཆིག་སྒྲིལ་གྱི་རེ་འདུན་གསུངས་དོན། ངས་བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག ཅེས་ལབ་པའི་རྒྱབ་ལྗོངས་སུ་ག་རེ་ཡོད་ཟེར་ན། ཉོན་མོངས་གདོན་གྱིས་སྨྱོས་པའི་བརླང་སྤྱོད་ཀྱིས། །རང་གཞན་གཉིས་ཕོངས་བགྱིད་པའི་སྙིང་རྗེའི་ཡུལ། །མི་བསྲུན་སྐྱེ་བོའི་ཚོགས་རྣམས་བླང་དོར་མིག །ཡོངས་ཐོབ་བྱམས་བརྩེས་མཛའ་བའི་དཔལ་ལ་སྦྱོར། ། ཅེས་གསུངས་ཡོད། དེ་འདྲའི་མི་བསྲུན་སྐྱེ་བོའི་ཚོགས་དེ་སུ་རེད་ཅེ་ན། ད་ལྟའི་རྒྱ་ནག་གི་དབང་འཛིན་པ་དེ་ཚོ་རེད། དེ་དག་བླང་དོར་གྱི་མིང་ཐོག་ནས་བྱམས་པ་དང་བརྩེ་བས་ང་ཚོའི་མཛའ་བརྩེ་ལྡན་པའི་གྲོགས་པོ་ཞིག་ལ་བསྒྱུར་དགོས་ཀྱིན་འདུག ཅེས་དྲུག་ཅུ་ཐམ་པའི་ལོ་ནས་ད་བར་ཁ་གྲགས་ཤེས་པའི་ཕྲུ་གུ་ཡན་ནས་ཉིན་རྟག་པར་སྐྱོར་བསྡད་པ་རེད། མི་བསྲུན་སྐྱེ་བོའི་ཚོགས་རྣམས་བྱམས་བརྩེས་མཛའ་བའི་དཔལ་ལ་བསྒྱུར་དགོས་ན། ཁ་བྲལ་བྱོས་གསུངས་པ་རེད་དམ། ཆིག་སྒྲིལ་བྱོས་གསུངས་པ་རེད། དེ་བསམ་བློ་གཏོང་ས་གཅིག་རེད། ཅེས་གསུངས་བྱུང་།
མཇུག་མཐར་ཁོང་གིས་༧གོང་ས་མཆོག་གིས་བོད་རྒྱ་མི་རིགས་ཆིག་སྒྲིལ་ལ་ཐུགས་རེ་གནང་ཡོད་སྐོར་གསུངས་དོན། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག ཅེས་ལབ་དགོས་པའི་རྒྱབ་ལྗོངས་གཞན་ཞིག་ནི། ད་རེབ་བོད་མིའི་དབུ་ཁྲིད་༧གོང་ས་མཆོག་གིས་གང་གསུངས་ཡོད་ཟེར་ན། རྒྱ་རིགས་མང་ཚོགས་ཀྱི་སྐུ་ཚབ་མཚོན་པའི་ཚོགས་ཆེན་འདིར་ང་ལ་རེ་བ་གཉིས་ཡོད། དེ་ནི་བོད་མིའི་དཀའ་རྙོག་སེལ་ཐབས་སུ་འབྱུང་འགྱུར་ལམ་སྟོན་ཅི་དགོས་གླེང་རྒྱུ་དང་། ཁྱེད་རྣམ་པ་བརྒྱུད་དེ་རྒྱ་ཆེའི་རྒྱ་རིགས་རྣམས་ལ་བོད་ཀྱི་དཀའ་རྙོག་འདི་བོད་རྒྱ་མི་རིགས་བར་གྱི་འཁོན་རྩོད་མིན་པ་དང་། གཞིས་བྱེས་བོད་མི་ཚང་མས་རྒྱ་མི་རིགས་ལ་འཁོན་འཛིན་དང་། མཐོང་ཚུལ་མི་ལེགས་པ་གང་ཡང་མེད་པའི་གནས་ཚུལ་གསལ་བསྒྲགས་དང་བཅས་མི་རིགས་ཁ་བྲལ་འགྲོ་བའི་ཉེན་ཁ་ལས་སྐྱོབ་ཐབས་གང་ཐུབ་གནང་རོགས་ཞེས་བརྗོད་རྒྱུ་དེ་གཉིས་ཡིན། ཞེས་༧གོང་ས་མཆོག་གི་ཞལ་དྲོན་མོ་ནས་དེ་ལྟར་གསུངས་པ་རེད། མི་རིགས་ཁ་བྲལ་འགྲོ་བའི་ཉེན་ཁ་དེ་ལས་སྐྱོབ་ཐབས་གང་ཐུབ་གནང་རོགས་ཟེར་སྐབས། ང་ཚོ་ཆིག་སྒྲིལ་ཡོང་བར་ཤོག་ལབ་རྒྱུ་ལས་ཁ་བྲལ་ཡོང་བར་ཤོག་ཟེར་ནས་ལབ་ས་མེད་པ་དང་། ལབ་སྲོལ་མེད་པ་ལྟ་བུ་ཞིག་ཆགས་ཡོད། ཅེས་གསུངས་བྱུང་།
རིན་པོ་ཆེའི་སྐུལ་སློང་་དེ་རྒྱ་མཚོ་ལས་གཏིང་ཟབ་པ་དང་། ཁོང་གི་ཕྱི་ནང་གཉིས་ཀའི་མཁྱེན་རྒྱ་དེ་ནམ་མཁའ་ལྟར་མཐའ་ཡས་པ་རེད། འོན་ཀྱང་ཁོང་གི་གཞུ་ལུགས་དང་ལག་ལེན་གཉིས་ལ་གནམ་ས་ལྟ་བུའི་ཁྱད་པར་ཞིག་མཐོང་གི་འདུག ནམ་ཡང་མཉམ་དུ་སླེབས་ས་མ་རེད།
སྣ་བོ་ཆེ། ཁྱེད་རང་གི་མཆན་འདི་ལ་ཡང་ཆེན་ཞིག་མ་བྲིས་ན། ལས་སླ་པོ་མགོ་ཚོད་ས་མ་རེད་དོ།
རིངས་ལུགས་ཞེས་བྲིས་ནོར་ཤོར་བ་རིང་ལུགས་སུ་གོ་གནང་ཡོང་བ་ཞུ།
ངས་བཀའ་ཁྲི་འདི་པའི་གསུང་ཚིག་རེ་རེའི་ཕྱི་ནང་དང་ཟུར་སུལ་གང་དུའང་གཞོམ་གཞིག་དཀའ་བའི་གནས་ལུགས་ཤིག་དང་། ཐེག་མི་ཐུབ་པའི་ལྗིད་ཁོག་ཅིག ཟད་པ་མེད་པའི་གཏིང་ཕུག་ཅིག་ཡོད་པར་ཡིད་ཆེས་བྱེད་ཀྱིན་ཡོད།
འོན་ཀྱང་ཁོང་གིས་འུ་ཐུག་གི་སྨྲེ་ངག་འདི་འདྲ་ཞིག་ཀྱང་གྱེར་མྱོང་བ་སྟེ།
བདེན་དོན་ལ་བརྟེན་པའི་གནས་ལུགས་རིགས་པ་དང་རྒྱུ་མཚན་དུ་མའི་སྒོ་ནས་གསལ་བཤད་ཇི་ཙམ་ཞུས་ཀྱང་། མང་ཆེ་བ་ཞིག་ལ་ཧ་ཅང་གོ་བརྡ་འཕྲོད་དཀའ་བ་དང་། ཡང་གཞན་དག་མང་པོར་གོ་བརྡ་འཕྲོད་ཀྱང་དགོས་དབང་གིས་གོ་བརྡ་མ་འཕྲོད་པའི་ཚུལ་བཟུང་སྟེ་བཞུགས་པ་དང་། ཡང་འགའ་རེས་གོ་བརྡ་འཕྲོད་མིན་ལ་མི་ལྟོས་པར་སྙན་རྒྱབ་ཀྱི་ལྷག་པ་ལྟ་བུར་སྣང་མེད་བཏང་སྙོམས་སུ་བཞག་པ་ལ་བརྟེན་ནས་བསམ་ཚུལ་སྨྲ་བརྗོད་ཐམས་ཅད་རང་བཞིན་ནུས་མེད་དུ་སོང་བའི་གནས་ཚུལ་ཞིག་བྱུང་། ཞེས་གསུངས་ཡོད། འདི་ནི་འུ་ཚོའི་སྤྱི་ཚོགས་ཀྱི་བསམ་བློའི་གོ་རྟོགས་ལ་བརྒྱབས་པའི་སྡོམ་ཚིག་ཆེན་པོ་ཞིག་ཡིན་ཅིང་། ད་རེས་གྲོས་ཚོགས་ཀྱི་དྭོགས་འདྲི་དེ་ཡང་གསུང་ཚིག་འདིའི་གཟས་ཡུལ་ལས་བརྒལ་མེད།
༡ བོད་རྒྱ་མི་རིགས་ཆིག་སྒྲིལ་དང་། བོད་རྒྱ་མི་རིགས་མཐུན་ལམ། བོད་རྒྱ་མི་རིགས་ཁ་བྲལ་མི་འགྲོ་བ། ཞེས་པའི་ཐ་སྙད་འདི་དག་དང་ཐ་སྙད་འདི་དག་གི་ཅུང་གཏིང་རིམ་ན་འཁྱིལ་བའི་གོ་དོན་དང་རྒྱབ་ལྗོངས་ཀྱི་ལྟ་བ། ༢ རྒྱ་རྒྱ་ཡུལ་ན་སྐྱིད། བོད་བོད་ཡུལ་ན་སྐྱིད་ཅེས་པའི་བོད་བཙན་པོའི་དཀྱེལ་ཡངས་དང་རླབས་ཆེན་གྱི་དགོངས་པ་མཚོན་པའི་གནའ་གཏམ་འདིའི་དགོངས་དོན། ༣ ཡང་ད་ལྟའི་བཙན་བྱོལ་གཞུང་གིས་བོད་ཡུལ་རྒྱའི་མི་སེར་སྤེལ་བའི་རིངས་ལུགས་སུ་བསྒྱུར་གྱིན་པའི་ཐད་ལ་ངོ་རྒོལ་གྱི་སྲིད་བྱུས་འཛིན་བཞིན་པའི་གཞི་རྩའི་ལྟ་གྲུབ་སྟེ། ཕྱི་ཚུལ་ནས་འགལ་བ་ལྟར་སྣང་བའི་ལྟ་གྲུབ་འདི་གསུམ་ནང་དོན་དུ་འབབ་སའི་བྲག་ཐེམ་གཅིག་ལས་གཉིས་པ་ཞིག་མེད་པ་དེ་བཀའ་ཁྲིའི་གསུང་ལན་འདིའི་བརྗོད་དོན་སྙིང་པོ་དེ་རེད། བརྗོད་ཚིག་འདི་དག་གི་ཕྱི་ཚུལ་གྱི་བར་ཐག་རིང་བའི་སྣང་ཚུལ་འདིས་ཐེངས་འདིའི་གྲོས་ཚོགས་ཀྱི་མི་སྣ་གཅིག་པུ་མིན་པར་སྤྱི་ཚོགས་ཀྱི་མི་སྣ་མང་དག་ཅིག་ལ་མགོ་རྙོག་དང་འཁྲུལ་གཞི་བཟོས་ཡོད།
དཔེར་ན་ན་ནིང་ས་བྱི་ཞི་རྒོལ་གྱི་མཇུག་ཏུ་༸གོང་ས་སྐྱབས་མགོན་ཆེན་པོས་བོད་རྒྱ་མི་རིགས་མཐུན་སྒྲིལ་གྱི་ཐད་ནན་ཏན་དང་ཛ་དྲག་རང་བཞིན་གྱི་བཀའ་སློབ་ཐེངས་མང་གནང་སྟབས་གཞིས་བཞུགས་བོད་མི་མང་དག་ཅིག་ལ་བྱ་དཀའ་བྱེད་གཏད་ཀྱི་གནས་ཚུལ་བྱུང་བ་ལྟ་བུ་རེད། དེ་ཡང་གཞིས་བཞུགས་བོད་མི་ཚོས་དེ་སྔ་རྒྱ་རིགས་ཀྱི་ས་ནས་དངོས་ཟོག་མི་ཉོ་བ་དང་། རྒྱ་རིགས་ཀྱི་ཟ་ཁང་སོགས་སུ་འགྲོ་མཚམས་འཇོག་པ་སོགས་མི་རིགས་གཉིས་རྒྱང་འགྱེད་དུ་འགྲོ་བའི་ལས་དོན་མང་དག་ལ་ཞུགས་ཀྱིན་ཡོད་ཅིང་དེ་ཉིད་སོ་སོའི་མི་རིགས་དང་རིག་གཞུང་སྲུང་སྐྱོབ། རྒྱ་རིགས་ཀྱི་གྲངས་འབོར་འཕེལ་རྒྱས་ལ་བཀག་འགོག་ཐུབ་པ་སོགས་ཀྱི་ཐབས་ལམ་ཞིག་ཏུ་མཐོང་གིན་ཡོད་པ་རེད། འོན་ཀྱང་༸གོང་ས་མཆོག་གི་རྒྱ་མི་རིགས་དང་འཆམ་མཐུན་གྱིས་འཚོ་དགོས་པའི་ནན་ཏན་ཆེན་པོའི་བཀའ་སློབ་འདིས་ཁོང་ཚོ་ལས་དོན་འདི་འདྲའི་རིགས་ཀྱི་འཕྲོ་མ་ནས་ཐེ་ཚོམ་གྱིས་འགྲེངས་དགོས་པར་གྱུར་ཡོད།
སེལ་ཐབས་དཀའ་བའི་དཀའ་ངལ་ཞིག་ནི་ལྟ་གྲུབ་དང་རྒྱུ་མཚན་གྱི་ངོས་ནས་བཤད་ན་བཀའ་ཁྲི་མཆོག་གིས་གསུངས་པ་ལྟར་ལྟ་སྟངས་འདི་དག་དབར་འགལ་འདུ་ཞིག་མེད་ཀྱང་། བསམ་ཚུལ་འདི་དག་ལག་བསྟར་གྱི་བརྒྱུད་རིམ་ནང་ཕན་ཚུན་གཡོལ་ཐབས་དཀའ་བའི་གདོང་ཐུག་རིགས་ཤིག་འབྱུང་གིན་ཡོད་པ་ནི་བསམ་གཞིགས་ནན་ཏན་བྱེད་དགོས་པའི་གནད་དོན་ཞིག་ཡིན།
མདོ་དོན་ཆིག་སྒྲིལ་ཅེས་པ་ནི་ནང་བསམ་བློའི་འདུ་ཤེས་འཛིན་སྟངས་ཤིག་སྟེ། སེམས་ཁམས་མཐུན་ན་ལེ་དབར་ཁྲི་ཡིས་རྒྱང་ཁད་ཆོད་ཀྱང་ཆིག་སྒྲིལ་ཡོད། སེམས་ཁམས་མི་མཐུན་སོར་གང་ཙམ་གྱི་བར་ཐག་མེད་ཀྱང་ཆིག་སྒྲིལ་མེད།
ཕོངས་དང་འཕོང་ཞེས་པའི་ཚིག་གཉིས་ལ་འདྲ་སའི་ཆ་མང་དུ་ཡོད། གཅིག་བྱས་ན་མིང་གི་བྱིངས་གཅིག་ལས་ཐོན་པའི་ཚིག་གི་རྣམ་འགྱུར་མི་འདྲ་བ་གཉིས་ཡིན་པའི་རྒྱུ་མཚན་གྱིས་ཡིན་སྲིད། དེ་བཞིན་མི་འདྲ་སའི་ཆ་ཡང་ཡོད་དེ། ཕོངས་ཞེས་པ་ནི་ལོངས་སྤྱོད་ཀྱི་མཐུན་རྐྱེན་མ་ཚང་བར་དབུལ་པོར་གྱུར་པའི་དོན་དང་། འཕུང་ཞེས་པ་རང་གནོད་གཞན་གནོད་བྱས་པའམ་མེད་བརླག་ཏུ་བཏང་བའི་དོན་ཏེ། དཔེར་ན། སྤྱི་ཚོགས་འཕུང་བར་བྱེད། ཅེས་པ་ལྟ་བུ་ཡིན། དེས་ན་གོང་གི་རང་གཞན་གཉིས་ཕོངས་བགྱིད་པའི་སྙིང་རྗེའི་ཡུལ། །ཟེར་བའི་ཚབ་ཏུ་མ་རྩོམ་རང་ཐོག་ཏུ་གསལ་བ་ལྟར་རང་གཞན་གཉིས་འཕུང་བགྱིད་པའི་སྙིང་རྗེའི་ཡུལ། །ཞེས་བཅོས་འདོད་བྱུང་།
