པེ་ཅིན་གྱི་འབྲེལ་མོལ་ཕམ་ཡང་། རེ་བ་ལ་འོད་ཟེར་འཕྲོས་འདུག

ཁུ་ལོ་ཌེ་ ཨར་པེ། རིག་འཛིན་ལྷུན་གྲུབ་ཀྱིས་བསྒྱུར།

༧གོང་ས་ཏཱ་ལའི་བླ་མའི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་དང༌། ཁོང་གི་ཕྱག་རོགས་རྣམས་ཉེ་ཆར་པེ་ཅིང་དུ་ཕེབས་ཏེ་རྒྱ་ནག་དབུས་དམར་ཤོག་ཚོགས་པའི་འཐབ་ཕྱོགས་གཅིག་གྱུར་གྱི་ལས་བྱེད་རྣམས་དང་ཐུག་འཕྲད་གནང་ཡོད། གྲོས་མོལ་སྐབས་དམིགས་བསལ་གྲུབ་འབྲས་གང་ཡང་བྱུང་མེད། ཡིན་ཡང་། དེ་ནི་རེ་ལྟོས་བྱེད་ས་དེ་ཡིན།

ཕྱི་ལོ་ ༡༩༨༠ གྱ་གྲངས་ཀྱི་མགོ་སྟོད་ནས་བཟུང་༧གོང་ས་ཏཱ་ལའི་བླ་མས་བསྟུད་མར་པེ་ཅིང་ལ་གྲོས་མོལ་སླད་སྐུ་ཚབ་བཏང་གནང་མཛད་ཀྱང་དམིགས་ཡུལ་ཆུང་ངུ་རེའམ་ཡང་ན་ཅི་ཡང་འགྲུབ་མེད། ལོ་འདི་དག་གི་རིང་། རྒྱ་ནག་གིས་མདུན་ཅོག་ཐོག་བརྗོད་གཞི་གཅིག་ཁོ་ན་འཁྱེར་བ་ནི་༧གོ་ས་ཏཱ་ལའི་བླ་མ་སྐུ་སྒེར་གྱི་གནས་བབ་རེད། ཕྱི་ལོ་ ༡༩༨༠ གྱ་གྲངས་ནང་དེར་ཁོང་གིས། ཁོང་གི་ཐུགས་འདུན་ནི་བོད་མི་ས་ཡ་དྲུག་གི་ལས་དབང་ཡིན་པ་ལས་རང་གི་གོ་གནས་ཆེད་མིན་ཚུལ་གསལ་བཤད་གནང་ཡོད།

ཕྱི་ལོ་ ༡༩༨༡ ལོའི་ཟླ་ ༧ པའི་ནང་རྒྱ་ནག་དམར་ཤོག་སྤྱི་ཁྱབ་དྲུང་ཆེ་སྐུ་ཞབས་ཧུའི་ཡོ་པང་གིས་སྐུའི་གཅེན་པོ་རྒྱ་ལོ་དོན་གྲུབ་ལ་པེ་ཅིང་གིས་གྲོས་མོལ་བྱ་རྒྱུར་གྲ་སྒྲིག་ཡོད་པ་དང༌། “ཏཱ་ལའི་བླ་མ་དང་ཁོང་གི་སྐུ་ཚབ་རྣམས་ཀྱིས་གཡས་སྐོར་གཡོན་སྐོར་མེད་པར་དབུས་གཞུང་ལ་ལྷག་བསམ་རྣམ་དག་དང་ཁ་གསང་པོ་བྱེད་དགོས”ཞེས་བརྗོད།

དེ་དུས་རྒྱ་ནག་དབུས་འགོ་ཁྲིད་ཚོས་དམིགས་ས་གཙོ་བོ་ནི་༧གོང་ས་ཏཱ་ལའི་བླ་མ་ཕྱིར་མེས་རྒྱལ་དུ་ལོག་ཕེབས་རྒྱུ་དེ་རེད། ཧུའུ་ཡོ་པང་གིས། གྲོས་མོལ་འདི་ནི་རྒྱ་ནག་གི་གཅིག་སྒྲིལ་གོང་སྤེལ་དང་། ཧན་མི་རིགས་དང་བོད་མི་རིགས་བར་ལ་མཐུན་འབྲེལ་དམ་ཟབ་ཀྱི་མཐུན་འགྱུར་བསྐྲུན་པའི་རེ་བའི་རྨང་གཞིར་བརྟེན་པ་ཡིན་ཞེས་དང༌། དམིགས་བཀར་གྱིས་བོད་ཀྱི་དབུ་ཁྲིད་མཆོག་གིས་ཆབ་སྲིད་ཀྱི་གནས་བབ་དང་འཚོ་བའི་གནས་སྟངས་ཐད་ལྔ་བཅུ་ང་དགུའི་སྔོན་དང་གཅིག་མཚུངས་རོལ་ཆོག འོན་ཀྱང༌། ཁོང་ཉིད་པེ་ཅིང་རང་དུ་བཞུགས་དགོས་ཞེས་དང་། “ཡིན་དང་ཡིན། ཁོང་དུས་ནས་དུས་སུ་བོད་དུ་ཕེབས་ཆོག་”ཅེས་བརྗོད་ཡོད། སྟབས་མ་ལེགས་པ་ཞིག་ལ་གྲོས་མོལ་མུ་མཐུད་ནས་བྱེད་ཐུབ་མེད་པ་དང༌། ཕྱི་ལོ་ ༡༩༨༥ ལོར་བོད་ཀྱི་དབུ་ཁྲིད་རང་ཡུལ་དུ་ཕེབས་རྒྱུར་རྒྱ་ནག་དབང་འཛིན་པས་ཆོག་མཆན་སྤྲད་མེད།
    
ལོ་ངོ་ ༣༠ ཙམ་གྱི་རྗེས་ང་ཚོ་གང་དུ་ཡོད་དམ། ཕྱི་ལོ་ ༢༠༠༢ ལོ་ནས་བཟུང་བོད་ཀྱི་སྐུ་ཚབ་ཚོས་རྒྱ་ནག་ནང་དུ་མངོན་སུམ་གྱིས་བཟང་ཕྱོགས་འགྱུར་བ་མེད་པའི་ཚོགས་འདུ་ཐེངས་བརྒྱད་དང༌། སུད་སིར་གཅིག་འཚོགས་པ་རེད།

དེང་སྐབས་རྒྱ་ནག་ནི་སྟོབས་ཆེན་རྒྱལ་ཁབ་ཅིག་ཏུ་གྱུར་ཟིན་པ་མ་ཟད་འཛམ་གླིང་ནང་དཔལ་འབྱོར་ཨང་གཉིས་པ་ཡང་ཆགས་ཡོད། པེ་ཅིང་གིས་གཟི་བརྗིད་ལྡན་པའི་ངང་རྒྱལ་སྤྱིའི་ཨོ་ལིམ་པིག་རྩེད་འགྲན་བསྐོངས་འཚོགས་བྱས་ཤིང་། ད་སྐབས་རྒྱལ་སྤྱིའི་དཔལ་འབྱོར་ཉམས་རྒུད་ཀྱི་དཀའ་སྙོག་ལ་གསོན་ཤུགས་སྦྱིན་མཁན་ཡིན་མ་ཟད་འཛམ་གླིང་གི་དཔལ་འབྱོར་སླར་གསོའི་ཐད་ཁ་ཚ་དགོས་གཏུག་གིས་དོ་འཁུར་བྱ་མཁན་ཞིག་ཡིན་པར་ངོས་འཛིན་བྱེད་ཀྱིན་ཡོད། རྒྱ་ནག་ལ་ཧང་སང་བའི་འཕོ་འགྱུར་འདི་དག་བྱུང་བར་མ་ལྟོས་པར་༧གོང་ས་ཏཱ་ལའི་བླ་མ་ནི་རང་འཇགས་སུ་པེ་ཅིང་གི་འགོ་ཁྲིད་ཚོར་མགོ་ཡི་ན་ཟུག་ཆེ་ཤོས་སུ་ལུས་ཡོད།

