བཀའ་ཤག་གིས་གཞུང་ཞབས་པ་རྣམས་ལ་ལོ་སར་སྤྲོ་སྐྱིད་ཀྱི་རྣམ་པས་གཏོང་མི་ཆོག་སྐོར་བསྒྲགས་པ་དེས། གཞུང་འབྲེལ་མ་ཡིན་པའི་ཚོགས་པ་ཁག་ལའང་བྱེད་ཁག་པོ་བཟོས་འདུག་ལ། ཁོང་ཚོའི་བར་ལོ་སར་ཇི་ལྟར་གཏོང་མིན་ཐད་ལྟ་ཚུལ་མི་མཐུན་པ་འབྱུང་བཞིན་ཡོད།
ཕྱི་ཚེས་ ༣ ཉིན་ཏེ། བོད་ལྕགས་སྟག་ལོའི་ལོ་སར་བར་དུ་ཉིན་བཅུ་ལས་མེད་པའི་སྐབས་འདིར། བོད་གཞུང་བཀའ་ཤག་གིས་འབྲེལ་ཡོད་ལྷན་ཁང་ཁག་བདུན་གྱི་ཁྱབ་ཁོངས་འོག་ཡོད་པའི་གཞུང་ཞབས་ལས་བྱེད་རྣམས་ལ་གསལ་བསྒྲགས་ཤིག་བཀྲམས་ཏེ། འདི་ལོའི་ལོ་སར་སྐབས་ཚེ་གཏོར་དང་བསང་གསོལ་སོགས་ཆོས་ཕྱོགས་ཀྱི་མཛད་སྒོ་རྣམས་སྲོལ་རྒྱུན་ལྟར་གནང་བ་མ་གཏོགས། གསོལ་སྟོན་དང་ཞབས་གཞས། ཤོག་པག་སྤར་བ་སོགས་བག་ཡངས་སྤྲོ་སྐྱིད་ཀྱི་ལས་རིམ་གཏན་ནས་མེད་པ་དགོས་རྒྱུ་མ་ཟད། གཞུང་ཞབས་ལས་བྱེད་རྣམས་ཀྱང་སྤྲོ་སྐྱིད་གསོལ་སྟོན་སོགས་སུ་ཕེབས་མི་ཆོག་པའི་སྐོར་བསྒྲགས་ཡོད་མོད། གཞུང་ཞབས་ལས་བྱེད་ཀྱི་ཕན་ནས་མི་མང་རྣམས་ལོ་སར་བའི་དགའ་སྟོན་རྟེན་འབྲེལ་ལ་རོལ་བ་དང་། གཞས་འཁྲབ་པ་དང་ཞབས་བྲོ་རྒྱག་པ། ཤོག་པག་སྤར་བ་སོགས་སྤྲོ་སྐྱིད་ཀྱི་རྣམ་པར་རོལ་མིན་ཐད་གང་ཡང་གསུངས་མེད། བཀའ་དྲུང་མི་འགྱུར་རྡོ་རྗེ་ལགས་ཀྱིས་ང་ཚོས་དམར་བོའི་གཞུང་ལྟར་མི་མང་ལ་བཀའ་གཏོང་ཆོག་གི་མ་རེད། ལོ་སར་གཏོང་མིན་དེ་མི་མང་རང་ཉིད་ཀྱི་རང་དབང་རེད་ཅེས་གསུངས་ཡོད།
འོན་ཀྱང་། གཞུང་ཞབས་ལས་བྱེད་རྣམས་ཀྱིས་ལོ་སར་སྤྲོ་སྐྱིད་ཀྱི་རྣམ་པར་གཏོང་ཆོག་གི་མེད་དུས། ཁོང་ཚོའི་ནང་མི་བུ་ཕྲུག་དག་ཀྱང་རང་བཞིན་གྱིས་དེའི་ཁོངས་སུ་འདུས་ཡོད་ལ། དེ་ལྟར་བྱས་ཚེ་ད་ཡོད་གཞུང་ཞབས་པ་མི་ ༥༠༠ ལྷག་ཡོད་པ་ནས་ཁོང་ཚོའི་ནང་མི་བུ་ཕྲུག་དང་ཉེ་འབྲེལ་བསྡོམས་ན། ཉུང་མཐར་ཡང་མི་ ༢༠༠༠ ལྷག་གིས་ལོ་སར་གཏོང་མི་ཆོག་པར་གྱུར་ཡོད།
འདིའི་ཐད་དུ་གཞུང་འབྲེལ་མ་ཡིན་པའི་ཚོགས་པ་རེ་ཟུང་གིས་འདི་ལོའི་བོད་ལུགས་ཀྱི་ལོ་སར་དང་རྒྱ་ནག་གི་ལོ་སར་གཉིས་དུས་མཉམ་དུ་འཁེལ་གྱིན་ཡོད་སྟབས། ལོ་སར་གྲ་རྒྱས་པོ་བཏང་སྟེ་བོད་མི་རིགས་ཀྱི་སྲོལ་རྒྱུན་རིག་གནས་དང་ལོ་སར་སྐབས་ཀྱི་རྒྱས་སྤྲོས་བྱེད་སྟངས་སོགས། རྒྱ་ནག་དང་ཐ་དད་ཡིན་པའི་རྣམ་པ་གསལ་བོར་སྟོན་དགོས་པ་རེད་ཅེས་དང་། ཡང་ད་ལྟ་བོད་ནང་ལ་མཚོན་ན་གཞིས་ལུས་བོད་མི་རྣམས་འདུ་འཛོམས་བྱེད་པའི་གོ་སྐབས་དེ་ཙམ་རག་གི་མེད་སྟབས། ལོ་སར་གྱི་རྟེན་འབྲེལ་ལ་རོལ་བ་དང་དགོན་སྡེ་ཁག་ཏུ་མཆོད་མཇལ་དུ་འགྲོ་རྒྱུ་ནི་བོད་མི་རྣམས་འདུ་འཛོམས་བྱེད་པའི་གོ་སྐབས་ཡག་ཤོས་ཤིག་རེད་ཅེས་སོགས་ཟེར་མཁན་བྱུང་ཡོད།
ཕྱི་ཚེས་ ༥ ཉིན་གྱི་ཞོགས་པར་འདི་གའི་གསར་འགོད་པས་བུད་མེད་ལྷན་ཚོགས་ཀྱི་ཚོགས་གཞོན་བསམ་གཏན་ཆོས་སྒྲོན་ལགས་སུ། བཀའ་ཤག་ནས་གཞུང་ཞབས་ལས་བྱེད་རྣམས་ལ་ལོ་གསར་བའི་ནང་དུ་དགའ་སྤྲོ་བག་ཡངས་ཀྱི་རྣམ་པ་མེད་པ་དགོས་པའི་སྐོར་ལ་གསལ་བསྒྲགས་སྤེལ་བའི་ཐད་དགོངས་ཚུལ་ཅི་ཡོད་དྲིས་པར། ཁོང་གིས་གསུངས་དོན། བོད་ནང་གི་གནས་སྟངས་མུ་མཐུད་ཛ་དྲག་ངང་གནས་ཡོད་སྟབས། ལོ་སར་སྐབས་གཞས་ཞབས་བྲོ་འཁྲབ་པ་དང་གླུ་ལེན་གར་རྩེས་ལ་རོལ་བ་སོགས་ཧ་ཅང་གི་དྲ་རྒྱས་པོ་བྱེད་མི་རུང་ནའང་། ཆོས་ཕྱོགས་ཀྱི་བྱེད་སྒོ་ཁག་དང་སྲོལ་རྒྱུན་གྱི་འགྲོ་སྟངས་ལྟར་ལོ་སར་གྱི་རྟེན་འབྲེལ་ཁག་བྱ་དགོས་པ་དེ་གལ་ཆེན་པོ་རེད་ལ། ལོ་སར་གྱི་རྟེན་འབྲེལ་དགའ་སྟོན་བྱེད་པ་དེས་བོད་ཀྱི་སྲོལ་རྒྱུན་རིག་གཞུང་ཞིག་མཚོན་གྱིན་ཡོད་པ་དང་། ལོ་སར་ནི་ལོ་གཅིག་གི་ནང་ནས་གལ་ཆེའི་དུས་ཆེན་ཞིག་དང་ངེས་པར་དུ་སྲུང་གཙི་ཞུ་དགོས་པ་ཞིག་ཡིན་སྟབས། གལ་སྲིད་ང་ཚོས་ལོ་གཅིག་ལ་ལོ་སར་མ་བཏང་། གཉིས་ལ་ལོ་སར་མ་བཏང་བར་བསྡད་ན་ཕྲུ་གུ་ལོ་ཆུང་ཚོ་ཡིན་ནའང་། རིམ་གྱིས་ལོ་སར་ལབ་དུས་སྤྲོ་སྣང་མེད་པ་དང་ལོ་སར་གྱི་ངོ་བོ་ངོས་མི་ཟིན་པར་ཆགས་འགྲོ་གི་རེད་ཅེས་གསུངས་ཡོད།
དེ་བཞིན་ངྷ་ས་བོད་རང་དབང་སློབ་ཕྲུག་ཚོགས་པའི་ཚོགས་གཙོ་ཆོས་དབྱངས་ལགས་ཀྱིས། རྩ་བའི་ང་ཚོའི་ཛ་དྲག་གི་གནས་སྟངས་ནི་ ༢༠༠༨ ལོ་ཙམ་མིན་པར་ ༡༩༥༩ ལོ་ནས་བཟུང་བྱུང་བསྡད་པ་རེད་ལ། སྐབས་དེར་མི་ས་ཡ་གཅིག་ཙམ་གྱི་སྲོག་ཤོར་བ་རེད། དེ་ལྟར་བོད་རྒྱ་ལག་ལ་ཤོར་བ་ནས་ད་ལྟའི་བར་ཛ་དྲག་གི་རྣམ་པར་གནས་ཀྱིན་ཡོད་ནའང་། ལོ་སར་རྟེན་འབྲེལ་ལ་རོལ་རྒྱུ་ནི་གལ་ཆེན་པོ་རེད་ལ། ཉིན་དེར་བོད་མིའི་སྲོལ་རྒྱུན་གྱི་རིག་གཞུང་དང་གྱོན་གོས། ཟ་མ་སོགས་ངོ་སྤྲོད་བྱ་རྒྱུ་དེ་གལ་ཆེ་ཤོས་ཤིག་ཡིན་པས་དེ་ང་ཚོས་བེད་སྤྱོད་ཡག་པོ་གཏོང་དགོས། བོད་ནང་དུ་རེ་ཟུང་གིས་ལོ་སར་གཏོང་དགོས་པ་རེད་ཟེར་བ་དང་། ཡང་རེ་ཟུང་གིས་གཏོང་ཉན་གི་མ་རེད་ཟེར་གྱིན་ཡོད་ནའང་། ཆབ་སྲིད་ཀྱི་ལྟ་སྟངས་ཤིག་གི་ངོས་ནས་བལྟས་ན་འདས་པའི་ལོ་གཉིས་གསུམ་རིང་གཞིས་ལུས་བོད་མི་རྣམས་ཀྱིས་སེམས་ནང་གི་སྡུག་བསྔལ་ཕྱི་ལ་སྟོན་པའི་དུས་ཚོད་བཟང་ཤོས་ནི་འདུ་འཛོམས་བྱེད་པའི་དུས་ཚོད་དག་རེད་ལ། རྒྱ་ནག་གིས་བོད་མི་ཚོ་མཉམ་དུ་འཛོམས་རྒྱུར་སྐྲག་སྣང་དང་བཀག་འགོག་བྱེད་ཀྱིན་ཡོད་པའི་ཆ་ནས་ད་ལྟའི་བར་བོད་མི་ཚོ་མཉམ་དུ་འཛོམས་ཐུབ་མེད་ཅིང་། ལོ་སར་ལ་རོལ་བ་དང་དགོན་སྡེ་ཁག་ཏུ་མཆོད་མཇལ་དུ་འགྲོ་བ་ནི་བོད་མི་རྣམས་འདུ་འཛོམས་བྱེད་པ་དང་མཉམ་དུ་སྤྲོ་སྐྱིད་ལ་རོལ་བའི་གོ་སྐབས་ཡག་ཤོས་ཤིག་རེད། དེ་ནི་བོད་ནང་ཙམ་མིན་པར་རྒྱ་གར་གཙོས་ཕྱི་རྒྱལ་ཁག་ཏུ་ཡོད་པའི་ས་གནས་གང་དུ་ཡིན་ནའང་། གལ་ཆེན་པོར་ཆགས་འདུག་ཅེས་གསུངས་ཡོད།
ཁོང་གིས་མུ་མཐུད་དེ། ང་ཚོས་ལོ་སར་གཏོང་དགོས་པ་རེད་ཟེར་དུས་དགའ་དགའ་སྤྲོ་སྤྲོ་བྱོས་ཟེར་གྱིན་མེད་པར། སོ་སོའི་རིག་གཞུང་དང་སྐད་ཡིག ཡུལ་སྲོལ་གོམས་གཤིས་སོགས་རྒྱ་ནག་དང་ཐ་དད་ཡིན་པ་གསལ་སྟོན་བྱ་དགོས་ཀྱི་འདུག་ཟེར་གྱིན་ཡོད་ཅེས་གསུངས།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་དབང་འོད་འབར་ལགས་ཀྱིས། སྤྱིར་བཏང་འདི་ལོའི་ལོ་སར་རྒྱ་ནག་གི་ལོ་སར་དང་མཉམ་དུ་འཁེལ་གྱིན་ཡོད་སྟབས། དྲ་རྒྱས་པོ་གཏོང་དགོས་པ་རེད་ཟེར་མཁན་དང་འདས་ལོའི་ནང་གཞིས་ལུས་བོད་མིས་མུ་མཐུད་སྡུག་སྦྱོང་མནར་གཅོད་མྱངས་དགོས་བྱུང་སྟབས། ལོ་སར་གཏོང་ཉན་གི་མ་རེད་ཟེར་མཁན་སོགས་རིགས་གཉིས་ཡོང་གི་འདུག་ལ། ཁ་སང་བཀའ་ཤག་གིས་གཞུང་ཞབས་ལས་བྱེད་ཚོས་ལོ་སར་སྐབས་སྤྲོ་སྐྱིད་ཀྱི་རྣམ་པ་གང་ཡང་མེད་པའི་ཐོག་ནས་ཆོས་ཕྱོགས་ཀྱི་མཛད་སྒོ་ཁག་གཏོང་དགོས་སྐོར་བརྗོད་སྟབས། མི་མང་ནང་དེས་ཤུགས་རྐྱེན་ཐེབས་གི་རེད་ལ། ང་ཚོས་ཀྱང་ལོ་སར་སྐབས་ག་རེ་བྱེད་དགོས་མིན་ཐད་ལས་བྱེད་ནང་ཁུལ་གྲོས་བསྡུར་བྱེད་བཞིན་པའི་སྒང་ཡིན་ཞེས་གསུངས་ཡོད།
གོང་གསལ་ཚོགས་པ་གསུམ་གྱི་ད་ལྟའི་ལས་འཆར་ལྟར་ན་འདི་ལོའི་ལོ་སར་སྐབས་ཨ་རིའི་སྲིད་འཛིན་ཨོ་བྷ་མ་མཆོག་ལ་འཚམས་འདྲིའི་ཤོག་བྱང་གཏོང་རྒྱུ་ཡིན་འདུག་ལ། འཚམས་འདྲིའི་ཤོག་བྱང་དག་སྲིད་འཛིན་ཨོ་བྷ་མ་དང་༧གོང་ས་མཆོག་རྣམ་གཉིས་མཇལ་འཕྲད་མ་གནང་བའི་སྔོན་ཏག་ཏག་དེར་ཁོང་གི་ཕྱག་ཏུ་འབྱོར་ཐུབ་པ་བྱ་རྒྱུ་ཡིན་འདུག
གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་ཁ་སང་བཀའ་ཤག་གིས་གཞུང་ཞབས་ལས་བྱེད་རྣམས་ལ་ལོ་སར་མི་གཏོང་རྒྱུའི་གསལ་བསྒྲགས་བཀྲམས་པ་དེས། ང་ཚོས་ཀྱང་ག་རེ་བྱེད་དགོས་མིན་ཐད་བསམ་བློ་གཏོང་གི་ཡོད་མོད། ད་དུང་ཐག་གཅོད་གང་ཡང་བྱུང་མེད་ཅེས་གསུངས་ཡོད། ཁ་སང་བཀའ་ཤག་གིས་གཞུང་ཞབས་པ་རྣམས་ལ་ལོ་སར་སྐབས་སྤྲོ་སྐྱིད་ཀྱི་རྣམ་པ་གང་ཡང་མེད་པའི་ཐོག་ནས་ལོ་སར་གཏོང་དགོས་པའི་སྐོར་འདི་གའི་དྲ་ཐོག་ཏུ་སྤེལ་རྗེས། བསམ་ཚུལ་སྤེལ་མཁན་དག་གི་ཁྲོད་ན་ལོ་སར་སྤྲོ་སྐྱིད་ཀྱི་རྣམ་པས་གཏོང་དགོས་པ་རེད་ཟེར་མཁན་དང་མ་རེད་ཟེར་མཁན་གཉིས་ཀ་བྱུང་བའི་ཁྲོད་ཀྱི་མང་ཤོས་ནི་མང་ཚོགས་ཀྱིས་ཀྱང་ལོ་སར་སྤྲོ་སྐྱིད་ཀྱི་རྣམ་པ་མེད་པའི་ཐོག་ནས་བཏང་སྟེ། གཞིས་ལུས་བོད་མི་རྣམས་ལ་གདུང་སེམས་མཉམ་སྐྱེད་བྱ་དགོས་པ་རེད་ཟེར་མཁན་ཡིན་འདུག
སྲོལ་རྒྱུན་ཁ་ལ་ཁྱེར་ནས་ལོ་གསར་གཏོང་མཁན་ཚོ། སྐད་ཆ་བཤད་དགོས་པ་ལས་རྒྱག་དགོས་པ་མ་རེད། དེ་བས་དོན་དུ་བོད་སྐད་ཤོད་ཅེས་འབྲི་དགོས་པ་རེད།
བོད་སྐད་རྒྱོབས།
བོད་ཆས་གྱོན།
བོད་ཟས་མཆོད།
བོད་ཡིག་བྲིས། ཅེས་འབྲི་དགོས་མི་འདུག་གམ། བོད་ཀྱི་བུད་མེད་ཚོགས་པ་དང་། བོད་ཀྱི་གཞོན་ནུ་ལྷན་ཚོགས། བོད་རང་དབང་སློབ་ཕྲུག་ཚོགས་པ་བཅས་ལ་བོད་ཡིག་གི་དྲ་རྒྱ་ཞིག་ཡོད་རེད་དམ། བོད་ཀྱི་ལོ་གསར་ཉིན་མོ་བོད་ཡིག་འབྲི་དགོས་མི་འདུག་གམ།
ཁམས་དཀར་མཛེས་ཕྱོགས་སུ་ཡང་ད་ལོ་ལོ་གསར་གཏང་གྱིན་མིན་ཟེར་གྱི་འདུག་ ཅེས་རླུང་འཕྲིན་ཁང་སོགས་ལ་བཤད་ཀྱི་འདུག་པས་ ད་ལོ་ཡང་བོད་ཀྱི་ལོ་གསར་དེ་མྱ་ངན་གྱི་དུས་དྲན་ཞིག་ལ་སྙིང་སྟོབས་ཀྱིས་བྲིས་
པའི་གསེར་རིས་རེད་འདུག།
༄༅། འཆར་ལ་ཉེ་བའི་མེ་སྟག་ལོ་གསར་དེ་ལྟས་དབང་གིས་བོད་ཀྱི་ལོ་གསར་དང་རྒྱ་མིའི་ལོ་གསར་གཉིས་ཀ་ཉིན་གཅིག་ལ་འཁེལ་གྱི་ཡོད་འདུག དེ་ཙམ་མ་ཡིན་པར་ལོ་གསར་ཚེས་གཅིག་ཉིན་དེང་རབས་ཀྱི་ན་གཞོན་གྲོགས་པོ་གྲོགས་མོ་རྣམས་རང་གི་དགའ་བརྩེའི་སེམས་ཚོར་སྟོན་རྒྱུའི་ཉིན་མོ་ བེ་ལིཎ་ཊ་ཨིན་ཌེ་ ཡང་དུས་གཅིག་ལ་སྟབས་འགྲིགས་འདུག བོད་རྒྱ་ཞི་མོལ་གྱི་ལས་རིམ་འགྲོ་བཞིན་པའི་སྐབས་འདིར་འདིས་གང་ཞིག་སྟོན་ཐབས་བྱེད་ཀྱི་ཡོད་དམ།།
བོད་སྐད་རྒྱོབས།
བོད་ཆས་གྱོན།
བོད་ཟས་མཆོད།
