དབུས་ཕྲུག་ཚེ་རིང༌།
༡༽
བྱ་དངོས་གང་ཞིག་ཡིན་ཀྱང་འཕེལ་རྒྱས་ཀྱི་ཡང་རྩེ་ནས་གུད་པ་དང་གུད་པའི་མཐར་རྒྱས་པ་ནི་དངོས་པོའི་གཤིས་ལུགས་ཡིན། ང་ཚོ་གངས་ཅན་པ་ཚོ་ཡང་འདས་པའི་ལོ་རྒྱུས་ནང་ཆབ་དཔལ་རིག་གསུམ་གྱི་མངའ་ཐང་དགུང་དུ་སྙེག་མྱོང་ལ། ད་ཆ་གུད་པའི་མཐར་ལྷུང་སོང་བ་རེད། འཛམ་གླིང་གི་མི་རིགས་དང་རྒྱལ་ཁབ་སུ་འདྲ་ཞིག་ཀྱང་ལོ་རྒྱུས་ཀྱི་ཐེམ་སྐས་འདི་འགྲིམས་མ་མྱོང་བ་མེད་ཚོད་རེད། མི་ལོ་ལྔ་བཅུ་ལྷག་ཙམ་ང་ཚོ་འདི་ལྟར་གྱར་དགོས་དོན་ཡང༌། ང་ཚོའི་སྤྱི་ཚོགས་ཁྱོན་ཡོངས་ཀྱི་སློབ་གསོའི་རྨང་གཞི་ཞན་པ་དང༌། བཟོ་ལས་ཚན་རིག་གི་ཤེས་བྱ་དང་གསར་གཏོད་ཀྱི་ལམ་བུར་དོགས་འདྲོགས་ཀྱི་བཀག་རྡོ་མང་བ། འདི་ལྟར་ཕྱོགས་ལྷུང་གི་བསམ་བློའི་འདུ་ཤེས་གཏིང་ཟབ་པས་ང་ཚོ་འདི་ལྟར་དྲུད་འོང་བ་རེད། འོན་ཀྱང་སྙིགས་དོར་བཅུད་ལེན་གྱིས་དེང་རབས་ཀྱི་འོད་སྣང་ལ་ཁ་ཕྱོགས་ཏེ་དཀའ་ཚེགས་ཆེ་བའི་ང་ཚོའི་མདུན་ཕྱོགས་ཀྱི་ལམ་བུར་དུས་རབས་ཀྱི་དཔལ་ཡོན་མངོན་འགྱུར་ཡོང་བར། ང་ཚོ་རང་ཉིད་ནས་འགོ་འཛུགས་བྱེད་ཐུབ་ན། རྟ་མཆོག་ལས་ཀྱང་འགྲོས་མྱུར་བའི་དུས་རབས་ཀྱི་འཕོ་འགྱུར་ཞིག་གིས་ང་ཚོ་ཡང་འདི་ལྟར་ལུས་མི་སྲིད།
༢༽
འོ་ན་ང་ཚོས་ཅི་ཞིག་ལས་དགོས་སམ་ཞེ་ན། སྔ་འདང་ཕྱི་འདང་གིས་འདས་པའི་ལོ་རྒྱུས་དང་ད་ལྟའི་དུས་རབས་ཀྱི་མདུན་ལྗོངས་ལ་བསམ་གཞིགས་གཏིང་ཟབ་བྱས་ཏེ་ང་ཚོའི་ཁོར་ཡུག་དང༌། མི་རིགས་ཀྱི་དགོས་མཁོར་འཚམ་པའི་བཅོས་བསྒྱུར་ལེགས་པོ་བྱེད་དགོས། དེ་ཡང་གལ་འགངས་ཆེ་ཤོས་ནི། ཤེས་ཡོན་སློབ་གསོའི་སྐོར་ཡིན། འཐུས་སྒོ་མ་ཚང་བའི་ད་ལྟའི་སློབ་གསོ་ལས་བྱིས་པ་དང་གཞོན་ནུའི་སེམས་ཁམས་དང་འཚམ་པའི་སློབ་ཚན་ཁག་བཅོས་སྒྲིག་དང༌། དགེ་རྒན་གྱི་ཡོན་ཚད་དང་སློབ་གསོའི་ནུས་རྩལ་གོང་འཕེལ་བཏང་སྟེ་ཚད་ལྡན་གྱི་འོས་སྦྱོང་དང་ཡང་ན། ཤེས་འཇོན་ལྡན་པའི་དགེ་རྒན་གྱི་དཔུང་ཁག་གསར་པ་འཛུགས་དགོས་རྒྱུ། སློབ་མའི་བསམ་བློ་བསྐྱེད་སྲིང་དང༌། རྩོམ་རིགས་ཀྱི་ནུས་རྩལ་གོང་འཕེལ་ཡོང་ཆེད་གཟེངས་བསྟོད་གྱ་ནོམ་པའི་སློབ་ཆུང་དང༌། སློབ་འབྲིང་མཐོ་སློབ། དེ་མིན་གྱི་ཁྱབ་ཁོངས་ནང་ལོ་རེར་ཐེངས་གཉིས་ཙམ་རེ་འགྲན་བསྡུར་གྱི་གར་སྟེགས་གསར་པ་བསྐྲུན་རྒྱུ།
དེ་བཞིན་དེང་གི་སྤྱི་ཚོགས་ཀྱི་ཁ་ཕྱོགས་དང་ཁྲོམ་རའི་གནས་སྟངས་བཞིན་དཔལ་འབྱོར་གྱི་དགོས་མཁོ་དང༌། མི་རིགས་ཀྱི་ལྟ་ཚུལ་ལྟར་བཤེས་གཉེན་ཚོར་གུས་བཀུར་གྱི་འདུ་ཤེས་བསྐྲུན་དགོས། མི་རིགས་སོ་སོའི་སེམས་ཁམས་ལ་དབྱེ་ཞིབ་མ་བྱས་པར་བཟང་ཚད་དང་ཡོད་ཚད་ཕྱི་ཕྱོགས་སུ་རློམ་ཞིང༌། ཀུན་སྤྱོད་རྒྱ་ཡན་དུ་ཤོར་བའི་སློབ་གྲྭའི་སྒྲིག་གཞིའི་མ་ལག་བསྒྱུར་བཅོས་གཏོང་རྒྱུ་དང༌། རིམ་པ་ཁག་གི་འགོ་ཁྲིད་ཚོ་སློབ་གྲྭ་ཁག་ཏུ་ཕེབས་སྐབས་ངེས་པར་དུ་སློབ་ཕྲུག་དང༌། དགེ་རྒན་གྱི་བསམ་ཚུལ་བསྡུ་ལེན་ཚད་ལྡན་གནང་དགོས་རྒྱུ། རང་རིགས་དང་གཞན་བོད་ཀྱི་རིག་གཞུང་ལ་དོ་དབྱིངས་ཡོད་པའི་མི་སྣ་སུ་རུང་གི་ཆེད། ཕན་ཚུན་བསམ་བློའི་བར་ཐག་སྦྲེལ་བ་དང་མི་རིགས་ཀྱི་སྐད་ཡིག་གོང་འཕེལ་སླད། གཞུང་གིས་གཙོ་གཉེར་གནང་བའི་དྲ་ཚིགས་འཐུས་སྒོ་ཚང་