༡༩༧༩ ལོར་ཏིན་གྱིས་རང་བཙན་མ་ཡིན་པའི་སྐད་ཆ་གང་ཡིན་ཡང་བཤད་ཆོག་ཅེས་པ་ནས་བརྩིས་ན། ད་བར་དུ་ མི་ལོ་ ༣༢ སོང་ཟིན། ༡༩༨༧ ལོའི་ཨ་རིའི་གྲོས་ཚོགས་ཀྱི་༧གོང་ས་མཆོག་གི་གསུང་བཤད་དང༌། ༡༩༨༨ ལོའི་སི་ཊ་སི་སྦག་གི་གསུང་བཤད་གཉིས་ནས་བརྩིས་ན་ མི་ལོ་ ༢༣ ཙམ་སོང་ཟིན། ༢༠༠༢ ལོ་ནས་ད་ལྟའི་འབྲེལ་མོལ་ཟེར་བ་འདི་མགོ་བཙུགས་ནས་ད་བར་དུ་མི་ལོ་ ༨ ཙམ་འགྲོ་བཞིན་ཡོད། དུས་ཚོད་འདི་ནི་བྱིས་པ་ཞིག་སྐྱེས་ནས་སློབ་གྲྭ་ཆེན་མོ་ཐོན་པ་དང་། དེ་ནས་གཉེན་སྒྲིག་ཅིང་། བྱིས་པ་ཡང་གཉིས་གསུམ་གྱི་ཡབ་ཡུམ་ཆགས་པའི་དུས་ཡུན་ཞིག་རེད། དུས་ཚོད་འདིའི་ནང་རྒྱ་ནག་གི་སྲིད་འཛིན་གསུམ་བརྗེས་ཟིན་པ་རེད། ཞི་མོལ་གྱི་ལས་རིམ་མགོ་བཙུགས་རྗེས་སུ་སྐྱེས་པའི་བོད་པའི་བྱིས་པ་ནར་སོན་ཏེ་བོད་རང་བཙན་རྩོད་བཞིན་འདུག་ལ། ཁ་ཤས་བཙོན་དུ་ཚུད་ཅིང་ཁ་ཤས་ཀྱི་སྐུ་སྲོག་ཤོར་ཡོད་པ་རེད། ང་ཚོ་ནི་ འགྱུར་བ་མེད། ང་ཚོ་ནི་རྟག་པ་ཡིན། གཞུང་གཅིག གཞུང་གི་དཔོན་པོ་གཅིག སྐུ་ཚབ་གཅིག ལས་ཀ་གཅིག གྲུབ་འབྲས་གཅིག ད་གལ་ཆེ་ཤོས་དེ་སང་ཉིན་རེད། སང་ལོ་རེད། མ་འོངས་པའི་ལོ་ བཞིའི་ནང་ལ་འགྱུར་བ་ཡོད་དམ། ལོ་བཅུའི་ནང་ལ་འགྱུར་བ་ཡོད་དམ། ལོ་ཉི་ཤུའི་ནང་འགྱུར་བ་ཡོད་དམ།
རྒྱ་རི་རིན་པོ་ཆེས་ ༡༩༨༨ ཙམ་ནས་བཀའ་བློན་གྱི་ལས་འཁུར་ཞུས། དེ་ནས་ ༡༩༩༠ ནང་ནས་ད་བར་དམིགས་བསལ་སྐུ་ཚབ་ཀྱི་འགན་བཞེས། ཧ་ལམ་མི་ལོ་ཉི་ཤུ་རྩ་གཅིག་ཙམ་གྱི་རིང་ལས་འགན་ཆེན་པོ་འདིའི་ཐུགས་འཁུར་བཞེས་པ་རེད། དུས་ཚོད་འདིའི་རིང་། ཟམ་གདོང་རིན་པོ་ཆེས་གྲོས་ཚོགས་ཚོགས་གཙོ་ཐེངས་གཉིས་དང་བཀའ་བློན་ཁྲི་པ་ཐེངས་གཉིས་བཅས་གནང་བ་རེད། ཟམ་གདོང་རིན་པོ་ཆེ་སྐུ་གཞོན་ཤ་ཅན་ནས་བགྲེས་པོའི་ཉམས་བཞེས་འདུག་ཅིང་། ཁ་སང་ཕྱག་ལ་ཕྱག་འཁར་ཞིག་བཞེས་ནས་ཕེབས་པ་མཐོང་བྱུང་བས་སེམས་སྐྱོ་བ་ཞིག་འདུག ད་དུང་དུས་ཡུན་དེའི་རིང་ཨ་རི་ལ་མཚོན་ན་སྲིད་འཛིན་གསུམ་བརྗེས་ཟིན་པ་རེད། རྒྱ་རི་རིན་པོ་ཆེ་དབུ་སྐྲ་ནག་པོ་ནས་དབུ་སྐྲ་དཀར་པོའི་བར་སླེབས་པ་རེད། ཞབས་སྟེགས་གཅིག་རང་གི་ཐོག་བཞུགས་པ་རེད། ད་ལོ་རྒྱ་རི་རིན་པོ་ཆེ་ དགུང་ལོ་ ༦༢ ཙམ་ལ་ཕེབས་ཡོད་པ་རེད། མ་འོངས་པའི་ལོ་ལྔ་བསྣན་ན་ དགུང་ལོ་ ༦༧ ལ་སླེབས་གི་རེད།
རྒྱ་རི་རིན་པོ་ཆེའི་མཛད་རྗེས་གཙོ་བོ་ཞིག་ནི་ ཨ་རིའི་གྲོས་ཚོགས་དང་གཞུང་ལ་སྐུལ་སློང་གིས་བོད་དོན་རྒྱབ་སྐྱོར་ཞུ་སྐུལ་བྱས་པ་དེ་རེད། ཁོང་གི་འཇོན་ཐང་ནི་ཧ་ལམ་མགར་སྟོང་བཙན་གྱི་ཚད་ལ་སླེབས་ཡོད་སྐད་འདུག འོན་ཀྱང་ང་ཚོ་ལ་ བོད་གཞུང་སྐུ་ཚབ་དོན་གཅོད་ཁང་ཞིག་ནིའུ་ཡོག་ལ་ཡོད་ཡོད་རེད། གལ་སྲིད་༧དམིགས་བསལ་སྐུ་ཚབ་ལས་ཁུངས་དང་བོད་གཞུང་སྐུ་ཚབ་དོན་གཅོད་གཉིས་གཅིག་ལྕོགས་གནང་ཐུབ་ཚེ། བོད་གཞུང་ལ་ཨ་སྒོར་འབུམ་ཁ་ཤས་བསྲི་ཚགས་བྱེད་ཐུབ་པ་ཡོད་པ་རེད། རྒྱ་རི་རིན་པོ་ཆེའི་མཛད་རྗེས་གཞན་ཞིག་ནི། རྒྱལ་སྤྱིའི་བོད་དོན་ལས་འགུལ་ཁང་བཙུགས་པ་དེ་རེད། ལས་འགུལ་ཁང་འདིའི་ ༢༠༠༨ ལོའི་ཡོང་འབབ་སྒོར་མོ་ནི་ $5,345,726 རེད། དེ་ནི་བཙན་བྱོལ་བོད་གཞུང་གི་ད་ལྟའི་ལོ་འཁོར་སྔོན་རྩིས་ཧིན་སྒོར་ ས་ཡ་དགུ་བརྒྱ་སོ་བཞི་ལྷག་ཡིན་པའི་(934,000,000)དབང་དུ་བཏང་ན། དེའི་བརྒྱ་ཆ་ ༢༠ ཙམ་ཟིན་ཡོད་པ་རེད།
ད་བོད་མི་རིགས་ཞེས་པའི་སྐད་ཆ་ཆེན་པོའི་ཐོག་ནས་བརྩིས་ན། ༡༩༧༩ ལོའི་རྗེས་ནས་བོད་ནང་དུ་སྲིད་བྱུས་གུ་ཡངས་བཏང་ཡོད་པ་དང་། དེ་ནས་རིམ་གྱིས་བོད་ནས་གསར་འབྱོར་བ་མང་ཙམ་འབྱོར་ཡོད་པ་རེད། ལོ་རེར་ཆ་སྙོམ་གྱིས་ ༡༠༠༠ རེ་འབྱོར་ཡོད་པའི་དབང་དུ་བཏང་ན། ད་ལྟའི་ཆར་སྲིད་བྱུས་གུ་ཡངས་ཀྱི་རྗེས་ནས་འབྱོར་བའི་གསར་འབྱོར་གྱི་མི་འབོར་དེ་ཁྲི་གསུམ་བརྒལ་གི་ཡོད་པ་རེད། བྱང་ཨ་མི་རི་ཀ་ལ་མཚོན་ ༡༩༩༠ སྔོན་ལ་བོད་མི་ ༥༠༠ ཙམ་ཡོད་པ་ནས་ད་ལྟའི་ཆར་བོད་མི་ ཁྲི་གཉིས་ཙམ་གྱི་ཚོད་རྩིས་བྱེད་དགོས་པ་ཞིག་ཏུ་འཕེལ་ཡོད་པ་རེད། བོད་རིགས་ཚོགས་པ་ཡང་མང་དུ་ཕྱིན་ཡོད་པ་རེད། ད་མ་འོངས་པ་ལ་བསམ་བློ་བཏང་ན། མ་འོངས་པ་ལ་བསམ་བློ་གཏོང་ཐུབ་གི་མི་འདུག བོད་མི་ཁྲི་སྐོར་རེ་༧རྒྱལ་བའི་ཞལ་ལ་གཅེར་ནས་ཧི་མ་ལ་ཡ་འཕྲེད་ཀྱིས་གཅོད་ཀྱི་རེད། བོད་མི་ཚོ་ནི་རང་བཙན་ཡིན་ནམ་དབུ་མའི་ལམ་ཡིན་ཞེས་པའི་གསལ་ཁ་མེད་པ་འདིའི་ནང་ནས་ཤི་མཁན་ཚོ་ཤི་གི་རེད། སྐྱེ་མཁན་ཚོ་སྐྱེ་གི་རེད། ཧ་ལམ་ང་ཡང་ཤི་མཁན་གྱི་གྲས་ན་ཡོད་པ་འདྲ། རྩིས་ཤིག་རྒྱོབས། ད་དུང་ཨང་གྲངས་ཡོད་ན་གསུངས་རོགས།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
