སུད་སིའི་ནང་བོད་དོན་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་འདུག

ཉིན་གྲངས་བདུན་གྱི་རིང་སུད་སིའི་རྒྱལ་ས་བྷན་ནས་ཛུ་རིག་བར་བོད་དོན་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་འདུག

སུད་སིའི་རྒྱལ་ས་བྷན་ནས་ཛུ་རིག་བར་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་པ། ༢༠༢༦།༣།༤ འབྲེལ་ཡོད་ཀྱིས་པར་མཁོ་སྤྲད་བྱས།གསུམ་བཅུའི་དུས་དྲན་ཐེངས་ ༦༧ པ་བསླེབས་ལ་ཉེ་བ་དང་བསྟུན། ཁ་སང་ཕྱི་ཚེས་ ༤ ནས་ ༡༠ བར་ཉིན་གྲངས་བདུན་གྱི་རིང་སུད་སི་དང་ལེག་ཏན་སིཊ་ཡན་བོད་རིགས་མི་མང་ཚོགས་པའི་གོ་སྒྲིག་འོག སུད་སིའི་རྒྱལ་ས་བྷན་ (Bern) ནས་ཛུ་རིག་བར་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་གནང་འདུག་ལ། ད་ལན་གྱི་ལས་འགུལ་ཁྲོད་ཨ་རིའི་བོད་ཀྱི་སྐུ་ཚབ་དོན་གཅོད་ཟུར་པ་དབུ་དཀར་ཚང་སྐལ་བཟང་རྡོ་རྗེ་ལགས་གཙོས་པའི་བོད་མི་ ༡༥ ཙམ་གྱིས་མཉམ་ཞུགས་གནང་འདུག

ཞི་བའི་གོམ་བགྲོད་ཀྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སུད་སི་གྲོས་ཚོགས་འཐུས་མི་ལྕམ་ཁེ་ཐི་རི་ན་ (Katharina Prelicz-Huber) ལགས་དང་། དམིགས་བསལ་སྐུ་མགྲོན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། དེ་བཞིན་རི་ཀོན་ཆོས་འཁོར་དགོན་ (Rikon Monastery) གྱི་མཁན་རིན་པོ་ཆེ། སེར་སྐྱ་མི་མང་སོགས་འདུ་འཛོམས་གནང་འདུག་ལ། སུད་སིའི་རྒྱལ་ས་བྷན་ནས་སུད་སིའི་གྲོང་སྡེ་ཨོལ་ཊན་ (Olten) དང་། དེ་ནས་གྲོང་སྡེ་ཨ་རའོ་ (Aarau) ནས་ཨོལ་སི་ཊེ་ཊེན་ (Altstetten)། མཐར་ཛུ་རིག་ཏུ་ཕྱིན་ཏེ་ལས་འགུལ་མཇུག་སྒྲིལ་རྒྱུ་ཡིན་འདུག

ཐེངས་འདིའི་ལས་འགུལ་གྱི་དམིགས་གཙོ་བོ་ནི་བོད་དོན་བདེན་མཐའ་གསལ་རྒྱུ་དང་བོད་རང་དབང་གི་ཆེད་དུ་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་ཡོད་པ་དང་། རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་དང་། བོད་ནང་གི་བཅའ་སྡོད་སློབ་གྲྭ། ཁྲིམས་འགལ་ཐོག་གསེར་གྱི་གཏེར་ཁ་སྔོག་འདོན་བྱས་པའི་ལས་གཞི་དེ་དག་འཕྲལ་དུ་མཚམས་འཇོག་དགོས་པའི་དགོས་འདུན་བཏོན་འདུག དེ་བཞིན་གསུམ་བཅུའི་དུས་དྲན་ཉིན་མི་མང་མང་པོ་འཛོམས་ཏེ་རྒྱ་ནག་གཞུང་ཚབ་ཁང་གི་མདུན་ངོ་རྒོལ་སྐད་འབོད་ཀྱི་ལས་འགུལ་སྤེལ་རྒྱུ་ཡིན། ཞེས་བརྗོད་བྱུང་།

སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། ཞི་བའི་གོམ་བགྲོད་ཀྱི་ལས་འགུལ་དེའི་གོ་སྒྲིག་ཚོགས་ཆུང་དང་མཉམ་ཞུགས་པ་རྣམས་ལ་དང་བླངས་ཀྱི་ཐོག་ནས་༸རྒྱལ་བའི་གོ་སྟོན་གྱི་བྱམས་བརྩེའི་ལོ་སྲུང་གཙི་དང་བསྟུན། ཞི་བའི་གོམ་བགྲོད་ཀྱི་ལས་འགུལ་སྤེལ་བར་བསྔགས་བརྗོད་དང་། ལས་འགུལ་དེ་ལམ་ལྷོངས་ཡོང་བར་བོད་མི་ཡོངས་ནས་རྒྱབ་སྐྱོར་གནང་དགོས་པའི་འབོད་སྐུལ་ཞུས་ཡོད་འདུག་ལ། ལས་འགུལ་དེ་བོད་ནང་ཡོད་པའི་བོད་མི་རྣམས་དང་བོད་དོན་བདེན་མཐའ་གསལ་བའི་ཆེད་དུ་ལས་འགུལ་སྤེལ་གྱི་ཡོད་པ་ནམ་ཡང་བརྗེད་རྒྱུ་མེད་པའི་དྲན་སྐུལ་ཞུས་འདུག