བ་ཞིག་གསར་འཛུགས་དགོས། འཕྲལ་ཕུགས་ཀྱི་དགོས་མཁོར་གཞིགས་ཏེ་རྒྱ་བོད་དབྱིན་གསུམ་གྱི་ཚད་ལྡན་ཡིག་བསྒྱུར་ཁང་ཞིག་ངེས་པར་དུ་དགོས་རྒྱུ། མི་རིགས་ཀྱི་སྐད་ཡིག་ནི་མི་རིགས་ཀྱི་བླ་སྲོག་ཡིན་ཞེས་བརྗོད་པ་ལྟར། རྨང་ནས་སྐད་ཡིག་ཉམ་ཞན་དུ་གྱུར་ན་མི་རིགས་འདི་ཉིད་ཀྱི་ཟུངས་ཁྲག་ཉམས་ཏེ་འཆི་རྒྱུ་ལས་མེད། དེས་ན་ང་ཚོ་གཞན་དབང་སྟབས་བསྟུན་ཡིན་ཡང་གཙོ་ཆར་མི་རིགས་ཀྱི་གནད་དོན་ལ་གཞིགས་ཏེ་སློབ་གསོའི་ཁ་ཕྱོགས་སྤོར་དགོས། འདི་ནི་མི་རིགས་ཤིག་འཆི་ལམ་ནས་སྐྱོབ་རྒྱུའི་དཔྱང་ཐག་ཉག་གཅིག་ཡིན་ངེས།
༣༽
ཆབ་སྲིད་དང་དཔལ་འབྱོར་གྱི་སྒྲོམ་གཞིའི་ཐད་ནས། ད་ལྟའི་བར་གྱི་བོད་མིའི་རྩ་འབོར་གྱི་བརྒྱ་ཆ་མང་ཆེ་བས་འོས་བསྡུའི་ཆ་ཤས་ལེན་མི་ཐུབ་པ་དེར་ལེགས་བཅོས་དང༌། སྐབས་གང་དུ་ཡང་གཞུང་འཛིན་ཚོགས་པ་ཞིག་རུལ་སུངས་དང་བག་མེད། ལེ་ལོའི་དབང་དུ་མ་སོང་བའི་ཆེད། དག་ཐེར་དང་འགྲན་སློང་གིས། འཛིན་སྐྱོང་ཚགས་ཚུད་དང་ལས་དོན་ལེགས་སྒྲུབ་ཡོང་ཆེད་སྲིད་དོན་ཚོགས་པ་ཞིག་ངེས་པར་དུ་ཡོད་དགོས། གྲོས་ཚོགས་གོང་འོག་གི་ལམ་ལུགས་དང་མི་རེར་འོས་ཐོབ་གཉིས་ཀྱི་ཐོབ་ཐང་ལ་སྣོན་འཕྲི་སྤོར་གཅོག་དགོས་རྒྱུ། ཇི་སྐད་དུ། དབུ་མ་བཞི་བརྒྱ་པ་ལས། ཇི་ལྟར་ཀླ་ཀློ་གཞན་སྐད་ཀྱིས།། བཟུང་བར་མི་ནུས་དེ་བཞིན་དུ།། འཇིག་རྟེན་པ་ཡིས་མ་གཏོགས་པར།། འཇིག་རྟེན་བཟུང་བར་མི་ནུས་སོ།། ཞེས་གསུངས་པ་ལྟར། ཐ་ན་ཆོས་ལུགས་ཀྱི་དྲི་ངད་ཀྱིས་ཡོངས་སུ་འཐུལ་འོང་བའི་འབྲུག་རྒྱལ་ཁབ་ཀྱི་གྲོས་ཚོགས་ནང་དུ་ཡང་ཆོས་ལུགས་ཀྱི་མི་སྣ་བཞུགས་མི་ཆོག་པ་བཞིན། རབ་བྱུང་ན་ཆོས་ལུགས་ཀྱི་སྤྱི་འཐུས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཚོ། དུག་གསུམ་གྱི་ཡོ་ལངས་འཚུབ་མའི་འཇིག་རྟེན་གྱི་འདུ་རར་འཚོགས་མི་དགོས་པར་སྟོན་མཆོག་ཐུབ་དབང་གི་ཞབས་ཟུང་གི་རྗེས་ཤུལ་བསྙེགས་ཏེ་ཆོས་སྲིད་ཀྱི་ལམ་ལུགས་དབྱེ་འབྱེད་དགོས་རྒྱུ།
སྤྱི་འཐུས་རྣམས་གྲོས་ཚོགས་ཀྱི་འཐུས་མིར་སྐབས་གཉིས་ཡན་ཕེབས་མི་ཆོག་པ། དེ་ནས་སྐབས་གཅིག་ངེས་པར་དུ་བར་སྟོང་འཇོག་དགོས་རྒྱུ། རྒྱུ་མཚན་ནི་སྤྱི་འཐུས་རྣམས་གྲོས་ཚོགས་སུ་དུས་ཡུན་རིང་དྲགས་ན་ཕྱོགས་གཅིག་ནས་ཤེས་འཇོན་ཅན་གྱི་གཞོན་སྐྱེས་ཚོར་གོ་སྐབས་མི་རེག་པ། གཉིས་ནས་གྲོས་ཚོགས་ནང་བསམ་བློ་རྒྱུན་འབྱམས་ཀྱི་རང་བཞིན་ཞིག་ལས་ལྟ་ཚུལ་གསར་པའི་མཐོ་རླབས་འཕྱུར་མི་ཐུབ་པ། གཞན་ཡང་གལ་སྲིད་ཁྱེད་རང་རྒྱལ་ཁབ་མེད་པའི་སྐྱབས་བཅོལ་བ་ཞིག་ཡིན་ན་མ་གཏོགས། གཞན་ནུབ་ཕྱོགས་རྒྱལ་ཁབ་ཀྱི་གཞུང་ཁག་ལ་འབོད་སྐུལ་གྱིས། བོད་མིའི་ངོ་བོ་མཚོན་པའི་རང་བཙན་ལག་དེབ་ཀྱི་ནུས་པ་གོང་འཕེལ་དང་གཅིག་འགྱུར་ཡོང་བ་བཟོ་རྒྱུ། ལོ་རེ་ནས་ལོ་རེར་བོད་མིའི་གྲངས་འབོར་ནུབ་ཕྱོགས་ཁུལ་དུ་མང་དུ་འགྲོ་བ་དང༌། ད་དུང་ནུབ་ཕྱོགས་ལ་ཁ་ཕྱོགས་པའི་འགྱུར་འགྲོས་འདི་ནམ་ཡང་འགོག་མི་ནུས་གཤིས། གཞུང་གིས་སྔོན་ཚུད་ནས་ནུབ་ཕྱོགས་ཁུལ་དུ་བོད་མིའི་ཆོས་རིག་དར་སྤེལ་དང༌། རྩ་དོན་རྒྱུན་འཁྱོངས་ཡོང་རྒྱུའི་སྒྲིག་འཛུགས་ཁྱབ་སྤེལ་དང་ས་བརྟན་གཏོང་དགོས་རྒྱུ།
༤༽
དཔལ་འབྱོར་གྱི་གནད་དོན། དཔལ་འབྱོར་ནི་ཆོས་དང་སྲིད། གནའ་དང་དེང་གང་དུ་ཡང་མེད་མི་རུང་བའི་རྒྱུན་སྤྱོད་དངོས་པོ་ཞིག་ཡིན་ལ། དུས་རབས་རིམ་བྱུང་ནང་ཆབ་སྲིད་དང་དམག་དོན་གྱི་རྒྱལ་ཁ་གཙོ་བོ་དཔལ་འབྱོར་གྱིས་བླངས་ཡོད། ལྷག་དོན་དུས་རབས་འདིའི་ནང་དྲང་བདེན་དང་ཁྲིམས་ལུགས། ཁེ་གྲགས་དང་དབང་ཤུགས་སོགས་ཡོད་ཚད་དཔལ་འབྱོར་གྱིས་བསླུ་ཉོ་བྱེད་ཀྱིན་ཡོད། ང་ཚོར་བདེན་པ་ཡོད་བཞིན་དུ་ཇི་ནི་ཝར་འཚོགས་པའི་འགྲོ་བ་མིའི་ཐོབ་ཐང་ལྷན་ཚོགས་སུ་ལོ་རྟག་པར་ང་ཚོ་ཕམ་འགྲོ་བ་ནི་རྒྱ་ནག་གི་དཔལ་འབྱོར་ནུས་ཤུགས་ཀྱིས་བཟོས་པ་རེད། འདི་ནི་དཔེ་མཚོན་རག་པ་ཙམ་ཞིག་རེད། དེར་བརྟེན་ང་ཚོས་གཞིས་ཆགས་ཁག་དང་རྒྱ་གར་ནང་གི་བོད་མི་རྣམས་ལྷིང་འཇགས་དང་ཆིག་སྒྲིལ། ཡུན་རིང་གི་འཚོ་གནས་ལ་འགན་ལེན་ཞིག་བྱེད་བསམ་ན། ངེས་པར་དུ་དུས་རབས་ཀྱི་འཕུར་མཆོང་ལ་བརྟགས་ཏེ་གཞུང་གི་གོ་སྒྲིག་དང་གལ་ཆེའི་ལམ་སྟོན་འོག སྤྱི་ཡོངས་ཀྱི་ཆ་ནས་ལོ་རེར་ཟླ་བ་གསུམ་ཙམ་ལས་མེད་པའི་བལ་གོས་དགུན་ཚོང་ཙམ་མ་ཡིན་པར། རྒྱ་གར་ནང་གཞུང་སྒེར་གྱི་བཟོ་གྲྭ་ཁག་དང་དེ་མིན་གྱི་བསམ་བློ་གསར་པའི་ཚོང་ལས་ཐོན་བསྐྱེད་ཀྱི་རྣམ་པ་གསར་པར་ཁ་ཕྱོགས་དགོས། དེ་མིན་གཞུང་གིས་ས་གནས་ཁག་སོ་སོར་དེང་རབས་དཔལ་འབྱོར་ལམ་ལུགས་ཀྱི་བྱེད་ཐབས་གཙོ་གྲས་དངུལ་གྱིས་དངུལ་གསོག་པའི་བརྒྱུད་ལམ། རྒྱ་གར་གཞུང་དང་སྒེར་གཉེར་གྱི་དངུལ་ཁང་དང༌། དེ་མིན་ཁེ་ལས་ཁག་སོ་སོར་དངུལ་བུན་བཅོལ་གྱི་ལམ་ལུགས་རྣམས་ཤེས་ལྡན་མི་སྣ་གོ་སྒྲིག་གིས་ས་གནས་ཚང་མར་ལམ་སྟོན་བྱེད་དགོས།
༥༽
མདོར་ན་ང་ཚོས་སྒལ་ཚིགས་སྒྲེང་ཞིང་རང་ཉིད་ཀྱི་རྐང་པར་བརྟེན་ནས་ལངས་དགོས་ན། ཤེས་ཡོན་དང་དཔལ་འབྱོར། ཆབ་སྲིད་ཕྱོགས་གསུམ་ལ་མི་རིགས་རང་མཚན་པའི་བསམ་སྤྱོད་དང༌། དུས་རབས་དང་འཚམ་པའི་སྒོ་ནས་བཅོས་བསྒྱུར་མཐར་ཕྱིན་པ་བྱེད་དགོས། ཇི་སྲིད་ང་ཚོར་གསར་སྤེལ་དང་མདུན་མཆོང་གི་སྙིང་སྟོབས་མེད་སོང་ན། དེ་སྲིད་དུ་ཡར་རྒྱས་དང་སྔོན་ཐོན། དུས་རབས་གསར་པ་ཞེས་པ་རྣམས་ང་ཚོའི་རྨི་ལམ་ཡིན་ལ་མིང་ཚིག་འདི་དག་ང་ཚོར་བེད་མེད་རང་རེད།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
གཤིས་ཀ་
ངའི་གཉིས་ཀ་ཡིན།་
ང་ལ་གཞན་གྱིས་བསྟོད་ཀྱང་མི་ཆོག་པ་མེད་ལ་རང་གིས་ངོམ་ཡང་མི་འགྲིག་པ་ཞིག་མེད་པའི་ཚོད་ཡིན་པ་ལ་རང་ཉིད་སྤོབས་པ་ཡོད། རྒྱུ་མཚན་ནི་སུ་ཞིག་གིས་བདེན་པ་བདར་གྱི་ཡོད་ན་ང་དེ་ལ་དགའ་ཞིང་དེའི་ཕྱོགས་ནས་ཀ་ལང་ལང་བྱེད་པ་ནི་ངའི་གཉིས་ཀ་ཡིན། ངའི་མིང་ལ་ཨ་ལ་ལ་ཞེས་བཏགས་པ་དེ་ཡང་ངའི་མིང་གི་རྣམ་གྲངས་ཤིག་ཡིན་ལ་དེ་ལྟར་བཏགས་པའི་ཚུལ་ཡང་བོད་གངས་ཅན་དུ་མིང་འདོགས་ལུགས་ལ་དངོས་མིང་དང་བཏགས་མིང་དེ་ལས་ཀྱང་ཁ་གསལ་ན་འདོད་རྒྱལ་དང་རྗེས་གྲུབ་ཟེར་བ་ཞིག་ཡོད་པ་དེའི་འགྲོ་ལུགས་ཀྱིས་བརྗོད་དོན་གྱི་ཅ་ནས་བཏགས་པ་ཞིག་ལས་དེ་གསང་མིང་ཞིག་གང་ནས་ཡིན། བོད་ཀྱི་དུས་བབ་ཚང་གིས་ཀྱང་འདི་འདྲའི་བསམ་འཆར་འདོན་སའི་མཐུན་རྐྱེན་ཞིག་བསྐྲུན་པ་དེ་ཡང་གཅིག་གཅིག་ལ་ཁ་གསེགས་སྣ་གསེགས་བྱེད་ས་ཞིག་གང་ནས་ཡིན།ངས་འདི་ལ་བསམ་འཆར་སྤེལ་བ་དེ་ཡང་དངོས་དོན་དང་མཐུན་མིན་དང་གཅིག་རྒྱབ་གཅིག་ལང་བྱས་པ་ཙམ་མ་ཡིན་པར་བདེན་དོན་རྒྱབ་ལང་བྱས་ཡོད་མེད་རྒྱ་ཅེའི་དྲ་གྲོགས་རྣམས་ཀྱིས་མཁྱེན་པའི་ཡིད་ཆེས་ལས་ཁྱེད་དང་ཁ་རྩོད་དང་ཚིག་མཚོན་འདེབས་འདོད་མེད། རྒྱུ་མཚན་ཡང་ཁྱེད་རང་ནི་ང་རིན་པོ་ཆེའི་གཞན་དབང་དུ་སོང་ཐལ་ཆེ་བའི་གཞོན་སྐྱེ་གསར་བུ་མཐོང་ཐོས་ཅུང་དབེན་པ་ཞིག་ལས་མེད་པ་མཐོང་ཐུབ་པས་ཡིན།
