རང་དབང་ལུང་པའི་རང་དབང་གི་གོ་སྐབས་ཆུད་ཟོས་སུ་མ་གཏོང་།

རང་དབང་ལུང་པར་ཡོད་པའི་བོད་རིགས་སྤུན་ཟླ་ཚང་མར་འབོད་སྐུལ་ཞིག་ཞུ་རྒྱུ་ཡོད། ད་བར་ཚང་མས་ཧུར་ཐག་བྱས་པ་རེད་ལ། ད་དུང་མུ་མཐུད་དུ་རང་དབང་ལུང་པའི་རང་དབང་གི་གོ་སྐབས་བཟང་པོ་ཆུད་ཟོས་སུ་མི་གཏོང་བར་རང་གི་དོན་དག་དེ་ངེས་པར་དུ་རང་ཉིད་ཀྱིས་བསྒྲུབ་དགོས་པ་རེད། རང་དོན་རང་གཅེས་བྱ་དགོས། རང་གི་ལུས་དེ་བོད་མིའི་ཤ་ཁྲག་ལས་གྲུབ་པའི་ལུས་བོ་ཞིག་ཡིན་སྟབས། ཇི་སྲིད་ལུས་པོ་མ་དོར་བར་དུ་བོད་སྤྱི་བའི་འགན་འཁུར་དེ་སོ་སོའི་ཕྲག་ལ་འཁྲི་ཡོད་པ་རེད་ཅེས་༧གོང་ས་མཆོག་གིས་གསུངས་ཡོད།

དེ་རིང་ཞོགས་པར་རྒྱ་གར་བྱང་ཕྱོགས་ངྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་གཞུང་དམངས་ལྷ་མི་ཡོངས་ཀྱིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད། བརྟན་བཞུགས་བསྟར་འབུལ་གྱི་མཛད་རིམ་ཐོག་མར་རྣམ་རྒྱལ་གྲྭ་ཚང་གི་མཁན་རིན་པོ་ཆེ་དབུ་བཞུགས་ཐོག བླ་སྤྲུལ་རྣམ་པ་དང་སྐུ་བསྟེན་རྣམ་པ། རྣམ་རྒྱལ་གྲྭ་ཚང་གི་དགེ་འདུན་པ་བཅས་ནས་ཚེ་སྒྲུབ་གནང་ཡོད་ལ། ཞོགས་པའི་ཆུ་ཚོད་ ༨ སྟེང་བཙན་བྱོལ་བོད་གཞུང་གི་ཁྲིམས་ཞིབ་པ་ཆེ་བ་དང་སྤྱི་འཐུས་ཚོགས་གཙོ། བཀའ་བློན་ཁྲི་པ་བཅས་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པའི་སེར་ཕྲེང་དང་རྔ་རོལ་གྱི་ཕེབས་བསུའི་དབུས་༧གོང་ས་མཆོག་ཕོ་བྲང་ནས་སྦྱན་འདྲེན་ཞུས་ཡོད། བརྟན་བཞུགས་དངོས་གཞིར་ས་སྐྱ་བདག་ཁྲི་རིན་པོ་ཆེ་མཆོག་གིས་མཎྜལ་ལྗགས་བཤད་གནང་སྐབས། སྤྱི་འཐུས་ཚོགས་གཙོ་མཆོག་དང་བཀའ་བློན་ཁྲི་པ་གཉིས་ཀྱིས་མཎྜལ་ཚོམ་བུ་ཟུར་འདེགས་ཞུས་ཡོད།