lenpa ཁྱེད་ཀྱི་བསམ་ཚུལ་གྱི་རྩོམ་ཐུང་དེ་མཐོང་སྐབས་གད་མོ་ཞིག་རང་དབང་མེད་པར་ཤོར་སོང་། ཚིག་དོན་གཉིས་ཆར་ལ་གོ་རྒྱུ་ཉན་རྒྱུ་མངས་པོ་འདུག བདེན་པ་རེད། ཐུགས་རྗེ་ཆེ། མ་ཟད་ཁྱེད་ཀྱི་རྩོམ་རྩལ་དང་རྣམ་དཔྱོད་ལ་བཀྲ་ཤེས་བདེ་ལེགས་ཞུ།
སྐུ་ཚབ་ཚོ་
ཚུགས་ཀ་མེད་ཀྱང་སྡོག་པ་བྱས་ནས་ས་ཡ་དྲུག་གི་སྐུ་ཚབ་དག།
བོད་ལྭ་གོན་ནས་བོད་ཚུགས་བཏོད་དེ་བོད་ཀྱི་རྒྱལ་ས་གཉིས་བ་ནས།།
༧ཡིད་བཞིན་ནོར་བུར་མགོས་ཕྱག་འཚལ་སྟེ་དམ་བཅའ་ཁས་ལེན་བྱས་བ་དང་།།
ཟ་དང་འཐུང་དང་ཡིན་དང་མིན་སོགས་རྒྱ་སྐད་ཁ་ཤས་སློབ་ཞོར་ལ།།
བོད་ལྭ་ཕུད་ནས་རྒྱ་ལྭ་གོན་ཏེ་མཁའ་ལམ་བརྒྱུད་ནས་ཕེབས་སོང་ཟེར།།
གཞིས་བྱིས་གཉིས་ཀྱི་རེ་བ་ཤི་ཡང་རྣ་བས་ཡང་ཡང་ཉན་པ་ན།།
ཤ་རྩ་དཀར་ལ་ཤ་ཚུགས་ལེགས་པའི་རྒྱ་མོ་འགའ་ཡི་བསུ་བ་བཅས།།
རྒྱ་མཁར་སྨུག་པོའི་ནང་ལ་འཛུལ་རྗེས་ཟ་འཐུང་སྡེར་མའི་ཁྲོག་སྒྲ་ལས།།
བོད་མིའི་བདེ་སྡུག་བཤད་པའི་སྐད་ཆ་སུ་དང་གང་གིས་མ་གོ་ཟེར།།
༧ཡིན་བཞིན་ནོར་བུའི་གསལ་བཤད་བདུན་པོ་ཕར་ལ་འཕྲོད་པའི་བརྡ་ཙམ་དང་།།
མི་རུང་ཁ་ཤོར་བཞི་ཡི་ཐོག་ལ་ཐུགས་རྗེ་ཆེ་ཞུ་ཕུལ་བ་དང་།།
ལག་པ་གཉིས་ཀས་ཕོ་བ་སྐྱོར་ནས་ཟ་འཐུང་བླུགས་པའི་སྒྱེ་མོ་བཞིན།།
པེ་ཅིང་མཁར་ན་ཡོད་པ་འདྲ་པས་བདེ་མོ་སྐྱིད་པོ་ཡིན་པར་སྨོན།།
ཆབ་སྲིད་འཐབ་ཕྱོསག་གཅིག་གྱུར་པུའུ་ཡིས་ཁྱོད་ཚོར་སྐད་ལོག་ཨེ་བྱས་ཐལ།།
པུའུ་ཀྲང་གཞོན་པས་དཔའ་སྐད་འཐེན་སྐབས་ཆོས་སྐྱོང་སྲུང་མ་ཨེ་དྲན་ཐལ།།
སྐུ་ཚབ་རྣམས་ལ་སྐྲག་སྣང་སྐྱེས་ནས་རྒྱུད་པ་གཉིས་ཀ་ཨེ་འདར་ཐལ།།
བདག་དབང་བཤད་སྐབས་མགོ་བོ་རྨོངས་ནས་༧ཡིད་བཞིན་ནོར་བུ་ཨེ་དྲན་ཐལ།།
སྲིད་ཇུས་བཤད་སྐབས་མགོ་ཡོམ་འཁོར་ནས་རྔུལ་ཆུ་མང་བོ་ཨེ་བཞུར་ཐལ།།
རྒྱལ་ཁབ་ཞིག་གི་སྐུ་ཚབ་ཡིན་པས་རྒྱ་ཆེན་རྒྱས་བ་ཨེ་ཐུབ་ཐལ།།
ཡ་ཡ་ལེགས་སོ་ཐུགས་རྗེ་ཆེ་ལས་གཞན་པའི་ཚིག་འགའ་ཨེ་ཤོད་ཐལ།།
༧གོང་ས་མཆོག་ལ་མཚན་སྨོད་བྱེད་སྐབས་སྐྱུ་མོ་གཉེར་ནས་ཨེ་དཀའ་ཐལ།།
རྒྱ་མོ་ཚོ་ལ་རྒྱ་རྒྱོ་བརྒྱབས་ནས་གུང་གསེང་སྐྱིད་པོ་ཨེ་བྱུང་ཐལ།།
མོ་ཐེ་འཐུང་སྐབས་མི་རིགས་ཤིག་གི་བཀའ་དྲིན་ཡིན་པ་ཨེ་ཚོར་ཐལ།།
ཁྱོད་ཚོར་རྟག་ཏུ་རྙོག་དྲ་མི་འདུག་རྒྱུན་དུ་ཕེབས་ཞེས་ཨེ་བཤད་ཐལ།།
མྱི་བཟང་རེད་ཅེས་མྱི་ཆེན་དག་གིས་བསྟོད་པའི་མཐེ་བོང་ཨེ་བསྒྲངས་ཐལ།།
སྒེར་བདག་ཁ་པར་ཨང་གྲངས་སྤྲོད་དང་སྒེར་དོན་བསྒྲུབ་ཞེས་ཨེ་བཤད་ཐལ།།
ང་ཚོ་ཚང་མ་བཟང་ས་ཡིན་པས་ནང་གཏམ་བཤད་ཅེས་ཨེ་བསྐོར་ཐལ།།
ཅི་གསུངས་བཀའ་ལ་ལེགས་སོ་ཙམ་ལས་རང་གི་འདོད་འདུན་ཨེ་ཤོད་ཐལ།།
བོད་པའི་སྐུ་ཚབ་ཡིན་པའི་རྟགས་ལ་བོད་དོན་ཚིག་འགའ་ཨེ་ཁྲོལ་ཐལ།།
ས་མཚམས་ལོ་རྒྱུས་གྲོས་མོལ་བྱེད་སྐབས་ས་རྒྱུས་མེད་པས་ཨེ་མྱངས་ཐལ།།
དྲང་མོར་བཤད་ན་འཕྲིན་སྐྱེལ་ཙམ་ལས་བོད་པའི་སྐུ་ཚབ་ཨེ་ཉན་ཐལ།།
རྡ་རམ་ས་ལའི་ཉེ་སར་འབྱོར་དུས་ཅི་བཤད་བསམ་ནས་ཨེ་སྐྲག་ཐལ།།
བཀའ་བློན་ཁྲི་བའི་བཀའ་བཀྱོན་དྲན་ནས་སྐྱག་རྫུན་བཤད་པྭ་ཨེ་འདོད་ཐལ།།
༧ཡིད་བཞིན་ནོར་བུ་ཡིད་ལ་ཤར་ནས་དགོངས་དག་ཞུ་པྭ་ཨེ་དྲན་ཐལ།།
སྐྱབས་བཅོལ་བ་ཚོ་སེམས་ལ་ཡོང་ནས་རྒྱ་ཆེན་བཤད་པྭ་ཨེ་འདོད་ཐལ།།
གསར་འབྱོར་བ་ཚོས་དྲི་བ་འདྲི་ན་དབྱིན་སྐད་རྒྱག་པྭ་ཨེ་དྲན་ཐལ།།
ཁ་ཤས་གསང་ནས་ཁ་ཤས་བཤད་སྐབས་རང་གིས་འཇོན་སོང་ཨེ་འདོད་ཐལ།།
པེ་ཅིང་ཁོ་ཡ་ཁོག་ནས་ཞུས་ཏེ་མོ་ཐེའི་བཟི་ཁ་དྭངས་བ་ན།།
དྲི་བ་འདི་ཚོར་ལན་ཞིག་གནོངས་ཞེས་གུས་མི་ཤེས་བའི་གུས་ལྡན་པ།།
ས་ཡ་དྲུག་གི་དམའ་ཤོས་དེ་ཡིས་ས་ཁུང་ཞིག་གི་ཡ་ཕུགས་ནས།།
ལག་པའི་ཐལ་མོ་ཐོད་ལ་སྦྱར་ཏེ་པུས་མོ་ས་ལ་བཙུགས་ནས་ཞུས།
འཇིགས་བྲལ་བསྟན་འཛིན་ལགས་སུ།
ཁུངས་ཞེས་པ་འདི་གསར་འགོད་རིག་པའི་ནང་འགྲོ་སྲོལ་ཞིག་ཡོད་པ་རེད། ཁུངས་ཞེས་པ་དེ་དགོས་གལ་བྱུང་ཚེ་མིང་ཙམ་གྱི་གསང་བ་ཡང་ཕྱི་ལ་མི་འདོན་པའི་ལམ་སྲོལ་ཞིག་ཡོད་པ་རེད། དེ་ངེད་ཀྱིས་ལག་ལེན་ལ་བསྟར་བཞིན་ཡོད། ད་དྭོགས་པ་ཡོད་ན་ལ་རྒྱ་རི་ལ་འབྲི་རོགས་གནང་། ཁོང་གིས་སྐད་ཆ་དེ་འདྲ་གསུངས་ས་དང་གསུངས་དུས་བཅས་ཚང་མ་བཀོད་ཡོད། དེ་ནས་སྐད་ཆ་འདི་མཚམས་འཇོག་གནང་རོགས།
