བོད་དོན་བཞུགས་མོལ་ཚོགས་འདུ་ཐེངས་ལྔ་པ་རོབ་ཙམ་གླེང་བ། ཀུན་དགའ་བཀྲ་ཤིས།

ཀུན་དགའ་བཀྲ་ཤིས།
 
རྒྱ་ནག་དམར་ཤོག་གི་ཚོགས་འདུ་གལ་ཆེན་གང་ཞིག་ཡིན་རུང་། གཞུང་ཕྱོགས་ཀྱི་དྲིལ་བསྒྲགས་ཕུད་པའི་དཔྱད་གཞི་གཞན་ནི་ཤིན་ཏུ་ཚད་ཡོད་པ་སྤྱི་དང་ལྷག་དོན་བོད་དང་འབྲེལ་བ་ཡོད་པའི་ཚོགས་འདུ་ནི་དེ་བས་བརྗོད་མ་དགོས་པ་ཞིག་རེད། དེས་ན་ངས་རྒྱ་དམར་གཞུང་ནས་མཁོ་སྤྲོད་བྱས་པའི་བརྡ་འཕྲིན་ཁོ་ནར་གཞིགས་ནས་བོད་དོན་བཞུགས་མོལ་ཚོགས་འདུ་ཐེངས་ལྔ་པས་མ་འོངས་བོད་ལ་ཤུགས་རྐྱེན་གང་ཞིག་ཐེབས་སྲིད་པའི་སྐོར་གླེང་རྒྱུ་ཙམ་ཡིན།

བཞུགས་མོལ་ཚོགས་འདུ་ཞེས་མིང་ལ་བལྟས་པ་ཙམ་གྱིས་རྟོགས་ཐུབ་པ་ནི་མི་མང་པོ་མཉམ་དུ་བཞུགས་ནས་མོས་བསྡུར་བྱས་ཏེ་གནད་དོན་ཐག་གཅོད་བྱེད་ཐབས་འཚོལ་རྒྱུ་ཡིན་པ་སྨོས་མི་དགོས་མོད། བོད་ཀྱི་ལས་དོན་བཞུགས་མོལ་ཚོགས་འདུ་འདི་ལ་ཧ་ལམ་གོ་རིམ་དེ་མེད་པ་ལྟར་དུ་སྣང་། སྐུ་ཞབས་ཧུ་ཅིང་ཐོ་མི་གཅིག་གིས་2009ལོའི་ཟླ་1ཚེས་8ཉིན་གསུང་བཤད་གནང་ནས་ཚོགས་འདུའི་དགོངས་དོན་གཏན་ལ་ཕབ་པ་རེད།

སྔོན་མའི་བསམ་བཀོད་ལྟར་དུ་འགྲོ་བ།

སྐུ་ཞབས་ཧུ་ལགས་ཀྱི་བཀའ་མོལ་མི་ཉུང་བ་ཞིག་གསུངས་མོད། འགོ་ནས་མཇུག་བར་ནང་དོན་གཙོ་བོ་གཅིག་རང་ལ་དམིགས་ཡོད་པ་སྟེ། ཁ་གཏད་གཅོག་དགོས་པ་དེ་རེད། དེ་ཡང་བོད་མིའི་འཁང་ར་དང་རེ་འབོད་ལ་ཁ་གཏད་ཇི་ལྟར་གཅོག་དགོས་པ་དེ་རེད། མ་ཚད་༸གོང་ས་མཆོག་དང་བཙན་བྱོལ་བོད་གཞུང་གཉིས་ཁ་འཕྲལ་སྟོབས་ཤུགས་ཡིན་པར་གཏན་ཕབ་སླར་ཡང་བྱས་པ་དེས་དེང་སྐབས་ཀྱི་རྒྱ་དམར་འགོ་ཁྲིད་ལ་བོད་དོན་ཐག་གཅོད་བྱེད་པའི་ཆབ་སྲིད་ཀྱི་འདོད་མོས་མེད་པ་དང་། དོན་དངོས་གདོང་གིས་བསུ་བའི་ལྷག་བསམ་དང་བློ་སྟོབས་མེད་པ་མཚོན་ཐུབ། དེ་ཡང་བོད་དོན་ཐད་རྒྱ་ནག་དབུས་གཞུང་ལ་བསྒྱུར་བཅོས་བྱེད་པའི་རྟགས་ལྟས་གང་ཡང་མེད་པ་རེད། འོན་ཀྱང་དབྱེ་ཞིབ་པ་ཁག་ཅིག་གིས་སྐུ་ཞབས་ཧུ་ཡིས་བཏོན་པའི་“རྒྱ་ནག་གི་ཁྱད་ཆོས་དང་བོད་ཀྱི་ཁྱད་ཡོན་འཛོམས་པའི་འཕེལ་རྒྱས་ལམ་བུར་འགྲོ་རྒྱུ་མཐའ་འཁྱོངས་བྱ་དགོས་”ཟེར་བ་དེ་དོན་གསར་པ་ཞིག་ཡིན་པར་འདོད་པ་དང་།  ཐ་ན་རེ་འགས་སྲིད་ཇུས་གསར་པ་ཞིག་ཡིན་པར་ངོས་འཛིན་བྱེད་ཀྱིན་འདུག

