བློ་བཟང་གིས་རང་གི་ཕ་རྒན་འཇིགས་གྲོལ་ལ། ངེད་གཉིས་ཚེ་ཐོག་འདིར་ཕ་དང་བུ་རུ་གྱུར་བ་རེད། ངས་སྔོན་ཆད་རྒྱ་གར་ནས་ཁྱེད་རང་ལ་ཁ་པར་བཏང་ནས་ཡང་ཡང་དྲིས་པ་དང་། ཁྱེད་ཀྱིས་ང་རང་ལ་ཁས་ལེན་བྱས་པ་ལྟར། ང་རང་ནང་དུ་ལོག་ཡོང་བ་རེད། འོན་ཀྱང་། ད་ཆ་བལྟས་དེ་འོང་དུས། སྐབས་དེར་ཁྱེད་རང་གིས་ང་ལ་ནང་འདིར་དོན་དག་ག་རེ་བྱུང་གི་ཡོད་མེད་སྐོར་གསལ་བོ་མ་བཤད་པ་དེས། དངོས་ནས་ང་རང་གི་དམིགས་ཡུལ་ཞིག་བཟུང་ནས་འོང་བ་དེར་ཆུད་ཟོས་སུ་གྱུར་བ་རེད། ཡིན་ཡང་། ཚེ་ཐོག་འདི་ལ་ད་ནི་ང་རང་སློབ་གྲྭ་ཆེན་མོ་འགྲིམ་མ་ཐུབ་པ་ཐག་གིས་གཅོད་པ་རེད། གལ་སྲིད། སྐབས་དེར་ཁྱེད་རང་གིས་ང་ལ་དྲང་མོ་བཤད་ཡོད་པ་ཡིན་ན། ངས་ཀྱང་གྲྭ་སྒྲིག་ཞིག་བྱས་དེ་འོང་གི་རེད། ད་ནི་ཚར་བ་རེད།
ཕ་རྒན་འཇིགས་གྲོལ་གྱིས། སྐབས་དེར་ངས་ཁྱེད་རང་གི་སེམས་ཁྲལ་བྱེད་རྒྱུར་དོགས་ནས་མ་བཤད་པ་ཡིན་ལ། བཤད་ནས་ཕན་པ་ཡང་མེད་པ་རེད། དེ་ལས་ཁྱེད་རང་ཕྱིར་སླེབས་རེག་བར་དུ་སྒུག་པ་རེད། ལྷག་པར་དུ་ཁྱེད་རང་གི་མ་རྒན་གྱིས་ཀྱང་ང་རང་ལ་ནང་གི་དོན་དག་འདིའི་སྐོར་གཏན་ནས་མ་བཤད་ཟེར་ནས་ཡང་ཡང་བཤད་མཐར་ངས་ཁྱེད་རང་ལ་དོན་དག་ངོ་མ་མི་གསང་ཐབས་མེད་བྱུང་བ་རེད། ཁྱེད་རང་སློབ་གྲྭ་ཆེན་མོ་དེར་འགྲོ་རྒྱུའི་ཕྱོགས་སུ་རེ་བ་མེད་པ་ཆགས་འདུག ནང་དུ་ཡང་བུ་ལོན་མི་ཉུང་བ་ཞིག་འཁོར་ཡོད་པ་དང་། ཁྱེད་རང་གིས་ཕུ་བོས་ཀྱང་ད་དུང་དུས་ཆད་བྱས་པ་ལྟར་ནང་དུ་ལོག་ཡོང་གི་ཡོད་པ་མ་རེད་ལ། བུ་ལོན་དེ་དག་ཡང་ང་རང་གིས་མིང་ཐོག་ནས་རྒྱལ་ཁབ་ལ་{རྒྱ་ནག་ལ་གོ་དགོས}གཡར་ཡོད་དུས། ད་ནི་ཟླ་ངོ་དྲུག་གི་རྗེས་སུ་བུ་ལོན་དེ་དག་ཚང་མ་ཕྱིར་མ་འཕྲོད་པ་ཡིན་ན། ཁང་བ་ལེན་སྲིད་པ་རེད་ཅེས་བཤད།