ཨེ་ནད་པ་ལགས་ཁྱེད་ལ་ནད་ཤིག་ཡོད་པ་དེ་ནི་བྱིའུ་ཕྲུག་ཚེ་རིང་གིས་ལག་ལེན་མི་ཐུབ་པའི་སྟོང་གཏམ་དེ་ཁྱེད་ཀྱི་ཀླད་པའི་ནང་དུ་གསང་བ་ཆེན་མོ་ཤིག་ཆགས་ནས་ཀླད་ནད་ཕོག་པ་རེད་འདུག་སྙམ།
ཆོས་སྲིད་ཀྱི་ཕྱོགས་ནས་གསང་བ་ཞིག་ཡོད་པ་ང་ཅོ་རིས་ཤེས་ཁུ་མོ་ཡིན་ཡང་བྱིའུ་ཕྲུག་ཞིག་གི་སྟོང་གཏམ་དེར་ང་ཅོ་རི་ནམ་ཡང་འཁྲུལ་མི་སྲིད།
རང་གི་ཀླད་ནད་མི་ཤེས་པ།
གཞན་ལ་བསླབ་བྱ་མ་རྒྱག་ལྭོ།
རང་ཉིད་སླ་ཁྲིད་མི་ཤེས་པ།
གཞན་ལ་ཕེབས་ཤོག་མ་གསུངས་ལྭོ།
ཅོ་རི་ཉི་མ་ལགས་ཡོད་ཚད་ཕྱི་གསལ་ནང་གསལ་ཞིག་བཟོ་དགོས་པ་དེ་ཕྱོགས་ཅིག་ཁོ་ནའི་བསམ་ཚུལ་ཙམ་ལས་དོན་གནད་མང་པོ་ཞིག་གི་ཐད་ཆོས་སྲིད་གཉིས་ལ་སྦས་གསང་གི་གནད་ལུགས་གལ་ཆེ་ཞིག་ཡོད་པ་དེ་ཁྱེད་ཀྱི་ཤེས་མི་འདུག
དཔེར་ན་གསང་བསྔགས་རྡོ་རྗེ་ཐེག་པའི་བསྟན་པ་དེ་སྐྱེ་བོ་ཡོད་ཚད་ལ་ཕྱི་གསལ་ནང་གསལ་ལྟར་བརྗོད་དགོས་པ་ཞིག་ག་ལ་ཡིན།
དུ་དུང་སྲིད་ཕྱོགས་ནས་བཤད་ན་རྒྱ་ནག་དང་བོད་གཉིས་ཀྱི་གནད་དོན་ཐད་ལ་ཡོད་ཚད་གསལ་པོར་བཟོ་དགོས་པ་ཞིག་མ་ཡིན་པར་གནས་ཚུལ་ཁ་ཤས་གསང་རྒྱ་དམ་པོར་བཟུང་དགོས་པའང་གལ་གནད་ཆེ་བའི་གྲས་ཤིག་རེད།
ཨོ་ཧཧ་ཧ་ཧ་ཧ་ཧ། ཨ་ལ་ལ་རིན་པོ་ཆེན་ལགས། ཁ་སྔོན་དུས་བབ་རྩོམ་སྒྲིག་པ་ལ་དྲི་བ་བྲིས་པ་དེར་ཁྱེད་ཀྱིས་ལན་རྒྱག་ཁུལ་བྱས་སོང་དེ་རིང་ཡང་བྱིའུ་ཕྲུག་ལ་དགག་པ་རྒྱག་དུས་ཁྱེད་ལ་ན་ཚ་ཡོང་དོན་ཅི་རེད་དམ།
ཨ་ལ་ལ་ཁྱེད་ལ་ཅི་ཞིག་དོན་དག་ཡོད་ཅི་ཞིག་གསུངས་ཀྱི་ཡོད་དམ། དེ་མིན་ང་ཅོ་རི་ལ་རྩོད་པ་རྒྱག་འདོད་ཀྱིན་འདུག་གམ།
རྟ་དཀར་པོས་རི་རྩྭ་ཟ་ཉིན་མོ། ཕག་ནག་པོ་མཆིན་པ་ན་དོན་ཇི།
ཁྱེད་སྐྱེ་ཕོ་ལུས་ལན་པའི་མི་ཞིག་ཡིན་ན་རང་གིས་རང་ལ་མིང་ལྷག་མ་བཏགས་ནས་དངོས་མིང་ཐོག་ནས་ཕེབས་དང།
ཀ་ཡེ་ཅོ་རི་བ། ཁྱེད་ཀྱི་བསམ་ཚུལ་དང་བཤད་ཚུལ་འདི་ལྟ་བུ་ཞིག་གིས་དབུས་ཕྲུག་ལ་འགྲན་བཟོད་པ་ལྟ་ཞོག་སྤུ་ཉག་གཅིག་ཀྱང་སྒུལ་ཐུབ་ས་མ་རེད། གང་ཞེ་ན། དབུས་ཕྲུག་གིས་ཅི་བཤད་པའི་ཁ་ཕྱོགས་ཙམ་ཡང་ཁྱེད་ཀྱིས་ཤེས་མི་འདུག་ག ད་དུང་སྟོད་འགག་སྔོན་པོ་ཅན་ཞེས་ཚིག་མཚོན་འདྲ་བཏབ་ནས་དེ་དག་ཀྱང་ཁྱིམ་སྤངས་ནས་རབ་ཏུ་བྱུང་སྟེ་ན་བཟའ་མནབ་པ་ཞིག་ལས་ཚོད་ཚོད་ཚོད་ཅིག་གང་ནས་ཡིན་སྲིད།
གི་དང་གིས་གཉིས་བརྗེ་པོ་རྒྱག། དེ་བྱིའུ་ཕྲུག་ཁྱེད་ཀྱི་ལས་འགན་རེད།
ཚུར་ཉན་དང་དབུས་ཕྲུག་ཚེ་རིང་ལགས། མིང་དབུས་ཕྲུག་མ་བཏགས་བྱིའུ་ཕྲུག་འདོགས།
དབུས་སྤྱི་པའི་མིང་དེ་མི་འཚམ་ཁུ། གཏམ་བཤད་ཚོད་ཐམས་ཅད་བྱིས་གཏམ་རེད།
ཁྱེད་ང་ཡི་སྐྱོན་ཞིག་མཐོང་བ་དེ། ཚིག་དག་ཆ་མེད་པས་ཅོ་རི་ལེན།༔
ངས་ཁྱེད་ཀྱི་སྐྱོན་ཞིག་མཐོང་བ་དེ། དོན་དག་ཆ་མེད་པའི་ཚེ་རིང་ལེན།༔
དབུས་ཕྲུག་ལགས་ཚེ་ཕྲུག་ལགས།
ཇི་སྐད་དུ། དབུ་མ་བཞི་བརྒྱ་པ་ལས། ཇི་ལྟར་ཀླ་ཀློ་གཞན་སྐད་ཀྱིས།། བཟུང་བར་མི་ནུས་དེ་བཞིན་དུ།། འཇིག་རྟེན་པ་ཡིས་མ་གཏོགས་པར།། འཇིག་རྟེན་བཟུང་བར་མི་ནུས་སོ།། ཞེས་གསུངས་པ་ལྟར། ཐ་ན་ཆོས་ལུགས་ཀྱི་དྲི་ངད་ཀྱིས་ཡོངས་སུ་འཐུལ་འོང་བའི་འབྲུག་རྒྱལ་ཁབ་ཀྱི་གྲོས་ཚོགས་ནང་དུ་ཡང་ཆོས་ལུགས་ཀྱི་མི་སྣ་བཞུགས་མི་ཆོག་པ་བཞིན། རབ་བྱུང་ན་ཆོས་ལུགས་ཀྱི་སྤྱི་འཐུས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཚོ། དུག་གསུམ་གྱི་ཡོ་ལངས་འཚུབ་མའི་འཇིག་རྟེན་གྱི་འདུ་རར་འཚོགས་མི་དགོས་པར་སྟོན་མཆོག་ཐུབ་དབང་གི་ཞབས་ཟུང་གི་རྗེས་ཤུལ་བསྙེགས་ཏེ་ཆོས་སྲིད་ཀྱི་ལམ་ལུགས་དབྱེ་འབྱེད་དགོས་རྒྱུ། ཞེས་གསུངས་པ་དེར་བསམ་ཚུལ་ཞུ་འདོད་པའི་རྒྱུ་མཚན་ནི། དེ་རིང་ངས་སྤྱི་འཐུས་གྲོས་ཚོགས་ཀྱི་གློག་བརྙན་ཆ་ཚང་ཞིག་བལྟས་པ་ཡིན་སྤྱི་འཐུས་གྲོས་ཚོགས་ནང་དུ་གྲོས་ཆོད་ཀྱི་སྐོར་རུ་དགེ་བཤེས་གཡང་དྲུང་རྒྱལ་མཚན་གྱིས་བལ་ཡུལ་ནང་གི་བོད་མི་ཉམ་ཐག་རྣམས་ཀྱི་འཚོ་བའི་དཀའ་ངལ་མཐོང་ཐུབ་པ་མ་ཟད་ཁ་མ་ཡིན་དོན་གྱི་སྤྱི་འཐུས་གྲོས་ཚོགས་ཀྱི་རྭ་བ་ནང་དུ་རེ་བསྐུལ་ཞུས་པར་མཐོང་དུས་སེམས་པ་དགའ་ཡོང་བ་ཞིག་དང་སྤྱི་འཐུས་གྲོས་ཚོགས་དེ་དོན་དང་ལྡན་ཞིག་རེ་དྲན་གྱིན་འདུག དེ་མ་ཟད་དགེ་བཤེས་སྟོད་འགབ་སེར་པོ་དང་སྔོ་པོ་གྱོན་པ་ཚོས་སྤྱི་དངུས་ལྐོག་ཟ་མི་བྱེད་པ་ཡིད་ཆེས་ཞིག་ང་ཅོ་རིའི་སེམས་ལ་རྩ་བ་བརྟན་དུ་འགྲོ་སོང། རྒྱུ་མཚན་ནི། ང་གྲྭ་ལོག་ཞིག་གིས་ཉམས་མྱོང་གི་ཐོག་ནས་བཤད་ན་གྲྭ་ས་གྲྭ་ཚང་གིས་ཚོང་ལས་ཞིང་ལས་བཟོ་ལས་ལ་སོགས་དཔལ་འབྱོར་འཛུགས་བསྐྲུན་སྐབས་སུ་ཡར་རྒྱས་འགྲོ་ཐུབ་པའི་རྒྱུ་རྐྱེན་གཙོ་བོ་ནི་ལས་བྱེད་པ་གྲྭ་བ་རྣམས་ཀྱིས་རྒྱུ་འབྲས་ཉམས་ལེན་བྱས་ནས་སྤྱི་དངུལ་ལྐོག་ཟ་མ་བྱས་པས་རྒྱུ་མཚན་གྱིན་རེད། དེ་འདྲ་ཡིན་དུས་ང་ཚོར་དགོས་པའི་སྤྱི་འཐུས་ནི་བོད་མི་ཉམ་ཐག་རྣམས་ལ་ལྟ་སྐྱོང་དང་དཔལ་འབྱོར་འཛུགས་བསྐྲུན་བྱེད་ཐུབ་པ་དང་༧གོ་ས་མཆོག་གི་དགོངས་གཞི་དང་དགོངས་པ་གཞིར་བཟུང་བས་ཐོག་ནས་བྱ་བ་གྲུབ་འདེབས་བྱེད་རོགས་ཀྱི་སྤྱི་འཐུས་དགོས་པ་མ་ཡིན་ནམ། དབུས་ཕྲུག་ཁྱེད་ཀྱིས་སྟོད་འགལ་སེར་སྔོ་གྱིན་པའི་སྤྱི་འཐུས་རྣམས་འཇིག་རྟེན་འཁོར་བ་པ་མིན་པའི་གྲྭ་བའི་སྤྱི་འཐུས་མི་འགྲིག་འདུག་ལབ་པ་དེ། གཅིག་ནས་ཁྱེད་ཀྱིས་འཇིག་རྟེན་འཁོར་བ་ངེས་མ་ཟིན་པ་དང་གཉིས་ནས་བོད་སྤྱི་དོན་ལ་རྟིང་ཟབ་པོ་དཔྱད་བྱེད་ཀྱི་བློ་རྒྱ་མེད་པས་རེད། དཔེ་ན་གས་ཟག་དེ་འཁོར་བ་པ་ཡིན་མིན་ནི་ཟག་བཅས་ཉེར་ལེན་གྱི་ཕུང་པོ་ཡོད་མེད་ལ་ལྟ་དགོས་པ་ཡིན་དུས་སྟོད་འགལ་སྔོ་སེར་གྱོན་པའི་སྤྱི་འཐུས་ཚོ་ཟག་བཅས་ཉེར་ལེན་གྱི་ཕུང་བོ་དང་ལྡན་པས་ཕྱིར། དགག་ཕྱོགས་ནས་བཤད་ན་༧གོང་ས་མཆོག་ཡང་འབྲུག་རྒྱལ་ཁབ་ཀྱི་གྲོས་ཚོགས་ནང་དུ་ཆོས་ལུགས་ཀྱི་མི་སྣ་བཞུགས་མི་ཆོག་པ་བཞིན་དུ་ཡིན་པ་ཐལ། ཁྱམ་ནས་ཁྱམ་མེད་པའི་རབ་ཏུ་བྱུང་བ་ཡིན་པས་ཕྱིར། དཔེ་ན་སྟོད་འགལ་སྔོ་སེར་གྱོན་པའི་སྤྱི་འཐུས་བཞིན་ཞེས་རྟོག་གེ་རིག་པའི་གནད་པ་བཏབ་ན་ཁྱེད་ལ་ཇི་ཞིག་ལབ་ཀྱི་ཡོད་དམ།་ཧཧཧཧཧཧཧཧཧ
