གསེར་དཀར་པོའི་ལོ། རྩོམ་སྒྲིག་པས།

བོད་ཀྱི་དུས་བབ་སྤྱིའི་འདོན་ཐེངས་ ༤༧༦ པའི་སྟེང་གི་རྩོམ་སྒྲིག་པའི་གཏམ།

དར་གྱི་སྒོ་ཆེན་བསླངས་ཤིང་། བསང་གསོལ་དང་བདུག་སྤོས་ཀྱིས་སྣེ་དྲངས་ཏེ་༧གོང་ས་མཆོག་ཕྱིར་བཞུགས་སྒར་དུ་ཞབས་སོར་བཀོད་སོང་། ཡིན་ཡང་མགོན་པོ་གང་གི་དགུང་ལོའི་བབ་དང་མཛད་འཕྲིན་ཁག་ལ་བསམ་སྐབས་ང་ཚོས་ལྷ་རྒྱལ་ཙམ་འཐེན་ནས་འདུག་ཚོད་མིན་པའང་ཇེ་གསལ་དུ་གྱུར།

༧གོང་ས་མཆོག་ད་ལོ་དགུང་ལོ་ ༧༥ རེད། འདི་ནི་ཕྱི་ལུགས་ལྟར་ན་ལོ་ ༢༥ རེའི་མཚམས་ཀྱི་ལོ་ཚིགས་གལ་ཆེ་ཤོས་ཏེ། དུས་རབས་གཅིག་ཕྱེད་བཞི་རུ་བགོས་པའི་ཕྱེད་མཐའ་མ་གཉིས་པ་དེ་རེད། འདི་ནི་གསེར་དཀར་པོ་སྲུང་གཙིའི་ལོ་རེད། དེ་བས་བོད་པ་ཚོས་ཀྱང་ལོ་འདིར་མགོན་པོ་གང་གི་སྐུའི་འཁྲུངས་སྐར་ཙམ་མིན་པར་ཁོང་གི་མཛད་འཕྲིན་ཁག་ལ་ཕྱོགས་ཡོངས་ནས་དབུ་འོག་དཔུང་འདེག་བྱ་རྒྱུ་ནི་གལ་ཆེ་བར་འདོད།

ཉེ་ཆར་༧གོང་ས་མཆོག་ཨ་རིའི་སྲིད་འཛིན་ལ་མཇལ་འཕྲད་གནང་སྐབས་གཞིས་ལུས་བོད་པ་ཚོས་རང་སྲོག་ལ་མ་འཛེམས་པར་དགའ་བསུའི་རྣམ་འགྱུར་ཅི་ཡང་བསྟན་ཡོད། མཇལ་འཕྲད་ཀྱི་རྗེས་སུ་༧གོང་ས་མཆོག་གིས་ཀྱང་ཐུགས་དགྱེས་ཚོར་ཆེན་པོའི་ངང་ནས་ཐེངས་འདིར་སྲིད་འཛིན་མཆོག་གིས་བོད་དོན་ལ་རྒྱབ་སྐྱོར་གནང་སོང་སྐོར་གསུངས་ཡོད། ཁོང་གི་ཆིབས་ཞབས་སུ་འབྲངས་མཁན་ཚོས་ཀྱང་དེ་སྐད་དུ་བསྒྲགས།

ཡིན་ཡང་། ཁོང་ཉིད་ཕོ་བྲང་དཀར་པོ་ནས་ཕྱིར་ཕེབས་སྐབས་ཀྱི་ཕེབས་སྒོ་དེའི་ཐད་བཤད་ཚུལ་མི་འདྲ་བ་དང་། ཐ་ན་ཕེབས་སྒོ་དེ་ནི་ཕོ་བྲང་དཀར་པོའི་ཐབ་ཚང་གི་སྒོ་ཡིན་ཚུལ་གླེང་མཁན་ཡང་ཡོད་ལ། འདི་ནི་གཙོ་བོ་རྒྱ་ནག་གི་གནོན་ཤུགས་དང་སྲིད་འཛིན་ཨོ་བྷ་མས་༧གོང་ས་མཆོག་ལ་བརྩི་བཀུར་བྱས་པ་མ་འདང་བའི་གནད་དོན་ལ་ངོས་འཛིན་བྱེད་མཁན་དང་། གོ་སྒྲིག་འདི་དག་གི་དབང་གིས་རྒྱ་ནག་གི་བློ་ཁ་ཚིམས་ཡོད་པར་བཤད་མཁན་ཡང་བྱུང་ཡོད།

གང་ལྟར། ད་ལོ་ནི་༧གོང་ས་མཆོག་གི་དགུང་ལོ་ཁྱད་པར་བ་ཞིག་ཡིན་སྟབས། ང་ཚོས་ངེས་པར་དུ་ཁོང་གི་མཚན་དང་གྲགས་པ་ལ་གནོད་པའི་ལས་ཕྲ་མོ་ཙམ་ལ་ཡང་ཤིན་ཏུ་ནས་གཟབ་དགོས་པར་འདུག

ལྷ་རབ་བྱུང་ན། ད་ལོའི་གོ་སྐབས་འདི་དང་བསྟུན་ང་ཚོས་ཆོས་སྲིད་གཉིས་ཐད་ནས་བསམ་བློ་བཏང་སྟེ། ས་སྟེང་གི་ནང་བའི་རྒྱལ་ཁབ་ཐུན་མོང་གིས་ཁོང་གི་མཛད་རྗེས་ལ་ཡི་རང་གུས་བཀུར་དང་ཁོང་གི་སྐུ་ཚེ་ཞབས་པད་བརྟན་པའི་ཆེད་དུ་བརྟན་བཞུགས་རྒྱས་པ་ཞིག་ཀྱང་འབུལ་རྒྱུའི་དུས་ལ་བབ་ཡོད་པར་འདོད་དོ།།