ས་སྐྱ་བདག་ཁྲི་རིན་པོ་ཆེ་མཆོག་གིས་མཎྜལ་ལྗགས་བཤད་གནང་དོན། སྤྱི་ནོར་༧གོང་ས་མཆོག་སྐུ་གཞོན་ནུའི་དུས་ནས་དགོངས་བཞེས་ཡོད་པ་ལྟར། གངས་ལྗོངས་ཆབ་སྲིད་ཀྱི་རང་བཞིན་དམངས་གཙོའི་ལམ་སྲོལ་དུ་བསྒྱུར་གནང་མཛད་པ་དང་ཆབས་ཅིག ཐུགས་རྒྱུད་ཀྱི་ལུང་གིས་བསྐུལ་བའི་འཕྲིན་ལས་ཀྱི་རྦ་རླབས་མཛད་མཐའ་མེད་པའི་མཐུ་ལ་བརྟེན་ཏེ། འཛམ་གླིང་མི་དམངས་ཀྱི་སེམས་ཀྱི་ཞིང་སར་བོད་ཀྱི་འཐབ་རྩོད་དེ་དྲང་བདེན་དང་། ཡང་དག་པ་ཡིན་པའི་ས་བོན་རྨ་མེད་པ་བཏབས་པས་འཛམ་གླིང་སྐྱེས་འགྲོ་ཡོངས་ཀྱིས་དད་པ་དང་འདུན་པ། ཡིད་ཆེས་དང་མཐུན་འགྱུར་ཉིན་རེ་ནས་ཉིན་རེར་ཇེ་བརྟན་ཇེ་རྒྱས་སུ་ཕྱིན་ཡོད། གཞིས་ལུས་རྒྱ་ཆེའི་མང་ཚོགས་ལ་གཉིས་ཕན་དབུ་མའི་ལམ་གྱི་ཐབས་ལམ་ལ་བརྟེན་ཏེ། རང་ཅག་ཁ་བ་རི་བ་ཡོངས་ཀྱི་སྙིང་ལ་བརྣག་པའི་ཆོས་སྲིད་རང་དབང་གི་ཉི་མ་ཤར་ལ་ཉེ་བ་ཙམ་དུ་མ་ཟད། འཛམ་གླིང་སྤྱི་དང༌། ཁྱད་པར་གླིང་ཆེན་ཨེ་ཤ་ཡའི་ཁྱོན་ཡོངས་ཞི་བདེའི་བསྟི་གནས་སུ་བསྐྲུན་གནང་མཛད་རྒྱུའི་དགོངས་བཞེས་རླབས་ཆེན་ལ་བརྟེན་ཏེ། སོ་སོ་སྐྱེ་བོ་ཙམ་དུ་མ་ཟད་སྔོན་བྱོན་རྒྱལ་བློན་བྱང་ཆུབ་སེམས་དཔའ་མཁས་གྲུབ་གོང་མ་སུས་ཀྱང་འགྲན་པར་མི་བཟོད་པའི་རྣམ་ཐར་ཆེས་ངོ་མཚར་བའི་རང་བཞིན་ལོ་རྒྱུས་ཀྱི་ཡི་གེར་ཟུར་དུ་འགོད་འོས་པ་དག་ནི་དེང་དུས་སྐྱེ་བོ་ཀུན་གྱི་མཐོང་ཐོས་སུ་གྱུར་ཡོད་ཅེས་སྦྱན་ཆབ་སིལ་བཞིན་གསུངས་བྱུང་།  

བརྟན་བཞུགས་ཀྱི་མཇུག་ཏུ་༧གོང་ས་མཆོག་གིས་མི་དམངས་ལ་ལམ་སྟོན་བཀའ་སློབ་བསྩལ་དོན། ཁྱེད་ཅག་གིས་སེམས་ཤུགས་དང་ལྷག་བསམ་གཡོ་བ་མེད་པའི་ཐོག་ནས་དེ་རིང་འདིར་བརྟན་བཞུགས་ཟབ་རྒྱས་འབུལ་བཞིན་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན། སྔ་ཕྱི་རིམ་པ་བཞིན་བརྟན་བཞུགས་མང་པོ་ཞིག་ལ་བདག་ཁྲི་རིན་པོ་ཆེ་མཆོག་དབུ་བཞུགས་གནང་སྟེ། མཎྜལ་ལྗགས་བཤད་གནང་བ་རེད། མཎྜལ་ལྗགས་བཤད་དེ་རིན་པོ་ཆེ་ལ་ཁྲལ་བབ་བསྡད་ཡོད་པ་རེད་ཅེས་རྩེད་མཚར་བྱས་པ་ཡིན། དེ་རིང་རིན་པོ་ཆེ་ཡིས་ཁྲལ་ཡག་ཐག་ཆོད་བསྒྲུབས་སོང་།  ཐུགས་རྗེ་ཆེ་ཞུ་རྒྱུ་ཡིན། ཞེས་དང་།

