ཕྱི་ཟླ་ ༩ ཚེས་ ༣༡ ཉིན་མདོ་སྨད་ཀྱི་ཆོས་སྡེ་ཆེན་པོ་རྗེ་སྐུ་འབུམ་དགོན་པའི་ཉེ་འགྲམ་གྱི་ཙོང་ཁ་མགྲོན་ཁང་དུ་ ༼ སྐབས་དང་པོའི་སྐུ་འབུམ་བོད་སྐད་ཡིག་བགྲོ་གླེང་ཚོགས་འདུ ༽ ཞེས་པ་དེ་སྐོང་ཚོགས་གནང་ཡོད་པ་དང་། ཚོགས་འདུར་མཐུན་འགྱུར་གནང་མཁན་སྐུ་འབུམ་དགོན་པའི་དགེ་འདུན་པ་དགོན་གསར་སྨོན་ལམ་རྒྱ་མཚོ་ལགས་ཡིན་འདུག ཐེངས་འདིའི་བོད་སྐད་ཡིག་བགྲོ་གླེང་ཚོགས་འདུའི་སྟེང་། རྗེས་སྐུ་འབུམ་བྱམས་པ་གླིང་གི་མཆོད་གཞིས་ཚོ་བ་དྲུག་གི་སྐུ་ཚབ་དང་། བྱང་གི་དགོན་ཆེན་བཞི་གཙོས་པའི་དགོན་སྡེ་ཁག་གི་དགེ་བཤེས། ནུབ་བྱང་མི་རིགས་སློབ་ཆེན་དང་མཚོ་སྔོན་མི་རིགས་སློབ་ཆེན། མཚོ་སྔོན་དགེ་ཐོན་སློབ་གྲྭ་ཆེན་མོ་བཅས་ཀྱི་དགེ་སློབ། དེ་བཞིན་ཞིང་ཆེན་དང་ས་གནས་རིམ་པའི་འབྲེལ་ཡོད་སྡེ་ཁག་གི་སྐུ་འཚབ། བོད་ཁུལ་གྱི་ཕ་སྐད་འཛིན་སྐྱོང་ཚོགས་པ་ཁག་ཅིག་གི་ཚོགས་མི་བཅས་མཉམ་ཞུགས་གནང་ཡོད་འདུག
ཉིན་དེའི་ཞོགས་པའི་ཆུ་ཚོད་ ༩ ནས་ཕྱི་དྲོའི་ཆུ་ཚོད་ ༤ དང་ཕྱེད་ཀའི་བར་ཚོགས་ཞུགས་པ་ཚོས་དེང་གི་མདོ་དབུས་ཁམས་གསུམ་ན་ཉམས་དམས་སུ་འགྲོ་བཞིན་པའི་བོད་ཀྱི་ཕ་སྐད་སྤྱིའི་གནས་བབ་དང་། ཡང་སྒོས་སྐུ་འབུམ་ས་ཁུལ་གྱི་བོད་སྐད་ཡིག་དང་རིག་གནས་ཉམས་པ་སླར་གསོ་དང༌། མ་ཉམས་པ་གོང་སྤེལ་ཐད་མི་སྒེར་གྱི་འཆར་སྣང་དང་འདོད་ཚུལ་སོགས་གླེང་ཡོད་ལ། མཇུག་མཐར་ཚོགས་ཞུགས་མི་སྣ་དག་གིས་རང་ཉིད་ནས་མགོ་བརྩམས་ཏེ། ཕ་སྐད་གཙང་མ་བཤད་རྒྱུའི་དམ་བཅའ་ཡང་ཕུལ་ཞིང་། སོ་སོའི་ནང་མི་གཉེན་འབྲེལ་དང་། གྲོགས་པོ་གྲོགས་མོ་སོགས་ལའང་ཕ་སྐད་བརྒྱག་པར་སྐུལ་སློང་བྱ་རྒྱུ་དང་། གཞི་རིམ་གྱི་སློབ་གྲྭ་དང༌དགོན་གྲོང༌། ལས་ཁུངས་སོགས་ས་ཁུལ་གང་ས་ནས་སྟོབས་ཤུགས་ཆིག་སྒྲིལ་བྱས་ཏེ་ཕ་སྐད་ཚོགས་པ་འཛུགས་རྒྱུར་འབད་བརྩོན་བྱ་རྒྱུར་གྲོས་འཆམ་ཡང་བྱུང་ཡོད་འདུག