དགེ་འདུན་རབ་གསལ་ལགས། བརྩད་གཅོད་འདིས་ཁྱོད་རང་ལ་མི་བདེ་བ་བྱུང་ཡོད་ན་སྒེར་ལ་དམིགས་པ་ཞིག་མིན་པས་དགོངས་པ་འགལ་མདོག་མེད་ལ་རེ་བ་ཡང་ཞུ་གི་ཡོད། གནད་དོན་འདི་བོད་ཀྱི་མདུན་ལམ་ལ་ཐུག་པའི་སྐད་ཆ་ཡིན་པས་བརྩད་གཅོད་བྱས་པ་ཡིན། དེ་དོན་དགོངས་འཇགས་ཞུ།
གཡང་སྐྱབས་རྒྱལ་གྱི་གཏམ་དེའི་ཁུངས་སྐྱེལ་ཐབས་ཤིག་དགེ་འདུན་རབ་གསལ་ལགས་ཀྱིས་གནང་འདུག དེ་ཡང་དགེ་འདུན་རབ་གསལ་ལགས་ཀྱིས་༼སྐད་ཆའི་ཡོང་ཁུངས་ནི་མིང་སྨྲ་འདོད་མེད་པའི་ཁུངས་ཡིད་བརྟན་འཕེར་བ་ཞིག་རེད། ༽ཅེས་གསུངས་འདུག དྲང་མོ་བཤད་ན་ཁྱོད་རང་མི་དེར་ཡིད་བརྟན་འཕེར་གྱི་ཡོད་ཀྱང་བོད་མི་མང་ཡིད་བརྟན་འཕེར་གྱི་རེད་དམ། བོད་མི་མང་ལ་དགོས་པའི་ཁུངས་སྐྱེལ་དེ་༼སྐད་ཆའི་ཁུངས་ལུང་ལ་ཆ་འཇོག་བྱེད་ཀྱི་རེད་མ་གཏོགས་ཟེར་སྐད་དང་། ཐོས་སྐད་སོགས་ལ་ཆ་འཇོག་བྱེད་ཐབས་ཡོད་མ་རེད།༽ ཅེས་སྔོན་ནས་བཤད་ཡོད། དཱ་མཐའ་མའི་ཁུངས་ལུངས་དེ་མིང་ཙམ་ཡང་འདོན་མི་ཕོད་པའི་མི་ཞིག་གིས་ལབ་སོང་ཟེར་བ་དེ་རེད། བོད་མི་མང་མགོ་སྐོར་མི་ཐེབས་པའི་དོན་དུ་མི་འདུན་ལ་དོན་ནས་རྒྱ་རིའི་སྐད་ཆའི་སྒྲ་འཇུག་དང་བཅས་བོད་མི་མང་ལ་གསལ་བསྒྲགས་བྱོས་དང་། རྒྱལ་གཅེས་དཔའ་བོ་རེད། རྒྱ་རི་ལ་ཞེད་དགོས་དོན་ག་རེ་འདུག སྔོན་ཡང་འདི་ལྟར་ཞུས་ཡོད། ༼གཡང་སྐྱབས་རྒྱལ་གྱིས་བཤད་པར་ཁུངས་ལུང་ཡོད་ན་དངོས་འབྲེལ་བཟོད་སྒོམ་བྱེད་ཐབས་བྲལ་བ་ཞིག་རེད། ང་ཚོས་ངེས་པར་ཐེར་འདོན་བྱེད་དགོས་པ་རེད། ང་ཚོ་དྲ་གྲོགས་ཚོ་ཡིན་ནའང་གནས་ཚུལ་འདི་དེ་མུར་འཇོག་མི་རུང་བའི་བསམ་ཚུལ་འདོན་དགོས་པ་རེད།༽ ཅེས་བཤད་པ་བཞིན་བོད་མི་ཞིག་ཡིན་པའི་ངོས་ནས་བཤད་ན་འཇོག་མི་རུང་ཐག་ཆོད་རེད། ལྷག་པར་༸གོང་ས་མཆོག་གི་སྐུ་ཚབ་ཀྱི་མིང་ཁུར་ནས་སྐད་ཆ་འདི་འདྲ་བཤད་ཀྱི་ཡོད་ན་གནད་དོན་ཆུང་ཆུང་གཏན་ནས་མ་རེད། དེར་བརྟེན་ངས་བརྩད་གཅོད་བྱེད་དོན་དེ་ཡིན། བདེན་པ་ཡིན་ན་རྒྱ་རི་བོད་མི་མང་གི་མདུན་དུ་མགོ་གྱེན་དུ་འདེགས་མི་ཕོད་པ་ཞིག་བཟོ་དགོས་པ་རེད་བསམས་ནས་ཡོད་ལ། དེ་བཞིན་ཡིག་ཐོག་ཏུ་བྲིས་ཡོད། ཡིན་ནའང་མཐའ་མ་དགེ་འདུན་རབ་གསལ་ལགས་ཀྱིས་ཁུངས་སྐྱེལ་ཐབས་འདི་འདྲ་ཞིག་གིས་འཐུས་ཐབས་གནང་ཡོང་བ་བློ་ཡུལ་ལས་འདས་པ་རེད།
འཇིགས་བྲལ་བསྟན་འཛིན་ལགས་སུ། ཁྱེད་ཀྱིས་ཉིན་ཤས་རིང་ཁ་བརྡའི་ཐོག་འཁོད་པའི་རྩོམ་འདིའི་ཁུངས་ལུང་འཁྱེར་ཤོག་ཅེས་གང་སར་བཀྲམས་ནས་གསུངས་པ་རེད། གློ་བུར་དུ་ ༢༠༠༨ ལོའི་ཕྱི་ཟླ་ ༡༢ ནང་བྱུང་བའི་གནས་ཚུལ་དེ་དྲན་མ་བྱུང་། དེ་བས་ཉིན་ཤས་རིང་དེའི་སྐོར་ལ་བསམ་བློ་བཏང་བ་ཡིན་ལ། སྐད་ཆ་འདི་ཡང་བསྐྱར་གླེང་རིན་ཡོད་མེད་ལའང་བསམ་གཞིགས་བྱས་པ་ཡིན། གང་ལྟར་ལན་འདི་འདྲ་ཞིག་བྲིས་ན་འོས་ཆེ་བར་མཐོང་ནས་བྲིས་པ་ཡིན། གཟིགས་རོགས་གནང་།
སྐད་ཆ་ངོ་མ་དེ་གཤམ་གསལ་ལྟར་རེད། “༼༢༠༠༨ ལོའི་ཟླ་བ་ ༡༢ ཚེས་ ༡༢ ཙམ་ལ་༽ ཁ་སང་ཁེ་ཉིན་ཞིག་ལ་ཨ་ རིའི་རྒྱལ་ས་ཝ་ཤིན་ཊོན་དུ་བོད་དོན་རྒྱབ་སྐྱོར་བའི་ཚོགས་འདུ་ཞིག་འཚོགས་ཡོད་ སྐད་དང་། ཚོགས་ཐོག་དེར་དམིགས་བསལ་སྐུ་ཚབ་རྒྱ་རི་རིན་པོ་ཆེས་གསུང་བཤད་གནང་སྟེ། “༡༩༤༩ ཡར་སྔོན་དུ་ཨ་མདོ་ཡོངས་དང་ཁམས་ཀྱི་ཕྱེད་དེ་རྒྱ་ཁོངས་རེད་”ཅེས་བཤད་ནས་དབུ་མའི་ལམ་གྱི་སྲིད་བྱུས་འདིས་ངོ་མ་བཤད་ན་”ཁྲིམས་མཐུན་དུ་མེད་པའི་བོད་ཀྱི་ས་ཁུལ་དགོས་པའི་”དགོས་འདུན་བཏོན་ཡོད་པ་དང་། “དབུ་མའི་ལམ་”ལ་ཆག་ཡངས་གང་ཡང་གཏོང་ཐབས་མེད་པ་ལ་བརྟེན་ནས་བོད་རྒྱའི་འབྲེལ་མོལ་དང་ཞི་མོལ་ལ་ལམ་ལྷོང་མ་བྱུང་ལུགས་བཤད་སོང་ཟེར།”
ད་ནི་ སྐད་ཆ་འདི་གསུངས་དུས་དེ་ ༢༠༠༨ ལོའི་ཟླ་བ་བཅུ་གཉིས་པ་རེད། གསུངས་ས་དེ་ བོད་དོན་རྒྱབ་སྐྱོར་བའི་ཚོགས་འདུ་ཞིག་ཝ་ཤིན་ཊོན་དུ་འཚོགས་པའི་ཚོགས་ཐོག་རེད། སྐད་ཆའི་ཡོང་ཁུངས་ནི་ མིང་སྨྲ་འདོད་མེད་པའི་ཁུངས་ཡིད་བརྟན་འཕེར་བ་ཞིག་རེད། ད་དུང་དྭོགས་པ་ཡོད་ན། དམིགས་བསལ་སྐུ་ཚབ་དང་སྐུ་ཚབ་ཀྱི་ལས་ཁུངས་ལ་བཅར་འདྲི་ཞུ་རོགས།
དྲ་གྲོགས་དགེ་འདུན་རབ་གསལ་ལགས།