དོན་དེར་ང་རང་ལྟ་བ་ཐ་དད་ཡིན། གང་ལགས་ཤེ་ན། “བོད་ཀྱི་ཁྱད་ཡོན་”ཟེར་བའི་ཡིག་འབྲུ་དེ་དག་ཕུད། སྒྲུབ་བྱེད་གཞན་གང་ཡང་མཐོང་མ་སོང་བས།  སྐུ་ཞབས་ཧུ་ཡིས་བཏོན་པའི་འཆམ་མཐུན་སྤྱི་ཚོགས་ཟེར་བ་དང་འདྲ་བར་ནམ་མཁའི་འཇའ་དང་དྲིལ་བསྒྲགས་རྩ་ཚིག་ཙམ་ལས་མ་འདས།

ཛ་དྲག་ཏུ་འགྲོ་བཞིན་པའི་བོད་དོན་དེ་ཉིད་དཔལ་འབྱོར་གོང་དུ་སྤེལ་བའི་འོག་ཏུ་སྦས་ཐབས་བྱེད་པ།

སྐུ་ཞབས་ཧུ་ཡིས་བོད་དུ་ཕྱག་ལས་ལོ་མང་གནང་མྱོང་བས། བོད་ཀྱི་ཁྱད་ཆོས་ཆེ་ཤོས་ནི་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཡིན་པ་མ་མཁྱེན་པ་གཏན་ནས་མ་རེད། བོད་དོན་ངོ་མ་ཐག་གཅོད་གནང་འདོད་ཡོད་ན། དང་ཐོག་མར་བོད་ཀྱི་ཆོས་ལུགས་དང་རིག་གནས་རྩ་མེད་དུ་འགྲོ་ཉེན་ཆེ་བའི་དོན་དངོས་ལ་མིག་གིས་ཅེར་དགོས། ཚོགས་འདུ་འདིའི་ཐོག  སྐུ་ཞབས་ཧུ་ཡིས་“དམངས་ཕྱུག་བོད་དར་”དང་། “དཔལ་འབྱོར་འཛུགས་སྐྲུན་ཤུགས་ཆེན་བྱེད་པ།” “བོད་ཐོད་བརྒལ་གྱིས་གོང་འཕེལ་གཏོང་དགོས་པ་”སོགས་ནན་བཤད་མངོན་གསལ་དོད་པོ་གནང་ཡོད། དེ་ཚོ་ཚང་མ་ནི་དཔལ་འབྱོར་གོང་འཕེལ་བཏང་ན་གནད་དོན་ཐམས་ཅད་ཐག་གཅོད་ཐུབ་པའི་རྒྱ་དམར་གཞུང་ཁོ་ནའི་འདོད་པ་ཙམ་དུ་ཟད། བོད་མིའི་འཚོ་བ་ལེགས་སུ་གཏོང་བ་ནི་དོན་ཡག་པོ་ཞིག་ཡིན་པ་སྨོས་མི་དགོས་མོད། འོན་ཀྱང་དངོས་པོས་བོད་མིའི་སྙིང་སྟོབས་བསླུས་ནས་བོད་པ་རྣམས་ཀྱིས་དེང་སྐབས་བོད་ལ་ལག་ལེན་བསྟར་བའི་སྲིད་ཇུས་ཁས་ལེན་ཞུ་བའི་རེ་བ་འཆང་བ་ནི་དོན་དངོས་དང་མི་མཐུན་པ་ཞིག་རེད།

