བལ་ཡུལ་རྒྱ་ནག་གཞུང་ཚབ་པས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་དམ་འབུལ་མཛད་སྒོར་བལ་ཡུལ་གྱི་ནང་སྲིད་བློན་ཆེན་མཆོག་གདན་འདྲེན་ཞུ་སྲིད་པས་སྔ་ས་ནས་དོགས་གཟོན་དགོས་པའི་སྐུལ་འདེད་བྱས།
ཟླ་འདིའི་ཕྱི་ཚེས་ ༡༣ ཉིན་བལ་ཡུལ་དུ་གནས་སྡོད་རྒྱ་ནག་གཞུང་ཚབ་པ་ཀྲང་མོ་མིང་(Zhang Maoming) ཟེར་བ་དེས། བལ་ཡུལ་ནང་སྲིད་བློན་ཆེན་སུ་དྷན་གྷུ་རུང་(Sudan Gurung) མཆོག་ལ་ཐུག་འཕྲད་བྱས་པ་ལྟར། བལ་ཡུལ་ནང་སྲིད་བློན་ཆེན་ལས་ཁུངས་ཀྱི་མགྲིན་ཚབ་པས། བལ་ཡུལ་གཞུང་གི་སྲིད་ཇུས་སུ་གཏན་འབེབས་བྱས་ཡོད་པ་བཞིན། རྒྱ་ནག་གཅིག་གི་སྲིད་ཇུས་དྭང་ལེན་གྱིས་བོད་དང་ཐའེ་ཝན་གཉིས་ཀྱི་གནད་དོན་ཐད་འགྱུར་བ་གང་ཡང་མེད་སྐོར་བརྗོད་འདུག
ཀ་ཐ་མན་ཌུ་ཆ་འཕྲིན་ནང་གནས་ཚུལ་སྤེལ་བ་ལྟར་ན། བལ་ཡུལ་དུ་གནས་སྡོད་རྒྱ་ནག་གཞུང་ཚབ་པས། བལ་ཡུལ་གཞུང་གིས་བལ་ཡུལ་དུ་གནས་སྡོད་བོད་མིའི་གནས་བབ་རྒྱུས་ལོན་ཐོ་འགོད་བྱ་དགོས་པ་མ་ཟད། བོད་དང་ཐའེ་ཝན་གྱི་གནད་དོན་རིགས་ལ་ཚོད་འཛིན་ནན་མོ་དང་། འདི་ལོའི་སྲིད་སྐྱོང་སྤེན་པ་ཚེ་རིང་མཆོག་གི་སྲིད་སྐྱོང་གི་ལས་ཡུན་གཉིས་པའི་དམ་འབུལ་དེ་ཕྱི་ཟླ་ ༥ ཚེས་ ༢༧ ཉིན་དབུལ་འཆར་ཡོད་པས། དབུས་བོད་མིའི་སྒྲིག་འཛུགས་ཀྱིས་བལ་ཡུལ་ནང་སྲིད་བློན་ཆེན་མཆོག་དམ་འབུལ་མཛད་སྒོར་གདན་ཞུ་གནང་སྲིད་པ་ཞིག་ཡིན་པས། སྔ་ས་ནས་དོགས་གཟོན་གནང་དགོས་ལུགས་སོགས་བཤད་ཡོད་འདུག
དེ་བཞིན་བལ་ཡུལ་ནང་སྲིད་བློན་ཆེན་ལས་ཁུངས་ཀྱི་མགྲིན་པ་ཨ་ནན་ཊི་ཀ་ཧྥི་ལི་(Anand Kafle)ལགས་ཀྱིས། ད་ལན་གྱི་ཐུག་འཕྲད་སྐབས། བལ་ཡུལ་གཞུང་གིས་བོད་ཀྱི་གནད་དོན་ཐོག་བཟུང་བའི་སྲིད་ཇུས་ལ་འགྱུར་བ་གང་ཡང་མེད་པར་མུ་མཐུད་རྒྱུན་འཁྱོངས་བྱ་རྒྱུ་ཡིན་པ་མ་ཟད། བལ་ཡུལ་ནང་རྒྱ་ནག་ལ་གནོད་པའི་ལས་དོན་རིགས་སྤེལ་དུ་འཇུག་རྒྱུ་མིན་པའི་ཁས་ལེན་གསལ་པོ་བྱས་ཡོད། ང་ཚོས་རང་ཉིད་ཀྱི་རྒྱལ་ཁབ་དང་ས་ཁོངས་ཕྱིའི་རྒྱལ་ཁབ་ཀྱི་སྟོབས་ཤུགས་ཀྱི་རྩེད་ཆས་སུ་མི་འགྱུར་རྒྱུར་ཆོས་སེམས་དང་དམ་བཅའ་བརྟན་པོ་ཡོད། ཅེས་བརྗོད་འདུག
སྤྱིར་འདི་ལོའི་བལ་ཡུལ་གྱི་འོས་བསྡུའི་ཁྲོད་རང་བཙན་སྲིད་དོན་ཚོགས་པ་(RSP) སྲིད་དོན་ཚོགས་པར་འོས་བསྡུའི་རྒྱལ་ཁ་ཐོབ་སྟེ་རྒྱལ་ཁབ་ལེགས་བཅོས་ཀྱི་སྲིད་ཇུས་གལ་ཆེན་ཁག་ཅིག་ལག་བསྟར་བྱེད་པའི་མགོ་བཙུགས་ཡོད་པ་རེད། ཀ་ཐི་མན་ཌུ་གསར་ཁང་ལྟར་ན། བལ་ཡུལ་གཞུང་གསར་པས་ལས་ཁུར་བྱས་རྗེས། རྒྱ་ནག་གཞུང་གིས་འཐབ་ཇུས་ཀྱི་ཁེ་ཕན་དང་མ་འཇོག དེ་བཞིན་བལ་ཡུལ་ནང་ཚོང་དོན་དང་ཡུལ་སྐོར་གྱི་ཁྱབ་རྒྱ་ཇེ་ཆེར་གཏང་རྒྱུ་དང་། རྒྱུད་གཅིག་ལམ་གཅིག་གི་ལས་གཞི་ལག་བསྟར། དེ་བཞིན་སྔོན་ཆད་ཀྱི་གྲོས་མཐུན་ཁག་སྲུང་སྐྱོབ་བྱེད་ཆེད་དུ་བལ་ཡུལ་ནང་སྐུ་ཚབ་ཚོགས་ཆུང་དང་འཐུས་མི་སོགས་ཀྱི་ཆེད་དུ་མངགས་ནས། བལ་ཡུལ་གཞུང་གསར་པའི་མགོ་ཁྲིད་དང་གནད་ཡོད་མི་སྣ་སོགས་ལ་ཐུག་འཕྲད་བྱས་ཡོད་འདུག་ལ། ཟླ་འདིའི་ཕྱི་ཚེས་ ༧ ཉིན་བལ་ཡུལ་དུ་གནས་སྡོད་རྒྱ་ནག་གཞུང་ཚབ་པ་ཀྲང་མོ་མིང་(Zhang Maoming) གིས་བལ་ཡུལ་ཕྱི་སྲིད་བློན་ཆེན་གསར་པ་ཤི་ཤལ་ཀ་ནལ་(Shisir Khanal) མཆོག་ལ་ཐུག་འཕྲད་བྱེད་སྐབས་ཀྱང་བློན་ཆེན་མཆོག་གིས། བལ་གཞུང་གིས་ཕྱི་སྲིད་རྩ་ཁྲིམས་གཏན་འབེབས་བྱས་ཡོད་པ་ལྟར། ང་ཚོས་མུ་མཐུད་དུ་རྩ་དོན་གྱི་ལངས་ཕྱོགས་བརྟན་པོའི་ཐོག་ནས་རྒྱུན་འཁྱོངས་བྱ་རྒྱུ་ཡིན་ལ། ང་ཚོའི་ལངས་ཕྱོགས་སྔར་བཞིན་རང་འཇགས་ཡིན། རྒྱ་ནག་ཚུད་པའི་རྒྱལ་ཁབ་གཞན་གང་ལའང་ང་ཚོའི་ས་ཁོངས་བེད་སྤྱོད་གཏོང་དུ་འཇུག་རྒྱུ་མིན་ཡང་། ང་ཚོས་རྒྱ་ནག་གཅིག་གི་རྩ་དོན་ལ་རྒྱབ་སྐྱོར་བྱ་རྒྱུ་ཡིན། ཞེས་གསུངས་འདུག