བློ་བཟང་གིས་ཕ་རྒན་གྱིས་སྐད་ཆ་ཚང་མ་ཉན་རྗེས་སུ། རང་གི་དམིགས་ཡུལ་འགྲུབ་རྒྱུའི་ཕྱོགས་སུ་རེ་བ་གཏན་བྲལ་ཡིན་པ་ཤེས་དེ། ཉིན་མ་ཁ་ཤས་རིང་དུ་དངོས་ནས་འདི་བྱེད་དང་གན་བྱེད་ཀྱི་དམིགས་ཡུལ་མེད་པ་ལྟ་བུ་ཞིག་ཆགས་དེ་ལུས་པ་རེད།
ཉིན་ཞིག་ཁོ་རང་གྲོང་ཁྱེར་དུ་ངོ་ཤེས་རྩོམ་པ་པོ་ཞིག་གི་ནང་དུ་སོང་ནས་ཞག་འདུག་བྱས་པ་དང་། མཚན་མོར་དེར་ཁོ་གཉིས་ཀྱི་བོད་མི་རིགས་ཀྱི་གནད་དོན་སྐོར་ལ་བགྲོ་གླེང་དང་རང་རང་གི་བསམ་ཚུལ་མི་ཉུང་བ་ཞིག་གླེང་བ་དང་ངོ་ཤེས་རྩོམ་པ་པོ་དེ་ཡིས་བློ་བཟང་ལ། ཁྱེད་རང་ལ་འདོད་པ་ཡོད་ན་ངེད་གཉིས་མཉམ་འབྲེལ་བྱས་ནས་གྲོང་ཁྱེར་འདི་ནས་ཟ་ཁང་ཞིག་འཛིན། དེ་ནས་ལོ་འདིའི་ནང་དུ་ཁྱེད་ཀྱིས་ཀྱང་གྲྭ་སྒྲིག་ཞིག་བྱོས་དང་། ངས་ཀྱང་ལོ་མང་་རིང་དུ་གཉར་བའི་རྩོམ་ཡིག་ཁག་གཅིག་ཕྱོགས་སྒྲིག་བྱས་དེ་གཉར་ཡོད། དཔེ་རྟགས་ཤིག་རེག་ས་རེད། འུ་གཉིས་ཀྱིས་ལྷན་དུ་ད་ལོ་དེབ་རེ་དཔར་སྐྲུན་བྱོས་ན་ཞེས་བཤད།
བློ་བཟང་གིས་རང་གི་ངོ་ཤེས་དེ་ཡི་སྐད་ཆ་ལ་གདེང་འཇོག་དང་བཅས། ང་རང་ལ་ད་དུང་དེབ་ཅིག་དཔར་རྒྱུའི་ཆུ་ཚད་གང་ཡང་སླེབས་ཡོད་པ་མ་རེད་ལ། འགྲོ་སོང་གི་ཐད་ནས་ཀྱང་དངོས་ནས་དཀའ་ངལ་ལ་ཐུག་ཡོད། ང་རང་གི་དམིགས་ཡུལ་ངོ་མ་ནི་ངས་གོང་དུ་ཁྱེད་རང་ལ་བཤད་པ་ལྟར་རེད། ཡིན་ཡང་ཟེར་ཞོར་ཝུ་ཆང་གི་ཤེལ་ཕོར་ཡར་བཀྱག་ནས་འཐུང་འཐུང་ཞེས་བཤད།
མཚན་མོ་དེ་ནི་དངོས་ནས་བློ་བཟང་ཕྱིར་རང་ཡུལ་དུ་ལོག་ནས་ཟླ་ངོ་གཅིག་སོང་བའི་རིང་གི་སྐྱིད་ཤོས་དེ་ཡིན་ཟེར་ན་གཏན་ནས་མི་འགྲིག་པ་མེད། ཞོགས་པ་སྔ་བོ་ཁོ་རང་འགྲོ་ཁར། ངོ་ཤེས་དེར་ངས་བསམ་བློ་གཏོང་ཆོག