སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཞི།

བློ་བཟང་སྒོ་ནང་དུ་ཡར་འཛུལ་མ་ཐག གྲྭ་བ་དེས་འཛུམ་འདང་དང་བཅས་དེ། ཡ་ཨ་རོགས། དེ་རིང་སློབ་མ་བྱས་དེ་སྐྱིད་པོ་བྱུང་སོང་ངམ་ཟེར་ནས་དྲིས་དུས། བློ་བཟང་གིས་དགོད་ཞོར་དུ་དངོས་ནས་སྐྱིད་པོ་བྱུང་ཟེར་ན་མི་ཤེས་ཀྱང་། ཚ་གེ་ཚུ་གེ་འདྲ་ཞིག་ཆགས་སོང་། འཛིན་གྲྭའི་ནང་དུ་མི་ཡང་མི་ཉུང་བ་ཞིག་འདུག་ལ། ཕྱི་གླིང་བ་དགེ་རྒན་དང་བླང་བྱེད་མཁན་ཡང་བཅུ་ལྷག་ཞིག་འདུག་ཟེར་ཞོར་དུ་ལག་གི་འབྲི་དེབ་དང་སྨྱུ་གུ་གྲྭ་བ་དེའི་འདུག་སའི་ཟུར་དུ་བཞག་ནས། ད་ནུབ་ཚལ་ཞིག་སྐོལ་ཟེར་ནས་ལག་པ་འཁྲུ་རུ་ཕྱིན།

བློ་བཟང་དང་ཁོ་གཉིས་ཀྱིས་ནུབ་ཚལ་འཐུང་ཞོར་དུ། བློ་བཟང་གིས་དེ་རིང་ང་ལ་འཛིན་གྲྭའི་ནང་དུ་དགེ་རྒན་དང་བླང་བ་ཞིག་གིས་ཁོ་རང་གིས་ང་རང་སྒེར་ལ་ནང་ནས་དབྱིན་ཡིག་འཁྲིད་དགོས་ན་འཁྲིད་ཟེར་ན། ཁྱེད་རང་གིས་བལྟས་ན་ག་འདྲ་འདུག ངས་འདི་རུ་འཁྲིད་དེ་འོང་ན་འགྲིག་གི་རེད་དམ་ཟེར་ནས་དྲི་བ་གཉིས་ལྷན་གཅིག་དུ་དྲིས་དུས། གྲྭ་བ་དེས་རང་གི་ཁ་ནང་གི་ཟ་མ་མུད་ཞོར་དུ། ཨོ་དེ་ནི་གཏམ་བཟང་ཞིག་རེད། འདི་ནས་དབྱིན་ཡིག་སྤྱོང་མཁན་མི་ཉུང་བ་ཞིག་གིས་སྒེར་ལ་དབྱིན་ཡིག་དགེ་རྒན་བཙལ་ཡང་ལས་སླ་བོ་རྙེད་ཀྱི་ཡོད་པ་མ་རེད། ཁྱེད་རང་དངོས་ནས་མི་ལམ་འགྲོ་ཅན་ཞིག་རེད། འདི་རུ་འཁྲིད་དེ་ཡོང་ན་འགྲིག་དང་འགྲིག ཁྱེད་རང་གིས་ག་དུས་འཁྲིད་དེ་འོང་ན་འགྲིག་གི་རེད་ཅེས་གསུངས་དུས། བློ་བཟང་གི་གདོང་ལ་འཛུམ་ཞིག་བླངས་ཞོར་དུ། ད་དུང་། བཀང་འཐུང་ཟེར་ཞོར་དུ་ལག་པ་གྲྭ་བ་དེའི་ཕྱོགས་སུ་བསྲིངས།

གྲྭ་བ་དེས་ཡ་ཡ་ དངོས་ནས་ཞིམ་པོ་ཞིག་བསྐོལ་འདུག་ཟེར་ནས་ལག་ནང་གི་ལྕགས་ཕོར་བློ་བཟང་ལ་སྟེར་ཞོར་དུ། ང་རང་སང་ཉིན་གྲོང་ཆོག་དུ་འགྲོ་རྒྱུ་ཡིན། གཅིག་བྱས་ན་ནང་ཉིན་ཡང་གྲོང་ཆོག་ལ་འགྲོ་དགོས་ཀྱི་ཡོད། སང་ཉིན་རང་གིས་ཉིན་གོང་ཁ་ལག་རང་ཉིད་གཅིག་བུར་འགྲིག་ནི་ཞིག་བཟོས་པ་ཡིན་ན་འགྲིག་གི་རེད། དབྱིན་ཡིག་དགེ་རྒན་དེ་གང་ནས་རེད་འདུག་ཟེར། བློ་བཟང་གིས་ཨ་རི་ནས་ཡོང་བའི་སློབ་ཕྲུག་ཞིག་ཡིན་པ་འདྲ། ཁོ་རང་བོད་པ་ལ་དགའ་བོ་ཡོད་ཟེར་བཞིན་འདུག་ཞེས་ལན་སྤྲད། གྲྭ་བ་དེས་ཨ་རི་ནས་ཡིན་ན་བཟང་གི ཤུ་རེ་བྱོས་དེ་སྤྱོང་། ཨ་རི་བ་དེ་ཚོ་དབྱིན་སྐད་ཀྱི་སྐད་གདངས་ཡག་པོ་ཡོད་པ་རེད་ཟེར་ནས་ངས་མི་མང་བོའི་ཁ་ནས་གོ་མྱོང་།

ཕྱིར་ཉིན་བློ་བཟང་སྔ་བོ་ནས་བླངས་དེ་རང་གི་བློ་འཛིན་བྱས་པའི་དབྱིན་ཡིག་གི་མིང་ཚིག་དེ་དག་ལ་བསྐྱར་སྤྱོང་བྱས། གྲྭ་བ་དེ་གྲོང་ཆོག་དུ་ཕྱིན་སྟབས། ཉིན་གུང་ཁོ་རང་གིས་རྩམ་པ་ཞིག་ཟས་དེ་འགྲིག་ནི་བྱས་དེ་བསྡད། བློ་བཟང་གིས་གྲྭ་བ་ཁོང་ལ་སྐད་ཆ་ཞིག་མ་དྲིས་པ་ཡིན་ན་ང་རང་འདི་ལྟར་མུ་མཐུད་དུ་བསྡད་པ་ཡིན་ན། ཁོ་རང་ལ་ཡང་དཀའ་ངལ་སྤྲོད་སྲིད་པ་རེད། དོ་ནུབ་ཁོ་རང་ལ་འཚོ་བའི་དཀའ་ངལ་ཡོད་མེད་བསྐོར་ལ་སྐད་ཆ་ཞིག་འདྲི་དགོས་སྙམ་ཞོར་དུ་ཕྱི་དྲོའི་འཛིན་གྲྭ་ལ་ཕྱིན། འཛིན་གྲྭའི་ནང་དུ་ཁ་སང་ལས་སློབ་མ་མང་དུ་ཕྱིན་ཡོད་པ་མ་ཟད། དབྱིན་དགེ་དང་བླང་བ་ཡང་མང་དུ་ཕྱིན་འདུག་པ་མ་ཟད། བུད་མེད་གསར་མོ་ཁ་ཤས་ཤིག་སླེབས་ཡོད་པ་དེ་དག་གི་འཁྲིས་སུ་ཕོ་གསར་རེ་གཉིས་ཤིག་སྔ་ས་ནས་སླེབས་འདུག་པ་དང་། གྲྭ་བ་རེ་ཟུང་ཞིག་ཡོད་པ་དེ་དག་གིས་ཀྱང་དེ་དག་ལ་སྐད་ཆ་འདྲ་བཤད་པའི་གོ་སྐབས་གང་རེག་བྱེད་ཀྱི་ཡོད་ན་ཡང་། བློ་བཟང་གིས་མར་ཁུ་ལགས་ཀྱི་གམ་ནས་ཁ་སང་གི་མིང་ཚིག་དག་བསྐྱར་འདོན་རེ་བྱེད་ཀྱིན་ཡོད་པ་དང་། ཞོར་དུ་ཁོ་རང་ལ་སང་ཉིན་ཁྱེད་རང་དུས་ཚོད་ག་ཚོད་ཅིག་ལ་ཁོམ་པོ་ཡོད་ཟེར་ནས་དྲིས། མར་ཁུ་ཡིས། ང་རང་སང་ཉིན་ཕལ་ཆེར་ཉིན་གང་བོར་ཁོམ་བསྡད་ཡོད། ཁྱེད་རང་དུས་ཚོད་ག་དུས་ཤིག་ལ་བདེ་བོ་ཡོད་ན་དེ་དུས་འུ་གཉིས་རླངས་འཁོར་འབབ་ཚིགས་སུ་ཐུག་ཆོག དེ་ནས་ཁྱེད་རང་ཡོད་སར་སོང་ན་འགྲིག་གི་རེད་ཅེས་བཤད་དུས། བློ་བཟང་གིས་ལགས་སོ། དེ་ན་སང་ཉིན་དུས་ཚོད་དང་བོ་ཏག་ཏག་ལ་ང་རང་རླངས་འཁོར་འབབ་ཚིགས་ལ་ཡོང་ངེས་ཡིན།