གོང་གི་འབོད་ཚིག་དག་བོད་རང་དབང་སློབ་ཕྲུག་ཚོགས་པའི་འདི་ལོའི་ལོ་སར་གྱི་འབོད་ཚིག་གསར་བ་དེ་རེད། དེའི་གཤམ་དུ་སྒོ་སམ་སྟེང་ཚིག་བཞི་ཞིག་བྲིས་ཡོད་པ་དེ་ཡང་ཁོང་ཚོའི་འབོད་ཚིག་རེད། ཁོང་ཚོར་ད་དུང་འབོད་ཚིག་གཞན་ཞིག་ཡོད་པ་ནི།
རྒྱལ་གཅེས་དཔའ་བོའི་ཟུངས་ཁྲག་ཆེད་དུ་སྔར་ལོའི་ལོ་གསར་སྡུག་གིས་བསྐྱལ། །
རྒྱལ་བའི་གཟི་བྱིན་སྔར་ལྷག་ཡོང་ཕྱིར་སྟག་ལོའི་ལོ་གསར་འཛུམ་གྱིས་སྤྲོ། །
གཞིས་བྱེས་ལྷན་འཛོམས་ཉི་མ་དེའི་ཕྱིར་ལོ་མགོའི་ཚེས་པ་ནས་བཟུང་སྟེ། །
འདས་གསོན་དཔའ་བོའི་ཞབས་རྗེས་སྙེག་གིན་གངས་རིའི་ལ་རྒྱ་དགུང་དུ་གཏོད། །
ཅེས་པ་འདི་རེད།
མཇུག་གི་ཤོག་བྱང་དེ་ནི་བུད་མེད་ཚོགས་པས་ལོ་སར་ཚེས་གཉིས་ཉིན་ཨ་རིའི་སྲིད་འཛིན་ཨོ་བྷ་མར་འབུལ་རྒྱུའི་ལོ་སར་གྱི་འཚམས་འདྲིའི་ཤོག་བྱང་གི་ཟུར་ངོས་གཅིག་དེ་རེད།
དེ་ནི་ངོ་སྤྲོད་ཙམ་ཡིན།
ཚོགས་གཞོན་བསམ་སྒྲོལ་ལགས།
སྐུ་ཉིད་ཀྱིས་ལོ་གཉིས་ཀྱི་ལོ་སར་སྤྲོ་སྐྱིད་དེ་བློས་གཏོང་གིས། རང་གི་བུ་རབས་ཚ་རྒྱུད་ལ་ཚེ་གང་གི་རང་དབང་བདེ་སྐྱིད་ཅིག་བསྐྲུན་རྒྱུའི་འདོད་པ་མེད་པར་བློ་ཕམ་བྱུང་།
ཚོགས་གཞོན་བསམ་གཏན་སྒྲོལ་མ་ལགས། ང་ལའང་བུ་ཆུང་ལོ་བཞི་ཅན་ཞིག་ཡོད། ངས་འདི་ལྟར་ཁོ་ལ་སློབ་གསོ་བཏང་བ་ཡིན། གཅེས་ཕྲུག་ལགས་ལོ་སྔོན་མ་དང་ད་ལོ་གཉིས་ལ་ང་ཚོས་ལོ་སར་གཏོང་ཆོག་གི་མ་རེད། ཤོག་སྦག་རྒྱགས་ཆོག་གི་མ་རེད། རྒྱུ་མཚན་ནི་ང་ཚོའི་བོད་མི་མང་པོ་ཞིག་རྒྱ་ནག་གི་དམག་མིས་བསད་པ་རེད་ཅེས་ལབ་པ་ཡིན།
འདས་པའི་ལོའི་ནང་ང་ཚོའི་སྤུན་ཟླ་བཞི་རྒྱ་གཞུང་གིས་སྲོག་ཐོག་བཏང་བ་རེད། དེ་བས་སོ་སོའི་ནང་མི་གྲོངས་དུས་མྱ་ངན་བྱ་དགོས་པ་དེ་ལོ་སར་གཏོང་དགོས་ཟེར་མཁན་ཚོས་སྲུང་སྐྱོབ་བྱེད་དགོས་ཅེས་བསྒྲགས་བཞིན་པའི་སྲོལ་རྒྱུན་རིག་གནས་དེ་རེད།
ད་དུང་བོད་ནང་གི་བོད་མི་ཚོར་ལོ་སར་གཏོང་འདོད་མེད་བཞིན་དུ་རྒྱ་གཞུང་གིས་བཙན་གྱིས་ལོ་སར་དགའ་སྟོན་ལ་རོལ་ཏུ་འཇུག་བཞིན་ཡོད་པས། ང་ཚོའི་ལོ་སར་རོལ་དགོས་ཤེ་ན། རྒྱ་གཞུང་གི་རྒྱབ་རོགས་ལྟ་བུར་གྱུར་བ་མ་རེད་དམ།
ད་ལྟའི་ཆར་བོད་མདོ་སྨད་རྔ་བ་དང་ཁམས་དཀར་མཛེས་ས་ཁུལ་ཁག་ཅིག་ཏུ་ལོ་སར་དགའ་སྟོན་མི་བྱེད་ཅེས་གནས་ཚུལ་ཐོན་ཡོད་པའི་ཁར། བོད་གཞུང་ནས་ཀྱང་ལོ་སར་མི་རོལ་བའི་གསལ་བསྒྲགས་སྤེལ་ཡོད་པས། གཞུང་འབྲེལ་མིན་པའི་ཚོགས་སྡེ་ཁག་གིས་ག་རེ་བྱས་ནས་རང་ཚུགས་སམ་ལངས་ཕྱོགས་རང་གར་བ་ཤིག་མཁྲེགས་འཛིན་བྱེད་དགོས།
