ད་ལོའི་དགུན་ཟླ་བཅུ་གཅིག་པའི་ས་སྲོད་ཀྱི་གདུང་དབྱངས་དམར་པོ་དང་འགྲོགས་ཏེ། ང་བཞུགས་སྒར་ནས་ལྷོ་ཕྱོགས་མོན་ཡུལ་དུ་ལམ་ལ་ཆས་ཤིང་། འདི་ནི་ངའི་གསར་འགོད་འགྲུལ་བཞུད་ཐེངས་གཉིས་པའི་གོམ་པ་དང་པོ་དེ་ཡིན། ལམ་ཐག་རིང་ཞིང་འགྲུལ་བཞུད་སྟབས་མི་བདེ་བ། སྐད་རིགས་མི་འདྲ་ཞིང་། དམ་དྲག་རྙོག་འཛིང་ཆེ་བའི་ཡུལ་ལུང་དེར་གནས་ཚུལ་མཁོ་སྒྲུབ་བྱེད་དུ་འགྲོ་རྒྱུར་དེ་ཙམ་སྤྲོ་སྣང་མི་འདུག་ལ། རང་དབང་གི་གསར་འགོད་ཆ་ཚང་ཞིག་ཡོང་ཐུབ་མིན་གྱི་གདེང་སྤོབས་ཀྱང་ཆུང་། ཡིན་ནའང་མིག་རྒྱ་ཞིག་བསྐྱེད་ཆེད་དང་ཉམས་མྱོང་ཞིག་གསག་ཕྱིར། ལས་དོན་འདིར་འཇུག་རྒྱུ་ནི་ངའི་དང་བླངས་ཀྱི་དམ་བཅའ་ཡིན།
ཐོག་མ་ནས་ངའི་སེམས་པའི་གཏིང་སར་ཉར་བའི་རེ་འདུན་ཞིག་ནི། ཐེངས་འདིའི་ལྗོང་རྒྱུའི་གོ་རིམ་ཁྲོད། རྩ་སྦུབས་ཀྱི་ཁྲག་རྒྱུན་གཅིག་པའི་ངའི་མེས་པོའི་མི་རྒྱུད་གཙང་མའི་མིང་སྲིང་དེ་ཚོར་སེམས་གཏམ་ཚིག་གསུམ་བཤད་རྒྱུ་དང་། འཚོ་གནས་སུ་བདག་པའི་ས་རྒྱུད་འདྲེས་པའི་ངའི་ཕ་ཡུལ་གངས་ལྗོངས་ཕྱུག་མོའི་ལྷོ་ཟུར་དེ་ནས་གཙང་ཆབ་ཧུབ་གསུམ་འཐུང་རྒྱུ་དེ་ཡིན། རྒྱ་གར་རྒྱལ་ས་ལྡི་ལི་ནས་མཁའ་ལམ་བརྒྱུད་ལྷོ་ཕྱོགས་སུ་འཕུར་སྐབས། ངའི་སེམས་སུ་རེ་དོགས་མང་པོ་ཞིག་གིས་ཁེངས་འདུག་ལ། གསར་འགོད་པའི་རྩ་དོན་ལྟར་འགྲོ་ཡུལ་དེའི་ལོ་རྒྱུས་ཀྱི་རྒྱབ་ལྗོངས་མང་པོ་ཞིག་ལ་བསམ་གཞིགས་བཏང་སྟེ། ཁ་གསལ་ཞིང་དོ་མཉམ་པ། དྲང་བདེན་གྱི་གསར་འགྱུར་འཐུས་སྒོ་ཚང་བ་ཞིག་ཇི་ལྟར་མཁོ་གཏོང་བྱ་རྒྱུའི་ཕྱོགས་ལ་སྔོན་འགྲོ་བསྒྲུབས།
སྤྱི་ཟླ་ ༡༡ ཚེས་ ༨ ནས་ ༡༥ བར་ཧི་མ་ལ་ཡའི་རི་རྒྱུད་སྤྱི་དང་། ཡང་སྒོས་ཨ་རུ་ན་ཅལ་མངའ་སྡེ་ལྷོ་མོན་རོང་གི་ས་ཆའི་དགོན་སྡེ་ཆེ་ཆུང་དང་གྲོང་ཁྱེར་གྲོང་རྡལ། གྲོང་གསེབ་ཁག་བཅས་ཟང་ཟིང་ལང་ལོང་གིས་མགོན་པོ་གང་ཉིད་ཚུར་བསུ་མ་དང་ཕར་སྐྱེལ་མ། ཟབ་གསལ་གསུང་གི་བདུད་རྩིའི་ཉིང་བཅུད་ལེན་པའི་སྐལ་བཟང་ཐོབ་ཅིང་། ཨ་རུ་ན་ཅཱལ་མངའ་སྡེ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་དང་རྟ་དབང་རྫོང་དཔོན་གྷམ་ལེ་པ་ཏཱོ་སོགས་གནད་ཡོད་མི་སྣ་དག་གིས་ཕེབས་བསུའི་སྣེ་ལེན་གཟབ་རྒྱས་ཞུས་ཏེ། མོན་རྟ་དབང་ཁུལ་གྱི་ཐེངས་ལྔ་བའི་རླབས་ཆེན་གྱི་མཛད་འཕྲིན་ཡོངས་བདེ་ལེགས་ངང་གྲུབ་ཡོད།
ཐེངས་འདིར་ཆོས་ཞུ་བ་རྣམས་ཀྱི་བདེ་འཇགས་ཆེད། རྟ་དབང་རྫོང་གི་ལས་ཁུངས་ཁག་དང་མཐའ་སྲུང་དམག་ཁུལ་ཁང་ཁག ས་གནས་སྐོར་སྲུང་ཚན་པ་བཅས་ཀྱིས་ལྟ་རྟོགས་དང་ཞིབ་བཤེར་ནན་ཏན་བྱས་ཤིང་། ས་གནས་མི་མང་ཡོངས་ནས་སྤྲོ་སེམས་ཁོལ་བའི་ངང་ཕེབས་ལམ་ཁག་ཉམས་གསོ་དང་གཙང་བཟོ། བོད་པའི་རིག་གཞུང་མཚོན་ཞིང་ས་གནས་མོན་པའི་ཁྱད་ཆོས་ལྡན་པའི་མཚོན་རིས་ཅན་གྱི་སྒོ་ཆེན་རིམ་པ་བཟོས་ཏེ། བཀྲ་ཤིས་པའི་སྨོན་ཚིག་དང་དགའ་བསུའི་ཤིས་བརྗོད་སྣ་ཚོགས་གང་སར་སྦྱར་འགྲེམས་བྱས་ཤིང་། ཁང་རྩེག་ཕར་ཚུར་བར་དར་ལྕོག་དང་བོད་པའི་རྒྱལ་དར་འཐེན་ཏེ། མི་མང་ཚང་མའི་གདོང་ལ་དགའ་དད་སྤྲོ་གསུམ་གྱི་བཀྲག་མདངས་རྒྱས་ཤིང་། སྐུ་ཉིད་སླར་ཡང་ལྷོ་མོན་རོང་ལ་ཞབས་སོར་འགོད་རྒྱུར་རེ་སྨོན་གྱི་མིག་ཟུང་ཅེར་འདུག
ཚེས་ ༨ ཉིན་ནས་བཟུང་རྟ་དབང་རྫོང་ཐོག་གི་བོད་པ་དང་མོན་པའི་ཚོང་ཁང་དང་ཟ་ཁང་། ཁྲོམ་ས་ཡོངས་རྫོགས་སྒོ་བརྒྱབས་ཏེ། བོད་པའི་ཕྱུ་པ་དང་གསེར་དངུལ་གཡུ་བྱུར་གྱི་རྒྱན་ཆ་བཏགས་ཏེ་གསུང་ཆོས་ཞུ་བར་བཅར་གྱིན་འདུག་ལ། ཕྱི་ཚེས་ ༩ ཉིན་གྱི་དགོང་མོར་མངའ་སྡེ་བློན་ཆེན་རྡོ་རྗེ་མཁའ་འགྲོ་མཆོག་གིས་བོད་པའི་སྐུ་མགྲོན་ཚོ་དང་གསར་འགོད་པ་ཡོངས་ལ་གསོལ་སྟོན་གཟབ་རྒྱས་བཤམ་སྟེ། ཐེངས་འདིར་བོད་པའི་སྐུ་མགྲོན་ཚོར་དམིགས་བསལ་གཟིགས་སྐྱོང་གནང་རྒྱུའི་ལས་འགན་ང་ཚོར་ཡོད། ཅེས་མོན་པའི་ཐུན་མོང་མ་ཡིན་པའི་ཞབས་བྲོ་དང་གླུ་གཞས་འཁྲབ་སྟོན་བྱས་ཤིང་། གླུ་ཚིག་གི་ནང་དོན་ཕལ་ཆེ་བ་སྐུ་མཆོག་ཉིད་ལ་བསྟོད་གླུ་དང་བསླར་ཡང་ལྷོ་མོན་རོང་དུ་ཕེབས་རྒྱུའི་སྨོན་ཚིག་རེད།
རྟ་དབང་རྫོང་གི་སློབ་གྲྭའི་དགེ་རྒན་བོད་རིགས་བུ་མོ་བཀྲ་ཤིས་དཔལ་མོ་ལགས་ཀྱིས་གསར་འགོད་པར་བརྗོད་པ་ལྟར་ན། ད་ལྟ་རྟ་དབང་རྫོང་ཐོག་ཏུ་བོད་པ་ ༡༥༠ ཙམ་ཡོད་པ་དང་།ཁོང་ཚོས་ཚོང་ལས་གཉེར་གྱིན་ཡོད་འདུག་ཅིང་། རྟ་དབང་རྫོང་ཐོག་གི་ཚོང་ཁང་དང་ཟ་ཁང་ལེགས་གྲས་ཕལ་ཆེ་བ་བོད་མིའི་ཡིན་འདུག སྔར་མོན་པ་དང་བོད་པའི་བར་དཀའ་ངལ་ཕྲན་བུ་བྱུང་མྱོང་ཡང་། སྐུ་མདུན་མོན་ཁུལ་དུ་ཐེངས་འགར་ཕེབས་ཏེ། བོད་པ་སྐྱབས་བཅོལ་བར་རོགས་ཕན་ཡོང་བའི་འབོད་སྐུལ་ཞུས་རྗེས་འབྲེལ་ལམ་ཇེ་བཟང་དུ་ཕྱིན་ཡོད་འདུག མོན་པ་ཚོར་༧གོང་ས་མཆོག་གི་སྐོར་གླེང་མོལ་བྱེད་སྐབས། “རྒྱལ་བ་ཡིད་བཞིན་ནོར་བུ་” ཞེས་ཧ་ཅང་དད་འདུན་དྲག་པོའི་རྣམ་འགྱུར་སྟོན་ཞིང་། མི་རིགས་ཧིན་རྡུ་ཡིན་པའི་དམག་མི་ཞིག་གིས་ཀྱང་། “ this People of area, Dhalai Lama is God ” ཞེས་དབྱིན་སྐད་ཐོག་བརྗོད་བྱུང་།
མོན་རྟ་དབང་གི་བྱང་ཕྱོགས་བོད་དང་ཤར་ཕྱོགས་ཨ་རུ་ན་ཅལ། ལྷོ་ནུབ་གཉིས་འབྲུག་ཡུལ་ཡིན་ཞིང་། རྫོང་ཡོངས་ཀྱི་ས་ཆའི་རྒྱ་ཁྱོན་ལ་སྤྱི་ལེ་གྲུ་བཞི་མ་༢༠༨༥ དང་། རྒྱ་མཚོའི་ངོས་ནས་མཐོ་ཚད་ ༣༠༢༥ འདུག ས་ཁུལ་འདིར་གྲོང་སྡེ་ཁག་ ༡༩༦ དང་ཁྱོན་བསྡོམས་མི་འབོར་ ༤༠༠༠༠ ལྷག་ཡོད་ཅིང་། དེ་དག་ཚང་མ་ནང་པ་ཡིན་པ་མ་ཟད། བོད་པའི་ལོ་གསར་དང་དགའ་ལྡན་ལྔ་མཆོད། ས་ག་ཟླ་བ། གཏོར་རྒྱག་ཆེན་མོ་སོགས་དུས་ཆེན་ཁག་སྲུང་གཙི་བྱེད་ཕྱོགས་ཀྱང་བོད་པ་དང་གཅིག་མཚུངས་ཡིན་འདུག རྟ་དབང་རྫོང་ཐོག་ནས་བོད་ཀྱི་ས་མཚམས་བར་སྤྱི་ལེ་ ༣༥ ལས་མེད་པ་དང་། མོན་རྟ་དབང་གི་ས་འབྲེལ་ནི་ལྷ་ས་ལྷོ་ཁའི་ཁོངས་གཏོགས་མཚོ་སྣ་རྫོང་ཡིན་འདུག བཞུགས་སྒར་ངྷ་རམ་ས་ལ་ནས་མོན་རྟ་དབང་བར་སྤྱི་ལེ་ ༣༠༢༥ དང་། ཆུ་ཚོད་གཅིག་གིས་ས་རུབ་པ་དང་ནམ་གསལ་བ་སྔ་ཞིང་། བོད་ཀྱི་རྒྱལ་ས་ལྷ་སའི་བར་སྤྱི་ལེ་ ༥༠༨ དང་། ཆུ་ཚོད་གཅིག་གིས་ས་རུབ་པ་དང་ནམ་གསལ་བ་འཕྱི་བ་ཡོད་འདུག
ས་གནས་ཀྱི་ཐོན་ཁུངས་གཙོ་བོ་ཞིང་ལས་ཡིན་ཞིང་། གྲོ་དང་ནས། མ་རྨོས་ལོ་ཏོག ཀོང་བུ། ཉུང་མ་སོགས་འདེབས་ལས་བྱེད་ཀྱིན་ཡོད་པ་དང་། གཞན། པད་ལོག་དང་མེ་ཚལ་དཀར་པོ། སུར་པན་སོགས་སྔོ་ཚལ་གྱི་རིགས་དང་། ཀུ་ཤུ་དང་ཚ་ལུ་མ། ཁྲེ། སྲན་ཆེན། དབྱིན་སྐད་དུ་ Kiwi དང་ Gauva སོགས་ཤིང་ཏོག་གི་རིགས་ཀྱང་མང་པོ་ཡོད་འདུག ས་གནས་ལ་ལར་ལོ་རེར་སོ་ནམ་ཐེངས་གཉིས་རེར་འདེབས་ལས་བྱེད་ཀྱིན་ཡོད་པ་དང་། མོན་ཡུལ་སྟོད་ཕྱོགས་སུ་ཞིང་འབྲོག་འདྲེས་མ་ཡིན་ཞིང་། སྒོ་ཕྱུགས་རྟ་དང་ལུག ར། ནོར་ནག་བཅས་རེད། ཁ་ཟས་གཙོ་བོ་ཤ་མར་ཆུར་གསུམ་དང་། འབྲས། ཉུང་མ་སོགས་ཡིན་ཞིང་། མོན་རྩམ་ཟེར་བའི་ཁ་མདོག་ཅུང་ནག་ཅིང་རོ་ཁ་བ་ཞིག་ཀྱང་འདུག མོན་ས་རང་ནས་འདེབས་ལས་བྱས་བའི་འབྲས་རིགས་མདོག་དམར་སྐྱ་ཅན་ཞིག་འདུག་ལ། དེ་ནི་འབྲས་རིགས་གཞན་ལས་ཡག་པོར་རྩི་ཞིང་། རིན་གོང་ཡང་གཞན་ལས་ཅུང་མཐོ་བ་འདུག བོད་དབུས་གཙང་ཕྱོགས་ཀྱི་ལུགས་སྲོལ་ལྟར་ཆང་འཐུང་རྒྱུ་ས་ཁུལ་དེའི་ཞིང་འབྲོག་ཐུན་མོང་གི་འཚོ་བའི་རྒྱུན་སྲོལ་ལྟ་བུ་རེད།
མོན་པའི་སྐྱེས་པ་དག་གི་གཟིགས་བོངས་ཆུང་ཞིང་ཤ་ཁ་སྨུག་པ། ཁོག་སྟོད་དུ་སྣམ་བུ་དམར་པོའི་སྟོད་ཐུང་ཡུལ་སྐད་དུ་ ( ཚོད་མ་ཕྱུ་བ ) ཟེར་བ་ཞིག་གི་སྟེང་སྐ་རགས་བཅིངས་ཤིང་། སྣམ་བུའི་ཡུ་ཁ་རིང་པོ་ཅན་གྱི་ཀོ་ལྷམ་དང་རས་ཀྱི་དོར་མ་ནག་པོ་གྱོན་འདུག སྐེད་པར་གྲི་ཆུང་རེ་འདོག་པ་ལས་སྐྱེས་པ་ཚོར་རྒྱན་ཆའི་རིགས་གཞན་འདོགས་སྲོལ་མེད་པ་འདྲ། བུད་མེད་རྣམས་ཀྱི་ཤ་རྩ་དཀར་ཞིང་མཁུར་ཚོས་དམར་བ། བོད་པའི་སྲོལ་རྒྱུན་གྱི་མཛེས་དཔྱོད་ལྟར་ན། མོན་པའི་བུད་མེད་ཚོར་མཛེས་མའི་ཁྱད་ཚོས་ཡོངས་སུ་ཚང་ཞིང་། ལ་བ་རིང་པོ་( ཤིང་ཀཱ) ཟེར་བ་ཞིག་གི་སྟེང་དུ་སྐ་རགས་བཅིངས་ཤིང་། དེའི་སྟེང་ལ་( ལྗན་ལྗིན་སྟོད་ཐུང ) དང་། ལྷ་ས་ཀོང་པོ་ས་ཁུལ་གྱི་ཆས་གོས་ལྟར་( ཏེ་རྔ་བཅིངས་མ ) ཟེར་བའི་སྣམ་བུ་དམར་པོ་ཞིག་འཕོངས་མགོར་དཀྲིས་འདུག བུད་མེད་མང་ཆེ་བའི་བྱུ་རུའི་སྐེ་རྒྱན་རིང་པོ་རེ་བཏགས་འདུག་ལ། སྔར་བོད་པའི་བུད་མེད་ཚོར་དོར་མ་གྱོན་པའི་ལུགས་སྲོལ་མེད་པ་ལྟར། མོན་པའི་བུད་མེད་ཕལ་ཆེ་བས་ད་ལྟའང་དོར་མ་གྱོན་པའི་ལུགས་སྲོལ་མེད་པ་འདྲ། ཕོ་མོ་གཉིས་ཀར་ཐུན་མོང་གི་གྱོན་ཆས་ཤིག་ཡོད་པ་ནི། ཟུར་སྣེ་རིང་པོ་ལྔ་ཡོད་པའི་( རྔ་མ་ཞ་མོ )ཟེར་བ་དེ་ཡིན་ཞིང་། དེ་ནི་ནོར་གྱི་རྩིད་པ་ནག་པོས་བཟོས་པ་ཞིག་རེད།
མོན་པའི་མི་རྒྱུད་དེ་སྔར་བོད་བཙན་པོའི་སྐབས་ཀྱི་བོད་མིའི་མི་རྒྱུད་ལས་མཆེད་ཚུལ་བོད་པའི་ལོ་རྒྱུས་དག་ཏུ་གསལ་བ་ལྟར། ལ་དྭགས་རྒྱལ་རབས་དང་འབྲུག་པའི་ལོ་རྒྱུས། མོན་རང་གི་ངག་རྒྱུན་བཅས་སུའང་ཡོད་རབས་བརྗོད། མོན་པའི་ཡུལ་སྐད་ནང་བོད་པའི་བརྡ་རྙིང་མང་ཞིང་། སྐད་གདངས་མདོ་སྨད་མཐའ་མཚམས་ཁུལ་གྱི་སྐད་གདངས་དང་ཅུང་ཉེ་བའི་སྣང་བ་བྱུང་ལ། རྒན་མགོ་ཚོ་བོད་པར་ཤ་ཞེན་ཆེན་པོ་འདུག ༧རྒྱལ་དབང་ལྔ་བའི་སྐབས་བོད་པའི་ཁྱིམ་ཚང་བདུན་མོན་ཡུལ་དུ་བཏང་བའི་མི་རྒྱུད་ད་ལྟའང་འདུག་ལ། དེ་དག་འཕེལ་རྒྱས་སུ་ཕྱིན་ཏེ་ད་ལྟ་མོན་རྟ་དབང་དགོན་པའི་ཞོལ་དུ་གྲོང་ཚོ་ཆུང་ཆུང་ཞིག་ཆགས་འདུག གྲོང་ཚོ་དེར་ཞོལ་གྲོང་པ་ཞེས་འབོད་ཅིང་། ཁོང་ཚོར་ཁྱེད་ཅག་མོན་པ་ཡིན་ནམ་ཞེས་དྲིས་ན། ཅུང་མ་རངས་བའི་ཉམས་ཀྱིས་ “ང་ཚོ་མོན་པ་མིན། ང་ཚོ་ཞོལ་པ་ཡིན།” ཞེས་ལན་འདེབས་གནང་གིན་འདུག
མོན་པའི་ལ་ལུང་ཀུན་དུ་ཚང་ཚིང་ཤིང་ནགས་ཀྱིས་བརྒྱན་ཞིང་། རྫོང་གི་ཉེ་ཁོར་དུ་ལྷ་ཤིང་ཤུག་པའི་སྡོང་བོ་མང་པོ་འདུག་ལ། མདུན་རྒྱབ་ཀྱི་རི་མགོ་དག་ཏུ་རྫ་བྲག་དང་སྤང་རི་ཅུང་རེ་མཐོང་རྒྱུ་འདུག ས་ཁུལ་འདིའི་གནམ་གཤིས་དགུན་དུས་ཁ་བ་འབབ་པ་དང་། དབྱར་ཁ་ཚ་བ་ཆེ་ཞིང་རླན་གཤེར་རྒྱས་པ། དུས་རྒྱུན་སྨིག་རྒྱུ་དང་ན་བུན་འཁྲིགས་ཏེ། ལམ་ཁ་དང་ཁང་པ་ཞིག་རལ་དུ་འགྱུར་སླ་ཞིང་བསྐྱར་གསོ་ཡང་ཡང་བྱ་དགོས་ཀྱིན་ཡོད་འདུག དེ་བཞིན། སྔ་མོའི་རྟ་དབང་དགོན་པ་བསྐྱར་གསོ་ཡང་ཡང་བྱས་ཏེ། ད་ལྟ་དགོན་པའི་མདུན་ཐང་དུ་དཔར་ཁང་ངམ། དཔེ་མཛོད་ཁང་རྙིང་པ་ཞིག་མ་གཏོགས་ལྷ་ཁང་གཞན་དག་ཚང་མ་གསར་བརྗེ་བྱས་ཡོད་འདུག
མོན་ཡུལ་གྱི་ཕྱིའི་སྣོད་ཀྱི་ཆགས་སྟངས་སྐོར། སྡེ་སྲིད་སངས་རྒྱས་རྒྱ་མཚོས་མཛད་པའི་༼ ལྔ་བ་དྲུག་པར་འཕོས་པའི་གཏམ་སྣ་བའི་བཅུད་ལེན ༽ ཞེས་པའི་ནང་། “བོད་ཁ་བ་ཅན་གྱི་ཡུལ་གྱི་མཐའ་མོན་བོད་གཉིས་ཀྱི་ས་མཚམས་སྦས་ཡུལ་སྐྱིད་མོའི་ལྗོངས་སམ་ལ་འོག་ཡུལ་གསུམ། ཚོ་གསུམ་དུའང་གྲགས་པ་ལུང་པ་ཕུ་ཆུང་ལ་མདའ་ཆེ་བ། དབྱིབས་པད་མ་འདབ་བརྒྱད་ཁ་ཕྱེ་བ་ལྟ་བུ། རྒྱབ་རི་དར་དཀར་གྱི་ཡོལ་བ་དང་། མདུན་རི་ཆོས་ཞུ་བ། གཡས་རི་དཔའ་བོ་ལྡན་ལ་བཞུགས་པ།གཡོན་རི་མཁའ་འགྲོས་གར་བྱེད་པ། རྩི་ཤིང་རྣམས་དམ་ཚིག་སེམས་དཔའ་ལས་ལ་གཤེགས་པ། བྲག་རི་ཐམས་ཅད་ཡེ་ཤེས་སེམས་པ་དབྱིངས་ནས་གཟིགས་པ་ལྟ་བུའི་དབུས་ས་གཞི་རྒན་པོའི་ངག་རྒྱུན་གསེར་གྱི་གཞོང་བ་ཟེར་ཡང་། མཆོད་པའི་མཎྜལ་ཕུལ་བ་ལྟར། ལ་ངོས་སུ་མ་རྨོས་ལོ་ཏོག་དང་། མཐིལ་དམའ་བ་ལ་རྒྱ་ཟས་ཀྱི་འབྲུ་བཅུ་གསུམ། བར་དུ་མོན་ཟས་ཀྱི་འབྲུ་བཅུ་གསུམ། རྩེར་བོད་ཟས་ཀྱི་འབྲུ་བཅུ་གསུམ་སྐྱེ་པ་སོགས་མ་བཏབ་པའི་ལོ་ཏོག་བསམ་གྱིས་མི་ཁྱབ། ,, ཞེས་བཀོད་འདུག
གནས་འདིར་རིག་འཛིན་ཚངས་དབྱངས་རྒྱ་མཚོའི་ཞབས་རྗེས་དང་ཕྱག་རྗེས། སློབ་དཔོན་པད་མ་འབྱུང་གནས་བྱོན་ཏེ་གྲུབ་རྟགས་སྣ་ཚོགས་བསྟན་པའི་ཤུལ་རྗེས་སོགས་གསལ་ཞིང་། བོད་ཀྱི་ཟློས་གར་ཆེན་མོ་བརྒྱད་ལས་༼ འགྲོ་བ་བཟང་མོ ༽ ཞེས་པའི་རྣམ་ཐར་གྱི་ཕ་སའང་ས་འདི་ཡིན་འདུག ད་ལྟའི་མོན་རྟ་དབང་དགོན་པའི་ས་ཆ་དེ་ནི། སྔར་ཡུལ་མཎྜལ་སྒང་གི་རྒྱལ་བོ་ཀ་ལ་དབང་པོའི་ཕོ་བྲང་གི་
ཤུལ་ཡིན་ཞིང་། བཙོན་ཁང་དང་ཕོ་བྲང་གི་རྩིག་རྨང་། བདུད་མོ་ཧ་ཤིང་མའི་སྐྱེས་ཡུལ་སོགས་ད་ལྟའང་སྟོན་རྒྱུ་འདུག རྟ་དབང་དགོན་པའི་མདུན་ཕྱོགས་ཀྱི་སྐོར་ལམ་ཞེང་ཚད་ཆེ་ཞིང་ཁོད་ཡངས་ལ། རྒྱབ་ཕྱོགས་གུ་དོག་ཅིང་བྲག་གཡང་མཐོན་པོ་སྐྱི་གཡའ་བ་ཞིག་འདུག དེ་ནི་རྒྱལ་པོ་ཀ་ལ་དབང་བོའི་སྐབས་ཕྱིའི་དགྲ་བོ་འགོག་ཆེད། ཕོ་བྲང་གི་མདུན་ཕྱོགས་ཆུ་རྫིང་དང་། རྒྱབ་ཕྱོགས་གཡང་གཟར་ལ་གཏད་པ་རེད་ཟེར་བའི་ངག་རྒྱུན་འདུག
གཞན། ཡུལ་དེར་གཏེར་སྟོན་ཆེན་པོ་པད་མ་གླིང་པ་དང་། ཆོས་རྗེ་བླ་མ་བསྟན་པའི་སྒྲོན་མེ། ཆོས་རྗེ་བློ་བཟང་བསྟན་པའི་ཉིན་བྱེད། ༧རྒྱལ་དབང་ལྔ་བའི་ངེས་སློབ་མེ་རག་བླ་མ་བློ་གྲོས་རྒྱ་མཚོ་སོགས་སྐྱེས་ཆེན་དམ་པ་དུ་མས་ཞབས་ཀྱིས་བཅགས་ཤིང་བྱིན་གྱིས་རླབས་ཡོད་པ་དང་། ཚེ་རིང་མཆེད་ལྔ་དང་བསྟན་མ་བཅུ་གཉིས། རིགས་གསུམ་མགོན་པོ། ལྷ་རྒྱལ་རི་སོགས་གནས་རི་འགངས་ཆེན་མང་པོས་མཐའ་ནས་སྐོར་ཡོད་ཚུལ་སེར་བྱེས་འཇམ་དབྱངས་ཆོས་འཁོར་གླིང་གི་འཛིན་སྐྱོང་འགན་འཛིན་ཐུབ་བསྟན་དབང་ཕྱུག་ལགས་ཀྱིས་འགྲེལ་བཤད་གནང་བྱུང་།
མོན་རྟ་དབང་ནི་ཁ་ཤར་ལྷོའི་ཕྱོགས་སུ་འཁོར་བའི་ལུང་གཞོང་ཆེན་པོ་ཞིག་གི་སྐེད་པར་ཆགས་འདུག་ལ། ལུང་གཞོང་དེ་ནས་ནུབ་བྱང་ཕྱོགས་སུ་གྱེན་ལ་སྤྱི་ལེ་ ༨༢ ཙལ་སྐྱོད་ན། སེ་ལ་ Sela ཟེར་བའི་རྒྱ་མཚོའི་ངོས་ནས་མཐོ་ཚད་ ༡༣༧༠༠ ཡོད་པའི་ལ་མགོ་མཐོན་པོ་ཞིག་ཏུ་སླེབས་ཤིང་། ལ་མགོ་དེར་གཡུ་ཡི་མེ་ལོང་ཕྱིས་འདྲའི་མཚོ་ཆུང་སྔོ་ལ་དྭངས་པ་ཞིག་དང་། དེའི་མཐའ་འཁོར་དུ་བོད་པའི་ཐུན་མིན་གྱི་སྒོ་ཟོག་ནོར་ནག་མང་པོ་མཐོང་རྒྱུ་འདུག མཁས་དབང་དགེ་འདུན་ཆོས་འཕེལ་གྱི་གསུང་འབུམ་དུ། “གཡག་གིས་གར་ཁྱབ་བོད་པའི་ས་ཡིན” ཞེས་གསུངས་པ་ལྟར། ཧི་མ་ལ་ཡའི་རི་རྒྱུད་སྤྱིའི་ས་གཤིས་མཚུངས་ཀྱང་། བོད་མི་སུ་ཞིག་ཡིན་རུང་ས་འདིར་འབྱོར་ཚེ། བོད་དུ་སླེབས་པ་ལྟ་བུའི་ཚོར་སྣང་གསར་པ་ཞིག་འགོག་མེད་དུ་བསྟེར་ཞིང་། ལ་མགོ་དེ་ནས་ལྷོ་ནུབ་ཕྱོགས་ལ་ཐུར་དུ་བབ་པ་ནས་བཟུང་མོན་པ་དང་གློ་བ་འདྲེས་མའི་གྲོང་སྡེ་མང་པོར་ཐུག་ཅིང་། ས་གཤིས་དང་གནམ་གཤིས་ཀྱང་རྒྱ་གར་སྤྱི་མཚུངས་ལྟར། ས་བབ་དྲོ་ཞིང་རླན་གཤེར་ཆེ་བ། མཁའ་དབུགས་བཙོག་ཅིང་། དབྱིངས་དབུགས་ལ་འདམ་དྲི་དང་སོལ་རླངས་ཀྱི་དྲི་མ་ཁ་བ་སོགས་ཀྱིས་ཡུལ་གྱར་བའི་ཚོ་བ་སྐྱུར་མོ་སླར་ཡང་དྲན་གསོ་བྱས་ཏེ། བསམ་གཞིགས་དུ་མའི་མགོ་བོ་རྨང་ནས་བསླང་འོང་།
༼ སྤྱི་ལོ་ ༢༠༠༩ ཟླ་ ༡༡ ཚེས་ ༡༩ ཉིན་གསར་འགོད་པ་དོན་འགྲུབ་བཀྲ་ཤིས་ཀྱིས་ཨ་སཱམ་གྱི་རྒྱལ་ས་གྷོ་ཧ་ཊེ་ནས་སྤེལ༽