བློ་བཟང་འཛིན་གྲྭ་གྲོལ་ནས་ནང་དུ་འབྱོར་དུས། གྲྭ་བ་དེ་ད་དུང་སླེབས་མེད་ཀྱང་། ཁོ་རང་ལ་ལྡེ་མིག་ཞིག་གྲྭ་བ་དེས་སྤྲད་ཡོད་སྟབས། ཁོ་རང་ནང་དུ་མ་སླེབས་ཀྱང་། ཁོ་རང་ལ་སེམས་འཁྲལ་མེད། བློ་བཟང་ནང་དུ་འབྱོར་ནས་ཆུ་ཚོད་གཅིག་ཙམ་ཞིག་གི་རྗེས་སུ་གྲྭ་བ་དེ་གྲྭ་བ་གཞན་ཞིག་དང་འགྲོག་ནས་སླེབས། དེ་དུས་བློ་བཟང་གིས་ཁྱེད་གཉིས་ཀྱིས་ནུབ་ཚལ་ཨེ་འཐུང་ཟེར་ནས་དྲིས་དུས། གྲྭ་བ་དེས་ང་རང་ལ་འཐུང་ས་མི་འདུག གྲོང་ཆོག་གི་ཁ་ལག་དངོས་ནས་ཡག་པོ་འདུག ཁྱོས་ནུབ་ཚལ་འཐུང་ཡོད་རྒྱུ་མ་རེད་ཟེར་ནས་ཁོ་རང་གི་གྲོགས་པོ་གྲྭ་བ་དེ་ལ་བཤད་དུས། གྲྭ་བ་དེས་ ཡ་ཡ་རེད། དེས་ན་ཉུང་ཉུང་ཞིག་བླུགས་རོགས་ཟེར་ནས་བློ་བཟང་ལ་བཤད། བློ་བཟང་གིས་ལྕགས་ཕོར་གཅིག་བཟུང་དེ་སྒོ་ཕྱི་ལ་འཁྲུ་རུ་ཕྱིན། བློ་བཟང་གིས་ལྕགས་ཕོར་འཁྲུ་ཞོར་དུ། ཡ་་ དོ་ནུབ་ངེད་གཉིས་ཀྱིས་ཁ་བརྡ་བྱེད་ཐུབ་རྒྱུ་མ་རེད་སྙམ་ཞོར་དུ་ལག་ནང་དུ་ལྕགས་ཕོར་གཡུག་བཞིན་གཡུག་བཞིན་ཕྱིར་ནང་དུ་འཛུལ།