བོད་ཀྱི་དུས་བབ་སྤྱིའི་འདོན་ཐེངས་ ༡༦༣ པའི་སྟེང་གི་རྩོམ་སྒྲིག་པའི་གཏམ།
ཕྱི་ཚེས་ ༨ ཉིན་འདི་གའི་རྩོམ་སྒྲིག་པར་དཔལ་རྒྱལ་བ་ཀརྨ་པ་མཆོག་ལ་ཁོར་ཡུག་གི་སྐོར་ནས་བཅར་འདྲི་ཞུ་རྒྱུའི་སྐལ་བ་ཞིག་ཐོབ་སོང་ལ། ཁོང་གི་བཀའ་མོལ་དེ་དག་གི་ཤུགས་ནས་མ་འོངས་པའི་ལྗང་མདོག་གི་བོད་པའི་སྤྱི་ཚོགས་ཤིག་ཀྱང་མཐོང་བྱུང་།
དཔལ་རྒྱལ་བ་ཀརྨ་པ་མཆོག་ནི་ལྗང་མདོག་གི་ཧི་མ་ལ་ཡའི་རི་རྒྱུད་དང་ལྗང་མདོག་གི་བོད་མིའི་སྤྱི་ཚོགས་ཤིག་ལ་ཐུགས་རེ་ཙམ་མིན་པར། དངོས་སུ་འཇིག་རྟེན་འདི་ལྟ་བུ་ཞིག་གི་ཁ་ཕྱོགས་ལ་ཞབས་ཀྱིས་འཆག་མཁན་གྱི་བོད་ཀྱི་བླ་ཆེན་ཐོག་མ་དེ་ཡིན། ཁོར་ཡུག་གི་གནས་སྟངས་ཧ་ལས་པའི་ཉེན་ཚབས་ཆེ་བའི་དུས་སྐབས་ཤིག་ལ། ཁོང་ནི་རྐང་བཙུགས་ནས་འགྲོ་དོན་འདི་ལྟ་བུ་ཞིག་གི་དོན་དུ་བྱོན་པ་ལྟར་སྣང་།
ཁོང་གི་ཐུགས་སུ་གྲྭ་བཙུན་རྣམས་ནི་གཞི་རིམ་མང་ཚོགས་ཀྱི་བསམ་བློའི་བརྒྱུད་སྐུལ་བ་ཡིན་སྟབས། ལས་གཞི་འདི་ནི་ཐོག་མར་དགོན་སྡེ་ཁག་གི་གྲྭ་བཙུན་དག་གིས་སྣེ་འཁྲིད་དགོས་པར་གསུངས། དེ་བས་ཁོང་གིས་ཐོག་མར་བཀའ་བརྒྱུད་པའི་དགོན་སྡེ་ཁག་གི་གྲྭ་བཙུན་རྣམས་ལས་གཞི་འདིའི་ཐོག་ཐུགས་རེ་ཆེན་པོས་འཁྲིད་ཀྱིན་འདུག་ལ། འདི་ལྟར་ཕྱག་ལེན་ལ་བཀལ་བ་ཡིན་ན། དགོན་གྲྭ་ཚང་གང་དུ་ཡོད་སའི་ཉེ་འཁོར་གྱི་དད་ལྡན་མང་ཚོགས་ལ་ཁོར་ཡུག་སྲུང་སྐྱོབ་ཀྱི་ཕྱོགས་ལ་རང་བཞིན་གྱིས་བག་ཆགས་བཟང་པོ་ཞིག་འཇོག་ཐུབ་པའི་ཡིད་ཆེས་ཀྱང་གནང་གིན་འདུག
ཁོང་གིས་དགོན་སྡེ་ཁག་གི་གྲྭ་བཙུན་ཙམ་མིན་པར། རིམ་བཞིན་བོད་མིའི་སྤྱི་ཚོགས་དང་ཧི་མ་ལ་ཡའི་རི་བརྒྱུད་ཀྱི་སྤྱི་ཚོགས་ཁྲོད་ཁོར་ཡུག་སྐོར་ནས་ཟབ་སྦྱོང་དང་། གོ་རྟོགས་སྤེལ་བ། མཉམ་ལས་གནང་རྒྱུ་བཅས་ཀྱི་དགོངས་འཆར་ཡང་གསུངས་སོང་།