དབུས་ཕྲུག་ལགས་ཀྱིས་རྩོམ་ཡིག་ཡག་པོ་ཞིག་སྤེལ་འདུག་ཐུགས་རྗེ་ཆེ།ཡིན་ནའང་དེ་ལྟར་སྤེལ་མཁན་མང་ཙམ་བྱུང་སོང་ཡང་ལག་ལེན་དེ་ཙམ་མི་འདུག།ངས་ལྟས་ན་ཁྱེད་ཤེས་ཡོན་ཡོད་མཁན་ཞིག་ཡིན་པ་མ་ཟད་ཁའང་བདེ་པོ་ཞིག་ཡོད་པ་འདྲ།ད་དུང་ཕྱག་ལས་ཐོག་ནས་འཇོན་ཐང་ཞིག་ངོམ་ཐུབ་ན་དེ་ལས་ཀྱང་བཟང་བ་འདུག།སྤྱིེར་ཁྱེད་ཀྱིས་ཕྱག་ལས་ག་རེ་གནང་གི་ཡོད་མེད་མ་ཤེས་ཀྱང་།ངས་ཁྱེད་ལ་རེ་བསྐུལ་དེ་ཡང་ཀྱག་ཀྱག་མིན།ཁྱེད་ལྟ་བའི་ཤེས་ཡོན་ཅན་རྣམས་ཀྱིས་ཁ་བཤད་གཅིག་བུ་མ་ཡིན་པར་ལག་ལེན་ཡང་དེ་བཞིན་གནང་ཐུབ་ན་མི་བཟང་ངམ།ད་སྐབས་བོད་གཞུང་གཏན་སློབ་ཁག་ཏུ་ཤེས་ཡོན་ཐུར་ཤོར་ངོ་མ་འགྲོ་བཞིན་འདུག།སོ་སོའི་སྦྱིན་བདག་ལའངགཏང་ཡིག་ཡག་པོ་ཞིག་བྲིས་ཐུབ་ཀྱིན་མི་འདུག་པས་དེ་ལྟ་བུའི་ཤེས་ཡོན་གྱིས་གསར་སྤེལ་བྱ་ཐུབ་ཨེ་ཡོང་།སྔར་ཡིན་ན་བོད་གཞུང་གཏན་སློབ་ཅེས་ཚང་མས་དགའ་པོ་བྱས་ས་ཞུག་རེད་འདུག།ད་ལྟ་ཉམས་ཆག་ཏུ་འགྲོ་བཞིན་ཡོད་པ་ནི་ཧ་ཅང་ཕངས་པོ་ཞིག་མ་རེད་པས།
གསར་སྤེལ་བྱ་དགོས་ངོས་ཤིག་རེད།ཡིན་ནའང་ཡོད་པ་རྣམས་ཉམས་ཆག་ཏུ་གཏང་ནས་གསར་སྤེལ་རྗེས་སུ་བསྙེག་ན་དྲེད་མོས་ཕྱི་བ་ཟེར་བལྟར་མི་ཡོང་ངམ་སྙམ།
བསྟན་པ་ཡར་འཕེལ་ལགས་ཟམ་གདོང་བླ་མས་དབུས་ཕྲུག་ལ་འགྲན་བཟོད་པ་འདུག་གམ། འགྲན་མི་བཟོད་ན་༧གོང་ས་མཆོག་གིས་འགྲན་བཟོད་པ་འདུག་པས་ཧཧཧཧཧཧཧཧ སྐྱེ་པ་ཕོ་ལུས་ལེན་ནས་མོ་གཏམ་བཤད་པས་མི་བུ་ཁྱེད་ལྟ་བུ་དུས་བབ་དྲ་ཐོག་རེ་གཉིས་སྲིད་པ་ཞིག་རེད་དོ།
དབུས་ཕྲག་ལགས་ཀྱི་གསུང་ལ་འགྲན་བཟོད་པ་སུ་ཡང་མི་འདུག
གོང་གི་དྲ་གྲོགས་ཚོས་ངའི་རྩོམ་ཡིག་འདིར་བསམ་ཚུལ་གསུངས་པ་ལེགས། འོན་ཀྱང་ཞུ་རྒྱུ་ཞིག་ལ། ཅོ་རི་ཉི་མ་ལགས། དང་ཐོག་ཁྱེད་ཀྱིས་དག་ཡིག་ལ་གཟབ་དགོས་ཞེས་དེ་སྔོན་ནས་བཤད་ཡོད། གཞན་ཁྱེད་ཀྱིས་ངའི་རྩོམ་ཡིག་ནང་ནས་ཆུ་ཐིགས་ཅིག་བླངས་ཏེ་འགོག་ཁུལ་བྱས་འདུག་ཀྱང་། ཕལ་ཆེར་ཁྱེད་རང་སྤྱི་ཚོགས་ལ་རྒྱུས་མངའ་ཡོད་མཁན་ཞིག་མིན་པ་འདྲ། བཙན་བྱོལ་བོད་གཞུང་གིས་དང་ཐོག་བལ་ཡུལ་གཙོ་བྱས་ཏེ་གདན་གྱི་བཟོ་གྲྭ་བཙུགས་ཡོད་པ་བདེན་པ་རེད། འོན་ཀྱང་གདན་གྱི་བཟོ་གྲྲྭ་སྒོ་རྒྱག་དགོས་པའི་རྒྱུ་རྐྱེན་ཁྱེད་ཀྱིས་བརྗོད་པ་ལྟར་མ་རེད། དེ་ནི་སྐབས་དེར་གདན་གྱི་བཟོ་གྲྭའི་ནང་བལ་ཡུལ་ནང་གི་ཕྲུ་གུ་ལོ་གཞོན་མང་པོ་ངལ་རྩོལ་ལ་ཡོད་པའི་དབང་གིས། ཡུ་རོབ་གཙོ་བོར་གྱུར་པའི་ཕྱི་རྒྱལ་ཡུལ་གྲུ་ཁག་ནས་དྲོ་སོབ་སོབ་དང་། བཟོ་རྩལ་མཐོ་བའི་གདན་གྱི་སྒྲུབ་ཆར་འགྲོ་བའི་མིའི་ཐོབ་ཐང་དང་། རང་དབང་བེད་སྤྱད་དེ་གདན་དེ་ཚོ་ལ་ོན་མ་སོན་པའི་ཕྲུ་གུ་མང་པོས་ངལ་རྩོལ་བྱས་ཏེ་བཟོས་པ་རེད་ཅེས། གང་སར་ཁྱབ་བསྒྶགས་ཤུགས་ཆེ་བྱས་ཡོད། མ་ཟད་བརྙན་འཕྲིན་ཡང་བཟོས་ནས་བསྟན་ཡོད་སྐོར་འདུག གོ་སྐབས་དེ་བཟུང་ནས་རྒྱ་གཞུང་གིས་རིན་གོང་ཅུང་དམའ་བའི་གདན་མང་པོ་བཟོས་ཏེ་རྒྱལ་སྤྱིའི་བོད་གྲུམ་གྱི་ཁྲོམ་ར་དེ་འདྲ་བྱས་ནས་འཕྲོགས་པ་རེད། ཤེས་སོང་ངམ། དེ་སྐབས་ཡལ་ཡུལ་དུ་གཞུང་དང་སྒེར་གྱི་གདན་གྱི་བཟོ་གྲྲ་མང་པོ་སྒོ་བརྒྱབ་ཡོད། དེ་ནས་བཟུང་སྒེར་གཉེར་ཁེ་ལས་བ་ཚོས་ཚོང་ལས་གསར་པར་ཁ་ཕྱོགས་པ་རེད། འོན་ཀྱང་གཞུང་གིས་ཚོང་ལས་གཞན་ལ་དོ་སྣང་གནང་མེད་པ་འདྲ།