གོང་དུ་བཀའ་ཁྲི་མཆོག་གི་གསུང་དེ་གནས་གང་དུ་དུས་ནམ་གསུང་སྐོར་ཞུ་ཡག་མེད། བང་ཆེན་དང་དུས་བབ་གང་རུང་ཞིག་གི་ཐོག་ནས་མཇལ་མྱོང་བ་དྲན་གྱི་འདུག གལ་ཏེ་མ་རྩོམ་དང་མ་མཐུན་པའི་སྐྱོན་ཆ་འདྲ་ཤོར་ཚེ་དགོངས་སེལ་ཞུ་རྒྱུ་ཡིན།
གལ་སྲིད་དབུ་མའི་ལམ་དུ་ཕེབས་གནང་ན་འདི་འདྲ་ཞིག་ཡོང་དགོས་པ་རེད།
བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག
དགོད་རྒྱུ་ཡོང་གི་འདུག ང་ཚོའི་སྤུན་ཟླ་ཚོའི་མགོ་ལ་ཁྲག་ད་དུང་སྐམ་མེད་ཡ།
ཁྲག་སྐམ་རྗེས་ཡིན་དཱའ།
རྩོམ་ཡིག་འདིའི་ནང་གི་གླེང་གཞི། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག ཅེས་པ་འདི་ནི་རིག་གནས་གསར་བརྗེ་ཆེན་མོའི་སྐབས་ཀྱི་འབོད་ཚིག་ཅིག་ལོས་ཡིན་སྙམ་པ་ཞིག་འདུག
ཁྲི་ལོར་བརྟན་པར་ཤོག་ཅེས་པ་ནི་རྒྱ་ཡིག་གི་ 万岁 ཞེས་པ་ལས་ཚུར་འགྱུར་བ་རེད།
རིན་པོ་ཆེ་མཆོག་ནི་སྤྱིར་བཏང་རྒྱ་ནག་གི་ཡི་གེ་བོད་ཡིག་གི་ནང་དུ་འགྱུར་བའི་སྐོར་ལ་ནན་ཏན་གྱིས་སྐྱོན་སེལ་གནང་མཁན་ཞིག་ཡིན་ཡང་། དེང་སྐབས་རྒྱ་ནག་གཞུང་གི་ཐ་སྙད་དག་འཁྱེར་ཡོང་ནས་གསུང་བཤད་གནང་བ་དང་། གྲོས་ཚོགས་ནང་དུའང་། བོད་རྒྱ་མི་རིགས་ཆིག་སྒྲིལ་ཁྲི་ལོ་བརྟན་པར་ཤོག་ཅེས་ལབ་ཡོད་ལ། ལབ་པ་ཙམ་དུ་མ་ཟད་ཡིག་ཐོག་ལའང་བྲིས་ཡོད། སྐད་ཆ་དེ་བཤད་སྐབས་བོད་རྒྱ་མི་རིགས་གཉིས་ཀྱི་ཚོགས་ཞུགས་པ་ཚང་མ་དང་གསར་འགོད་པ་བཅས་ཡོད་ཡོད་པ་མ་ཟད། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་གི་གསེར་ཞལ་དྲོན་མོ་ཡོད་ས་ནས་ལབ་པ་ཡིན་ཅེས་བཀའ་ལན་གནང་འདུག