དཔལ་འབྱོར་གོང་དུ་སྤེལ་བ་ཁོ་ནས་བོད་དོན་ཐག་གཅོད་ཐུབ་ཀྱི་མེད་པ་དེ་དོན་ངོ་མས་སྔ་ས་ནས་ར་འཕྲོད་ཟིན་པ་རེད། བོད་དོན་གྱི་གནད་འགག་ཐུག་ས་ནི་བོད་མི་རིགས་འདི་འཚོ་གནས་ཇི་ལྟར་ཐུབ་པ་བྱ་རྒྱུ་དེ་རེད། གལ་ཏེ་སྔོན་མ་ལས་ལེགས་པ་དང་བོད་རིགས་ཀྱི་ཁྱད་ཆོས་དང་མཐུན་པའི་བོད་ཀྱི་སྲིད་ཇུས་ཤིག་མེད་ན། སྔོན་མའི་གནད་དོན་དེ་ཚོ་ཡང་བསྐྱར་ཐོན་གྱི་རེད།
རྒྱ་རིགས་ཁག་ཅིག་གིས་བོད་ཀྱི་དཔལ་འབྱོར་ལེགས་སུ་སོང་བ་དང་། བོད་མིར་ཁ་ལ་ཟས་དང་རྒྱབ་ལ་གོས། འདུག་སའི་ཁང་པ་ཡོད་ན། གནད་དོན་ཐག་གཅོད་ཐུབ་པར་ངོས་འཛིན་པ་དེ་ནི་ལྟ་བ་ནོར་འཁྲུལ་ཞིག་རེད། རྒྱ་ནག་གི་མི་སེར་གྱིས་དེང་གི་སྲིད་གཞུང་འདི་ལ་བཅོས་བསྒྱུར་བྱེད་མི་ཐུབ་དོན་གང་ལ་ཐུག་གམ་ཟེར་ན། དེ་ནི་མིག་མདུན་དང་སྐབས་འཕྲལ་གྱི་ཁེ་ཕན་ཁོ་ན་བསམས་པ་ལས་རྒྱང་རིང་དང་མི་རབས་དུ་མའི་མི་རིགས་རང་ངོས་ཀྱི་ཁེ་ཕན་ལ་ལྷོད་གཡེང་གཏོང་བ་དེས་ལན་པ་རེད། མུ་མཐུད་ནས་ལྟ་བ་འདི་འཛིན་པ་ཡིན་ན། དཔལ་འབྱོར་ཉམས་རྒུད་ཐེབས་པའི་དུས་སུ་སྤྱི་ཚོགས་ཧྲིལ་པོ་ཉམས་ཉེན་གྱི་གཡང་ལ་ལྷུང་རྒྱུ་རེད།

བོད་ཀྱི་ཆོས་ལུགས་དེ་རྒྱ་ནག་དམར་གཞུང་གི་དམ་དྲག་འོག་བོད་ཀྱི་ལོ་རྒྱུས་ཐོག་བྱུང་མྱོང་གཏན་ནས་མེད་པའི་བར་ཆད་མྱངས་བ་དང་མྱོང་བཞིན་པ་རེད། འོན་ཀྱང་༸གོང་ས་མཆོག་གི་ཐུགས་རྗེའི་དབང་གིས་བོད་མིའི་སེམས་པའི་ཕུགས་ན་ནང་ཆོས་ལ་དད་པ་མི་ཕྱེད་པ་སྔར་བཞིན་བརྟན་པོ་ཡོད།

སྐུ་ཞབས་ཧུ་ཡིས་ཀྱང་བོད་ཀྱི་སློབ་གསོ་དང་། སྤྱི་ཚོགས་ཕན་བདེ། སྣོད་བཅུད་ཁོར་ཡུག་སོགས་པའི་སྐོར་གླེང་འདུག འདི་དག་ཚང་མ་ཁ་བཤད་ཆུ་ཡི་ལྤུ་བའི་བརྟུལ་ཞུགས་མི་འཛིན་རྒྱུའི་རེ་བ་ཡོད། དོན་དམ་པར་སྲིད་ཇུས་ཤིག་ལག་ལེན་དུ་འཁྱོལ་བར་ལྟ་སྐུལ་གྱི་ཁོར་ཡུག་ངོ་མ་ཞིག་གྲོགས་སུ་བསྟེན་དགོས་ལ། ལས་བྱེད་པའི་བྱང་ཚད་བཟང་པོ་ཞིག་ཀྱང་དགོས་པ་ཡིན།

