༧གོང་ས་མཆོག་གིས་ལྡི་ལི་བརྙན་འཕྲིན་ཁང་ལ་སྲིད་འཛིན་ཨོ་བྷ་མ་བོད་དོན་ཐད་ནས་རྒྱ་ནག་གི་ཐོག་གཉོམ་སོང་བ་མ་རེད། ཁོང་གིས་རྣམ་པ་གསར་པ་ཞིག་འདོན་གྱིན་ཡོད་པ་རེད་ཅེས་གསུངས་འདུག
ཕྱི་ཚེས་ ༢༢ ཉིན་༧གོང་ས་མཆོག་གིས་ལྡི་ལིའི་བརྙན་འཕྲིན་ཁང་གི་བཅར་འདྲི་དང་ལེན་གནང་སྐབས་སྲིད་འཛིན་ཨོ་བྷ་མའི་རྒྱ་ནག་གི་གཟིགས་སྐོར་དང་ཁོང་གི་བོད་དོན་གྱི་ལངས་ཕྱོགས་བཅས་ལ་བཀའ་ལན་གནང་ཡོད་པ་རེད། ༧གོང་ས་མཆོག་གིས་གསུངས་དོན། བོད་དོན་གྱི་ཕྱོགས་ནས་སྲིད་འཛིན་ཨོ་བྷ་མ་རྒྱ་ནག་གི་ཐོག་གཉོམ་སོང་བ་མ་རེད། རྣམ་པ་གསར་པ་ཞིག་བཏོན་པ་རེད། ཅེས་གསུངས་ཡོད།
བོད་པ་དང་བོད་དོན་རྒྱབ་སྐྱོར་བ་མང་པོ་ཞིག་གིས་ཐེངས་འདིར་སྲིད་འཛིན་ཨོ་བྷ་མ་མཆོག་པེ་ཅིན་དུ་ཕེབས་དུས་བོད་དོན་དེ་གལ་ཆེན་དོན་ཆེན་དུ་བརྩིས་ནས་གླེང་མ་སོང་བའི་སྐོར་ལ་སྐྱོན་བརྗོད་རིམ་པར་བྱས་དང་བྱེད་བཞིན་ཡོད་པ་རེད།
དེ་བཞིན་དུ་ཉེ་ལམ་༧གོང་ས་མཆོག་ཨ་ཤིན་ཊོན་ཌེ་སེ་ལ་ཕེབས་སྐབས་སྲིད་འཛིན་ཨོ་བྷ་མས་ཁོང་ལ་མཇལ་འཕྲད་མ་གནང་བའི་སྐོར་ལ་ཁོང་གིས། སྲིད་འཛིན་ཨོ་བྷ་མས་ངོས་རང་ལ་ཐུག་འཕྲད་མ་གནང་བ་དེར་ངོས་རང་བློ་ཕམ་བྱུང་མ་སོང་ཞེས་གསུངས་ཡོད་པ་རེད།
ཡང་ཁོང་གིས་ཕྱི་ཚེས་ ༢༤ ཉིན་སྲིད་འཛིན་ཨོ་བྷ་མ་དང་རྒྱ་གར་གྱི་སྲིད་བློན་མན་མོ་ཧན་སིན་རྣམ་གཉིས་ཝ་ཤིན་ཊོན་ཌེ་སེ་ནས་མཇལ་འཕྲད་སྐབས་སུ་སྲིད་འཛིན་ཨོ་བྷ་མས་རྒྱ་གར་གྱི་སྲིད་བློན་མཉམ་དུ་བོད་དོན་གླེང་ངེས་པའི་ཡིད་ཆེས་ཡོད་ཅེས་ཀྱང་གསུངས་ཡོད་པ་རེད།
ལས་མེད་ལང་ཚོ་རྒྱས་པའི་ཕྱུག་པོ་ཚོ། །དོན་མེད་སྟོང་གཏམ་བཤད་པའི་དཔྱད་ལྡན་ཚོ། །བོད་པའི་ལ་རྒྱ་རྩོད་པའི་དཀྲུགས་ཤིང་ཚོ། །དབྱངས་གསལ་སོ་བཞི་ཤེས་པའི་མཁས་པ་ཚོ། །
སྲིད་དོན་པའི་རྩེད་ཆས་སུ་གྱུར་བའི་བོད།