འདས་ཟིན་པའི་ལོ་འདི་དག་གི་ནང་རྒྱ་ནག་གི་ལངས་ཕྱོགས་ནི་ཇེ་མཁྲེགས་སུ་འགྲོ་བཞིན་ཡོད། དེང་གི་ཆར་རྒྱ་ནག་དམར་ཤོག་ཚོགས་པའི་འགོ་ཁྲིད་ཚོས་བོད་ཀྱི་དབུ་ཁྲིད་ཀྱི་མཚན་ཙམ་ཡང་ཐོས་འདོད་མེད་ཅིང་། ཁོ་ཚོས་གོ་མི་འདོད་མཁན་དེར་”ཁ་བྲལ་པ་”ཞེས་འབོད་ཀྱིན་ཡོད། རྒྱ་རི་བློ་གྲོས་རྒྱལ་མཚན་གྱི་གཏམ་རོགས་ཀྲུང་དབྱང་འཐབ་ཕྱོགས་གཅིག་འགྱུར་ལས་ཁུངས་ཀྱི་བློན་ཆེན་གཞོན་པ་ཀྲུའུ་ཝེ་ཆུན་གྱིས་༧གོང་ས་ཏཱ་ལའི་བླ་མས་བོད་མིའི་”སྐུ་ཚབ་མཚོན་གྱི་མེད་”ཅེས་ཟེར།

རྒྱ་རི་བློ་གྲོས་རྒྱལ་མཚན་རྒྱ་གར་ལ་ཕྱིར་ལོག་ཕེབས་ཏེ་ཡོངས་ཁྱབ་ཀྱིས་བསྒྲགས་གཏམ་དེར་དགག་བྱ་གནང་ཡོད། “དེ་ནི་ཁས་ལེན་ཐབས་མེད་པ་ཞིག་རེད། ༧གོང་ས་ཏཱ་ལའི་བླ་མ་ནི་ཁྲིམས་འཐུན་གྱི་བོད་མིའི་སྐུ་ཚབ་རེད།”ཅེས་དང༌། ཁོང་གིས་པེ་ཅིང་ལ་”༧གོང་ས་མཆོག་ལ་གཞི་མེད་སྐྱོན་འཛུགས་དང༌། ཁ་བྲལ་པའི་མཚན་སྨོད་བྱེད་པ་མཚམས་འཇོག་དགོས་”པའི་མངགས་བྱ་བཏོན་ཡོད།

གནད་དོན་གསལ་པོ་ཞིག་ནི་ཇི་སྲིད་རྒྱ་ནག་དབང་འཛིན་པས་༧གོང་ས་མཆོག་ལ་བོད་ཀྱི་མ་འོངས་སླད་ཐུགས་འགན་ཆེན་པོ་ཡོད་པ་ངོས་འཛིན་བྱེད་རྒྱུའི་གྲ་སྒྲིག་མེད་པ་དེ་སྲིད་དུ་ “གྲོས་མོལ་ “ལ་མུ་མཐུད་ནས་གྲུབ་འབྲས་མེད་པར་ལྷག་ངེས། ཀྲུའུ་ཝེ་ཆུན་གྱིས་གསར་འགོད་གསལ་བསྒྲགས་ཤིག་སྤེལ་བའི་སྐབས་”སྐུ་སྒེར་གྱི་སྐུ་ཚབ་རྣམས་ལ་ང་ཚོ་དང་མཉམ་དུ་གྲོས་མོལ་བྱེད་རྒྱུའི་ཁྲིམས་མཐུན་གྱི་གནས་བབ་མེད། ཁོ་ཚོ་ནི་ཏཱ་ལའི་བླ་མའི་སྐུ་སྒེར་གྱི་སྐུ་ཚབ་རེད། དེར་བརྟེན༌། ཁོ་ཚོས་ཏཱ་ལའི་བླ་མའི་མདུན་ལམ་འབའ་ཞིག་གྲོས་མོལ་བྱེད་ཆོག”ཟེར། འདི་ནས་ང་ཚོ་གང་དུ་འགྲོ་འམ། ཕལ་ཆེར་འགྲོ་ས་མེད་པ་ལྟ་བུ་རེད།