དབུས་ཕྲུག་ལགས་ཁྱེད་ཀྱིས་ལག་ལེན་ཐོག་ཡོང་ཡ་མེད་པའི་སྐད་འདྲ་ཆག་ཆག་མང་པོ་ཞིག་གསུངས་ཡོད་པ་གཞི་ན་རྩོམ་པ་པོའི་མང་ཙམ་དང་ལྟོ་གོས་རེ་རག་མདོག་ཁ་པོ་འདུག
དཔེ་ན། ཡུན་རིང་གི་འཚོ་གནས་ལ་འགན་ལེན་ཞིག་བྱེད་བསམ་ན། ངེས་པར་དུ་དུས་རབས་ཀྱི་འཕུར་མཆོང་ལ་བརྟགས་ཏེ་གཞུང་གི་གོ་སྒྲིག་དང་གལ་ཆེའི་ལམ་སྟོན་འོག སྤྱི་ཡོངས་ཀྱི་ཆ་ནས་ལོ་རེར་ཟླ་བ་གསུམ་ཙམ་ལས་མེད་པའི་བལ་གོས་དགུན་ཚོང་ཙམ་མ་ཡིན་པར། རྒྱ་གར་ནང་གཞུང་སྒེར་གྱི་བཟོ་གྲྭ་ཁག་དང་དེ་མིན་གྱི་བསམ་བློ་གསར་པའི་ཚོང་ལས་ཐོན་བསྐྱེད་ཀྱི་རྣམ་པ་གསར་པར་ཁ་ཕྱོགས་དགོས། ཞེས་གསུངས་འདུག་པ་འདིར་བསམ་ཚུལ་ཞིག་ཞུ་འདོད་པ་ནི།
མི་ལོ་མང་པོའི་རིང་དུ་རྒྱ་གར་བལ་ཡུལ་ནང་དུ་བཙན་བྱོལ་གཞུང་གི་གདན་བཟོ་གྲྭ་དང་ཚོང་ཁང་ཟ་ཁང་རྣམས་ཀྱི་ཡོང་འབབ་དཔོན་ངན་ཟ་ངོམས་ཅན་རྣམས་ཀྱིས་ལྐོག་ཟ་བྱས་ནས་ཡོང་འབབ་བོད་གཞུང་ལ་མེད་པའི་རྐྱེན་གྱིས་སྒོ་རྒྱག་པ་མ་ཡིན་ནམ།
ཁྱེད་ཀྱིས་བཟོ་ལས་དང་ཚོང་ལས་གསར་པ་ཁ་ཕྱོགས་དགོས་ཞེས་པ་དེ་སྒོ་རྒྱག་མཁན་ཟམ་གདོང་བླ་མའི་སྙན་དུ་གསོལ་ན་དགའ་ལེ་རེད།
དེ་རིང་གི་ལག་ལེན་ཐོག་ཡོང་མིན་དཔྱོད་མི་ཤེས་པའི་མི་ཞིག་གིས་བོད་མི་རིགས་ཀྱི་མདུན་ལམ་སྣེ་ཁྲིད་མདོག་དེ་ནི་ཇི་འདྲའི་སྙིང་རྗེ་བ་ལ་ཨང།
གཞན་ལ་ལྟ་བའི་མིག་ཡོད་ཀྱང་རང་ཉིད་ལྟ་ན་མེ་ལོང་དགོས།
རང་བློ་ནང་དུ་མ་བསྡུས་ན་སྐྱོན་རང་གིས་མཐོང་བ་དཀའ། ཞེས་ས་སྐྱ་ལེགས་བཤད་ཀྱི་ཚིག་འདིའི་གོ་བ་ལེན་ཐུབ་པ་དགོས།
དབུས་ཕྲུག་ལགས།་་་ཁྱེད་ཀྱིས་སེམས་ཤུགས་ཀྱིས་ཀུན་ནས་བསླངས་ཏེ་བྲིས་པའི་རྩོམ་དེར་གོ་རྒྱུ་ཆེན་པོ་འདུག་པས་ངས་ཁྱེད་ལ་དགའ་བསུ་ཞུ།་་་ཁྱེད་ཀྱིས་གསུངས་པ་ལྟར་ནུབ་ཕྱོགས་སུ་བོད་མི་གནས་སྤོས་བྱེད་བཞིན་པ་དེར་སུས་ཀྱང་བཀག་འགོག་བྱེད་མི་ཐུབ་ལ།་་་ངས་བསམ་ན་རྒྱ་བལ་འབྲུག་གསུམ་དུ་གནས་ཀྱང་བོད་ཀྱི་རིག་གཞུང་དང་ཡ་རབས་སྤྱོད་བཟང་གི་བུ་ཕྲུག་ཞིག་གསོ་སྐྱོངས་བྱེད་ཐུབ་པའང་ངེས་པ་མེད།་་་བོད་མི་རིགས་ཀྱི་འདུ་ཚོགས་ཆེ་བའི་ཡུལ་ལུང་གང་ཞིག་ཡིན་ནའང་བཙན་བྱོལ་གཞུང་གིས་རིག་གཞུང་གི་གོ་རྟོགས་སྤེལ་བར་དོ་སྣང་ཆེ་ཙམ་གནང་དགོས་འདུག་་་་དམིགས་གསལ་ཨ་རི་སོགས་ནུབ་ཕྱོགས་སུ་ཡོད་པའི་བོད་རིགས་གཞོན་སྐྱེས་ཚོར་དབྱར་ཁའི་གུང་གསེང་དང་སྟབས་བསྟུན་ཏེ་བོད་ཀྱི་རིག་གཞུང་ལ་དོ་སྣང་སླེབས་པའི་ཆེད་དུ་གཞུང་གིས་ལམ་སྟོན་དང་ཕྱག་ལས་ཤིག་འགོ་འཛུགས་དགོས་འདུག་་་་དེ་མིན་ཕྱིའི་རིག་གཞུང་གི་ཤུགས་རྐྱེན་འོག་ང་ཚོའི་མི་རབས་རྗེས་མ་ཚོ་བོད་ཀྱི་རིག་གཞུང་གི་དབུལ་བའི་མི་རིགས་ཤིག་ཆགས་རྒྱུ་རང་རེད་འདུག
༡༩༥༩ ལོར་བོད་རྒྱ་མིས་བཙན་འཛུལ་བྱས་ནས་རྒྱལ་ཁ་ཐོབ་པའི་ཡིད་ཆེས་ཆེན་པོ་བྱས་པ་དང་སྦྲགས་༸ ཏྭ་ལའི་བླ་མ་ཕྱི་རྒྱལ་དུ་ཤོར་ཟིན་ཡང་འཛམ་གླིང་འདི་སྟེང་ཡར་ལངས་ཐུབ་པའི་ཡིད་ཆེས་ཁྱོན་ནས་བྱས་མེད།
