བློ་བཟང་གིས་སེམས་ཐག་གཙང་བཅད་ཀྱིས་རང་གི་ནུ་མོ་དང་སྤུན་མཆེད། གྲོགས་པོ་གཞན་གཉིས་བཅས་ལ་ང་ཚོ་དེ་རིང་གངས་རི་བརྒལ་ཐུབ་བྱེད། མི་མང་བོ་ཞིག་འདི་ནས་ཕར་ཕྱོགས་སུ་སོང་བ་རེད། ང་ཚོ་ཡང་འགྲོ་མི་ཐུབ་པ་གང་ཡོད། ལྷག་པར་དུ་དེ་རིང་དངོས་ནས་གནམ་གཤིས་ཀྱང་ཡག་པོ་འདུག ང་ཚོས་ལམ་ཁ་མི་མཐོང་བའི་དཀའ་ངལ་ཡང་མི་འདུག ང་འདི་ནས་དང་བོ་བྱས་དེ་འགྲོ ངས་རྗེས་སུ་མི་གཅིག་ཤོག དེ་ཡི་རྗེས་སུ་ངའི་ནུ་མོ་ཡོང་དུ་བཅུགས། དེ་ཡི་རྗེས་སུ་མི་གཉིས་ཀ་ཤོག ཚང་མས་ངའི་རྐང་རྗེས་སུ་མ་གཏོགས་རྐང་བ་གཞན་དུ་གཏན་ནས་སྤོ་མི་རུང་། གལ་ཏེ། གངས་ཆག་གི་བར་གསེང་དུ་ལྷུང་བ་འདྲ་ཡིན་ན་ང་རང་དང་བོ་བྱས་དེ་ལྷུང་ངེས་ཡིན། ང་ནི་༧རྒྱལ་བ་རིན་པོ་ཆེ་ཚང་ལ་མཇལ་ཚར་བ་ཡིན་པས། གལ་སྲིད་འདི་ནས་མ་ཐར་བ་ཡིན་ན་སྐྱོན་མེད་པ་རེད་ཅེས་བཤད་དེ་ཁོ་རང་ཐོག་མར་ལམ་ལ་བུད།
བློ་བཟང་གིས་ཕྱིར་བལྟས་ཙམ་ཡང་མི་བྱེད་པར་གངས་རིའི་ནང་དུ་ཤར་རྒྱགས་འགྲོ་བཞིན་པའི་སྐབས་ཤིག་ལ། རྒྱབ་ལོག་ནས་ནུ་མོ་མཚོ་མོ་སྐྱིད་ཀྱིས། ཕུ་བོ། ང་ཚོ་འདི་ནས་ངལ་ཅུང་ཙམ་ཞིག་གསོས་ན་འགྲིག་གི་རེད་དམ་ཞེས་བཤད་དུས་སུ། བློ་བཟང་གིས་རང་གི་ནུ་མོ་ལ། ཤུ་རེ་བྱོས། ང་ཚོ་འདི་ནས་ཐར་བ་ཡིན་ན་ད་ཉེན་ཁ་ཡོད་པ་མ་རེད་ཅེས་ལན་བཏབ་ནས་མུ་མཐུད་དུ་ཕྱིན།
བལ་བོད་གཉིས་ཀྱི་ས་མཚམས་སུ་སླེབས་མ་ཐག རྒྱ་ནག་གི་བོད་དུ་བཙན་འཛུལ་བྱས་རྗེས་སུ་བཙུགས་པའི་རྡོ་རིང་དེ་ཡི་འགྲམ་དུ་རྡེའུ་འབུམ་བླུགས་ཡོད་པ་མ་ཟད། དེ་ཡི་སྒང་དུ་དར་ལྕོག་ལྷབ་ལྷུབ་དུ་གཡོ་བ་དེ་ཡི་འགྲམ་ནས། ཁོང་ཚོ་ཚང་མས་ཀི་ཀི་བསོ་བསོ་ལྷ་རྒྱལ་ལོ་ཞེས་སྐད་ཤུགས་ཆེན་པོ་ཐེངས་འགའ་བརྒྱབ་རྗེས་སུ། རོགས་པ་གཞན་ཞིག་གིས་དེ་རིང་ནས་རྒྱ་ནག་འདི་ཚང་གི་འོག་ནས་ཐར་སོང་བ་རེད། རང་དབང་ཐོབ་སོང་བ་རེད། བོད་རང་བཙན་ཁྲི་ལོ་བརྟན་པོར་ཤོག་ཟེར་ནས་སྐད་ཤུགས་ཆེན་པོ་བརྒྱབ་པ་དེ་ཡི་རྣམ་པ་དེ་ནི་དངོས་ནས་མི་ཞིག་ཚེ་ཐག་བཅད་པ་ལས་ཐར་བའི་སྤྲོ་སྣང་ལྟ་བུ་ཞིག་བྱུང་ཡོད་པ་ལྟ་བུ་ཞིག་ཡིན་པར་གླེང་ཆོག་པ་རེད།