ཐེངས་འདིར་ཨ་རིའི་སྲིད་འཛིན་ཨོ་བྷ་མཱ་རྒྱ་ནག་གཙོས་པའི་ཨེ་ཤ་ཡའི་ཡུལ་གྲུ་ཁག་ལ་ལྟ་སྐོར་དུ་བསྐྱོད་ཡོད་པ་དང༌། ཨོ་བྷ་མཱ་ཐོག་དང་པོ་རྒྱལ་ས་ཝ་ཤིན་ཀྲོན་ནས་ཉི་ཧོང་ལ་ལམ་དུ་ཆས་སྐབས་ཀྱི་ཉིན་དེར་ང་རང་སྲིད་འཛིན་ཨོ་བྷ་མཱའི་ཕོ་བྲང་དཀར་པོའི་མདུན་དུ་གསར་འགོད་དུ་བསྐྱོད་པ་ཡིན། ཡིན་ན་ཡང་ཉིན་དེར་ཆར་བ་ཤུགས་ཆེན་བབ་པ་དང་རླུང་གཡུག་པ་ལ་བརྟེན་ནས་ངས་རང་ཉིད་ཀྱི་འདོད་པ་ཁེངས་པའི་གསར་འགྱུར་ཞིག་བརྙན་འཕྲིན་བརྒྱུད་རྒྱུད་བསྒྲགས་བྱ་ཐུབ་མ་སོང༌། མིའི་རིགས་འདི་ག་དུས་ཡིན་ན་ཡང ཁ་གཡོར་སའི་རྒྱུ་མཚན་ཞིག་འཚོལ་བར་དགའ་བས་ངས་ཀྱང་ཉིན་དེར་བརྙན་འཕྲིན་གསར་འགྱུར་འདོད་པ་ཁེངས་པ་ཞིག་ཡོང་མ་ཐུབ་པ་དེ་གནམ་གཤིས་ལ་འཁང་ར་བྱས་པ་ཡིན།
ཨོ་བྷ་མཱ་ཉི་ཧོང་ལ་འཕུར་བའི་ལམ་བར་ནས་བྱང་ཨ་མེ་རི་ཀའི་གྲོང་ཁྱེར་ཨ་ལ་སི་ཁཱ་རུ་གཟིགས་སྐོར་དུ་ཕེབས་ཏེ་དེར་ཡོད་པའི་དམག་མི་དང་མཇལ་འཕྲད་ཀྱིས། སྲིད་འཛིན་གྱིས་དམག་དོན་ཐད་ནས་ཨ་རིའི་གཞུང་གིས་ཨབ་གྷན་ནི་སི་ཐན་ནང་དམག་མི་ཁ་སྣོན་བྱ་དགོས་པ་དེ་གནད་འགག་ཆེ་ཤོས་སུ་ཆགས་ཡོད་པས། ཨབ་གྷན་ནི་སི་ཐན་ནང་དམག་མི་མང་དུ་གཏོང་རྒྱུ་ཐེངས་འདིའི་གཟིགས་སྐོར་སྐབས་དམག་དོན་གྱི་ཐད་ནས་གྲོས་མོལ་བྱ་རྒྱུ་ཡིན་པ་དང༌། མི་མང་གི་རྒྱབ་སྐྱོར་དང་དོ་སྣང་ཡོང་བར་འབད་པ་བྱ་རྒྱུ་ཡིན་པར་བརྗོད་ཡོད་པ་རེད། དེའི་རྗེས་ཉི་ཧོང་ནས་ཉི་ཧོང་གི་སྲིད་བློན་ཡུའུ་ཁའོ་ཧ་ཐོ་ཡ་མཱ་དང་མཉམ་དུ་མཇལ་འཕྲད་ཀྱིས་རྒྱལ་ཁབ་གཉིས་བར་མཉམ་འབྲེལ་བྱ་རྒྱུའི་གྲོས་མོལ་བྱས་ཡོད་པ་དང༌། ཉི་ཧོང་སྲིད་བློན་གྱིས་ཨ་རིའི་གཞུང་གིས་ཨབ་གྷན་ནི་སི་ཐན་ནང་དུ་དམག་མི་མང་དུ་གཏོང་རྒྱུར་རྒྱབ་སྐྱོར་ཤུགས་སྣོན་བྱ་རྒྱུའི་ཁས་ལེན་བྱས་ཡོད་པ་རེད་འདུག