སྐབས་དེར་སྐུ་འབུམ་དགོན་པའི་བླ་མ་གཞུང་ལས་པ་རྒན་རྒྱལ་མཚན་མགོན་པོ་དང༌། སྐུ་འབུམ་ལྔ་རིག་སྐྱེད་ཚལ་སློབ་གླིང་གི་སློབ་གཙོ་རྒན་བརྩོན་འགྲུས་རྒྱ་མཚོ་སོགས་གྲྭ་བཙུན་མང་པོ་ཞིག་གིས། ཉི་མ་དེ་རིང་ནས་བཟུང་བོད་རང་གི་ཕ་སྐད་གཙང་མ་བརྒྱག་རྒྱུར་དམ་བཅའ་དང་། སྐུ་འབུམ་གྱི་གཞོན་སྐྱེས་གྲྭ་བཙུན་མང་པོ་ཞིག་ལའང་ཕ་སྐད་གཙང་མ་བརྒྱག་པར་བཏིང་སྐུལ། ལྷག་པར་དུ་བོད་སྐད་ལ་བྱང་གོམས་མེད་པའི་སྐུ་འབུམ་ཚོ་དྲུག་གི་གྲྭ་བཙུན་དང་སོག་པོ། ཧོར། རྒྱ་རིགས་བཅས་ཀྱི་གྲྭ་གཞོན་མང་པོ་ཞིག་ལ་བོད་སྐད་བཤད་རྒྱུར་མཐུན་རྐྱེན་དང་རོགས་རམ་བྱ་རྒྱུ་བྱས་ཤིང་། བོད་ཀྱི་ཕ་སྐད་རྒྱག་པ་ནས་མགོ་བཟུང་སྟེ་བོད་ཀྱི་རིག་གནས་འཛིན་སྐྱོང་ལ་ཤུགས་བརྒྱག་རྒྱུའི་དམ་བཅའ་ཁས་ལེན་བྱས་ཡོད་འདུག
ཐེངས་འདིར་སྐུ་འབུམ་དགོན་པར་བོད་སྐད་ཡིག་བགྲོ་གླེང་ཚོགས་འདུ་བསྡུས་པ་དེ་ནི་རྣག་ཐོག་གཙགས་འཁེལ་ལྟ་བུར་གྱུར་ཡོད་ཅེས་རྗོད་ཀྱིན་ཡོད་འདུག་ལ། དེ་ནི་འདས་པའི་ལོ་རྒྱུས་ཀྱི་འཕོ་འགྱུར་དང་ཆབ་སྲིད་ཀྱི་གཡོ་འཁྱོམ་འོག སྐུ་འབུམ་ཉེ་ཁོར་དང་ཟི་ལིང་གཡས་གཡོན་གྱི་བོད་པའི་སྡེ་ཚོ་དག་དང་། ལྷག་པར་དུ་རྗེ་སྐུ་འབུམ་དགོན་པའི་མཆོད་གཞིས་ཚོ་བ་དྲུག་གི་མི་སེར་རྣམས་བོད་མི་རིགས་ཀྱི་ཁྲག་རྒྱུན་ཙམ་ལས་བོད་པའི་སྐད་ཡིག་རིག་གནས་དང་ཡུལ་གོམ་གཤིས་ལུགས་ཉམས་ཆག་ཆེན་པོ་ཕྱིན་ཡོད་པ་མ་ཟད། གྲོང་སྡེ་ལ་ལའི་ནང་དུ་ཧ་ལམ་བོད་སྐད་ཤེས་མཁན་ཉིན་མོའི་སྐར་མ་ལྟ་བུར་གྱུར་ཡོད་ལ། ཁོར་ཡུག་དང་སྤྱི་ཚོགས་ཀྱི་ཤུགས་རྐྱེན་འོག་རྗེ་སྐུ་འབུམ་དགོན་པའི་རྒྱུན་སྤྱོད་ཀྱི་སྐད་ཡིག་དེ་ཡང་རྒྱ་སྐད་ཆགས་ཡོད་འདུག