ལོ་གསར་གཏོང་མི་གཏོང་ཟེར་བ་དེ་ལོ་གསར་གྱི་དུས་སྟོན་བྱེད་མི་བྱེད་ལ་གོ་དོན་ལེན་དགོས་པ་འདྲ། དུས་སྟོན་ཞིག་བྱེད་དུས་རང་བཞིན་གྱིས་སྤྲོ་སྐྱིད་ཀྱི་རྣམ་པར་འགྱུར་ངེས་ཡིན། སྤྲོ་སྐྱིད་ཀྱི་རྣམ་པ་འབྱུང་དུས་དགའ་བའི་གླུ་ལེན་པ་དང་། སྐྱིད་པའི་ཞབས་བྲོ་འཁྲབ་པ། བག་མེད་ཀྱི་ཤོ་རྒྱན་རྒྱག་པ་སོགས་ནི་ཞར་དང་ཞོར་ལ་བོད་མི་ཚོས་བྱེད་ངེས་རེད། གཞི་རྩའི་ཆ་ནས་ལོ་གསར་གཏོང་མི་གཏོང་ཙམ་ནི་དེ་ཙམ་གྱི་གནད་འགག་གང་ཡང་མ་རེད། ཡིན་ན་ཡང་ད་ལྟའི་གནས་སྟངས་འདི་འདྲའི་སྐབས་ལ་བོད་མི་ཚོས་ལོ་གསར་གཏོང་བ་དེ་འོས་འཚམ་ཞིག་ཏུ་མ་མཐོང་། གཞུང་འབྲེལ་མ་ཡིན་པའི་ཚོགས་སྡེ་ཁག་གིས་དོན་དག་འདི་དང་མཉམ་དུ་བོད་ཀྱི་རིག་གཞུང་དང་སྐད་ཡིག་སོགས་ཀྱི་སྐད་ཆ་གཞན་ཞིག་བཤད་ཀྱིན་ཡོད་པ་དེ་དག་ནི་བསམ་བློའི་གོ་རྟོགས་ཆུང་བའི་རྟགས་མཚན་ཞིག་ལས་གཞན་ཅི་ཡང་མ་རེད། དངོས་འབྲེལ་བོད་ཀྱི་རིག་གཞུང་དང་སྐད་ཡིག་བཅས་ལ་དགའ་ཞེན་བཅོས་མིན་ཞིག་ཡོད་ན། ལངས་ཕྱོགས་གསལ་པོ་དང་ཆོད་སེམས་བརྟན་པོའི་སྒོ་ནས་དེ་འབྲེལ་གྱི་ལས་འགུལ་མུ་མཐུད་དུ་སྤེལ་དགོས་པར་འདོད།
བཀའ་ཤག་གིས་ལོ་གསར་མ་གཏོང་རོགས་ཞེས་རེ་འབོད་དེ་བོད་སྤྱིར་ཡོངས་ལ་གོ་དགོས་རེད་མ་གཏོགས་བོད་མི་གཞུང་འབྲེལ་དང་གཞུང་འབྲེལ་མ་ཡིན་པའི་ཁྱད་པར་གང་ཡང་ཡོད་མ་རེད་སྙམ།
་ལོ་སར་མི་གཏོང་
ཡང་ན་མང་གཙོའི་ལམ་སྲོལ་ཐོག་ཁྲིམས་ལུགས་དང་མི་འགལ་བའི་བྱ་བ་དང་སྤྱོད་པ་མི་འདྲ་བ་རེ་ཁྱེར་དབང་ཡོད་པ་ལྟར་ལོ་གསར་ཟེར་དུས་ཞབས་བྲོ་རྐང་པ་ཆག་ལ་ཁད་བརྒྱབ་རྒྱུ་ཡོད་ཀྱང་དེ་ལྟར་རྒྱོབས། ཡང་ན་བོད་གཞུང་བཀའ་ཤག་གིས་དགེ་སྐྱོན་དཔྱད་ནས་གསུངས་པའི་བཀའ་སློབ་ལ་བརྩི་བཀུར་གྱིས་དེ་དེ་བཞིན་གསུངས་པའི་ལམ་ལ་ཞུགས་ཐབས་བྱོས། སེམས་གཏིང་ནས་དོན་དག་གཞན་དག་ཅིག་བྱེད་དགོས་ཀྱིན་དགོས་ཀྱིན་ཡང་ཕྱི་ལོགས་ནས་བསྟུན་མཁས་ཡིན་མདོག་དང་གུས་བརྩི་ཡོད་མདོག་གི་རྣམ་འགྱུར་ཞིག་ཀྱང་སྟོན་ཐབས་བྱེད་དགོས་པ་ད་ཅི་བྱས་སོང་བ་རེད།
གནད་དོན་ལུག་གི་རིལ་མ་ལྟ་བུའི་ཆུང་ཆུང་འདི་འདྲ་ཞིག་གི་ཐོག་ལ་ཁ་འདུམ་རྒྱུ་དང་ལག་འགྲིག་རྒྱུ་ཞིག་མེད་པར་རྩ་དོན་ཐོག་རྡོག་རྩ་གཅིག་བསྒྲིལ་ཟེར་བ་ཁ་ཐག་རིང་རང་དྲགས་ས་མ་རེད་དམ།