དེའི་རྗེས་སེན་གྷ་ཕོར་རུ་ཨེ་ཤ་ཡའི་མགོ་ཁྲིད་ཚོ་ཚོགས་ཆེན་ཞིག་འཚོགས་པར་མཉམ་ཞུགས་ཀྱིས། སྐབས་དེར་འབར་མའི་དྲག་པོའི་དམང་དཔུང་གཞུང་གི་མགོ་ཁྲིད་དང་ཟུར་ནས་མཇལ་འཕྲད་ཀྱིས་འབར་མའི་ནང་གི་དམངས་གཙོ་དོན་གཉེར་བ་དང་ནོར་བྷེ་ཞི་བདེ་གཟེངས་རྟགས་བཞེས་མྱོང་མཁན་གྱི་འབར་མའི་གཞུང་གི་ཕྱོགས་འགལ་ཚོགས་པའི་ཚོགས་གཙོ་ལྕམ་ཨན་སང་སོན་སྐྱིས་མཆོག་གཙོས་པའི་འབར་མའི་ཆབ་སྲིད་བཙོན་པ་ཚོ་གློད་གྲོལ་ཡོང་དགོས་པའི་འབོད་སྐུལ་ཞུས་ཡོད་འདུག
གསར་འགྱུར་རེ་རེ་བཞིན་གོ་ནས་ཡོང་དུས་ཆུ་ཚོད་རེ་རེ་ལ་ཡང་སྡོད་གཟོད་མེད་པར་རྒྱལ་སྤྱིའི་དྲ་རྒྱ་ཁག་ལ་ཡང་སྐོར་བསྐྱར་སྐོར་བྱས། ཡིན་ན་ཡང་ཐེངས་འདིའི་ཨོ་བྷ་མཱ་ཡི་རྐང་རྗེས་སྤར་ས་རེ་རེ་ནས་བློ་ཕམ་རེ་ཁ་སྣོན་བྱ་དགོས་བྱུང༌། ཚེས་ ༡༦ ཉིན་སྲིད་འཛིན་ཨོ་བྷ་མཱ་རྒྱ་ནག་གི་གྲོང་ཁྱེར་ཧྲང་ཧེ་ནས་གྲོང་སྡེ་ཚོགས་ཁང་ཞིག་ཏུ་ཕེབས་ཏེ་རྒྱ་ནག་གཞུང་གིས་གོ་སྒྲིག་བྱས་ཡོད་པའི་སློབ་ཕྲུག་དང་དགེ་རྒན་མིང་ཅན་འགར་ཐུག་འཕྲད་ཀྱིས་གཏམ་བཤད་བྱས་ཡོད་འདུག ཨོ་བྷ་མཱས། སྟོབས་ཤུགས་ཆེ་བའི་ཨ་རི་དང་རྒྱ་ནག་གཉིས་ཀྱིས་སའི་གོ་ལའི་ཚ་དྲོད་ཀྱི་གནམ་གཤིས་འགྱུར་ལྡོག་ལ་འགྱུར་བ་གཏོང་བའི་ལས་འགུལ་སྤེལ་ཐུབ་པ་མིག་དཔེ་སྟོན་དགོས་ཞེས་བརྗོད་ཡོད་པ་རེད། ཡིན་ན་ཡང་རྒྱ་ནག་ནི་འཛམ་གླིང་ནང་མཁའ་རླུང་བཙོག་པ་བཟོ་མཁན་ཏེ་དུག་རླངས་ཕྱི་རུ་འདོན་མཁན་ཆེ་ཤོས་དེ་ཡིན། ཨོ་བྷ་མའི་སྲིད་གཞུང་གིས་རྒྱལ་སྤྱིའི་ཚོང་རའི་དཔལ་འབྱོར་ཉམས་རྒུད་དུ་འགྲོ་བཞིན་པ་གཙིགས་སུ་འཛིན་རྒྱུ་ཡིན་པ་བསྒྲགས་ཀྱིན་འདུག་ལ། ཨོ་བྷ་མས་ཀྱང་གོ་ལའི་ཚ་དྲོད་དེ་ཉེན་ཁར་གྱུར་ཚུལ་གླེང་སློང་བྱེད་ཀྱིན་འདུག
རྒྱལ་སྤྱིའི་སྒང་གི་ཚོགས་པ་རིགས་མི་འདྲ་བ་མང་པོ་ཞིག་དང་དཔྱད་བརྗོད་པ་ཚོས་ཐེངས་འདིར་ཨོ་བྷ་མཱར་རེ་བ་ཆེན་པོ་ཅིག་བཅིངས་ཡོད་ལ། ཨོ་བྷ་མཱས་འཛམ་གླིང་འདིའི་ཕྱི་ནང་གང་རུང་དུ་སྨྲེ་སྔགས་དང་འོ་དོད་མེད་པར་ཞི་བདེ་ལྷིང་འཇགས་ཤིག་བསྐྲུན་པར་འབད་པ་བྱ་རྒྱུའི་རེ་བ་བཅིངས་ཡོད། ཨོ་བྷ་མཱས་པེ་ཅིན་ནས་གཏམ་བཤད་རྙིང་པ་ཞིག་གིས་ཐེངས་འདིར་ལྟ་སྐོར་མཇུག་རྫོགས་པར་བྱེད་ལ་འཛམ་གླིང་འདིའི་ཤར་ནུབ་གང་སའི་མི་གྲངས་ཁྲི་སྟོང་མང་པོའི་རེ་བ་སྣང་མེད་བཏང་སོང་བ་མ་ཟད༌། ཆབ་སྲིད་དཔྱད་བརྗོད་པ་ཚོས་ཏེངས་འདིའི་ཨཽ་བྷ་མའི་ལྟ་སྐོར་ནི་གྲུབ་འབྲས་མེད་པ་ཞིག་ཏུ་ངོས་བཟུང་ཡོད། རྒྱུ་མཚན་ཨོ་བྷ་མ྄ཱས་ཐོག་མར་ཨོ་རིའི་ནང་ནས་མི་མང་དང་ཐག་ཉེ་བོ་བཏང་ཏེ་སློབ་གྲྭ་དང་ཚོགསཔ་འདྲ་མིན་མཉམ་དུ་བགྲོ་གླེང་རང་བཞིན་གྱི་ཚོགས་འདུའི་རྣམ་པ་བསྡུ་སྐོང་བྱ་རྒྱུའི་འཆར་གཞི་འཐེན་ཡང༌། རྒྱ་ནག་གཞུང་གིས་ཐོག་དང་པོ་ནས་རྣམ་པ་དེར་འདོད་མོས་དང་ཆོག་མཆན་མེད་པར་གོ་སྒྲིག་ཡོད་ཚད་རྒྱ་ནག་གཞུང་གིས་བྱས་ཡོད་འདུག འདི་ནི་ཁོང་སྲིད་འཛིན་ལ་བསྡད་པའི་ཟླ་དགུའི་རིང་གི་འདོད་ཐོག་ལ་མ་ཡོང་བ་དེ་གཅིག་པུ་ཡིན་པ་རེད།
ཨོ་བྷ་མའི་གཏམ་བཤད་རྙིང་པ་དེ་ནི་རྒྱ་ནག་གཞུང་ལ་མཚོན་ན་བ་སྤུ་ཙམ་ཡང་སྒུལ་ཐུབ་པ་མ་ཡིན་ཏེ། ཨོ་བྷ་མས་ཚོང་རའི་དཔལ་འབྱོར་ཆེད་དུ་བོད་འདི་ཁོང་གིས་རྒྱ་ནག་ལ་ངོ་སྲུང་བྱེད་དུ་བེད་སྤྱོད་བཏང་ཡོད་པའི་ཚོར་བ་བྱུང་ལ། འཛམ་གླིང་གིསྐད་གྲགས་ཆོད་པའི་ནོར་བྷེ་ཞི་བདེ་གཟེངས་རྟགས་དེ་ཡང་སྲིད་འཛིན་ཨོ་བྷ་མཱས་རིན་ཐང་མེད་པར་བཟོས་ཡོད་པ་རྒྱལ་སྤྱིའི་དཔྱད་བརྗོད་པ་ཚོས་བརྗོད་གྱིན་ཡོད་ལ། ཡང་སྲིད་འཛིན་ཨོ་བྷ་མཱ་ལ་འཛམ་གླིང་གི་ཤར་ནུབ་གང་སར་འགྲོ་བ་མིའི་གདོང་ལེན་བྱེད་བཞིན་པའི་མིའི་གཞི་རྩའི་ཐོབ་ཐང་གི་བཀའ་རྙོག་མང་པོ་སེལ་བར་རེ་བ་དང་ཡིད་ཆེས་བྱེད་དོན་ནི་ཁོང་ཉིད་ཐོག་མར་སྲིད་འཛིན་འོས་གཞིར་ཞུགས་སྐབས། བྱང་ཆ་ལྡན་ལ་ཡིད་སེམས་འགུག་པའི་གཏམ་བཤད་དེ་དག་གི་རེད་ཆེད་རེད་ལ། ཕྱེད་མི་རིགས་ནག་པོ་དང་ཕྱེད་ཁ་ཆེ་ཆོས་ལུགས་ལ་འབྲེལ་བའི་མཱེ་ཤལ་བྷི་རག་ཁཱི་ཨོ་བྷ་མཱ་ཡང་མི་རིགས་དབྱེ་འབྱེད་ཀྱི་སྤྱི་ཚོགས་ཁྲོད་ནས་འཚར་ལོངས་བྱུང་བ་དང༌། ཁོང་གི་མི་རིགས་ཁྲོད་དུ་འགྲོ་བ་མིའི་ཐོབ་ཐང་སོགས་ཀྱི་ཐད་ལ་ཕྱག་ལས་གནང་ཏེ་སྐུ་ཚེ་ཕུལ་བའི་རླབས་ཆེན་གྱི་སྐྱེས་བུ་དེ་འདྲ་བྱུང་མྱོང་ཡོད་པ་སོགས་གང་ལྟར་འཛམ་གླིང་མི་མང་གིས་ཁོང་ལ་ཡིད་ཆེས་སྔར་ཡོད་མེད་པ་ཞིག་བྱུང་ཡོད་པ་རེད། ཡང་ཨ་རིའི་སྤྱི་ཚོགས་རང་ལ་མཚོན་ན་ཕོ་བྲང་དཀར་པོའི་ནང་དུ་མི་རིགས་ནག་པོ་ཞིག་སླེབས་པ་ནི་དུས་རབས་སྔོན་མ་དག་གི་མི་སུ་ཡིས་ཀྱང་བློ་ཡིད་ལ་མ་ཤར་ཀྱང༌། དུས་རབས་འདིར་ཨ་རིའི་གཞུང་ནི་རིགས་རུས་ཁྱད་མེད་དང་སྐྱེས་ཁམས་ཁྱད་མེད། ཆོས་ལུགས་ཁྱད་མེད་ཀྱི་ཐོབ་ཐང་གི་ལྟ་ཚུལ་གཅིག་པ་ཡིན་པ་འཛམ་གླིང་མི་མང་ལ་མིག་དཔེ་སྟོན་པ་ཞིག་ཏུ་ཆགས་ཡོད་ཀྱང་ཨོ་བྷ་མཱ་ཁོང་རང་ཉིད་ཀྱིས་ཕྱག་ལས་དང་གཏམ་བཤད་ནི་འགལ་འདུ་ཅན་ཞིག་ཏུ་གྱུར་ཡོད་པ་རེད།
གང་ལྟར་ཉམས་ཞིབ་པ་མང་པོས་ཨོ་བྷ་མར་ནོར་བྷེ་ཞི་བདེ་གཟེངས་རྟགས་ཕུལ་གཏན་འཁེལ་བ་ལ་རྒྱུ་མཚན་གཉིས་ཡོད་པར་བརྗོད་ལ། ཕྱོགས་གཅིག་ནས་མི་རྣམས་ཀྱིས་་ཨོ་བྷ་མར་འགྲོ་བ་མིའི་ཐོབ་ཐང་གི་བཀའ་རྙོག་དང་དེ་བཞིན་རྡུལ་ཕྲན་མཚོན་ཆ་སོགས་ཚོད་འཛིན་གྱི་ཕྱག་ལས་གནང་བར་རེ་འབོད་མཚོན་པར་བྱེད་བཞིན་དང༌། ཡང་ཕྱོགས་གཞན་ནས་ཨོ་བྷ་མས་ཕྱག་ལས་དེ་ལྟར་མ་གནང་ཐབས་མེད་ལ་བཏང་ཡོད་པ་རེད་ཟེར། ཡིན་ན་ཡང་མི་མང་པོ་ཞིག་གིས་ཨོ་བྷ་མཱར་གཟེངས་རྟགས་དེ་ཕུལ་གཏན་འཁེལ་བར་སྔ་དྲག་རེད་ཟེར་ལ། ཡང་གཟེངས་རྟགས་ཕྱིར་འཐེན་བྱ་དགོས་པར་བརྗོད་མཁན་ཡང་བྱུང་ཡོད།
གང་ལྟར་ཨོ་བྷ་མཱ་ནི་ཨོ་བྷ་མའི་གཏམ་བཤད་ཁྲོད་ནས་མི་རྣམས་ཀྱི་སྣང་ཡུལ་དུ་གྱུར་བའི་ཨོ་བྷ་མཱ་ཞིག་མིན་པར་ཁོང་ནི་འགྲོ་བ་མིའི་རིགས་ཀྱིས་དངོས་སུ་གདོང་ལེན་བྱེད་བཞིན་པའི་དཀའ་ངལ་ལ་སྣང་མེད་གཏོང་མཁན་ཞིག་ཡིན་པ་མ་ཟད། བོད་མི་རིགས་ཐེངས་འདིར་དེ་ལས་ཀྱང་བློ་ཕམ་ཡིད་སྐྱོའི་གནས་སུ་སྐྱེལ་ཡོད། ཁོས་པེ་ཅིན་ནས་སྐད་གསེང་མཐོ་བོས་ཨ་རིའི་གཞུང་གིས་བོད་འདི་རྒྱ་ནག་གི་ཆ་ཤས་ཡིན་པར་ངོས་ལེན་བྱེད་ཀྱིན་ཡོད། ཅེས་བརྗོད་ཡོད་པ་རེད།