རྩོམ་པ་པོ་སྐལ་བཟང་བརྩོན་འགྲུས་ལགས་ཀྱིས་གོང་གི་གནས་ཚུལ་དེ་དང་འབྲེལ་ཏེ་སྐུ་འབུམ་ས་ཁུལ་གྱི་ལོ་རྒྱུས་རགས་བསྡུས་ངོ་སྤྲོད་བྱས་དོན། རྗེ་སྐུ་འབུམ་བྱམས་པ་གླིང་གི་མཆོད་གཞིས་ཚོ་བ་དྲུག་ནི། ཆི་ཀྱ་ཚོ་བ་དང༌། ཀླུ་འབུམ་ཚོ་བ། མི་ཉག་ཚོ་བ། ཟི་ན་ཚོ་བ། ཞིང་སྐྱོང་ཚོ་བ། ཤོག་པའམ་ཕྱོགས་པ་ཚོ་བ་བཅས་དྲུག་ཡིན། ཚོ་བ་འདི་དག་གི་ནང་དུ་བོད་མི་རིགས་ཀྱི་ཆོས་སྲིད་ལ་མཛད་རྗེས་ཆེ་བའི་མཁས་ཆེན་དམ་པ་མང་པོ་བྱུང་ཡོད། དཔེར་ན། སྙན་གྲགས་སྲིད་གསུམ་ལ་ཁྱབ་པའི་ཤར་ཙོང་ཁ་པ་རྗེ་བློ་བཟང་གྲགས་པ་དང༌། རྗེ་རང་ཉིད་ཀྱི་སྐུ་འཁོར་ལུང་དང་རྟོགས་པའི་མངའ་བདག་རྟོགས་ལྡན་འཇམ་དཔལ་རྒྱ་མཚོ། དགའ་ལྡན་ཁྲི་ཆེན་དགུ་བ་རྗེ་དབོན་བློ་བཟང་ཉི་མ། གྲུབ་ཆེན་ཆོས་ཀྱི་རྡོ་རྗེ། འཛམ་གླིང་ཞི་བདེ་དེད་དཔོན་ཆེན་པོ་རྒྱལ་བ་བསྟན་འཛིན་རྒྱ་མཚོ། མི་དབང་ཟི་ན་རྒྱལ་པོ་རུ་འབོད་པ་དང་ཟི་ན་དགེ་བཤེས། དམངས་ཁྲོད་ན་གྲགས་སྙན་ཆེ་བའི་རྩལ་ཆེན་ཀླུ་འབུམ་མི་རྒོད། མཁས་ཆེན་བསམ་བློ་མི་ཐུང་སོགས་བྱུང་། དེ་བཞིན། བོད་ཀྱི་ཆབ་སྲིད་ངོས་ཐད་དུ་སྐུ་གཅེན་མི་དབང་རྒྱ་ལོ་དོན་འགྲུབ་དང་ཙོང་ཁ་ལྷ་མོ་ཚེ་རིང༌། སྟག་ལ་ཕུན་ཚོགས་བཀྲ་ཤིས་སོགས་ཡིན།