ངས་དེ་སྔོན་ཁྱེད་ཀྱི་རྩོམ་ཡིག་འགའ་ཤས་བཀླགས་མྱོང་ཡོད་མོད།་་གོང་གི་རྩོམ་ཡིག་་་ཨང་རྩིས་་་ཞེས་འབོད་པ་དེས་ང་རང་ལ་ཚོར་ཤུགས་ཆེ་ཤོས་སྦྱིན་སོང།་་དཔེར་ན།་་ཁྱེད་ཀྱིས་གཟིགས་ནས་ཚོར་སྣང་བྱུང་བ་ལྟར།་་་གུས་པས་ཀྱང་ཟམ་གདོང་རིན་པོ་ཆེའི་ཕྱག་ལ་ཕྱག་འཁར་བཞེས་པ་ཐེངས་གཅིག་གཉིས་མཐོང་བྱུང་བར་སེམས་ལ་སྐྱོ་བ་ཆེན་པོ་སྐྱེས་བྱུང།་་་འོན་ཀྱང་སློབ་དཔོན་ཆེན་པོ་ཁོང་གིས་༸གོང་ས་ཆེན་པོ་བཀའ་དགོངས་དང།་བོད་མི་མང་གི་བདེ་སྔུག་ལ་གཟིགས་རྟོགས་གང་ལེགས་གནང་བ་དེས་སེམས་གསོ་བའི་གཞི་རྟེན་དུ་སྒོམ་ནས་བསྡད་ཡོད།
མདོར་ན།་་་རྩོམ་པ་པོ་དགེ་འདུན་རབ་གསལ་ལགས།་་་མུ་མཐུད་རྩོམ་ཡིག་དེ་འདྲ་བ་སྤེལ་རོགས་གནང་ཞུ་རྒྱུ་ཡིན།་་་ཐུགས་རྗེ་ཆེ།།
བདུན་ཕྲག་འདིའི་ནང་དོ་སྣང་བྱུང་བ་ལྟར་ན། ཕ་ཡུལ་དྲ་རྒྱའི་སྟེང་ན་རྒྱ་ནག་གི་ཅ་དངོས་རིགས་ཁྱབ་བསྒྲགས་འདྲ་བྱས་ནས་བསྡད་འདུག ག་རེ་ཡིན་མིན་མ་ཤེས།
ཟླ་གཅིག་གི་སྔོན་ལ་རྒྱ་ནག་ལྷོ་ཕྱོགས་ནས་ཡིན་པའི་བུད་མེད་ཅིག་གིས་རྒྱ་གར་ནས་ཅ་ལག་འདིའི་རིགས་ཁྱབ་བསྒྲགས་བྱེད་ན་བརྒྱུད་ལམ་ཡག་ཤོས་གང་རེད་ཟེར་ནས་སྐད་ཆ་དྲིས་སོང་། སྐབས་དེར་ངས་ The Times of India ཡིན་ངེས། ཚགས་པར་དེ་ཚོང་ལས་ཁྱབ་བསྒྲགས་ཤུགས་ཆེ་ཤོས་ཀྱི་ཚགས་པར་ཡིན། འཛམ་གླིང་སྟེང་དཔར་གྲངས་མང་ཤོས་ཀྱི་ཚགས་པར་ཨང་དང་པོ་ཡང་གོང་གི་ཚགས་པར་དེ་ཡིན་ཅེས་བཤད་པ་ཡིན།
ཕྱི་ཟླ་གཉིས་པའི་ཚེས་ ༢༧ དང་༢༨ ཉིན་གཉིས་རིང་ལ་བཙན་བྱོལ་བོད་གཞུང་གི་གཞུང་ཞབས་ཁེ་གཙང་གིས་མ་འོངས་མི་ལོ་ ༥༠ སྐོར་ལ་ལས་དོན་གང་འདྲ་ཞིག་བྱེད་དགོས་མིན་གྱི་སྐོར་ལ་བགྲོ་གླེང་ཞིག་གནང་གཏན་འཁེལ་འདུག
ངས་བསམས་ན་དེ་ནི་གནད་དོན་ཧ་ཅང་གིགལ་ཆེ་ཞིག་ཡིན་པའི་ངོས་འཛིན་བྱེད་ཀྱིན་ཡོད། གང་ཡིན་ཟེར་ན་ང་ཚོས་ངེས་པར་དུ་བཙན་བྱོལ་བོད་གཞུང་གི་མ་འོངས་ལས་དོན་ཐད་ལ་འཆར་གཞི་ལྡན་པ་ཞིག་བཟོ་དགོས་ཀྱི་འདུག་ལ་ད་དུང་འཆར་གཞི་དེ་ཡིག་ཐོག་ཏུ་ལུས་པ་ཞིག་མ་སོང་བར་བྱ་དངོས་མངོན་འགྱུར་ཡོང་བ་ཞིག་བྱེད་དགོས་ཀྱི་འདུག
དཔེར་ན་རྒྱ་ནག་ལྟ་བུར་མཚོན་ན་ ༡༩༨༠ ལོར་ཏིང་ཞའོ་ཕིན་གྱིས་རིགས་པའི་གཞུང་ལུགས་ཟེར་བའི་ཐད་ལ་དེང་རབས་ཅན་བཞི་ཞེས་ཞིང་ལས་དང་། བཟོ་ལས། རྒྱལ་བསྲུང་། ཚན་རྩལ་བཅས་ལྟེ་བ་གཅིག་དང་གཞི་རྩའི་གནས་གཉིས་ལ་གཏན་འབེབས་བྱས་༡༩༨༠ ནས་ ༡༩༩༠ བར་རྒཡལ་ཁབ་ཀྱི་འཆར་གཞི་བཟོས་པ་ཡོད་པ་དང་འཆར་གཞི་དེ་ལག་བསྟར་དོན་འཁྱོལ་ནང་༡༩༩༠ ནས་ ༢༠༠༠ བར་ཁྱོན་མི་ལོ་ ༢༠ ལས་འཆར་བཀོད་ནས་ད་ལྟའི་རྒཡལ་ཁབ་འདི་འཕེལ་རྒྱས་ཚད་ལ་སའདས་པ་ཞིག་འགྲོ་བཞིན་ཡོད།
དེར་བརྟེན་ང་ཚོས་ཀྱང་ད་ལྟ་མ་འོངས་བོད་དོན་གྱི་ལས་འཆར་ཐད་འཆར་གཞི་ངེས་ཅན་ཞིག་བཟོ་དགོས་ཀྱི་འདུག དེ་ཡང་ཨང་དང་པོ་ཆབ་སྲིད། གཉིས་པ་དཔལ་འབྱོར། གསུམ་པ་བསླབ་གསོ། བཞི་པ་རིག་གཞུང་བཅས་ལ་ངེས་པར་དུ་འཆར་གཞི་དང་ལག་ལེན་གཉིས་བཟུང་འབྲེལ་བྱེད་རྒྱུར་འབད་ཐབས་བྱེད་དགོས་འདུག
དགེ་འདུག་རབ་གསལ་ལགས་ཀྱི་ཨང་རྩིས་ལ་ཁ་སྣོན་མེད་དེ་་་་་ནོར་སོ་ཅུང་ཙམ་འདུག ༢༠༠༢ ནས་ ༢༠༡༠ བར་བརྩིས་ན་ལོ་དགུ་དག་དག་འགོར་ཡོད་པ་ལས་ལོ་བརྒྱད་མ་རེད། ༢༠༠༢ གི་ལོ་འདི་དང་ ༢༠༡༠ འདི་གཉིས་ནང་ལ་བརྩི་དགོས། རྒྱུ་མཚན་ནི་ལོ་འདི་གཉིས་ལ་བོད་རྒྱའི་བར་འབྲེལ་མོལ་བྱས་ཡོད། ད་དུང་རྩིས་ནོར་རེ་ཟུང་འདུག ཁྱོད་ཚོས་ལྟོས་དང་མ་ཤེས་ན་ངས་གསུང་འབྱོན་ཆོག
༼རང་བཙན་མ་ཡིན་པའི་སྐད་ཆ་གཞན་གང་ཡིན་ཡང་གླེང་ཆོག་༽ཅེས་པའི་ཚིག་དུམ་དེར་ཤི་འཐམ་རོ་འཐམ་བྱས་ནས་མི་ལོ་ཉི་ཤུས་ག་ལ་ཚད། དུས་ནོར་དེ་ནས་ད་བར་དུ་མི་ལོ་ཧྲིལ་བོ་སུམ་ཅུ་འདས་ཡོད་པ་རེད། རྒྱ་རི་རིན་པོ་ཆེ་ནི་སྤྱིར་བཏང་ནུས་འཇོན་ཆེ་ཙམ་ཡོད་མཁན་ཞིག་ཏུ་སྣང་ན་ཡང་། རྒྱ་དཔོན་ཚོའི་སར་འགྲོ་དགོས་པའི་བོད་ཀྱི་སྐུ་ཚབ་ཀྱི་ལས་དོན་ནི་ཁོང་གིས་གཏན་ནས་སྒྲུབ་མི་ནུས་པ་མངོན་གསལ་དོད་པོ་རེད། བོད་ཀྱི་སྐུ་ཚབ་ཚོས་རྒྱ་དཔོན་ཚོར་ཅི་བཤད་རྣམས་གསལ་རྟོགས་མི་འབྱུང་ཡང་། རྒྱ་ཕྱོགས་ཀྱི་བསྒྲགས་གཏམ་དང་ཚོགས་གཏམ་འདྲ་བོ་དེ་ཚོ་མཐོང་དུས་རང་བཞིན་གྱིས་དོགས་སློང་ཞིག་ཡང་ཡང་འབྱུང་གི་འདུག
མདོ་འདུམ་ཚང་རིག་འབྱུང་དོན་གྲུབ་བཀྲ་ཤིས་ལགས།