མངོན་གསལ་དོད་པོའི་འགྱུར་ལྡོག་གཅིག་ནི་པེ་ཅིང་གིས་༧གོང་ས་ཏཱ་ལའི་བླ་མའི་སྐུ་ཚབ་རྣམས་དང་ཐུག་འཕྲད་བྱས་ཚུལ་ངོས་ལེན་བྱས་པ་དེ་རེད། འདས་ཟིན་པའི་ནང་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པར་འདྲི་སྐབས། “ཕྱི་རྒྱལ་ཡུལ་གྲོགས་གཅིག་པ་”རེད་ཅེས་བརྗོད་ངེས། ཐེངས་འདིར་གཟིགས་སྐོར་ལ་ངོས་ལེན་དང་གཞུང་འབྲེལ་ཁྱབ་བསྒྲགས་བྱས་པ་ཙམ་མིན་པར། ཀྲུའུ་ཝེ་ཆོན་གྱིས་རྒྱ་ནག་དང་ཕྱི་རྒྱལ་གི་གསར་འགོད་པ་ཡོད་པའི་གསར་འགོད་གསལ་བསྒྲགས་ཞིག་ཀྱང་བསྐོངས་འཚོགས་བྱས་ཡོད།

སྐུ་ཞབས་ཀྲུའུ་ཝེ་ཆོན་གྱིས་པེ་ཅིང་གིས་”བཙན་བྱོལ་གཞུང་ཞེས་པར་ངོས་འཛིན་བྱེད་ཀྱི་མེད་པ་དང་མཉམ་དུ་རྒྱ་གར་གྱིས་རྒྱ་ནག་གི་གཞི་རྩའི་རྩ་ཁྲིམས་ལ་བརྩི་བསྐུར་མི་བྱེད་པའི་སྐྱོན་བརྗོད་”བསྐྱར་བཤད་བྱས་ཡོད། དེར་མ་ཟད་ཁོས་གསལ་བཤད་གང་ཡང་མེད་པར་ཕྱི་ལོ་ ༢༠༠༨ ལོའི་ཟླ་ ༡༡ ནང་རྒྱ་རི་བློ་གྲོས་རྒྱལ་མཚན་གྱིས་ཕུལ་བའི་རྒྱ་ནག་གི་རྩ་ཁྲིམས་ལ་གཞི་བཅོལ་བའི་བོད་མི་ཡོངས་ལ་ཡང་དག་པའི་རང་སྲིད་རང་སྐྱོང་ཀྱི་གནས་བབ་ལོངས་སྤྱོད་ཀྱི་ཐབས་ལམ་གསལ་བའི་ཟིན་བྲིས་དེ་རྩིས་མེད་བཏང་ཡོད། མཇུག་མཐར་ཀྲུའུ་ཝེ་ཆོན་གྱིས་གསར་འགོད་བརྒྱུད་ལམ་དུ་ནོར་འཁྲུལ་གང་ཡིན་ཐོ་འགོད་ཁ་གསལ་མེད་པར་”ཏཱ་ལའི་བླ་མས་སོ་སོའི་ནོར་འཁྲུལ་ལ་ཡོ་བསྲང་བྱེད་དགོས”ཟེར།
   