མི་རིགས་ཀྱི་འགལ་བ་གསར་པ་བཟོ་བ།

ད་རེས་ཀྱི་ཚོགས་འདུའི་ཐོག སྐུ་ཞབས་ཧུ་ཡིས་༸གོང་སའི་ཚོགས་པ་དང་འཐབ་རྩོད་བྱེད་པ་དེ་ཁྱོད་ཤི་ང་གསོན་གྱི་འཐབ་རྩོད་ཅིག་ཡིན་པར་གཏན་འཁེལ་བྱས་མེད་རུང་། “ བོད་ལ་མི་རིགས་ཁག་གི་མི་དམངས་དང་ཏྰ་ལའི་ཚོགས་པས་འཐུས་ཚབ་བྱས་པའི་ཁ་འཕྲལ་སྟོབས་ཤུགས་བར་གྱི་དམིགས་བསལ་གྱི་འགལ་བ་ཞིག་ད་དུང་ཡོད་”ཅེས་པའི་འཆད་ཚུལ་དེས་མི་རིགས་གཞན་པ་དང་བོད་མི་རིགས་ཕན་ཚུན་ཁ་གཏད་དུ་བསླངས་བ་རེད། བསམ་བློ་གཏོང་སྟངས་དེ་ཡིས་རྒྱ་དང་བོད་མི་རིགས་གཉིས་བར་དང་། ཐ་ན་མི་རིགས་ཡོད་དོ་ཅོག་ཚང་མར་ཕན་པ་མེད་པ་ཞིག་རེད།
༸གོང་ས་མཆོག་ནས་རྒྱ་ནག་གི་རྩ་ཁྲིམས་ཀྱི་གཏན་འབེབས་ལྟར། བོད་དུ་མི་རིགས་ས་ཁོངས་རང་སྐྱོང་གི་བཅའ་ཁྲིམས་མིང་དོན་མཚུངས་པའི་ངང་ནས་དོན་འཁྱོལ་བྱ་རྒྱུའི་ཐུགས་རེ་གནང་བ་ཡིན་པས། མི་རིགས་གཞན་དག་དང་འགལ་བ་གང་ཡང་མེད་པ་མ་ཚད། ད་དུང་མི་རིགས་ཁག་དང་མཉམ་དུ་འདྲ་མཉམ་དང་འཆམ་མཐུན་ངང་སྤྱི་ཚོགས་གོང་དུ་འཕེལ་བར་སྐུལ་འདེད་གཏོང་ཆོག་པ་རེད།

ཨེ་ཤ་ཡའི་འཕེལ་རྒྱས་ལོ་རྒྱུས་ལས། བོད་མི་རིགས་འདིར་ལོ་ངོ་སྟོང་ཕྲག་རིང་ཧི་མ་ལ་ཡའི་ལྷོ་རྒྱུད་ཀྱི་རྒྱ་གར་དང་། འབྲུག་ཡུལ། བལ་ཡུལ་ཁོངས་ཀྱི་མི་རིགས་སྣ་ཚོགས་པ་དང་མཛའ་མཐུན་མཉམ་གནས་ཀྱི་འབྱུང་བ་གླེང་རྒྱུ་ཡོད་ལ། བྱང་རྒྱུད་ཀྱི་སོག་པོ་དང་བྱང་ཤར་ཁུལ་གྱི་རྒྱ་ནག་ཁོངས་ཀྱི་མི་རིགས་སྣ་ཚོགས་དང་མཛའ་མཐུན་མཉམ་གནས་ཀྱི་ལོ་རྒྱུས་རིང་པོ་ཞིག་ཡོད་ཚུལ་ང་ཚོར་གསལ་པོར་བསྟན་ཡོད། སྐུ་ཞབས་ཧུ་ཡི་དོན་དངོས་ཀྱི་གཞི་འཛིན་ས་གང་ཡང་མེད་པའི་འཆད་ལུགས་འདི་རིགས་ནི། འཆར་གཞི་ཡོད་པ་དང་དམིགས་ཡུལ་ཡོད་པའི་སྒོ་ནས་བོད་མི་རིགས་དང་རྒྱ་རིགས་ཚུད་པའི་རྒྱ་ནག་གི་མི་རིགས་གཞན་ཁག་བར་འགལ་བ་བཟོས་ནས་བོད་རིགས་སྦྱར་སྡོང་རྐང་གཅིག་ཏུ་འཇོག་པ་དང་བོད་རིགས་རྩ་མེད་བཟོ་བའི་དམིགས་ཡུལ་སྒྲུབ་རྩིས་བྱེད་ཀྱི་ཡོད་པར་ང་རང་དོགས་པ་འདུག ཆབ་སྲིད་ཐད་ཀྱི་ཐབས་ངན་ཟད་རུལ་འདི་འདྲ་ནི་འཛམ་གླིང་ལོ་རྒྱུས་ཐོག་མཐོང་དཀོན་པོ་ཞིག་རེད་ཟེར་ན་ཆོག་པ་ཡིན།

