ཉིན་གསུམ་རིང་གི་གསུང་ཆོས།

༧གོང་ས་མཆོག་གིས་སང་ཉིན་ནས་ཉིན་གསུམ་རིང་སོག་པོའི་དད་ལྡན་ཆོས་ཞུ་བར་འཇིགས་བྱེད་ལྷ་བཅུ་གསུམ་དང་བྱང་ཆུབ་ལམ་སྒྲོན་གྱི་གསུང་ཆོས་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༨ ཉིན་༧གོང་ས་མཆོག་རྒྱ་དཀར་ནག་གཉིས་ཀྱི་ས་མཚམས་མོན་རྟ་དབང་ཁུལ་ཏུ་ཞབས་སོར་བཀོད་དེ། དེར་ཡོད་མི་མང་ལ་གསུང་ཆོས་བཀའ་དྲིན་བསྐྱངས་ཤིང་མཛད་འཕྲིན་ལེགས་པར་གྲུབ་རྗེས་ཕྱི་ཚེས་ ༡༧  ཉིན་ཨི་ཊ་ལིའི་གྲོང་ཁྱེར་རོམ་ནང་སྐོང་འཚོགས་གནང་བའི་འཛམ་གླིང་གྲོས་ཚོགས་འཐུས་མིའི་བོད་དོན་ཚོགས་ཆེན་གྱི་ཚོགས་མགོན་དུ་ཆིབས་བསྒྱུར་གྱིས་བཀའ་སློབ་གནང་ཡོད་པ་དང་། ཕྱི་ཚེས་ ༡༩ ཉིན་ཕྱིར་རྒྱ་གར་དུ་ཞབས་སོད་བཀོད་ཅིང་། ཕྱི་ཚེས་ ༢༠ ནས་ ༢༢ བར་ལྡི་ལིར་མཛད་འཕྲིན་དག་བསྐྱངས་རྗེས། དེ་རིང་ཉིན་རྒྱབ་བཞུགས་སྒར་ངྷ་རམ་ས་ལའི་སེར་སྐྱ་མང་ཚོགས་ཀྱི་དགའ་དད་སྤྲོ་གསུམ་གྱི་ཆིབས་བསུ་དང་བཅས་ཕོ་བྲང་དུ་ཞབས་སོར་བཀོད་ཡོད་ལ། སང་ཉིན་ཕྱི་ཚེས་ ༢༤ ནས་ཉིན་གསུམ་རིང་༧གོང་ས་མཆོག་གིས་སོག་པོའི་ཆོས་ཞུ་པ་ ༣༠༠ ལྷག་གཙོས་པའི་དད་ལྡན་པ་ཡོངས་ལ་འཇིགས་བྱེད་ལྷ་བཅུ་གསུམ་དང་བྱང་ཆུབ་ལམ་སྒྲོན་གྱི་གསུང་ཆོས་གནང་རྒྱུ་རེད།