བོད་རིགས་གཞོན་སྐྱེས་མང་པོ་ནི་འགུལ་སྐྱོད་མེད་པའི་གྲོས་མོལ་དེར་མ་དགའ་བ་ཙམ་མིན། སྐུ་ཚབ་རྣམས་པེ་ཅིང་དུ་སླེབས་པའི་ཉིན་དེར། ཞིན་ཧྭ་གསར་འགྱུར་ཁང་གིས་སྒྲུང་ཅིག་སྤེལ་བ་དེས་རྒྱུ་མཚན་ཅིའི་ཕྱིར་མི་དགའ་བ་བྱུང་མིན་ཤེས་པར་རོགས་པ་བྱེད་ཐུབ། རྩོམ་ཡིག་ནང་”བོད་རང་སྐྱོང་ལྗོངས་ཆ་འཕྲིན་དྲ་གནས་ལས་ཁུངས་ལ་གཞིགས་ན། འདི་ལོ་བོད་ནང་ཆ་འཕྲིན་དྲ་རྒྱ་བེད་སྤྱོད་གཏོང་མཁན་ ༡༠༠༠༠༠ ཡོང་བའི་རེ་བ་བྱེད་པ་དང༌། ཕྱི་ལོ་༢༠༠༩ ལོ་ལས་བརྒྱ་ཆ་ ༡༥ འཕར་གྱི་ཡོད་”ཅེས་འུད་སྒྲོག་བྱས། སྒྲུང་དེ་དང་མཉམ་དུ་ཇོ་མོ་གླང་མའི་ཉེ་འདབས་དིང་རི་ས་ཁུལ་གྱི་བོད་པ་གཞོན་ནུ་མ་གཉིས་ཀྱིས་སྤུས་ཚད་ཆེ་བའི་ལག་ཐོག་ཁ་པར་བེད་སྤྱོད་བྱེད་ཀྱིན་པའི་འདྲ་པར་བཀོད་ཡོད།

རྒྱ་ནག་གིས་བོད་ལ་ཡར་རྒྱས་ཆེན་མོ་བྱུང་ཡོད་པ་བརྗོད་ཀྱིན་ཡོད། འོན་ཀྱང་སུ་ཞིག་ལའང་མགོ་སྐོར་བཏང་ཐུབ་མེད་པ་ནི། དྲ་རྒྱ་འཚོལ་ཞིབ་བྱེད་སའི་ནང་མིང་ཚིག་དཔེར་ན་”བོད་”དང་”ཏཱ་ལའི་བླ་མ་” “གནམ་བདེ་སྒོ་མོ་ཆེ།” སོགས་ནི་རྒྱ་ནག་གིས་བཀག་ཡོད། རྒྱ་གར་དང་འཛམ་གླིང་ཡུལ་གྲུ་གཞན་དུ་རང་དབང་ལོངས་སུ་སྤྱོད་མཁན་བོད་རིགས་གཞོན་སྐྱེས་ཚོ་ནི་ཅིའི་ཕྱིར་དམག་མིའི་བཙན་གནོན་འོག་ཡོད་ཅིང་གནས་ཚུལ་དམ་དྲག་འོག་ཡོད་པའི་བོད་དུ་ལོག་དགོས་པ་རེད། ཁོ་ཚོས་ཐ་ན་སོ་སོའི་གྲོགས་པོར་ཐུག་སའི་ངོ་དེབ་ Facebook དྲ་རྒྱ་ཡང་ཁ་ཕྱེ་ཆོག་གི་མེད།

བོད་རིགས་མི་མང་དཀྱུས་མ་ཚོའི་འཚོ་བའི་ཁྲོད་མར་བབས་ན། ཁོ་ཚོ་སོ་སོའི་དབུ་ཁྲིད་ལ་ཧ་ཅང་དད་གུས་ཡོད། མ་ཟད་རྒྱ་ནག་དང་བོད་ནང་གི་གནས་སྟངས་ལ་རྒྱུས་ལོན་དང་དོ་སྣང་ཆེན་པོ་ཡོད། དཔེར་ན། ཉེ་ཆར་༧གོང་ས་ཏཱ་ལའི་བླ་མས་རྒྱ་གར་”སློབ་དཔོན་ཚོར་ཡིད་མོས་”ཆེར་བསྐྱེད་ཀྱིས་སྐུ་ཉིད་”རྒྱ་གར་བུ་ཕྲུག་ཅིག་”ཡིན་པར་འགྲེལ་བརྗོད་གནང་བར་ཧང་སང་ཡོད།