༸གོང་ས་མཆོག་གི་རྒྱལ་སྤྱིའི་ཁོར་རྒྱ་ཆུང་དུ་གཏོང་བར་བརྩོན་པ།

བོད་དོན་ལས་གཡོལ་ཐབས་བྱེད་པ་ནི་སྔོན་ཆད་རྒྱ་དམར་གཞུང་གི་འགོ་ཁྲིད་ཀྱིས་རྒྱལ་སྤྱིའི་གསར་འགྱུར་ཚན་པ་གཙོ་གྲས་དེ་ཚོའི་མདུན་དུ་བསྟན་པའི་རྣམ་འགྱུར་ཞིག་རེད། འོན་ཀྱང་ཉེ་བའི་ལོ་ཤས་ནང་། རྒྱ་ནག་སྲིད་གཞུང་གིས་རྒྱལ་སྤྱིའི་ཐོག་ལ་རང་འགུལ་གྱིས་བོད་དྲིལ་བསྒྲགས་བྱེད་པ་མ་ཚད། ད་དུང་བདམས་ཀ་ཡོད་པའི་སྒོ་ནས་ཕྱི་རྒྱལ་གསར་ལམ་བོད་ཀྱི་དམིགས་འཛུགས་ས་ཆར་གདན་དྲངས་པ་དང་། ཁ་ལ་ཉན་ཆེ་བའི་བོད་རིགས་ལས་བྱེད་པ་（ཁོང་ཚོ་སོ་ལྟ་དམ་པོའི་འོག་ཡོད་པ་ང་ཚོས་གསལ་པོ་ཤེས་ཐུབ） ཕྱི་རྒྱལ་དུ་མངགས་པ་སོགས་དང་། ད་རེས་སྐུ་ཞབས་ཧུ་ཡིས་ཀྱང་བོད་དོན་བཞུགས་མོལ་ཚོགས་འདུ་ལྔ་པའི་ཐོག་ཏུ་ཡང་། “བོད་ཀྱི་ལས་དོན་ཡག་པོ་བསྒྲུབ་རྒྱུ་ནི་རྒྱལ་སྤྱིའི་ཁོར་ཡུག་ཡག་པོ་ཞིག་བསྐྲུན་པར་ཁ་ཚ་དགོས་གཏུག་ཡིན་”པ་ཁས་ལེན་བྱས་ཡོད།

གོང་སྨོས་དེ་དག་ཚང་མས་རྒྱ་དམར་གྱིས་བོད་དོན་གཡོལ་ཐབས་བྱེད་པ་ནས་བོད་དོན་འབུར་དུ་ཐོན་ཐབས་བྱེད་པའི་ཕྱོགས་སུ་ཐབས་ཇུས་བསྒྱུར་ཡོད། འོན་ཀྱང་འབུར་དུ་ཐོན་ཐབས་བྱེད་ཚུལ་དེ་ནི་དངོས་ཡོད་དང་དོན་ལ་གནས་པ་ཞིག་མ་ཡིན་པར། དེ་ལས་ལྡོག་ཏེ་བོད་ཀྱི་གསར་འགྱུར་རྟོག་བཟོ་དང་བོད་མིས་བོད་སྐྱོང་ཚུལ་རྟོག་བཟོ་བྱས་ནས། མངོན་འགྱུར་ཐུབ་མིན་ལ་མི་བལྟོས་པར་༸གོང་ས་མཆོག་གི་རྒྱལ་སྤྱིའི་ཁོར་རྒྱར་གཏོར་བཤིག་དང་ཉམས་དམས་སུ་གཏོང་བར་བརྩོན་པ་ཞིག་རེད།

མདོ་དབུས་ཁམས་གསུམ་གྱི་བོད་མི་རྡོག་གཅིག་ཏུ་ཁས་མ་ལེན་རང་ལེན་བྱུང་བ།

ད་རེས་ཀྱི་ཚོགས་འདུའི་ཐོག་གི་གནས་ཚུལ་ཅུང་གསར་པ་ཞིག་ནི། ཡོངས་གྲགས་བྱས་མེད་ཀྱང་བོད་ཧྲིལ་པོ་ཅན་དེ་ཁས་ལེན་བྱས་ཡོད་པ་རེད། སྔོན་མ་ཡིན་ན་“བོད་རང་སྐྱོང་ལྗོངས་”འཕེལ་རྒྱས་གཏོང་དགོས་ལུགས་ཁོ་ན་ནན་བཤད་བྱེད་མོད། ད་རེས་“སི་ཁྲོན་དང་། ཡུན་ནན། ཀན་སུ། མཚོ་སྔོན་བཅས་པའི་བོད་ཁུལ་གྱི་དཔལ་འབྱོར་དང་སྤྱི་ཚོགས་གོང་དུ་སྤེལ་བར་ཁྱོན་ཡོངས་ནས་བཀོད་བཤོམ་བྱ་དགོས་”སོགས་པ་བཏོན་ཡོད།

ངས་བལྟས་ན། དེ་ལ་རྒྱུ་རྐྱེན་གཉིས་ཡོད་པ་སྟེ།  གཅིག་ནི་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་ཕྱིར། ༸གོང་ས་མཆོག་ནས་ཐོག་མཐའ་བར་གསུམ་དུ་བོད་མི་རིགས་ཧྲིལ་པོ་ཅན་དེ་ནན་གྱིས་གསུངས་བས་ཡིན། གཉིས་ནི་2008ལོའི་ཟླ་3པར་མདོ་དབུས་ཁམས་གསུམ་གྱི་བོད་མི་ཡོངས་ཀྱིས་རང་གི་ཟུངས་ཁྲག་དྲོན་མོས་བོད་ཀྱི་ས་ཁྲ་བསྟན་པ་ཡིས་ཀྱང་༸གོང་ས་མཆོག་གིས་གསུངས་གནང་བའི་བོད་ཡོངས་རང་སྐྱོང་ཡོང་བ་ནི་ལོ་རྒྱུས་དང་དོན་དངོས་གཉིས་ཀ་དང་ཡོངས་སུ་མཐུན་ལ། ལུགས་དང་ཡང་མཐུན་པ་ཞིག་ཡིན་པ་ར་འཕྲོད་བྱུང་བས་རེད།

མདོར་ན། ཕྱིན་ཆད་བོད་ལ་དཔལ་འབྱོར་ཐད་ཕལ་ཆེར་འཇམ་ཙམ་བྱེད་སྲིད་མོད། འོན་ཀྱང་ཆབ་སྲིད་ཐད་སྔར་ལས་དམ་དྲག་ཆེ་བ་ཡོང་ས་རེད། ཕྱོགས་གཅིག་ནས་དཔལ་འབྱོར་གོང་འཕེལ་བཏང་བ་ལ་བརྟེན་ནས་བོད་མིར་ད་ལྟ་ལག་ལེན་བསྟར་བའི་སྲིད་ཇུས་བཙན་གྱིས་ཁས་ལེན་ཞུ་འཇུག་པ་དང་། ཕྱོགས་གཞན་ཞིག་ནས་ཕྱི་ལ་དྲིལ་བསྒྲགས་ཆེན་པོ་བྱེད་པ་དང་དུས་མཚུངས་ནང་ལ་དམ་དྲག་བཀམ་སྡོམ་བྱ་རྩིས་ཡོད་པ་རེད། མ་ཟད་མུ་མཐུད་ནས་༸གོང་ས་མཆོག་སྐུ་ཞིང་ལ་ཕེབས་པ་ངང་སྒུག་གིས་དུས་ཚོད་ནར་འགྱངས་བྱས་ནས་འགྱུར་བ་ཞིག་ཡོང་བའི་སྲིད་ཇུས་བསྟར་རྩིས་འདུག སླད་ཕྱིན་བོད་དུ་མིང་དོན་མཚུངས་པའི་རང་སྐྱོང་མངོན་འགྱུར་ཐུབ་རྒྱུ་དཀའ་ཁག་ཧ་ཅང་ཆེན་པོ་ཡིན་ཞིང་། བོད་མིའི་འཚོ་གནས་ཁོར་ཡུག་ལ་ད་དུང་གཏོར་བརླག་སྔར་ལས་ལྷག་པ་གཏོང་རྒྱུ་ཡིན་པ་བཤད་མི་དགོས་པ་ཞིག་རེད་ལ། མཐོ་གནོན་སྲིད་ཇུས་ལ་འགོག་རྒོལ་དང་༸གོང་ས་མཆོག་ཕ་ཡུལ་དུ་ཕེབས་པའི་རེ་འབོད་ནི་ཆེ་ནས་ཆེ་རུ་འགྲོ་རྒྱུ་ངེས་གཏན་རེད།