ཉག་ཕྲ་བའི་བོད་ཀྱི་རིག་གཞུང་དང་སྐད་ཡིག་ལ་དོ་ཁུར་དང་ལ་ཞེན་ཐོག་ནས་བགྲོ་གླེང་ཚོགས་འདུ་གནང་པ་ནི་ཡི་རང་ཡོད། ད་ཐེངས་གཅིག་པུ་མ་འཐུས་པ་མུ་མཐུད་ནས་བོད་ས་གནས་གང་ཐད་ནས་བསྐུལ་མ་དང་རྒྱབ་སྐྱོར་སོགས་ལས་རིགས་སྤེལ་གང་ཐུབ་གནང་རོགས་ཞུ་རྒྱུ་ཡིན། ད་རིས་ཀྱི་ལས་གཞི་འདོན་མཁན་དང་མཐུན་འགྱུར་གྱི་རོགས་རམ་གནང་མཁན་ཡོད་རིགས་ལ་སྙིང་དབུས་ནས་ཐུགས་རྗེ་ཆེ་ཞུ།
བོད་པས་བོད་སྐད་བཤད་ཀྱི་ཡིན་ཟེར་བ་འདི་ལ་བསྟོད་བསྔགས་དང་རྗེས་སུ་ཡི་རང་བྱེད་དགོས་དོན་མེད། འདི་ནི་སྒྲུབ་དགོས་པ་དང་འོས་པའི་ལས་འགན་ཞིག་རེད། འོན་ཀྱང་ང་ཚོས་ཤེས་དགོས་པ་དང་དྲན་དགོས་པ་ནི་འདི་འདྲ་ཞིག་ཅིའི་ཕྱིར་ཆགས་པའི་རྒྱབ་ལྗོངས་འཚོལ་དགོས་པ་དེ་རེད།
ནུབ་ཕྱོགས་སུ་ཡོད་པའི་བོད་རིགས་རྣམས་ཀྱིས་ཀྱང་དུས་རྒྱུན་དུ་སོ་སོའི་ནང་མི་དང་བོད་མི་སུ་ཐུག་ལ་གོ་བརྡ་ཕྲད་མིན་ལ་མ་ལྟོས་པ་བོད་སྐད་ཁོ་ན་རྒྱག་རྒྱུ་དམ་བཅའ་ཞིག་བཞག་རོག་བྱེད་ན་ང་རང་ཚོ་མགོ་ནག་བོད་མི་ཡོངས་ལ་ཕན་རླབས་ཆེན་པོ་ག་འདྲ་ཞིག་མི་འདུག་གམ།
གཞིས་ལུས་བོད་མི་ཚོས་ལས་འགུལ་འདི་འདྲ་ཞིག་སྤེལ་དེ་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
བོད་སྐད་ནི་ང་ཚོ་ཐུན་མོང་ལ་དབང་བའི་རིན་ཆེན་གསེར་ལྟ་བུ་ཡིན། བོད་སྐད་ནི་མི་རིགས་འདིའི་སྲོག་རྩ་ཡིན། བོད་སྐད་ནི་ཕ་མེས་ཡང་མེས་ནས་བཞག་པའི་ཞབས་རྗེས་ཡིན། མུ་མཐུད་ནས་འདི་རིགས་ལ་རྒྱུན་འཁྱོངས་བྱེད་རྒྱུ་ནི་ཚང་མས་ལས་འགན་རེད།
དོན་དག་འདི་ནི་ཧ་ཅང་རླབས་ཆེ་ཞིང་དགའ་འོས་པ་ཞིག་རེད། དེ་རིང་འདི་གར་ཆིབས་བསྒྱུར་བསྐྱངས་པའི་བྱང་གི་དགོན་ཆེན་བཞི་ཡིས་དགེ་བཤེས་རྣམ་པ་དང་སློབ་གྲ་ཆེན་མོའི་དགེ་སློབ་རྣམ་པ་དེ་བཞིན་ཞིང་ཆེན་དང་ས་གནས་རིམ་པའི་འབྲེལ་ཡོད་སྡེ་ཁག་གིས་སྐུ་ཚབ་ཡོངས་ལ་པྱི་རྒྱལ་ན་ཡོད་པའི་བོད་མི་ཡོད་དོ་ཅོག་གིས་ཚབ་བྱས་ཏེ་འགའ་བསུ་དང་རྟེན་འབྲེལ་ཞུ།