ཀྲུའུ་ཝེ་ཆོན་གྱིས་གསར་འགོད་གསལ་བསྒྲགས་ཀྱི་ནང་༧གོང་ས་ཏཱ་ལའི་བླ་མ་དང་ཨ་རིའི་སྲིད་འཛིན་ཨོ་བྷ་མ་བར་གྱི་མཇལ་འཕྲད་ཀྱིས་”རྒྱལ་སྤྱིའི་རྩ་ཁྲིམས་ལ་གཏོར་སྐྱོན་”བཟོ་སྲིད་པ་དང༌། རྒྱ་ནག་གིས་གནད་དོན་ལ་དགོས་ངེས་ཀྱི་བྱེད་ཐབས་སྤེལ་རྒྱུའི་ཉེས་བརྡ་བཏང་ཡོད། འོན་ཀྱང་ཕོ་བྲང་དཀར་པོས་ཨོ་བྷ་མ་ནི་༧གོང་ས་མཆོག་ཨ་རིར་ཆིབས་བསྒྱུར་བསྐྱང་སྐབས་མཇལ་འཕྲད་གནང་རྒྱུའི་འཆར་གཞི་ཡོད་པའི་ལངས་ཕྱོགས་སྲ་བརྟན་བྱས་ཟིན།

བོད་ཀྱི་སྐུ་ཚབ་རྣམས་ཀྱི་པེ་ཅིང་ནས་གང་ཡང་འཁུར་རྒྱུ་མེད་ཀྱང༌། གནད་དོན་གསལ་བོ་ཞིག་ནི་དམར་ཤོག་ཚོགས་པས་སླར་ཡང་འཚེ་མེད་ཞི་བའི་བོད་མི་ཚོ་དང་མཉམ་དུ་ཚུལ་ལྡན་གྱི་མཐུན་འབྲེལ་བྱེད་རྒྱུའི་གོ་སྐབས་ཞིག་བརླགས་པ་རེད། དྲན་གསོ་གཏང་དགོས་པ་ཞིག་ནི་ཧུའུ་ཡོ་པང་གིས་བརྗོད་དོན་དག་རེད། ཁོང་གིས་”༧གོང་ས་ཏཱ་ལའི་བླ་མས་རྒྱ་ནག་གི་གཅིག་སྒྲིལ་གོང་སྤེལ་དང། ཧན་མི་རིགས་དང་བོད་མི་རིགས་བར་མཐུན་འབྲེལ་དམ་ཟབ་བསྐྲུན་དགོས་”ཞེས་བརྗོད་ཡོད།

གལ་སྲིད་རྒྱ་མི་རྣམས་ལྷག་བསམ་ཅན་ཡིན་ན། དེང་སྐབས་ཧན་མི་རིགས་དང་བོད་མི་རིགས་བར་མཐུན་ཐབས་དཀའ་བའི་བར་སྟོང་དེ་མཐུད་ཐབས་བྱེད་མཁན་གྱི་མི་སྣ་གཅིག་རང་ཡོད་པ་ནི་༧གོང་ས་ཏཱ་ལའི་བླ་མ་རེད། ཁོང་ནི་ཐག་པ་ཡག་ཤོས་དེ་ཡིན་པ་ཤེས་དགོས། པེ་ཅིང་གིས་དངོས་ཡོད་ཀྱི་ཁེ་ཕན་འདི་ལེན་པ་ལས་སྣང་མེད་འདོར་མི་རུང༌། 

རྩོམ་ཡིག་འདི་ནི་ཁུ་ལོ་ཌེ་ ཨར་པེ་ Claude Arpi ལགས་ཀྱིས་༢༠༡༠། ༢། ༦ ཉིན་རྒྱ་གར་ཉིན་རེའི་གསར་ཤོག་ The Pioneer ཞེས་བའི་ཐོག་སྤེལ་བ་རིག་འཛིན་ལྷུན་གྲུབ་ཀྱིས་བོད་བསྒྱུར་ཞུས།