ཕྱི་ལོ་ ༢༠༢༤ ཟླ་ ༡༢ ཚེས་ ༢ ནས་ ༥ བར་ཉིན་གྲངས་བཞིའི་རིང་བལ་ཡུལ་གྱི་སྲིད་བློན་ཟུར་བ་ཤར་མཱ་ཨོ་ལི་(K P Sharma Oli ) རྒྱ་ནག་ཏུ་གཞུང་འབྲེལ་སྐོར་སྐྱོད་བྱས་ཡོད་ཅིང་། སྐབས་དེར་བལ་ཡུལ་གཞུང་གིས་བོད་ཀྱི་གནད་དོན་ནི་རྒྱ་ནག་གི་ནང་སྲིད་ཡིན་པས། བལ་ཡུལ་ནང་རྒྱ་ནག་དང་ཁ་བྲལ་གྱི་ལས་འགུལ་གཅིག་ཀྱང་སྤེལ་དུ་མི་འཇུག་པའི་ཁས་ལེན་བསྐྱར་དུ་བྱས་འདུག་པ་མ་ཟད། རྒྱ་ནག་གཅིག་གི་སྲིད་ཇུས་ལ་དྭང་ལེན་གྱིས་ཐའེ་ཝན་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཡིན་ཞིང་། ཐའེ་ཝན་གྱི་རང་བཙན་ལ་ངོ་རྒོལ་དང་རྒྱ་ནག་གཅིག་གྱུར་ཡོང་བར་རྒྱབ་སྐྱོར་བྱས་ཡོད་ལ། འདས་ལོའི་ཕྱི་ཟླ་བཅུ་གཉིས་ནང་། བལ་ཡུལ་དུ་ཡོད་པའི་རྒྱ་ནག་གཞུང་ཚབ་པ་ཟུར་པ་ཁྲན་སོན་ཟེར་བས། བལ་ཡུལ་གྱི་བར་བརྒལ་སྲིད་བློན་ཟུར་པ་ལྕམ་སོའུ་ཤི་ཀར་ཀི་མཆོག་ལ་ཐུག་འཕྲད་གནང་སྐབས་ཀྱང་། བལ་ཡུལ་དུ་གནས་སྡོད་སྐྱབས་བཅོལ་བོད་མི་དང་བལ་བོད་མཐའ་མཚམས་ཀྱི་ས་གནས་ཁག་ཏུ་བོད་དོན་དང་འབྲེལ་བའི་ལས་དོན་རིགས་མི་གཉེར་སླད་དོགས་གཟོན་བྱ་དགོས་ལུགས་བཤད་ཡོད་པ་རེད།
རྒྱུད་གཅིག་ལམ་གཅིག་གི་ལས་གཞི་ནི་ཕྱི་ལོ་ ༢༠༡༣ ལོའི་མཇུག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཐོག་མར་གླེང་སློང་བྱས་ཏེ་གཏན་ལ་ཕབ་ཡོད་ཅིང་། ཕྱི་ལོ་ ༢༠༡༧ ཙམ་ནས་བལ་ཡུལ་ནང་ལྕགས་ལམ་གསར་རྒྱག་དང་། མ་འཇོག་སོགས་ཚུད་པའི་རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་ལག་བསྟར་བྱེད་མགོ་བཙུགས། ཕྱི་ལོ་ ༢༠༢༣ ལོར་དོན་ཚན་བཅུ་གཉིས་ཀྱི་ཐོག་ནས་བལ་ཡུལ་ནང་སྲིད་ཇུས་དེ་སྔར་ལྷག་སྤེལ་རྒྱུའི་གྲོས་ཆོད་བཞག་པ་ཡོད་པ་རེད། རྒྱ་ནག་གཞུང་གི་གནོན་ཤུགས་འོག ལོ་མང་རིང་བལ་ཡུལ་དུ་གནས་སྡོད་བོད་མི་རྣམས་ལ་གསུམ་བཅུའི་དུས་དྲན་དང་། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་སྲུང་གཙི་ཚུད་པའི་བོད་དོན་ལས་འགུལ་རིགས་སྤེལ་དུ་འཇུག་གི་མེད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