དེ་ལྟ་བུའི་བོད་ཀྱི་སྐད་ཡིག་ཉམས་པ་སླར་གསོ་དང་མི་ཉམས་གོང་འཕེལ་གཏོང་རྒྱུ་འདི་ནི། བོད་གངས་ཅན་གྱི་ཆོས་དང་རིགས་གཞུང་གི་སྲོག་རྩ་ཡིན་ལ། མ་ཟད་ཆོལ་གསུམ་གྱི་བོད་མི་ལ་བཅིང་བའི་བརྩེ་དུང་གི་ལ་རྒྱ་ཞིག་ཀྱང་རེད། དེས་ན་རྒྱལ་ཕྱི་ནང་གི་བོད་རིགས་ཡོངས་ཀྱིས་རང་གི་སྐད་ཡིག་ལ་གཅེས་སྐྱོང་དང་མཐོང་ཆེན་འོག་ཉམས་པ་སླར་གསོ་དང་མི་ཉམས་གོང་འཕེལ་གཏོང་རྒྱུའི་འགན་ཡོད་ཕྱིར་འདི་ལ་དོར་སྣང་སྤྲད་རོགས། ལྷག་པར་དུ་ ཨ་རིའི་བོད་སྐད་རླུང་འཕྲིན་ཁང་སོགས་བོད་སྐད་བཤད་མཁན་རྣམས་ལ་ཀྱིས་དོར་སྣང་སྤྲད་རོགས་ཞུ་ལགས།
བོད་ནང་གི་མི་དག་ལུས་ངག་ཡིད་གསུམ་ནས་འགུལ་བཞིན་ཡོད། བྱེས་སུ་ཁ་ལས་གང་ཡང་མི་འགུལ་བ་ང་ལྟ་བུ་ཇེ་མང་དུ་འགྲོ་བཞིན་ཡོད།
བོད་ཀྱི་སྤྱི་སྐད་ཐོག་ལ་བསམ་བློ་མ་བཏང་ན་ཡུལ་ལུང་སོ་སོའི་རང་སྐད་ལ་བདག་སྐྱོང་ཇི་ཙམ་རྒྱབ་ཐུབ་མིན་གྱི་གནས་ལུགས་ངོས་འཛིན་དགོས་པ་གལ་ཆེན་པོ་རེད་བསམ་སོང་། བོད་ལ་མཚོན་ན་གནས་བབ་འདྲ་མིན་གྱི་དབང་གི་ད་བར་བོད་རང་གི་སྤྱི་སྐད་ཐོག་དོ་སྣང་མེད་པ་ཡུལ་ལུང་སོསོའི་རང་སྐད་ལ་བདག་སྐྱོང་བྱེད་ཏེ་བོད་རང་གི་སྤྱི་སྐད་ཐོག་ཉམས་ཆག་ཧ་ལས་པ་ཞིག་འགྲོ་ཡོད་པ་ནི་དཔེ་ན་ད་ལྟའི་འཆར་ཡུལ་ལུང་མི་འདྲ་བའི་བོད་མི་གཉིས་གཏམ་གླིང་བྱེད་སྐབས་སྐད་བརྡ་མ་ཁྲོད་ཚེ་རྒྱ་སྐད་ཐོག་གསལ་བཤད་བྱེད་པའི་ལམ་གསོ་ཞིག་ཆགས་ཡོད་ད་དུང་བཙན་བྱོལ་ནང་མཚོན་ན་དགོས་མེད་གྱི་ཕྱོགས་ཞིན་འདི་མཁྲིགས་འཛིན་བྱེད་ཏེ་མཐའ་ན་དུས་བབ་སོགས་སུ་ཟིན་བྲིས་པ་འགས་རང་རང་ཡུལ་པའི་སྐད་གྱི་ཐོག་ནས་ཟིན་བྲིས་སྤེལ་བཞིན་པ་མི་ཉུང་བ་ཞིག་རེད་