སུད་སི་གྲོས་ཚོགས་འཐུས་མི་ལྕམ་ཁེ་ཐི་རི་ན་ལགས་ཀྱིས། སུད་སིའི་ནང་ཡོད་པའི་བོད་མི་རྣམས་ཀྱིས་ཆོས་ལུགས་དང་བོད་མིའི་རང་དབང་གི་ཆེད་དུ་ཞི་བའི་གོམ་བགྲོད་ཀྱི་ལས་འགུལ་སྤེལ་བར་འབྲེལ་ཡོད་རྣམས་ལ་ཐུགས་རྗེ་ཆེ་ཞུས་པ་དང་། ༸གོང་ས་རྒྱལ་བ་རིན་པོ་ཆེ་མཆོག་གིས་ངོས་འཛིན་མཛད་པའི་ཆོས་ལུགས་ཀྱི་སྲོལ་རྒྱུན་ཁག་ལ་གུས་ཞབས་བྱས་པ་དང་། ཁོང་ཚོའི་མཐུན་སྒྲིལ་ལ་བསྔགས་བརྗོད་ཞུ་ཡི་ཡིན། ཞེས་གསུངས་འདུག

སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པས་གསར་འགོད་བསྒྲགས་གཏམ་ཞིག་སྤེལ་བའི་ནང་། སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་བོད་མི་དང་མཉམ་དུ་ཡོད། ཅེས་དང་། འདས་པའི་ལོ་ངོ་ ༦༧ རིང་རྒྱ་ནག་གཞུང་གིས་དྲག་པོའི་སྲིད་ཇུས་འདྲ་མིན་ལག་བསྟར་བྱས་ཏེ་བོད་ཀྱི་རིག་གཞུང་དང་། སྐད་ཡིག་སོགས་རྩ་མེད་གཏོང་ཐབས་བྱེད་བཞིན་ཡོད་ལ། བོད་ཕྲུག་ས་ཡ་གཅིག་ཙམ་ཕ་མ་དང་ཁ་བྲལ་དུ་བཅུག་ནས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲད་དེ་བོད་ཀྱི་ངོ་བོ་དང་རིག་གཞུང་སོགས་རྩ་མེད་གཏོང་གི་ཡོད་སྐོར་དང་། དིང་རི་རྫོང་དུ་ས་ཡོམ་ཤུགས་ཆེན་བརྒྱབ་ཡོད་ཀྱང་། རྒྱ་གཞུང་གིས་བོད་ནང་ཆུ་རགས་གསར་རྒྱག་མུ་མཐུད་བྱེད་མུས་ཡིན་སྐོར། རྒྱ་ནག་གི་དྲག་གནོན་སྲིད་ཇུས་ལ་ངོ་རྒོལ་དང་བོད་མིའི་རང་དབང་གི་ཆེད་དུ་ལས་འགུལ་སྤེལ་བར་ཡི་རངས་བསྔགས་བརྗོད་དང་། རྒྱ་གཞུང་གིས་བོད་ནང་གི་བོད་མི་དང་ཡུ་གུར་བ་རྣམས་ལ་ལྟ་སྲུང་ནན་པོ་བྱེད་ཀྱི་ཡོད་པ་དང་། སུད་སིའི་ནང་ཡོད་པའི་བཙན་བྱོལ་བོད་མི་རྣམས་ལ་རྒྱལ་མཚམས་ལས་བརྒལ་བའི་དྲག་གནོན་སྤེལ་བཞིན་ཡོད་པར་དགག་པ་ཡོད་སྐོར། བོད་མིའི་རང་དབང་དང་ཞི་བའི་ལས་འགུལ་སྤེལ་བར་རྒྱབ་སྐྱོར་མུ་མཐུད་དུ་བྱ་རྒྱུ་ཡིན་པ་དང་། རྒྱ་གཞུང་གིས་བོད་ནང་དྲག་གནོན་གྱི་སྲིད་ཇུས་དང་བོད་ཀྱི་ངོ་བོ་དང་རིག་གཞུང་སོགས་རྩ་མེད་གཏོང་ཐབས་བྱེད་བཞིན་པར་སེམས་འཚབ་ཡོད་ལ། རྒྱནག་གིས་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཐད་ཐེ་ཇུས་བྱེད་བཞིན་པར་དགག་པ་ཡོད་སྐོར་སོགས་ཡོངས་བསྒྲགས་གནང་འདུག

གསར་འགོད་པ། བསྟན་འཛིན་ཕུར་བུ།