ཁྱེད་ཀྱིས་དུས་བབ་སྒང་ན་དེའི་༼གཡང་སྐྱབས་རྒྱལ་༽སྐོར་ལ་ཁྱེད་ཀྱིས་མཆན་བུ་ཐང་མ་བརྡལ་བརྡལ་བྱས་འདུག རྒྱུ་མཚན་ཅི་ཞིག་གི་སླད་དུ་ཡིན་མིན་ངེད་ཀྱིས་མི་ཤེས། ཅེས་བཤད་འདུག དེའི་རྒྱུ་མཚན་ནི་གསལ་པོ་བྲིས་ཡོད། དེ་ཡང་གཡང་སྐྱབས་རྒྱལ་གྱིས་བཤད་པར་ཁུངས་ལུང་ཡོད་ན་དངོས་འབྲེལ་བཟོད་སྒོམ་བྱེད་ཐབས་བྲལ་བ་ཞིག་རེད། ང་ཚོས་ངེས་པར་ཐེར་འདོན་བྱེད་དགོས་པ་རེད། ང་ཚོ་དྲ་གྲོགས་ཚོ་ཡིན་ནའང་གནས་ཚུལ་འདི་དེ་མུར་འཇོག་མི་རུང་བའི་བསམ་ཚུལ་འདོན་དགོས་པ་རེད། ཅེས་དང་། མ་ཟད་མུ་མཐུད་འདི་ལྟར་བྲིས་ཡོད། དེ་མིན་སྐད་ཆ་འདི་འདྲ་བཤད་སོང་ཟེར་བ་དང་། ལབ་ཀྱི་འདུག་ཟེར་བ། ཡིན་ས་རེད་ཟེར་བ་སོགས་ནི་ཕུ་ནུ་ནང་དཀྲུགས་ཀྱི་བཀའ་མོལ་རེད། ཁུངས་ལུང་ཡོད་རྒྱུ་རེད་བསམ་གྱི་འདུག ཁུངས་ལུང་འགོད་རྒྱུ་མེད་ན་བཀའ་མོལ་འདི་རྒྱ་མིའི་སོ་པའི་བྱེད་ལས་ཤིག་ལ་ངོས་འཛིན་མི་བྱེད་ཐབས་མེད་རེད། ང་ཚོས་སྐད་ཆའི་ཁུངས་ལུང་ལ་ཆ་འཇོག་བྱེད་ཀྱི་རེད་མ་གཏོགས་ཟེར་སྐད་དང་། ཐོས་སྐད་སོགས་ལ་ཆ་འཇོག་བྱེད་ཐབས་ཡོད་མ་རེད། ཅེས་པ་འདི་གཉིས་ནི་རྒྱུ་མཚན་ཡིན།
དེ་བཞིན་མདོ་འདུམ་ཚང་རིག་འབྱུང་དོན་འགྲུབ་བཀྲ་ཤིས་ལགས། ཁྱེད་ཀྱིས་ཟུར་བཀོད་བྱས་པའི་ཁ་བརྡའི་དྲ་བྱང་བརྒྱུད་གཡང་སྐྱབས་རྒྱལ་ཟེར་བས་རྒྱ་རིའི་སྐོར་ལ་བྲིས་པ་དེ་བཀླགས་པ་ཡིན། ཁོ་རང་ལ་ཁུངས་ལུང་མེད་ཚུལ་བྲིས་འདུག དཱ་ཁུངས་ལུང་མེད་པའི་ཁྲོམ་གཏམ་འདི་སྤེལ་མཁན་དེ་བོད་མི་ཚད་ལྡན་ཞིག་ལ་ངོས་འཛིན་དགོས་པ་རེད་དམ། ཡག་ན་འདྲ། སྡུག་ན་འདྲ། འདོད་ན་འདྲ། མ་འདོད་ན་འདྲ། རྒྱ་རི་༸གོང་ས་མཆོག་གི་དམིགས་བསལ་སྐུ་ཚབ་རེད། ཁོང་གི་སྐུ་ཚབ་ལ་ཁུངས་ལུང་མེད་པའི་དཀྲུགས་གཏམ་སྤེལ་དགོས་དོན་ག་རེ་ཡིན་རྒྱུ་རེད།
དེ་མིན་ཁྱེད་ཀྱིས་གནས་ཚུལ་གཏོང་དགོས་ས་འདྲ་ཡོད་ན་ཞེས་གསུངས་འདུག དྲ་ངོས་འདིར་ཁ་ནས་གང་ཐོན་ཐོན་བཤད་མཁན་དང་། རྒྱག་གཏམ་སྤེལ་མཁན་དེ་ཚོའི་མིང་གབ་ནས་བཤད་ཀྱི་འདུག ངས་ཀྱང་དོན་དངོས་སུ་མི་དེ་དག་གི་བྱེད་ལས་གང་ཡིན་ནམ་བསམ་གྱི་ཡོད་ལ། སོ་སོས་ཤེས་རྟོགས་བྱུང་བ་ཡིན་ན་གབ་མིང་བེད་སྤྱོད་གཏོང་མཁན་དེ་སུ་ཡིན་དྲ་ངོས་སུ་གསལ་པོ་བཟོ་འདོད་བྱེད་ཀྱི་ཡོད།
མདོ་འདུམ་ཚང་། ཁྱེད་ལ་ལན་སྤྲོད་རྒྱུ་མེད་པའི་དཀའ་ངལ་བྱུང་ཡོད་ན་ངས་མི་དེད། ་སེམས་བདེ་མོ་བྱོས།
འཇིགས་བྲལ་བསྟན་འཛིན་ཞུ་མཁན་དེར་སྐད་ཆ་ཚིག་འགའ་བསྐྱར་དུ་ཞུ་གི་ཡིན།
འདི་ཁྱེད་ལ་བཏབས་པའི་མཆན་བུ་མཐའ་མ་དེ་ཡིན། སྐུ་ཉིད་ནས་གོ་བ་མ་ལོན་ན་བསྐྱར་དུ་འགྲེལ་བཤད་བྱེད་རྒྱུའི་དུས་ཚོད་ངེད་ལ་མེད།
དང་པོ།
སྐུ་ཉིད་ནས། རིག་འབྱུང་དོན་གྲུབ་བཀྲ་ཤིས་སུ་ཡིན་མིན་དང་། མདོ་འདུམ་ཚང་སུ་ཡིན་མིན། ད་དུང་། གཡང་སྐྱབས་རྒྱལ་སུ་ཡིན་མིན་སོགས་བརྩད་གཅོད་གནང་བཞིན་པ་དེར་རྗེས་སུ་ཡི་རངས་ཞུ་བཞིན་ཡོད། འོན་ཀྱང་། དེ་ཁྱེད་ལ་བབ་པའི་ལས་ཀ་ཞིག་མ་རེད་ཀྱང་ཞོར་ལ་ཞུ་གི་ཡིན། གལ་སྲིད། རྩོམ་འབྲི་མཁན་སུ་ཡིན་མིན་དེ་ཁྱེད་ཀྱི་གསར་འགྱུར་གྱི་ཆེད་དུ་ཡིན་ན། མུ་མཐུད་དུ་བརྩད་གཅོད་གནང་རོགས་ཞུ་གི་ཡིན། གནས་ཚུལ་གཏོང་དགོས་ས་འདྲ་ཡོད་ན་གཏོང་རོགས་ཞུ་གི་ཡིན། དེ་གཅིག་ཡིན།
གཉིས་པ།
གཡང་སྐྱབས་རྒྱལ་གྱིས་བྲིས་བའི་རྩོམ་དེ་ངེད་ཀྱིས་བྐླགས་པ་ཡིན། མཆན་བུ་དང་བཅས་བ་བྐླགས་པ་ཡིན། ཁྱེད་ཀྱིས་བཀོད་པའི་གནས་ཚུལ་དེར་ཁུངས་སྐྱེལ་ཡོད་མེད་ཀྱི་སྐོར་ནས་། སྐབས་དེའི་མཆན་བུའི་ནང་ན་ཁོང་གིས་ཁ་གསལ་གསུངས་འདུག ཁྱེད་རང་བསྐྱར་དུ་སོང་ནས་ྐློགས། འབྲེལ་ཐག་འདི་རུ་འདུག (http://www.khabdha.org/?p=1091)
དུས་བབ་སྒང་ན་དེའི་སྐོར་ལ་ཁྱེད་ཀྱིས་མཆན་བུ་ཐང་མ་བརྡལ་བརྡལ་བྱས་འདུག རྒྱུ་མཚན་ཅི་ཞིག་གི་སླད་དུ་ཡིན་མིན་ངེད་ཀྱིས་མི་ཤེས། གང་ལྟར། བྱེད་སྟངས་དེའི་རིགས། གསར་འགོད་པའི་མིང་ཡོད་མཁན་ཞིག་གི་བྱེད་སྟངས་མ་རེད་ཀྱང་ཞོར་ལ་ཞུ་འདོད་བྱུང་། ད་དུང་། ཁྱེད་ནས་ཁུངས་སྐྱེལ་མེད་ན་རྒྱ་མིའི་སོ་བ་ཡིན་པའི་སྐོར་ཞིག་ཀྱང་བཤད་འདུག་
སྐད་ཆ་དེ་ཚོའི་རིགས་ལ་ཁྱེད་ལ་ཁུངས་སྐྱེལ་ཡོད་དམ། འོན་ཀྱང་། ཁྱེད་ཀྱིས་མཆན་བུ་ག་རེ་བཏབས་ན་ཡང་ངེད་རང་སྒེར་ངོས་ནས་དེ་ལ་དགག་བྱ་མེད། བསམ་ཚུལ་འདི་ཁྱེད་ལ་ཞོར་ནས་བཤད་པ་ཡིན་མ་གཏོགས་ངེད་རང་རྩོམ་དེ་འབྲི་མཁན་གཡང་སྐྱབས་རྒྱལ་ལ་དགའ་བ་དང་ཁྱེད་ལ་མ་དགའ་བ་དེ་འདྲ་མིན། དེ་ཡང་སེམས་ལ་འཛིན་རོགས།
གསུམ།
