བདག་སྒྲ་ཡ་ཆའི་སྐོར་ཅུང་ཙམ་ཞུ། ཀརྨ་དགེ་ལེགས།

ཀརྨ་དགེ་ལེགས།

                          དང་པོ། བདག་སྒྲ་ཡ་ཆའི་སྐོར་ཞུ་དགོས་པའི་རྒྱུ་མཚན་ནི།
   སྤྱིར་རང་རེའི་བོད་འདི་ན་སོ་སོའི་རང་ལུགས་འདི་ཞེས་ཨུ་ཚུགས་མཁན་མང་བ་དང་། དྲང་མོས་དཔྱད་པ་བྱེད་མཁན་ཉུང་བའི་ཕྱིར། ཐ་ན་བདག་སྒྲ་ལའང་ས་ཕྱོགས་རེ་ན་རང་ལུགས་མི་འདྲ་བ་རེ་དང་། སྦྱོར་ཚུལ་མི་འདྲ་བ་རེ་འདུག    དཔེར་ན། ནང་པ་བ། ནང་བ་པ། ནང་བ་བ། ཞེས་པ་ལྟ་བུའོ། ད་ལྟ་རྩོམ་འབྲི་མཁན་དང་རྩོམ་སྒྲིག་མཁན་གཉིས་བར་རང་ལུགས་མི་འདྲ་བ་རེ་བྱུང་བས་ཕན་ཚུན་རྙོག་འཛིང་གི་དྲ་བར་ཚུདའདུག   ལྷག་པར་ལེགས་བཤད་ལྗོན་དབང་དུ། བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་གསུངས་ཡོད་པ་ལ།དེ་འགྲེལ་མཁན་རྣམས་ཀྱིས་དོན་ལོག་པར་བཀྲལ་ནས། ང་ཚོའི་ཁ་དཔེར། བླུན་པོས་འཆུགས་ན་མཐོ་གང་། །མཁས་པས་འཆུགས་ན་འདོམ་གང་། །ཟེར་ཡང་། འདིར་མཁས་བརྒྱས་འཆུགས་ནས་འདོམ་རྒྱ་རུ་གྱུར་ཡོད།  སྤྱིར་ལེགས་བཤད་ལྗོན་དབང་ཞེས་པའི་སུམ་བཅུ་བའི་སྡོམ་ཚིག་དེ་དར་ཁྱབ་ཆེ་ཤོས་ཡིན་ཕྱིར་ལོག་འགྲེལ་དེ་ཡང་དར་ཁྱབ་ཆེ་ཤོས་སུ་གྱུརཡོད། དེ་བཞིན་ཨུ་ཚུགས་ཀྱི་དཔེར་བརྗོད་རེ་བཀོད་ནས་བོད་མདོ་དབུས་ཁམས་གསུམ་གྱི་སློབ་གྲྭ་ཆེ་ཆུང་ཀུན་ལའང་འགྲེལ་ལོག་འདིས་མགོ་སྐོར་གཏོང་བཞིན་དང་། བོད་ཀྱི་སྐད་ཡིག་ལའང་འདིས་སླད་སྲེ་བཞིན་ཡོད། ཚུལ་འདི་ལ་བསམས་ནས་དྲང་མོའི་སྒོ་ནས་དཔྱད་པ་དང་བཅས་དོན་ལེགས་པར་བཀྲལ་ནས་ཞུ་རྒྱུ་གལ་ཆེ་ཕྱིར་རོ། །
                               དོན་ཆེན་ཟབ་མོའི་ལྟ་གྲུབ་འདིར་མེད་ཀྱང་། །
                                   དོན་ཆུང་གཞན་གྱི་གསུང་སྒྲོས་རྐུས་པ་མིན། །
                                   བོད་ལ་ད་དུང་བོད་སྐད་དགོས་གྱུར་ན། །
                                  གལ་ཆེན་དོན་ཆེན་ཡིན་མིན་ལྟོས་དང་ཤེས། །
        གཉིས་པ།  གཞན་གྱི་བདག་སྒྲ་ཡ་ཆ་འགྲེལ་ལུགས། ལེགས་བཤད་ལྗོན་དབང་དུ།   ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན།།
བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །མིང་མཐའི་པ་བ་ཕལ་ཆེར་འདྲ། །ཞེས་པའི་བདག་སྒྲ་ཡ་ཆ་གཉིས་ཀྱི་དོན་གཞན་གྱིས་ཇི་ལྟར་བཀྲལ་པར་ཞུ་བ་ལ། ཚྭ་སྤྲུལ་དང་། རྡོ་རྗེ་རྒྱལ་བོ། དུང་དཀར་བློ་བཟང་ཕྲིན་ལས་སོགས་མང་བོ་ཞིག་གིས་ཚེག་བར་བརྩིས་ནས། ཚེག་བར་གསུམ་ཅན། ཚེག་བར་ལྔ་ཅན་རྣམས་ལབདག་སྒྲ་ཡར་གྱུར་བ་དང་། ཚེག་བར་གཉིས་ཅན།  ཚེག་བར་བཞི་ཅན།  ཚེག་བར་དྲུག་ཅན་རྣམས་ལ་བདག་སྒྲ་ཆར་གྱུར་པ་ཞེས་འབོད།  དཔེར་ན། ཚྭ་སྤྲུལ་གྱིས། གཟུགས་གཞི་ཐང་པོ་དང་། མི་གྱོང་བོ།  ཉག་རོང་བ་དང་། རོང་པ། ང་མཐའི་བདག་སྒྲ་ཡར་གྱུར་བོ་དང་། ཆ་ལ་པོ། ཡང་ཡ་ལ་བ་དང་། ཆ་ལ་པ་སྦྱར་བ། ཉེ་པོ་དགའ་པོ་དང་། ཕན་པོ་མདའ་པ་དང་། རྒྱ་མདའ་བ། འ་མཐའི་བདག་སྒྲ་ཡར་གྱུར་བ་ཕྱེད་ཝ་དང་། ཆ་ལ་པོ། ཡང་ཡ་ལ་བ་ཕྱེད་ཝ་དང་། ཆ་ལ་པ་སྦྱར་བ། རྒྱན་ཆ་མཆོར་པོ་དང་། མི་འཕེར་བོ། མིག་ཞར་བ་དང་། གུར་པ། ར་མཐའི་བདག་སྒྲ་ཡར་གྱུར་བོ་དང་། ཆ་ལ་པོ། ཡང་། ཡ་ལ་བ་ཕྱེད་ཝ་དང་། ཆ་ལ་པོ་སྦྱར་བ། མི་དལ་བོ་དང་། སེམས་རྩ་འཁོལ་པོ། བློ་གསལ་བ་དང་། ཚལ་པ། ལ་མཐའི་བདག་སྒྲ་ཡ་ལ་བོ་དང་། ཆ་ལ་པོ། ཡང་། ཡ་ལ་བ་ཕྱེད་ཝ་དང་། ཆ་ལ་པ་སྦྱར་བ། ཁ་བདེ་བོ་དང་། ལག་པ་བདེ་པོ། སེ་ར་བ་དང་། ཉ་པ། མཐའ་མེད་ཀྱི་བདག་སྒྲ་ཡ་ལ་བོ་དང་། །ཆ་ལ་པོ། ཡང་ཡ་ལ་བ་ཕྱེད་ཝ་དང་། ཆ་ལ་པ་སྦྱར་བ་བཅས་ཡིན།  ཞེས་སོགས་འཁོད་པ་ལ་གཟིགས་པར་འཚལ།
      གསུམ་པ། གཞན་སྐྱོན་གསལ་བར་ཞུ་བ་ལ།སྐབས་འདིར་གཞན་གྱི་འགྲེལ་ལུགས་ལ་སྐྱོན་ཡོད་མེད་ནི་བོད་སྐད་དང་མཐུན་མི་མཐུན།བོད་ཀྱི་བརྡ་སྤྲོད་པའི་གཞུང་དང་མཐུན་མི་མཐུན་གྱི་སྒོ་ནས་འཇོག་དགོས་ཕྱིར། འདིར་བོད་སྐད་དང་མཐུན་ཐབས་མེད་པའི་དཔེར་བརྗོད་འགའ་བཀོད་པ་ལ། གཟིགས་དང་། རྗེ་རིན་པོ་ཆེའི་མཚན་གཅིག་པོར་མཚོན་ན།
                                         ཙོང་ཁ་བ།    ཡ་ཅན།   ཚེག་བར་༣ཅན།
                                     རྗེ་ཙོང་ཁ་པ།    ཆ་ཅན།   ཚེག་བར་༤་ཅན།
                 རྗེ་བཙུན་ཙོང་ཁ་བ།    ཡ་ཅན།   ཚེག་བར་༥་ཅན།
                       ཤར་རྗེ་བཙུན་ཙོང་ཁ་པ།    ཆ་ཅན།   ཚེག་བར་༦་ཅན།
