བོད་ཕྱི་ནང་གི་སྒྱུ་རྩལ་བ་རྣམས་ལ་འཚམས་འདྲི་ཞུ།

ད་ཡོད་ཀྱི་ཡར་རྒྱས་ལ་ཆོག་ཤེས་བྱས་ནས་མི་འདུག་པར་བློ་སེམས་གཅིག་སྒྲིལ་གྱིས་མུ་མཐུད་ཡར་རྒྱས་ཡོང་ཐབས་དང་། དུས་རབས་ཀྱི་རྗེས་སུ་མཐུན་པའི་ལེགས་ཆ་ལེན་འོས་པ་དག་བླངས་ཏེ་བོད་ཀྱི་བདེན་དོན་འཐབ་རྩོད་འདི་དྲིལ་བསྒྲགས་ཀྱི་བྱེད་སྒོའི་ནང་གདོང་ལེན་གྱི་ནུས་པ་སྔར་ལྷག་འདོན་སྤེལ་བྱེད་གལ་ཡིད་ལ་འཇགས་དགོས་ཞེས་་༧གོང་ས་མཆོག་གིས་ཟློས་གར་ཚོགས་པ་བཙུགས་ཏེ་ལོ་ ༥༠ འཁོར་བའི་དུས་དྲན་ལ་དམིགས་བསལ་གསུང་འཕྲིན་དུ་བསྩལ་ཡོད།

ཕྱི་ཚེས་ ༢ ཉིན་གྱི་ཞོགས་པའི་ཆུ་ཚོད་ ༩ བའི་སྟེང་བོད་གཞུང་ཟློས་གར་ཚོགས་པ་དབུ་བརྙེས་ཏེ་མི་ལོ་ཧྲིལ་བོ་ ༥༠ འཁོར་བའི་དུས་དྲན་སྲུང་གཙི་གནང་ཡོད་ལ།  དེར་སྐུ་མགྲོན་གཙོ་བོ་བོད་གཞུང་དཔལ་འབྱོར་བཀའ་བློན་ཚེ་རིང་དོན་འགྲུབ་གཙོས། བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། ལྷན་ཁང་ཁག་གི་དྲུང་ཆེ་རྣམ་པ།  ངྷ་ས་ས་གནས་འཐུས་ཚོགས་དང་ས་གནས་མགོ་འཛིན། ཚོགས་སྡེ་ཁག་གི་འགན་འཛིན་དང་རྒྱུན་ལས་རྣམ་པ། ཕྱོགས་མཐའི་ལྷན་ཚོགས་ཁག་དང་ཟློས་གར་ཚོགས་པའི་ཚོགས་མི་ཟུར་བ། དེ་བཞིན་ངྷ་སྟེང་དང་ངྷ་ཤོད་སློབ་གྲྭའི་སློབ་མ་དང་ས་གནས་མི་དམངས་བཅས་མི་གྲངས་ ༡༠༠༠ བརྒལ་བ་འདུ་འཛོམས་ཐོག ༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་ཟློས་གར་སྤྱི་ཁྱབ་འགན་འཛིན་ལགས་ནས་མཎྜལ་འདེགས་འབུལ་གནང་བ་དང་། གྲུབ་ཐོབ་ཐང་སྟོང་རྒྱལ་བོའི་སྐུ་བརྙན་གདན་ཞུ་གནང་སྟེ་མཛད་སྒོ་དངོས་སུ་ཚུགས་ཡོད།

སྐབས་དེར། བོད་གཞུང་ཟློས་གར་ཚོགས་པའི་འགན་འཛིན་ཕ་ཟུར་དབང་ཕྱུག་ལགས་ཀྱིས་ཟློས་གར་ཚོགས་པའི་འདས་པའི་མི་ལོ་ ༥༠ ཡི་ལས་སྡོམ་ངོ་སྤྲོད་དང་འབྲེལ་༧གོང་ས་མཆོག་གིས་ཐེངས་འདིའི་དུས་དྲན་ལ་དམིགས་བསལ་དུ་བསྩལ་བའི་གསུང་འཕྲིན་སྒྲོག་སྦྱོང་གནང་སོང་ལ། ༧གོང་ས་མཆོག་གི་གསུང་འཕྲིན་ནང་དུ། རང་རེ་བཙན་བྱོལ་བ་རྣམས་ཀྱིས་བོད་ཀྱི་རྩ་ཆེ་བའི་རིག་གཞུང་སྲུང་སྐྱོབ་དང་། བསྟན་སྲིད་རང་དབང་སླར་གསོའི་འགན་འཁྲི་ཆེན་པོ་ཕྲག་པར་ཁུར་ནས་རྒྱ་གར་རང་དབང་ལུང་པའི་ནང་ལས་གཞི་མང་པོ་ཞིག་གསར་དུ་བརྩམས་པའི་ནང་ནས་ཟློས་གར་ཚོགས་པ་འདི་འཛུགས་སྔ་ཤོས་ཀྱི་གྲས་ཤིག་ཡིན། མི་རིགས་ཤིག་གི་ཐུན་མོང་མ་ཡིན་པའི་ངོ་བོ་མཚོན་བྱེད་རིག་གཞུང་འབུད་དོད་ཡོད་པ་ཟློས་གར་ལས་གོ་རྟོགས་ཀྱི་ནུས་པ་ཆེན་པོ་ལྡན་ཡོད་པ་ལྟར། ད་ཕན་ཟློས་གར་ཚོགས་པའི་མི་རབས་རྒན་གཞོན་རིམ་པས་ལྷག་བསམ་སྙིང་རུས་ཆེན་པོས་དཀའ་ངལ་ལ་གདོང་ལེན་གྱིས་སྒྱུ་རྩལ་གྱི་འཐབ་ས་བརྟན་པོར་བཟུང་ནས་བཙན་བྱོལ་གྱི་སྤྱི་ཚོགས་ཙམ་མ་ཡིན་པར་ཕྱི་རྒྱལ་གྱི་ཡུལ་ལུང་མང་པོར་འཁྲབ་སྟོན་དུ་བསྐྱོད་དེ་རྣམ་ཐར་གླུ་གཞས་མ་ཟད། ཆོས་གོས་སོགས་ཁྱད་ཆོས་འབུར་དུ་ཐོན་པའི་མི་རིགས་ཀྱི་གཟུགས་བརྙན་དང་། བོད་ཀྱི་བདེན་དོན་ངོ་སྤྲོད་བྱེད་ཐུབ་པ་བྱུང་ཡོད། ད་ལམ་ང་ཚོ་བཙན་བྱོལ་ལ་འབྱོར་ནས་མི་ལོ་ལྔ་བཅུ་དང་། ཟློས་གར་ཚོགས་པ་བཙུགས་ནས་མི་ལོ་ལྔ་བཅུ་འཁོར་བའི་དུས་ཚིགས་གཉིས་འཛོམས་ལ་དྲན་གསོའི་བྱེད་སྒོ་གཟབ་རྒྱས་སྤེལ་བ་འདིའི་ཐོག་ཟློས་གར་ཚོགས་པའི་འགོ་ལས་ཚོགས་མི་ཡོངས་ལ་འཚམས་འདྲི་བཀྲ་ཤིས་བདེ་ལེགས་དང་། ལྷག་པར་མི་རབས་རྒན་པ་འདས་གསོན་རྣམས་ལ་རྗེས་འཛིན་གྱི་སྨོན་ལམ་ཡོད། ཟློས་གར་ལ་རྣམ་གྲངས་མང་པོ་ཡོད་པ་སྔོན་དུས་བོད་ནང་གར་པ་དང་། ནང་མའི་སྐྱིད་སྡུག ལྷ་མོའི་ཚོགས་པ་སོགས་ཁག་སོ་སོར་ཡོད་ཀྱང་། དེང་སྐབས་ཟློས་གར་ཚོགས་པས་གཅིག་ལྕོགས་ཀྱིས་འཁྲབ་སྟོན་དང་། རྒྱུན་འཛིན་པ་གསོ་སྐྱོང་བྱས་པ་སོགས་གང་ཅིའི་ཐད་ཡར་རྒྱས་ཀྱི་ལམ་དུ་ཞུགས་པར་བསྔགས་བརྗོད་ཡོད། ལྷག་པར་བོད་ཀྱི་ལྷ་མོའི་སྒྱུ་རྩལ་ནི་གྲུབ་ཆེན་ཐང་སྟོང་རྒྱལ་པོས་གསར་གཏོད་མཛད་པའི་མི་རིགས་ཀྱི་རང་བཞིན་དང་། སྒྱུ་རྩལ་གྱི་ཚད་མཐོའི་རང་བཞིན་ལྡན་པའི་ཁྱད་ནོར་