འོན་བཏང་མི་ལོ་ལྔ་བཅུའི་ནང་ཕྱི་ལོགས་སུ་ཡོད་པའི་༸ གོང་ས་ཏྭ་ལའི་བླ་མ་མཆོག་གི་སྐུ་ཚེའི་མཛད་འཕྲིན་དང་མཚན་སྙན་ནི་འཛམ་གླིང་ས་སྟེང་དུ་འགྲོ་བ་མི་རྣམས་ཀྱི་བསམ་ཡུལ་ལས་འདས་པ་ཞིག་རྒྱས་པ་དང་དེའི་ཐུགས་བརྩེའི་བཀའ་དྲིན་གྱི་ཞབས་འོག་ཏུ་འཁོད་པའི་ཕྱི་ནང་བོད་རིགས་ཡོངས་ཀྱི་སྙིང་སྟོབས་འགྱུར་མེད་དེས་ད་ཆ་བོད་དོན་དེ་འཛམ་གླིང་གང་སར་ཁྱབ་ཏེ་རྒྱ་ནག་གི་བཀའ་ངལ་ཆེ་ཤོས་དེ་ཆགས་ཡོད།
༸ གོང་ས་མཆོག་དང་། བཙན་བྱོལ་གཞུང་། ཕྱི་ནང་བོད་རིགས་ཡོངས་ཀྱི་ཆོས་དང་། སྲིད་དང་། རིག་གཞུང་། ཤེས་ཡོན། འཚོ་གནས་སོགས་ཕྱོགས་གང་སར་བསྡོམས་རྩིས་ཅིག་བརྒྱབ་ན་མི་ལོ་ལྔ་བཅུའི་ནང་ཡར་རྒྱས་དང་། གྲུབ་འབྲས་བསམ་ཡུལ་ལས་འདས་པ་ཞིག་བྱུང་ཡོད་སྟབས་ང་ཚོའི་མདུན་ལམ་ལ་རེ་བ་དང་ཡིད་ཆེས་ཀྱི་ཁེངས་ནས་བསྡད་ཡོད།
ཡིན་ནའང་དབུས་ཕྲུག་གིས་གསུངས་པ་ལྟར་ཡར་རྒྱས་ལ་མཐའ་མེད་སྟབས་ང་ཚོས་སོ་སོའི་ཞན་ཆ་རྣམས་ལ་ངོས་འཛིན་དང་ཡོ་བསྲང་བྱེད་དགོས་ལ་ཡར་རྒྱས་ལ་ཡིད་སྨོན་བྱས་ཏེ་དགའ་བའང་བསྒོམ་དགོས་པ་ཞིག་རེད།
དབུས་ཕྲུག་ཚེ་རིང་ལགས། ཐེངས་འདིར་ཁྱེད་ཀྱིས་སྐུ་ལས་ཞེ་དྲགས་བསྐྱོན་འདུག ངས་ཁྱེད་ལ་ཐུགས་རྗེ་ཆེ་ཞུ་རྒྱུ་མ་ཟད་སྐུ་ཚེ་རིང་བའི་སྨོན་འདུན་ཡང་ཞུ་འདོད་བཅོས་སྨིན་དུ་བྱུང་། ཁྱེད་ཀྱིས་བཤད་པ་དེའི་ནང་དུ་མི་བདེན་པ་གཅིག་ཀྱང་མི་འདུག ངས་ཁྱེད་ལ་དྲན་སྐུལ་ཞིག་ཞུ་འདོད་བྱུང་བ་ནི། འདི་ལྟ་བུའི་སེམས་ཤུགས་ཤིག་བཟུང་ནས་སྐད་ཆ་ཞིག་བཤད་ཚུན་ཆད་ལ་སེམས་ནང་ན་གྲ་སྒྲིག་ངེས་ཅན་ཞིག་དགོས་རྒྱུ་ནི་ཆ་རྐྱེན་དང་པོར་འཛིན་དགོས་ཞེས་གསལ་འདེབས་ཞུ་རྒྱུ་ཡིན། སྤྱིར་ད་ལྟའི་སྤྱི་ཚོགས་དང་སྒོས་སུ་བོད་པའི་སྤྱི་ཚོགས་སུ་བདེན་པ་བདེན་པར་བརྩི་བ་དང་དེ་ལ་རྒྱལ་ཁ་ཐོབ་པའི་ངེས་པ་མེད་པས་བདེན་ཞེན་ལ་གཙིགས་སུ་བཟུང་ཆེས་ན་མཇུག་འབྲས་ཅི་འབྱུང་ལ་ཚོད་དཔག་ཐུབ་དགོས། མདོ་དོན་ནི་འདིའི་ཐད་ལ་༧གོང་ས་མཆོག་གིས་སྡོམ་ཚིག་གི་བཀའ་སློབ་ཅིག་གནང་ཡོད་པ་ནི་། འདི་ལྟར་ཏེ། ལྔ་བཅུ་ང་གྲངས་དང་དྲུག་ཅུ་རེ་གྲངས་ནང་བྱེད་སྟངས་མ་ཤེས་པར་ལུས་ཡོད་པ་རེད། ད་ལྟ་དེ་འདྲ་མ་རེད། ད་བྱེད་དང་མི་བྱེད་ཀྱི་གདམ་ག་རེད་མ་གཏོགས་མ་ཤེས་པ་གཏན་ནས་ཡོད་པ་མ་རེད། ཅེས་གསུངས་ཡོད། དེ་ནི་དངོས་འབྲེལ་ཞིག་ཀྱང་རེད། ང་ཚོའི་ལས་ཀྱི་སྣེ་མོ་བ་ཚོའི་ཁྲོད་དུ་ཐད་ཀར་བཤད་ན་རིག་པ་དང་རྣམ་དཔྱོད་དེ་བཞིན་ཁ་བདེ་པོ་སོགས་ལྡབ་ལས་ཁྱེད་རང་ལས་མང་གི་རེད། གཙོ་བོ་ཁྱེད་རང་ལ་ཁེ་ཕན་ཞིག་ཡོད་པ་ནི་སེམས་ཤུགས་མ་ཆགས་པ་བྱེད་རྒྱུ་ནི་ཁྱེད་ཀྱི་ཁེ་ཕན་ཁོ་ནར་མཐོང་། དེ་ལས་ཀྱང་གཞེན་སྐུལ་ཞིག་ཡོད་པ་ནི་དུས་གསུམ་གྱི་བོད་པའི་ལོ་རྒྱུས་ལ་མང་ཙམ་ལྟོས།
ཤེས་ཡོན་དང་འབྲེལ་བའི་ཐོག་ནས་བཤད་ན། ད་ལྟའི་ཆར་བཙན་བྱོལ་བོད་གཞུང་གི་ངོས་ནས་ཐུགས་སྣང་དང་། གལ་ཆེ་དོན་ཆེར་གཟིགས་དགོས་པ་གཅིག་ནི། བཙན་བྱོལ་ནང་དུ་ལོ་ཙཱ་བའི་མཐུན་ཚོགས་ཤིག་གསར་འཛུགས་དང་སྐད་ཡིག་མི་འདྲ་བའི་ཐོག་ཆེད་ལས་གནང་མཁན་གྱི་ལོ་ཙཱ་བ་གང་མང་སྐྱེད་སྲིང་གནང་དགོས་པ་དེ་རེད་སྙམ། དེ་ལྟར་བྱུང་ན། ཕྱི་གཏེར་ནང་དུ་འདྲེན་རྒྱུའི་དཀའ་ངལ་དེ་ཅུང་ཆུང་དུ་འགྲོ་ངེས་སྙམ།
ནང་གཏེར་ཕྱི་འདྲེན་གནང་མཁན་གྱི་ལོ་ཙཱ་བ་ནི་ཚང་མས་མཁྱེན་གསལ་ལྟར་རེད།།