གཞིས་ལུས་བོད་མི་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་བའི་འཕྲིན་ཡིག་ཅིག

བདག་སོགས་འགྲོ་བ་ཡོངས་ཀྱི་འདི་ཕྱི་གཉིས་ཀྱི་སྐྱབས་གནས་༧སྐྱབས་མགོན་ཡིད་བཞིན་ནོར་བུའི་སྙན་ལམ་དུ་།

སྐྱབས་མགོན་ལགས། སྔོན་བསགས་བསོད་ནམས་ཀྱི་མཐུ་ལས་གཞིས་ལུས་བདག་ལ་གསེར་ལས་ལྷག་པའི་གོ་སྐབས་འདི་ཐོབ་བྱུང༌། གུས་པས་ཀྱང་ལྷག་བསམ་རྣམ་པར་དཀར་བའི་ཐོག་ནས་མགོན་པོ་མཆོག་ལ་སྐད་ཆ་འགའ་ཞུ་འདོད་བྱུང༌།

དུས་འགྱུར་ནས་བཟུང༌། བོད་ཀྱི་སྐད་ཡིག་ནང་ཆོས་རིག་གཞུང་བཅས་ཀྱི་གནས་སྟངས་ནི་དཔེ་ཛ་དྲག་ཏུ་གྱུར་ཡོད། འོན་ཀྱང་སྐྱབས་མགོན་རྒྱལ་བ་ཡབ་སྲས་རྣམ་གཉིས་ཀྱི་ཐུགས་བསྐྱེད་སྨོན་ལམ་ལས་བོད་ཀྱི་སྐད་ཡིག བོད་མི་རིགས། བོད་ཀྱི་རིག་གཞུང་ཞེས་པའི་ཐ་སྙད་རྣམས་ད་དུང་འཛམ་བུ་གླིང་འདིར་གྲགས་ཡོད། འོན་ཏེ་ཁྲེལ་མེད་ཀླ་ཀློའི་དཔུང་གིས་ཁ་ནས་ཆོས་དད་རང་མོས། མི་རིགས་རང་སྐྱོང་། ཐུན་མིན་མི་རིགས་རིག་གནས་སྲུང་སྐྱོབ་སོགས་ཀྱི་རྫུན་གཏམ་འདྲ་མིན་རྒྱལ་སྤྱིའི་ཐོག་ཁྱབ་བསྒྲགས་བྱས་དང་བྱེད་བཞིན་ཡོད།

དོན་དངོས་ཐོག་ལོ་ལྟར་སློབ་གྲྭའི་བོད་ཡིག་སློབ་དེབ་ལ་བསྒྱུར་བཅོས་གཏོང་ནས། བོད་མི་རིགས་རང་གི་ལོ་རྒྱུས་གོམས་སྲོལ་རིག་གཞུང་དང་འབྲེལ་བའི་སློབ་ཚན་དེ་དག་དོར་ནས། རྒྱ་རིགས་དང་མགོ་སེར་གྱི་སྙན་ངག་དང་རྩོམ་ལ་སོགས་བོད་ཡིག་དུ་བསྒྱུར་ནས་སློབ་ཁྲིད་བྱེད་བཞིན་ཡོད། ལྷག་པར་དུ་དགོན་སྡེ་ཁག་ལ་གང་སར་ཉེན་རྟོག་པས་དད་ལྡན་མང་ཚོགས་ཚོའི་སྨྲ་བརྗོད་དང་བྱ་བྱེད་ལ་ལྐོག་ལྟ་བྱ་བ་དང་དགོན་པའི་ཕྱི་ནང་དབྱེ་བ་མེད་པར་གང་སར་གློག་གི་འཕྲུལ་ཆས་བཙུགས་ནས་དམ་དྲག་ཤུགས་ཆེན་བྱེད་བཞིན་ཡོད།

ཡང་ཉེ་བའི་ཆ་ལ་གྲངས་ཉུང་མི་རིགས་ལ་དམིགས་ནས་སྲིད་ཇུས་གསར་པ་ཞིག་བཏོན་ཡོད་པ་གོ་རྒྱུ་འདུག སྐབས་རེ་ཡང་མ་འོངས་པར་འགྱུར་བ་གང་འདྲ་བྱུང་ངམ་བསམ་ནས་འཇིགས་སྣང་ཡང་ཡང་ཡོང་གི་འདུག དེ་བས་ཀྱང་བློ་ཕམ་ཞིག་ལ་དེང་སང་བོད་ནང་གི་ལོ་ཆུང་ན་གཞོན་མི་ཉུང་བ་ཞིག་གི་རང་རིགས་ཀྱི་སྐད་ཡིག་ཆོས་དང་རིག་གཞུང་ལ་སྦྱངས་འདོད་མེད་པ་མ་ཟད་ བླུན་པོ་ཆུ་སྣ་གར་ཁྲིད་ཀྱི་ཚུལ་དུ་མགོ་སེར་དང་ལྷག་པར་དུ་རྒྱ་ནག་པོའི་རིག་གནས་ལ་དང་དོད་ཇེ་ཆེར་འགྲོ་བཞིན་འདུག