                                                                                                                                                                                                                                                                                                                                                                                                                                                     རྗེ་བཙུན་ཆེན་པོ་ཙོང་ཁ་བ།    ཡ་ཅན།   ཚེག་བར་༧་ཅན།
                             ཤར་རྗེ་བཙུན་ཆེན་པོ་ཙོང་ཁ་པ།    ཆ་ཅན།   ཚེག་བར་༨་ཅན།
དེ་བཞིན། གཞན་ཡང་དཔེར་བརྗོད་རེ་འགོད་པ་ལ།
                                         བཟོ་པ་བ།   ཡ་ཅན།  ཚེག་བར་༣་ཅན།
                             ཤིང་བཟོ་བ་པ།   ཆ་ཅན།  ཚེག་བར་༤་ཅན།
                               ཤིང་གྲུ་བཟོ་པ་བ།   ཡ་ཅན།  ཚེག་བར་༥་ཅན།
                          གྲུ་ཆུང་ཆུང་བཟོ་བ་པ།   ཆ་ཅན།  ཚེག་བར་༦་ཅན།
         གྱེན་འཕུར་གནམ་གྲུ་བཟོ་པ་བ།   ཡ་ཅན།  ཚེག་བར་༧་ཅན།  ཞེས་དང་།                     
                                           ཟ་པ།  ཆ་ཅན།  ཚེག་བར་༢་ཅན།
                                            ཟ་པ་བ།  ཡ་ཅན།  ཚེག་བར་༣་ཅན།
                                         ཤ་ཟ་བ་པ།  ཆ་ཅན།  ཚེག་བར་༤་ཅན།
                                   ལུག་ཤ་ཟ་པ་བ།  ཡ་ཅན།  ཚེག་བར་༥་ཅན།
                                ཤ་ཚོན་པོ་ཟ་བ་པ།  ཆ་ཅན།  ཚེག་བར་༦་ཅན།
                          གླང་བོ་ཆེའི་ཤ་ཟ་པ་བ།  ཡ་ཅན།  ཚེག་བར་༧་ཅན།
                        གླང་བོ་ཆེ་ཡི་ཤ་ཟ་བ་པ།  ཆ་ཅན།  ཚེག་བར་༨་ཅན།
དཔེར་བརྗོད་འདི་དག་ལ་གཟིགས་དང་བོད་སྐད་དང་མི་མཐུན་པ་བློ་གཟུ་བོར་གནས་པ་དག་གིས་ཤེས་སླའོ། །