ཨོ་བྷ་མ་རྒྱ་ནག་ལ་སོང་དུས་སྐད་ཆ་གཙོ་བོ་བོད་དོན་བཤད་པ་ལ་ཡི་རང་ཡོད།
ད་དུང་མདང་དགོང་དབྱིན་ཇིའི་BBC གསར་འགྱུར་ནང་དུ། ལོ་གཉིས་ཀྱིས་རྗེས་ནས་རྒྱནག་གི་ཚོང་རྫས་ཀྱིས་འཛམ་གླིང་གི་ཨང་དང་པོ་ཟིན་རྒྱུ་ཡིན་པ་དང་། དཔལ་འབྱོར་འཕེལ་རྒྱས་ཀྱི་མགྱོགས་ཚད་ཀྱང་ཨང་དང་པོར་སླེབས་སྲིད་པའི་ཚོད་དཔག་བྱེད་ཀྱིན་འདུག ད་བསྡད་ཀིན་བསྡད་ཀིན་བོད་དང་བོད་དོན་ཟེར་ན་འཛམ་བུ་གླིང་འདིར་གླེང་ཐུབ་མཁན་གྱི་ཕྱིའི་རྒྱལ་ཁབ་གཅིག་ཀྱང་མེད་པ་འདྲ་ཆགས་སྲིད་པ། གནམ་ས་གཉིས་ཀྱིས་མཁྱེན། མགོ་ནག་བོད་འདིའི་ལས་འདྲ་བ་ཞིག་བསགས་ཡོད་ན།
ཨོ་སྦ་མས་བོད་ཀྱི་གནས་སྟངས་ཤེས་བཞིན་དུ་བོད་དོན་ཐད་ལ་དོན་ཕན་ལྡན་པའི་གླེང་སློང་གང་ཡང་བྱས་མ་སོང་། ད་དུང་དེ་ལས་ལྡོག་སྟེ་གཏམ་བཤད་ཀྱི་ཐོག་མ་ཉིད་ནས་བོད་རྒྱ་ཁོངས་སུ་བཅུག་བྱུང་། ཁ་ཞེ་མི་མཚུངས་པ་དང་གྲུབ་འབྲས་ཐོན་རྒྱུ་མེད་པའི་བོད་རྒྱ་འབྲེལ་མོལ་བསྐྱར་གསོའི་ལས་ནི་དུས་ཚོད་དང་། རྒྱུ་ནོར། བོད་མི་མང་གི་རེ་འདོད་སོགས་བསམ་བཞིན་ཆུད་ཟོས་སུ་གཏོང་གཞིར་འགྱུར་རྒྱུ་ལས་དེ་ལ་དགོས་པ་གཞན་གང་ཡང་མ་མཐོང་། ངའི་རྨོངས་འཆར་ལྟར་ན། ཨོ་སྦ་མ་བོད་དོན་ཕྱོགས་ནས་རྒྱ་ནག་གི་ཐོག་ལ་གཉོམ་སོང་བ་ཧ་ཅང་མངོན་གསལ་རེད་བསམ། དེ་མིན་ན་ཁོ་རང་བོད་ཀྱི་གནད་དོན་གླེང་ཡུལ་གཙོ་བོ་རྒྱ་དཔོན་ཚོའི་འཁྲིས་ལ་དངོས་སུ་སླེབས་ནས་ཀྱང་བོད་རྒྱ་ཁོངས་སུ་བཅུག་པ་དང་། ཡོངས་ཁྱབ་ཀྱི་འགྲོ་བ་མིའི་ཐོབ་ཐང་གི་སྐོར་ཙམ་ལས་བོད་ཀྱི་གཞི་རྩའི་གནད་དོན་གང་ཡང་གླེང་ཐུབ་མ་སོང་། རྒྱ་ནག་བཙན་དྲགས་པས་ཨོ་སྦ་མ་གཉོམ་སོང་བ་དང་། ཨོ་སྦ་མ་གཉོམ་པས་བོད་དང་བོད་ཀྱི་ཏཱ་ལའི་བླ་མ་གཉིས་ནི་སྲིད་དོན་པ་ཁོ་ཚོའི་རྩེད་ཆས་ལྟ་བུར་སྤྱོད་ཀྱིན་ཡོད་པ་ཡང་ཤུགས་ཀྱིས་གསལ་ཡོང་། ཨོ་སྦ་མ་གཉོམ་པ་མིན་ན་འཛམ་གླིང་ཡོངས་ཁྱབ་ཀྱིས་གུས་བཀུར་ཐོབ་པའི་ཞི་བདེའི་མི་སྣ་ཏཱ་ལའི་བླ་མ་མཆོག