དཔལ་རྒྱལ་བ་ཀརྨ་པ་མཆོག་གིས་ད་ལོར་ཁོར་ཡུག་སྲུང་སྐྱོབ་སྐོར་གྱི་དོན་ཚན་བརྒྱ་དང་བརྒྱད་ཅན་གྱི་ལག་དེབ་ཅིག་བཏོན་འདུག་ལ། དོན་ཚན་དེ་དག་ནི་བོད་དབྱིན་ཧིན་གསུམ་གྱི་སྐད་ཡིག་ནང་བཏོན་ཡོད་ཅིང་། གཙོ་བོ་བོད་དང་ཧི་མ་ལ་ཡའི་རི་བརྒྱུད་ན་འཚོ་ཞིང་གནས་པའི་དགོན་གྲྭ་ཚང་དང་དེ་དག་གི་མཐའ་འཁོར་དུ་གནས་པའི་སྤྱི་ཚོགས་རྣམས་ལ་དམིགས་འདུག དོན་ཚན་ ༡༠༨ དེ་དག་ནི་བོད་དང་ཧི་མ་ལ་ཡའི་རི་བརྒྱུད་ཀྱི་མང་ཚོགས་ཚོས་ཁོར་ཡུག་དང་འབྲེལ་བའི་ཉིན་རེའི་འཚོ་བ་རོལ་སྟངས་ཡིན་ལ། འཚོ་བ་འདི་ཡང་ཧ་ཅང་གིས་ཞིབ་ཆ་ཆེ་ཞིང་། ཧ་ཅང་གིས་ལག་ལེན་ལ་བདེ་བ་རྐྱང་རེད།
དཔལ་རྒྱལ་བ་ཀརྨ་པ་མཆོག་གིས། བོད་དོན་ལ་ཡང་ཆབ་སྲིད་ཙམ་མིན་པར། ཁོར་ཡུག་གི་སྟེང་ནས་གཟིགས་ཀྱིན་འདུག་ལ། ཁོང་གིས་བོད་ཀྱི་ཁོར་ཡུག་གི་གནད་དོན་འདི་ནི་བོད་པ་ཙམ་མིན་པར་ཨེ་ཤ་ཡའི་མི་རིགས་ཐམས་ཅད་ཀྱི་གནད་དོན་ཞིག་ཡིན་པར་གསུངས་ལ། ཁོང་གིས་ཁོར་ཡུག་གི་ངོས་ནས་བོད་དོན་གྱི་འཁོབས་རྒྱ་ཆེ་རུ་བཏང་སྟེ་བོད་དོན་གྱི་འགན་ནི་ནུབ་ཕྱོགས་ལས་ཀྱང་ཤར་ཕྱོགས་ཨེ་ཤ་ཡའི་མི་རིགས་ལ་ཡོད་པར་བསྟན་བྱུང་།།
བོད་ཀྱི་དུས་བབ་རྩོམ་སྒྲིག་པ་མཆོག་ལ་ཞུ་རྒྱུར། ཟླ་འགའི་སྔོན་ལ་དུས་བབ་བོད་ཁུག་ཅེས་དྲ་རྒྱའི་འབྲེལ་མཐུད་ལམ་བུ་ཞིག་སྒོ་འབྱེད་བྱས་ནའང་།་བར་སྐབས་བེད་སྤྱོད་གཏོང་ལངས་མ་བྱུང་བས་སྒོ་བརྒྱབ་འདུགཔས། སླར་ཡང་སྒོ་འབྱེད་གནང་བར་རེ་སྐུལ་ཞུ་རྒྱུ་ལགས་
ཕྲན་གྱི་མིང་ལ་དམུ་དགེ་རབ་དགའ་རུ་འབོད་ཅིང་ངའི་དྲ་རྒྱའི་ཁ་བྱང་ནི་
rabgabigla@yahoo.co.in ཡིན