བོད་ཀྱི་སྐད་ཡིག་སྲུང་སྐྱོབ་བྱེད་རྒྱུ་ནི་མི་རེ་ངོ་རེའི་ལས་འགན་རེད། གཞིས་ལུས་བོད་མི་ཚོས་དཔའ་ངར་ཞུམ་མེད་ཀྱིས་ལས་འགུལ་འདི་འདྲ་ཞིག་སྤེལ་བར་ཡི་རངས་ཡོད། འདི་དང་ཕྱོགས་མཚུངས་སུ་བྱེས་སུ་གྱར་བའི་ང་ཚོས་ཀྱང་ཕ་སྐད་ར་མ་ལུག་འདི་འགྱེལ་ས་ནས་སྐྱོབ་དགོས་པའི་ལས་འགུལ་གཞི་རྒྱ་ཆེན་པོ་ཞིག་རྩོམ་དགོས་པར་གདའ།
འདི་ལྟ་བུའི་གསར་འགྱུར་རེ་མཐོང་དུས་རང་ཉིད་ལ་ནུས་པ་ཅི་ཡང་མེད་ཀྱང་འདི་ལྟར་བྱས་ན་བོད་པ་ཚོས་ཀྱང་རྡོག་རྩ་གཅིག་བསྒྲིལ་ཞིག་བྱེད་ཐུབ་ས་རེད་བསམས་ནས་སེམས་ཁོང་ན་སྤྲོ་སྣང་བན་བུན་ཞིག་རང་བཞིན་གྱིས་སླེབས་ཡོང་གི་འདུག
ཤེས་ཡོན་ལྷག་བསམ་གྱིས་ཕྱུག་པའི་སྣེ་ཁྲིད་པ་ཚོར་ཀླ་ཀློའི་དཔུང་གིས་འཇིགས་པ་མེད་པར་བསམ་དོན་ཡིད་བཞིན་འགྲུབ་པ་དང་། སྐུ་ཚེ་ཡུན་རིང་བརྟན་པའི་སྨོན་འདུག་དང་། རྗེས་སུ་ཡི་རང་ཡང་ཞུ་བཞིན་ཡོད།
ང་ཚོས་རང་ཉིད་ཀྱི་ཕ་སྐད་འདི་ཡང་སྲུང་ཐུབ་དང་མ་ཐུབ་པའི་གནས་སྐབས་འདི་འདྲ་ཞིག་ལ་སླེབས་དུས་ཚང་མས་རིག་པ་བསྒྲིམ་དགོས་པ་ཞིག་མ་རེད་དམ།
ཁོང་རྣམས་ཀྱི་ལྷག་བསམ་ལ་རྗེས་སུ་ཡི་རངས་ཡོད།
མདོ་སྨད་ས་ཡི་ཐིག་ལེ་ཙོང་ཁའི་ཡུལ།།
བསྟན་པའི་མེ་རོ་གསོ་སའི་གནས་ཀྱི་མཆོག།
སྔ་རབས་ཕྱི་རབས་མཁས་མང་འཁྲུང་བའི་སྡེ།།
སྒོ་གསུམ་གུས་བས་བྱམས་པའི་གླིང་དེར་འདུད།།
བཀླགས་ཟིན་
ལྷག་བསམ་རྣམ་དག་གིས་རྒྱབ་སྐྱོར་ཡོད།
ཕྱི་མའི་སྔ་ལམ་བསྙེགས་པའི་ཁྱོད་ཀྱི་ཕ།།
ཉལ་གདན་རློན་པར་འབྱར་བའི་ངེད་ཀྱི་ཕ།།
གསོན་པ་ཙམ་གྱི་ཁྱད་པར་ཡོད་པ་ལས།།
རེ་བའི་འཇའ་ཚོན་རིང་ནས་ཡལ་སོང་ཐལ།།