་ལ་མཇལ་འཕྲད་ཀྱི་དུས་ཚོད་ནར་འགྱངས་བཏང་བ་དང་། རྒྱ་ནག་པེ་ཅིན་ལ་ལྟ་སྐོར་དུ་སླེབས་མཚམས་རང་ནས་བོད་རྒྱ་ནག་གི་ཆ་ཤས་སུ་ངོས་ལེན་བྱས་པ། འགག་རྩའི་སར་བོད་ཀྱི་གནད་དོན་གང་ཡང་མ་གླེང་བ། འཆར་ཟླའི་མགོ་སྟོད་ནང་༧གོང་ས་མཆོག་དང་མཇལ་རྒྱུའི་ཁ་དན་ཡོད་པ་དེ་ཡང་ད་ལྟ་གྲགས་མེད་ཚོར་མེད་དུ་གྱུར་པ་བཅས་ནི་ཡོང་དོན་མི་འདུག་བསམ། ཡང་ང་ཚོས་རེ་བའི་སྣེ་མོར་རེ་བ་མཐུད་དེ་ཨོ་སྦ་མས་མི་རིང་བར་རྒྱ་གར་གྱི་སྲིད་བློན་མཉམ་དུ་བོད་དོན་གླེང་ངེས་པའི་རེ་བ་རྒྱག་གི་ཡོད་ཀྱང་། རྒྱ་གར་གྱིས་བོད་ཐོག་འཛིན་པའི་སྲིད་ཇུས་ནི་ང་ཚོར་རྒྱུས་མངའ་ཆེ་ཙམ་ཡོད་པ་ལྟར་ཡིན་རྒྱུ་རེད་བསམ།
དངོས་གནས་ཁྱོད་བདེན། ངའི་མིག་འདིས་ཨ་དང་ཝ་ནོར་བ་མ་མཐོང་བ་རེད། ངས་ཌེ་སེ་ཞེས་པ་ལ་འཁྲུལ་ཡོད་དམ་སྙམ་བྱུང་། དགོངས་དག།
ཨོ་བྷ་མས་རྒྱ་ནག་ལ་སྐད་ཆ་བཙན་པོ་བཤད་མ་ཐུབ།
དྲ་གྲོསག་ཁྲ་གླག་སྤྱང་གསུམ་གྱིས་གསལ་འགྲེལ་གནང་བར་དངོས་གནས་ཐུགས་རྗེ་ཆེ་ཞུ། གོང་ནས་ཝ་ཤིན་ཊོན་གླེང་དགོས་དོན་དེ་ཝ་ཤིན་ཊོན་ལ་ཨ་ཤིན་ཊོན་བྲིས་འདུག་པ་ལས་བྱུང་བ་རེད། དེ་དང་འབྲེལ་ནས་ཁྱེད་ཀྱིས་D.C.ལ་གསལ་འགྲེལ་གནང་བ་རེད། དངོས་གནས་ཁ་གསལ་གོ་བདེ་བོ་རེད། ཁྱོད་བཟང་ཐལ།
ཝ་ཤིན་ཊོན་ཌེ་སེ་ཟེར་ན། washington D.C ཟེར་བ་དེ་རེད། དེ་ནི་ཨ་མེ་རི་ཀའི་རྒྱལ་ས་རེད། ཨ་རིའི་ཤར་ཕྱོགས་སུ་ཡོད། སྤྱིར་ཝ་ཤང་ཊོན་ཟེར་ན། ཨ་རིའི་ནུབ་ཕྱོགས་སུ་ཡོད་པའི་མངའ་སྡེ་ཞིག་གི་མིང་རེད། D.C ཟེར་བའི་ཌེ་ནི་རྫོང་དང། སེ་ནི་ཀོ་ལིན་བྷི་ཡའི་བསྡུས་ཡིག་རེད། བོད་སྐད་ལྟར་ལབ་ན། ཀོ་ལིན་བྷི་ཡ་རྫོང་ངམ་རྫོང་ཀོ་ལན་བྷི་ཡ་ཟེར་བ་རེད།
ཨོ་བྷ་མས་ཞི་བདེ་གཟིངས་རྟགས་བཞེངས་གྲུབ་ཙམ། རྒྱལ་ཁབ་གཞན་ལ་ཕོག་ཐུག་མ་ཤོར་བ་བྱས་པ་ཡིན་པར་འདྲ།