རྩོམ་སྒྲིག་པས་ངའི་གསལ་འདེབས་ལ་ཐུགས་སྣང་གིས་ནོར་བ་འགའ་ཞིག་བཅོས་འདུག་པར་ཐུགས་རྗེ་ཆེ་ཞུ། འདི་འདྲས་ཀྱང་བོད་ཀྱི་སྐད་ཡིག་ལ་ཕན་ངེས།
དྲ་གྲོགས་བསེ་རུས་ཀྱང་མཉམ་ལས་དང་སེམས་ཤུགས་ཀྱི་བཀའ་མོལ་གནང་བས་སེམས་སྤྲོ། གི་དང་གིན་སོགས་ཀྱི་སྦྱོར་ཚུལ་དུས་བབ་ཚང་ལ་ངེས་གཏན་མི་འདུག་པ་འདི་རིམ་པས་ལེགས་བཅོས་གནང་ན་ལེགས་ཀྱང། འདིའི་སྐོར་སྔར་དྲ་གྲོགས་ཚོས་བགྲོ་གླེང་མང་པོ་གནང་ཚར་བས། རེ་ཞིག་འདིའི་སྐོར་བསྐྱར་དུ་བགྲོ་གླེང་ཡོང་བཟོ་མི་འདུག སྔོན་གྱི་བགྲོ་གླེང་དེ་དག་སྐོར་ངས་ལྟ་ཀློག་ཞིབ་ཕྲ་མ་ཐུབ་པས་ཆ་ཚང་ཞིག་ཤེས་ཀྱི་མེད་ཀྱང། གལ་སྲིད་བསྐྱར་དུ་བགྲོ་གླེང་གནང་ན་གང་ཐུབ་ཀྱིས་མཉམ་ཞུགས་བྱེད་རྩིས་ཡོད།
ཨ་ག་ལུང་རིགས་ལགས་ཁྱེད་ཀྱི་བསམ་བློ་ལ་རྒྱབ་སྐྱོར་ཡོད། དུས་བབ་ཀྱི་སྤུས་ཚད་ཇེ་ལེགས་སུ་འབད་པར་བཀའ་དྲིན་ཆེ། དུས་བབ་དྲ་ཚིགས་ནི་ངའི་དགེ་རྒན་ལྟ་བུར་ཆགས་ཡོད། འདིའི་བཀའ་དྲིན་ངས་ནམ་མི་བརྗེད་ལོ།
རང་གི་མཚང་ཐོག་ལ་ཕོག་ན་སུབ་ན་ཡག་པོ་རེད། ཧ་ཧ་ཧ
ངས་བསམ་པར་ཀརྨ་པ་མཆོག་གིས་འཁོར་ཡུག་གི་གནད་དོ་འདིའི་རྒྱུད་བོད་ཀྱི་ཆབ་དཔལ་རིག་གསུམ་འཛམ་གླིང་ཐོག་ཁྱབ་སྤེལ་གཏོང་ཐབས་ལ་ཐུགས་སྣང་གནང་པ་དེ་ནི་དེང་རབས་ཀྱི་སྤྱི་ཚོགས་འདིའི་ཐོག་ཆེས་ཕན་རླབས་བསྒྲུབ་ཐུབ་པའི་གནས་དོན་ཞིག་ཡིན་པ་མ་ཟད་སྒོས་སུ་བོད་ཀྱི་གནད་དོན་འདི་ཉིད་ལ་ཐུགས་སྣང་གསར་པ་ཞིག་བསྐྲུན་ཐུབ་པའི་རེ་བ་ཞིག་ཀྱང་འདུག་བསམ། འདི་ནི་དངོས་གནས་གནད་ལ་ཕོགས་ཐུབ་པའི་ཆབ་སྲིད་ཀྱི་ལམ་ཕྱོགས་དམིགས་བསལ་ཅན་ཞིག་རེད་སྙམ། ང་ཚོས་ཅིས་ཀྱང་དངོས་དོན་ལ་ངས་ལེན་ཐུབ་པ་དགོས་པ་ལས་ཕྲག་དོག་དང་འཐེན་འཁྱེར་གྱི་གྲིབ་པས་འོག་མི་ལ་སྐྱོན་འཛུགས་ཁོ་ན་བྱེད་ནས་བསྡད་ནས་དུས་ཚོད་འཁྱོལ་པར་བྱེད་མི་རུང་།