མཚོ་ཚང་བཀྲིས་ལགས་སུ་སྐྱོ་རོགས་བྱས་པ་ཡིན།
མཚོ་ཚང་བཀྲ་ཤིས་ལགས།
སྐུ་ཉིད་ལ་དེ་འདྲའི་དང་བླངས་ཀྱི་དམ་བཅའ་ཞིག་ཡོད་པར་ཡི་རངས་ཡོད་ལ། ཕུགས་འདུན་ཡིད་བཞིན་འགྲུབ་པའི་སྨོན་འདུན་ཡང་ལྷན་གཅིག་ཞུ། གཞན། དམར་གཞུང་གིས་ཁྱེད་ཀྱི་ཕ་ཡུལ་ལ་དེ་ལྟ་བུའི་ཚུལ་མིན་གྱི་བྱ་སྤྱོད་སྤེལ་གྱིན་ཡོད་པ་བདེན་ན། ང་ཚོའི་གསར་ཁང་ལ་འབྲེལ་བ་བྱོས་དང་། ང་ཚོ་ཕྱི་ཕྱོགས་ནས་འཇོན་པ་ནི་སྐྱིད་སྡུག་ལེགས་ཉེས་ཅི་བྱུང་གི་གནས་ཚུལ་རྒྱལ་སྤྱིའི་སྟིངས་ཆར་བསྐྱལ་རྒྱུ་དེ་ཡིན།
མཚོ་ཚང་བཀྲ་ཤིས་ལགས་ཀྱི་བསམ་ཚུལ་ཡི་རང་ཡོད། ང་ཚོ་བཙན་བྱོལ་སྤྱི་ཚོགས་ཡོད་དོ་ཅོག་གིས་གཅིག་སྒྲིལ་གྱིས་བོད་ཡིག་བོད་སྐད་ཉམས་པ་སླར་གསོའི་སེམས་ཤུགས་ཡོད་ན། མ་འོང་བོད་ཀྱི་རྩ་དོན་ལ་ལས་འགུལ་སྐད་འབོད་སྣ་ཚོགས་ལས་ཀྱང་ཁེ་ཕན་ཆེན་པོ་ཡོད་པར་སྣང་།
ངའི་ཕ་དམ་པ་ཁོང་དང་ངེད་བུ་སྤུན་གཉིས་ཀྱི་བསམ་དོན་འགྲུབ་པར་སྨོན། ང་རང་ཕ་དམ་པའི་དགོངས་བཞེས་ལྟར་ཕ་ཡུལ་སྐུ་འབུམ་ནས་སྟོད་རྒྱ་གར་འཕགས་པའི་ཡུལ་དུ་བོད་ཡིག་དང་བོད་སྐད་སློབ་པར་ཡོང་པ་ཡིན་ལ་མ་འོངས་པར་རང་ཡུལ་དུ་ལོག་ནས་ཡུལ་མི་རྣམས་ལ་བོད་སྐད་དང་བོད་ཡིག་རེ་སློབ་ཨེ་ཐུབ་འབད་རྒྱུ་དེ་ཡིན། འོན་ཀྱང་སྟབས་མ་ལེགས་པར་ངའི་གཅེན་པོས་བཙུགས་པའི་བོད་སྐད་སློབ་གྲྭ་དེ་ཟླ་ཤས་ནས་སྒོ་རྒྱག་དགོས་ཐུག་སོང་ལ་ངའི་ཕ་ཡང་ཡུན་རིང་མ་འགོར་བར་ཚེ་ལས་འདས་སོང༌། ད་རེབ་ངེད་ཕ་བུ་གསུམ་གྱི་བསམ་དོན་འགྲུབ་པར་སྨོན།
བཀླགས་ཟིན་རྗེས་སུ་ཡི་རངས་ཞུ།
ཧ་ཅང་ཡག་བྱུང་འདུག་རྗེས་སུ་ཡི་རངས་ཞུ། བྱེས་འབྱོར་བ་ཚོས་ཀྱང་དེ་དང་འདྲ་བ་ཤུགས་རྒྱག་དགོས་གལ་ཆེན་པོ་འདུག