ཁྱེད་རང་གིས་བཤད་པ་ལྟར། དངོས་ནས་རང་ས་ནས་བསྡད་དེ་ལས་ཀ་བྱེད་རྒྱུ་དེ་ནི་གལ་ཆེན་པོ་ཡིན་པར་ངས་ཀྱང་རྟག་དུ་འདོད་ཀྱི་ཡོད་ལ། ཁྱེད་རང་གི་བསམ་ཚུལ་དེར་ངས་རྒྱབ་སྐྱོར་ཡང་ཡོད། འོན་ཀྱང་། ང་ནི་ད་ལྟའི་བར་དུ་ཡར་ལ་གོམ་ནས་འདི་ནས་གསར་དུ་རྐང་བ་འཛུགས་དགོས་དུས། ལས་སླ་བོ་ཞིག་མེད་པ་དང་། འདི་ཁུལ་ནས་གཉེན་རྟོགས་པ་དེ་ཚོས་ཀྱང་དཀའ་ལས་བཟོ་མི་སྲིད་པ་མིན། གང་ལྟར། འུ་གཉིས་ཀྱིས་ག་ལེར་འབྲེལ་བ་བྱེད་ཆོག་གི་རེད། ཉིན་ཁ་ཤས་ཀྱི་རྗེས་སུ་ང་རང་ཁྱེད་རང་ཡོད་སར་བཅར་ངེས་ཡིན་ཟེར་བཞིན་སྒོ་འགྲམ་གྱི་རྐང་འཁོར་ལ་ཞོན་ནས་རང་གི་སྡེ་བའི་ཕྱོགས་སུ་ཕྱིན།
བློ་བཟང་ནང་དུ་སླེབས་མ་ཐག ཕ་རྒན་གྱིས། ཨ་རོགས་ཁྱེད་རང་ལ་འདང་དགོང་བུད་མེད་ཅིག་གིས་ཁ་པར་ཐེངས་མ་ཁ་ཤས་ཤིག་ལ་སླེབས་སོང་། ཁོ་མོས་ཁྱེད་རང་ལ་ཁ་པར་ཨང་གྲངས་འདིས་སྟེང་ནས་ཁ་པར་ཞིག་རྒྱོབས་ཟེར། བུད་མེད་དེ་ནི་ཉིན་མ་འདི་ཚོའི་རིང་དུ་ཁྱེད་རང་ལ་ཁ་པར་ཡང་ཡང་སླེབས་ཀྱི་འདུག བུད་མེད་དེ་ཁྱེད་རང་དང་ལྷན་དུ་ཡར་ནས་ཡོང་བ་ཡིན་ནམ་ཞེས་དྲིས།
བློ་བཟང་གིས། ཨ་ཕ། མིན། ཁོ་མོ་ང་རང་དང་ལྷན་དུ་རྒྱ་གར་ནས་ཡོང་བ་མིན། ལྷ་ས་ནས་མར་ཡོང་རོགས་ཡིན། ད་ང་རང་ཕ་ཡུལ་ནས་བསྡོད་དགོས་བྱུང་བ་ཡིན་ན། ཁོ་མོ་དང་ལྷན་དུ་བཟའ་ཚང་བྱེད་འདོད་ཡོད། ཁྱེད་རང་གིས་བལྟས་པ་ཡིན་ན་ག་འདྲ་འདུག གལ་སྲིད། མོ་རང་དང་ལྷན་དུ་གཉེན་སྒྲིག་བྱེད་མ་ཐུབ་པ་ཡིན་ན། ང་རང་འདི་ནས་མི་བསྡོད་ལ། ཕྱིར་ཡར་ལ་འགྲོ་རྒྱུ་ཡིན། དེ་ལ་ཁྱེད་རང་གིས་མོས་མཐུན་བྱེད་ཐུབ་ཀྱི་འདུག་གམ་ཞེས་བཤད།
ཕ་རྒན་གྱིས། ཁྱེད་རང་གིས་རང་གི་བཟའ་ཚང་བཙལ་བ་དེར་ང་རང་ལ་མི་འཐད་རྒྱུ་མེད། ཡིན་ཡང་། ལམ་ཐག་ཐུང་ཐུང་དེ་འདྲ་ཞིག་ལ་འགྲོག་ནས་བུད་མེད་ག་འདྲ་ཞིག་ཡིན་མིན་གཏན་ནས་ཤེས་ནི་མ་རེད། དེ་ཡིན་དུས། དངོས་ནས་ཁྱེད་རང་མོ་དང་བཟའ་ཚང་བྱེད་འདོད་ཡོད་ན་ནི་ཁྱེད་རང་གིས་ལྟོས་ཞེས་ལག་ནང་གི་ཁ་པར་ཨང་གྲངས་དེ་བློ་བཟང་ལ་སྤྲད།