རྐང་རྗེན་པ་ལགས།
ཁྱེད་ཀྱིས་ཁོ་བོས་ད་བར་ཞུ་དག་གི་ཁུར་པོ་དེ་འཁུར་གྱི་ཡོད་པ་རྟོགས་པ་དང་།
ད་རེས་ཞུ་དག་མ་བཏང་བ་དེ་ཡང་གསལ་པོར་མཁྱེན་འདུག དེ་ལྟར་ཐུགས་སྣང་གནང་གིན་ཡོད་པར་ཐུགས་རྗེ་ཆེ་ཞུ་འདོད་བྱུང་།
ང་ལ་ཐཱུགས་སྣང་བྱུང་བ་མ་རེད། བོད་ཀྱི་སྐད་ཡིག་ལ་ཐུགས་སྣང་བྱུང་བ་ཞིག་རེད། དངོས་གནས་ང་ལ་ཞུ་དག་གཏོང་རོགས་འདི་འདྲའི་རིགས་དགོས་ཀྱི་འདུག ད་དུང་འགྲོ་ཞོར་འདུག་ཞོར་ལ་ཞུ་དག་རེ་གཏོང་ཐུབ་ན། བོད་མི་རིགས་ཀྱི་སྐད་ཡིག་གི་བླ་སྲོག་ལ་ཕན་ངེས་རེད།
ཀྱིན་དང་གྱིན་དང་གིན་ལྟ་བུ་ནི་དུས་ལྟ་བར་སྦྱོར་རྒྱུའི་ད་ལྟ་བ་སྟོན་བྱེད་ཀྱི་ཚིག་ཅིག་དང་།
ཀྱི་དང་གྱི་དང་གི་ལྟ་བུ་ནི་སྤྱིར་བཏང་ད་ལྟ་བར་འཇུག་པའི་སྐབས་ཤིག་ཡོད་ཀྱང་། དུས་བབ་ཚང་ལ་དེའི་ས་མཚམས་གསལ་པོ་ཞིག་མི་འདུག་སྙམ་བྱུང་།
ད་དུང་འབྲེལ་སྒྲའི་ཚབ་ཏུ་གི་བཙན་སྦྱོར་བྱེད་སྟངས་དེའི་རིགས་ལ་སྔར་ནས་བསམ་ཚུལ་མང་པོ་བཤད་ཟིན་ཀྱང་། དགོས་དབང་ཞིག་གིས་སམ་ཡང་ན་རྒྱན་འབྱམས་ཤིག་གི་དབང་གིས་འགྱུར་བ་གཏོང་གི་མི་འདུག ད་དུང་དེའི་ཐོག་ཟིན་མཚམས་གསལ་པོ་ཞིག་དུས་བབ་ཚང་ལ་མི་འདུག དེའི་རྒྱུ་མཚན་ནི་གསར་འགྱུར་གྱི་ཁྲོད་དུ་ཡོད་པའི་གི་སོགས་ཀྱི་ཕྲད་སྦྱོར་སྟངས་ལ་གཟིགས་ན་འགྲིག་གི་རེད།
ངས་དེ་ཚོའི་སྐོར་མ་བཤད་པ་མིན། བཤད་ཟིན་པ་ཡིན། ཕལ་ཆེར་ངའི་རྒྱུ་མཚན་དེ་དག་ལྟར་སྣང་དུ་སོང་བ་འདྲ།