བཀའ་ཤག་གིས་གཞུང་ཞབས་པ་རྣམས་ལ་ལོ་སར་སྤྲོ་སྐྱིད་ཀྱི་རྣམ་པས་གཏོང་མི་ཆོག་སྐོར་བསྒྲགས་པ་དེས། གཞུང་འབྲེལ་མ་ཡིན་པའི་ཚོགས་པ་ཁག་ལའང་བྱེད་ཁག་པོ་བཟོས་འདུག
སྐད་ཆ་འདིས་ཡང་སྙིང་དོན་དག་ག་རེ་ཤོད་ཀྱིན་ཡོད་པ་རེད། གཞུང་འབྲེལ་མ་ཡིན་པའི་ཚོགས་པ་ཁག་ལ་མང་གཙོའི་གོ་རྟོགས་མི་འདུག་ཟེར་གྱིན་ཡོད་པ་རེད་དམ་ཡང་ན་གཞུང་འབྲེལ་མ་ཡིན་པའི་ཚོགས་པ་འདི་ཚོས་དོན་དག་གཅིག་གི་ཐད་བཀའ་ཤག་དང་ཐུག་དུས་སུ་རྣམ་འགྱུར་ཀྱོག་ཀྱོག་ཞིག་དང་ཡང་གནས་དུས་གཞན་དག་གི་ཚེ་རྣམ་འགྱུར་ལོགས་ཀ་ཞིག་སྟོན་གྱི་འདུག་ཟེར་གྱིན་ཡོད་པ་གང་རེད།
མང་གཙོའི་ལམ་སྲོལ་གཙང་མ་ཞིག་གི་ཐོག་ལ་འགྲོ་མཁན་ཞིག་གི་ངོས་ནས་བཤད་ན་གནད་དོན་འདི་ཚོ་འགྲམ་རུས་ལག་སྐྱོར་གྱིས་མནོ་བསམ་གཏིང་ཟབ་གཏོང་དགོས་ས་དེ་འདྲ་ཅི་ཡང་མ་རེད། འོན་ཀྱང་འགའ་ཞིག་གིས་སོ་སོའི་འདོད་བློ་དང་འཚམ་མིན་གྱི་ཐོག་ནས་དོན་དག་འདི་ཚོ་སྤྱི་ཚོགས་ཆུང་ཆུང་གི་ནང་སྡོམ་ཐག་ལྟ་བུའི་རྙོག་འཛིངས་ཡོད་པ་ཞིག་ཏུ་བསྒྱུར་གྱི་ཡོད།
བུད་མེད་ཚོགས་པར་དམིགས་བསལ་གྱིས་ལོ་སར་གཏང་བཅུག་དགོས། བུད་མེད་ཀྱི་སྟོབས་ཤུགས་འཕེལ་དགོས་ན་ཞལ་ལག་ཡག་པོ་མ་ཟོས་ན་ག་བ་ཡོང་གི་རེད།
བྱེད་ཞོར་
་་་་གལ་སྲིད་ལོ་གསར་གཏོང་དགོས་དགོང་གི་འདུག་ན་་་་ཉམས་ཆུང་ཆུང་ཞིག་གིས་ལོ་གསར་བསུ་རོག་ཞེས་རེ་བསྐུལ་ཞུ་རྒྱུ་ཡིན་་་་
་་་་གཞན་ཡུལ་གྱི་ལོ་གསར་ལ་ཽཕ་ཡུལ་ཡོད་དུས་བཞིན་སྐྱིད་པོ་ཁྱོན་ནས་མི་འདུག་ལ།
་་་ད་དུང་སྤུན་མང་པོའི་ཚེ་སྲོག་ཤོར་བ་དང་་སྤུན་ཟླ་་མི་ཉུང་བ་ཞིག་བཙན་འོག་ན་མ་ཤི་སྨྱལ་བ་དངོས་སུ་མྱོང་བཞིན་ཡོད་པ་ཚང་མས་མཁྱེན་གསལ་ལྟར་རེད་་
་་དེ་ནི་ཁོང་ཚོ་འགྲིག་གི་མི་འདུག་གསུངས་ནས་དམར་པོའི་ཁྲིམས་འོག་ཏུ་འཛུས་པ་ཞིག་གཏན་ནས་མིན་་་་ལ་་་་ཚེ་སྲོག་ལ་དགོས་པ་མི་འདུག་གསུངས་ནས་་་རྒྱ་དམག་གི་མཚོན་ཆའི་མདུན་དུ་མཆོང་བ་ཞིག་ཀྱང་དེ་བས་མ་རེད།
་་་་
་་་་མི་རིགས་ཞིག་ལ་དགོས་པའི་རང་དབང་དང་མི་་་རིགས་ཞིག་འཚོ་གནས་ལ་གང་དགོས་པའི་རེ་འདུན་བཏོན་ནས་རང་གི་གཅེས་ནོར་གྱི་ཚེ་སྲོག་ཤོར་་ཞིང་་བཙོན་ཁང་དུ་ཞུགས་དགོས་བྱུང་སོང་བ་འབའ་ཞིག་ཡིན།
་་་་་