དེ་ནས་། ཁྱེད་ཀྱིས་འདི་འདྲ་གསུངས་འདུག ཁྱེད་གཉིས་ཀྱིས་ཨང་རྩིས་ལ་བརྟེན་ནས་ཉིན་གཅིག་སུ་དགོངས་བ་ཞུས་ཟེར་གྱི་ཡིན་ན་ལབ་འདུག འདི་རུ། མི་སྒེར་ལ་དགའ་མི་དགའི་སྐད་ཆ་ཡོད་མ་རེད་འདོད། མི་སྒེར་ལ་དགའ་མ་དགའ་གྱི་སྐད་ཆ་བཤད་ཀྱི་ཡོད་མ་རེད། གལ་སྲིད་བཤད་པ་ཡིན་ན་ཡང་། བཤད་མཁན་དེ་དང་འབྲི་མཁན་དེ་བྱབ་ཆུང་རེད། འདི་རུ་བོད་མིའི་སྤྱི་ཡོངས་གནས་སྟངས་མང་པོ་ཞིག་ལ་བལྟས།་ དེ་མིག་གིས་མཐོང་། ཞིབ་འཇུག་འདྲ་བྱས། དེ་ནས་བསམ་ཚུལ་གླེང་གི་ཡོད་རེད་དྲན། ངེད་རང་སྒེར་ངོས་ནས་་དགེ་འདུན་རབ་གསལ་གྱི་རྩོམ་དེར་མཆན་བུ་བཏབས་པ་དེ་ཚོའི་ཁོངས་ན་མ་འགྲིག་པ་འདྲ་ཡོད་ན། ཁུངས་ལུང་མེད་པ་བཤད་ཡོད་ན། ཁྱེད་ཀྱིས་ནོར་བཅོས་གནང་རོགས། ངེད་ཀྱི་མཆན་བུ་་དང་རྩོམ་གང་ཡིན་རུང་། ངེད་རང་ནས་འགན་ཁུར་གྱི་ཡོད། འདི་ཡང་ཁྱེད་རང་ལྟ་བུའི་ྐློག་མཁན་ཚོས་ངེས་པར་དུ་མཁྱེན་དགོས་བའི་གནད་དོན་ཞིག་རེད་འདོད།
བཞི་པ།
ངེད་རང་སྒེར་ངོས་ནས་ཁྱེད་ལ་ལམ་སྟོན་ཞུ་རྒྱུ་ཅང་ལྷག་མེད། བོད་རྒྱའི་འབྲེལ་མོལ་ཐད་ཀྱི་འགྱུར་བ་གཏོང་དགོས་བའི་བསམ་ཚུལ་དེ་དང་དེའི་འགྲེལ་བཤད་ཐུང་ངུ་ཞིག་ངེད་ཀྱིས་མཆན་བུ་སྔ་མ་འགར་བཏབས་ཡོད། དེ་ནས་ཁྱེད་ཀྱི་བློ་སྒོ་ཅུང་ཙམ་ཕྱེས་ཡོད་པའི་རེ་བ་ཡོད། འགྱུར་བ་གཏོང་སའི་ལམ་ཁ་ཡོད་མེད་ཀྱི་ཐད་ལ་བསམ་ཚུལ་ཞིག་འབྲི་བཞིན་ཡོད།
ཁྱེད་ཀྱིས་གོ་བ་ལོན་མི་ལོན་མི་ཤེས། ངེད་ཀྱིས་ཁ་སང་ནས་གསལ་བོར་བཤད་ཡོད། ད་ཕན་ངེད་ཀྱིས་བྲིས་བ་དང་བརྩམས་པ་དེ་ཚོ། མཚམས་རེར་ྐློག་མཁན་ཚོས་གོ་བ་ལོན་གྱི་འདུག མཚམས་རེར་ྐློག་མཁན་ཚོས་གོ་བ་ལོན་གྱི་མི་འདུག འདི་ཁྱེད་ལ་མཐོང་ཆུང་གི་སྐད་ཆ་མིན། ངེད་རང་སྒེར་གྱི་བསམ་ཚུལ་ཡིན། ག་ལེར་ག་ལེར་ཁྱེད་རང་ལྟ་བུའི་ྐློག་པ་པོ་ཚོས་གོ་བ་ལོན་པའི་རེ་བ་ཡོད། གང་ལྟར། ད་ཕན་ངེད་ཀྱིས་བརྩམས་པ་དང་མཆན་བུ་བཏབས་པ་དེ་ཚོའི་ཐོག་ལ། བསམ་ཚུལ་མི་མཐུན་པ་ཡོད་ན། དགག་ལན་ཆར་བ་འབབ་འབབ་གནང་རོགས། དེ་ལ་དགའ་བསུ་ཞུ་གི་ཡིན། གཞན།
ངེད་ཀྱིས་བྲིས་བ་དེ་ཚོར་ཁྱེད་ནས་དོ་སྣང་སྤྲོད་བཞིན་པ་དེར་ཡང་དགའ་ནས་ཡོད། དེ་ལ་ཐུགས་རྗེ་ཆེ་ཞུ་གི་ཡིན། ་ གོང་དུ་ངེད་ཀྱིསབཤད་པའི་ཁོངས་སུ་། ཚིག་རྩུབ་འདྲ་ཤོར་ཡོད་ན་དེ་ལ་སྙིང་ནས་དགོངས་དག་ཞུ་གི་ཡིན།
རིག་འབྱུང་དོན་གྲུབ་བཀྲ་ཤིས་ཀྱིས་གུས་ཞབས་དང་བཅས།
ཉིན་འགའི་སྔོན་དུ་གཤམ་གྱི་སྐད་ཆ་འདི་ཤོད་མཁན་གྱི་གཡང་སྐྱབས་རྒྱལ་ཟེར་བར་ངས་ཁུངས་སྐྱེལ་རོགས་ལབ་པ་ཡིན། ཁོ་ད་དུང་སླེབས་མ་སོང་། ཡིན་ནའང་ལོ་མང་སྔོན་ནས་སྐུ་ཚབ་ལ་གཏམ་སྤེལ་མཁན་དང་། ཁ་སང་གཡང་སྐྱབས་རྒྱལ་འཚོལ་སྐབས་རྒྱ་རིའི་སྐོར་འདི་ན་འདུག་གསུང་མཁན་གྱི་དགེ་འདུན་རབ་གསལ་ལགས་ཀྱིས་ཨང་རྩིས་གཅིག་བཀྲམས་སོང་ལ། ༼སྐུ་ཚབ་རྣམ་པ། ཁྱེད་ཚོའི་སྤྲོ་འཆམ་དེ་གྲུབ་ཚར་སོང་ངམ་༽ཟེར་བའི་རྒྱག་གཏམ་རྩོམ་མཁན་མདོ་འདུམ་ཚང་རིག་འབྱུང་དོན་འགྲུབ་བཀྲ་ཤིས་ཀྱིས་ཨང་རྩིས་ལ་ཁ་སྣོན་བྱས་སོང་། ཡིན་ནའང་ད་དུང་ང་ལ་མཚོན་ན་མདོ་འདུམ་ཚང་རིག་འབྱུང་དོན་འགྲུབ་བཀྲ་ཤིས་ཀྱི་ལན་འགའ་དགོས་ཀྱང་གྲག་འགུལ་མི་འདུག གྲོགས་པོ་རྣམ་གཉིས། གཡང་སྐྱབས་རྒྱལ་ཁྱེད་གཉིས་ཀྱི་འཐབ་གྲོགས་ཡིན་ངེས་པས་གཤམ་གྱི་སྐད་ཆ་དེ་ཁོ་ལ་ཤོད་རོགས། ཁྱེད་གཉིས་ཀྱི་ཨང་རྩིས་ལ་བརྟེན་ནས་ཉིན་གཅིག་སུ་དགོངས་པ་ཞུས་ཟེར་རྒྱུ་ཡིན་ན། ཤ་ཚ།
དྲ་གྲོགས་གནས་ཚང་ལགས་ཀྱིས་འདྲེན་བཀོད་བྱས་པ་དང་། གཡང་སྐྱབས་རྒྱལ་གྱིས་ཁ་བརྡ་དྲ་ཚིགས་སུ་གཤམ་གྱི་བཀའ་མོལ་དེ་བཤད་པ་ལས་འཕྲོས་པའི་བསམ་ཚུལ་འགའ།
དམིགས་བསལ་སྐུ་ཚབ་རྒྱ་རི་རིན་པོ་ཆེས་གསུང་བཤད་གནང་སྟེ། “༡༩༤༩ ཡར་སྔོན་དུ་ཨ་མདོ་ཡོངས་དང་ཁམས་ཀྱི་ཕྱེད་དེ་རྒྱ་ཁོངས་རེད་”ཅེས་བཤད་ནས་དབུ་མའི་ལམ་གྱི་སྲིད་བྱུས་འདིས་ངོ་མ་བཤད་ན་”ཁྲིམས་མཐུན་དུ་མེད་པའི་བོད་ཀྱི་ས་ཁུལ་དགོས་པའི་”དགོས་འདུན་བཏོན་ཡོད་པ་དང་། “དབུ་མའི་ལམ་”ལ་ཆག་ཡངས་གང་ཡང་གཏོང་ཐབས་མེད་པ་ལ་བརྟེན་ནས་བོད་རྒྱའི་འབྲེལ་མོལ་དང་ཞི་མོལ་ལ་ལམ་ལྷོང་མ་བྱུང་ལུགས་བཤད་སོང་ཟེར། གུང་ཁྲན་གྱིས་འབྲེལ་མོལ་ལམ་ལྷོང་མ་བྱུང་བའི་ཁག་འགེལ་དེ་བོད་གཞུང་ལ་བཀལ་བའི་ཐོག་ ང་ཚོའི་སྐུ་ཚབ་ཀྱིས་ཀྱང་ལམ་ལྷོང་མ་བྱུང་བའི་ཁག་འགེལ་དེ་ང་ཚོར་བཀལ་བ་འདི་འདྲ་ནི་ཡིན་མི་སྲིད་པ་ཞིག་རེད་བསམས་ནས་སྙིང་རླུང་སྟོད་ལ་འཚངས། ཅེས་དྲངས་འདུག