རྐང་རྗེན་པ་ལགས། གནས་ཚུལ་དེ་ལྟར་རེད། འདི་ཚོའི་སྐོར་གཟིགས་འདོད་ན། ཁོ་བོའི་ཟིན་བྲིས་སུ་”གི་སྒྲའི་བཙན་འཛུལ་སླེབས་འདུག་”ཅེས་པའི་ནང་མཆན་བུ་དང་། དྲ་གྲོགས་གཞན་གྱི་དགོངས་ཚུལ། རྩོམ་སྒྲིག་སོགས་དང་བགྲོ་གླེང་བྱས་པའི་མཆན་བུ་ཁག་ཀྱང་ཡོད་སྙམ་པས། དེར་གཟིགས་རོགས་གནང་།།
དཔལ་ཀརྨའི་འཁོར་ཡུག་ཕྱོགས་ལ་ཐུགས་འཚུབ་གནང་བ་བཟང་ཀྱང་བོད་དོན་བརྗེད་སོང་བ་བློ་འཚབ་ཡོད།
རྐང་རྗེན་པར་ཐུགས་རྗེ་ཞུ། བཅོ་དགོས་པ་རྣམས་བཅོས་ཟིན།
རྐང་རྗེན་པའི་འཕྲོར་བཙན་པོ་འབོད་པ་ཞིག་གིས་མཆན་ཞིག་བཞག་འདུག་པ་བསུབས་པ་ཡིན། གནས་ཚུལ་དང་བསམ་ཚུལ་གང་དུའང་རྒྱུ་མཚན་ངེས་ཅན་མེད་པའི་དཀྲུག་ཤིང་དང་འཐེན་འཁྱེར་གྱི་མཆན་གྱི་རིགས་ལ་སྟངས་འཛིན་ནན་མོ་བྱ་རྒྱུ་ཡིན་པས་དྲ་གྲོགས་ཚོས་ཐུགས་སྣང་ཡོད་པ་ཞུ།
ཚིག་དང་ཡི་གེ་ནོར་བ་འགའ་བཅོས་དགོས་པའི་གསལ་འདེབས་ཞུ་རྒྱུར།
༼བཅར་འདྲི་གནང་རྒྱུའི་སྐལ་བ་ཞིག་ཐོབ་སོང་༽ ཞེས་པ་བོད་སྐད་ཀྱི་བཤད་སྲོལ་དང་འགལ་བས། བཅར་འདྲི་ཞུ་རྒྱུ་ཟེར་དགོས།
༼ཧི་མ་ལ་ཡའི་རི་བརྒྱུད་༽ ཅེས་པ་རི་རྒྱུད་དེ་བས་འཕུལ་མ་དག དེ་གོང་འོག་ལན་དུ་མར་འབྱུང་བ་ཀུན་གཅིག་མཚུངས་ཡིན།
༼ཞབས་ཀྱིས་ལྕོགས་མཁན་༽ ཞེས་པ་ཞབས་ཀྱིས་འཆག་མཁན་ཡིན།
༼འཁྲིད་ཀྱིན་འདུག་༽ དང་ ༼གནང་གི་འདུག༽ ༼གཟིགས་ཀྱིན་འདུག ༽ཅེས་པའི་ཀྱིན་དང་གི་གཉིས་ལ་རྗེས་འཇུག་ན་དགོས་མིན་གྱི་ཁྱད་པར་དེ་རྒྱུ་མཚན་གང་ལ་བརྟེན་ནས་བྱུང་ངམ། འདི་ལྟར་སྦྱར་བས་ཕྲད་འདི་རིགས་སྦྱོར་ཚུལ་ལ་ད་དུང་ངེས་གཏན་གྱི་རང་ལུགས་ཤིག་རྙེད་མེད་པའི་རྣམ་པ་ཞིག་མཐོང་གི་འདུག དོན་དངོས་སུ་དེ་གཉིས་ཀར་རྗེས་འཇུག་ན་སྦྱོར་མི་དགོས་པ་ཡིན།
༼མཐའ་འཁོར་ཏུ་༽ ཞེས་པ་མཐའ་འཁོར་དུ་ཡིན།
མཇུག་ཏུ་༼ཀརྨ་མ་མཆོག་གིས་༽ ཞེེས་མ་ཡིག་བྲིས་པ་འདི་མཛུབ་གནོན་ནོར་བར་ངེས།