་་་་་རྒྱ་ནག་གཞུང་གིས་རྒྱུག་ཁྱི་རྣམས་བེད་སྤྱོད་བྱེད་སྦྱོར་་་ལོ་གསར་བཀྲ་རྒྱས་པོ་དགོས་པའི་བསྐུལ་མ་ག་ཚད་གནང་གི་མི་འདུག་གམ།
་་་
་་
གཞུང་ཞབས་དེ་འདྲའི་ལག་གང་ལ་འཁེལ་་་་་་གང་ཡིན་ས་ཞིག་ནས་ཤོར་རྒྱུ་རེད་་་་ང་ཚོས་བལྟ་ཆོག་་་་་ནམ་ཡིན་ཡང་འགའ་ཤས་ཤིག་ལ་རང་ཉིད་གཅིག་པུ་ལས་ཅི་མེད་པས་ཁག་པོ་མེད་འགྲོ
ལོ་སར་གྱི་གནས་ཚུལ་་དང་སྤྲགས་བསམ་བློ་གསར་བ་ཞིག་མི་གཏོང་ཐབས་མེད་བྱུང་། སྟོང་ལོ་༨ གྱི་ཞི་རྒོལ་གྱིས་བོད་མི་ཡོད་ཅོག་རྡོག་རྩ་གཅིག་བསྒྲིལ་གྱི་འདུ་ཤེས་རྙེད་ཡོད ། དེ་ནི་རྒྱལ་ཁ་ཞིག་རེད་བསམ་ཡོད ། མྱི་ངན་གྱི་ལོ་ཟླ་ཕར་འདས་སོང་ ། ཡར་བསྐྱར་ལོ་ཟླ་འདི་མྱི་ངན་གྱི་དུས་ཚོད་ཞིག་ལ་ངོས་འཛིན་དགོས་ན་སང་ལོའངལོ་སར་ངོས་འཛིན་ཇི་ལྟར་བྱེད་དགོས
ཧཧཧཧཧཧདགོངས་དག་བྲིས་ནོར་སོང།
གཞུང་འབྲེལ་ཐོག་ནས་བོད་མི་ལ་རྒྱབ་སྐྱོབ་ཡོད་ན་༢༠༠༨ལོར་གཞུང་ཞབས་རྣམས་ཀྱིས་རྒྱ་གཞུང་ལ་ངོ་རྒོལ་མི་བྱས་དོན་ཅི་ཡོད་དམ།་་་ཞེས་བཅོས་རོགས་གནང་།
ག་དུས་ཡིན་ནའང་གཞུང་འབྲེལ་དང་གཞུང་འབྲེལ་མ་ཡིན་པ་ཞེས་གཉིས་གསུངས་ཀྱིན་ཡོད་ལ་ལག་ལེན་ཀྱང་སྟར་གྱིས་ཡོད་པར་རེད།
དཔེར་ན། ༢༠༠༨་ལོར་བོད་མི་ཚང་མས་རྒྱ་ནག་ལ་ངོ་རྒོལ་བྱས་དུས་གཞུང་ཞབས་ལས་བྱེད་པ་ཚོས་རྒྱ་ནག་དམར་པོས་བཀའ་གསུངས་ཇི་བཞིན་རྒྱ་ནག་གཞུང་ལ་ངོ་རྒོལ་བྱས་མེད་པ་རེད།
སྐབས་རེ་གཞུང་འབྲེལ་ཐོག་ནས་བོད་མི་ཚེ་སྲོག་ཤོར་བ་རྣམས་ཀྱི་ཆེད་དུ་ལོ་གསར་གཏོང་གིན་མིན་གསུངས་ཀྱིན་ཡོད་རེད།
གཞུང་འབྲེལ་གྱིས་ཐོག་ནས་བོད་ཕྱི་ནང་གཉིས་ཀྱི་བོད་མི་རྣམས་ཀྱི་འདོད་པ་ལྟར་རྒྱ་ནག་གཞུང་ལ་ཁ་གཏད་ལངས་ཀྱིན་མེད་ལ་དམར་པོའི་རྩ་ཁྲིམས་ལ་སློབ་སྦྱོང་བྱེད་འགོ་རྩམ་ནས་བྱེད་མི་ཆོག་པ་བཞི་ཞེས་བཙན་བྱོལ་སྤྱི་ཚོགས་ནང་དུ་ཁུར་ནས་སླེབས་ཡོད།
ལོ་གསར་གཏོང་མི་གཏོང་ཙམ་གྱིས་བོད་མི་རྣམས་ལ་སེམས་གསོ་ཡོང་ཐབས་མེད་ལ་བོད་མི་རྣམས་ཀྱིས་རྒྱ་ནག་དམར་པོའི་རྩ་ཁྲིམས་ལ་ངོས་ལེན་བྱེད་སེམས་རྩ་བ་ནས་མེད།
གཞུང་འབྲེལ་ཐོག་ནས་བོད་མི་ལ་རྒྱབ་སྐྱོབ་ཡོད་ན་༢༠༠༨ལོར་གཞུང་ཞབས་རྣམས་ཀྱིས་རྒྱ་གཞུང་ལ་ངོ་རྒོལ་བྱས་མི་དོན་ཅི་ཡོད་དམ།
ག་དུས་ཡིན་ཡང་གཞུང་འབྲེལ་དང་གཞུང་འབྲེལ་མ་ཡིན་པ་ཟེར་ནས་བཙན་བྱོལ་བོད་མི་ཁ་གཉིས་ཕྱེ་སྡོད་པ་ཡིན་ན་ཡག་པོ་མི་འདུག་སྙམ།