     བོད་ཡིག་བྱེད་པོ་ཐོན་མི་མན་ཆད་ནས།   །དབྱངས་ཅན་གྲུབ་པའི་རྡོ་རྗེ་ཡན་ཆད་བར། །                 
  ཚེག་བར་བརྩིས་ནས་ཐོབ་ཐང་སྦྱོར་ཚུལ་ཞིག   །བོད་ཀྱི་བརྡ་སྤྲོད་གཞུང་ལ་གྲགས་མ་མྱོང་། །
   དབྱངས་ཅན་གྲུབ་པའི་རྡོ་རྗེ་མན་ཆད་ནས།   །ང་རང་ཀརྨ་དགེ་ལེགས་ཡན་ཆད་བར། །
 བདག་སྒྲ་ཡ་ཆ་ཚུལ་བཞིན་འགྲེལ་མཁན་ཞིག   །རང་ཅག་གངས་ཅན་བོད་ལ་བྱུང་མ་མྱོང་། །
         བཞི་བ། བདག་སྒྲ་ཡ་ཆའི་དོན་ཅི་ཡིན་གསལ་བར་ཞུ་བ་ལ།ད་ནི་སྐབས་འདིའི་བརྗོད་བྱ་དངོས། རང་ལུགས་ལྟར་བདག་སྒྲ་ཡ་ཆ་གཉིས་ཀྱི་གོ་དོན་ཅི་ཡིན་ཚིག་དོན་གཉིས་
དང་།  རྒྱུ་མཚན་དང་བཅས་གསུམ་ལས།  དང་པོ་རྗོད་བྱེད་ཀྱི་ཚིག་རང་ལ་གཟིགས་དང་། བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་
བདག་སྒྲ་ཁོ་རང་ཡ་ཆ་གཉིས་སུ་དབྱེ་ཡོད་མ་གཏོགས་འདིར་ཚེག་བར་ཞིག་རྩ་བ་ནས་གསུངས་མི་འདུག  བདག་སྒྲ་ཡའི་དོན་ནི་བདག་སྒྲ་གཅིག་ལས་མེད་པའམ།  བདག་སྒྲ་ཁེར་རྐྱང་གི་དོན་རེད།  པ་པོ་བ་བོ་བཞི་ལས་གཅིག་སྦྱར་ཡོད་པའི་དོན་རེད། བདག་སྒྲ་ཆ་ཞེས་པའི་དོན་ནི།  བདག་སྒྲ་གཉིས་ཡོད་པའམ།  བདག་སྒྲ་འཕར་མའི་དོན་རེད།  པ་པོ་བ་བོ་བཞི་ལས་གཉིས་ཡོད་
པའི་དོན་རེད།  དེ་ཚེག་བར་ནོར་བ་ཡ་མཚན་ཆེ།  གལ་ཏེ་ལེགས་བཤད་ལྗོན་དབང་དུ།  ཚེག་བར་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་གསུང་ཡོད་ན་ད་གཟོད་ཚེག་ཁྱིམ་བརྩི་དགོས་མོད། ལྟོས་དང་།  ཁོང་གི་རྩ་བར་ཚེག་བར་ཞིག་རྩ་བ་ནས་གསུང་མི་འདུག  ཁྱེད་ཅག་གིས་འགྲེལ་བར་ཨུ་ཚུགས་ཀྱིས་ཚེག་བར་བརྩི་དགོས་དོན་ཅི་ལ་ཐུག གལ་ཏེ་ཚེག་བར་བརྩིས་
ནས་བོད་སྐད་དང་མཐུན་ཐུབ་པ་ཞིག་འོང་ན་དེ་ལྟར་འདོད་ཀྱང་རུང་མོད། ཁྱེད་ཅག་གི་ཚེག་བར་རྩི་བའི་ལུགས་དེ་བོད་སྐད་དང་མཐུན་མི་ཐུབ་ལ། ལྷག་པར་བོད་ཀྱི་བརྡ་སྤྲོད་པའི་གཞུང་དང་རྩ་བ་ནས་མཐུན་ཐབས་མེད།
      གཉིས་པ་བརྗོད་བྱའི་དོན་ལ་གཟིགས་དང་། ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །ཞེས་པའི་དོན་ནི། རྗེས་འཇུག་གི་ཡི་གེ   ང་། འ། ར། ལ། རྗེས་འཇུག་མེད་པའི་མཐའ་མེད་དང་བཅས་ཀྱི་
རྗེས་སུ་བདག་སྒྲ་ཁོ་རང་གཅིག་ལས་མེད་པས་ན་བདག་སྒྲ་ཡར་གྱུར་བ་ཡིན་པས་བ་དང་བོ་གང་རུང་སྦྱར་དགོས་སྟེ།  དཔེར་ན།   ནང་བ།  མཐའ་བ།  མགར་བ།  རྒྱལ་བ།  བཟོ་བ།  ལྟ་བུ་དང་། དེ་དག་གི་མཐར་ཡང་གཅིག་སྦྱར་ན་བདག་སྒྲ་ཆར་བ་ཡིན་ཕྱིར་པ་དང་པོ་གང་རུང་སྦྱར་དགོས་སྟེ།  དཔེར་ན།  ནང་བ་པ།  མཐའ་བ་པ།  མགར་བ་པ།  རྒྱལ་བ་པ།  བཟོ་བ་པ།  ལྟ་བུ་ཡིན།  
      གསུམ་པ་བདག་སྒྲ་ཡ་ཆ་གཉིས་སུ་དབྱེ་དགོས་པའི་རྒྱུ་མཚན་ནི། སྤྱིར་ང་འ་ར་ལ་མཐའ་མེད་ཀྱི་རྗེས་སུ་བ་བོ་ཐོབ་པ་ནི་ཡོངས་གྲགས་ཡིན།   སུམ་བཅུའི་སྡོམ་ཚིག་གསུང་མཁན་ཚོའི་ཞལ་གཅིག་མཐུན་ཡིན། ཡིན་ནའང་། པྲཏིས་བདག་སྒྲའི་དཔེར་བརྗོད་གཅིག་ཏུ། ཀ་བ་པ།  ཟེར་བ་ཞིག་དང་། གསེར་ཏོག་གིས།  ནང་བ་པ།  ཟེར་བ་ཞིག་བཞག་ཡོད་པའི་ཀ་བ་དང་། ནང་བ་གཉིས་ཀྱི་བ་ཡིག་ནི་མཐའ་མེད་རང་ཡིན།   དེ་མཐའ་མེད་ཡིན་ཕྱིར་མཐའ་མེད་ལྟར།  ཀ་བ་བ། ནང་བ་བ།  ཞེས་སྦྱར་ན་བརྗོད་མི་ལེགས་པ་དང་། དེ་དང་རིགས་འདྲ་བ་ནི། དཔེར་ན།  རོང་བ་བ། འཐེང་བ་བ། མཐའ་བ་བ།   མགར་བ་བ།  རྒྱལ་བ་བ།  འགོ་བ་བ།  ཞེས་པ་ལྟ་བུ་ལ་ལྟོས་དང་།    བ་ཡིག་གཉིས་མཉམ་དུ་ཡོད་ན་བརྗོད་མི་བདེ་བ་མངོན་གསལ་རེད།  གཞན་ཡང་སི་ཏུའི་སུམ་རྟགས་ནང་།  གསུང་བ་པོ།  འགྲེལ་བ་པོ། ཟ་བ་པོ་སོགས་མང་པོ་ཞིག་གསུང་ཡོད། རྒྱུ་མཚན་དེ་དག་ལ་བརྟེན་ནས་བདག་སྒྲ་ཡ་ཆ་གཉིས་སུ་བཀར་ནས། བདག་སྒྲ་རྗེས་མ་དེ་པ་པོ་གང་རུང་སྦྱར་ན་བརྗོད་བདེ་
ཕྱིར།   ཆ་ལ་པ་ཉིད་སྦྱོར་བ་ལེགས། །ཞེས་གསུངས་པ་ལ་རྒྱུ་མཚན་ཡང་དག་དང་ལྡན་པར་འདུག་གོ།
                       བདག་གིས་བདག་སྒྲ་ཡ་ཆའི་དོན་བཀྲལ་ནས། །
                             བོད་མི་བོད་ཡིག་ཤེས་མཁན་རྣམས་ལ་འབུལ། །
                             ཡ་མཚན་ཡ་ཆ་རྩི་ལུགས་དེ་དོར་ནས། །
                             དག་ཡིག་དག་མ་སློབས་ཤིག་གྲོགས་པོ་ཚོ། །
          འདིར་གྲོགས་ཁ་ཅིག་ལས་གཏམ་སྣ་ཚོགས་ཐོས་པའི་རྐྱེན་དང་། བོད་སྤྱིའི་རིག་གཞུང་ལའང་
ཅུང་ཙམ་རེ་ཡང་ཨེ་ཕན་བསམས་ནས། སྔར་བཤད་པ་ནང་བཞིན་སླར་ཡང་ཨར་གནས་ཀརྨ་དགེ་ལེགས་སུ་
འབོད་པས་བྲིས་པའོ། །  ། །