གོང་དུ་ཞུས་པ་ལྟ་བུ་ད་ལྟའི་གནས་སྟངས་དཔེ་ཛ་དྲག་པོར་གནས་ཡོད་ཀྱང་། གཞིས་ལ་བཞུགས་པའི་མཁས་བཙུན་བཟང་གསུམ་རྣམ་པས་སྐུ་ངལ་ལ་མི་འཛེམས་པར་ཆོས་འཁོར་རྒྱ་ཆེར་འཁོར་བ་དང༌། མང་ཚོགས་རྣམས་ལ་བཀའ་སློབ་མང་པོ་ཕེབས་གནང་བ། རྒྱ་ཆེའི་མང་ཚོགས་ཚོས་ཀྱང་རང་གི་སྐད་ཡིག་རིག་གནས་ལ་འཛིན་སྐྱོང་སྤེལ་གསུམ་དང༌། ག་དུས་ཆོས་མཇལ་ལ་འགྲོ་དུས་མགོན་པོ་མཆོག་གི་ཞབས་བརྟན་གསོལ་འདེབས་དང་མཚན་སྔགས་གསོལ་འདེབས་འདོན་བཞིན་མགོན་ཁྱེད་ཀྱི་མཚན་ནས་བོས་ཏེ་གསོལ་སྨོན་ཤུགས་གྲགས་(དྲག)ཞུ་བ་དང་མགོན་པོ་མཆོག་གི་བཀའ་སློབ་གང་ཕེབས་ལྟར་རང་གཞན་གཉིས་ཕན་བྱང་ཆུབ་སེམས་མཆོག་རིན་པོ་ཆེ་སྒོམ་ཞིང་དོན་དངོས་ཐོག་ལག་བསྟར་བྱས་པ། མདོར་ན་རང་རིགས་ཀྱི་ཤ་ཞེན་དང་ལ་རྒྱ་བཅངས་ནས་དད་པ་དང་དམ་ཚིག་ནམ་ཡང་འགྱུར་བ་མེད་པར་གནས་དང་གནས་བཞིན་ཡོད།

གུས་པས་ཀྱང་ལག་གཉིས་ཐལ་མོ་སྦྱར་ནས་༧གོང་ས་སྐྱབས་མགོན་རིན་པོ་ཆེ་མཆོག་གི་ཞབས་ཟུང་གསེར་གྱི་འཁོར་ལོ་ལྷ་ལྡན་དག་པའི་ཞིང་ལ་མྱུར་བར་འཁོད་གནང་མཛད་པ་དང་སྐྱེ་རྒུའི་གསོས་སྨན་དུ་ཆོས་འཁོར་རྒྱ་ཆེར་འཁོར་ནས་བོད་གཞིས་བྱེས་ལྷན་འཛོམས་སྐལ་བཟང་ཉི་མ་དེ་མྱུར་དུ་ཤར་བའི་སྨོན་ལམ་དང༌། ལྷག་དོན་དུ་གོང་ས་མཆོག་སྐུ་ཚེ་ཞབས་པད་བརྟན་པ་དང་མཛད་པ་འཕྲིན་ལས་ནམ་མཁའ་ལྟ་བུར་འཛམ་གླིང་ཡུལ་ཕྱོགས་ཀུན་དུ་ཁྱབ་ཅིང་ཐུགས་ཀྱི་བཞེད་དགོངས་གང་ཡོད་ཐ་དག་བགེགས་མེད་ལྷུན་གྱིས་གྲུབ་པའི་གསོལ་སྨོན་ཤུགས་དྲག་ཞུ་ཞུ།

ཕྱི་ལོ་ ༢༠༢༦ ཟླ་ ༩ ཚེས་ ༢༤།

རྩོམ་སྒྲིག་པའི་གསལ་བཤད།

གོང་འཁོད་འཕྲིན་ཡིག་ནི་བོད་ནང་གི་བོད་མི་ཞིག་གིས་བྲིས་པ་དང་། ཕྱི་ཟླ་ ༩ ཚེས་ ༢༩ ཉིན་༧གོང་ས་མཆོག་ལ་མཇལ་བཅར་དུ་ཡོང་བའི་རྒྱ་རིགས་ཤིག་གི་ལག་ཏུ་བསྐུར་འདུག འདི་གའི་གསར་འགོད་པས། རྒྱ་རིགས་གནས་མཇལ་བ་དེའི་ཆོག་མཆན་འོག་པར་དུ་བཏབ་ནས་ཡིག་ཐོག་ཏུ་ཕབ་པ་ཡིན། འཕྲིན་ཡིག་འདི་འབྲི་མཁན་གྱི་མཚན་ཡང་འཁོད་འདུག་ཀྱང་། ཁོང་གི་བདེ་འཇགས་སྲུང་སྐྱོབ་ཆེད་འདིར་བཀོད་མེད།