གཡང་སྐྱབས་རྒྱལ་གྱིས་བཤད་པར་ཁུངས་ལུང་ཡོད་ན་དངོས་འབྲེལ་བཟོད་སྒོམ་བྱེད་ཐབས་བྲལ་བ་ཞིག་རེད། ང་ཚོས་ངེས་པར་ཐེར་འདོན་བྱེད་དགོས་པ་རེད། ང་ཚོ་དྲ་གྲོགས་ཚོ་ཡིན་ནའང་གནས་ཚུལ་འདི་དེ་མུར་འཇོག་མི་རུང་བའི་བསམ་ཚུལ་འདོན་དགོས་པ་རེད། ཡིན་ནའང་དང་པོ་གཡང་སྐྱབས་རྒྱལ་ལགས་ཀྱིས་གནས་ཚུལ་འདི་ཁུངས་སྐྱེལ་བྱེད་དགོས་པ་རེད། དེ་མིན་སྐད་ཆ་འདི་འདྲ་བཤད་སོང་ཟེར་བ་དང་། ལབ་ཀྱི་འདུག་ཟེར་བ། ཡིན་ས་རེད་ཟེར་བ་སོགས་ནི་ཕུ་ནུ་ནང་དཀྲུགས་ཀྱི་བཀའ་མོལ་རེད། ཁུངས་ལུང་ཡོད་རྒྱུ་རེད་བསམ་གྱི་འདུག ཁུངས་ལུང་འགོད་རྒྱུ་མེད་ན་བཀའ་མོལ་འདི་རྒྱ་མིའི་སོ་པའི་བྱེད་ལས་ཤིག་ལ་ངོས་འཛིན་མི་བྱེད་ཐབས་མེད་རེད། ང་ཚོས་སྐད་ཆའི་ཁུངས་ལུང་ལ་ཆ་འཇོག་བྱེད་ཀྱི་རེད་མ་གཏོགས་ཟེར་སྐད་དང་། ཐོས་སྐད་སོགས་ལ་ཆ་འཇོག་བྱེད་ཐབས་ཡོད་མ་རེད།
གཡང་སྐྱབས་རྒྱལ་ལགས། བཀའ་མོལ་འདི་ལ་ཁུངས་སྐྱེལ་བྱེད་རོགས།
ལོ་མང་པོའི་སྔོན་ནས་དགེ་འདུན་རབ་གསལ་ལགས་ཀྱིས་སྐུ་ཚབ་ཚོའི་སྐོར་ལ་གཏམ་སྤེལ་བ་རེད། ད་དུང་ཡང་སྤེལ་གྱི་འདུག ཁྱོད་ཀྱི་བརྩོན་འགྲུས་ལ་བསྔགས་བརྗོད་ཡོད།
དགེ་འདུན་རབ་གསལ། གཡང་སྐྱབས་རྒྱལ་གྱིས་དོན་ཚན་གཅིག་སྟེ། སྐུ་ཚབ་ལོ་མང་ཕྱིན་འདུག་ཟེར་བ་དེ་ཁྱོད་རང་གིས་བསྐྱར་བཤད་གནང་བཤད་འདུག་པཱ།
ཧཧཧཧ། ད་ཡིན་ན་ལྟད་མོ་འདུག
བོས་ན་མི་ཡོང་སྒུག་ན་ཡོང་།
དཱ་འདི་ན་གཡང་སྐྱབས་རྒྱལ་དང་། མདོ་འདུམ་ཚང་གཉིས་ཀྱི་ཡང་སྲིད་འཁྲུངས་འདུག ཡིན་ནའང་སྐད་ཆ་ཤོད་ཕྱོགས་ལ་འགྱུར་བ་ཐེབས་འདུག
མདོ་འདུམ་ཚང་རིག་འབྱུང་དོན་འགྲུབ་བཀྲ་ཤིས། ལན་མེད་པར་ཉིན་འགའ་ཕྱིན་སོང་བ།
ད་ཡང་བསམ་བློ་གཏོང་བཞིན་ཡོད། ཨང་རྩིས་འདིའི་སྐོར་ལ་བསམ་བློ་གཏོང་བཞིན་ཡོད། “བོད་མི་རིགས་”ཀྱི་འཐབ་རྩོད་འདི་ལ་ངར་ཤུགས་ཀྱིས་ཕོངས་མི་འདུག རྒྱལ་ཞེན་གྱིས་ཕོངས་མི་འདུག འོན་ཀྱང་། ངར་ཤུགས་དང་རྒྱལ་ཞེན་དེ་དག་བེད་སྤྱོད་གཏོང་མ་ཐུབ་ནས་ཕོངས་འདུག དེ་དག་བེད་སྤྱོད་གཏོང་སྟངས་མ་ཤེས་ནས་ཕོངས་འདུག མི་ཞིག་ལ་དཔེ་བྱས་ན། གཟུགས་པོ་བདེ་ཐང་རེད། ཡིན་ན་ཡང་། གཟུགས་པོ་ལ་མྱུར་རྩལ་ཡོད་མ་རེད། ལྡེམས་ཆ་ཡོད་མ་རེད།
ད་ འགྱུར་བ་གཏོང་དགོས་པ་རེད། ཏན་ཏན་འགྱུར་བ་གཏོང་དགོས་པ་རེད། སྐུ་ཚབ་ཀྱང་བརྗེས་དགོས་པ་རེད། གཞུང་ཡང་བརྗེས་དགོས་པ་རེད། གལ་ཆེ་ཤོས་དེ་ཆབ་སྲིད་ཀྱང་བརྗེས་དགོས་པ་རེད། མ་བརྗེས་ན། འཐོམས་འཐོམས་ཀྱི་བསམ་བློ་འདིས་ང་ཚོའི་འཐབ་རྩོད་འཕྲོ་བརླག་ལ་གཏོང་གི་རེད། ཡིན་ལ་མིན་ལ་ཅན་གྱི་སྲིད་བྱུས་འདིས་ང་ཚོའི་འཐབ་རྩོད་འཕྲོ་བརླག་ལ་གཏོང་གི་རེད།
ལོ་རྗེས་མའི་ནང་། ད་ལྟའི་རྒྱ་ནག་གི་སྲིད་བྱུས་ལ་འགྱུར་བ་རྩ་ནས་མེད་པའི་ཐོག་ནས་ “༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་”ཐུབ་གི་ཡོད་ན་ཡང་། རྒྱལ་ཁ་ཞིག་རེད། བོད་མི་ས་ཡ་དྲུག་གིས་༧རྒྱལ་བ་སྐུ་གསོན་པོ་དེ་མཇལ་དུས་ཤི་ན་ཡང་རྣམ་ཤེས་བདེ་ནས་འགྲོ་གི་རེད། དེ་ལྟར་མེད་ཚེ། ང་ཚོའི་མི་ཐོག་གི་མི་འཇོན་པ་འདི་ལ་བརྟེན་ནས་མ་འོངས་པའི་མི་རབས་ཚོའི་མདུན་ལམ་གཅོད་མི་རུང་བ་རེད། མི་འོས་པ་རེད། ང་ཚོས་ད་བར་དུ་ “བོད་ཀྱི་འཐབ་རྩོད་”འདིའི་གནམ་འཕང་དགུང་ལ་བསྟད་པ་རེད། མུ་མཐུད་ནས་མ་འོངས་པའི་མི་ཐོག་ལ་འཐབ་རྩོད་འདིའི་རྒྱུན་འཇོག་དགོས་པ་རེད། “རྒྱ་ནག་ལ་སྐད་ཆ་བཤད་པ་ཡིན། བྱུང་མ་སོང་། ད་མཚམས་འཇོག་གི་ཡིན། མ་འོངས་པའི་བྱེད་ཕྱོགས་འདི་ཡིན།”ཞེས་ཁ་བསངས་དགོས་པ་རེད། ཨང་རྩིས། ཨང་རྩིས་འདི་འདྲ་རེད།
སྐུ་ཚབ་ཚོས་ཕར་རྒྱ་གོས་གོན་ནས་རྒྱ་ངོ་བྱས། ཚུར་བོད་གོས་གོན་ནས་བོད་ངོ་བྱས་ཡོང་གི་འདུག རྒྱ་མིའི་མདུན་ལ་བོད་གོས་ཀྱང་གོན་མི་ཕོད་པར་ལྟོས་ན་སྐུ་ཚབ་ཚོས་ཆེན་པོ་ཞིག་གླེང་ཕོད་རྒྱུ་ཁག་པོ་མིན་འགྲོ།
ལྷ་སྲས་རྒྱ་ལོ་འདོད་བློ་མཚིམ་ཏེ་རྒྱ་ནག་དམར་པོའི་མདུན་ཏུ་སོང་།།
སྡ་སར་མཇེ་ཙོང་ཨ་མདོ་ཕེལ་ཆེར་ནུབ་ཕྱོགས་རྒན་མོའི་ཏུ་ལ་ཐམ།།
མཆིང་ཡིག་བཞག་པའི་སྐུ་ངོས་ང་ཕོད་མྱལ་བའི་ཞིང་ན་བོད་དོན་གླེང་།།
འདི་དག་ཨང་རྩིས་ཡག་པོ་རྒྱབ་དུས་དད་པའི་ས་བོན་རིམ་གྱི་འབར།།