བློ་བཟང་གིས། ཁོ་མོར་མངལ་ཆགས་འདུག ངས་ངོ་མ་བྱིས་པ་ཆགས་ཟིན་པའི་བུད་མེད་ཅིག་ལ་ཁྲེལ་མེད་བྱེད་ན་མི་འདོད་ཀི་ཟེར་ནས་བཤད་དུས།
ཕ་རྒན་འཇིགས་གྲོལ་གྱིས། སྣང་དོགས་ཙམ་ཡང་མི་བྱེད་པར། དེང་སང་གི་བུད་མེད་ཚོས་རང་གི་བློར་འབབ་སོང་བ་ཡིན་ན་འགུག་ཐབས་ལ་དེ་འདྲ་ཟེེར་ནི་རེད། ཁྱེད་གཉིས་འགྲོག་ཡུན་ཡང་རིང་བོ་མ་རེད། ལྷག་པར་དུ་བུད་མེད་དེ་ཡི་རིགས་ལ་ཡིད་ཆེས་བྱེད་རྒྱུ་ཁག་པོ་ཡིན་ནི་རེད། འོན་ཀྱང་། ཁྱེད་རང་གིས་འདོད་པ་རེད། དངོས་ནས་ཁོ་མོ་དང་འགྲོག་འདོད་ཡོད་ན་ནི། ང་རང་སོང་ནས་ཨ་ལགས་ཚང་ལ་ཕྱག་མོ་ཞིག་བཏབ་ན་ག་འདྲ་འགྲིག་འདུག ད་ལྟའི་བར་དུ་ཁྱེད་རང་ཡར་འགྲོ་མར་འགྲོ་གང་གི་སྐབས་སུ་ཡང་ཁོང་ཚང་གི་ཕྱག་མོ་བཏབ་པ་དེ་ཐུག་་པོ་བྱུང་བ་རེད། ཕྱག་མོ་ཡག་་པོ་འདྲ་ཡིན་ན་རང་གིས་འདོད་པ་བྱོས། ཕྱག་མོ་ཡག་པོ་མ་བྱུང་བ་ཡིན་ན། ད་ཁྱེད་རང་གིས་བསམ་བློ་གཏོང་།
བློ་བཟང་གིས་ཀྱང་རང་གི་ཕ་རྒན་གྱི་སྐད་ཆ་དེར་མོས་མཐུན་བྱས་པ་དང་། ཁ་པར་ཨང་གྲངས་དེ་ཁུར་ནས་ཁང་བའི་ནང་གི་ཁ་པར་ཡོད་སའི་འགྲམ་གྱི་རྐུབ་སྟེགས་སྟེང་བསྡད་ནས་བན་སྡེ་འཚོས་སྤྲད་པས་ཁ་པར་ཨང་གྲངས་དེ་བསྣན། ཏུར་་་་་ཏུར་་་་
ཨ་རོགས་ཁྱེད་རང་སུ་ཡིན།
མུ་འགོད།
ཁྱེད་ཚོ་ཀློག་དུ་ཕེབས་པ་དགའ་ཡོད།
ཡག་པོ་འདུག་སྙན་པོ་འདུག་་་་་་་་་ཐུགས་རྗེ་ཆེ།
ཞིབ་ཏུ་ཀློག་ཚར་ཡིན། ཡག་པོ་བྲིས་འདུག
ཤ་ཁྲག་ལགས་བཀླགས་ཟིན་པ་ཡིན།
ཡ་་་་བསོད་བདེ་ཆེ་བ་ལ། ལེའུ་འདི་ཀློག་མཁན་ཐོག་མ་དེ་ང་རང་ཡིན་འདུག
ཞིབ་མོ་ཞིག་ཀློག་གི་ཡིན། བཀའ་དྲིན་ཆེ།