ཞིག་ཡིན་པས་རྒྱུད་འཛིན་ཡག་པོ་བྱེད་དགོས། ངོས་ནས་གོ་སྐབས་འདི་དང་བསྟུན་ཏེ་བོད་ཕྱི་ནང་དུ་གནས་པའི་གཞས་སྣ་སྒྱུ་རྩལ་གླུ་པ་སོགས་བོད་མིའི་རྣམ་པ་དང་སྙིང་སྟོབས་འདོན་བསྐུལ་བྱེད་པའི་བོད་མི་སྤུན་ཟླ་ཡོངས་ལ་མཛའ་བརྩེའི་མཚམས་འདྲི་བྱ་རྒྱུ་ཡིན། ཅེས་དང་། ཡང་༧གོང་ས་མཆོག་གིས། ཟློས་གར་ཚོགས་པའི་འགོ་ལས་ཚོགས་མི་བཅས་ནས་ད་ཡོད་ཀྱི་ཡར་རྒྱས་ལ་ཆོག་ཤེས་མིན་པར་བློ་སེམས་གཅིག་བསྒྲིལ་གྱིས་མུ་མཐུད་ཡར་རྒྱས་ཡོང་ཐབས་དང་། དུས་རབས་འཕེལ་རྒྱས་ཀྱི་རྗེས་སུ་མཐུན་པའི་ལེགས་ཆ་ལེན་འོས་བླངས་ཏེ་བོད་ཀྱི་བདེན་དོན་འཐབ་རྩོད་དྲིལ་བསྒྲགས་བྱེད་སྒོའི་ནང་གདོང་ལེན་གྱི་ནུས་པ་སྔར་ལྷག་འདོན་སྤེལ་བྱེད་གལ་ཡིད་ལ་འཇགས་དགོས། ཞེས་བཀའ་སློབ་གནང་ཡོད། 

༧གོང་ས་མཆོག་གི་གསུང་འཕྲིན་སྒྲོག་སྦྱོང་གནང་རྗེས་སྐུ་མགྲོན་གཙོ་བོ་མཆོག་གིས་ཟློས་གར་ཚོགས་པའི་ནང་མི་ཚེ་ཧྲིལ་བོར་ལས་ཁུར་དང་ལེན་བྱས་པའི་རྒན་རབས་པ་ཁག་ཅིག་ལ་གཟེངས་རྟགས་ཕུལ་སོང་ལ། དེ་བཞིན། བོད་གཞུང་ཟློས་གར་དང་ཚོགས་མི་ཟུར་པ། དེ་བཞིན་ཕྱོགས་མཐའ་ནས་ཕེབས་པའི་ལྷ་མོ་ཚོགས་པ་མཉམ་རུབ་ཐོག་གཟུགས་ཀྱི་ཉི་མའི་རྣམ་ཐར་གཟིགས་འབུལ་གནང་བ་དང་། མཐའ་མར། སྐུ་མགྲོན་གཙོ་བོ་དཔལ་འབྱོར་བཀའ་བློན་ཚེ་རིང་དོན་འགྲུབ་མཆོག་གིས་གསུངས་དོན།  བོད་གཞུང་ཟློས་གར་ནི་བོད་ཀྱི་ཐུན་མོང་མ་ཡིན་པའི་རིག་གཞུང་ཁྱབ་སྤེལ་བྱེད་པའི་བརྒྱུད་རིམ་ཁྲོད་འཁྲབ་སྟོན་གྱི་ལམ་ནས་བརྒྱུད་སྤྲོད་བྱ་རྒྱུ་གནད་འགག་ཏུ་མཐོང་སྟེ་གསར་འཛུགས་གནང་བ་ཞིག་རེད་ལ། འདས་པའི་ལོ་ལྔ་བཅུའི་ནང་བོད་གཞུང་ཟློས་གར་ནང་གི་མཐུན་རྐྱེན་ཚང་བའི་ཐོག་ཕྱིའི་འཛུགས་སྐྲུན་སོགས་ང་ཚོའི་མཐོང་ཆོས་སུ་ཡོད་པའི་སྒྱུ་རྩལ་སློབ་སྦྱོང་གི་བསྟི་གནས་ཤིག་ཆགས་ཡོད་པ་དང་། ལོ་དེ་དག་ཏུ་སྒྲིག་སྲོལ་དང་མཐུན་རྐྱེན་ཡར་རྒྱས་ཕྱིན་པ་མ་ཟད། བཙན་བྱོལ་སྤྱི་ཚོགས་སྤྱི་དང་སློབ་གྲྭ་ཁག་གི་སྒྱུ་རྩལ་འཁྲབ་སྟོན། དེ་བཞིན་བོད་ཀྱི་རིག་གཞུང་འདི་ཉིད་ཕྱི་རྒྱལ་ཡུལ་གྲུ་ཁག་ཏུ་ངོ་སྤྲོད་དང་གོ་རྟོགས་སྤེལ་བའི་ཐད་ནས་བོད་དོན་ཁྱབ་བསྒྲགས་ལ་ནུས་པ་ཆེན་པོ་ཐོན་ཡོད་པ་ཞིག་ལ་ང་ཚོས་ངོས་འཛིན་ཞུ་གིན་ཡོད་ལ། བཀའ་ཤག་གི་ངོས་ནས་ཐུགས་རྗེ་ཞུ་རྒྱུ་ཡིན་ཅེས་དང་། ཡང་ཁོང་གིས། མ་འོངས་པར་བོད་གཞུང་ཟློས་གར་གྱི་ངོས་ནས་འདས་པའི་མི་ལོ་ ༥༠ ཡི་གྲུབ་འབྲས་ལ་འདོད་ཆུང་ཆོག་ཤེས་མེད་པའི་ཐོག  ཡར་རྒྱས་གཏོང་དགོས་པའི་གནད་དང་ལེགས་སྤེལ་ཉེན་འགོག་གི་ལས་འཆར་སྔར་ལས་ལྷག་པ་གནང་རྒྱུ་གལ་ཆེན་པོ་རེད། ཟློས་གར་སྒྱུ་རྩལ་དེ་ད་ལྟའི་སྤྱི་ཚོགས་ལ་ཆ་མཚོན་ན་སྤྱི་ཚོགས་ཤིག་གི་བསམ་བློའི་གནས་བབ་བཟང་ཕྱོགས་སུ་འགྱུར་བའི་ཐད་ལ་གལ་ཆེན་ཡིན་པ་མ་ཟད།  ལྷག་པར་ང་ཚོ་བཙན་བྱོལ་སྤྱི་ཚོགས་ལ་མཚོན་ན་དེ་ལས་ལྷག་པའི་གལ་ཆེན་ཆགས་ཡོད་སྟབས། འཁྲབ་སྟོན་པ་ཚོ་ཡིན་ནའང་འཕྲལ་སེལ་ཙམ་དུ་ངོས་འཛིན་མི་བྱ་བར་འཁྲབ་སྟོན་བྱེད་པ་དེ་མི་རིགས་ཤིག་གི་རིག་གཞུང་རྒྱུད་འཛིན་གྱི་ལས་འགན་ཞིག་ཡིན་པའི་བསམ་བློ་དང་འགན་ཡོད་པའི་ཐོག་འཁྲབ་སྟོན་གནང་རྒྱུ་གལ་ཆེན་པོ་རེད་ཅེས་གསུང་བྱུང།

ཐེངས་འདིའི་བོད་གཞུང་ཟློས་གར་ཚོགས་པའི་མི་ལོ་ ༥༠ དུས་དྲན་དེ་ཉིན་གྲངས་གསུམ་རིང་འཚོགས་འཆར་ཡོད་པ་དང་། ཉིན་དང་པོའི་མཛད་སྒོའི་སྟེང་ཟློས་གར་ཚོགས་པའི་འཁྲབ་སྟོན་པ་རྣམས་ཀྱིས་ཕྱོགས་ཡོང་སྐུ་མགྲོན་དང་ལྟད་མོ་བ་རྣམས་ལ་གཟུགས་ཀྱི་ཉི་མའི་རྣམ་ཐར་གཟིགས་འབུལ་ཞུས་སོང་ལ།  བོད་གཞུང་ཟློས་གར་ཚོགས་པའི་འདས་པའི་མི་ལོ་ལྔ་བཅུའི་བཞུད་ལམ་དང་འབྲེལ་བའི་རི་མོ་འགྲེམ་སྟོན་དང་ཟློས་གར་རང་ནས་ཕབ་བསྐྲུན་དང་འཁྲབ་སྟོན་བྱས་པའི་དབྱར་སྐྱིད་དང་རྣམ་ཐར། གཞས་སོགས་ཀྱི་འོད་སྡེར་མང་པོ་འགྲེམས་སྤེལ་བྱས་ཡོད་འདུག་ལ། ཉིན་གྲངས་གཉིས་པ་དང་གསུམ་པའི་རིང་ཟློས་གར་ཚོགས་པའི་གཞས་སྣ་གང་མང་གཟིགས་འབུལ་ཞུ་རྒྱུ་ཡིན་འདུག