རྒྱ་བོད་ཀྱི་འབྲེལ་མོལ་འདི་བོད་པའི་ཕྱོགས་ནས་འཐེན་རྩིས་བརྩི་གི་ཡོད་པ་རེད། རང་བཙན་ནས་ཕྱེད་ཀ་མར་འཐེན་དེ་ལྷག་གྲངས་དབུ་མ་རེད། དབུ་མ་ནས་མར་འཐེན་ཏེ་རྒྱ་ནག་གི་རྩ་ཁྲིམས་ལ་འགྱུར་བ་གཅིག་ཀྱང་གཏོང་མ་དགོས་པའི་རང་སྐྱོང་ལྷག་པ་རེད། གང་ལྟར་གྲོས་མོལ་བྱེད་ཐེངས་རེ་རེར་ང་ཚོས་སྔ་མའི་རྩོད་གཞི་ནས་ཆ་མང་པོ་མར་འཐེན་དགོས་པ་དང་། རྒྱ་ནག་གིས་འབྲེལ་མོལ་རེ་རེའི་སྐབས་ལ་བསྣོན་རྩིས་བརྒྱག་གི་ཡོད་པ་རེད། རྒྱ་ནག་གྲངས་ཀ་གཅིག་བསྣན་པ་དང་བོད་པས་གྲངས་གཅིག་མར་འཕྲི་དགོས་ཐུག་གི་ཡོད་པ་རེད། གང་ལྟར་ལྷག་གྲངས་གོར་ཐིག་ལ་མ་སླེབས་པར་དུ་གྲངས་ཀ་འདི་བརྩི་དགོས་པ་རེད།
རིག་འབྱུང་དོན་གྲུབ་བཀྲ་ཤིས་ཀྱིས་འདིར་སྣོན་པ་འགའ་བཏབ་ཡོད་པ་དག་གཤམ་གསལ་ལྟར་ལགས།
“ཨང་རྩིས་འདི་ལ་བསམ་ཚུལ་འགའ་ཁ་སྣོན་བྱེད་ཀྱི་ཡིན།
ད་ལོའི་བཙན་བྱོལ་བོད་གཞུང་གི་ལོ་འཁོར་སྔོན་རྩིས་དེ། རྒྱ་སྒོར་༡,༠༠༣,༦༤༢,༠༠༠ཙམ་རེད། རྒྱལ་སྤྱིའི་བོད་དོན་ལས་འགུལ་ཁང་གི་ལོ་རེའི་ཡོང་འབབ་ཨ་སྒོར་༥༣༤༥༧༢༦དེ་རྒྱ་སྒོར་ལ་ཕབ་ན། རྒྱ་སྒོར་༢༤༧,༡༥༩,༦༤༡ ཙམ་རེད། དེས་བཙན་བྱོལ་བོད་གཞུང་གི་ལོ་གཅིག་གི་འགྲོ་སོང་གི་བརྒྱ་ཆ་༢༠ཟིན་འདུག བཙན་བྱོལ་བོད་གཞུང་ལ་དཔལ་འབྱོར་གྱི་ཡོང་ཁུངས་ཆེ་ཁག་གསུམ་ཡོད་པ་ནས། གཅིག་༧གོང་ས་མཆོག་སྐུ་སྒེར་ནས་རེད། གཅིག་དེ་ཕྱི་རྒྱལ་གྱི་རོགས་ཚོགས་ཁག་རེད། གཞན་དེ། བཙན་བྱོལ་བོད་མིའི་དྭང་བླང་དཔྱ་ཁྲལ་ཡོང་འབབ་རེད། ཕྱི་ལོ་༢༠༠༩ལོའི་བཙན་བྱོལ་བོད་མིའི་དྭང་བླང་དཔྱ་ཁྲལ་ཡོང་འབབ་ནི་རྒྱ་སྒོར་༨༧,༠༡༧,༢༢༦ ཙམ་རེད། གཞན་༧གོང་ས་མཆོག་སྐུ་སྒེར་ནས་བརྒྱ་ཆ་ཉི་ཤུ་ཙམ་ཡོང་གི་ཡོད་པ་རེད། གལ་སྲིད། རྒྱལ་སྤྱིའི་བོད་དོན་ལས་འགུལ་ཁང་གི་ཡོང་འབབ་དེ་འདྲ་ཞིག་བོད་གཞུང་ལ་གཏོང་ ཐུབ་ན། དེས་དཔལ་འབྱོར་ལས་ཁུངས་ཀྱི་ཕྱི་རྒྱལ་རོགས་དངུལ་ཚན་པའི་ལས་འགན་གཙོ་བོ་སྟེ།
༧གོང་ས་མཆོག་ནས་ཕྱི་རྒྱལ་རྒྱལ་ཁབ་ཁག་ནས་རོགས་དངུལ་ཐབས་འཚོལ་གནང་བར་མཇུག་སྐྱོང་གནང་རྒྱུ་ཟེར་བའི་ཁུར་བོ་ལྗིད་པོ་དེ་ས་ལ་ཕབ་པ་རེད།
ངེད་ཀྱི་རྩ་བའི་བླ་མ་ལ་ཡང་སྐུ་ངལ་གསོ་བའི་གོ་སྐབས་ཅུང་ཙམ་ཡོང་གི་རེད། དེ་འདྲ་ཞིག་རེད།
ད་དུང་སྐད་ཆ་འགའ་ཁ་སྣོན་བྱེད་ཀྱི་ཡིན།
རྒྱལ་སྤྱིའི་བོད་དོན་ལས་འགུལ་ཁང་གི་ཕྱི་ལོ་༢༠༠༨ལོའི་ལོ་འཁོར་རྩིས་ཕྲའི་སྤྱི་བསྡོམས་དེར་རོབ་ཙམ་བལྟས་བ་ཡིན།
རྩིས་ཕྲ་དེ་ཞིབ་ཚགས་ཤིག་མི་འདུག ཞིབ་ཚགས་མེད་པའི་རྒྱུ་མཚན་གཅིག་དེ། (Expenses) འགྲོ་སོང་གི་ཁོངས་སུ།( Salaries expense)ལས་མིའི་གླ་ཆའི་འགྲོ་སོང་དེ་བཅུག་མི་འདུག
ད་དུང་། མ་འཇོག་གི་ཁོངས་སུ(Dividends) ཡང་འདུག( Dividents) ཟེར་བ་འདི་བཟོ་གྲ་ཞིག་ཡིན་ན། དེའི་མ་བཤེར་བདག་པོ་ཚོར་བགོ་བའི་དངུལ་འབབ་དེ་རེད།
ད་དུང་། ( Investments)མ་བཙུགས་ཀྱང་ཨ་སྒོར་༣༤༨,༠༠༩ཙམ་བྱས་འདུག་པ་དང་དེ་ནས་མ་དངུལ་( Investment loss)ཨ་སྒོར་༡༢,༦༦༠ཙམ་ལ་གྱོང་རག་འདུག
རྩིས་ཕྲ་དེར་ཞིབ་ཚགས་ཤིག་ བལྟས་རྗེས། ངེད་རང་སྒེར་ལ་ཚོར་སྣང་ཞིག་བྱུང་། དེ་ནི་རྒྱལ་སྤྱིའི་བོད་དོན་ལས་འགུལ་ཁང་འདི་ཚོང་ལས་ཀྱི་སྡེ་ཚན་ཞིག་ཆགས་འདུག་ པ་དེ་རེད།
ཚོང་ལས་ཀྱི་་སྡེ་ཚན་ཞིག་ཡིན་པའི་རྣམ་པ་དེ་རྩིས་ཕྲའི་སྒང་ལ་གསལ་ལྷང་ངེར་འདུག དེ་ཙམ་ཡིན།
གཅིག་བརྗེད་འདུག
ངེད་ཀྱིས་ཁོང་ཚོའི་རྩིས་ཕྲའི་ཐོག་ན་ཚོང་ལས་ཀྱི་སྡེ་ཚན་ཞིག་ཡིན་པའི་རྣམ་པ་དེ་གསལ་བོ་འདུག་ལབ་ཀྱི་ཡོད་མ་གཏོགས།
གཞན། བོད་དོན་དང་འབྲེལ་བའི་ཕྱག་ལས་གནང་མི་འདུག་ལབ་ཀྱི་མེད་ལ་བོད་དོན་དང་འབྲེལ་བའི་ལས་འགུལ་རྩོམ་གྱི་མི་འདུག་ཡང་ཟེར་གྱི་མེད།
དེ་ཙམ་ཡིན།
མོ་ལུང་རྩིས་གསུམ་གྱི་ནང་གི་རྩིས་སྐོར་སྐབས། བསེ་རུར་རྙེད་དོན་གཅིག་ནི༌”༡༩༧༩ ལོར་ཏིན་གྱིས་རང་བཙན་མ་ཡིན་པའི་སྐད་ཆ་གང་ཡིན་ཡང་བཤད་ཆོག་”ཅེས་པའི་ཚིག་དུམ་དེ་ཁུར་ནས་མི་ལོ་ཉི་ཤུ་འདས་ཟིན་པ་དེ་རེད། དེར་ཕྱིར་བལྟས་ཤིག་བྱེད་སྐབས། ང་ཚོས་ད་བར་མ་ཎི་བཞིན་བགྲངས་ཟིན་པའི་ཚིག་དུམ་དེ་ངག་ནས་ངག་བརྒྱུད་པའི་ཚིག་དུམ་ཞིག་ཡིན་པ་ལས། ཁྲིམས་མཐུན་ཚད་འཕེར་གྱི་ཡིག་ཐོག་གི་སྐད་ཆ་ཞིག་མིན་སྟབས། དེ་ནི་ལོ་རྒྱུས་ཀྱི་དཔང་པོར་འགྱུར་སྲིད་དམ། དེ་ནི་རྒྱ་གཞུང་གི་ཡིག་ཆ་གང་ཞིག་གི་ནང་དུ་འཁོད་ཡོད་དམ། གོང་གི་ཚིག་དུམ་དེར་ཤི་འཐམ་རོ་འཐམ་བྱས་ཏེ་མི་ལོ་ཉི་ཤུ་འདས་ཟིན་འདུག ད་དུང་ཡང་ནམ་རིང་སྒྲུང་གིས་འཁྱོལ་སྲིད་དམ། འདི་ནི་ངའི་བསམ་པའི་འཆར་སྒོ་ཙམ་ཡིན་པས་དཔྱད་པར་འཚལ།།