༸ གོང་ས་མཆོག་གི་ཐུགས་དགོངས་ལྟར་བོད་མི་རིགས་ཀྱི་མདུན་ལམ་ལ་ཁ་ཚ་དགོས་ཐུག་སྐབས་སུ་ཕན་ཐོགས་གཅིག་འབྱུང་རབས་བྱས་ན་སྲིད་འཛིན་ཨོ་བྷ་མས་རྒྱ་ནག་གཞུང་ལ་གང་གསུངས་ཀྱང་འགྲིག་པ་ཞིག་རེད།
ངས་ཀྱང་དོན་དགོས་དང་མཐུན་པ་ཞིག་ལ་རྗེས་སུ་ཡིད་རངས་ཞུ་བཞིན་ཡོད།
རང་མིང་ངོ་མ་བོ་དེའི་འོག་ནས་མཆན་བུ་འདྲ་ཨེ་ཐོབས་ལྟོས་དང་སྐྲག་དགོས་ནི་མ་རེད། ཏཱ་ལའི་བླ་མར་ཅིག་བཤད་ཀོ་ཀི་འདོད་ནས་སྐྲག་ན་ཡང་ནོར་བ་རེད།
ལར་ནས་དྲ་གྲོགས་གཅན་བཟོད་ལགས་ཀྱིས་(ཨོ་བྷ་མ་གཉོམ་སོང་བ་མ་རེད། རྒྱ་ནག་བཙན་སོང་བས་རེད་) ཟེར་བ་དེ་སུ་ལ་ཟེར་གྱི་ཡོད། ཏ་ལའི་བླ་མར་ཟེར་ཡོད་པས། ངོ་མ་སྐྲག་གི་ཀོ།
དྲག་གྲོགས་གཅན་བཟོད་རྒྱམ་ལགས་ཁག་མི་འདུག ལུང་རིགས་རྒྱལ་ཧམ་པ་ཆེ་སའི་བྱུང་ཨ། ད་དུང་ནོར་མེད་མདོག་མདོག ཝ་ཤིན་ཊོན་དང་ཝ་ཤིན་ཊོན་ཌེ་སེ་གཉིས་ལ་ཁྱད་པར་ཡིན་ན་ཆིག་ཡོད་རེད་ཟེར། ཨ་ཤིན་ཊོན་ཌེ་སེ་ཟེར་བ་དེ་ག་རེ་ཟེར་ནི་རེད། གྲོགས་མཆོག་ཧམ་པ་ཆེན་པོ་བྱེད་རྒྱུ་ཡོད་མ་རེད།
ཨོ་བྷ་མ་གཉོམ་ནི་ཇེ་ཡིན། སྤྱང་བོ་འཁྲབ་སྟངས་ལ་ནོར་འཁྲུལ་ཞིག་ཤོར་བ་དེ་རེད།
ཨོ་བྷ་མ་གཉོམ་སོང་བ་མ་རེད།
བོད་ཀྱིས་ཁོ་ལ་ཕན་ཐོག་མེད་པས་རེད།
དེ་གཉིས་ལ་ཁྱད་པར་ཡོད་ཀི་ནམ་ཡང་ཟེར་གིན་མེད། གསལ་བོ་ཐེངས་གཅིག་བཤད། གཤམ་ནས་ཡར་བརྩིས་པའི་ཐིག་ཕྲེང་བཞི་བའི་ནང་དུ་འདུག
སྤྱན་གསལ་བོ་མེད་ན་འདིར་དཔར་གློག་གིས་ཁྱེར་ཡོད། གཟིགས་རོགས་གནོངས།
༼དེ་བཞིན་དུ་ཉེ་ལམ་༧གོང་ས་མཆོག་ཨ་ཤིན་ཊོན་ཌེ་སེ་ལ་ཕེབས་སྐབས་སྲིད་འཛིན་ཨོ་བྷ་མས་ཁོང་ལ་མཇལ་འཕྲད་མ་གནང་བའི་སྐོར་ལ་ཁོང་གིས། སྲིད་འཛིན་ཨོ་བྷ་མས་ངོས་རང་ལ་ཐུག་འཕྲད་མ་གནང་བ་དེར་ངོས་རང་བློ་ཕམ་བྱུང་མ་སོང་ཞེས་གསུངས་ཡོད་པ་རེད།༽འདི་ཁྱེད་ཚང་གི་ཚིག་ཇི་མ་ཇི་བཞིན་རེད།
ཝ་ཤིན་ཊོན་དང་ཝ་ཤིན་ཊོན་ཌེ་སེ་གཉིས་ལ་ཁྱད་པར་ཡོད་ས་རེད།
ཨོ་བྷ་མ་གཉོམ་སོང་བ་མ་རེད། རྒྱ་ནག་བཙན་སོང་བས་རེད།
ཨོ་རེད། ཨ་ཤིན་ཊོན་ཌེ་སེ་ཞེས་བྲིས་འདུག ཝ་ཤིན་ཊོན་ཡིན་རྒྱུ་རེད།