བཙན་བྱོལ་ནང་གི་བོད་ཀྱི་བརྡ་སྤྲོད་ལ་ཆེད་མཁས་མི་སྣ་དྲུག་གདན་འདྲེན་ཞུས་ཏེ་སྨོན་ལམ་ཚིག་མཛོད་ཆེན་མོའི་བརྡ་སྤྲོད་དང་རྩོམ་སྒྲིག་སྐོར་ལ་བགྲོ་གླེང་ཚོགས་འདུ་འཚོག་གི་འདུག
ཁ་སང་ཕྱི་ཚེས་ ༤ དང་ ༥ ཉིན་གཉིས་རིང་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་བཀྲ་ཤིས་ཁང་གསར་དུ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག སྨོན་ལམ་ཚིག་མཛོད་ཆེན་མོ་དང་འབྲེལ་བའི་བགྲོ་གླེང་ཚོགས་འདུ་ཐེངས་བརྒྱད་པ་འཚོགས་ཡོད་འདུག་ལ། སྐབས་དེར་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་འགན་འཛིན་མཁན་པོ་འཇུ་བསྟན་སྐྱོང་ལགས་དང་། ཝཱ་ར་ཎ་སིའི་བརྡ་སྤྲོད་དགེ་རྒན་འབུམ་རམས་པ་ལྷག་པ་ཚེ་རིང་ལགས། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་བརྡ་སྤྲོད་དགེ་རྒན་འབུམ་རམས་པ་ཤེལ་དཀར་བློ་བཟང་དངོས་གྲུབ་ལགས། སཱ་ར་མཐོ་རིམ་སློབ་གཉེར་ཁང་གི་སློབ་དཔོན་ཆེན་མོ་བསོད་ནམས་རྒྱལ་མཚན་ལགས། བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ཟུར་པ་ན་ག་སངས་རྒྱས་བསྟན་དར་ལགས། ཀིརྟིའི་བྱེས་པ་གྲྭ་ཚང་གི་སློབ་དཔོན་ཀིརྟིའི་དྲུང་ཡིག་འབྲིང་བ་དཀོན་མཆོག་འཇིགས་མེད་ལགས་བཅས་མཉམ་ཞུགས་ཀྱིས་རྩོམ་ཤོག་དང་འབྲེལ་ཏེ་བགྲོ་གླེང་གསུང་བཤད་གནང་ཡོད།
དེ་རིང་འདི་གའི་གསར་འགོད་པས་ཁ་པར་བརྒྱུད་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ཚིག་མཛོད་འཛིན་སྐྱོང་འགན་འཛིན་དགེ་བཤེས་འཇམ་དབྱངས་ཚུལ་ཁྲིམས་ལགས་སུ་བགྲོ་གླེང་ཐོག་གནད་དོན་གཙོ་བོ་ག་རེའི་སྐོར་བགྲོ་གླེང་གནང་ཡོད་དྲིས་པར་ཁོང་གིས། ད་ལན་གྱི་བགྲོ་གླེང་ནང་བརྡ་སྤྲོད་སྐོར་གླེང་སློང་བྱེད་ཀྱིན་ཡོད་པ་དང་། ང་ཚོས་ཚིག་མཛོད་ཆེན་མོ་རྩོམ་སྒྲིག་ལག་བསྟར་བྱེད་པའི་སྐབས་ཚིག་སྦྱོར་སྟངས་ཀྱི་རྣམ་པའི་ཐོག་ནས་ཚིག་ཁ་ཤས་ལ་བརྡ་སྤྲོད་ཀྱི་དབྱེ་བ་འབྱེད་དགོས་ཀྱི་ཡོད་པར་བརྟེན། བརྡ་སྤྲོད་ཀྱི་ཁུངས་ག་རེ་ཡིན་མིན་དབྱེ་བ་གསལ་པོ་འབྱེད་མི་ཐུབ་པའི་དཀའ་ངལ་འཕྲད་ཀྱི་ཡོད་པར་སོང་། བཙན་བྱོལ་ནང་གི་བརྡ་སྤྲོད་ཀྱི་ཆེད་ལས་མི་སྣ་ཁག་ཅིག་གདན་འདྲེན་ཞུས་ཏེ་བརྡ་སྤྲོད་ཀྱི་དཀའ་གནད་འགའ་ཞིག་གི་སྐོར་ལ་བགྲོ་གླེང་བྱེད་ཀྱི་ཡོད། ཅེས་བརྗོད་བྱུང་།
རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་གི་བཀྲ་ཤིས་སྒོ་མང་ཁང་གསར་དུ་སྨོན་ལམ་ཚིག་མཛོད་ཆེན་མོ་དང་འབྲེལ་བའི་བགྲོ་གླེང་ཚོགས་འདུ་ཐེངས་བརྒྱད་པ་འཚོག་བཞིན་པ། ༢༠༢༦།༣།༥ པར་འབྲེལ་ཡོད་ཀྱིས་མཁོ་སྤྲོད་བྱས།ད་ལན་གྱི་སྨོན་ལམ་ཚིག་མཛོད་ཆེན་མོ་དང་འབྲེལ་བའི་བགྲོ་གླེང་ཐོག་སྔ་དྲོར་བརྡ་སྤྲོད་ཐོག་ཆེད་ལས་མཁས་པ་རྣམས་ཀྱིས་བརྡ་སྤྲོད་སྐོར་བགྲོ་གླེང་བྱས་པ་དང་། ཕྱི་དྲོར་རྩོམ་སྒྲིག་པ་ནང་ཁུལ་ནས་རྩོམ་སྒྲིག་བྱེད་ཕྱོགས་སྐོར་ལ་དཀའ་ངལ་ག་རེ་འཕྲད་ཀྱི་ཡོད་པའི་སྐོར་ལ་བགྲོ་གླེང་བྱེད་ཀྱི་ཡོད་འདུག
སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་ཇོ་ནང་དང་། གཡུང་དྲུང་བོན་གཙོ་བོར་གྱུར་པའི་ཤེས་ཡོན་གྱི་ཚོགས་སྡེ་མི་འདྲ་བའི་རྩོམ་སྒྲིག་སྡེ་ཚན་ ༣༥ ཡི་རྩོམ་སྒྲིག་པ་ ༢༠༠ ལྷག་གིས་ལོ་ངོ་དགུའི་རིང་འབད་བརྩོན་གནང་སྟེ་རྩོམ་སྒྲིག་ཚར་བའི་སྨོན་ལམ་ཚིག་མཛོད་ཆེན་མོ་པོད་ ༢༢༣ ལེགས་གྲུབ་བྱུང་སྟེ། ཕྱི་ལོ་ ༢༠༢༢ ཟླ་ ༥ ཚེས་ ༢༧ ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་དབུ་འབྱེད་མཛད་པ་དང་། འདས་ལོའི་ཕྱི་ཟླ་ ༡༡ ཚེས་ ༣ ཉིན་ཁ་པར་དང་གློག་ཀླད་སོགས་ལ་བཀོལ་ཆོག་པའི་མཉེན་ཆས་གསར་སྐྲུན་གྱིས་རིན་མེད་འགྲེམས་སྤེལ་གནང་ཡོད་པ་རེད། དེ་བཞིན་ད་ལྟའི་ཆར་སྨོན་ལམ་རིག་ནུས་དང་། སྨོན་ལམ་བརྡ་མཛོད་ཆེན་མོ། སྨོན་ལམ་ཚིག་མཛོད་ཆེན་མོ་བཅས་ཀྱི་ཐོག་ལ་ལས་དོན་བྱས་དང་བྱེད་མུས་ཡིན་པ་མ་ཟད། ཐོག་མའི་དམིགས་ཡུལ་བཞིན་བོད་ཀྱི་སྐད་ཡིག་དུས་རབས་དང་མཐུན་པའི་རྒྱུན་འཛིན་དར་སྤེལ་གཏོང་བར་ལས་དོན་སྤེལ་མུས་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