འདིར་དེ་རིང་དངོས་སུ་འདུས་པའི་དད་ལྡན་སེར་སྐྱ་མང་ཚོགས་དང༌། ལྷག་པར་དུ་གཞིས་ལུས་རྒྱ་ཆེའི་མི་དམངས་ལ་མཚོན་ན། གཞན་དབང་འོག་ལ་ཚུད་བསྡད་ཡོད་པ་རེད་དེ། ལྷག་བསམ་དང་སྙིང་སྟོབས་ཞུམ་པ་མེད་པར་བོད་རང་ཉིད་ཀྱི་བདེན་དོན་ཐོབ་ཐང་འཐབ་རྩོད་ལ་སེམས་ཤུགས་གཡོ་བ་མེད་པར་བརྟན་པོར་གནས་ཡོད། བར་ལམ་བོད་ནང་དྲག་གནོན་གདུག་རྩུབ་ཚད་མེད་བཏང་སྟེ་འདས་གྲོངས་སུ་ཕྱིན་པ་མང་པོ་ཞིག་ཡོད། དེ་དག་ལ་ང་རང་ཚོ་ཚང་མས་སྨོན་ལམ་རྒྱག་རྒྱུ་གལ་ཆེན་པོ་རེད། ཁོང་ཅག་གིས་བོད་བསྟན་སྲིད་ཀྱི་དོན་དུ་སྲོག་དོར་བ་རེད། ལྷག་བསམ་དེར་ཏན་ཏན་འབྲས་བུ་བཟང་བོ་ཞིག་ཡོང་ངེས་པ་རེད། དེ་བཞིན་རྡུང་རྡེག་མནར་གཅོད་འོག་ནས་ལུས་ལ་ནད་གཅོང་ཕོག་བསྡད་པ་མང་པོ་ཞིག་ཡོད། དེ་དག་ལའང་ནད་གཅོང་གི་སྡུག་བསྔལ་ནས་མྱུར་དུ་གྲོལ་ཏེ་ཚེ་མུ་མཐུད་ཐུབ་པ་ཞིག་ལ་ང་ཚོས་སྨོན་ལམ་རྒྱག་དགོས། དེ་དང་མཉམ་དུ་ལྷག་བསམ་དང་སྙིང་སྟོབས་སྔར་བཞིན་བརྟན་པོར་གནས་བསྡད་པའི་མི་རབས་རྒན་པ་ཚོ་ན་ཚོད་སྡུག་ཏུ་འགྲོ་བཞིན་ཡོད། དེ་དག་ལའང་ན་ཚ་སྡུག་བསྔལ་མེད་པར་མི་ཚེ་རིང་དུ་འཚོ་རྒྱུར་ང་ཚོས་ཐུགས་སྨོན་གནང་དགོས། དུས་ད་ལྟའི་བར་གཞིས་ལུས་རྒྱ་ཆེ་མི་དམངས་ལྷག་བསམ་རྩེ་གཅིག་ཏུ་གནས་བསྡད་པ་དེ་ལ་ཐུགས་རྗེ་ཆེ་ཟེར་རྒྱུ་ཡིན་ལ། ད་དུང་ཡིན་ནའང་དད་འདུན་ལྷག་བསམ་གཡོ་མེད་གནས་རྒྱུ་གལ་ཆེན་པོ་རེད། ཅེས་གསུངས་བྱུང་།

ཁོང་གིས་མུ་མཐུད་དུ་གནའ་དེང་གི་ཤེས་ཡོན་ཟུང་དུ་འབྲེལ་བའི་ཐོག ཚང་མས་སློབ་སྦྱོང་ལ་འབད་བརྩོན་བྱ་རྒྱུ་གལ་ཆེན་ཡིན་སྐོར་ནན་གྱིས་གསུངས་དོན། ངས་ནམ་རྒྱུན་འབོད་སྐུལ་ཞུས་བསྡད་པ་ལྟར། ཚང་མས་ཤེས་ཡོན་ཐོག་ལ་དོ་སྣང་བྱ་རྒྱུ་དེ་ཧ་ཅང་གལ་ཆེན་པོ་རེད། ཤེས་ཡོན་ཡོད་ན་མིའི་རྣམ་དཔྱོད་ཀྱི་ནུས་པ་ཡོངས་སུ་རྫོགས་པས་རྩལ་འདོན་ཐུབ་ཀྱིན་ཡོད། མི་ལ་རྣམ་དཔྱོད་མེད་ན་ལྷག་བསམ་གཅིག་པུས་ནུས་པ་ཐོན་ཁག་པོ་རེད། དེར་བརྟེན་དེང་དུས་ཀྱི་ཤེས་ཡོན་དང་ཟུང་དུ་འབྲེལ་ཏེ་བོད་གངས་ཅན་གྱི་ལྗོངས་སུ་སྔ་མོ་ནས་ཡོད་བསྡད་པའི་སངས་རྒྱས་ཆོས་ཀྱི་ལྟ་གྲུབ་ལ་སྦྱང་བརྩོན་བྱ་དགོས། སངས་རྒྱས་ཆོས་ལུགས་ནང་གི་རྟེན་ཅིང་འབྲེལ་བའི་ལྟ་གྲུབ་ལ་སྦྱང་བརྩོན་བྱས་ཏེ་ཤེས་པར་བྱ་རྒྱུ་ཤིན་ཏུ་ནས་ཀྱང་གལ་ཆེན་པོ་རེད། སངས་རྒྱས་ཆོས་ལ་དད་པ་མེད་མཁན་ཞིག་ཡིན་ན་ཡང་། སངས་རྒྱས་ཆོས་ཀྱི་ལྟ་གྲུབ་དེ་ངེས་པར་དུ་ཤེས་དགོས་པ་ཞིག་རེད། སངས་རྒྱས་པའི་ཆོས་པ་ཞིག་ཡིན་ན་རྒྱུ་མཚན་ཤེས་པའི་སྒོ་ནས་དད་པ་ཐོབ་པ་ཞིག་བྱུང་ན། དད་པ་དེ་ཧ་ཅང་བརྟན་པོ་ཞེ་དྲག་རེད། དེང་དུས་ཀྱི་ཤེས་ཡོན་དང་ཕ་མེས་བཀའ་དྲིན་ཅན་ཚོས་དཀའ་བ་དཔག་ཏུ་མེད་པ་སྤྱད་དེ་བསྒྲུབས་པའི་སངས་རྒྱས་ཀྱི་ཆོས་ཚུལ་དེ་ནི། དེང་སྐབས་ཧ་ལམ་འཛམ་གླིང་གི་གཅེས་ནོར་རེད་ཟེར་ནས་ལབ་ཐུབ་པ་ཞིག་ཆགས་ཡོད། ཕ་མེས་ནས་བརྒྱུད་སྤྲོད་བྱས་ཡོང་བའི་ནོར་བུ་དེ་ད་ལྟ་རང་ཉིད་ཀྱི་ལག་ཏུ་ཡོད་པ་ངོས་ཟིན་པའི་ཐོག་ནས་དེ་ལ་བདག་པོ་རྒྱག་རྒྱུ་གལ་ཆེན་པོ་རེད། བདག་པོ་རྒྱོབ་ཟེར་དུས་དད་པ་གཅིག་པུའི་སྐད་ཆ་མ་རེད། ཤེས་ཡོན་དེ་རང་གི་རྒྱུད་ལ་ཚང་བར་བྱ་དགོས་པ་རེད། དེར་སྨོན་ལམ་བརྒྱབས་ཏེ་ཚང་གིོ་མ་རེད། སློབ་སྦྱོང་བྱས་ཏེ་ཚང་གི་འཇུག་དགོས། དེར་བརྟེན། དེ་རིང་འདིར་དམིགས་བསལ་གྱིས་འབོད་སྐུལ་ཞིག་ཞུ་དགོས་དྲན་བསྡད་ཡོད། ཅེས་གསུངས་སོང་།