ཁོང་ཚོ་གངས་རི་ལས་བརྒལ་ནས་ག་ལེར་བལ་ཡུལ་གྱི་ས་ཐོག་ནས་མར་ལུང་ཁུག་དུ་འབབ་བཞིན་པའི་སྐབས་སུ། གྲྭ་བ་ཤེས་རབ་རྒྱ་མཚོས་བློ་བཟང་ལ་གངས་ཁྲོད་ནས་ཁོ་རང་གི་ནུ་མོ་ཁ་རོག་གེར་ངུས་པ་དེ་ལ་ཀུ་རེ་བྱེད་ཀྱི་ཡོད་པ་དེ་མཐོང་ནས། བློ་བཟང་གིས་རང་གི་ནུ་མོ་ལ་ཅིའི་ཕྱིར་ངུས་པ་དྲིས་དུས་སུ། ནུ་མོས་གཏན་ནས་ངུས་མེད་ཟེར་ནས་ཁས་ལེན་མ་བྱས་པའི་སྐབས་དེར། ཤེས་རབ་ཀྱིས། ཁྱེད་རང་གི་ངལ་གསོ་མི་བྱེད། མགྱོགས་པོ་འགྲོ་ཟེར་བའི་སྐབས་དེ་རེད། ཁྱེད་རང་གི་རྐང་རྗེས་སུ་མོ་རང་གི་རྐང་བའི་མ་གཉོབ་པ་དང་འགྲོ་ཡུན་རིང་དྲགས་ནས་ངུས་པ་རེད་ཅེས་བཤད་དུས། བློ་བཟང་གིས་རང་གི་ནུ་མོའི་མགོ་ལ་ལག་པའི་ཕྱིལ་ཕྱིལ་ཞིག་གཏོང་བཞིན། དེ་རིང་ནས་ང་ཚོ་ཁྱོས་གང་ནས་ངལ་གསོ་ཟེར་ན་དེ་ནས་ངལ་གསོས་པ་ཡིན་ན་འགྲིག་གི་རེད་ཅེས་བཤད་པའི་སྐབས་དེར། ནུ་མོ་མཚོ་མོ་སྐྱིད་ཀྱི་གདོང་ཡོངས་སུ་འཛུམ་མདངས་ཀྱིས་འཁང་དེ། ཡ་ཡ་ ཕུ་བོ།
བལ་ཡུལ་གྱི་ས་ཐོག་དུ་སླེབས་པས་ཁོང་ཚོ་སེམས་པ་ཡང་བདེ་རུ་སོང་ཡོད་ཀྱང་། གནམ་གཤིས་ཧ་ཅང་བཟང་རྒྱུ་མེད་པ་དང་། ཉིན་མོ་དེར་ཁོང་ཚོ་གངས་འདབས་ཀྱི་རྡོ་ཕ་བོང་དེ་དག་གི་གསེང་ནས་ངལ་གསོ་རྒྱུ་ཁ་འཆམ་ནས་དེ་རུ་ཉལ་བ་རེད། ཕྱིར་ཉིན་ནས་ཁོང་ཚོ་མུ་མཐུད་དུ་གང་ཐུབ་ཅི་ཐུབ་རེ་སོང་ན་ཡང་། སྟབས་མ་ལེགས་པ་ཞིག་ལ་བློ་བཟང་གི་རྐང་བ་ན་ནས་འགྲོ་མ་ཐུབ་པའི་སྐབས་དེ་འདྲ་ཞིག་ལ། བློ་བཟང་གིས་ད་ནི་ང་རང་དངོས་ནས་འགྲོ་ཐུབ་ས་མ་རེད། ང་ཚོས་འདི་ནས་ངལ་གསོ་བྱེད། དེ་མིན་ན། ཁྱེད་ཚོ་ག་ལེར་ལམ་ཁ་དེད་ནས་འགྲོ་ཡི་བསྡོད། ང་ཚོ་ཟ་མ་ཡང་ཚར་གྲབས་འདུག ཁྱེད་རང་ཚོ་ཟ་མ་ཡོད་ས་ཞིག་ནས་ང་ལ་སྒུག་ནས་བསྡོད་ཅེས་བཤད་པ་རེད།
བློ་བཟང་གི་སྤུན་མཆེད་བཀྲ་ཤིས་དོན་འགྲུབ་ཀྱིས། ཕུ་བོ། དེ་འདྲ་ཡོང་གི་མ་རེད། ང་དང་རྡོར་སྐྱབས་གཉིས་ཀྱིས་ཁྱེད་རང་རྒྱབ་དུ་ཁུར་ནས་ངལ་གསོ་ཞོར་དུ་འགྲོ་ཆོག ཤེས་རབ་རྒྱ་མཚོ་གྲྭ་བ་ཡིན་སྟབས་ཁྱེད་རང་ཁུར་ན་འགྲིག་གི་མ་རེད་ཞེས་ཨུ་ཚུགས་བྱས་མཐར། བློ་བཟང་གིས་ཁོང་ཚོས་ཁ་ལ་ཉན་ནས་ཁུར་དུ་བཅུགས་ནས་བལ་ཡུལ་གྲོང་སྡེ་ཞིག་གི་སྣེ་མོ་ཟིན་ནས་དེ་ཡི་ནང་དུ་ལམ་འགྲུལ་བའི་ཟ་ཁང་མི་ཚང་ཞིག་གི་ནང་དུ་ཕྱིན་ནས་ཁོང་ཚོས་འབྲས་ཚལ་གང་ཡོད་པ་དེ་བསྔགས་ནས་ཟས་ཚར་མ་ཐག་པའི་སྐབས་དེ་འདྲ་ཞིག་ལ། ནང་དུ་བལ་ཡུལ་གྱི་དམག་མི་མེ་མདའ་འཛིན་མཁན་ཁ་ཤས་ཤིག་ནང་དུ་སླེབས་ནས་ཁོང་ཚོ་གང་ནས་ཡིན་ཟེར་ནས་དྲིས་དུས་སུ། ཁོང་ཚོ་སུས་ཀྱང་ལན་མ་བཏབ་པར་བསྡད་པ་རེད།
དམག་མི་ཞིག་གིས་འགྲུལ་བའི་ཟ་ཁང་ནང་གི་བདག་མོ་དེར་འདི་ཚོས་ཁྱེད་རང་ལ་ཟས་རིན་སྤྲད་སོང་ངམ། ཁོང་ཚོ་འདིར་སླེབས་ནས་དུས་ཚོད་ག་ཚོད་འགྲོ་སོང་། ཁོང་ཚོས་ནང་དུ་བལ་ཡུལ་སྐད་ཤེས་མཁན་དང་དབྱིན་སྐད་ཤེས་མཁན་ཨེ་འདུག་ཞེས་དྲིས་པའི་ལན་དུ་བདག་མོ་དེས། ཁོང་ཚོས་ནང་དུ་དབྱིན་སྐད་དང་བལ་སྐད་ཤེས་མཁན་མི་འདུག ངས་ཟས་རིན་ཚང་མ་སྤྲད་སོང་། བློ་བཟང་ལ་མཛུབ་མོ་བཙུགས་ནས་མི་དེས་རྐང་བ་ནད་པ་རེད་འདུག ཁོང་ཚོས་ཁོ་རང་ཁུར་ནས་སླེབས་སོང་ཞེས་བཤད་པ་དེས། ཁོང་ཚོ་ལ་རོགས་པ་བྱས་པ་གཅིག་པ་ལྟ་བུ་ཞིག་ཆགས་ན་ཡང་། དམག་མི་གཞན་ཞིག་གིས་ཅ་ལག་ཚང་མས་ཁ་ཕྱེ་ཟེར་ནས་བཤད་པ་ལྟར། བློ་བཟང་གིས་ཀྱང་རོགས་པ་ཚོ་ལ་ཁོང་ཚོས་འདོད་པ་ལྟར་བྱེད་དུ་འཇུག་དགོས་པ་རེད་ཅེས་རང་གི་རོགས་པ་དག་ལ་བཤད་པ་རེད།
མུ་འགོད།
སྒྱུ་མའི་ཁམས་ནས་ཕེབས་པས་སྤུན་ཟླ་ཁྱེད་རང་ལ་དགའ་བསུ་ཞུ། རྗེས་ཕྱོགས་ཀྱང་གང་ཐུབ་ཡོང་རོགས་ཞུ། བལྟས་ནས་འདུག
ཨ་རོ། བོད་རང་བཙན་བྱེད་རྒྱུ་ལྷག་བསྡད་པའི་སྐབས་འདིར་ཁྱོད་ལ་བོད་རང་བཙན་ཐོབ་འདུག་པ་མ་ཟད། དེ་ཉིད་ཁྲི་ལོ་བརྟན་པའི་སྨོན་འདུན་ཞུས་པ་མཐོང་དུས་དངོས་གནས་སྣང་བ་སྤྲོ་བོ་བྱུང་།
ཨ་རོ། ཧི་མ་ལ་ཡི་རི་བོ་བརྒལ་སྟངས་ཅུང་བདེ་དྲགས་པས་རི་བོ་བརྒལ་སྟངས་ཀྱི་རྣམ་པ་གསལ་བོ་འདྲ་མཐོང་ཐུབ་མ་སོང་། དངོས་གནས་མུ་འཐུད་ནས་བྲིས་དང་སྒྲུང་རིང་ཞིག་ཏུ་འགྱུར་རྒྱུ་གདོན་མི་ཟ།