༼ཁོབས་རྒྱ་ཆེ་རུ་བཏང༽ཞེས་པར་འཁོབས་རྒྱ་ཞེས་འས་འཕུལ་དགོས།
ནམ་རྒྱུན་དྲ་གྲོགས་བསེ་རུས་ཞུ་དག་གཏོང་བཞིན་པ་ལ་ད་རེས་མ་བཏང་བ་ཅི་ཡིན་ནམ། རྩོམ་སྒྲིག་པའི་གཏམ་འདི་རིགས་ལྷག་པར་གལ་མི་ཆེའམ།
བོད་པ་ཚང་ལ་ཕྲེང་བ་འདྲེན་རྒྱུ་དགའ་བོ་ཡོད་ལ། བརྒྱ་དང་བརྒྱད་འདི་ཡང་བོད་མིའི་ལས་དབང་དང་འཚམ་པོ་ཞིག་ཡོད་པ་ཡིན་དུས། རྒྱལ་བ་ཀརྨ་པ་མཆོག་གིས་དགོངས་བཞེད་འདི་དག་ལམ་ལྷོང་ཡོང་བར་སྨོན་ལམ་འདེབས།
བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན།
བོད་དུ་ཕྱིར་ལོག་བྱས་པའི་བོད་ཕྲུག་ཁྱིམ་སྡེའི་སློབ་ཟུར་གཉིས་ལ་ལོ་ངོ་བཅུ་བཞི་ནས་བཅོ་ལྔ་བར་གྱི་ཁྲིམས་ཐག་བཅད་པའི་གནས་ཚུལ་ཐོན་འདུག
ཁོང་གཉིས་ཀྱི་མཚན་ལ། མིག་དམར་དོན་གྲུབ་དང་། བསྟན་འཛིན་ཆོས་གྲགས་ཞུ་གི་འདུག
ཞིབ་ཕྲ་བོད་གཞུང་དྲ་རྒྱུར་གཟིགས་རོགས།
དཔལ་རྒྱལ་བ་ཀ་རྨ་པ་ལ་མངོན་པར་བསྟོད་དོ
སྤྱིར་བསམ་བློ་གཏིང་ཟབ་མོ་དང་རྒྱ་ཆེན་པོ་རེད།
ཡིན་ནའང་ད་ལྟའི་བོད་ཀྱི་གནས་བབས་ལ་ལྟོས་ནས་བཤད་ན་ཁ་ཡོད་ལག་ཡོད་ཀྱིས་རང་རྒྱལ་འདི་སྐྱོབས་ཐབས་ལ་འབད་དགོས་མ་གཏོགས་ཨེ་ཤ་ཡའི་སྤྱི་སོགས་བཤད་ན་བར་ཐགས་རིང་གི་ཡ།
དྲ་གྲོགས་ཚོས། འདི་དང་ལྷན་དུ་༸གོང་ས་མཆོག་གིས་མཛད་པའི་སྣོད་བཅུད་རྟེན་འབྱུང་དང་འབྲེལ་བའི་གདམས་པ་ཚིགས་སུ་བཅད་པ་དེ་ཡང་ཐེངས་ཤིག་བཀླགས་ཏེ་དགོངས་པ་ཞིག་བཞེས་ན། ང་ཚོ་དང་ཁོར་ཡུག་བར་གྱི་རྟེན་འབྱུང་གི་འབྲེལ་ལམ་ལ་ངེས་ཤེས་རྙེད་ངེས་མ་ཟད།
༸གོང་ས་མཆོག་གི་འཛམ་གླིང་འདི་ཡི་ཁོར་ཡུག་ལ་ཐུགས་གལ་ཆེན་པོ་ག་ཚོད་ཙམ་གནང་གིན་ཡོད་མེད་ཀྱང་རྟོགས་ངེས་པ་རེད།།