མཇུག་མཐར་ཁོང་གིས་རང་དབང་ལུང་པའི་བོད་མི་ཚོས་རང་དོན་རང་གཅེས་ཀྱིས་རྩ་དོན་ལ་འབད་འབུང་བྱ་དགོས་སྐོར་བསྟན་དོན། དེ་རིང་གི་གོ་སྐབས་འདི་བཟུང་སྟེ། རང་དབང་ལུང་པོར་ཡོད་པའི་བོད་རིགས་སྤུན་ཟླ་ཚང་མ་ལ་འབོད་སྐུལ་ཞིག་ཞུ་རྒྱུ་ཡོད། ད་བར་ཧུར་ཐག་བྱས་པ་རེད་ལ། ད་དུང་མུ་མཐུད་དུ་རང་དབང་ལུང་པའི་རང་དབང་གི་གོ་སྐབས་བཟང་པོ་ཆུད་ཟོས་སུ་མི་གཏོང་བར་རང་གི་དོན་དག་དེ་ངེས་པར་དུ་རང་ཉིད་ཀྱིས་བསྒྲུབ་དགོས་པ་རེད། རང་དོན་རང་གཅེས་བྱ་དགོས། རང་གི་ལུས་དེ་བོད་མིའི་ཤ་ཁྲག་ལས་གྲུབ་པའི་ལུས་ཕུང་ཞིག་ཡིན་སྟབས། ཇི་སྲིད་ལུས་པོ་མ་དོར་བར་དུ་བོད་སྤྱི་བའི་འགའ་འཁུར་དེ་ཕྲག་ལ་འཁྲི་ཡོད་པ་རེད། ལྷག་པར་དུ་གཞིས་ལུས་རྒྱ་ཆེའི་མི་དམངས་ཚོས་ང་ཚོ་རང་དབང་ལུང་པའི་བོད་རིགས་སྤུན་ཟླ་ཚོར་རེ་བའི་མིག་འབུར་བལྟས་ཡོད། དེ་མ་བརྗེད་པ་བྱ་དགོས། རང་ཉིད་ཕྱོགས་བཞི་མཚམས་བརྒྱད་གང་དུ་གནས་ཡང༌། བོད་སྤྱི་བའི་བདེ་དོན་དེ་སེམས་ནས་མི་འདོར་བར་སྐབས་བབ་ཀྱི་སོ་སོས་གང་འཇོན་པ་དེར་ཧུར་ཐག་བྱ་རོགས། ཞེས་གསུངས་བྱུང་།